####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00021
Uniform title: īśvarapratyabhijñāvivṛtivimarśinī Volume 2
Author : abhinavagupta
Editor : śāstrī m. k.

Description: 
Text taken from Vol. 62 of the Kashmir Series of Texts and Studies, The īśvarapratyabhijñā vivṛtivimarśinī by Abhinavagupta Vol. 2     Volume 2 of 3 volume set.


Notes: 
Data-entered by the staff of Muktabodha under the supervision of Mark Dyczkowski.    Revision 0: 19/11/2005  

Publisher : Research Department Jammu and Kashmir State
Publication year : 1941
Publication city : Bombay
Publication country : India
####################################################

atha
īśvarapratyabhijñāvivṛtivimarśinī |


śrīmanmahāmāheśvarācāryavayarśrīmada-
bhinavaguptapādaracitā |

atha caturtho vimarśaḥ |

īśvaramaśeṣatāpapraśamanamamṛtadravaṃ sadā vande |
apratighātisvecchāvikāsaviśrāntamamṛtakaramaulim ||

	evaṃ jñānam, tataḥ smṛtiḥ, taddvayāntaḥprāṇikā apohanaśaktiriti 
yadyapi kramaḥ; tathāpi

	athānubhavavidhvaṃse smṛti ..................| (1|2|3)

iti pūrvapakṣe

	satyaṃ kintu smṛtijñānaṃ ................. | (1|3|1)

iti siddhānte smṛtireva pūrvaprakrāntā na cet iti sūtritena prasaṅgena 
sūcitāt prasaṅgaviparyayādātmeśvarasiddhau sātiśayamabhijñānam | 
ata eva gītāsu sā eva prathamamupāttā | tadasyāḥ svadarśane 
upapattirabhidhīyate 

	sa hi pūrvānubhūtārthopalabdhā .................... |

ityādinā

	.......................... arthau bhātaḥ pramātari ||

ityantena ślokāṣṭakena | anyathāhi kaścit brūyāt- māstu paradarśane 
smṛtirupapāditā, bhavaddarśane'pitu kathaṃ sā upapadyate iti | tatra ekena 
tadupapattiruktā | ekena smṛteranubhūtārthaprakāśanasāmarthyamuktam |

(page 2)

anyena anubhavatadviṣayābhyāmekatāparyanta āveśaḥ | turyeṇa 
smṛtāvanubhavo viṣayatayā pṛthak na bhātīti | yogijñānenāpi 
parānubhavo na pṛthaktayā viṣayavat prakāśyate iti bruvatā pañcamena 
tadartha eva draḍhitaḥ | anyena smṛtyā jñānasya pṛthagviṣayīkaraṇaṃ 
śaṅkyamānaṃ kālpanikaṃ, na vāstavamiti uktam | smṛtiprasaṅgena 
vikalpasya api anubhavena tādātmyaṃ saptamena uktam | antyena 
smartavyasmṛtismartṝṇāṃ prasaṅgataśca dṛśyadarśanadraṣṭṝṇāṃ 
pāramārthikaikasaṃvittattvaviśrāntirdarśiteti tātparyam | tatra 
prathamamupoddhātaḥ samastaśāstrārthapīṭhabandha ityabhiprāyeṇa āha 
avataraṇikāyām idānīṃ jñānaprakaraṇena iti | jñānaṃ 
smṛtyādirūpaṃ svadarśane ghaṭate ityevaṃ vicāryatvena 
prakriyate'dhikriyate'smin, tena | nirūpayiṣyan iti kriyāyāṃ 
kriyārthāyāmupapade bhaviṣyati ḷṭ | tena ayamarthaḥ- smṛtyādīnāṃ 
sarveṣāṃ svarūpaṃ nirūpayiṣyāmīti hṛdaye gṛhītvā smṛtereva iti 
yasyāḥ pūrvopakrāntatā tasyā eva īśvaraśaktirūpatāṃ 
pratipādayitumicchan paradarśane sarvathaiva aghaṭamānatvamabhidadhat 
prathamaṃ pūrvaṃ saṃbhavamāha anena ślokena granthakṛt 
granthakṛdabhinna eva vā tadvimarśaparispandasvabhāvaḥ ślokaḥ | 
tāvadgrahaṇaṃ jñānāpohanāderapi anantaraṃ nirūpayiṣyate 
svarūpamiti kramaṃ dyotayati | nanu kuto'yamevaṃbhūtaḥ kramaḥ | āha 
suspaṣṭaṃ kṛtvā īśvarasvabhāvasya ātmanaḥ siddhau hetutā 
smṛteryato'sti, tato'yaṃ kramaḥ | kathaṃ suspaṣṭateti | āha 
aśeṣakālānugata iti pūrvānubhavakālaḥ smaraṇakālaśca yāvat bodhena 
na vyāptaḥ, tāvat kathaṃ smaraṇam, tau ca na niyatāviti 
aśeṣakālānugamastaddvāreṇa āyātaḥ iti nityaprakāśasvabhāvo yo 
bodhaḥ, tadātmatattvamiti labdham | evamapica yadi tadavinirbhāgena 
anubhūtavastusaṃbhavo 

(page 3)

na bhavet, kathaṃ smaraṇamiti sarvākāratālakṣaṇaṃ svātantryamuktam | 
yadāha bhaṭṭadivākaraḥ 

	sarve'nubhūtā yadi nāntararthāstvadātmasātkārasurakṣitāḥ syuḥ|
	vijñātavastvapratimoṣarūpā kācitsmṛtirnāma na saṃbhavettat ||

iti | naca iyadeva, yāvat viśvākāratāyāmapi prakāśarūpatvāparihāṇiḥ | 
kasyacideva bhāvabhāgasya unmajjanā, anyeṣāṃ nimajjaneti bahuśākhe 
vaicitrye yadasya nityabodhasvabhāvasya ātmanaḥ 
svātantryametadaiśvaryamanantaśākhamiti yāvat sādhayitavyaṃ, tat 
smṛtiśaktyā siddhyatīti yuktaṃ spaṣṭatvam |

	sa hi pūrvānubhūtārthopalabdhā parato'pi san |
	vimṛśansa iti svairī smaratītyapadiśyate || 1 ||

	atra ca pūrvānubhūta iti sūtrārdhamaśeṣakālānugataśabdena 
saṃkṣepārthanirūpaṇena avatāritaṃ svatantrāvabodha ityādinā | sa 
maheśvaraḥ pratyagātmatāṃ svātmani bhāsayamāno yadvivṛtirbhaviṣyati 
cinmayasya īśvarasyaivahi iti | atra pratyagātmatādaśāyāṃ tathā 
anekakālatopacāropacaryamāṇaḥ parato'pi 
pūrvānubhavakālādanyasminnapi smaraṇavartamānakāle 
saṃskāraprabodhadhāmani pūrvānubhūtārthopalabdhaiva yato bhavati- 
natu tadasya pūrvārthopalabdhṛtvaṃ vicchidyate- tato bhavanāt hetostathaiva 
pūrvāparobhayakālāvalambanaucityādāgatena sa ityanena vimarśanena 
tamarthaṃ vimṛśati | anantabhāvānubhavitṛtve'pi tameva kasmāditi na 
vācyam, yataḥ sa svairī svatantraḥ | sadṛśādṛṣṭapraṇidhānādyapi hi 
tasyaiva svātantryāt niyativijṛmbhā | sa-ityasya vimarśasya pūrvāparau 
kālau parasparagalitāvapi cidrūpe ca animagnāvapi santau parasparaṃ 
cidrūpe ca nimagnau taṃ ca arthaṃ 

(page 4)

cidrūpe sphurantamapi adhikamiva abāhyamapi bāhyamiva parāmṛśataḥ | 
parameśvarasvātantryameva jīvitamityapi svairipadam | smaraṇaśaktireva hi 
paramaṃ svātantryam | yadāha divākaravatsaḥ dhyānādibhāvaṃ 
smṛtireva labdhvā cintāmaṇistvadvibhavaṃ vyanakti | iti | hiḥ iti sakalaṃ 
smaraṇaprakaraṇaṃ hetutayā dyotayati | yasmāt sa svairī maheśvaraḥ 
evaṃbhūtaḥ sannucyamānavakṣyamāṇanyāyāt smarati 
ityetadvyavahārabhājanamiti anvayo'yamupapannaḥ, tasmāt na cet iti 
pūrvasūtroktaḥ prasaṅgarūpatvena vyatireko yuktaḥ | anyathā 
ātmābhāvaprayukto'yaṃ teṣāṃ smṛtyādīnāmabhāva iti kathaṃ bhavet 
| nahi bhavati ghaṭābhāvādaṅkurābhāva iti | tasmāt yuktaḥ 
prasaṅgarūpatayā ayaṃ vyatirekaḥ iti | hiśabdena samastasya 
etatprakaraṇārthasya hetutāṃ dyotayan pūrvaprakaraṇena saha etat 
prakaraṇaṃ saṃgamitaṃ karoti,- iti sūtrārthaḥ | tasya ekasya 
pūrvānubhūtatvena yaḥ pratyavarśaḥ sa iti ubhayakālasaṃsparśī atra 
iti prāṇapuryaṣṭakadehādau saṃkucitasya 
pūrvānubhūtārthāsaṃpramoṣarūpā smṛtirnāma vyāpāraḥ iti 
saṃbandhaḥ | ekatvāt hi sa ubhayakālaspṛk | kartṛtaiva ca vibhutā 
svairitvamiti vṛttiyojanā | nanu bodhātmano nityasya kālayogo nāsti, 
tatkṛtaśca ayaṃ vyavahāraḥ parato'pi astīti tadākṣiptaśca pūrvamapi 
astīti tau kathaṃ bodhātmani syātāṃ, yena parato'pi san iti sūtraṃ 
taddhṛtiśca paścādapi iti | atha ucyate pūrvānubhūtārthopalabdhā 
ityetadviśeṣaṇake parato'stīti vyavahāro viśeṣye'nupapadyamāno 
viśeṣaṇāṃśamāśliṣyati yathā satatavāhitvenāna.... tadhāmanyapi 
bhūmaṇḍale vyapadiśyate mahadāścaryaṃ satatamapi idaṃ pravahat 
kṛtayugocitaśāstravyavahāraṃ bhūmaṇḍalaṃ tiṣṭhatīti | bhavedevam, 
yadi upalabdhṛtārūpamapi 

(page 5)

viśeṣaṇaṃ kālavyavahāraṃ saheta | naca sahate bodhāvyatirekādeva | 
etadāśaṅkamānaḥ pariharati sautraṃ ca arthapadaṃ vivṛṇoti | apiśabdaḥ 
pūrvapakṣatāṃ saptamyā anūdyamānasya sūcayati | anūdyamāne ca 
hetutayā anūditamapi ātmano nityatvamarthāt pūrvapakṣopayogitvena 
ākṣiptaṃ mantavyam | anyathā bodhaikarūpasya api arthānubhavasya ceti 
nipātadvayena ubhayaniṣṭhaṃ pūrvapakṣāt vyavahāraṃ kathaṃ 
siddhānte samarthayeta | nyāyyaṃ ca etat pramātaryapi kālavyavahārasya 
loke'valokitasya avaśyasamarthyatvāt | tena 
nipātadvayamasaṃbhāvanādyotakaṃ vyākhyāya arthānubhava eva 
kālavyavahārasamarthanamidamiti na bhramitavyam | tena iti bodhena | te iti 
anubhūyamānāḥ | tathā iti svarūpādavibhaktā api 
bodhasvātantryaprakāreṇa nirmitavibhaktatāmiva āpāditāḥ, ata eva 
vicitraṃ kṛtvā bhinnā bodhācca anyonyaṃ ca, tata eva deśakālaviśeṣaṇā 
ye arthāḥ, taiḥ prakāśamānairyaḥ uparāgaḥ, tena hetunā 
ahamityantarmukhatayā iva nīlaboddhā ahamityevaṃ bahirmukhatā api 
avabhāsate | anubhavaśca tadīya eva bahirmukhaḥ svabhāvo nīlabodha iti | 
tatra bodhasvātantryāt nīlaṃ paśyeyaṃ tāvaditi antaḥkalpanāpūrvakaṃ 
bāhyanīlāvabhāsanam | tatpūrvaṃ ca antaḥkalpanamiti bījāṅkuravadetat | 
tataśca arthoparāgādarthagatau deśakālau pramātāraṃ ca anubhavaṃ ca 
āviśantau lakṣyete  | tatra ahaṃ nīlaṃ tadā apaśyamiti hi tritayamapi 
tadāviṣṭaṃ bhāti | ata eva iti śaṅkitaṃ pūrvapakṣamarthaśabdopādāne 
hetutvena upajīvati | nanu arthasya tau bhavantau tatsākṣibhūtaṃ 
saṃvedanamāśliṣyataḥ iti kā bhāṣā | āha arthaviṣaya iti apica asya 
anantaraṃ yadyapi upalabdhṛtāyā artho viṣayaḥ, tathāpi sā viṣayataiva 
prakāśamānatākhyā 

(page 6)

svayamasatī prakāśamananupraviśataḥ kathamiti prakāśo'nayā 
svīkartavyaḥ, naca tanmukhaprekṣitayā śuddhavidyocitena vapuṣā yena 
deśakālocitaṃ śambaramujjhantī satī bhāseta, kintu veśyayā iva 
māyāprabhāveṇa svamukhaprekṣiṇaṃ taṃ kurvatyā yena 
taddeśakālavyājaṃ so'pi na na aṅgīkuryāditi darśayati arthākāra iti 
natu anubhavitṛrūpatā arthasya śaṅkyeti yāvat | tṛcāpi iti pratiṣiddho'pi 
samāso'tra vaktavyavastuśraddhayā kṛtaḥ | samāse hi vṛttipadārtho 
vṛttyarthe pāṃsuriva udake miśrībhavan tatkāluṣyarūṣaṇāṃ tatra 
avabhāsayati | naca atyantamalākṣaṇiko'yaṃ śabdaḥ, yena 
apaśabdatvādavācakatve kāpuṣkalatvakathā vaktavyasya | tadāha 
jñāpakāt iti sūtrāpekṣāt tatprayojako jātivācakatvāt ityādeḥ | kvacit 
iti śiṣṭaprayukte | sārvatrika iti jñāpake tṛjakābhyām iti (2|2|15) 
niṣedho'navakāśaḥ syāt | nanu śiṣṭaprayukto'yamiti kuto niścayaḥ,- 
ityāśaṅkya āha tṛnnantena vā iti tācchīlyādinā hi 
māyāpadamavadyotitataraṃ syāt | bhartrīśvarācāryastu vacanavārtike 
śeṣaṣaṣṭhīsamāsasya na niṣedhaḥ iti nyarūpayat | arthoparāgatve 
kālavyavahāra ityetat viparyāsayitumākṣipati nanu iti

	kramo bhedāśrayo bhedo'pyābhāsasadasattvataḥ | (2|1|4)

iti vakṣyate | tatra ca ayamarthaḥ- tiṣṭhati sthāsyati tasthau ghaṭa ityatra 
kālavyavahāre ābhāsanasya avicchedaḥ ityayaṃ hetuḥ 
saṃbhāvanāvicchede | ābhāsanaṃ ca anubhavaḥ | tadanubhavo dvāramatra 
| sa eva yāvat na kālena spṛṣṭaḥ, tāvat kriyāntaranibandhano'pi 
kālavyavahāro na bhavati | iha tu anubhavakriyāyāṃ sākṣādeva 
asāvupakrāntaḥ- anubhūtaḥ pūrvamartha iti | tadanubhavasyaiva 

(page 7)

mukhyaḥ kālasparśo vaktavyaḥ, tanmukhena ca viṣayasya, natu viparyayo 
yuktaḥ | sādhyasvabhāve kriyātmani tiṅantavācye viśrāntaḥ kālo 
nirbhāsate, tadetadaṅgīkārapūrvakaṃ samarthayate satyam iti | nanu yadi 
satyametadasmaduktaṃ, kathaṃ tarhi tvayā uktam- arthoparāgakṛtau 
saṃvedane deśakālau- ityāśaṅkya āha kintu iti | na etāvadetat, anyo'pi 
asti viśeṣaḥ, sa praśnayogyaḥ | taṃ darśayati anādinidhanasya iti | yadyapi 
anubhava eva kālaprathāyā bījam, tathāpi na asāvantarmukhena 
saṃvidekarūpeṇa vapuṣā tathāsarūpatāyāstatra abhāvāt | bahirmukhaṃ 
ca asya rūpameṣaṇīya- jñeya- kāryarūpamarthameva pradhānīkṛtya 
bhavatīti tātparyam | padārthastu- cidrūpasya prakāśamātraikarūpasya 
ādyantavyavahāro na upapadyate prakāśābhāve tasya asiddheḥ, tatsiddhau 
vā prakāśābhāvāyogāt | yathoktaṃ

	natu yo'ntarmukho bhāvaḥ sarvajñatvaguṇāspadam |
tasya lopaḥ kadācitsyādanyasyānupalambhanāt || (sp. kā. 16)

iti | tasya hi lope sati akartṛka eva upalambho na saṃbhavati iti sa lopa eva 
kathaṃ vyavahāryaḥ, anyena cittattvena vyavahariṣyate iti cet, cidrūpatve 
kathamanyat tat bhavet | anyatve vā tasya aprakāśatvāt 
tatkartṛkamupalambhanaṃ kutaḥ | tadetadāha ekagrahaṇena | nanu ahaṃ 
pūrvaṃ na abhūvamiti asti dhīḥ, satyam | tataścittattvādanyasya 
dehāderanupalabhyamānatvaṃ cittattvasya kathamādinidhane vyavasthāpayet 
| naca cidrūpaṃ sāṃkhyadarśane iva udāsīnaprāyaṃ yuktaṃ 
paricchinnaprakāśatvena nīlādivadacidrūpatāprasaṅgāt | yathoktaṃ 
mayaiva-

	paricchinnaprakāśatvaṃ jaḍasya kila lakṣaṇam |
	jaḍādvilakṣaṇo bodho yato na parimīyate || (bo. pṃ. 8)

(page 8)

iti | aparicchinnaprakāśatvaṃ ca prakāśane svātantryamahamiti 
mahatsaṃrambhātmā pratighātaśūnyo vimarśaḥ, tadevaca asya 
sarvaśaktitvam | sarvaśaktitvādeva antarvyavasthitamapi cinmātrarūpaṃ 
bhāvajātaṃ svaśaktiprapañcamayaṃ 
svarūpasaṃkocanāvabhāsanapuraḥsaraṃ svataśca anyonyataśca 
vibhaktamiva nirbhāsatāmiti amunā api rūpeṇa prakāśamānaḥ 
svātantryāpratighātāt bhāvabhedanirmāteti ucyate | tadasya nirmātṛtvaṃ 
māyā nāma śaktiḥ | tasyāḥ padaṃ viṣayo nirmeyalakṣaṇaḥ 
pramātṛprameyarāśirūpaḥ saṃsāraḥ | tatra iti māyāviṣaye bhagavataḥ 
saṃbandhinyāḥ kartṛśakteḥ kālakramāvabhāsanaṃ nāma vyāpāraḥ, 
natu śuddhasaṃvinmātratve tadavabhāsanam | tathāhi yaḥ kālakramo 
vyavahārasiddhaḥ- idaṃ bhātaṃ, na bhāti bhātyekarasaṃ, bhāsiṣyate- 
ityādirbhūtādirūpo bhāvānāmanyonyāsahabhāvena 
upalabhyamānatvaṃ, tattvasya yadavabhāsanam; yat saṃvida itthaṃ 
vimarśanamapratihataṃ, yadahamamunā api rūpeṇa itthaṃ 
prakāśeyetyevaṃrūpaśca vyāpāraḥ kartavyaṃ yasyāḥ 
parameśvarasvātantryaśakteḥ, sā kālotthāpakatvāt bhagavataḥ 
kālaśaktiriti ucyate 

	avyāhatakalāṃ yasya kālaśaktimupāśritaḥ |

ityādau | tataḥ sopānapadapaṅktyā saiva svātantryaśaktiravarohantī etena 
asahaprathanena pramātṛprameyarāśinā ahaṃ prakāśe ityevaṃrūpatāṃ 
prāptā artharāśau karmaṇi kṛtapadabandhā avabhāsayati 
smaratītyevaṃprāyeṇa kriyātmanā prathate | saca kriyātmā prādhānyena 
pratibhāsamānaḥ kālaśaktirūpeṇa prācyena vapuṣā anuviddha eva bhāti 
uttararūpasphuṭasphuraṇe'pi pūrvasya rūpasya jīvakalpasya avaśyaṃ 
sphuraṇāt | kevalamapradhānatayā tasya prathanamiti 
viśeṣaṇatvamupasarjanatvāt | tena kālākhyayā śaktyā yaḥ samutthāpitaḥ 
prathāyāmasahabhāvo 

(page 9)

nāma kramaḥ, tena vicitrīkṛtā bhūtādikālānuviddhā 
avabhāsanālakṣaṇā kriyā | nanu avabhāsanaṃ sṛṣṭirnirmāṇakriyā 
kartṛśaktiśca kathaṃ sṛṣṭikramā kriyā syāt | naitadāśaṅkanīyaṃ 
yasmāt kartṛśaktireva avabhāsanā | svātantryādeva hi bhagavato bhāsante 
bhāvāḥ | sāca māyāpramātṛsaṃvedanopadeśanādiṣu 
avaśyaṃbhāvinā krameṇa nirūpyamāṇā kriyeti ucyate | evaṃ hi 
tatsvātantryaṃ nirūpyate- bhagavān ahamiti antārūpāt 
saṃvedakātmanaḥ icchāśaktāveṣaṇīyatvena sthitān bhāvanayā hi 
sphuṭatayā parāmṛśyatvena śrīmatsadāśivabhuvi yattacchabdavācyān 
padārthān bahīrūpatayā prakāśapṛthaktvena idamiti avabhāsayitumicchati 
| naca sā asya icchā pratihanyate, apitu tathā prakāśayati | 
evamantarbahīrūpatvena asahabhāvaprakāśanāt kramikā avabhāsanā 
yataḥ, tena nirūpaṇāvasare sā kriyeti ucyate | kumbhakṛtāpica etadeva 
kumbhakaraṇaṃ- yadabhinavatvena avabhāsanam | tadapica kartṛśaktereva 
icchopakramatvena apratihatabahiravabhāsanāvasānatvena 
kramikatāprathanam | tadāha nānyat iti | vakṣyate iti 

	itthaṃ tathā ghaṭapaṭādyābhāsajagadātmanā |
	tiṣṭhāsorevamicchaiva hetutā kartṛtā kriyā || (2|4|21)

iti | kumbhakārāderapica etadeva karaṇam- yat parameśvarasya 
saṃvidrūpasya tathā avasthānaṃ, na anyat kumbhakārasaṃvido'pi 
bhagavato'nanyatvāt | na kevalamanubhavanirmāṇalakṣaṇamanavaratayā 
paramārthāhantārasapratyayamayyā idantayā bhāsanaṃ 
parameśvarasaṃvedanaśaktyā, yāvat smaraṇarūpamapīti 
prakṛtamanusarati smṛtikriyāpi iti asyaiva iti sarvaśakticittattvameva | 
asyāmapi kartṛ kriyātvaṃ ca kramikatayeti tāṃ darśayati antaḥsthita

(page 10)

iti tamaḥpaṭalena avacchādita iva | antariti pratyagātmarūpe 
dehaprāṇapuryaṣṭakaśūnyāvacchedini saṃvittattve yaḥ sthitaḥ 
pūrvānubhūtaḥ prāktanaprakāśaparāmarśarūpayā idantayā 
upalakṣito'rthastasya yo vimarśastamo'pasāraṇena sphuṭīkaraṇaṃ, tatra 
yā icchā; saiva upakramaḥ prārambho yasyā bahiriti, tata eva 
saṃkucitasaṃvidrūpāt vedakāt pṛthagbhāvena sphuṭavedyatvena 
yo'dhunā vimarśaḥ, sa yataḥ prākkālabhāvinā vimarśena 
prakhyānubhavasvabhāvaprakāśajīvitena militaḥ, tataḥ sa-ityevaṃrūpeṇa 
śabdena āviṣṭaḥ ubhayakālasparśitāyāmapi 
pūrvakālasparśapradhānaḥ prakāśate, natu na prakāśate 
ityevaṃsvabhāvaḥ, so'vasānaṃ paryanto yasyāḥ, sā smṛtikriyā api 
bhagavatkartṛkaiveti pratyagātmāpekṣayā atra antarbahirbhāvo mantavyaḥ, 
natu īśvarasadāśivaśivāpekṣayā | tatra yā ahantāprādhānyena viśvasya 
sphuraṇe tadvahirbhāvāvabhāse smṛtirniyataviṣayā, sā kathaṃ bhavet | 
nirmāṇaṃ ca tat syāt, na smaraṇam | pūrvānubhūtasya arthasya yaḥ 
prācya eva prakāśaḥ, tadarthaviṣayā bodhasya bahirmukhatā, tasya 
pramuṣitasya api tamasā avacchāditasya iva samyak nirmūlatvena 
apramoṣaṇaṃ nātyantamapahāraṇam | nanu asaṃpramoṣa iti 
tatrabhavadanantabhaṭṭārakādiprayuktaṃ ghañaṃ tyaktvā lyuṭi ka ādaraḥ 
| āha- kartṛvyāpāratā iti | ata eva hi napuṃsakatvamasya 
siddhatādharmayoge'pi sādhyarūpānapahastanena 
madhyamapadaviśrānteḥ kriyāviśeṣaṇapadavat | nanu yastasya siddhatā iti 
sāmānyoktau kuto'yamasya viśeṣaḥ | rūḍheḥ iti | kartaryapi hi 
tṛjādivadākhyātaṃ vidhīyamānaṃ sādhyamānatāṃśaṃ 
pradhānīkaroti śaktivaicitryāt | tathāhi avyayakṛtāṃ 
sādhyāṃśaprādhānyāt tadyoge kṛtvor'thaprayoga ityādi nirṇītaṃ 
paramaguruṇā patañjalinā |

(page 11)

tathā ca kṛdabhihitaḥ ityatra dravyavat kriyāvat cetyetat 
bahutaraguṇavimardavaicitryavat vibhajanīyam,- iti alamavāntareṇa | nanu 
smarāmyahaṃ kṛśo bubhukṣito duḥkhī kaśmīropabhogasubhagaṃ 
sthūlaṃ śarīraṃ dadhyodanasya tṛptiṃ nirātaṅkatāsukhaṃ ceti 
śarīrādereva smartṛtvaṃ bhāti, tat kathaṃ sūtravṛttyorbhagavataḥ 
smartṛtvamuktam, tadanusāreṇa ṭīkāyāmapi | āha cinmayasyaiva hi iti | 
hiśabdo'sya arthasya hetutāmācakṣāṇaḥ sādhyatvaṃ pūrvoktasya 
darśayan pūrvapakṣāśaṅkāṃ dyotayati | pūrvoktaśca arthaḥ 
smṛtikriyāpi ityādiḥ avasānā ityantaḥ, śiṣṭaṃ tu vṛttivyākhyānam | 
cinmayasya iti śarīrādāvapi vedyāṃśe jaḍe śvātantryarahite kā 
smartṛtā, cidaṃśastu na bhagavato bhidyate iti evakāraḥ | nanu cidrūpaṃ 
sarvataḥprakāśarūpaṃ sarvārthakroḍīkāri, tatrāpi kathaṃ smaraṇam, 
anubhūtamavacchāditaṃ prabuddhamiti hi arthatattvasya 
prakāśanaikasāratāyāṃ kathaṃ bhavet | ucyate samāropitasvātantrye iti 
śarīrasya avasthāpariṇāmapākajotpattyādinā atyantabhedāt na 
smartṛtvena upādānam | śūnyasya api vyavahārātītasya smartṛtā na 
bhāti, pramātṛtvena hi na ado'bhimanyate loke | prāṇapuryaṣṭakayostu 
asaṃcetyabhedatvādanuyāyitve smartṛtvamucitam, tatsaṃbandhāt tu 
śarīrāderapi tathā smartṛtvena astu avabhāsaḥ, samāropitaṃ svātantryaṃ 
yatra puryaṣṭakādau, tatra sati tadrūpatāmātmani 
svīkurvannanubhavasmaraṇavikalpanāni jñānasmṛtyapohanaśabdavācyāni 
saṃpādayati,- iti saptamīprayogeṇa atra iti vṛttipadaṃ vyākhyātam | 
prathamapāṭhastu anārṣatvādupekṣyaḥ | nanu mā bhūt dehādeḥ 
smartṛtvam, anubhavaḥ saṃskāraḥ smṛtiriti tu jñānamālaiva 
upādānopādeyabhāvena bhaviṣyatīti āha natu iti vastūnām iti 
svalakṣaṇarūpatvena 

(page 12)

anyonyarūpaviṣayasaṃsparśaśūnyānāmityarthaḥ | yena iti 
kāryakāraṇabhāvena hi viṣayasya bhedaḥ pūrvaṃ coditaḥ

	dṛksvābhāsaiva ............................. | (1|3|2)

iti | tadiha codyaṃ na avatarati | ata eva iti etameva 
viṣayabhedacodanāvakāśābhāvaṃ hṛdaye abhisandhāyetyarthaḥ | 
svenaiva īraṇaṃ yasya, svasyaiva īraṇaṃ yena, svameva īraṇamasyeti 
vyatiriktāpekṣānirāsaḥ | māyāpramātā hi yadi smaret, sa mūrcchitamapi 
jātu kathaṃ na smaret, anyadapi ca kathaṃ smaret | praṇidhānecchādyapi ca 
nirviṣayamasya upapannam, mandatādṛktvavedanamapica tasya asmāryasya 
avedane'saṃvedyam | asaṃvedane ca sarvaṃ sarveṇa tādṛgiti niyamāyogaḥ 
| evaṃ nibandhavirodhādisaṃbandheṣu api viṣayālābhe tadasaṃvedanaṃ 
vācyam, smaraṇādeva viṣayalābhe anyonyāśrayam | adṛṣṭasya 
niyāmakatve praṇidhānādyanupayogaḥ | dṛṣṭakāraṇamadhya eva 
adṛṣṭaṃ, na śuddhamiti cet, astu tāvadevaṃ tathāpitu bhedavāde'pi 
adṛṣṭasya jaḍasya adhiṣṭhāpakaṃ cittattvarūpamīśvaramaṅgīkṛtameva | 
yat ghoṣyate 

	ajño janturanīśo'yamātmanaḥ sukhaduḥkhayoḥ |
	īśvaraprerito gacchetsvargaṃ vā śvabhramevavā ||

iti | naca cittattvasya deśakālarūpabheda iti sa paramātmaiva smṛteḥ 
kāraṇam | tanniyatiprabhāvapradarśitastu dṛṣṭādṛṣṭakāraṇaḥ 
pratibhāsaḥ, ata eva tasya aniyatatvamapi upapannam | susmūrṣāvasare ca 
jānātyeva ayaṃ śarīrādyasaṃkucitacittattvāntaḥpraveśam, yena 
ayamindriyārthadeśāt parāṅmukhībhavan guhāntarniveśamiva ātmano 
manyate | tadguhāpraviṣṭastu paramātmarūpa eva bhūtvā 
svatantrasturyātītapadaniviṣṭasvātantryaśaktimulāsayan 
turyapadamadhiśete | tataḥ samavacchāditārthaprakāśarūpāṃ 
suṣuptātmikāṃ bījabhuvamadhyāste | tato 
bījādarthaprakāśanamasādhāraṇaṃ

(page 13)

sattārūpameva | bahīrūpatāṃ tatraiva prāṇavṛttyādau 
tatprāṇabuddhyādisaṃvidapekṣayā asya nirbhāsayat svapnabhuvi vimṛśati 
yat, tadetat smarati iti ucyate | nanu bījabhuvi na sa eva arthaḥ sthitaḥ, tat 
kathaṃ niyatasya smaret | ucyate | tatrāpi hi susmūrṣārūpaṃ 
svātantryamicchāśaktilakṣaṇameva prapatati |

	.................................. praṇayasyānatikramāt |
	yathecchābhyarthitaḥ ..................................... || (sp. kā. 33)

iti uktam | tathā icchā api tasyaiva svātantryamiti | tadetaduktaṃ 
bhaṭṭadivākaravatsena 

	saṃpreṣite cetasi hāritārthajñaptyai mahājñāna bhavatsakāśam |
	yuktyā yadāvedayasi tvamantastattattvavidvetti vijṛmbhitaṃ te ||

iti | svairitvaṃ ca saṃvedyamānapraṇidhipūrvake smaraṇe 
māyāpramāturavalokitam, asaṃvedyamāne'pi 
praṇidhāvabhyastavinābhāvādivanmāyāpramātureva mantavyam, tasyaiva 
ca kartṛśabdena vṛttāvabhidhānam | ekatvaṃ ca asyaiva 
ubhayakālavyāpitvāt | evaṃ svātantryaikatvakartṛtvāni pramukhe 
māyāpramātari nirbhāsamānāni api saṃkucitasaṃvido'pi 
asaṃkocaparamārthasaṃvinmayatayā parameśvararūpaparyavasitāni,- 
ityetat sūtre darśitaṃ sahi itivacasā maheśvaraḥ iti 
pūrvasūtrāvamarśinā, vṛttau ca uktaṃ vibhoḥ iti | tadetat vivṛtikṛdāha 
kartṛtaivaca ityādinā | vividhaṃ kṛtvā bhavatīti vibhutvaṃ, natu iha 
vyāpakatvaṃ deśabhedābhāvāt tasya iha anupayogāt | nanu 
deśāntaragatamapi etaddeśena smaryate, tat kathaṃ vyāpakatvasya 
anupayoga iha | satyaṃ, satu vedye śarīrādāvanupraviṣṭo 

(page 14)

deśabhedaḥ | nanu kālabhedo'pi tathaiveti ko viśeṣaḥ | idamapi satyam, kintu 
kṣaṇikatve saṃvidāṃ na upapadyate smaraṇamiti upakrāntam | 
kṣaṇikatvaṃ ca kṣaṇabhedātmā kālabheda eva, natu saṃvidāmavayavina 
iva deśabhedamukhena saugato bhedaṃ bhrūte | tadabhiprāyeṇa ayaṃ 
kālabheda eva apākṛto vartate, vastutastu deśakālau vedyaśarīrapraviṣṭau 
vedyaviṣayeṇa smareṇena kroḍīkṛtāveva | yadyapi dehadeśe eva dehakāle 
eva ca smaraṇamavabhāsate yathāhuḥ 

	antaḥśarīravṛttitvānmanasa ....................... |

iti, tathāpi saṃvido na vastuto deśavat kālo'pi kaścit | vedyamukhena 
kālasparśe deśasparśo'pi samānaḥ, tata eva sarvadeśasparśitvāt 
vyāpakatvasiddhiradurlabhetyuktaṃ bhaṭṭadivākaravatsapādaiḥ 

	dūrāntideśādigatārkacandra-
tārādibāhyaprathayaiva vidmaḥ |
	vyāpya sthitaṃ viśvamidaṃ vibhuṃ tvāṃ 
svadehavicchedavimohabhaṅgāt ||

iti | etadapica vibhutvamaiśvaryeṇa svīkṛtameva | nahi pratihanyamāno 
deśataḥ kālataḥ svarūpato vā īśane 
tācchīlyatāddharmyatatsādhukāritvabhāgiti | nanu anubhavasyaiva 
cedasaṃpramoṣaṇaṃ smaraṇam, tarhi anubhava eva syāt, na smaraṇam | nahi 
nirvṛttācchādano ghaṭo gaurbhavati | viṣamametat | gorhi 
ghaṭādarthāntaratvameva jīvitam | nanu na evaṃ 
smaraṇamanubhavādanyadeva kiṃcit bhavati, apitu anubhavasyaiva 
punarunmeṣaḥ | tat punarunmeṣe'pi anubhavāmītyeva na kiṃ vyavahāraḥ | 
ucyate kevalam iti, pravṛttastasmin nīlādike'rthe'vabhāso yeṣāṃ 
pramātrantarāṇāṃ sarvajñakrimiprabhṛtīnāṃ, taiḥ saha tasmin 
nīlābhāsāṃśamātre, natu parasparaṃ śarīrādyahantābhāse, 

(page 15)

ya ekībhāvastannīlābhāsaprakāśamātrarūpatvaṃ; tasya prāk 
pītavedanadaśāyāmabhāvāt tatpītapramātrekatopasaṃhārapūrvakatayā 
nirmāṇaṃ saṃpādanaṃ, tadeva mukhaṃ dvāramupāyaḥ, tena upāyena 
yadā asau caitraḥ pramātā 
maitrādipramātṛbhirnīlābhāsaprakāśanamayairnīlasaṃkocite 
prakāśabhāge ahaṃ nīlaṃ bhāsayāmi, mama nīlamavabhātītyevaṃrūpe 
nīlānubhavopalakṣite anubhavitṛrūpe pratyagātmani māyāpramātari 
tādātmyalakṣaṇena sāyujyenaiva praviśati tatkālabhāvini eva, natu 
prāṇapuryuṣṭakādiprakāśabhāge anubhavopalakṣite'pi 
pūrvāparakālānuvartini | nahi asya tatra pramātṛtvena saṃvittiḥ, nāpi 
paramātmabhāge bhedānavabhāsaprasaṅgāt | etacca vakṣyate 

	tadevaṃ vyavahāre'pi prabhurdehādimāviśan |
	bhāntamevāntararthaughamicchayā bhāsayedbahiḥ || (1|6|7)

ityatra | so'yaṃ tadābhāsamātraprathanātmā tatpraveśo'sya 
pramāturapūrvāvabhāsarūpaḥ svaśarīraprāṇādisthairye'pi 
pūrvamabhāvāt garbhāt niṣkrāntasya iva idānīṃ jāta iti nirmāṇatayā 
cakāsadapi na nirmāṇarūpaḥ pūrvaṃ pramātrantararūpatayā bhāvāt | 
ihaśabdo'nubhaviturabhimāno'yamiti dyotayati | ābhāsaikībhāve'pi na 
nirapekṣībhavati asau pramātā nirvikalpake niḥśeṣābhāsasaṃvedini 
sadāśivādipade haṭhādeva praveśena māyaucityānudaye saṃta............ 
hābhiṣvaktasya pramāturabhinnena arthena hānādeḥ parapratyayanādeśca 
tāvatā saṃpatteḥ | tadayaṃ grāmya iva lāsyamandirāt nirjigamiṣan 
dvārapālena vikalpena anugṛhyate māyāprāṅgaṇe nikṣipatā | tatra hi 
ayamabhilaṣitāt nīlādanyasya atadrūpasya śaṅkākṛtaṃ 
samāropamapohamānastadapohanārpitaṃ bhedameva bahu manyamānaḥ, 
tathā apohanaprāṇena niścayena svayaṃ ca paraiśca svocitayā

(page 16)

goṣṭhyā vyavaharan kṛtakṛtyamātmānaṃ manyate | tacca apohanarūpaṃ 
niścayanaṃ yadyapi sarvamanubhavakālapaścādbhāvi, tathāpi 
kiṃcitkālabhedāpahastanena tadanubhavatādātmyenaiva sphurati yena 
anubhavo'pi asau bhedini eva artha iti abhimānaḥ- idamahamidānīmeva 
anubhavāmīti | anyathāhi sarvo vikalpaḥ smṛtireva bhavet | evaṃ taditi cet, 
anubhave khalu vyavahṛte sādhyarūpasya anubhavasyaiva arūḍhau 
kathamasya siddhatayā parāmarśo bhavet- anvabhūvamiti | naca 
kālabhedāparāmarśane bhrāntatā kālabhedasya avāstavatvāt | 
yathāparāmarśaṃ hi vastutathātvamiti vakṣyāmaḥ | tena yadāha 
bhaṭṭaśaṅkaranandanaḥ anubhavāyante vikalpāḥ iti dharmottaraṃ 
dūṣayituṃ 

	siddhaṃ siddhatayā vastu nirūpyaṃ na tathā tataḥ |

iti, tat svānubhavabāhyamanoṅkāryamati darśayati | 
kevalamanubhavāyamānatvaṃ pṛthak svaprakāśasaṃvedanasaṃtānavādī 
samarthayitumaśaktaḥ kāśakuśamavalambamāno'nena anugrāhya iti 
āstām | yadā tu tamanubhavamācchādanavicchinnaṃ madhye abhimanyate 
praṇidhānādinā ca punaḥ prabodhitam, tadā kālabhedābhāvāt dvayorapi 
pramātṛprameyayostulyakālatāyāmapivā kālavaicitryamullāsayati | 
tathāhi anubhavaṃ tatkālaṃ parāmarśasya arthaniṣṭhatvāt manyamānaḥ 
etatkālaparāmarśasya pramātṛniṣṭhatāṃ prādhānyena spṛśati idānīṃ 
bhavata iva mama nīlānubhavo'bhūditi | tadetaducyate sa-iti parāmarśanam | 
yogī tu atītajñāne'rtha eva prācyaṃ kālamadhiropayati, na anubhave | 
tadānīṃtanapramātṛkālaspṛgeva hi asau tasya | yadā tu 
dvayametatsaṃmīlya vikalpayati, tadā pratyabhijñānaṃ so'yamiti | tatra ca 
ekatarānuvādaikataravidheśca bhedadvayam, samamanuvādāt 

(page 17)

samaṃ vidheśca bhedadvayam,- ityalaṃ bahunā | na tatra 
apūrvanirmāṇayoge tadanubhava ucyate, nirmāṇakalpasya tu anubhavasya 
prācyakālasparśe smaraṇamiti | yadyapi anubhavananiścayanasmaraṇa-
pratyabhijñānavikalpanaśaktisvātantryalakṣaṇa eva vastutaḥ pramātā, 
tathāpi tatra tatra bhāge vyapadeśa iti na kiṃcit duḥstham | 
apiśabdaścaśabdaśca uttarottarākāṅkṣāṃ 
sūcayantāvasamāptapravāhamekameva cittattvamiti sūcayataḥ | tuśabdaḥ 
pūrvottarābhyāṃ madhyamasya parāmarśasya smaraṇatānidānaṃ 
viśeṣaṃ dyotayati | etat sarvaṃ vṛttiṃ vyācakṣāṇa upasaṃharati tat iti | 
yadevaṃbhūtamanubhūtaprakāśāsaṃpramoṣaṇaṃ vyākhyātam, tat 
vyaktīkartum āha iti iti saṃbandhaḥ | atra iti māyāpramātari | yadi tu sa-
ityetat svīkṛtau pūrvau deśakālau na asya parāmṛśati, apitu nīlaṃ 
pītamityetāvanmātraṃ, tat, niścayanasmaraṇapratyabhijñānādiviśeṣa-
vyapadeśanibandhanāyogādapūrvatānavabhāsācca śuddhameva 
vikalpanamiti ucyate | uttaratra iti 

	dīrghavṛttordhva ......................... | (2|3|4)

ityādau hi ābhāsamātraṃ vastu,- iti vyavasthāpayiṣyāmaḥ || 1 ||

	nanu ca nirviṣayāstāvat vikalpāḥ svalakṣaṇātmano'nanugāmitvena 
ajanakatvena ca tatra anavabhāsāt, sāmānyādeśca avāstavatvāt, 
grāhyākārasya ca jñānaikaviśrāntasya grāhakākāravadavikalpyatvāt | 
vikalpaviśeṣa eva ca smṛtiriti sāpi nirviṣayaiva | ekaviṣayatayā ca ekaṃ 
saṃvedanatattvamupapipādayiṣitamatra | anubhavasmṛtyorekaṃ 
svasaṃvedanarūpamekaviṣayatopalambhāt | bhinnasaṃvedanarūpatāyāṃ 
hi pṛthak svaprakāśamātrarūpatvamekaviṣayatopalambhasya viruddhamiti 
svabhāvaviruddhopalabdhyā bhinnasaṃvedanarūpatvāt vipakṣāt

(page 18)

vyāvṛtta eva svasaṃvedanarūpatvena vyāpyate iti vyāptisiddhau 
svabhāvahetuḥ | sa ca ayaṃ nirviṣayatve atyantāsiddha ityāśaṅkya sūtraṃ 

	bhāsayecca svakāle'rthātpūrvābhāsitamāmṛśan |
	svalakṣaṇaṃ ghaṭābhāsamātreṇāthākhilātmanā || 2 ||

	sahi iti pūrvasūtrāt sa maheśvaro bhagavān cidātmā 
pūrvāvabhāsitamarthaṃ tāvat smṛtau parāmṛśati vikalpayatīti 
upagamyam | tathopagame ca tasya arthasya 
pūrvadeśakālābhyāmavacchedāt deśakālasaṃkocasāratvācca 
svalakṣaṇātmanaḥ svalakṣaṇarūpaṃ tamarthaṃ parāmṛśatīti āyātam | 
parāmarśanaṃ ca prakāśanāntarīyakam | aprakāśamānatāyāṃ hi kiṃ 
parāmṛṣṭaṃ syāt | aprakāśitaṃ vimṛṣṭaṃ ceti hi andhapadam | 
parāmarśaśca prakāśasya svabhāva iti svabhāvino'saṃbhave kasya 
svabhāvo bhavet | parāmarśanena hetunā upalakṣaṇena vā tasya 
svalakṣaṇasya avaśyaṃbhāvinī bhāsanā | arthāt sāmarthyāt 
parāmarśanānyathānupapattyā ghaṭābhāsa eva ekākī 
mārtikatvaunnatyādyanekābhāsayogitvena vā bahuprakāraḥ 
samastapūrvābhāsasaṃbhinno vā avamṛśyate | sarvaśca asau 
deśakālābhāsasaṃbhedāt svalakṣaṇībhūtaḥ | atha iti vikalpaṃ dyotayati 
| nanu yadi so'rthaḥ prakāśate, tadanubhavāt ko bhedaḥ | ka evamāha 
prakāśate iti | prakāśate kila asau | sahi prācyaḥ kālo'sya avabhāsāṃśe 
vedyasvīkāriṇi svālakṣaṇyahetuḥ, idānīṃtanaśca 
smartṛdehaprāṇādigato vartamāno vimarśabhāge | 
tadetadubhayakālasparśanaṃ vimarśasya-sa-iti | tena bhagavata iva ahamiti, 
sadāśivasya vā ahamidamiti, anubhavabhuvi vā idamiti na smartuḥ 
smaraṇaparāmarśaprasaṅgo vedyasya unmeṣāt pṛthaktvāt 
prākkālatvācca | yadāha svakāle iti | pūrvāvabhāsitaṃ

(page 19)

ca svakālatyāgena taddeśatyāgena ca ghaṭābhāsamātratayā parāmṛśan 
saṃkocābhāsavān sāmānyātmakamarthaṃ prakāśayatyeva 
smṛtivyatiriktaṃ vikalpamātramityapi athaśabdaḥ | tathāca avatāriṇyāṃ 
vikalpo'pi svīkṛta eva | tasmāt vailakṣaṇyena vā sāmānyalakṣaṇena vā 
viṣayavattaiva smṛtivikalpādāviti nirviṣayatvāsiddhau sa hetuḥ sthita eva- 
ekaviṣayatvopalambhāditi sūtrārthaḥ | taṃ saṃkṣepeṇa avatārayati smṛti 
iti smṛtirūpaparāmarśe pūrvakāladeśādyavacchedavān so'rtho'ntariti 
indriyabhūmimatikramya sthito'pi bahiriti saṃvidbhāgāt vyatiriktatvena 
ahantāvibhaktaḥ, ata eva tadityanena vapuṣā parāmṛśyo yo'rthaḥ, tasya 
sāmārthyāditi parāmarśanānyathānupapattyaiva bhavati prakāśaḥ 
śuddhavikalparūpavimarśāvasare punaḥ pūrvadeśakālānavacchedena 
idamitinirdeśyasya | ādigrahaṇāt 
pratyabhijñotprekṣaṇādhyavasāyādivikalpeṣu api yathāyogaṃ tadidamiti 
idaṃ taditi tadiva idamiti tadeva idamityādinirdeśyatā mantavyā ubhayataḥ 
tanmukhau ca vicitrau deśakālāvacchedau | niyatarūpatayā iti 
avaśyaṃbhāvenetyarthaḥ | smṛtau hi prāgdeśakālayogo'vaśyaṃ sphurati 
| anyathā vikalpamātraṃ tat bhavet, natu smṛtiḥ | tatsphuraṇe ca 
ekābhāsasya ābhāsanikurambhasya vā svalakṣaṇataiveti smṛtau 
svalakṣaṇasyaiva parāmarśastāvat siddhaḥ | sahi iti 
pūrvasūtrādanuvṛttaṃ prāktanīṃ smartṛtāmāheti vṛttau smṛtiśaktyā 
iti uktam | siddhena parāmarśena hetunā prakāśanamarthasya 
sādhayitumāha prakāśasvabhāvaśca iti | cakāro'tra samuccayena 
nāntarīyakatāṃ hetuṃ prati sādhyasya dyotayan hetuhetumadbhāve 
viśrāmyati | yasya parāmarśo'rthasya, tasya avaśyaṃ prakāśaḥ | sahi 
parāmarśaḥ prakāśanasya svabhāvabhūto dharmaḥ prakāśanābhāve 
niravalambana 

(page 20)

eva kathaṃ bhavet | yathāhi kṛtakasya anityatvaṃ svabhāva iti anityatve 
nirbhāsamāne kṛtako na nirbhāsa iti bhavati, tathā parāmarśe 
nirbhāsamāne prakāśaḥ | svabhāvino hi abhāve asya ayaṃ svabhāva iti 
katham | tataśca svabhāvarūpatvaviruddhamasvabhāvatvamāpatediti 
svabhāvaviruddhopalabdhiprasaṅgabhītyā svabhāvyanābhāsāt vipakṣāt 
vyāvṛttaṃ svabhāvatvaṃ vyāpakaṃ parāmarśasya svabhāvyābhāse 
niviśamānaṃ svavyāptaṃ parāmarśamapi tatraiva niveśayatīti | naca 
vaktuṃ yuktamabodhasyaiva parāmarśaḥ svabhāvo bhavatu,- iti evaṃhi 
smṛtivikalpādernīlādivadasvaprakāśatvaṃ syāditi bodhasyaiva svabhāvaḥ 
parāmarśaḥ, bodhaśca prakāśātmā | tadayaṃ svabhāvaheturarthasya 
parāmarśaḥ prakāśātmā tatsvabhāvatvāditi | ata eva iti vivādābhāvāt 
| yadyapi bhāvakarmakartṛsaṃkhyādyarthābhidhāyinastiṅaḥ, tathāpi 
bhāvamākhyātena ācaṣṭe iti sādhyarūpatāṃ dhātvarthasya 
prādhānyena udrecayantastathā bhavanti | tena kriyaiva teṣāṃ 
mukhyamabhidheyam | vidhyādau ca liṅ vidhīyamāno 
dhātvarthopādhibhūtān vidhyādīnavagamayati | 
pratyayārthakartṛkarmādyupādhitvamapi teṣāṃ 
dhātvarthopādhitādvāreṇaiva kārakaśaktiyogāt, natu dravyasya sarvato 
niraṃśasya vidyādidharmāntarasaṃbandhaḥ svata upapadyate | tena 
vidhyupādhikadhātvarthasādhyamānatodrecanaṃ liṅartha iti darśayati 
niyogakaraṇalakṣaṇa iti | niyogena niyamena yat karaṇaṃ 
sādhyamānatvaṃ, tat lakṣaṇaṃ svarūpaṃ yasya | ājñārūpasya api 
niyogasya niyamarūpatayaiva 
karaṇasaṃbhāvanānirāsābhiprāyavedanameva prāṇitam | 
maryādāvedanameva hi ājñānam | svayaṃ maryādāṃ jānan parasya 
tatparasya tatpratyayamutthāpayannājñāpayatītyucyate | agnihotraṃ 
juhuyāt svargakāmaḥ ityatra hi svargakāmasya ayaṃ 

(page 21)

niyamo juhotyeveti | anyathāhi na sa svargakāmaḥ syāt paramārthataḥ | 
pathyamanupayuñjāno hi śaktaḥ śāstrā nirastaśca na tattvata 
ārogyakāmaḥ | kāmanāyāṃ 
bhavantyāmuttarottaraprayatnakriyāprabhṛtikāryaparamparā avaśyaṃ 
bhavediti tatkāmaḥ pathyamupayuṅkta eveti liṅarthaḥ | yāvajjivamityatrāpi 
pratyavāyaparihārakāmo na syāt yadi juhotītyartho'vatiṣṭhate | 
phalakalpanadainyaṃ na niyogasyetyapi pakṣe 
yāvajjivanaviśiṣṭabrāhmaṇarūpataiva asya hīyeta yadi na juhoti, tasmāt 
juhotyevetyevaṃ maryādāyā niyamarūpāyā āvedanameva niyogatattvam | 
kālaviśeṣaṃ ca abhivyaṅktuṃ yadyapi liṅaḥ sāmarthyaṃ nāsti, tathāpi 
kriyāyāḥ kālena niyogāyogāt kartṛbhedena deśabhedena ca anabhidhānāt 
nityapravṛttavartamānasparśo bhāti | naca iyatā pramāṇāntarāgocaratvaṃ 
yatra dhūmastatrāgnireveti aviśeṣopakramāyāmapi vyāptau 
kālabhedāsparśe'pi pratyakṣānupalambhavikalpasya ullāsāt | tadvadeva 
ārogyakāmaṃ pathyopayogayoginaṃ paśyan deśakālakartrābhāsa-
viśeṣāntaratiraskāreṇa tatkāmanāyogatadavaśyaṃkaraṇayoḥ 
kāryakāraṇabhāvamavagacchatīti alamavāntareṇa bahunā | nanu yadi 
smṛtau prakāśate eva so'rthaḥ; tarhi so'nubhava eva syāt, natu smṛtiriti | 
maivam | prakāśate hi tadā prakāśaḥ, prakāśate iti tu anubhave | yadyapi 
prakāśe kālayogo nāsti, tathāpi vedyadehādau niṣikto'sau 
prakāśastadanukārī māyāpade nirbhāsate iti 
atitavartamānadehādisahabhāvāt bhūtavartamānavyavahārapātratāṃ 
spṛśati | prācyadehādisahabhūto'sau smaryamāṇavastugato 
vimarśamayo'pi prakāśo dehapramātṛmānināmasphuṭatvena 
abhimānagocaratvameti, sphuṭatvena tu vartamānadehopādhiviśrānto 
vartamāno dvitīyo vimarśa iti tenaiva asya vyapadeśo 

(page 22)

bhavati smṛtirvikalpa iti | vimarśaviśeṣa eva hi vikalpaḥ iti vakṣyate | 
tadetadāha kevalam ityādinā | kevalaparādayaḥ śabdāḥ iyadadhikamatra 
avaśyaparigrāhyamityanena niyamadharmeṇa vākyārthe sattvabhūte 
viśeṣaṇatāṃ gacchanto liṅga-saṃkhyā-
sarvanāmanapuṃsakaikatvābhyāṃ vyavahāryā iti prathamāntā 
mantavyāḥ, yadivā vākyārtho'pi kriyaiva kārakādiviśeṣaṇābhyāṃ 
rūṣitaśarīreti kriyāyāmeva śrutāyāmadhyāhṛtāyāṃ vā 
viśeṣaṇatāmupayanto dvitīyāntāḥ śaktita eva kriyāyāḥ sādhyatvāt | 
karmatāyāmapi ākhyāte tatsaṃskārāsaṃbhavāt 
sattvabhūtārthābhidhāyini tadviśeṣaṇe eva tatsaṃskārasaṃkrāntau 
dvitīyā | saṃkhyāliṅgasarvanāmayogaśca sattvabhūte arthe | 
sattvabhūtārthasya viśrāntiyuktimadvidvadbhistu vacanamārabdham 
kriyāviśeṣaṇānāṃ karmatvam ityādi | tadāha iti 
anubhūtasyāvaśyaṃ prakāśaḥ iti pūrvāvabhāsitatvenaiva 
prakāśaḥ iti ca yat vyākhyātam, tat vṛttikṛdanena granthena āha anyathā 
iti na syāt prakāśanam | pūrvaprakāśitatvena tatprakāśanānulagnaḥ 
kathaṃ parāmarśo bhavet | yadica na bhavet pūrvaprakāśitatvena 
parāmarśanaṃ, tat sa-iti bhūtaprakāśaparāmarśo na syāt | tena 
prakāśitasya iti vṛttau prakṛtyarthe ca pratyayārthe ca bharaḥ kartavyaḥ | 
pratyayasvīkṛto'pica bhūtārthaḥ svasattākāla evaca ityanena vṛttau 
sphuṭīkṛtaḥ | tena smṛtikāle evaca ābhāsayatīti vṛttiyojanā | nanu 
cirantanairbhagavatpatañjaliprabhṛtibhiriyat na uktamityāśaṅkya āha eṣa 
evaca iti | pūrvaprakāśitavimṛṣṭatvenaiva prakāśo yo vimarśane 
vārtamānike antarvartī samarthitaḥ, sa eva anubhūtasya viṣayasya 
asaṃpramoṣo'napahāraḥ ucyate | anubhavo'tīto hi atra prakāśabhāvena 
viṣayasya uktaḥ, asaṃpramoṣaśca vārtamānikaṃ 

(page 23)

tathāparāmarśanam | nanu prakāśasya kālayogābhāvāt 
kathamatītatetyāha pūrvaprakāśitatvaṃ ca iti | tatra deśe hyaḥ 
pipāsitena mayā tena mitreṇa saha apakvākāratayā ghaṭo'yaṃ dṛṣṭaḥ,- 
iti saṃghātavigṛhītatayā deśādibhirupādhibhiḥ prakāśo'vacchidyate | 
māyāpade ca smaraṇavyavahāro na bhavati | aupādhikarūpasaṃkoca eva ca 
prakāśasya māyāpadam | uktamarthaṃ vaktavye'rthe tena ityanena vṛttau 
hetutāṃ tāvat nayati | teneti padaṃ vivṛṇoti tadevam iti yaduktaṃ tasmāt 
hetorityarthaḥ | kiṃ taduktamiti sphuṭayati anyathā iti anupayogasya 
vicāraniṣphalatve | hetutā tatra samarthanasya, samarthane ca prasaṅgasya 
hetuteti | tathāhi nāśe arthena smṛterna doṣaḥ, sadbhāve na poṣaḥ- iti 
tātparyaṃ vṛttiṭīkayoḥ | iyatā smṛteḥ svarūpamuktvā tadeva 
pariśodhayati etāvatā ca iti | ataḥ prameyāt manāgapi nyūnatāyāṃ na 
smṛtitvamupapannamiti yāvat | pūrvasya arthāvabhāsasya anunmeṣe, 
pūrvaprakāśitatvena aparāmarśe, anubhavena atītena 
avacchinne'rthamātre yo jñānaviśeṣaḥ; so'bhinava eva anubhava 
evetyarthaḥ | nanu yogaḥ paramārthapramātrā vidyate yasya, sa 
paramārthapramātṛtattvanimagnamāyāpramātṛtābhāgo 

	yogamekatvamicchanti .................... | (mā. vi. 4|4)

ityāgame nirūpyate yogī | tasya ca sarve'rthāḥ svātmani 
akālakalite'hamityeva tādātmyabhāja unmiṣanto'pi vā ahamidamiti 
bhāsanocitāḥ | tatra kathaṃ kasyacideva avabhāsaḥ, kathaṃca 
pūrvakālaviśiṣṭatā tasyetyāśaṅkya āha yasya iti | hiśabdo hetvartha 
āśaṅkāṃ sūcayati | tadabhāve samarthayitāvyābhāvāt samarthakasya 
hetoranupayogaprasaṅgādiha ābhāsānābhāsātmā krama eva tāvat 
kālaḥ | tatra śarīrasya pratikṣaṇamapi vailakṣaṇyena 
ābhāsanamanābhāsanaṃ 

(page 24)

ca pratikalaṃ pravahadatyantaṃ kālabhedaṃ vitarati | tena 
śarīrapramātṛmānināṃ tata eva 
tadanulagnabāhyendriyāyattaprāyasaṃvedanakriyāṇāṃ gāḍhagāḍhaṃ 
kālaśṛṅkhalāvabaddhānāṃ

	saṃbaddhaṃ vartamānaṃ ca gṛhyate .................... |

iti nyāyena na atītānāgatakāladarśane manāgapi yogyatā | yadā tu 
prasaṃkhyānopadeśaviśeṣābhāsāt dehe pratanūkaroti 
pramātṛtābhimānaṃ; tadā ātyantikaḥ 
kālabhedo'navaratasphuṭabhedatvāt dehasya avaśyaṃbhāvī yaḥ sa yadyapi 
asya vigalati, tathāpi vedyarūpatvādakhyātipradhāne māyāmaya eva 
puryaṣṭake vā prāṇe śūnye vā pramātṛtābhimāno'sya sphuṭaḥ | tatra 
ca kālakṛtāvasthābhedo deha iva sphuṭo na saṃbhavati yadyapi, tathāpi 
taddehasahakāryabhimānāvicchedādaupādhikaḥ sphurati ko'pi bhedaḥ | 
tataśca asya pūrvānubhūteṣu artheṣu smaraṇaṃ tāvadasti | 
dehātmakaniviḍatarāvaraṇābhimānaviṣamā ca 
tanukaraṇaprāṇabuddhiśūnyāvaraṇāntarvartinī 
saṃvidamalāśaradabhropahitaraviprakāśavat kvāpi aṃśe ābhimukhyena 
dhāraṇāpūrvakatayā yo yogo dhyānaṃ tasya vaśaḥ sāmarthyaṃ tena 
samādhisthalabdhaprakāśakabhāvalakṣaṇanirāvaraṇasvarūponmeṣā 
tamarthamapūrvāvabhāsameva tata eva smaraṇāyogyamapi 
pūrvasmaryamāṇasāhityāt pūrvatayā anubhavatyeva 
saṃskārasākṣātkaraṇādinā pūrvajātīriva | nanu 
smṛtāvaṅgavikalametat pratyudāharaṇaṃ 
pūrvānubhavabhodhayogāṃśasya | smṛterhi śabdārūṣitatvaṃ rūpam | 
tacca atra nāsti nirvikalpakatvāt yogipratyakṣasya | satyam, kintu 
śabdārūṣaṇe vidyamāne'pi pūrvānubhavasya anābhāsanādeva 
smṛtitvābhāvaḥ svatantravikalpe | tena ukte'pi viṣaye tathaiva yuktamiti 
nirūpayati pūrvānubhava ityādi | svecchayā iti 

(page 25)

	yā tu vyākṣepasāratvāccetasaḥ svarasodgatā |

iti nyāyena na tatra pūrvānubhavollekhaḥ | yadā ca asya satyata eva pitā 
rājā, na ca āgamādeva avagataṃ vyākṣepabalotpannā sā 
vikalpamadhye'pi ca asatyavikalpāt kākatālīyenaiva samunmiṣati, tadā 
idamudāharaṇaṃ pūrṇam, āgamādavagame tu punaḥ smaraṇameva | 
asatyaviṣayatve ca tadānīntanasattvādisarvajñapramātrantarasaṃlagnatā 
kathamupapadyeteti uktodāharaṇadvayaviṣaye smṛtitvaṃ nirākaroti | 
tadānīntanatvena ye pramātāraḥ sarvajñā yadivā saṃsāriṇo'pi 
anumānāgamādipramāṇāntarāyātatadviṣayaprakāśā apūrvatvena 
paśyanti vimṛśanti teṣāṃ yo jñānābhāsaḥ, tena saha tatra aṃśe 
bhagavadicchayā sa ekībhavati | smaraṇe tu pūrvapramātṝṇāṃ yo 
jñānābhāsastasya smartuḥ pūrvānubhavena saha milito'bhūt, sa eva 
idānīmunmiṣatīti viśeṣaḥ | etadupasaṃharati tasmāt iti tadanunmeṣe 
smṛtyabhāvasya darśitatvāt | smṛtau pūrvānubhavonmeṣavipakṣe 
smṛtiviruddhena smṛtitvābhāvena vyāptasya 
sākṣātkaraṇasvatantravikalpanarūpatvasya prasaṅga iti 
viruddhavyāptopalabdhyā vipakṣāt vyāvṛtto hetuḥ sādhyena 
tadunmeṣavattvena vyāpyate iti vyāptisiddhau svabhāvahetuḥ | evaṃ na 
duṣyati ityantaṃ sautre pāde vṛttigranthaṃ vyākhyāya 
ghaṭābhāsamātreṇa ityante sūtrāṃśe yā vṛttiḥ avabhāsa ityantā, 
tāṃ vivṛṇoti arthitvācca iti | ā samantāt bhogaḥ 
saṃvedanāntarbruḍitānantabhāvasaṃskāramadhyanimagnasya cidbhāvasya 
unmeṣaṇātmakapālanacarvaṇavyāpāro'nveṣaṇātmā, 
ābhogaścintāsantatilakṣaṇaṃ prāṇidhānam | so'rthitvāt yāvati aṃśe 
bhavati, tāvantameva smarati yathā ghaṭena mārtikena udakānayanārthī 
śaiśavaparidṛṣṭaṃ nṛpasadanasulabhaṃ sauvarṇamapi ghaṭaṃ 
tatkāriṇamadhunā pṛthubudhnodarākāramātreṇa 

(page 26)

smarati, yathāvā niṣpannapaṇḍitaḥ 
khaṇḍikopādhyāyakathitānantaprakriyāsmaraṇamanādriyamāṇa eva 
brāhmaṇaśabde sādhutvamātraṃ smarati tāvataiva 
abhīṣṭaprayogasiddheḥ | anyasmaraṇādaraṇe pratyuta 
abhisaṃhitagaṅgāsrotaḥsaṃtatasaṃskṛtavacanaviracanapratyūhāya tat | 
tadāha yathopayogam iti | svalakṣaṇarūpatā ca sāmānyasya 
vyāpakatvanityatvāpahastanena deśakālābhyāmeva vitīryate iti 
ekābhāsasya āropamātratayā ābhāsāntarasaṃparkavirahāt 
pūrṇārthakriyāsaṃpādanavaikalyena asphuṭasyāpi sā uktā yathā 
saṃtamase dūrādūrdhvamidaṃ kimapīti | smṛtitattvena abhimanyamānaṃ 
vikalpamathaśabdena sūtre sūcitamatraiva 
ābhāsapārimityābhidhānaprasaṅgena vivṛṇoti pūrvadeśākālādi iti | 
ādigrahaṇena vartamānabhaviṣyaddeśakālāvacchedavirahamapi āha | 
evaṃbhūtaśca sāmānyasvalakṣaṇavibhāgo na anyatra prasiddhaḥ 
ityāśayena hetumatra ghaṭayati sāmānyānyevahi iti | saṃbhūya iti 
parasparaṃ saṃmiśrībhūya | naca dvandvapadārthanyāyena 
tulyakakṣyatayā, apitu parasparaṃ viśeṣaṇaviśeṣyabhāvena paryāyato 
guṇapradhānabhāveneti yāvat | tathāhi āvaraṇārthitve paṭatvaṃ 
pradhānaṃ, śuklatvādi punaravacchedakam, cittaprasādārthitāyāṃ 
śuklatvamavacchedyam, itarattu viśeṣaṇamiti paryāyato'vacchede'pi 
tatsamudāyāśayena anyonyāvacchedabhaṇitiḥ | yugapadapica avaccheda 
upakārī | ghaṭo lohitatve vyāpake api anyonyāvacchedāt deśakālābhyāṃ 
saṃkocyate | evaṃ bahubhiḥ sāmānyairmilitairekaṃ svalakṣaṇamiti uktam | 
tatra yaḥ śaṅkate- nanu evaṃ dhavaḥ khadiraḥ palāśaḥ iti bhinnānyeva 
svalakṣaṇāni, tatra vṛk' iti ekabuddhiḥ kathamiti; taṃ prati āha evamapica 
iti | varṇasaṃsthānagrahaṇena rasavīryasparśādikamupalakṣayatā

(page 27)

dhavatvādīnāṃ svarūpamuktam, avāntarabhedaśca sūcitaḥ | nanu 
ābhāsa eva vastu | sa ca prakāśamattvāya yatate | prakāśaśca 
vimarśajīvitaḥ | vimarśaśca māyāpade vikalpātmā pratyābhāsaṃ 
viśrāntaḥ śabdanaikaśarīratvāt śabdasya pratyābhāsaṃ saṃketanāt | tat 
kathaṃ svalakṣaṇaṃ nāma prakāśate | satyam, anyadarśane dūṣaṇameva 
etat nirvikalpakaprakāśasya api vikalpakenaiva vyavahāryaviṣayatvena 
upagamāt; iha tu naivamiti darśayati svayam ityādinā | sāmānyānyeva 
anantasvalakṣaṇatāmāpadyante | tatra ca hetuḥ parasparabhedaḥ paryāyeṇa 
ca anyonyāvacchedaḥ | tathāhi sattaiva dravyaṃ guṇaḥ karma ca sattā hi 
dravyatvādibhyo bhidyate, tāni ca tataḥ | anyonyaṃ ca avacchedaḥ sat 
dravyaṃ, sat guṇa iti | deśakālābhāsāvapi na bhāvasya svarūpaṃ yathā 
saugatā manyante saṃkucitātmaiva bhāva iti, pratyuta vikasitasvabhāva eva 
bhāvo vikalpena vyavahriyate | saṃkocastu anyena deśābhāsasāmānyena 
kālābhāsasāmānyena ca militvā nirbhāsyate | tayorapi ca 
deśakālābhāsayostadavacchedāt saṃkoca iti ṣaḍrasasaṃpādyamāne 
pānake yathā anyonyaśaktiniyantraṇayā apūrvaṣāḍavādirasodayaḥ, 
tathā ihāpi svalakṣaṇābhāsodayaḥ iti yaugapadyena api anyonyāvaccheda 
upakārī | rase ca yathā kuśalasūdavyāpāraḥ pradhānatayā upayogī, 
tathā svalakṣaṇodaye bhagavanniyatiśaktiryā sarvaṃ niyacchati | 
tadullaṅghane hi sarvaṃ sarvata eva pūrṇamiti āstāṃ tāvat | evaṃ 
dravyaṃ ghaṭaḥ, dravyaṃ paṭaḥ, ghaṭaḥ sthūla ityādyapi mantavyam | tatra 
ca svalakṣaṇe vākyaparāmarśajīvita eva yojanātmā prakāśaḥ | nanu 
evaṃ ghaṭābhāsapaṭābhāsasāmānye militvā kathamekaṃ svalakṣaṇaṃ 
na utthāpayataḥ | āha

(page 28)

ānuguṇyenaiva iti | parameśvaraniyatiśaktimahimā hi ābhāsānāṃ 
saṃmīlane vyāpriyate, na svamahimā | yathāca dhavatvavṛkṣatvayoreva 
anyonyamelanam, na dhavatvakhadiratvayoriti apārthe 
bhagavanniyatirvijṛmbhate, tathā kvacidavyabhicāraniyamo'pītyāha 
kiñcicca iti | anyena vyatiriktatayā parāmṛṣṭena ābhāsāntareṇa 
aviśeṣitatve'pi svenaiva śuddhena rūpeṇa nirbhāsamānamapi sat sphuṭaṃ 
sāmānyam | yato'sya ātmā sāmānyarūpa eko'pi 
svabhāvo'nekasāmānyamayo'nekasāmānyaṃ na vyabhicarati, yathā 
dhavatvaṃ sāmānyaṃ sattvadravyatvapārthivatvavṛkṣatvāni avyabhicarat 
tadapekṣayā sphuṭameva sattvādīnāmapi pūrvaṃ 
pūrvamasphuṭamuttarottarasphuṭatveneti mantavyam | nanu evaṃ tat 
svalakṣaṇameva bhavet sphuṭatvāt | āha sāmānyatāṃ tu iti | 
sāmānyaśabdo'yamavyutpannaḥ sādhāraṇārthaḥ, natu 
bhāvapratyayāntaḥ,- iti | yukta eva bhāvapratyayaḥ | bhāvapratyayena ca sve 
vācye sāmānyaśabdasya pravṛttinimittaṃ sāmānyānāṃ yadekaṃ 
lakṣaṇaṃ samāptyā anekatra ekadhīhetutvasamavāye'pi iha buddhijanake 
yat asaṃbhavi, taducyate anekasāmānyaśabdasamavetā 
sāmānyaśabdatvalakṣaṇā śabdajātirvā yayā śabdamuparañjayantyā 
tadvācyamapi uparajyate yato'sau śabdavācyo'rtho 
vimarśamukhaprekṣitayā sa svarūpīkriyate, na anyathā | jātiṣvapivā 
vyaktitayā svātantryeṇa sṛṣṭāsu jātiraparā saṃbhavatyeva 
ātmādivikalpeṣu iva ādyantaram | tathāha tatrabhavān 

	anupravṛttidharmo vā jātiḥ syātsarvajātiṣu | (vā. p. 3|14)

iti,

	jātiśabdaikadeśe sā jātīnāṃ jātiriṣyate | (vā. p. 3|9)

iti,

(page 29)

arthajātyabhidhāne'pi sarve jātyabhidhāyinaḥ |
vyāpāralakṣaṇā yasmātpadārthāḥ samavasthitāḥ || (vā. p. 2|11)

iti ca | sāmānyatāyāṃ hetuḥ deśakāla iti | atra adhuneti gṛhīto ya 
ekako'pi ābhāsaḥ, sa vyāpakatvanityatvātmasāmānyalakṣaṇatiraskārāt 
saṃkucitaḥ svalakṣaṇamucyate atredaṃ saditi | tāvatāpi ca 
hṛdbhaṅgaparihārādyarthakriyā bhavatyeveti vakṣyate

	tathaiva saddhaṭadravya ........................ | (2|3|5)

ityatra | ghaṭābhāsaśabdaḥ sūtre kevalābhāsopalakṣaṇārthaḥ iti vṛttau 
vyākhyātamanyatamapadena | akhilātmanā iti sūtre 
bahvābhāsopalakṣaṇaṃ | asamagratve, samagratve'pivā ābhāsanam, tatra 
asamagrābhāsatāṃ vyākhyātuṃ anyadā tu iti vṛttiḥ | tāṃ vivṛṇoti 
yadā punaḥ iti | samagrābhāsatāṃ vyākartuṃ vṛttiḥ atiśaya iti | tāṃ 
vyācaṣṭe kadācit iti sākṣātkārasamaye yāvadbhirābhāsaiḥ 
pūrṇo'rthaḥ pratyabhāsiṣṭa, tāvadbhireva smaryate yadā | kiṃ bahunā 
yamahamimamidānīṃ paśyāmi vimṛśāmīti, ayamapi ābhāso 
viśeṣaṇamadhye praviṣṭaḥ; tenāpi tadā pura iti anubhavituragre eva 
vartamānadeśakālayostaddeśakālatayā 
ācchuritayostaddeśakālībhūtayoreva so'rthaḥ sphurati yena adhunaiva agra 
eva imamahaṃ paśyāmyeveti pratipattirbhavati | anena pratyakṣīkāraḥ iti 
vivṛtam | apratyakṣasya smaryamāṇasya pratyakṣābhāsatayā ācchuritasya 
atadavasthāyāḥ smaryamāṇatāyāḥ paramārthato vidyamānāyā api 
nyakkāra iti yāvat | ata eva bhagavatā patañjalinā svapno bhāvitaḥ 
smartavyā smṛtiḥ uktā | bhāvito bhavattvaṃ prāpitaḥ, smartavyaḥ 
smaraṇayogyatvena abhavannapi artho'syāmiti | antarayati sāntaraṃ karotīti 

(page 30)

antaraṃ vijātīyāṃśo malaṃ, tadabhāvo nairantaryam | nanu tadānīṃ sa-
ityavimarśāt kathaṃ smṛtitvamityāha tadā na iti pūrvadṛṣṭatayaiva iti | 
nahi yogijñānavadapūrvārthāvabhāso'sau 
vartamānapramātṛsvarūpaikībhāvābhāvāt | pūrvadṛṣṭataiva 
savimarśā satī idānīntanavimarśabhūmipatitā sa-itivimarśa ucyate iti tena 
atra avaśyabhāvyameva | bhāvanātastu udrecitatvāt prakāśāṃśa eva atra 
sphuṭa iti sannapi vimarśo nyakkṛtaḥ sthitaḥ | tata ucyate 

	śabdasaṃketasmṛtipariśuddhau svarūpaśūnyevārthamātrā 
nirvitarkā (yo. sū. 1|43)

iti | tata eva sahajavimarśādyutthāne vikalpe sa-ityevaṃvimarśaḥ | sutarām 
iti anubhavāṃśasya api dṛṣṭatāvyapadeśakṛtaḥ sphuraṇena apramoṣāditi 
bhāvaḥ | tadāhi smaraṇānubhavayorekasvasaṃvedanībhāve'pi 
anubhavāṃśasya udriktatayā smaraṇam | atha sūtrasūcite 
svatantravikalpe'pi sphuṭatāṃ vyākhyātumamumeva vṛttiṃ yojayati 
svatantre'pi iti | anumānāgamādikaṃ vicitradharmadharmiviṣayaṃ yat 
pramāṇaṃ miśraṃ vā kevalaṃ vā, tena yaḥ pariśuddhaḥ satyatayā 
hṛdayānupraviṣṭho natu 
kāmaśokādiprabhāvitavikalpagrāhyatulyo'nekana viśeṣaṇena 
viśiṣṭo'rthābhāso brahmādistatra unmukhaḥ sphuṭīkaraṇaikavyagraḥ | 
anena dṛṣṭārthaśabdo vyākhyātaḥ | taduktam iti 
śivasūtravṛttyormadhuvāhinītattvārthacintāmaṇyorbhaṭṭa-
śrīkallaṭapādaiḥ | nanu yogipratyakṣamavikalpakamiti uktaṃ 

	.................. tat sphuṭā kalpadhīḥ phalam |

iti, tat kathaṃ vikalpatā uktetyāha tadā ca iti

	śabdārthajñānavikalpaiḥ saṃkīrṇā savitarkā | smṛtipariśuddhau 
svarūpaśūnyeva arthamātrā nirvitarkā | (yo. sū. 1|42)

(page 31)

iti nītyā | tena vāśabdo'tra na saṃśaye, apitu saṃbhavavikalpe | nanu yadā 
nirvikalpakatā, tadā kathaṃ svatantravikalpo'pi iti 
uktirvācakībhavedityāha pūrvāvasthāyāmatibhāvyate iti | asyāṃ 
bhāvanāpariniṣpattiphalāyāṃ vikalpatvasya saṃbhavāditi adoṣaḥ | nanu 
nirvikalpakatvasya parāmarśasya abhāvāt parāmarśanānyathānupapattyā 
parāmṛśan iti sūtroktayā yadarthāvabhāsanaṃ samarthitaṃ, tat 
kathamityāśaṅkya āha parāmarśaśūnyatā tu iti | parāmarśasya hi 
pratiyogiśaṅkānirākaraṇakāraṇatāyoge vikalparūpatāviśeṣa iti 
vakṣyate 

	tadatatpratibhābhā............................ | (1|6|3)

ityādau | naca viśeṣābhāve sāmānyābhāvaḥ | sadbhāve'pi asya tarhi 
kiṃ pramāṇam | āha tādātmyāt iti

	svabhāvamavabhāsasya vimarśaṃ viduranyathā | (1|5|11)

iti hi vitatya samarthayiṣyate | nanu svalakṣaṇaṃ smṛtyā bhāsate iti sūtre 
vṛttau ca vaktavyam, kiṃ śabdagauravakāriṇā ṇicprayogeṇa 
tadanusārāyātena ca ābhāsitam ityādau 
ṇijarthavyākhyānaprayatnenetyāśaṅkya āha sarvatra ca iti | cittattvasyaiva 
antaḥsvasaṃvedanarūpasya svātantryaṃ rūpāntaratirodhāne 
rūpāntarasvīkṛtau tatsaṃyojanaviyojanādau | yattu samanantarapratyayāt 
viṣayeṇa tadvāsanayā vā sahakṛtāt pūrvasmāduttaraṃ jñānamudetīti 
śuṣkakāryakāraṇabhāvavādināṃ matam, tat na saṃbhavatīti ṇicā 
nirūpitam | pūrvābhāsitam iti sūtrāṃśatvāt vyākhyeyaṇijarthamapi 
pūrvaṃ paṭhitam, tato vṛttikṛtaṃ ṇijantam | tenaiva sautro ṇicprayogo 
vyākhyāta iti na paṭhitaḥ | vyākhyeyaṇijarthatayā vṛttigatatayā pṛthak 
praghaṭṭakena paṭhitam prakāśitasya iti || 2 ||

(page 32)

	nanu parāmarśasya andhapadaprakhyatā mā bhūditi smaraṇe'pi 
arthasya prakāśa upagamyate | tataśca anubhūyamāna iva smaryamāṇo'pi 
bahirayamiti kathaṃ na vyavahāryaḥ | tadvyavahārakāraṇaṃ hi tasya 
arthasya prakāśanam | tacca avikalamastītyāśaṅkya āha

	naca yuktaṃ smṛterbhede smaryamāṇasya bhāsanam |
	tenaikyaṃ bhinnakālānāṃ saṃvidāṃ veditaiṣa saḥ || 3 ||

	smaryamāṇasya arthasya yat prakāśanaṃ tadidānīntanaṃ na bhavati, 
apitu prācyameva tat | tadapica prācyaṃ prakāśānaṃ smṛtilakṣaṇe 
saṃvedane'dhunātanaṃ vimarśarūpaṃ pradhānīkṛtya 
nirbhāsamānamabhedenaiva, natu bhedena, ābhāti | tataśca smaraṇe 
svātmāṃśe savimarśaḥ prakāśaḥ kālānavacchinna eva | arthāṃśe tu 
prakāśaḥ prācya eva | tannāntarīyakavimarśasahitaḥ punarvimarśastu 
idānīntanaḥ | evaṃ tat smaryamāṇasya anubhavaprakāśanadvāreṇa 
bhāsanaṃ bhavati | anyathā svātantryeṇa anubhūyamānatocitaṃ 
tadbhāsanaṃ bhavet, na smaryamāṇatocitam | tena yathā anubhavajñāne 
prakāśādapṛthagbhūtamapi māyāśaktyā māyāpramātuḥ 
pṛthagbhūtamiva prakāśyate vastu, na tathā smṛtijñāne; apitu tatra prācya 
eva asau pṛthagbhāvaprakāśābhimāno'nuvartate | tena pṛthak prakāśaḥ 
kasmāt na bhavati smṛtāviti na codanīyam | 
etaddoṣaparihāranāntarīyakatayā ca prasaṅgataḥ prakṛtamapi siddhyati 
adhikaraṇasiddhāntatayetyāha tena iti | yaduktaṃ 
smṛtāvanubhavaprakāśanamanuvedhakatayā vartate 
anubhavaprakāśābhedena ca artho vartate iti, tato hetoridamapi siddhaṃ 
bhavati- śarīraprāṇādyābhāsānāṃ sphuṭatvena asphuṭatvena 
saṃbhāvitasphuṭatvena ca vartamānātītabhaviṣyadrūpatayā 
tadupādhisaṃkocayogena saṃvido'pi vartamānādibhedena 
upacaritakālabhedāyā

(33)

api paramārthata aikyameveti | satyapi ca sarvata aikye yāvati eva 
nijasvātantryamahimnā sa pramātā parāmṛśati aikyam, tāvati eva tat bhāti 
smaraṇānubhavayoriva | etadeva hi saṃvedanādhikaṃ saṃveditṛtvam- yat 
saṃvitsu saṃyojane viyojane ca svācchandyamiti | 
yadevamaikyamanusandhānarūpaṃ svātantryaṃ, tadeva aparaṃ 
vailakṣaṇyapradamātmana iti sa eva ātmā | eka ātmeti vaktavye 
bhāvapratyaye taddharmaprādhānyaṃ darśitaṃ yathā caitanyamātmā iti 
śrīśivasūtre | tathāhi āryaḥ 

	dharmāntarapratikṣepāpratikṣepau tayordvayoḥ |
	saṃketabhedasya phalaṃ jñātṛvāñchānurodhinaḥ ||

iti | saḥ iti cchannākārasya eva eṣa iti sphuṭaṃ svarūpamuktamiti 
vismayagarbhayā uktyā pratyabhijñānameva sūcayatīti sūtrārthaḥ | 
tadavatārayati saṃkṣepeṇa smṛtikāle ca iti | ca āśaṅkāṃ dyotayati | sā 
darśitā sūtravyākhyānārambhe iti | darśayan iti ca darśayan 
jñānakriyāsvatantryasya maheśvararūpasya ātmana upapattiṃ karotīti 
saṃbandhaḥ | anena ślokārdhasya tātparyadvayaṃ darśitam- 
smṛtyanubhavayorna grāhakāṃśena, na grāhyāṃśena bhedaḥ kaściditi | 
tacca prakṛtaprameyasiddhāvupayogīti | yogijñāna iva iti 
kevalārthaprakāśe tu yogijñānavadapūrvānubhavataiva syāt, na smṛtitā | 
smṛtāvatītatvam iti anubhūtaviṣayāsaṃpramoṣaḥ ityatra yadyapi 
sarvatra kriyāmukhenaiva dravyasya kālasparśaḥ, tathāpi 
avyabhicaritabhavanādikriyāmukhena bhūtatvaṃ vastuno'sattāmāha, natu 
anubhavakriyāmukhena | atra iti smṛtilakṣaṇe | prakāśāt bhinnasya mā 
bhūt prakāśamānatā, smṛtistu bhinnasya kathaṃ na syāditi parihartuṃ 
smṛtiprakāśe iti vṛttavuktam | tat vivṛṇoti

(page 34)

jñānarūpaiva iti | upakṣiptā iti prathamārdhavyākhyānakāle eva 
sucitetyarthaḥ | anubhavena saha arthaḥ smaraṇādabhinnaḥ iti vṛttyā 
tātparyadvayaṃ sautraṃ vyākhyātam | smaryamāṇasya iti sūtre 
anubhūtasya asaṃpramoṣalakṣaṇaṃ bhāsanaṃ vedanā, tena 
grāhakagrāhyāṃśau dvāvapi ekībhāvaṃ smaraṇe pratipadyete iti uktam | 
atra hetumāha vṛttikṛt prakāśāt bhinnasya iti | nanu smaryamāṇasyaiva 
arthasya na eṣa dharmaḥ, anubhūyamānasya apihi eṣaiva vārtā | satyam, eṣa 
tu āśayaḥ smṛtāvadhyāruhya evamabhidhānasya- anubhūyamāne 
māyāśaktyā pṛthagabhimānastāvadasti bahiḥ, iha tu so'pi nāsti | tata eva 
na arthakriyā smaryamāṇāditi | ata eva bhaṭṭena api 
smṛtinirbhāsamānavastumukhenaiva arthadharmatā prakāśasya apasāritā

	artho na bhāsate bhrāntismṛtyoḥ ............................... |

iti,

	................ smṛtau tu nirdagdhapadārthaviṣayo yathā |
	sa bhāvo neṅgate naivaṃ prakāśetāpi .................. ||

iti ca | purastāt iti ādisiddhasūtrādiṣu | vakṣyate ca iti 

	prāgivārthaḥ ............................................................ | (1|5|2)

ityādisūtreṣu | tatra ca yadyapi sāmānyena 
samastajñānasādhāraṇamidamuktam, tathāpi viśeṣāntaravat smṛtirapi 
atra nirastā, pratyuta tanmukhenaiva na arthadharmaḥ prakāśaḥ siddhyediti 
darśitameva | arthasya ca smṛtau bhedena prakāśe smaraṇataiva na bhavet, 
pūrvamanubhavanameva syāt | tena smaraṇe yadarthasya prakāśanaṃ, 
tadarthamatitamāṃ kroḍīkaroti; cchāyāmātreṇa tu pṛthaktābhimāno'tra, 
- ityetāvatā

(page 35)

anubhavasaṃskārajatā ucyate | smaraṇe eva hi arthasya śvetatāveśo 
dṛṣṭāntaḥ, natu anubhave | tatra tādātmyatāvabhāsasya yauktikatvāt 
śvetaguṇasya samavāyadarśane'pi tādātmyena avabhāso'ṅgīkāryaḥ | 
yadāha tatrabhavān 

	ātmāntarasya yenātmā tadātmevāvabhāsate |
	yataścaikatvanānātvatattvaṃ nādhyavasīyate ||
	tāṃ śaktiṃ samavāyākhyāṃ ....................... | (vā pa. 3|10)

iti | vastusthityā tu bhinnarūpatvam iti vacanaṃ 
nirbhāsanasārapadārthasvarūpanirūpaṇāvasare na saṃgatameva | tathāca 
nareśvaravivekaḥ 

	svayaṃ prāsādo na śveto nāpyaśvetaḥ ............. |

iti aprāmāṇikoktiḥ | nahi vastudharmayoranyonyaparihāreṇa 
avasthitayoranyatareṇa ayuktaṃ vastu saṃbhavediti | yacca ucyate 

	pradeśasyaikadeśaṃ vā parato vā nirūpaṇam |
	viparyayamabhāvaṃ vā vyavahāro'nuvartate ||

iti | tatra yadi pāramārthikamanirūpyaṃ rūpaṃ tanmātrasaṃcayo vā 
saṃsargi dravyaṃ vā brahmadravyamabhinnaṃ vā sarvato vyāvṛttaṃ 
svalakṣaṇaṃ vā,- ityukte

	vastusvarūpaṃ tattādṛk.................... |

iti kathaṃ pratītyam | yadāryaḥ

	anirūpitena nāma ayamātmanā bhāvān vyavasthāpayatīti 
svavyavasthā bhāvāḥ |

	iti | tat yuktamuktam- yat yadātmakaṃ na bhavati, na tat tena vapuṣā 
prakāśate pītatayā iva nīlam | prakāśate ca prakāśātmanā 

(page 36)

smṛtau bhāvaḥ iti na tadātmā | atadātmanastathā nirbhāsane tadeva tathaiva 
bhāti abādhitena rūpeṇeti ubhayato niyamo na bhavet | aniyamaśca 
vyāpakasya dṛśyamānasya niyamasya viruddha iti 
vyāpakaviruddhopalabdhiprasaṅgāt tathāaprakāśanamatadātmatvāt 
vipakṣataḥ palāyitaṃ tadātmatayā vyāpyate iti tadviruddhasya 
atādātmyasya viruddhavyāptopalabdhyā pratiṣedhaḥ | evaṃ ślokārdhaṃ 
vyākhyāya tadarthasya hetutāmanyatra yojayituṃ yat sautraṃ tena ityādi, 
tadvṛttim evaṃ ca ityādikāṃ vivarītuṃ pūrvoktopasaṃhāramukhena āha 
tadevaca iti | utprekṣādi ityatra api ādipadena 
pratyabhijñāsaṃkalpanādergrahaṇam | vikalpanaṃ tu 
anubhavāyamānatvāt na pṛthaguktam | vartamānabhaviṣyadekīkārātmikā 
utprekṣā samudāhṛtā bhūtabhāvyekīkārotprekṣāmapi upalakṣayati 
mama yā punaranubhaviṣyata iti | nanu saṃvidāmaikyamekarūpatā, 
ekasaṃvidrūpatvamātmeti katham, yāvatā smaraṇādayastasya dharmā iti 
ātmavādināṃ matam | satyam, tatra tu idamākūtamiti darśayati kevalam iti 
| dharmatākalpane vicitratā hetuḥ, tasyāmapi viṣayavaicitryaṃ 
saṃvyavahriyate iti sāṃvyavahāriko'yaṃ bhedaḥ, natu ānubhavikaḥ, yena 
pāramārthiko bhavet | anena vaiśeṣikasya mohaḥ śamitaḥ | sahi brūte- 
bhedastāttvikaḥ, samavāyabalāt tu abhedaḥ iti | tacca anubhavavirodhi | 
yadajaḍapramātṛsiddhiḥ 

	na siddho'prathanādeva jñānādisamavāyyapi | (19)

iti | atītābhāsena iti anubhavakāle, vartamānaḥ ābhāsaḥ 
smaraṇībhūtaḥ, tāvekasya arthasya kathaṃ rūpaṃ syādityarthaḥ | 
anubhavasmṛtyoreva nāsti bhedaḥ ityāśayena āha atrocyate iti | vakṣyate iti

(page 37)

	naiva hyanubhavo bhāti smṛtau pūrvo'rthavat pṛthak | (1|4|4)

iti | anena vṛttau yat tathāhi iti uttaraprabandhasya 
prakṛtasamarthakatādyotakatvam, tat vivarītuṃ prabandho'yaṃ yojanīyaḥ | 
jñānānāṃ ca iti bhedena prathane'pīti āśayaḥ | vakṣyate iti

	kevalaṃ bhinnasaṃvedyadeśakālānurodhataḥ |
	jñānasmṛtyavasāyādi sakramaṃ pratibhāsate || (1|5|21)

iti | nanu jñeyabhedāt ya upacaritaḥ kālabhedaḥ, so'nubhavasmaraṇayoḥ 
kva prayāta iti | āha evaṃ ca iti evamapi yaḥ 
pūrvāparavyavahāro'rthāpekṣayā upacaritaḥ śaṅkyate, sa nāsti 
arthasyaiva bhedābhāvāt | tāvadgahaṇena 
samarthayiṣyamāṇamanyathātvamasya vyavahārasya sūcayati | vakṣyate iti

	yā caiṣā pratibhā tattatpadārthakramarūṣitā |
	akramānantacidrūpaḥ pramātā sa maheśvaraḥ || (1|7|1)

ityādyuddeśeṣu | nanu bhāti ayaṃ bodhasmṛtyoḥ pūrvāparabhāvaḥ | 
satyam, satu na viṣayabhedāt | kutastarhi | 
kalpitamāyāpramātṛbhedādityāha tasyaiva tu iti | na arthabhedādeṣa 
pūrvāparatāvyavahāraḥ, apitu anena prakāreṇa | viśeṣaṃ turdyotayati | 
ātmaiva īśvaratvāt sarvaśaktiḥ | tasya vicitrābhāsakāritvena lakṣitā yā 
kālotthāpikā śaktirābhāsānāṃ pratyabhijñāvaicitryeṇa 
kramotthāpanasāmarthyaṃ, tayā hetubhūtayā 
sūryādikriyāṇāmudayāstamayavṛttī sphuṭena anubhavena lakṣaṇīye ye 
ābhāsasya bodhaniṣṭhasya ākārasya sadasattve bhāvābhāvau 
prabandhavṛttī, tābhyāmābhāsānāṃ ghaṭādīnāṃ bhedasya 
kriyāvaicitryasya prakāśanāt kramasya avabhāsanaṃ bhavatīti 
kālacintāvasare ayaṃ kramo nyāyyo lakṣyate 

(page 38)

	kramo bhedāśraya ............................... | (2|1|4)

ityatra | kramāvabhāsane ca asmin dehaprāṇabuddhyāderapi 
māyāpramāturbālyayauvanadurbalatvadṛḍhatvapaṭutvāpaṭutvādya-
vasthābhāsānāṃ yaḥ kramaḥ so'nayoranubhavasmṛtyorbodhena 
antarmukharūpeṇa abhede'pi kevalamupacaryate, upacaritabhedayośca 
tayorviṣaya eko'pi bhidyate iveti | evaṃ yadarthasya paurvāparyamupacaritam, 
tat vāstavena abhedena na virudhyate māṇavakasya iva agnitvagotvādīini 
māṇavakatvena | aupacāriko hi bhedo na vastuni niviśate 
pramātṛbuddhiniveśitvāt tasya | tulyaviṣayatvaṃ 
viruddhayordharmayorvirodhakatvam, anyathā viśvaṃ viśvasya viruddhaṃ 
bhavet | tena virodhakāraṇasya tulyaviṣayatvasya viruddhena 
bhinnaviṣayatvena vyāptaṃ yadaupacārikatvaṃ, tat 
svavyāpakaviruddhakāryasya virodhasya niṣedhakamiti 
kāraṇaviruddhavyāptopalabdhiḥ | evamaupacārikamātre tāvat na virodhaḥ, 
kimaṅga iha upacāraparaṃparāyām | iha hi paramārthato na kvacit bhedaḥ, 
kevalaṃ svātantryaśaktireva pārameśvarī svapnasaṃkalpayogīcchādāviva 
evaṃ bhūtena ābhāsabhāvābhāvaprabandhena bhātīti kiṃ kena 
virudhyate iti tātparyam | nanu bhinnaviṣayatvādastu atra virodhaḥ 
sphuṭatvāsphuṭatvāt tu tasyaiva viṣayasyeti abhinnaviṣaye te ca sta eva 
anubhūyamānasmaryamāṇayoriti tatkṛto virodhaḥ syāditi punarapi 
kathamaikyaṃ viṣayasyetyāśaṅkāṃ niṣedhati na ca iti | naca 
ābhāsabedādapi bhidyate so'rthaḥ,- iti tamābhāsabhedamekamukhena 
upalakṣayati smṛtau ityādinā | nanu yadi aṅgīkṛta ābhāsabhedaḥ, tarhi 
tatkṛtaḥ kathaṃ na bhedaḥ | itthamābhāsasya vimarśa eva jīvitamiti 
tadbhedābhedakṛtaiva vastubhedābhedasthitiḥ | iha ca vimarśa aikyena eva | 
saugatairapi asphuṭagrahaṇaṃ dhūlipaṭa-

(page 39)

lādivastvantarasāhityagrahaṇameva, vastunastu 
adhyavasāyaikyādekatvameveti prāmāṇyaparīkṣādau nirṇītam | vakṣyate 
iti 

	dūrāntikatayārthānāṃ .............................. | (2|3|10)

ityādyuddeśeṣu | nanu pūrvānubhavena sahabhāvaḥ smaryamāṇavastunaḥ 
kathaṃ vṛttāvuktaḥ | sa hi na pṛthak bhāti | tat kaḥ sahārthaḥ | satyam, 
yadā punastāmeva smṛtiṃ vikalpāntareṇa adhyavasyati anubhūtaṃ 
smarāmīti, tadā 

	svātantryāmukta ..................................... | (1|5|16)

iti nyāyena tadarthapṛṣṭhe spaṣṭo'sau vedyatayā anubhavo bhāti,- 
ityabhimānāt | tadāśayena itthamuktamiti darśayati yadyapica iti | 
arthamayaḥ iti arthaḥ prakṛto viśeṣyatvena yasmin saḥ | nanu 
itthamarthavadanubhavasya api asti bhedena prathā, prakāśamānatābalāt tu 
yaḥ prakāśarūpāt bodhādabhedaḥ, so'rthasya api | tat ko viśeṣaḥ, yena 
saṃvidaikyadvāreṇa ayamadvayopakramaḥ

	puruṣa evedaṃ sarvam (śve. u. 3|15)
	brahmaivedaṃ sarvam (nṛ. u. u. 6 kha.)

ityevamātmakebhyo nirviśeṣābhedopakramebhyo vailakṣaṇyena āśrita iti | 
āha evam iti | yadyapi vyavahārāt viśeṣaṇaviśeṣyatālakṣaṇāt 
bhedo'yaṃ darśitaḥ, tathāpi māyāpade arthasya tāttvikamaikyaṃ sadapi 
na parāmarśadaśāṃ śrayate apitu anubhavasya | tena 
tāttvikapramātrabhedavimarśaprakāreṇa hetubhūtena 
prāgahamanvabhūvam iti pramātari ārūḍhasya anubhavasya ābhāsanaṃ 
yuktam | tato hetoranubhavo'rtha iva māyādaśāyāmapi smṛtau na 
pṛthageva bhāti, apitu apṛthagapi | tato hetoḥ pūrvasūtre saṃvidaikyaṃ 
yaduktaṃ nirviśeṣādvayavādavailakṣaṇyena, tat yuktamiti sūtrārtho 
bhaviṣyan prathamaṃ buddhau niveśanena dṛśyatām- evaṃ kila 
idamityavadhānadāpanarūpeṇa

(page 40)

vṛttau darśitaḥ | hiśabdena bhāvisūtragatena saṃvidaikyopakramasya 
upapattau hetutā sūtrārthasya ukteti saṃvidaikyaṃ rājagavīkṣīre gauriva 
pūrvottarārthābhyāṃ saṃbadhyate iti darśyate || 3 ||

	naiva hyanubhavo bhāti smṛtau pūrvo'rthavat pṛthak |
	prāganvabhūvamahamityātmārohaṇabhāsanāt || 4 ||

	etadavatārayati saṃkṣepoktyā naca iti | smaraṇajñāne iti 
smṛtijñānavyavaharaṇarūpe tu adhyavasāyāntare viśeṣaṇatayā sṛṣṭo 
bhātu nāma pṛthagityarthaḥ | nanu bhavatu anvabhūvamityatra kartṛlagnatā 
anubhavasya, karmalagnatāyāṃ tu sā katham | āha artha eva iti 
kartṛsthānānāṃ kriyāṇāṃ karmalagnatāyāṃ spaṣṭāyāmapi 
tatkartravaṣṭambhāparityāga iti anubhavasya kartṛsthatā na vighaṭate | tata 
eva upasarjanatā yuktā | idamityevaṃbhedyatve pṛthak dravyarūpatayā hi 
viśeṣyatvaṃ bhavet, vīraḥ puruṣaḥ iti tu upasarjanatvaṃ na śrautāt vṛttāt, 
api tu vākyīyāt | etacca saṃbandhavimarśe vicārayiṣyate | nanu yadā 
anupasarjanatayā anubhavaḥ parāmṛśyate arthastu aprādhānyena- 
so'nubhavaḥ sphuṭo nīle mama abhūditi, tadā asti asya pṛthak bhāsanamiti | 
ata āha tasya tu iti | mātrapadena mūlapratītiviśrāntireva 
vyavahārapratītīnāṃ tattvamityāha | vakṣyate iti 

	smaryate yaddṛgāsīnme saivam ........................ | (1|4|6)

ityatra | etadevaca yuktamiti draḍhayati so'hamevam ityādinā | naca ātmā 
vedya eva vedakāntarānavasthānāditi hi uktamiti āśayaḥ | buddhyā cetyā 
māyāpramāturye dharmāḥ sukhitvaduḥkhitvamūḍhatvādayo 
vedyarūpāḥ, teṣāṃ bodhe upacāreṇa tathā bhedābhimānakṛtena 
āropaṇā iyaṃ vedyatetyarthaḥ | yaśca ityādinā vṛttigranthena 
etatsūtrārthasya 

(page 41)

saṃvidaikye hetutvaṃ sūcayan sautro hiśabdo vyākhyātaḥ | taṃ vivṛṇoti 
yo'yam ityādinā | aham iti vyācaṣṭe vedya iti | bhūmikāgrahaṇena 
naṭasya iva evamādirūpatā prakāśavapuṣaḥ parameśvarasya vedyatā 
svāvaṣṭambhāparityāgena abhimānamātre setyāha | nanu ca saṃvidaḥ 
kālasparśa eva nāstīti kathaṃ vṛttiḥ anekakālagata iti | anekakālagateṣu 
vedyeṣu yadunmukhatvaṃ, tāvanmātrādeva sa bodho'nekakāla iti 
upacāreṇa ācaryate | nanu vedyāni api bodhādabhinnāni eveti | ata āha 
pratyagātmatā iti | pratipuruṣamābhimukhyena 
anyānāmiśrasvasaṃvedanamātrarūpeṇa añcati jānāti,- iti yo 
māyāpramātṛrūpaḥ pratyagātmavargo meyebhyo'nyonyataśca 
bhedaprāṇaḥ, tadavasthāyāṃ vedyānāṃ 
bhedādābhāsabhāvābhāvakṛtakālakramonmeṣāt bhinnakālatvam | 
tadunmukhaśca ekaḥ svasaṃvedanapramātā anekakāla iti upacaryate | 
tadanusāreṇaiva asmābhiḥ svairisūtre sahi iti pratyagātmatāmātmani 
bhāsayamāna iti vyākhyāyi yat, na tadutsūtramiti mantavyam | draṣṭā 
smartā iti prakṛtibhāgasya bhedena darśanasmaraṇarūpatayā 
vedyonmukhatvakṛtayā kālabhedaṃ darśayan pratyayāṃśena aikyaṃ 
darśayannanekakālatvaṃ sūcayati | adraṣṭuḥ smartṛtvamayuktam iti 
abhidadhānaḥ 
svatantrakāryakāraṇamātrasvabhāvabodhaparaṃparāmātreṇa na 
smaraṇasiddhiriti smartā draṣṭeva kalpitaḥ | (1|2|6) iti pūrvapakṣoktiṃ 
pratikṣipati | atra iti vṛttau | prathamānatāyāṃ vedyatā upacaritā 
tātparyaṃ tatparatvaṃ viśrāntisthānatvamanyānveṣaṇaśūnyatva-
manapahnavanīyatāparyavasitaṃ prayojanaṃ hetutvena abhisaṃdhāya | 
vedanakarmatāyāṃ hi prakāśāntaropajīvitvalakṣaṇāyāṃ 
prakāśakāntaramapekṣyam | tacca nāstīti mukhyārthabādhaḥ | vedye ca 
vyavahārāpekṣayā

(page 42)

prathamānatvaṃ vyavahriyate iti vyavahārābhimānavaśena 
vidyatāprathayorekārthasamavāya upacāre nimittam || 4 ||

	yogināmapi bhāsante na dṛśo darśanāntare |
	svasaṃvidekamānāstā bhānti meyapade'pivā || 5 ||

	nanu iti | yathā yuktibalāt prakāśānupraveśo'ṅgīkṛtaḥ, tathā 
grāhyagrāhakayoranubhavabalāt bhedo'pi aṅgīkartavyaḥ | 
tatsamarthanāyaiva ca māyāśakterabhyupagamaḥ | tataśca yathā ghaṭo 
māyāpramātuḥ pṛthak bhāti, tathā yoginaḥ parasaṃvedanam | tat ca tridhā 
para idaṃ jānātīti, paratra śarīre pūrvajātilakṣaṇe eṣa 
me'nubhavo'bhūditi, pareṇa idamitthaṃ pūrvaṃ dṛṣṭamadhunā smaryate 
iti | sarvaṃ ca etat pramātrantaragatā upalambhāḥ itivṛttau darśitam, 
sūtre'pi dṛśaḥ iti bahuvacanena | ṭīkāyāmapi prathamaṃ 
sahajānandāvirbhāvastadā syāt ityantena vicāritam, dvitīyaṃ 
smṛtireva asau ityantena, tṛtīyaṃ pramātrantara ityādinā | tadetat 
tridhāsaṃvedanaṃ vedyam | tena māyādaśāyāṃ jñānasya 
jñānāntaravedyatvamāyātam | tena ca anubhavasmaraṇayorapi 
vedyavedakatā, tayā ca ekaviṣayatvena viṣayamelanam, tena 
vyavahārasiddhiriti kathamekapramātṛsamarthanamiti siddhāntamabhyupetya 
aniyamāt kathāprasaṅgo'yamapasiddhāntaḥ prasajati,- iti 
codayiturabhiprāyaḥ | tadatra iti atra pūrvapakṣe taditi 
pūrvoktamuttaramastīti śeṣaḥ | tadeva smārayati yogināmapi iti | taditi vā 
vākyopakrame | prāguktanītyā iti

	dṛk svābhāsaiva .................................. | (1|3|2)

ityādyuktena nyāyena | tasya iti parasaṃmatasya api bodhasya | evaṃ 
yoginām ityādi bhānti ityantaṃ sūtraṃ saṃkṣepeṇa vyākhyāya

(page 43)

	aparīkṣitābhyupagamāt 
tadviśeṣaparīkṣaṇamabhyupagamasiddhāntaḥ | (nyā. sū. 1|31)

iti kathitaprakṛtaprameyasamarthanahetudārḍhyaprathanāya 
abhyupagamasiddhāntamāśritya yaḥ sūtraśeṣa uktaḥ, taṃ 
vyācaṣṭe'vatāraṇāya grāhyabhūmiḥ iti | anubhavabalāt bheda iti uktam 
| sa ca yogijñāne kāmamāpāte yuktaḥ | eṣa jānātīti ahaṃ jānāmīti 
yoginaḥ parasaṃvedanaṃ na asmadarthena saṃbhedametīti hi asti 
vacanāvakāśaḥ | prakṛte tu so'pi nāsti ahamanvabhūvam iti 
asmadarthaśarīrībhūtasyaiva anubhavasya nirbhāsanāt | apiśabdena 
dṛṣṭāntatvena yat saṃbhāvitaṃ pareṇa, tadasya na ghaṭate ityāha dṛśaḥ 
iti upalabdhayaḥ parakīyā na darśanaviśeṣe 
bhūtārthabhāvanāprakarṣaviśeṣaparyantaje saṃvedane vedyatayā 
avabhānti | saugatānāṃ tāvat svasaṃvedanameva jñānasya vapuḥ, tadeva 
kathaṃ yadi vedyatā | sāṃkhyānāṃ puruṣacchāyaiva upalabdhiḥ, 
puruṣaśca asaṃvedyaparvā | kāṇādānāmapi ātmāntarasamavāyi 
jñānamantaḥśarīravṛttinā yogimanasā kathaṃ jñāyate | 
jaiminīyānāmapi ātmāntaratādātmyavṛtti | tena yogina iyat 
parajñānavedanaṃ yat paradehādisahabhāvī 
nīlamadhurasukharāgādyavabhāsamayaḥ prakāśa iti | tatra ca nīlādi 
pṛthagbhāvena vedyameva, prakāśāṃśastu ahamityeva prakāśate | 
pramātrīkṛtadehādyavabhāsasaṃskārāt tu tanniṣṭhāmidantāṃ 
prakāśabhāge'bhimanyate, dṛḍhasvaparavibhāgasaṃskārabhraṃśe tu 
sarvamātmatayā paśyan svasṛṣṭameva svaparavibhāgaṃ paśyatīti 
tadapekṣayāpi na jñānaṃ jñānāntareṇa vedyam | yogijñāne vā 
avicāritāpātaśaṅkitapratibhānabalādeva vedyatā astu parajñānasya, natu 
evaṃ smṛtāviti sūtrārthaḥ | bhānti iti kākākṣivat yojyam | nanu yogi 
kriyāśaktiprakarṣavānapi iha darśane, tat 

(page 44)

kathaṃ jñānaśaktiprakarṣamātramasya vṛttau nirūpitam | āha 
upayujyamānatvāt iti | jñānaṃ jñānāntaravedyamiti kila iha sādhyam | 
tatra dṛṣṭāntatayā parokṣasya paracittāderjñānamupayujyate iti kimanyena 
tatprakarṣeṇa | etacca yogināṃ darśanaviśeṣa iti uktau śrutāyāṃ 
bahutaraśāstralokaprasiddhe yogipratyakṣe matirabhipatatīti labhyate | tadāha 
yogipratyakṣasya iti | vṛttau gatagrahaṇaṃ prāptimātre lokaprasiddhe 
prayuktaṃ samavāyadvāreṇa tādātmye paryavasāyitaṃ ṭīkāyām | 
dṛśaḥ iti upalambhāḥ iti ca bahuvacanaṃ vivṛṇoti tattat iti | etat teṣāṃ 
svabhāva iti kuta ityāśaṅkya tāvanmātraṃ lakṣaṇaṃ hi eṣām iti 
uktam | yat yasya anyato vyāvartakaṃ, sa eva tasya svabhāvo ghaṭasya iva 
pṛthubudhnodarākārātā | tathā ca jñānasya 
svasaṃvinmātrarūpatvamanyato jaḍāt vyāvartakamiti sa eva tasya 
svabhāvaḥ | svo hi bhāvaḥ sa eva, yo na vyabhicārī | tata eva ghaṭasya na 
dravyatvaṃ svo bhāvaḥ, kintu saṃbhavi tadasya rūpaṃ 
pṛthvādirūpaviśiṣṭaṃ tu bhavet nāma asādhāraṇatvāt | yena yat na 
hīyate, yataśca na hīyate yat, tadeva asya avyāptyativyāptiśūnyaṃ 
lakṣaṇaṃ svabhāvaḥ | anyasya svabhāvatve atadapi tat syāt, tadapi ca atat | 
svaṃ vyatirekāvyatirekayuktameva arthāṃśena samuccitya saṃvidameva 
arthe samuccinvan cakāreṇa turyamapi niyamaṃ sūcayati svā saṃvideva iti | 
nanu svaparaprakāśo bodhaḥ, tat svasyaiva iti kathamiti | ata āha paramapi hi 
iti tathābhūtaṃ ca iti | sat ityanena idamāha- yat yasya lakṣaṇaṃ, tat cet 
na bhāti, tarhi na ābhātameva tat bhavet, 
caturvidhaniyamaniyantritarūpāvabhāsaśca jñānasya 
jñānāntaravedyatāyāṃ vighaṭate eveti | svaiva saṃvit ityatra 

(page 45)

pratiyogirūpaṃ darśayati parāpi asya saṃvit iti | svasya saṃvideva ityatra 
tu pratiyogi asaṃvidapi ca | tat iti svasyeti śeṣaḥ | svā saṃvidevetyetatprāgiti 
tu sūcayati jaḍasya evaṃlakṣaṇatvāt iti jaḍamapi asya rūpaṃ syāt, natu 
saṃvideveti bhāvaḥ | svasyaiva saṃvidityatra tu pratiyogi na darśitaḥ 
prakṛtānupayogāt paraprakāśatvasya pratiyogino bhavato'pi 
jāḍyanimittatvābhāvācca | nanu evaṃ parajñānaviṣayaṃ yogijñānamiti 
kathaṃ vyavahāraḥ syādityāśaṅkya kramāt kramaṃ svapakṣe pātayati 
tadā tu iti yadā ayaṃ vyavahāraḥ iti bhāvaḥ | pratyupasthitam iti 
svahetubalena saṃnidhiṃ yogisaṃvedanasya parasaṃvedanasya ca darśayati | 
tatra parasaṃvedanaṃ svaprakāśatvāt tāvat prakāśate yogisaṃvedanasya 
ca nairmalyātiśayena apratihataprasaratvāt tadapekṣayāpi tasya 
parasaṃvedanasya svasattānapekṣayaiva svaprakāśatā na tirobhūya āste iti 
darśayati taṃ yoginaṃ prati iti | asya iti parapramātṛjñānasya evam iti 
uktaprakāreṇa jñānalakṣaṇasya niyamavatsaṃvedanarūpasya atikrama 
ullaṅghanaṃ na bhavati,- iti saṃbhāvyate | nanu etadapi iti asmaddṛśā 
tāvadetadupapadyate, natu jñānasya jñānāntaravedyatayeti āśayaḥ | 
pareṇa iti mātrantarabodhena | karmapravacanīyavibhaktyā hi saṃbandha 
ucyate | ṣaṣṭhīsthāne hi sā | naca viṣayaviṣayibhāvo jñānayoḥ 
saṃbandhaḥ | yato viṣayitā ghaṭena viṣayeṇa jñānasya iyameva ucyate- yat 
tadākārānukāritvaṃ nāma sārūpyam | viṣayarūpaṃ hi anukurvatā 
bodhena tadālambitaṃ svīkṛtaṃ bhavatīti viṣayasya ālambanatā 
sārūpyāt | tacca bhedābhedābhyāṃ vyāptaṃ sarvathā bhede sarvathā 
abhede tadabhāvādambhaḥstambhayoriva anyonyaṃ ghaṭasya iva ca 
svātmani | naca jñānasya jñānāntarāt bhedaḥ 

(page 46)

kaścit deśakālākārabhedasya nirastatvāt, jñeyopādhikasya bhedasya 
apāramārthikatvāt jñeyāṃśasya nīlāderāśayasya vā rāgādeḥ pṛthak 
prakāśena viṣayatve'pi bodhāṃśasya viṣayabhāvāyogāt | darpaṇayostu 
deśakālasvarūpātmakaṃ sarvameva rūpaṃ vilakṣaṇamiti 
anyonyapratibimbayogakṛtamastu sārūpyam, naiva jñānayoḥ | tadayaṃ 
prayogaḥ- na jñānayorviṣayaviṣayibhāvaḥ 
pāramārthikabhedānupalabdheriti vyāpakānupalabdhiḥ | sārūpyaṃ 
bhedena vyāptaṃ viṣayitāyā lakṣaṇaṃ, pṛthakkaraṇe'pi tasya 
vyāpakavyāpakaṃ vyāpakamevetyāśayena vyāpakavyāpakādicintā na 
kṛtā āryadharmakīrtinā | kāraṇakāraṇādyanupalabdhāvapi 
kāraṇānupalabdhiḥ śakyā bhaṇitumiti kāraṇakāraṇaviruddhādyapi na 
cintitam | kalpitarūpatvena ca dharmīkaraṇamupapannamiti | jñānayoḥ iti 
prayogo māyāpadānusāreṇa | māyayā ca paramārthato na bodhasya 
śaktimataḥ svarūpamāvriyate dāhakaśaktyā iva vahneḥ | āvaraṇamapi hi 
vastutaḥ pūrvāvasthāvilakṣaṇasvarūpajanakameva | nanu tadākāratvaṃ 
viṣayitā jñānasya ca jñānāntarākāratvaṃ tvayaiva bhedaṃ 
samarthayamānena uktamityāśaṅkya āha kiṃca iti | evaṃbhūte 
viṣayabhāve aikyaparyavasāyini na jñānaṃ jñānāntaravedyaṃ 
samarthitaṃ bhavet | yuktaṃ ca etat | yasya hi yat svarūpaṃ, tat cet na 
prakāśitaṃ, rūpāntaraṃ ca asya prakāśitam; tarhi na viṣayīkṛtaṃ tat 
śuktikārajatapītaśaṅkhādipratyayeṣu iva śuktikāśaṅkhādi | jñānasya 
ca grāhakameva svarūpamiti tadaprakāśane grāhyabhāvasya ca prakāśane 
tat na viṣayīkṛtaṃ bhavet | viṣayīkṛtatve hi kvacideva bhavat niyamena 
vyāptam, vipakṣe ca aniyamaḥ prasajyate iti tatsvarūpaprakāśenaiva 
vyāpyate iti vyāpakānupalabdhiḥ | saṃkṣiptatvāt vṛttau na dṛśo 
darśanāntare iti sautraṃ na vivṛtaṃ pūrvamuktatvāt 

(page 47)

svātmārūḍhā eva iti evakāreṇa tu sūcitam | nanu evaṃ 
svātmāruḍhatvena avabhāse parajñānaṃ prakāśitamiti paravyavahāraḥ 
katham | aupādhikatvenetyāha parapramātṛ iti | ekasmin hi yogisaṃvedane 
parasya śarīrapraṇādi grāhakābhimataṃ, nīlādi grāhyābhimataṃ 
rāgādicaittarūpaṃ jñānaṃ ca paramārthagrāhakarūpaṃ samameva 
nirbhāsate | tatra aucityāt jñānaṃgrāhakabhāgatādātmyāpannamapi 
pramukhaparigṛhītaparasaṃmatadehādyupādhisaṃbhedārūṣaṇayā 
paratvena vikalpyate, gṛhyate tu svatvenaiva | śarīrādi tu paratvena 
svāhaṅkārapṛthagbhāvena bhavati | niyatiśaktyaparikṣayāt gṛhyate ca 
vikalpyate ca | tattvam iti vivṛṇoti paramātmavedakam ityanena | tattvaṃ 
paramātmavedakatvamityarthaḥ | nanu paramātmavedakamiti na upakrāntaṃ; 
tat kathaṃ sarvanāmnā pratyavamṛśyamityāśaṃkāṃ vyapohati 
sarvajñasya iti | sarvajñagrahaṇaṃ prāgupakrāntaparasaṃvedanopakramāt 
parātmavedakaparyāyatāmetīti bhāvaḥ | nanu anyabodhena cet yogī 
pramātṛbhāge samāviśyate, tarhi tadgatamātrādisaṃbhedāpatteḥ 
sukhaduḥkhasahasrasaṃbhedavyatikarakalitaḥ sa saṃsāribhyo'pi kaṣṭāṃ 
daśāmāśritaḥ | yadāha idameva hi naḥ sukhaṃ yat sātaṃ 
saṃvedanam iti | yo yena aikyamāpadyate, sa taddharmabhāk bhavati 
kuṅkumapaṅkapiñjarajalāñjalijanitasaṃbhedamiva jalāntaram | tathāca 
yogibodho bodhāntarairiti svabhāvehetuḥ, anaikyāpattyā hi viruddhayā 
vyāptamataddharmavattvamiti vipakṣāt pracyāvakaṃ pramāṇam | atra 
viruddhavyāptopalabdhiprasaṅgaḥ | etat pratikṣipati naca iti | cakāraḥ 
śaṅkādyotakaḥ, ekamātrapadābhyāṃ sukhāderadhikasya grāhyabhāge 
eva viśrāntimāha | tathāca sukhādīn prakṛtiguṇāneva vakṣyāma iti 
avāstave śarīrādisthānīye buddhipramātari teṣāmavasthānam, na 
saṃvedanarūpe |

(page 48)

evaṃ ca yathā paradehadharmairgaurādibhirasya na saṃvit saṃbhedameti 
gauro'hamiti niyatiśaktyā niyantraṇāt, svadehadharmaiḥ punarabhyeti 
śyāmo'hamiti; tathā parabuddhidharmairasaṃbhedo'sya vakṣyate iti 

sa svarūpāparijñānamayaḥ ......................... | (4|1|3)

ityatra | ata eva iti na vāstave pramātari sukhādi, iti yaduktam, tat 
vakṣyamāṇo'pi heturupayukta iti evaśabdo'dhikaraṇasiddhāntatāmāha | 
heturapihi adhikaraṇasiddhānta ucyate eva | nanu 
grāhakabhūmikābhinnavedyasaṃvedanocitamāyāpramātṛtādaśāto ye 
uttīrṇāstatra na grāhakabhāvābhimāninaḥ, te kathaṃ tathā 
bhavantītyāha vāstava iti vāstavaṃ pramātāraṃ samyak 
dṛḍhaniścayaparyantaśuddhavidyāprakāśabalena ye āpannāḥ 
prāptāstatraiva pramātṛtābhimānabhājaḥ, teṣāṃ nityoditamapica 
tadrūpaṃ

	............................ cakrabhramavat dhṛtaśarīraḥ |

iti śeṣavartanasaṃbhāvanāt 
niyatisaṃskārajadehādipramātṛbhāvāvarohaṇātmake vyutthānasamaye 
pratyastamitamiva bhāti,- iti daśāśabdena vyavahṛtaṃ 
tattatsvahetūpasthāpitagrahaṇena 
sukhaduḥkhādīnāmavaśyaṃbhāvinīmutpattimāha | tacca utpannaṃ 
sukhaduḥkhādi taiḥ sākṣātkriyate anyagrāhakavat saṃvedyate, 
yathoktamabhinavabhāratyām 

	upacacāra ca sā kṛtimāninī
		munimanargalabhogasamarpaṇaiḥ |
	paritutoṣa ca so'pi virāgiṇāṃ
		nahi sukhaṃ karaṇāśrayiṇāṃ sukham ||

iti | sākṣātkāre apitu ahaṃ sukhīti pramātari sukhānuvedhamaye 
nābhimanyate, tata eva anugrahamupaghātaṃ ca 
sukhaduḥkhakṛtamabhimanute iti | bhagavatā gītaṃ 

	duḥkheṣvanudvignamanāḥ sukheṣu vigataspṛhaḥ | (bha. gī. 2|58)

(page 49)

iti | udvegaspṛhākṛtāśca harṣādaya iti tadabhāve tadabhāva iti darśitaṃ 

	harṣāmarṣabhayakrodhairmukta .................................... | (12|15)

iti | nanu evamanugrahopaghātau cet na saṃvedyeta, tarhi bāhyo ghaṭaḥ 
sukhādyātmā api yathā udāsīnasya na sukhaduḥkhamohātmā, tathā 
buddhigatamapi sukhādirūpaṃ na sukhādyeva syāt | 
sukhādirūpatāvirbhāvasya hi anugrahopaghātau lakṣaṇaṃ, anyathā 
anavarataṃ sarvaḥ sukhaduḥkhaparītaḥ syāditi tadvyāpakarūpābhāve 
tadanāvirbhāvaḥ,- iti ekāntaḥ | satyam, 
paramārthapramātṛtāsamāpannasya api 
dehāhaṃbhāvasaṃskāradārḍhyādaṅge'ṅgāraspṛṣṭe dāhakṛtaṃ 
buddhau duḥkhaṃ madhyoditavyutthānasamayasaṃbhavadrūpamapi 
tadbuddhigatāhantāsvasaṃvedanasākṣātkṛtavimṛṣṭarūpamapi 
saṃmukhīkṛtasatyapramātṛbhāvābhimānaviśramodrekāt 
vikalpyamānatātmakena dṛḍhaniścayātmanā anubandhena ahaṃ sukhīti 
yato na ahaṃbhāge viśrāmyati viśrāntyabhāvāt, evaṃ hi pāntha iva 
mārgagatāṃstāṃstān sukhaduḥkhahetubhūtān yadṛcchopanatān na 
anubandhena rāgadveṣāyatanatvena abhimanyate tata uktaṃ na sukhitvādi iti 
| ye tu dehādau saṃskāradārḍhyaṃ śithilīkṛtyaiva kuto'pi nibandhanāt 
gṛha iva adhikaraṇamātrābhimānena sthitāḥ, teṣāṃ 
dehabuddhyādāvahaṃbhāvalakṣaṇo yo'nugrahopaghātāvirbhāvako 
hetuḥ sukhādīnāmāvirbhāvakaḥ, sa nāstīti candanādisparśayoge'pi 
tadahaṅkārābhidhānasahakāryasaṃbhavāt sāmagrīrūpasya 
hetorapūrṇatvāt na utpadyante eva sukhaduḥkhādayaḥ | yathoktaṃ

	vāsīcandanakalpānāṃ vairāgyaṃ nāma ...................... |

iti vāsī candanakalpā yeṣāmiti guruṇā vyākhyātamiti 
śrīlakṣmaṇaguptagururāha | nanu sarvathā ahaṃbhāvābhimānābhāve 
karaṇapreraṇādisvātantryameva vilupyate | tat hi 

(page 50)

	nahīcchānodanasyāyaṃ prerakatvena vartate |
	apitvātmabalasparśātpuruṣastatsamo bhavet || (sp. kā. 8)

iti nītyā ahantāveśakṛtameveti kāraṇānupalabdhyā avasīdedeva | 
satyamevaṃ, kintu sahajasya akṛtakasya 
svātmaviśrāntilakṣaṇasamastapūrṇatodayāpākṛtavyatiriktākāṅkṣākā
luṣyacidrūpasya paramānandasya yata āvirbhāve nirāvaraṇatayā prakāśo 
bhavati, tatastadānandadugdhāmbudhinimgnā asau 
viṣayajanitasukhādisaṃvedanakaṇikā na pṛthagātmānamuddarśayati 
śithilīkṛtadehādyahaṃkārāṇām | tadā iti 
vāstavapramātrāveśadaśāyām, yadivā tadeti sukhaduḥkhotpādāvasare 
yo lokasya tatra tatra | te hi

	saṃbandhe sāvadhānatā | (vi. bhai. 106)

ityupadeśabalena svarūpavimarśadraḍhimani viśrāmyantaḥ parānandena 
yujyante | yathoktam 

	ānande mahati prāpte dṛṣṭe vā bāndhave cirāt | (vi. bhai. 71)

ityādi

	duḥkhe'pi ca vikāse'pi sthairyārthaṃ dhṛtisaṃgamāt | (śi. dṛ. 5|9)

ityādi ca | vāśabdo niyatayogyāśayena vyavasthitavikalpārtho mantavyaḥ | 
evaṃ prathame prakāre paracittajñāne vedyavedakatāṃ nirasya 
svakapūrvajanmagatamanubhavaṃ jānātītyatra api 
anubhūtaviṣayāsaṃpramoṣarūpatvena smṛtitvaṃ ghaṭayan nirasyati 
pūrvajanmāntarapratyakṣīkāre'pi iti | pūrvasmin janmaviśeṣe 
smṛtitve ca anvabhūvamiti ātmārohaḥ siddha evetyāśayaḥ | jātismara iti 
vyavahārācca smaraṇameva itthaṃ pūrṇamiti bhāvaḥ | 
svayamananubhūtāsu tu parakīyapūrvajātiṣu 
saṃskārasākṣātkaraṇopadeśābhyāsena yat yogino vijñānaṃ, tatra 
pūrvānubhavasparśādabhinavajñānarūpatā uktā

(page 51)

yogino hi yasya ityādāviti avirodhaḥ | evaṃ dvitīyaṃ prakāraṃ smṛtau 
praveśya tṛtīyamapi tathā karoti pramātrantaradṛṣṭam iti yadā kenacit 
pramātrā ghaṭo dṛṣṭaḥ, yoginā tu pūrvaṃ na dṛṣṭastaduttarakālaṃ yogī 
taddṛṣṭatāmeva udrecayan bhāvanābalāt paraḥ paśyatīti 
anubhūtaviṣayāsaṃpramoṣarūpatvameva vikalpanāvasare 
taditipūrvadṛṣṭatayaiva hi vikalpayati, na punarapūrvatayā jānāmīti | nanu 
na atra mayā jñātamiti pūrvaprakāśameva tadīyaṃ punarunmīlitaṃ 
pramāṇīkuru, natu apūrvamidānīmuditaṃ prakāśam | 
tatpūrvaprakāśatādātmyapraveśa eva hi tasya yoginastadānīṃ smartṛtā | 
tata eva manvādīnāṃ dharmaviṣaye prakāśanamapi sārvajñyāt bhavat 
parameśvarasya anāderayamitthaṃ prakāśa iti 
tatprakāśapramāṇīkaraṇena bhavat smṛtirucyate | 
tadapūrvapārameśvaraprakāśānugrahotthaṃ hi pramāṇaṃ śrutiḥ | nanu 
pramātrantareṇa yadanubhūtaṃ, tat cet yogī smarati; tat pramātrantaraṃ, 
saca iti ekaṃ saṃpannam | tataśca tena idaṃ dṛṣṭamiti kathaṃ vyavasthā | 
āha svapratyagātma iti svo yaḥ pratyagātmā dehaprāṇādiḥ, tatra 
yo'hantādārḍhyasaṃskārastasya anivṛtteḥ paraśarīrādi paratvena paśyati 
yataḥ, tato vyavaharati pramātrantareṇa etat dṛṣṭamiti | yasya tu yogino 
dṛḍhaḥ saṃskāraḥ kṣīṇaḥ, natu sarvātmanā naṣṭaḥ, nāśe hi tasya 
saṃskārasya īśvara eva; satu īśvarāyate nāśonmukhe tu tasmin 
sarvaprakāravati dṛḍhe saṃskāre śarīrādi ahamiti paśyannapi tanmadhya 
eva viśvamahamiti paśyati | tadasya cakravartina iva viśvamanuśāsato'pi 
svadehādikamadhiṣṭhānarājadhānīkalpam | evaṃ vedyatāṃ 
yogisaṃvedanāpekṣayā nirākṛtya upasaṃharati tadevam iti sthitam iti 
asyaiva 

(page 52)

pakṣasya dārḍhyamabhidadhat pakṣāntaramabhyupagamavādamātram, 
smṛtyanubhavayostu tathāpi na vedyavedakatetyāha bodhamātreṇa iti | 
asmaduktaṃ vedyoparāgādi parāsyati prātisvikena iti 
jñānasvalakṣaṇātmanā | tat nirdiśati śuddha iti | ayaṃ ca atra bhāvaḥ- 
svasmin svasmin darśane yādṛśaṃ bodhasya śuddhaṃ rūpaṃ, tat yathā

	sarvārtharūpatā śuddhirjñānasya nirupāśrayā |
	tato'pyasya parāṃ śuddhimeke prāhurarūpikām ||
	prabhāsvaramidaṃ cittaṃ prakṛtyāgantavo malāḥ |

	citiśaktirapariṇāminyapratisaṃkramā darśitaviṣayā śuddhā 
cānantā ca

	guṇānāṃ samavāyāṃśopādhityāge paraṃ vapuḥ |
	asaṃsṛṣṭamanirbhaktaṃ śuddhaṃ tattvavido viduḥ ||

ityādi, na tādṛśaṃ niruparāgaṃ vedyatāṃ paracittajñāne'bhyetīti 
bhāseran iti ubhayatra vṛttikṛt darśayan bhānti ityasya kākākṣivat 
yojanāmāha | noktanayena iti paravedyatā viṣayatā ca jñānasya dūṣitā 
yataḥ | evamabhyupagame ca bījamātramasti | saugatadṛśi svalakṣaṇāni 
jñānāni bhinnānīti, naiyāyikamate jñānaṃ jñānāntaravedyamiti | tacca 
idamubhayamapi apākīrṇam | svadarśane'pi asti bījam- māyāśaktirevaṃ 
kuryāditi | tacca etat na yuktam | bahirbodhasvarūpameva māyayā 
anyathākriyate viśvasya aprakāśanaprasaṅgāt | sā hi bodhasya 
śaktistadāyattā tadabhāve kathaṃ syāt | nirmāṇaṃ tu svātmanyapi 
kurutāṃ nāma, natu nirmātṛrūpaṃ śuddhaṃ bodhaṃ bādhitumalam | 
yathoktaṃ

	tasyānāvṛtarūpatvāt .................................. | (spa. kā. 2)

iti | atra nimittaṃ

	yatra sthitamidaṃ sarvaṃ kāryaṃ yasmācca nirgatam | (spa. kā. 2)

(page 53)

iti | tadanāvṛtau hi āvaraṇaśatamapi kutra bhāseta, kutaśca udbhavet | 
bhāsate hi tat saṃvidi eva, udbhavati ca tata eveti abhāsane anudbhave ca 
kimāvaraṇamiti na māyāśaktirbodhaṃ bhindyāt bhedyatve'bodhatvāt 
tathāpica bodhasya apratyastamayāt, anyathā bodhasya api kaḥ prakāśaḥ | 
yadi tathā iti natu etat saṃbhavatīti yāvat | yat nareśvaraviveke

	.......... nacānupapannaṃ māyāśaktyāpi śakyate kartum |

iti | nahi tadaiva sa eva tathaiva tatraiva tameva prati nāsti astīti ca śraddhīyate 
māyāta etadevamiti vacanamātreṇa | eṣa ca asaṃbhavasturyapādasya 
āvṛttyā kākusahāyayā sūtrito mantavyaḥ | prakṛtasya dārḍhyaṃ tunā 
āha ihatu iti kartṛkarmapratyayabhede'pi anubhavaḥ kartṛstha eveti bhāvaḥ | 
naca ātmā jñānadvayasamavāyikāraṇamātraṃ vaiśeṣikasya ivetyāha 
ātmanaśca iti audāsīnyāt iti | sa hi dvayoḥ kevalamādhāratvena asti 
ghaṭa iva rūparasayoḥ natu dvayormelanāya samarthaḥ | jñānāntaramapi 
jñānadvayaviṣayameva rūparasayoriva guṇatvam | yāvat iti yadetyarthaḥ || 
5 ||

	smaryate yaddṛgāsīnme saivamityapi bhedataḥ |
	tadvyākaraṇamevāsyā mayā dṛṣṭamiti smṛteḥ || 6 ||

	nanu ghaṭe smaryamāṇe vedyadaśādhiśādhiśāyini anubhavo 
grāhakenaiva milatu, tasminneva tu smaryamāṇe vedyīkṛte kiṃ vācyam | 
ucyate | ghaṭe mama anubhavo'bhūdityapikathane ghaṭa eva vedyaḥ | yathāha 
tatrabhavān

	ghaṭajñānamiti jñānaṃ ghaṭajñānavilakṣaṇam |
	ghaṭa ityapi yajjñānaṃ viṣayopanipāti tat || (vā. pa. 3|1|105)

(page 54)

iti | āryo'pi

	.................... taṃ hi matatyaktaṃ vivecayan |

iti | sā iti smṛtiparāmarśo maulikaḥ | tasya vṛttiḥ mayā dṛṣṭam iti 
darśanasya pṛthaksṛṣṭatāyāmapi guṇatvena bhedasya aprarūḍhatvāt | 
tasyā vibhāgamākartuṃ ṭīkā mama tasmin ghaṭe jñānamabhūt iti 
tasyaiva prādhānyena sṛṣṭasya bhedaprarohāt | mūlapratītiśca 
vyākhyānapratītyā na bādhyate, apitu upavṛṃhyate iti pūrvamuktameva 
sarvam | spaṣṭamanyat | sūtravṛttiṭīkāsu sarvaṃ hi etat vitatya nirṇītam | 
kathanaśabdena iti spaṣṭamapi etat na vastuto maulikasya bādhakamiti yāvat 
|| 6 ||

	anubhavānantarabhāvyadhyavasāyarūpamanujīvati smṛtiravikalpite 
smaraṇāsaṃbhavāt | tatastadadhyavasāyamukhaprekṣiṇyā smṛtyā 
tadagocarīkṛtaṃ spṛśyate khapuṣyamiva | naca adhyavasāyena 
pratyakṣānantarabhāvinā anubhavāṃśo vedyatvena adhyavasito 
grāhakabhāge'smadarthe sāmānādhikaraṇyena viśrānteriti darśayati 
sūtreṇa 

	yā ca paśyāmyahamimaṃ ghaṭo'yamiti vāvasā |
	manyate samavetaṃ sāpyavasātari darśanam || 7 ||

	yāca iti caśabdaḥ smaraṇasya etadupajīvakatāmāha | yā avasā 
vadhyavasāyaḥ paśyāmi ityevaṃ jāyate, sā tāvat darśanamavasātari 
grāhakāṃśe pratyavamṛśantī tadanubhavasaṃskārāt manyate tathaiva 
sākṣātkurute | yatra api svaśabdaparāmṛṣṭaṃ darśanaṃ na bhāti, tatra api 
ayamiti tāvat pratyakṣatā parāmṛśyate | sā ca na bhāvanīyaṃ rūpam, 
apitu darśanameva | tacca na bhāvadharmatvena adhyavasīyate idamarthena 
saṃbhedābhāvāt,

(page 55)

tasmāt na vedyo'nubhavo'dhyavasāye 
vedyatāvyāpakedantāviruddhāsmadarthasaṃbhedopalabdheḥ | na smṛtyā 
anubhavo vedyatvena bhāsyate tathānadhyavasāyāt, 
asmadarthasaṃbhedādhyavasāyāt veti smṛtinirbhāsanāyāḥ kāraṇasya 
anupalabdhiḥ kāraṇāviruddhasya vā,- iti sūtrārthaḥ | 
adhyavasāyaviśeṣaśca smṛtiḥ | naca kvacidapi 
adhyavasāyo'nubhavamidantayā viṣayīkaroti | tataḥ sā api kathamitthaṃ 
kurvīta, kurvatī vā adhyavasāyarūpatāṃ jahyāditi sūtratātparyam | 
etadavatārayati pratyakṣa ityādinā saṃkṣepavivaraṇena | 
idantānirdeśena vā iti darśanaṃ prarāmṛśyate iti saṃbandhaḥ | nanu 
ghaṭo'yamityadhyavasāye na asmadaḥ, na dṛśaḥ prayogaḥ, tat kutra 
viśrāntaṃ kiṃ parāmṛśyate | satyam, na etayorasti prayogaḥ, tena tu vinā 
api tadubhayārthaparāmarśo'sti ayam iti | tadetat darśayati aham ityādinā | 
nanu idamityanena ghaṭarūpameva avamṛśyate | netyāha anyathā iti 
pratyakṣatvāparāmarśe ca svatantravikalpāt na asya bhedaḥ syāditi | na atra 
ayaṃśabdo ghaṭarūpatāparāmarśaviśrāntimātreṇa kṛtībhavati, apitu 
tadīyayogyadeśasthatvaparāmarśamukhena tatpratyakṣatāparāmarśe 
viśrāmyati | nanu pratyakṣatā api ghaṭadharma eva | netyāha pratyakṣatvam 
iti ahaṃkāragocaraḥ iti pramātṛmayaḥ | hi iti yata evaṃ, 
tato'smacchabdenaiva ubhayatra darśanaparāmarśa iti pūrveṇa saṃbandhaḥ 
| pratyakṣarūpaḥ iti ayamiti yaḥ sūtre'vasāya uktaḥ, sa pratyakṣasya 
rūpaṇātmā adhyavasānasvabhāvaḥ, natu ghaṭamātrasya,- ityevaṃ vṛttau 
vyākhyāto darśanameva tat pratyavamṛśyate iti vacanena | ayamiti hi 
śabdo ghaṭātmānaṃ yadyapi sāmānādhikaraṇyena avalambate, tathāpi 
iyati eva na viśrāmyati | yathoktam 

(page 56)

idamityasya vicchinnavimarśasya kṛtārthatā | (aja. pra. si. 15)

iti | tataśca svaviśrāntimeva ahaṃbhāvasya abhimukhīkaroti | pratyakṣo 
ghaṭa iti pratītāvapi pratyakṣatā svaviśrāntaiva madīyo ghaṭa itivat | 
apiśabdena ca sūtre idamāha- yādṛk darśanasya vapustadeva nirūpyaṃ 
svasaṃvedane nirbhāsanayogyam | vikalpāṃśavicārastatra kva upayujyate, 
bhavatu vā, tathāpi vikalpanamapi na idantodantamāviṣkarotīti | 
evaṃbhūtā sā dṛk mameti vikalpo na laukikasya haṭhavivecakaṃmanyasya 
api kasyacit bhavan prakṛtipratyayārthavibhāgakaraṇavat kalpanāmātram | 
sā dṛk iti ca sa ghaṭa itivat dṛgantaramapekṣyeteti anavasthā | dṛśeśca 
kartṛsthabhāvakatvamuktaṃ- darśayate bhṛtyān rājeti | jaiminīyairapi 
prakaṭatāphalabhāvanātmā dṛgātmavartinī eva uktā | tena ghaṭaṃ 
paśyāmi, ghaṭo'yaṃ, ghaṭe mama dṛgiti śabdavaicitryamātram, 
tattvārthastu avicitra eva | evaṃ smaraṇe'pi taditi, ahamanvabhūvamiti, mayā 
anubhūtamiti, sā mama dṛgāsīditi śabdavaicitryamātrameveti 
sūtradvayasya tātparyam || 7 ||

	cidvapureva jñānādiśaktimān, smaraṇānubhavayośca ekameva 
saṃvidrūpatvaṃ tattvamityukteḥ sāmarthyādidamāyātam- yat māyīyau 
grāhyagrāhakau śuddhasaṃvinmayāveva bhāsete, tato vakṣyamāṇasya 
sūtrasya na adhiko vācyaḥ, apitu sa eva artha ekīkṛtya upasaṃharaṇīya iti 
prakaraṇārthaparyālocanakuśalakuśāgrīyabuddhyabhiprāyeṇa avatārayati 
iti iti idaṃ vastu upasaṃharannāha | upasaṃhāropalakṣitamāha 

	tanmayā dṛśyate dṛṣṭo'yaṃ sa ityāmṛśatyapi |
	grāhyagrāhakatābhinnāvarthau bhātaḥ pramātari || 8 ||

yadetat pūrvamuktam, tasmāt hetoḥ | ayamatra tātparyārthaḥ- yat

(page 57)

viśuddhasaṃvidrūpe pramātari grāhyagrāhakarūpatayā 
parasparāpekṣayā bhinnau vedyāvarthau bhāsete iti | kīdṛśe mayā 
dṛśyate mayā dṛṣṭe iti ca anubhavasmaraṇāmarśanopalakṣite ayam iti sa 
iti ca darśanabhāgānādaraṇena 
anubhūyamānasmaryamāṇārthabhāgapradhānena āmarśena upalakṣite | 
apiścārthe | apiśabdo bhinnakramaḥ, bhinnāvapi ekatra ābhāsete iti 
vṛttyanusāreṇa vā yojanā | ye tu sthūladṛṣṭayaḥ prakaraṇārthaṃ 
vivektumaśaktāḥ, tān prati 
codyapūrvakamapūrvārthābhidhānamidamityanayā cchāyayā avatārayati 
athavā iti | athaveti parihariṣyannāha iti saṃgatiḥ | samastasya 
pariharaṇaprakārasya svakaṇṭhena anabhidhānāt na vartamānanirdeśaḥ, 
apitu bhaviṣyatprayogaḥ | abhiprāyāntarvartino bhaviṣyattaiva ucitā yataḥ | 
kiṃ tatparihartumabhiprāyeṇa upalakṣaṇam | āha darśanādi iti |

	naiva hyanubhava ....................... | (1|4|4)

ityādiślokaireva mātṛviśrāntasya darśanāderavabhāsa iti samarthite'pi 
prakṛtaṃ prameyaṃ

	tenaikyaṃ bhinnakālānāṃ saṃvidāṃ ............... | (1|4|3)

iti na samarthitameva avasāturahaṃ gauraḥ kṣudhitaḥ sukhīti 
prāṇabuddhirūpasya asaṃvidrūpatvādatyantabhedācceti | tatra parihāraḥ 
tanmayā iti | āmarśanena upalakṣitaḥ saṃvitsvabhāvo yataḥ pramātā 
upapadyate, kalpitagrāhakastu bhavannapi grāhyavat tatraiva nirbhāsate | tat iti 
tasmāt hetoḥ saṃvidekatā na na samarthiteti abhiprāyaḥ | sūtre 
pūrvamanubhavopādānaṃ tatpūrvakatvāt smṛteḥ, tasyā eva 
prakṛtatvamityāśayena tu vṛttau saiva prathamamuktā | vivṛtāvapi 
tadanusāreṇa iha abhisaṃdhāne draṣṭṛbhāgabahumāne ca dṛk 
prādhānyena parāmṛśyate |

(page 58)

smaraṇe pratyakṣādhyavasāye ca ādaraṇameva 
puraḥsarapūrvādiśabdairdarśitam, anādaraṇaṃ tu parityāgādiśabdaiḥ | 
tathāhi anabhisaṃdhau dṛśyabhāgabahumāne ca dṛgbhāgo na ādriyate, 
apitu arthabhāga eveti caturdhā anubhave, ṣoḍaśadhā ca smṛtau, 
ubhayaspṛśi ca pratyabhijñāne catuḥṣaṣṭidhā, 
pūrvāparabhāgabhedaprādhānyena ca dviguṇībhūte vartamāne 
heyopādeyādibhedena punarapi bhinne svatantravikalpe ca utprekṣādilakṣaṇe 
sarvasminnevamatra saṃvedane grāhako grāhyaśca parasparāpekṣayā 
bhinnaprathau, parasparāpekṣyā ca grāhyagrāhakatāṃ gatau 
yugalasṛṣṭiyogena bhinnau prakāśete | kva | 
parāmarśanasvatantrakartṛsvabhāve saṃvidrūpe viśuddhapramātari | 
anyonyāpekṣau iti vacanena sūtre bhāvapratyayaprakṛte dvandvasya 
itaretarayogo darśitaḥ | sahavivakṣā ca atraiva yuktā dvayorapi grāhyatvāt 
grāhakatvācca | yadāha yābhyāmeko dvyarthastābhyāmaparo'pi iti | 
nanu kathaṃ tayorvicchinnā anyonyapṛthagbhūtā prathā | āha 
idantāparāmarśāt satyāmeva vedyatāyāmahamitiparāmarśasya kṛtakasya 
kalpitasya āspadatāṃ haṭhādeva yato grāhako nīto'haṃ gauro'yamiti, 
yataśca grāhyo ghaṭādiḥ prakāśamātraparamārtho'pi idantāyāḥ 
prakāśabhinnatvaparāmarśasya gocaratāṃ balādeva prāpitaḥ, tata etau 
vicchinnaprathau | nanu yadi vicchinnaprathau, tarhi kathamekapramātari protau | 
kiṃ maṇidvayasya iva tantau pramātari protatvamanayoḥ | netyāha | kathaṃ 
tarhi | tanmayau | viśuddhapramātṛparamārthādadhikamanayorna kiṃcit 
vapuḥ | kathametat pratyeyamiti cet, āha grāhakasya tāvat iti | 
ayatnopapannametaditi tāvatpadam | yadivā

	yadyapyarthasthitiḥ prāṇapuryaṣṭakaniyantrite |
	jīve niruddhā tatrāpi paramātmani sā sthitā ||

(page 59)

tadātmanaiva tasya syātkathaṃ prāṇena yantraṇā | (aja. pra. si. 20)

iti nyāyo'tra anusaraṇīyaḥ iti tāvacchabdābhiprāyaḥ | āpāte yadyapi 
grāhyamidamiti prakāśabhinnatvena vimṛśyamānaṃ cakāsti, tathāpi

	idamityasya vicchinnavimarśasya kṛtārthatā |
	yā svasvarūpe viśrāntirvimarśaḥ so'hamityayam || (aj. pra. si. 15)

iti,

	prakāśasyātmaviśrāntirahaṃbhāvo hi kīrtitaḥ |

iti ca nayena ahantāviśrāntataiva pāryantikīti sārapadasya abhiprāyaḥ 
ṭīkāyām | anantarameva iti

	vartamānāvabhāsānāṃ ....................... | (1|5|1)

ityādinā prakaraṇena idameva vitaniṣyate ityarthaḥ | nanu bhavatu itthaṃ 
prakāśamānatā, sā tu na grāhyasya svarūpaprathāyāṃ cakāsti 
ghaṭasyaiva cakāsā yataḥ | satyam, ghaṭasya tu iyameva cakāsā yā 
prakāśamānatāyāḥ prathā, anyathā ghoṭo'prakāśita eva bhavediti 
āśayena cecchabdaḥ | maulikaḥ iti pāramārthika iti yāvat | grāhya eva 
idamiti cakāsat bhagavataḥ śaktyā māyayā vicchedita iti astu nāma, 
gāhakastu ahamiti nirbhāsamānaḥ kathaṃ prakāśāt chedita iti parasya 
bhramaṃ bhinatti grāhakaśca ayam iti | 
pāramārthikaprakāśalakṣaṇacinmātraparamārthā hi bhāvā anyathā 
prakāśanāsaṃbhavāt teṣāṃ, tadapekṣayā ca māyāśaktiryadi bhāvān 
vicchindyāt, tadaprakāśarūpāṃstān nirbhāsayatīti uktaṃ syāt | na ca etat 
yuktam- prakāśante ca, na prakāśante ceti | tataḥ pāramārthikaprakāśāt 
tāvadabhinnā eva sarvadā te iti upagamyam | 


(page 60) 

nanu bhagavacchaktiratidurghaṭakāriṇī kiṃ kiṃ na kuryāt | tathāca

	bodhānāmapi kartṛtvajuṣāṃ kārmamalakṣatau |
	bhinnavedyajuṣāṃ māyāmalaṃ vidyeśvarāśca te || (3|2|9)

iti vakṣyate | tataśca bodharūpaṃ paramārthaprakāśamapekṣya 
bhāvānāṃ bhedena prathā na yuktā | etadāśaṅkya gamayati 
kriyamāṇāpi vā iti | bodhasya hi viśvātmano'pi 
māyābhidhānabhagavacchaktikṛtāyāṃ viśvātmatvākhyātirūpatāyāṃ 
māyīyāparaparyāyāṃ khaṇḍanāyāṃ satyāmapi

	vedyīkaraṇamarthānāṃ malo māyākhya ucyate |
	mūlam ................................................................... ||

iti dṛśā bahirmukhatāyāmantarmukhasaṃkocāntarābhāvāt 
prakāśarūpatāyāḥ sarvān vedyān prati sā prakāśarūpatā bhavediti sā 
bhedena prathā sarvajñatvarūpā bhavet | naca sarve sarvajñāḥ, 
asarvajñatāyāmapica vicchedena prathanamasti | sthūlasūkṣmarūpasya 
asya vedyavargasya apūrvatathāvidhaprathālakṣaṇanirmāṇaviṣayatayā 
kāryaśabdavācyasya bhūtasṛṣṭergrāhakarūpāyā idānīṃ 
mīmāṃsāvasaraḥ | tadupayoginī eva bhāvasṛṣṭirityāśayena 
āgamoktacaturvidhasṛṣtimadhyāt sṛṣṭidvayameva ṭīkākṛtā darśitam | 
evaṃca asarvajñatāyāṃ yat bhedena prathanam, taditthamupapadyate- yadi 
bodharūpo'hamiti prakāśabhāge'pi kaścit saṃkoco bhavet, saṃkucito hi 
ahamiti prakāśabhāgo nālikāsuṣirasaṃkucitacākṣuṣaprakāśavat 
niyataprakāśa iti yuktam | taduktam 

	....................... anyastvahaṃbhāvo vedyeṣvapyāṇavo malaḥ |

iti | nanu evaṃ dehādau grāhyarāśāveva patita iti punarapi 
grāhyagrāhakatābhinnau 

(page 61)

iti sūtre grāhakapadamasamarthitamevetyāśaṅkya āha 
vedyasvabhāvamapica iti | tadānīm iti śarīramidaṃ kṛśamityādyavasare 
bhavatu udbhūtavedyatākaṃ dehādi, ahaṃ kṛśo ghaṭaṃ 
vedmītyādipratyaye tu ahamitisaṃvidabhiṣekarasa eva utsiktāvabhāsaḥ, na 
grāhyatāṃśaḥ | nanu evaṃ kṛśāderapi 
avabhāsādavaśyabhāvinyāmidantāyāṃ yadi tāvadahamityanena rūpeṇa 
ācchādanam, tadīśvararūpataiveti ka ivaśabdārthaḥ | īśvaraśca 
paramārthapramatṛtattva eveti kiṃ grāhakapadopādānena | atha na 
āchādanaṃ tarhi ghaṭādivat grāhyarūpataiveti punarapi kiṃ tena | tatra 
prathamāṃ śaṅkāṃ prādhānyena pariharati kevalam ityādinā 
vedyarāśeranyaiva ityantena | prasaṅgataśca atraiva dvitīyāpi parihṛtā 
bhavatīti varṇayiṣyate | tat iti vastujātamīśvarasya avabhāsate | kathamiti | 
āha anyonya ityādi | trīṇi api kriyāviśeṣāṇāni amūni | ekaikaṃ 
parasparasmādapṛthagbhūtaṃ tata eva viśvameva pāramārthikaṃ 
rūpamasyeti | evamapi ca avabhāsanaprasādoditena vapuṣā na virodhaḥ 
kaścit | atra tu iti māyāpade pramātrantarebhyaḥ prameyebhyaśca yat 
bhinnaṃ prāṇadhīśūnyarūpamahantāveśena 
saṃvitsvātantryābhiṣekeṇa pratyagātmeti 
parasparāsaṃkīrṇasvasaṃvedanasaṃjñam, tat grāhakībhūtaṃ 
svavyatiriktasya grāhyasya ghaṭāderiti saṃbandhaḥ | 
prāṇādisaṃkocabhāgitvācca sā saṃvit viśvarūpatvamasahiṣṇuriti 
aṇurucyate pārimityāt | naca atra bhagavata idaṃprathamikā vidyate 
grahyagrāhakayugalakanirmāṇakāriṇyāṃ māyāśaktāviti nityatvamasya 
uktam | nanu ahantāveśena tat prāṇādisaṃvidi cet vilīnīkṛtam, tat punarapi 
na tato bhāvānāṃ bhedaḥ | satyaṃ, natu vilīnīkṛtaṃ tat ātmīyatvena yo 
bhedo vedyatvaṃ,

(page 62)

tatra yo gāḍhagrāstasya atiraskārāt | tadanena paśulakṣaṇaṃ svīkṛtam | 
yaduktaṃ śrīkiraṇāyāṃ

	paśurnityo hyamūrto'jño niṣkriyo nirguṇo'prabhuḥ |
	vyāpī māyodarāntaḥstho bhogāpāyavicintakaḥ ||

iti | aṇutvādipāśayogāt paśuḥ, anāditvāt nityaḥ, ahantāveśanādamūrto 
vyāpī ca, svabhāvato vedyatvāt jñānakriyāśūnyaḥ, 
māyābhūmipatitaḥ, tata eva asvatantraḥ, vedakatvāt 
sattvādivedyaguṇagaṇottirṇaḥ, saṃvidrūpatve'pi apūrṇatvāt 
bhogalālasākrānto yato'navarataṃ pūrṇatvaṃ kāmyati | etat prakṛte 
yojayati ityaparaiva iti | evamuktena krameṇa śarīrādau vedyatā tādṛśī 
yā na īśvaravedye'rthe, nāpi saṃsārijanavedye ghaṭādau; vedakatā ca api 
īśvaravedakatāvilakṣaṇā | hi iti yasmādevaṃ, 
tasmādidamahamitibhāgadvayasya api īśvaraniṣṭhāt rūpāt 
vilakṣaṇatvaṃ māyāpramātari, tasmāt īśvarasya iveti yukta 
ivaśabdārthaḥ | vilīnatvābhāvaṃ sphuṭayati tathāhi iti | yathā yathā hi 
bhāvanopadeśabalāt vedyatā prāṇāderapasāryate, vedakataiva 
nirbhāsyate; tathā tathā saṃvitsvātantryadharmodayāt 
khecaratvādisiddhyudayaḥ | śarīre'pi yāvadeṣā vārtā- yat ghaṭādi 
sabrahmacāri nirbhāsate, kimaṅga buddhiprāṇādāviti evakāraḥ | nanu 
māyākṛtavicchedāviti yaduktaṃ, tena bhagavata eva māyāyogāt 
mālinyaṃ syāt | netyāha seyam iti evaṃvidhaparamādbhūtabhāsane yat 
vaibhavamapratighātalakṣaṇamantaḥ- 
sthitabhāvarāśipravikāsanalakṣaṇavijṛmbhāsaṃbhārarūpaṃ, na tat 
mālinyamākṣipati aindrajālikasya iva | mālinyaṃ hi 
saṃvido'bhīṣṭapratighātalakṣaṇam, tadviruddhaśca apratihatasvecchāyoga 
iti svabhāvaviruddhopalabdhiḥ | nanu yadi śarīrādi vedyameva vedakīkriyate,

(page 63)

tadā tasya vedyatāyāṃ kiṃ vedakam | āha yadā iti | tadeva iti yat 
grāhakīkṛtaṃ ghaṭādau grāhye | yoginaḥ iti sākṣātkārajñānena 
jighṛkṣataḥ iti āśayaḥ | samastaśarīraprāṇadhīprabhṛtibhāvaniṣedho- 
pādhisaṃkucitaṃ cittattvaṃ tasya prāṇabuddhyādervedakaṃ bhavati | 
ayaṃ prāṇādyabhāva ityapi sākṣātkāre 
tadvedyarūpābhāvaniṣedhātmakaṃ śūnyāntarameva tadapekṣayā 
vikasitamiva pramātrībhavati | tatrāpi vikasitataramityādikrameṇa 
mahāśūnyamāgameṣu śūnyātiśūnyaśabdavācyaṃ pāryantikaṃ 
pramātṛrūpamullasati | naca abhāvasya abhāva iti bhāvarūpataiva iyamiti 
vaktavyamabhāvasya tuccharūpasya abhāvāntaramapi tuccharūpameveti hi 
vakṣyate | vedyāpekṣayā ca tucchatvaṃ saṃvidrūpaṃ, bhittipātācca 
vedakatvam | ata eva śūnyātiśūnyaṃ nāma 
vedyarāśivinirmuktaśuddhasvabhāvasaṃvidrūpaṃ 
citsvasaṃvedanasaṃviditamiti na anavasthā | yaduktaṃ

	tathāhi vedyate yadyattanmadhye'haṃ na kaścana |
	apitvetadvimukto'smi naca dṛśyo'smi tādṛśaḥ ||
	iti bhāvaniṣedho'haṃbhāvabhūstattvataḥ sthitaḥ |
	tasya puryaṣṭakādyetadvedyaṃ yogidṛśi sphuṭam ||
	tatra bhāvaniṣedho yaḥ so'pi nātyantatucchakaḥ |
	ahaṃsaṃvidupārohāttatastanmaya eva saḥ ||

iti | ata evahi ākāśasamāpattyabhyāse gṛhaprāṅgaṇāraṇyādipradeśa- 
vikāsatāratamyābhyāsena 
brahmāṇḍādibahirbhūtaparamākāśasamāpattiriti āgamaḥ |

	bahirakalpitā vṛttirmahāvidehā

ityatra api eṣaiva parākāśaśarīratā pāryantikī prāpyatvena uktā | 
krameṇa vedyatāyāṃ śarīrasya prāṇaḥ, tasya api dhīḥ, tasyāḥ śūnyo 

(page 64)

vedakaḥ iti prasiddho'yamarthaḥ iti na ukta iha; anukrameṇa tu samastasya 
vedyatve śūnyameva vedakam | nanu yogino 
virāmapratyayābhyāsapūrvāsaṃprajñātasamādhisamārūḍhasya 
śakyaṃ dehaprāṇādervedyatāṃ kartum, ayogī tu śarīrādyuttirṇaṃ 
śūnyaṃ śabdato'pi na śrutavān, tat kathaṃ tadapekṣayā asya 
vedyatetyāśaṃkāyāmāha anyena tu iti | na tena asya 
dehāderahaṃbhāvāspṛṣṭasya vyatiriktaghaṭādivedyavargasagotratayā 
sākṣātkāraḥ, apitu ahamidamityeva sākṣātkāraḥ kevalam | vedyatā tu 
anena vikalpyate, paraṃ na sākṣātkriyate 
sattādravyatvaśuklādyaśeṣopādhivinirmuktatā iva dravyasya | naca 
kalpanāyāṃ tadrūpasaṃpattiḥ pratīkṣyā yena kevalavedyatāsiddhaye 
vedakāntarānveṣaṇaṃ bhavet | martyaloke jīvanneva hi svargitāṃ 
kalpayannātmano na tatsaṃpattimapekṣate | tadayaṃ prayogaḥ- vikalpena 
tadrūpasaṃpattirapekṣyā asākṣsatkārātmakatvāt | 
bhāvasvabhāvānuvartitā hi saṃvedanasya sākṣātkārarūpatayā vyāptā, 
anyathā na kaścit sākṣātkāro bhavet | tadviruddhaṃ ca 
sākṣātkārarūpatvamiti vyāpakaviruddhopalabdhiḥ | nanu prāṇādau vedye 
śuddhā saṃvideva pramātṛtvena ucyatām, śūnyamantarāle kimiti kalpyate 
| athāpi astyevaṃ yoginaḥ pratipattiḥ 

	yadyadvikalpyate kiṃcinna tattadrūpam |

iti | so'yamātmā neti neti ca nītyā sarvavedyavimuktaṃ yat, tadahamiti 
yathā saṃsāriṇaḥ kṛṣo'haṃ tṛṣito'haṃ sukhyahamiti tat kaḥ 
kalpanārthaḥ ityucyate; tathāpi śarīrāderyugapat yoginā vedane 
śūnyāntareṇa kimāntarālikena | atra āha anyathā iti yadi śūnyaṃ na 
vedakaṃ syāt tat mahāprakāśāt na kiṃcit vyatiriktaṃ prakāśeta 
aprakāśanaprasaṃgāditi vyatirekajīvitā vedyataiva kathaṃ

(page 65)

nirvahet | nanu yadā anugrahārthaṃ parameśvaraḥ svayameva ātmānaṃ 
śiṣyebhya upadiśati ahameva bhavatāmātmeti, tadā bhagavati vedake 
kimanyat vedyaṃ syāt | ucyate yadāpi iti | tat iti svarūpam | īśvaratayā 
prakāśatayā vā iti vāgrahaṇena idamāha- na khalu avibhāgaṃ 
śuddhasaṃvidrūpaṃ vedyībhāvamabhyeti, kintu atadrūpavyāvṛttyā 
jānanniti apūrvābhāsatayā sṛjanīyaṃ nirmitavānekadharmamukhena 
rūpam | tadeva parāmṛśan bhagavānanuśāsti śiṣyān- eṣa īśvaro 
madrūpo bhavatāmātmeti, na punaḥ sākṣāt vedakarūpam | tatra api 
upadeṣṭṛtayā sthitaṃ svaprakāśaṃ yat, tadeva śiṣyān prati tena 
ātmatayā anuśāsanīyamupadeśyaṃ yuktaṃ yatha śarīrādi 
vedyamātmatayā upadeṣṭuṃ yuktamiti vaidharmyadṛṣṭāntaḥ | yadāhuḥ 
siddhāpādāḥ

	atītaḥ panthānaṃ tava sa mahimā vāṅmanasayo-
	ratadvyāvṛttyāyaṃ cakitamabhidhatte śrutirapi |

iti | tadeva ityatra tadaivam iti anyeṣāṃ pāṭhaḥ | sa ātmābhāso nirmitaḥ 
san na śarīrādivat sarvapramātṛsādhāraṇo vedyaḥ, apitu saṃvedane 
parāmarśe ca upadeśakopadeśyayoḥ paraṃ parisphurati, natu bahirityarthaḥ | 
śarīrādivadityasya evamuktena nayena vedakarūpaṃ svaprakāśamiti | nanu 
evamātmīyaṃ bhagavatā rūpaṃ śiṣyāṇāmātmatvena na upadiṣṭaṃ 
tāvat, apitu nirmitaḥ kaścidābhāsaḥ iti | āha parāmarśaikyāt ca iti | 
tadapi iti yadābhāsātmakaṃ svarūpamuktaṃ, tat | tadeva iti 
parameśvarasvarūpameva, na adhikamiti vakṣyate 

	svātantryāmuktamātmānaṃ............................ | (1|5|16)

ityatra | ābhāsasya taditisvarūpeṇa militasya 
pūrvamabhidhānamityāśayena 

(page 66)

tadapi iti napuṃsakatā yuktā | bahutaraprameyāntaritaṃ sūtrārthatattvaṃ 
śiṣyabuddhisamādhaye nigamayati tadevam iti | ghaṭādeḥ śarīrādeḥ 
svarūpasya ca vedyatā sākṣātkāryavikalpanīyādirūpeṇa vicitrā uktā 
māyāpramātuḥ, yoginaḥ īśvarasya bhagavatparamaśivasya ca vicitrā 
grāhakatā uktā | tadetat 
grāhyagrāhakayugalakamanantāvāntarabhedabheditaṃ 
paramaprakāśarūpe bhagavati bhāti tadrūpeṇa prakāśamānatvāt 
mahādarpaṇa iva parigṛhītapratibimbaṃ darpaṇavaiśvarūpyamiti 
svabhāvahetuḥ | tadrūpeṇa prakāśamānatvaṃ hi yadi atanmaye syāt, 
tadaniyataṃ bhavet, ghaṭo'pi paṭatayā prakāśeteti 
vyāpakaniyamaviruddhāniyamaprasaṅgāt tadrūpeṇa prakāśamānatvaṃ 
vipakṣādatanmayatvāt vyāvṛttaṃ tanmayatvena vyāpyate iti 
vyāpyasiddhiḥ || 8 ||


iti śrīmahāmāheśvaraśrīmadācāryābhinavaguptaviracitāyā-
mīśvarapratyabhijñāvivṛtivimarśinyāṃ smṛtiśakti
vimarśaścaturthaḥ || 4 ||


atha pañcamo vimarśaḥ |

	yadanuttarasambodhādānandavikasvarecchayā pūrṇam |
	īśvaramunmiṣadamṛtaughasundaraṃ tatstuve dhāma ||

	evaṃ smṛtiśaktiṃ tatprasaṅgena ca vikalpavṛttāntaṃ vimṛśya, 
tadubhayopajīvanīyajñānaśaktivimarśaṃ

	vartamānābhāsānāṃ ............................. |

ityādyayā

	................................ sakramaṃ pratibhāsate |

ityantayā ślokaikaviṃśatyā vitatya vimṛśati | tatra evaṃbhūtā 
jñānaśaktiriti ślokena pratijānīte | dvayena prakāśa eva arthānāṃ 
svarūpamityāha | prakāśabāhyānāmarthānāṃ 
vijñānavādoktadūṣaṇena dṛḍhīkṛtaṃ sadbhāvaṃ dvayena āśaṅkya 
ekena tadanupagame tāvat na kiñciduparudhyate iti kathayati | svadarśane 
arthatattvamupadarśayan bāhye arthe pratyakṣaṃ pratikṣipati ekena, dvayena 
anumānam | parāmarśātmanā arthānāṃ cidātmani avaśyaṃbhāva iti 
ekena āha | pramātṛrūpasya prakāśasya vimarśa eva sāramiti 
anubhavāgamanyāyasvarūpanirūpaṇayā catuṣkena āha, 
jñānaparāmarśa eva jñeyaṃ śuddhamanujjhitapramātṛbhāvaṃ 
prathayatīti trayeṇa, prakāśaikarūpatāyāmapi 
jñānajñātrādivibhāgamekena, jñātari iva viśuddhe jñāne'pi 
avikalpakasavikalpakatājuṣi jīvitaṃ vimarśa eveti dvayena, 
jñātṛjñānayorbhinnatvaṃ dūṣitaṃ yat pūrvapakṣe, tadekena 
samarthayate upasaṃhāradiśā,- iti tātparyam |

	vartamānāvabhāsānāṃ bhāvānāmavabhāsanam |
	antaḥsthitavatāmeva ghaṭate bahirātmanā || 1 ||

	smaraṇavikalpayostāvat na arthaḥ sarvapramātṛsādhāraṇo bhedena 
bhāti | yatra api tathā pratyakṣarūpe anubhave, tatra api anubhavādanatirekī

(page 68)

asau; kā tu kathā tadupajīvini smaraṇādau,- iti vṛttāvapiśabdo 
yāvacchabdaśca sūtraśeṣatvena paṭhitaḥ | sūtrārthastu- vartamānatvena 
sphuṭatayā idamityevamākāramavabhāsanaṃ yeṣāṃ te bahirātmanā 
śūnyādimāyāpramātṛpṛthagbhāvena bhinnāḥ, tato 
māyāpramāturvicchinnāḥ teṣāṃ tathāvidhamapi yadavacchinnatayā 
bhāsanaṃ; tat antaḥsthitavatāmeva 
śuddhacitātmakaparamārthapramātṛtattvatādātmyamanujjhatāṃ ghaṭate 
yujyate pramāṇena | atyaktasaṃvidabhedasyaiva bhāvasya 
kalpitapramātrapekṣayā vicchedena yat prakāśanaṃ, sā bhagavato 
jñānaśaktiriti yāvat | idānīm iti prakārāntaratvaṃ sphuṭayati | śiṣṭaṃ 
vṛttivivṛtyoḥ spaṣṭam || 1 ||

	sūcitā iti yadupajīvanena uktaṃ ṭīkākṛtā, tat sūtramavatārayati

	prāgivārtho'prakāśaḥ syātprakāśātmatayā vinā |
	na ca prakāśo bhinnaḥ syādātmārthasya prakāśatā || 2 ||

prakāśarūpatayā vinā iti prakāśāt na bhinno'rthaḥ prakāśamāno 
yuktaḥ, prakāśamānāt ca arthāt na bhinnaḥ prakāśo yukta iti 
ubhayatomukhamarthaprakāśayorbhedamapasārayan prathamamardhaṃ 
saṃkṣepeṇa vyācaṣṭe- yathā jñānānudaye nīlaṃ sarvānprati nīlaṃ na 
kaṃcit vā prati, apitu svātmani, svātmani apivā tat na kiṃcit; tadvadeva 
jñāne'pi udite syāt, natu prakāśeta mama idaṃ nīlam iti; syāt iti 
prakāśatādātmyamasya pūrvavadeva na bhavediti- anubhavarūpataiva 
ityādinā dvitīyam | yata evaṃ pūrvavadaprakāśatā syāt, tasmāt 
prakāśamānatā nāma arthasya na bhinnā | tata evamāyātaṃ- prakāśa 
eva arthasya ātmā | tathāca vṛttiḥ- svarūpabhūto yaḥ prakāśaḥ 
so'rthasya prakāśamānatā; natu tasmādarthāt bhinnaḥ san

(page 69)

prakāśaḥ, so'rthasya prakāśamānatā yukteti | yadivā prasaṅgāt 
ityantena prathamārdhāvatāraṇaṃ arthācca ityādinā 
tṛtīyapādārthasaṃkṣepābhidhānam | ayaṃ ca arthaḥ- 
arthaśarīraviśrānta eva prakāśo'stu arthavat bhinnasvabhāva 
ityāśaṃkāyāmāha naca prakāśo bhinnaḥ syāt | arthaśarīratve ca 
arthavadasya bhedaḥ prāpnoti, naca sa yukto'nusandhānābhāvaprasaṅgāt | 
etat vyācaṣṭe arthācca iti | artha eva cet prakāśamānatātmā, tarhi tato 
hetoḥ prakāśasya svātmani bhedaḥ prāpnoti, yadivā tamavalambya 
vartamāno yaḥ prakāśastasya saṃbandhi yat svarūpaṃ, tasya bhedaḥ 
prāpnoti | naca asau yuktaḥ | tasmādarthasya prakāśamānatā nāma ātmā 
paramārtharūpaṃ, natu bhinnaḥ kaścidarthaḥ | arthasya ca 
prakāśamānatā anubhavarūpatā ātmā, natu prakāśamānatāyā 
arthātmatā,- iti | atra pakṣe vṛttirevaṃ netavyā- arthasya yā 
prakāśamānatā, sā prakāśo'nubhavaḥ; natu asau prakāśamānatātmā 
prakāśo'rthasya svarūpabhūto'rthaśarīramagnaḥ | tathāhi sati 
arthabhedāt bhinnaḥ syāt, naca tathā yuktaḥ | nanu ghaṭasya ghaṭataiva 
svarūpaṃ, tat jñānodaye pūrvamapi; tat kā anyā asya 
prakāśamānatetyāśaṃkya āha ghaṭasya iti na kaṃcana iti | etaddhi 
vastutattvaṃ parasya paraniṣṭhāyogāt, pūrvaṃ tu saṃbhāvanayā kṛtvā 
cintāmapekṣya uktaṃ sarvānprati samamupayogāt iti | upayogo'pi hi 
prakāśamānatāyattaḥ, natu ghaṭatāmātrādhīnaḥ | nanu 
indriyādikṣaṇāntarasahakṛtādupādānāt ghaṭakṣaṇāt 
prakāśamānaghaṭarūpo viśiṣṭaḥ kṣaṇo jātaḥ, tadastyeva prāgavasthāto 
vijñānodayakāle viśeṣaḥ; natu sthirapadārthavādināmiva asmākaṃ sa 
eva asau ghaṭa ityāśaṃkāyāṃ brūte athāpi iti | pramātuḥ iti | tato hi 
indriyādisāmagrīto ghate 

(page 70)

viśeṣo jātaḥ prakāśamānatā ālokādapica | āloke'pica ghaṭādeva 
ādyarūpavilakṣaṇatā | ghaṭālokādeśca pramātṛsantāne jñānodayaḥ | 
tatra ca yathā sa jñānodayo na ghaṭaṃ prati, naca ghaṭa ālokaṃ prati 
tulye'pi kāraṇatve ekasāmagryadhīnatāyāṃ vā vyavahāryatāmeti 
svarūpasya svaniṣṭhatvāt; tathā so'pi ghaṭagato viśeṣaḥ 
prakāśamānatākhyo na pramātāraṃ prati vyavahāryaḥ syāt | yat yasya 
svarūpaṃ, tat na anyaniṣṭhaṃ nīlasya iva pītaniṣṭham; tathāca 
prakāśamānatā ghaṭasyeti na pramātṛniṣṭhā | anyaniṣṭatve svarūpatā 
na upapadyate viruddhadharmādhyāsaprasaṅgāt | anyaniṣṭhatā hi 
anyatādātmyaṃ svarūpatā na anyatādātmyamiti 
svabhāvaviruddhopalabdhiḥ | etatprayogasūcanārthameva arthalabdhamapi 
svakaṇṭhena kathayati na syādeva iti | atha svarūpaniṣṭhataiva 
vikalpānāmapratihataprasaratvādevaṃ vyavahriyate, tarhi niyamānupapattiḥ 

	yatra svātantryamicchāyā ......................... |

iti nyāyāt | etat darśayati sarvapramātṝṇāṃ vā iti | nanu yameva 
indriyāditathābhūtaghaṭatāviśeṣaprakāśamānatā udaye nidānatāṃ 
pratipadyate, tameva pramātāraṃ prati tathā vyavahriyate iti siddho niyamaḥ | 
etat dūṣayati nahi iti | upayogāya iti na ghaṭatā kulālameva prati asyeti 
bhāvaḥ | nanu kāraṇena tāvat kāryasya saṃbandho dṛṣṭo bījasya 
aṅkuraḥ, kulālasya ghaṭa iti; tadvadeva caitrasya ghaṭaḥ prakāśamāna iti 
bhaviṣyati | etāvat tu iha sādhyam, tacca siddham | tat ko'nya upayogo 
nāmetyāśayena śaṅkate athāpi iti | etat na sahate na yuktam iti | etāvatā 
tatkṛtā prakāśamānatā ghaṭasyeti uktam |

(page 71)

sā yathā bījakṛtā aṅkuratā, kulālakṛtā ca ghaṭatā; natu sā aṅkuratā 
ghaṭatā ca svārthakriyākālavyavahriyamāṇāṃ kāraṇakalāṃ bhittitvena 
upādāya vyavahriyate kāraṇanirbhāsanāpekṣayaiva 
aṅkurādisvarūpavyavahārāt | prakāśamānatā tu mameti caitrasyeti ca 
bhittibhūtaṃ pramātāramavalambya niyamena vyavahriyate | yadidaṃ 
tallagnatvena niyataṃ vyavaharaṇaṃ, tat tādātmyamānayati 
ghaṭapratibimbasya iva darpaṇalagnatvena | tādātmyaṃ hi tadrūpatvaṃ, 
svaniṣṭhatvaṃ ca atadrūpatvamiti svānyarūpadvayaṃ bhāvasya kathaṃ 
syāt | prathanaṃ hi ghaṭaprakāśamānatāyāḥ 
pramātṛtādātmyamānayati niyamena tallagnatayā prathamānatvāt | 
ghaṭatādātmyaṃ ca asyāḥ svabhāva iti tamatikramya kathaṃ prathanaṃ 
syāt | arthakriyā api prathamānaiva tathā bhavati,- iti tatrāpi ayameva 
vidhiriti arthakriyayā api na bāhyatā siddhyati dharmottaradṛśeti vaktuṃ 
paryavasitārthaḥ iti arthapadam | tadāha bhaṭṭaḥ

	prakāśenāvinābhūtaiḥ sattāyāṃ niyatātmabhiḥ |
	dharmairbhāvaḥ pṛthagbhāvo na bāhyasiddhimṛcchati ||

iti | nahi kvacidapi sā prakāśamānatā bhittibhāvena anavalambamānā 
pramātaraṃ prathamānā dṛṣṭā yena tatra satyabhāvamavasthāpya tatra 
anaikāntatāṃ brūyāma nāmetyāśayena āha ayathāsvabhāvaṃ ca iti | 
nanu pramāṇasiddhabhedo bāhyo'rthaḥ paramāṇusaṃcayamātrasvabhāva 
iva | sa prathayā vyavahriyamāṇo'nyalagnatvena bhrāntyā nirbhāsatāṃ 
sthūlarūpa iva | tat ko virodha iti paramatamāśaṃkya āha prakāśasya iti | 
bhrāntirnāma prakāśamānatā vastvanumānānācaraṇeti, natu anyat | sā 
ca pramātṛbhittilagnatvena, tacca na kiṃciditi saṃvedanabhāgo'pi na 
upapadyate | bhrāntau ca so'bhrāntatayā

(page 72)

avaśyasamarthanīyo'rthāṃśe bhrāntitvopagamāt | saṃvedanasya api 
asattve bhrāntiriti pāṣāṇatā syāt | etadvyākhyānusāreṇa 
śuklaśaṃkho'prathamāna eva iti nañaṃ paṭhati ācāryaḥ | yadi na 
kāṃcit prathāṃ bhajate, tat sitaśaṃkhaḥ pītatvena prathate iti niḥsāroktiḥ 
| yaditu prakāśyasya prakāśātmabhāvaḥ ityatra pramāṇasiddha iti 
adhyāhriyate tadā nañ prapaṭhyate | evaṃca yojanā- iha pareṇa 
pramāṇasiddhabheda iti yaduktam, tatra pramāṇaṃ prakāśa eva | tataśca 
yadi bhedaḥ siddhaḥ, bhrāntyā tu anyalagnatāvyavahārastadā idamuktaṃ 
bhavati- prakāśāt bhinnaḥ siddhaḥ, tato bhinnatvena 
prakāśamānasaṃvedanato bhramavaśāt saṃvedanatādātmyena 
tallagnatayā mameti prakāśate iti | naca etat yuktamekasyāmeva pravṛttau 
tadatadrūpanirbhāsanayorayogāt | nahi bhavati śulkaśaṃkha eva 
bhāsamānaḥ pīto bhāsate iti | evaṃ prakāśamānatayā prakāśāt 
bhedānupapattimuktvā āśayaśuddhirūpeṇa vastupariśuddhiprādhānyena 
vādarūpatāṃ śāstrakathāyāḥ prakaṭayan tarkaṃ tāvadutthāpayati 
saṃśayotthāpanadiśā tadetadevam iti | yato'nyathā na upapadyate, tat 
tasmādetaditi bhrāntyā bhedena prakāśamānatvamevamiti 
vakṣyamāṇanayena bhavati,- iti saṃbhāvyate | tat vakṣyamāṇamāha yadi 
ghaṭa eva iti | na anyaḥ kaścit prakāśaḥ iti evakāraḥ | evaṃ 
vāgrahaṇānīta evakārārtho na anyaḥ kaścit ghaṭa iti saṃbhāvanāyāṃ 
bījamādarśayati evamekasya iti | tadeva tadaiva saṃvedanabalena prakāśāt 
bhinnamabhinnaṃ ceti yo virodha uktaḥ, sa tāvat na bhavati 
prakāśaghaṭayorbhedābhāvāt | bhedasya ca prathanamabhede'pi ghaṭate | 
śilāputrakaikasvarūpopalambhe'pi hi vikalpabalāt bhavati bhedābhimānaḥ 
asya idaṃ śarīramiti, kevalaṃ buddhipūrvakatāyāṃ vyavahāro

(page 73)

ropaṇādivyavahāraḥ, abuddhipūrvakatve bhrāntatāvyavahāra iti sarvaṃ 
darśayati ayathāvastu iti | atra hetumāha tatrāpi iti | pratheta iti hetau liṅ | 
pakṣadvaye'pihi ghaṭamayī saṃvit, saṃvinmayo ghaṭa iti ca paramārtho 
ghaṭasya saṃvit saṃvido ghaṭa iti viṣayiviṣayatārūpo yo bhedaḥ, tasya 
maulikābhedabhādhena prathanāyogāt | śilāputrakasya śarīramiti 
vyatirekaprathā na avyatirekaprathāṃ bādhate | bhādhakatve hi 
tadunmūlakatvaṃ kāraṇaṃ, tasya viruddhaṃ tadanunmūlakatvam | tena 
vyāptaṃ tanmūlatayā tadvyavahārarūpatvaṃ, tena 
svavyāpakaviruddhakāryasya abhāvaḥ sādhyate iti 
kāraṇaviruddhavyāptopalabdhiḥ | tat iti uktapūrvāt hetoḥ | evam iti 
saṃviddhaṭayoravaśyāṅgīkārye bhede sati | tasya tu 
ubhayatomukhatvasaṃbhavāt saṃdehe pakṣāntaranirākaraṇamātraṃ 
kartavyam | tadapica māyāpramātṝn pratyāyayitum | vastutaḥ punarghaṭaḥ 
saṃvit, saṃviddhaṭa iti na atra bhedaḥ kaściditi darśitamādisiddhasūtre 

	yo māṃ paśyati .................................. | (bha. gī. 6|31)

ityādinā | māyāpramātārastu upadeśyā idamiti bhedāvagrahāt 
ghaṭameva paritaḥ paricchinnaṃ na tāvadabhimanyante, jaḍaṃ ca 
jaḍatvādeva prakāśarūpatayā 
prathamamasiddhatvādanūdyamānatvapadāsahiṣṇuṃ ca 
anyākāṃkṣatvena apūrṇaṃ ca; tadabhinnā ca saṃvidebhya upadiśyeta, 
tāmapi tathāvidhāmeva paricchinnatvena 
aparapaṭādisaṃvidanusandhānavandhyāṃ jaḍāṃ 
saṃvidrūpatvādividhibhittibhāvabhājanabhūtāmanyākāṃkṣatvena 
idamitibhāsanayogyāmeva ca abhisandadhīran | etadviparītaṃ ca 
asyāstattvamiti yathā tadīyaḥ paramārtho hṛdaye praviśati viparītaḥ, tathā 
upadeṣṭavyam | yathā vṛkṣatvaśiṃśapātvayoḥ paramārthataḥ 
samavyāptikatve'pi vyavahārayogyatve 

(page 74)

śiṃśapātvaṃ vyāpyamupadiśyate, na 
vyāpakamavṛkṣavyāvṛtervṛkṣatvasāmānyasya vā dhavādiṣu api 
vyavahāryatvāt | tata upadeśyajanānusāreṇa prathamataḥ saṃvittattvaṃ 
bhagavatā śivarūpaṃ keṣucidāgameṣu sarvottīrṇatāprādhānyena, 
apareṣu sarvamayatāsvīkāreṇa, anyeṣu ubhayarūpavisphāraṇāya 
upadiṣṭam | tat prāthamakalpike iha upadeśye saṃvinmukhena 
ādāvadvayamupadeśyamityāśayena tāvacchabdopakramametaduktam | astu 
iti prāthamakalpikatvameva abhidhātuṃ prāptakālatāyāṃ loṭ | tadā ca iti 
saṃvida eva ghaṭādyuttīrṇāyā darpaṇadṛṣṭyā 
ghaṭādyanantarūpasvīkāritāṅgīkaraṇadaśāyāṃ dvaitoktasya virodhasya 
parihārastāvat pūrvameva kṛta iti saptamyā sūcayati | ghaṭamukhena 
advayoktau ca yo doṣaḥ saṃbhāvitaḥ, so'pi na iha avataratītyāha 
prameyāntara iti | ghaṭādiprādhānye vā advayaṃ yaḥ samarthayate, tasya 
tāvat prameyāntareṣu pramātrantarāṇi vikalpakāvikalpakasaṃvidrūpāṇi 
bahūni yāni asmanmate ekasya pramāturvedyoparāgayogopacārakalpitāni 
jñānāni teṣāṃ yadanusandhānaṃ ya eva ahaṃ ghaṭādīn vedmi sa eva 
paṭādīniti; caitramaitrādipramātrantarairapica saha yadanusandhānaṃ 
niṣpannaniṣkampavijñānaśālino yathoktaṃ śrīparimeṣṭhipādaiḥ 

	pūjanānnāsti me tuṣṭirnāsti khedo hyapūjanāt |
	pūjakairavibhedena sadā pūjeti pūjanam || (śi. dṛ. 7|93)

iti, śrīparamagurupādairapi

	yadyathāsthitapadārthadarśanaṃ ...................... | (u. sto. 13|7)

iti, bhagavatāpi

	karmaṇyakarma yaḥ paśyedakarmaṇi ca karma yaḥ |
	sa buddhimān manuṣyeṣu sa coktaḥ kṛtsnakarmakṛt || (bha. gī. 4|18)

(page 75)

iti; sarvakarmakartṛtvaṃ samastakarmapāśanikartanasāmarthyaṃ ca 
prameyaviśeṣaiśca saha pramātṛviśeṣasya pūrvasiddhasya 
yadanusandhānam- ahaṃ nīlaṃ vedmīti; prameyasya prameyāntareṇa 
sāmānādhikaraṇyetararūpaṃ bahuprakāraṃ yadanusandhānaṃ 
kapitthaṃ nīlaṃ, madhuraṃ, ghaṭena udakamityādi ca; tat sarvamupapadyate 
ajaḍatvādekarūpatvāt, pūrvasiddhatvācca | 
prakāśarūpatānāntarīyakamiyatsarvamiti darśayituṃ bhittitvena 
dharmitayā prakāśaḥ ṣaṣṭhyā darśitaḥ | sarvadā siddhatvāt iti 
vedyānapekṣatvena nairākāṅkṣyāditi yāvat | āgūrya iti hṛdayena 
vaktumudyamya | pramātṛśabdena hi prakāśasya viśeṣaṇena 
jñānātiriktasvatantrarūpābhidhānāt sarvametat svīkṛtaṃ bhavati | 
gītāślokapāde saptamyāvananyatrabhāvākhyāṃ viṣayatāmāhatuḥ | 
upadeśadaśāyāmeva ca itthaṃ bhara iti darśayati prakāśātmano'pi ca 
iti | paramārthato'pi hi ghaṭo nāma ko'nyo'sti | tata ubhayamukhatvaṃ 
yadadvayasya śaṃkyate, tat katham | prakāśasyaiva bhāve ka ubhayārthaḥ | 
tathāhi prāgiva iti yathādāviva iti pūrvākāravilakṣaṇa iti ca 
yaducyate, tatra kimaprakāśātmanā kaścit ghaṭo bhātīti kṛtvā 
cintāmātrametat | nanu prakāśamānatā svarūpabhūtā ghaṭasya iti 
vṛttau kimetat | ghaṭo hi dharmī, sā tasya dharmaḥ | tadetat pariharati 
dharmāntara iti | etacca 

	tenaikyaṃ bhinnakālānāṃ ....................... | (1|4|3)

ityatra vyākhyātam | nanu aprakāśātmaiva prakāśasambandhāt 
prakāśate | āha svarūpeṇaiva iti | prakāśate iti hi yaducyate, tena 
cedanāviṣṭo'rthaḥ, tadaprakāśamāna eva prakāśyate | etacca 
ucyamānameva trapākaram | śvetaguṇena hi samavāya etadarthameva 
aṅgīkṛto yena śvetasvarūpīkaraṇameva prāsādasya anyathā 
śvetaguṇo'tra 

(page 76)

prāsāde na śvete, na aśvete evavā sthita iti 
samavāyabalādādhārādheyatāmātraṃ pratīyeta kaṭacaitravat | nanu 
śvetaguṇaḥ prāsāde tāvat samavaiti, tatastatra abhedaparyantatā ucyatām; 
prakāśastu jñānātmā na arthe samavaiti, apitu ātmani | hanta tarhi 
prakṛtamapi bhagnam | prakāśasaṃbandhābhāve hi arthaḥ kathaṃ 
prakāśate | nanu tasya jñānameva prakāśa iti uktam | tarhi sa prakāśate 
artha iti | etat jñānam, etacca ātmani,- iti ukte 
arthajñānātmanāmaikyameva darśitaṃ syāditi uktaṃ prāk | nanu 
asmadartharūpāt prakāśāt pramātṛsvabhāvāt vyatirekeṇa arthasya 
prathāyāṃ mama ghaṭaḥ prakāśate iti, natu ahaṃ ghaṭaḥ prakāśe iti | 
satyam, asti iyaṃ bhedena prathā, sā tu śarīrādeḥ kalpitapramātuḥ 
kṛśādiguṇaviśiṭṭatvādavigalitavedyabhāvasyaiva, yasya adhikaḥ 
pramātṛbhāva āropito māyāśaktyā | kīdṛk | arthānāṃ nīlādīnāṃ 
yā vibhāgena viśeṣeṇa ca avasthitayo'vasthānāni, teṣāṃ yā niṣṭhā 
nirākāṅkṣā viśrāntistasyā vyatiriktāyā abhāvādanāspadamapi 
sadāspadatāṃ bhittibhūtatāṃ prāpto yaḥ prakāśaḥ, sa eva prakṛtaṃ 
rūpaṃ yasya pramātṛbhāvasya; sa tādṛk | natu śarīrādyasaṃkucitāt 
paramārthaprakāśādaprakāśāaṃśakṛśādiśavalībhāvaśūnyāt 
bhedena prathā ghaṭādeḥ | atra hetuḥ aprakāśatā iti || 2 ||

	evaṃ tāvat vyatiriktaṃ jñānamarthasya prakāśamānateti 
asṃgato'yamarthaḥ, bhavatu vā; vyatireke tu abhyupagamyamāne 
viṣayāṇāṃ ca svarūpasāṃkaryaprasaṃga iti darśayati sūtreṇa

	bhinne prakāśe cābhinne saṃkaro viṣayasya tat |
	prakāśātmā prakāśyo'rtho nāprakāśaśca siddhyati || 3 ||

	abhinnaḥ san bodhamātrarūpo yaḥ prakāśaḥ, so'rthānāṃ na 
kaścit

(page 77)

bhinnatvena parasya paraniṣṭhatvāyogāt | tathāca sati prakāśabalena yā 
nīlādīnāṃ tatsvarūpārūṣaṇāyāḥ sāmarthyam, tato nīlaḥ prakāśaḥ, 
pītaḥ prakāśaḥ iti | atra sarvapadārthānupraveśanāt prakāśa 
ityetāvanmātramabhinnaṃ tattvamavaśiṣyate | prakāśabalācca 
nīlapītayorbhedo'bhyupagantavyaḥ | saca prakāśa ubhayatra api 
abhinnastulyaḥ | tadanugrahāt yadi nīlaṃ tat, pītaṃ na kasmāt, na vānīlaṃ, 
nāpi pītam | tadapi ca na vyavatiṣṭheta | anekāntavādo'pi naca 
pratiṣṭhāmadhigacchet | ekajñānajñeyasphuṭatvādeḥ smṛtyādeśca na 
vyavasthā syāditi bahuśākhaḥ saṃkaraḥ | tasmāt prakāśasya yadi na 
paraniṣṭhatā, tathāpi saṃkara iti cakāraḥ | tat iti yata evaṃ prakāśe arthāt 
bhinne saṃkaraḥ prasajyate | naca asau tathā | tasmādarthāt 
prakāśamānādabhinna eva prakāśaḥ | bhinnatve hi bādakapramāṇaṃ 
viṣayayogena pāṭavādinā smaraṇadiśā ca viṣayasaṃkīrṇatāpattiḥ | 
tadviruddhaṃ ca viṣayāsaṃkīrṇatvamupalabhyate,- iti 
vyāpakaviruddhopalabdhyā bhinnatvamarthat prakāśasya pratiṣidhyate | nanu 
evamartha eva nīlādirastu, kiṃ tato bhinnasvabhāvena svarūpābhinnena 
prakāśanāmnā bodhena viṣayasaṃkīrṇatātmakadoṣāpādakena 
aṅgīkṛtena | āha nāprakāśaśca iti | caḥ pūrvapakṣasūcanāya | 
etaduktaṃ bhavati- aprakāśasya jaḍasya svātmani na kācit siddhiḥ | uktaṃ 
hi- prāk nīlaṃ yadi svātmani anīlaṃ, navā anyat kiṃcit; tat kiṃ duṣyet | 
tathāca ajaḍapramātṛsiddhiḥ 

	evamātmanyasatkalpāḥ prakāśasyaiva santyamī |
	jaḍāḥ prakāśa evāsti svātmanaḥ svaparātmabhiḥ | (13)

iti | tasmāt prakāśarūpāt bodhādabhinna eva arthaḥ iti sūtrārthaḥ | vṛttau 
mātraśabdena abhinnatvamātraṃ vyākhyātam, sarvārthasādhāraṇatvena 
saṃkaraśaṃkāyāḥ pīṭhabandhaḥ kṛtaḥ | tasya iti prakāśamātrasya 

(page 78)

viṣayaniyamo nirnibandhanaḥ na kenacit hetunā upapadyate iti saṃbandhaḥ 
| viṣayaniyamasya ākāraṃ darśayati ghaṭasya ityādinā | tṛtīyapādasya 
arthaṃ prakāśātmatāśabdena vṛttau vyācaṣṭe arthasya siddhiḥ iti | tat iti 
vyākhyātaṃ tasmāt ityanena | vivṛtikāra evamarthaṃ saṃkṣepeṇa 
nirūpaṇāya avatārayati prakāśamānataiva iti | anena antyamardhaṃ 
ślokasya pūrvamavatāritamabhīṣṭatvādasya iha vastunaḥ, tadupāyatvena tu 
pūrvamardhaṃ saṃkṣiptaṃ vyākhyāya paścādavatāritam | tasya ca 
arthāt ityādinā prathamaślokārdhasya ādyamardhaṃ vyācaṣṭe | 
prakāśasya iti nīlādyākāraśūnyasyetyanena abhinnapadaṃ 
vyākhyātam svātmamātra ityādinā tu bhinnapadaṃ viṣayāpekṣayā 
ityādinā saṃkarapadam | svātmamātraparyavasānaṃ yaduktaṃ jñānasya, 
tat na sahate paraḥ | svaparaprakāśarūpaṃ hi jñānam | anyathā jaḍādasya 
ko bhedaḥ | tathāha ātmānātma iti evaṃrūpaḥ iti | 
svaparaprakāśarūpaṃ yasya ātmano jñānīyasya svabhāvasya, tasya yat 
prakāśanaṃ; natu anyā paraniṣṭhatā saṃvedanasya kācit yena sā 
svaparayorbhedāt virodhamutthāpayet | etat dūṣayati tat na iti | yadihi 
parasaṃmato'pi nīlādirādarśapraticchandakacchadmanā svarūpamatra 
saṃvedane na samarpayet, tadvirodho durapasāra eva ātmānātmanorvirodhe 
tatprakāśatvasya bhinnasvabhāvatāpatteravaśyaṃbhāvāt | tathāca 
viniścayo na tadityādi | etaddhi

	sahopalambhaniyamādabhedo nīlataddhiyoḥ |

iti vijñānākāramātraṃ nīlādi prasādhayituṃ nirūpitam | 
saṃvedanamityapi tasya tādātmyāt tathā prathanaṃ, natu tat saṃvedanaṃ 
nāma saṃvedanādanyasya vyatiriktasya kasyacidupapadyate iti |

(page 79)

evaṃ prathamamarthaṃ sarvathā paraniṣṭhatvānupapattilakṣaṇaṃ 
saṃkarasiddhaye vyākhyāya nirnibandhane paraniṣṭhatve 
abhyupagamyamāne viśeṣābhāvāt sarvasya paraniṣṭhatāpattau 
niyataparaniṣṭhatākṛtasya asaṃkarasya punarapi 
anupapattirityevaṃbhūtamarthamaparaṃ vyākaroti bhavatu vā ityādinā | 
tataśca sākāratākṛta eva niyamaḥ | yathāha

	tatrānubhavamātreṇa jñānasya sadṛśātmanaḥ |
	bhāvyaṃ tenātmanā yena pratikarma vibhajyate ||

iti | tasmāt nīlākāro'pṛthagbhūto bodhāditi bhāvaḥ | tadākāratayā api 
vinā tatra tatra niyate nīle pīte vā karmaṇi yā viśiṣṭatvena bodhasya 
avasthānarūpā pratikarma vyavasthā niyataparaniṣṭhatārūpā, tāṃ 
saṃbandhāntareṇa sādhayitumāha paraḥ athāpi iti | ya eva yogye deśe 
sthitaḥ san vijñānasya janakastasyaiva tat vijñānaṃ prakāśaḥ, sa eva 
vijñānasya viṣayaḥ | yadāha nākāraṇaṃ viṣayaḥ iti | saṃvedanasya 
viṣayasya ca sahabhāvenaiva upalambhaḥ, tat kathaṃ kāraṇabhūtasya 
nīlasya vijñānāt pūrvakālabhāvino viṣayatā ucyamānā 
anubhavabādhitā satī aṅgīkaraṇīyeti cet, tarhi samānakāla eva viṣayo'stu 
| pratyāsattiśca niyamakāriṇī ekasāmagryadhīnatātmā | tathāhi 
arthajñānakṣaṇalakṣaṇāt paryāyeṇa 
anyonyamupādānasahakāribhāvena vartamānādekasmāt sāmagrīrūpāt 
parasparonmukhau raṇarasikorabhrayugalakavat viṣayaviṣayibhāvena 
melanayogyau sopādānakāraṇaparamparāpratilabdhajaḍacetanasvabhāva-
viṣayasaṃbodhau jātau | atrāpi doṣamāha tato'pi iti | 
janakatvaikasāmagryadhīnatālakṣaṇāt kāraṇādapi yā 
pratyāsattiniyamasahiṣṇutā, tasyāstāvadaviśeṣo nīlapītayoḥ | anyathā 
ubhayaviṣayaṃ kathaṃ tatsaṃvedanaṃ syāt | nirākāratve ca saṃvedanaṃ

(page 80)

nīle yat paṭu, tat mandatvena anubhavo yasyetyevamabhimatasya mandena vā 
anubhavena abhimatasya pītasyāpi saṃbandhitayā paṭīyastvenaiva 
abhimataṃ syāt, nīlasyāpivā saṃbandhitayā mandatvena, yadivā dvaye'pi 
apaṭumandatvena | nahi nirākāratāpakṣe saṃvedanasya ko'pi viśeṣaḥ | sa 
eva paṭumandatādinā saṃkara uktaḥ | smṛtidvāreṇa api saṃkaramāha 
tathā iti | samakālameva yo nīle pīte ca anubhavaḥ, tena dattaḥ saṃskāro 
yadā nīlamātradarśanena prabodhyate, tadā sa prācyo'nubhavo nirviśeṣaḥ 
prabuddho nīlasyaiva, na pītasyeti niyamābhāvāt pītaprakāśātmā api 
bhevediti pīte'pi smṛtiḥ sā syāt | naca 
śikharasthajñānaparidṛṣṭabhāvavaiśvarūpyasya 
punarekatamabhāvadarśanaprabuddhasaṃskārasya 
samastapūrvānubhūtaviṣayā smṛtiriti loke'sti anubhavaḥ | nanu 
prabodhakabalāt niyamo bhaviṣyatīti parasya saṃbhāvanāṃ bhanakti 
yadyapi ityādinā | pūrvānubhavasya iti smṛtau punarunmiṣataḥ iti 
bhāvaḥ | sa iti anubhavaḥ | nanu sākaratādarśane'pi prabodhake 
nīladarśane niyate'pi prabodhyaṃ yat prācyamanubhavarūpaṃ 
saṃskāramukhena, tat nīlapītadvayākāramiti samānaprasaṅga iti 
śaṃkāṃ nikṛntati arthākāra iti | ākāradvayayogī apihi asau 
prabodhakabalāt tamākāramuddhurīkṛtya prabudhyate, dvitīyaṃ tu 
ākāramavacchāditameva saṃskārarūpatayā udāsīnamiva apahastitamiva 
karotīti na doṣaḥ | smṛtidvāreṇa saṃkaradoṣa uktaḥ | tasya yat 
nirākaraṇaṃ svapakṣe, tat 
pūrvoktasamastasaṃkaradoṣapraśamanopalakṣaṇaparaṃ mantavyam | 
tathāhi- tadākāraniyantritatvāt pratikarma vyavasthā nīlapītākārayoḥ 
paṭumandatayā parasparamasaṃkīrṇatā | etacca 
sākārakṣaṇikajñānasantānanaye vakṣyamāṇanītyā 
vāsanāsamarthanānirvahaṇādanupapannaṃ, sarvānu-

(page 81)

bhavāntarmukhaikasvatantrasaṃviddarśane tu upapannam,- iti nirūpayituṃ 
tatsadṛśānubhavasaṃvitprabodhitaḥ ityatra saṃvitpadamupāttam | 
evamiyatā sūtrasya svapakṣe na ayaṃ doṣa iti abhiprāyo'ntarlīnayā 
sūcitaḥ | tathāca vakṣyati sautraṃ tacchabdam ityupakramya sarvameva iti | 
yat parapakṣe duṣpariharamado doṣajātaṃ, svadṛśi tu mūlata eva na 
avatarediti, tasmādetat vyācaṣṭe tataḥ iti | prakāśasyaiva iti 
prakāśarūpataiva tasya jīvitam | sā ca ghaṭe'pi, paṭe'pi, śakaṭe'pīti 
svatantrā pramātṛrūpā svaśaktyā svātmani darpaṇe iva 
ghaṭādīnābhāsayati,- iti darpaṇasya lagnatvena yathā pratibimbāni bhānti, 
natu darpaṇābhedamanādṛtya svātmapariniṣṭhitāni, tathā amī 
ghaṭādayastasyaiva prakāśasya lagnāstadanujīvitā nirbhāsante; na 
svaniṣṭhitā iti yat mukhyaṃ prameyarūpamiha vitatya anyatra uktam 

	evamātmanyasatkalpāḥ .................... | (aja. pra. si. 13)

ityādinā, tadapi asmin sūtre pratipāditaṃ bhavati yena 
prāgupakrāntamantaḥkṛtānantaviśvarūpatvaṃ bhagavati nirvyūḍhaṃ 
bhavatīti || 4 ||

	tattadākasmikābhāso bāhyaṃ cedanumāpayet |
	nahyabhinnasya bodhasya vicitrābhāsahetutā || 5 ||

	nanu iyatā bodhābhinnasvabhāvatvaṃ satyaṃ 
nīlāderābhāsavargasya samarthitam, sattvābhāsavargo'pi yadi bodhasya 
svabhāvastatsadaiva bodhastathā cakāsyāt | naca evam | tasmāt kramikatvena 
ye vicitrā ābhāsāḥ, tannirbhāse niyamanidānaṃ vaktavyam | naca 
bodhasya tatra hetutvamavicitrāt vicitrakramikābhāsollāsāsaṃbhavāt | 
hetubhedādhino hi kāryabhedaḥ | tasmādekasyaiva bodhasya 
kramikānābhāsān pratibimbakalpena arpayituṃ caturastacchāyādhārī 
bāhyo'rthavargaḥ 

(page 82)

kalpanīyo'numānena | saca anumānasiddho'pi ayamitipratyakṣatā-
dhyavasāyādanumānasaṃvādasamarthitārthamūlatālakṣaṇena 
pratibandhena pramāṇaphalāt pratyakṣapramāṇaka ityapi na na yujyate 
vaktuṃ tena bāhyākāratayā saṃvedanarūpaprakāśavicchedena 
adhyavasāyādadhyavasāyāpekṣatvācca pratyakṣavyavahārasya | 
bhāvisūtrārthopaskṛtasya etatsūtrārthasya cet iti nipāto 
bāhyārthavādinā saṃbhāvyamānatāmāha | vāsanāprabodhādavicitrāt 
vicitro'yaṃ tattaditi ya ukta ākasmiko 
nirbhāsamānabodhahetukatvāsaṃbhavādajñātahetuka ābhāsaḥ, sa 
bāhyamanupāyatīti saṃbhāvyate | nahi avicitrāt bodhāt kramika 
ābhāsabhedo yuktaḥ, tata ekāntena bāhya eva hetutayā anumīyate iti yadi 
paro manyeteti sutrārthaḥ | tamavatārayati atha matam iti | etat cet ityasya 
vyākhyānaṃ bhāvisūtrārthaparyantasparśi vyākhyeyam | vicitraśabdena 
tattaditi vyākhyātam, kramaśabdena ākasmikatvam | eko'pi hetuḥ 
svasāmarthyayogāt yugapat vicitraṃ kāryamullāsayet nāma | kramasya tu na 
hetuḥ saṃbhāvyate iti hiśabdena dvitīyārdhaṃ hetutayā sūtre sūcitam, 
hetunā ca pūrvasiddhena bhāvyamityāśayena 
upeyopakramocitapravṛttike'pi sūtre vṛttau pūrvaṃ vyākhyātaṃ 
tasyāviśeṣe'pi ityantena | tathaiva vivṛtikāro'pi vyācaṣṭe 
bodhavyatiriktastāvat ityādinā | dṛśya ityanena ajñātahetukatvena 
ākasmikatāṃ vyācakṣāṇo bāhyasya anumeyatāṃ sūcayati | tatra 
anumeyabāhyārthavādī nirbhāsamāne bodhe sākāre 
prakṛtaśāstrārthābhyupagamasabrahmacārīti darśayati | jaḍatvamiha 
paraprasiddhyapekṣayā pramukhe mantavyam yadāha cetanaścāpi 
vedyatvāt iti | nanu pratyakṣasiddhā eva 
arthakriyāsaṃvādapratilabdhasatyabhāvābhāvā bāhyāḥ,

(page 83)

ta eva ābhāsānāṃ viṣayavyavasthāniyatasvabhāvānāṃ bodhānāṃ 
krameṇa udbhavatāṃ ekasāmagrīrūpatānupātena hetavo bhaviṣyanti,- iti 
dharmottarīyamāśaṃkya āha naca iti | uktanyāyena iti pūrvasūtradvaye | 
tatra hi pratyakṣameva prakāśātmakamaprakāśarūpabhāvane 
kathaṃ syāt iti uktam | tena yadāha ācāryadharmottaraḥ- anubhavasiddho 
bāhyasya bhedaḥ, yastu abhedaḥ, sa

	tatrānubhavamātreṇa jñānasya sadṛśātmanā |
	bhāvyaṃ tenātmanā yena pratikarma vibhajyate ||

iti yuktibalena vyavasthāpyamāno'nānubhavika iti; tadayuktīkṛtam | 
anubhava evahi na bhinnasya iti vadati vijñānavādini saṃvedanamityapi 
tasya tādātmyāt tathā prathanaṃ

	...................... na tadanyasya kasyacit |

iti nītyā | kā iyaṃ bhaṇitiranubhavasiddho bheda iti | tata eva 
sātāsātayorvyāvṛttimātrakalpito na bhedaḥ | pṛthagākārānanubhave hi 
tathā syāt nīlatvakṣaṇikatvayoriva, ihatu pṛthagākāropalambha ityapi asat 
saṃvedanatādātmyenaiva upalambhasya uktatvāt | kiṃca 
pratikarmavyavasthā api svasaṃvedanātmakasākṣātkārasvabhāvaiva- 
nīlamidaṃ saṃvedyate, pītamidaṃ saṃvedyate,- ityevaṃrūpā kevalaṃ 
vipratipadyamānasya hetucchāyayā nirdiṣṭā ghaṭo'yaṃ 
pratyakṣasiddhatvādastītivat | naca tāvatā anānubhavikatvamuktam | 
vyavahārasya mūlāpabādhanasāmarthyaviraha iti hi asakṛduktam | naca 
vyāmūḍhapratyakṣameva pratyakṣam, apitu parīkṣakavedyamityapi 
bhaṭṭena uktam; dṛḍhānumānasiddhamapi ca kiṃ na siddhaṃ bhavatīti 
alamasthānasvadarśanapakṣapatanena parasya | nanu yathā ghaṭasya 
prakāśamānataiva rūpaṃ, tathā ghaṭatā api bhaviṣyati nīlasya iva 
kṣaṇikatvakāryatvakāraṇatvādi,- ityāśaṃkya āha na 

(page 84)

ca iti | atra hetuḥ prakāśāprakāśa iti | prakāśatvādabhyadhiko hi 
ghaṭāṃśo'prakāśasvabhāvaḥ syāt, nīlameva tu bhūtvā na 
bhavaddhetorudbhavat svāmarthakriyāṃ vidadhacca 
atadvyāvṛttikalpitairbhāvāntarasādhāraṇaiḥ 
kṣaṇikatvādibhiravibhaktamavadhāryatāṃ kāmaṃ, natu 
parasparābhāvavyāptanīlapītatādātmyamekasya yuktam | 
prakāśaviruddhaśca ghaṭasya svabhāva iti na asau prakāśena ekātmā, 
ekātmatve vyāpako virodhābhāvastadviruddhaśca virodha iha upalabhyate iti 
vyāpakaviruddhopalabdhiḥ | prakāśasya na viruddho nīlātmā 
prakāśānadhikatvāt | tāvāneva hi prakāśa iti cet, pītaprakāśatā na 
kadācidupapadyeta nīlasya pītāt bhedāt | nīlapītādisvabhāva eva prakāśa 
iti cet, yugapadeva tathā nirbhāseta | krameṇa 
nīlapītādivaiśvarūpyabhāgiti cet, svāpādau prakāśarūpatā na syāt | 
ahaṃkārāspadasya ca bodhasya samastanīlādirūpatāśūnyasya 
upalabdhiprakāśamātreṇa śuddhena vapuṣā pratilabdho bodhena svabhāva 
iti tadadhikaṃ yadatra kiṃcit nīlaṃ vā pītaṃ vā śvetaṃ vā sātaṃ vā 
asātaṃ vā, tatsarvaṃ prakāśādadhikaṃ aprakāśarūpameveti 
virodhamāpādayet | naca iha kramaniyamo'pi asti- 
śuddhabodharūpānantaraṃ nīlābhāsaḥ, tataḥ samanantarapratyayāt 
pītābhāsa ityādirvaicityasahasrāṇāṃ darśanādaniyamena ca 
kāryakāraṇatvāyogāditi yuktamuktaṃ viruddhadharmādhyāsena iti | 
avadhāraṇam iti vṛttavevaśabdena dyotyam | ata eva iti yato 
vijñānaśarīrībhūtasya ghaṭāderākārasya saṃvedanarūpādadhikaṃ 
tṛṇamātramapi rūpaṃ na asti, tataḥ sthūlatāyāḥ kasyāścit 
paramārthasatyā abhāvāt kimavalambya codyaṃ kriyeta sthūlaṃ hi 
deśavitataṃ bhinnadeśaṃ ca | naca ekameva taddeśamataddeśaṃ ca 
bhavitumarhatīti |

(page 85)

nahi tat sthūlaṃ kiṃcana vastu, yadevaṃ paryanuyogapātrīkriyeta | 
citrarūpajñāne hi yo jñānasya upādhirjñānatādātmyena 
nirbhāsamāno nīlādiḥ, sa vijñānāt yato bhedena aśakyadarśanaḥ; 
tato'nanyabhāk san pītādiviviktaḥ sannaśakyadarśana iti na anyat rūpaṃ 
tato jñānāt vyatiriktavikalpavedyaṃ vyatiriktaṃ bhajate | taṃ hi vivecayan 
pṛthagbhāvena ekānekatādinā arthe vibhramakalpitabāhyabhāve nipatati 
taccitrākārasvasaṃvedanāstamayasamuditavikalpakāle vivecako yena 
kathaṃ tadeva nīlaṃ tadeva pītamityādiparyanuyogaprāṇitena 

	citraṃ tadekamiti cedidaṃ citrataraṃ tataḥ |

ityevamādivācyatāśatonmeṣeṇa arthamupalabhate, tat na vijñānasya 
ākārībhūte kaścit viveko yena codyā śaṃkā syāt- ekameva 
sthūlākāraṃ kathamiti, bāhyaṃ tu na sthūlākāramupapadyate | tadeva ca 
dṛśyate, pratibhāsadharmaḥ sthulateti ca bāhyārthāpahnavapūrvaraṃga 
eva ayam | paramāṇurūpa eva dṛṣṭo'rtha ityapi bāhyānupapattisūtre 
parākariṣyate | tasmāt bodhasya rūpaṃ na prakāśādatiricyate kiṃcit | 
etadeva apiśabdena āha citrākāre'pi iti | āstāṃ 
tāvadahaṃkārāspadabhūto bodhaḥ samādhānāvasthāpratipanno vā 
ekābhāsaniṣṭho vā, na yatra bodhādhikarūpāntarasaṃbhavāśaṃkā 
kācit | citrākāre'pi yāvadeṣaiva vārtā | bodhakarūpatvena iti 
virodhāpekṣayā api tṛtīyā vyākhyeyā hetau mukhyatayā prayuktā api | 
tadayamarthaḥ- yathā darpaṇena na gajaturagayorvirodho, nāpi 
tayoranyonyaṃ darpaṇaikaparamārthatvāt; tathā bodhena na 
nīlapītayoranyonyaṃ bodhaikaparamārthatvāditi | nanu 
bāhyamarthamanumānena itthaṃ saugataḥ samarthayitumadhyavasitaḥ | naca 
ayamekameva bodhamicchati |

(page 86)

tat kā iyaṃ granthaśayyā | sā iyaṃ granthaśayyā bāhye'rthe sati 
deśakālabhinne tajjanitāni saṃvedanāni ākāravanti kāraṇabhedāt 
bhinnānīti yuktam | tatra tu sati bodhaikarūpatā pareṇa ānīyamānā 
aparihāryaiveti vijñānavādī sarvathā samastadarśanāpabādhakaḥ,- iti 
ākūtena bāhyārthavādī ekabodhādvayavādamāpatantamasya darśayati | 
nanu yathā indranīlaḥ padmarāga indukānta iti maṇerviśeṣā 
maṇirūpānadhikāḥ kasyacidapi atra amaṇitvāyogāt; yathāca śāvaleyo 
bāhuleyaḥ khaṇḍa iti gotvasya viśeṣāstataśca gotvādanadhikā 
agorūpatvābhāvāt; yathāca indranīlaṃ mahānīlaṃ vaiḍūryaṃ 
garuḍamaṇiḥ śukaratnamiti nīlasyaiva viśeṣā nīlarūpatvānatiruktāḥ 
kasyacidapi tatra anīlatvāyogāt; tathā nīlabodhaḥ pitabodho madhurabodhaḥ 
karkaśabodhaḥ saurabhabodhaḥ ityādayo bodhasyaiva viśeṣāḥ, naca 
bodhātiriktavapuṣo yena eṣāmaprakāśarūpatāprasaṃgaḥ | tatasta eva 
viśiṣṭanirvikalpanīlādibodhasvabhāvā anyeṣāmapi 
svayamatadrūpāṇāṃ nīlasmaraṇavikalpanādīnāṃ 
vicitratābhāsabhājāṃ saṃskārādhānadiśā kāraṇaṃ bhaviṣyanti,- 
ityāśaṃkya niṣedhayati naca iti | atra hetumāha yataḥ iti | vṛkṣaḥ iti na 
kevalaḥ kaścidastīti pūrveṇa saṃbandhaḥ | pareṇa dṛṣṭāntīkṛtāt vargāt 
prakṛtasya bodhasya vailakṣaṇyamāha naivamiha iti | aparasya iti 
svāpamadamūrcchāsamādhānakaivalyādiṣu 
nīlasaṃvedanādirūparahitameva bhāti saṃvedanam | 
nīlādisaṃvedanakāle'pi tadviviktabodhasya svarūpamahamiti 
nīlādirūpatāveśavikalaṃ cakāstyeva,- iti darśayati ahaṃkārāspadasya 
ca iti | etacca 

	jñānaṃ ca citsvarūpaṃ ....................... | (1|2|7)

(page 87)

ityatra vimṛṣṭamasmābhiryat yasya nijaṃ rūpaṃ, tat tenaiva saha satataṃ 
bhāti taruriva śākhādimadviśeṣātmanā; naca bodho viśeṣaiḥ sadā 
bhāti,- iti vyāpakānupalambhaṃ darśayadbhiḥ | nanu ca 
bhavaddarśane'nekasāmānyasaṃvedanarūpaṃ svalakṣaṇamiti nirṇeṣyate 

	tathaiva saddhaṭadravya ...................... | (2|3|4)

ityādau

	pṛthagdīpaprakāśānāṃ ....................... | (2|3|5)

ityādau ca uddeśe | tataśca maṇitvavṛkṣatvagotvāni api ābhāsarūpāṇi 
śāvaleyādiviśeṣānupraveśaśūnyāni api bhavanti yathaiva 
arthakriyākaraṇāt viśeṣānupraveśavanti api śāvaleyādirūpatayā, tathā 
prakṛte'pi bhaviṣyati | etadāśaṃkya nirākaroti yathāvā iti, vāśabdaḥ 
śaṃkāṃ dyotayati | evaṃ yadi āśaṃkā tava, tadanena api prakāreṇa 
bodhasya na viśeṣo bhavati yato gotvākhyasya ābhāsasya sāmānyarūpasya 
tādātmyasaṃmelanayogena yadā anupraveśabhāñji ābhāsāntarāṇi 
deśakālādīni khaṇḍatvamuṇḍatvādīni ca, tadā 
sāmānyasādhyārthakriyātiriktaviśiṣṭārthakriyāsaṃpādanasamartha 
eṣāṃ bhedo bhavati; natu bodhe bodhabhāga ābhāsāntarairārūṣyate | 
pramātṛrūpaṃ hi saṃvedanāntaraṃ 
sāmānādhikaraṇyādisaṃbandhadiśā melayatyābhāsān, vibhajati veti hi 

	svātmaniṣṭhā....................... | (2|2|4)

ityatra vakṣyate, naca bodhasya saṃvedakāntaramasti | nanu ca 
pāṭavāpāṭavādīni kiṃ bodhasya na viśeṣāḥ | omiti brūmaḥ | kasya tarhi 
| āha viṣayasyaiva iti dūrāt rajaḥprabhṛtibhāvāntarācchuritameva 
vastutattvaṃ bodhe mandabodhatāviśeṣamādhatte nīlamiva 
nīlabodhatāviśeṣam, viparyaye tu viparyayaḥ | nanu kasmāt trasyadbhirbodhe

(page 88)

na sahyate ābhāsāntarānupraveśo bhavadbhiryuktimārgādityāha 
bodhabhāvāt ityādi | uktam iti pūrvasūtraṭīkāyām | bhāvātma iti 
bahubrīhiḥ prakāśātmanaḥ iti ca | prakāśasya kaḥ svabhāva iti 
cintāyāṃ yadi bhāvarūpa iti ucyate, tadaprakāśatāprasaṃga iti kathaṃ 
tatra ābhāsāntarānupraveśasaṃbhāvanā,- iti tātparyam | tadapi iti 
pūrvamekamityasya padasya prakāśāprakāśarūpatā ekasya ghaṭasya 
viruddhā,- ityasyāṃ chāyāyāṃ tātparyaṃ vyākhyātam, bodhasya 
ābhāsāntareṇa vyāmiśraṇāt svayaṃ ca bhedābhāvādekarūpatā,- iti 
tātparyacchāyāntaramadhunā asya nirūpitamiti apiśabdaḥ | bodhasya 
nīlādirna viśeṣo'nyatadrūpābādhaktvāt darpaṇasya iveti 
vyāpakaviruddhopalabdhiḥ | viśeṣatāyā viśeṣāntarāpabādhanaṃ 
vyāpakamabādhakatve viśeṣarūpatāviruddhasāmānyarūpatāprasaṃgāt 
| tacca iha na upalabhyate | nīlabodha eva sarvajñabodhatāyāṃ 
vaiśvarūpyasaha eva darpaṇa iva acchaḥ | tata eva bodhaṃ bhettumaśaktā 
nīlādayo bodhānadhikā api upari iva antariva, bahiriva na kvacidiva 
pariplavamānā darpaṇānadhikagajaturagādipratimatayā pratibimbatayā 
ucyante | nanu ekatvamapi ābhāsāntaraṃ kathaṃ 
bodhamanupraviśedityāśaṃkya āha na bahavaḥ iti | 
ābhāsāntarānupraveśavaśāśaṃkitaviśeṣāntaratiraskriyātātparyeṇa 
ayamekaśabda iti yāvat | evaṃca vadatā granthakāreṇa vistaravādino'pi 
bodhabhedaḥ kathaṃkāraṃ sidhyet 
bhedahetordeśakālākārāderābhāsāntarasya 
bodhasvabhāvavyāmiśraṇasahiṣṇoḥ kasyacidapi abhāvāditi 
bhinnabhinnakṣaṇikasaṃvedanasantānarūpatābhidhāna-
pracchanno'yamabhinnabodhavāda eva paramārthato bhavati,- iti darśitam | 
nanu abhedabodhasya kathaṃ nīlabodhaḥ, pītabodha iti | ābhāsabhedo'yaṃ,

(page 89)

na bodhabhedaḥ | ābhāsācca pratibimbakalpena avastusvabhāvāḥ kathaṃ 
svayaṃ bhidyeran, kathaṃvā bodhaṃ bhindīran abhinnasya bodhasya iti 
sautrāṃśasya arthaṃ vyākhyāya tasya bodhasya vicitrābhāsahetutā na 
upapadyate iti amuṃ bhāgaṃ heturūpaṃ sādhyaṃ pratyavatārayiṣyāmi, 
- ityāśayena sādhyārthanirūpakaṃ prathamamardhaṃ vyācaṣṭe sūtrasya 
paraspara iti ābhāsebhyo vijñānadarpaṇaviśrāntebhyo'tiriktaṃ 
vijñānarūpaṃ, vijñānācca atiriktaṃ tadābhāsarūpaṃ hetumākṣipati, 
- iti saṃbandhaḥ | krameṇa itivṛttau kramo'pi na niyataḥ, apitu 
bahubhirbhedairābhāsān viśiṣṭān karoti,- iti viśiṣyamāṇaśabdaṃ 
vṛttigataṃ tātparyeṇa vyācaṣṭe nacāpyete iti | bodhavilakṣaṇa iti 
aprakāśamānatvādeveti āśayaḥ | bāhyaśabdo'rthakriyākāriṇi vastuni 
rūḍhaḥ, natu prakāśabahirbhūtamātramāha śaśaviṣāṇaṃ 
bāhyamitivyavahārābhāvāt, tathāca dharmottaropādhyāyena apohaḥ

	prakāśātmakasaṃvedanabahirbhāvamantarno

iti vacasā pratipanna ukto'pi na bāhyatayā ukto na bahiriti vadatetyāśayena 
yo'rthaśabdo vṛttau, taṃ vivṛṇoti tathābhūta iti | 
bodhapratibimbatāprakarṣaṃ ye prāptā nīlādyābhāsāḥ, teṣāmarpakena 
sadṛśena tāvat bhavitavyaṃ darpaṇābhāsānāmiva | tataśca 
nīlābhāsasadṛśa eva nīlaḥ sidhyati anumānena | tasyaiva bāhyo'rtha iti 
saṃjñā | tadayaṃ prayogaḥ- vijñānāntarvartī nīlādyākāraḥ 
sadṛśamarpakamapekṣate pratibimbatvāt darpaṇapratibimbavaditi 
svabhāvataḥ pratibimbānāṃ hi bhavatāṃ niyatakramakatvamasti 
vyāpakam | tacca samarpakānapekṣāyāmakāraṇakatvāt na ghaṭate iti 
pratibimbatvaṃ tasya avyāvṛttaṃ sādhyabhūtayā arpakatvāpekṣayā 
vyāpyate iti

(page 90)

vyāptisiddhiḥ | nanu na kadācana bāhyākāraḥ pratyakṣeṇa 
avalokitapūrvaḥ, tat kathamagṛhītavyāptiko'numīyate | āha yathāca iti 
yathāhi indriyaṃ na kadācana pratyakṣeṇa gṛhītaṃ kāraṇamātreṇa tu 
vyāptirgṛhīteti; tathaiva kāraṇamātratvena anumīyate, natu prātibimbikena 
kenāpi vapuṣā | tattu anumitaṃ pakṣadharmatvabalāt viśeṣe viśrāmyati | 
rūpopalmbhe yat kāraṇaṃ niyatamapi ātmavarti tata eva tamasa ālokācca 
anyat, tat cakṣuriti, tathā ihāpi,- iti āśayaḥ | akasmāt iti kadāciditi yāvat | 
rūpādijñānaṃ kartṛ kalpayatīti saṃbandhaḥ | nanu indriyavadeva tarhi 
kāraṇamātraṃ tat kiṃcit syāt; nīlaṃ, pītamityādi tu kutaḥ | atra ucyate 
kevalam iti | jñānākāraviṣayā yā pratyakṣapratītiḥ, tasyā yā 
pariniṣṭhā paśyāmītyadhyavasāyarūpā tasyā aviṣayatvena tadapi 
avaseyatvena kalpyate, natu kāraṇamātratayā yato'rthatvena ayamiti tatra 
adhyavasāyaḥ | kāraṇamātrānumānāt viśeṣaṃ darśayitumāha nahi iti | 
indriyajanitānāṃ jñānānāṃ pratyakṣasaṃvedanarūpāṇāṃ 
satyamindriyaṃ kāraṇaṃ, natu viṣayastairjñānena indriyaṃ 
paśyāmītyadhyavasāyasya ajananāt | indriyaṃ hi anumānasyaiva 
viṣayastadadhyavasāyenaiva adhyavasitatvāt, anumānaṃ ca viṣayo yasya 
ananyatrabhāvo viṣayārthaḥ | iha punaḥ iti prakṛte viśeṣamāha | agṛhītaḥ 
kathaṃ dṛṣṭatvena avasita iti cedāha sārūpyāt iti, yāvat kiṃcit 
deśakālasahacāri svarūpavaicitryaṃ jñānāntavṛttenīrlasya, tāvat 
sarvamavikalaṃ tadarpakasyeti sāmānābhihāramelananyāyena 
jñānīyākāraviṣayo'dhyavasāya utpannaḥ sārūpyakṛtāt vibhramāt 
jñānabhinnamarthākāramidantocitamadhyavasyāmi,- ityevamupajāyate, na

(page 91)

ca asau vibhramajo'pi adhyavasāyo gṛhītāyāṃ śuktikāyāṃ 
rupyāvasāya iva gṛhīte jñānākāre bāhye avasāyatayā 
bhramamātrasvabhāvaḥ, kintu arthapratibandhanāt maulikaṃ 
jñānākārārpaṇasamarthamarthaṃ kāraṇabhūtamadhyavasyan 
bhrāntirapi saṃbandhaḥ pramā iti nyāyena pramāṇavyāpāratāmātmani 
ādarśayati | yadāha

	arthasyāsaṃbhave'bhāvātpratyakṣe'pi pramāṇatā |
	pratibaddhasvabhāvasya taddhetutve samaṃ dvayam ||

iti | pramāṇavyāpāraśca ayaṃ bhavan darśanabalāt paśyāmītyevaṃ 
pratyakṣādinā adhyavasāyarūpatāṃ gṛhṇan 
pratyakṣamanugrāhakamarthasya amātya iva paravaśīkṛtaṃ rājānaṃ 
grāhakatvena vyavaharati, tataḥ pratyakṣagṛhīta eva bāhyo'rtha iti 
laukikamanusṛtaṃ bhavati | tarhi anumānasya kutra vyāpāraḥ | āha 
sasaṃvāda iti mūlakāraṇabhūtaḥ samarpaka ākārāṇāmasti 
arthastadākārasadṛśa iti | etāvati vyāpāro'numānasya | yaditu 
anumānaṃ tamarthaṃ bāhyamadhyavasīyamānaṃ bādheta sthairyamiva 
sattvahetuḥ, tadasau bāhyatādhyavasāyo nirmūla eva 
bhavannapramāṇaphalaṃ syādagṛhīte bāhye marīcigrahaṇe'pi 
jalāvasāyo bhavannagṛhītaviṣayo na pramāṇaphalam | yadica 
anadhyavasitaṃ yathā kṣaṇikatvaṃ sattvahetuḥ prasādhayati, tathā 
bāhyamarthaṃ pratibimbatvahetuḥ; tat laukikaḥ pratyakṣadṛṣṭena arthena 
vyavahārākṣama iti na syādeva vyavahāraḥ | tadetadāha natu 
akṣaṇikatvavat ityādinā | indriyopayogena iti indriyamupayujyate asmin 
vijñāne tena adhyavasāyāṅgīkāritabāhyārthaviṣayatākena | pūrvam iti 
anumānavyāpārāt | nanu

	........................ ākasmikamahetukam |

iti prasiddhaṃ

(page 92)

	nākasmikā na nityāste na nityajñānahetukāḥ |
	iti kāryākasmikatvaprasaṅga.............................. ||

ityādau | naca ahetukāt hetvanumānaṃ yuktamityāśaṃkāṃ vyapohati 
ajñātahetūdbhavatvam iti | kiṃśabdasya 
cicchabdanipātadyotitārthasahāyasya viśeṣo'rthaḥ kaściditi nañsamāse 
taddhitavṛttau ca dadhyodanamārdaṅgikādigata iti vyavatiṣṭhate | 
sāmānyasya ca viśeṣaviśrāntiśūnyasya avadhibhāvāt viśeṣasya 
avaśyaṃbhāve sāmānyādāgata iti vacanavyaktirajñātaviśeṣāditīyati 
paritiṣṭhati | tata ākasmiko'yamartha ityukterajñātahetūdbhavatvaṃ 
nañtaddhitavṛttitātparyāyāto

	vākyārhte padavacanaṃ śrotrendriyakṣetriyavat |

iti nayena mukhyo'rthaḥ sati ca hetau yathā bhavati ajñānaṃ, tathā asatyapi, 
- iti ajñānasādharmyādahetukābhidhāyī sādṛśyanimittatayā lakṣaṇayā 
tatra tatra prayuktaḥ, natu iha tatheti yuktamuktam- 
ākasmikādajñātahetoraniyatakramakatayā kramikādābhāsavaicitryāt 
bāhyārthasiddhiriti | avaśyaṃ ca asāvabhyupagantavyā 
svatantrasvākāravijñānasamarthanarabhasapravṛttatvavaśyamapraśa-
manīyamīśvarādvayavādaṃ 
samastasvanikāyasamayonmūlanamanupraveśayiṣyati,- iti 
sūtravṛttivivṛtīnāṃ tātparyam || 4 ||

	atha sa eva bāhyārthavādī vijñānavādimatamāśaṃkya 
niṣedhayati 

	na vāsanāprabodho'tra vicitro hetutāmiyāt |
	tasyāpi tatprabodhasya vaicitrye kiṃ nibandhanam || 5 ||

	vāsanānāmanādikālopanatānāmabhinavanīlādyābhāsotthāpana
śaktīnāṃ yo vicitraḥ prabodhaḥ, sa eva atra kramikābhāsavaicitrye 
hetutāmeti prathamataḥ, caramaṃ tu saṃskārātmanāṃ prabodho vikalpa-

(page 93)

nasmaraṇādyābhāsanāhetutāmeti,- iti saṃbhāvayate vijñānavādī | etat 
dūṣayati na iti | atra hetumāha tasyāpi iti | yo'sau vicitratvena saṃmato 
vāsanāprabodhaḥ, sa svātmani vaicitryāt vā vicitraḥ, 
vāsanāvicitrabhāvāt vā, prabodhakabhedāt vā | trayamapica asat | yato 
vāsanā nāma vijñānānatiriktavigrahā | tat punarapi 
prabodhamātramekamanyasya aprakāśamānatvena asattvāt | evaṃ 
prabodhe'pi vācyam | naca prabodhakahetavo'pi vijñānabāhyāḥ kecana 
upapadyante sarvasya prakāśamānasya 
prakāśātmkabodhamātraparamārthatvāt | tasmādābhāsavaicitryamanyato 
na ghaṭate,- iti samarpakena ābhāsavaicitryādhāyinā bāhyenaiva bhavituṃ 
yuktamiti cet bāhyārthavādino matamiti sūtrārthaḥ | vṛttigrantho'tra 
spaṣṭaḥ | taṃ saṃkṣipya avatārayati bāhyamarthaṃ vinaiva ityādinā | 
tadvaicitryasya iti vāsanāprabodhavaicitryasya, vāsanāṃ 
kastūrikākalpitavastrādyadhivāsavat satataṃ paratantrarūpāṃ 
vyākhyātuṃ tasyāḥ śaktirūpatāmabhidhatte 
śaktimadekaparamārthatāsiddhaye | bodhaḥ ityādinā prabodhaṃ 
vyācaṣṭe | tasya iti, etaditi nīlapītādikramikābhāsalakṣaṇaṃ yat 
svakāryaṃ, tajjanane kartavya ābhimukhyaṃ 
paripāko'ntyāvasthāprāptatayā sa prabodhaḥ | astu iti 
vāsanāsmṛtijanakaḥ saṃskāraḥ prasiddhaḥ, natu 
apūrvānubhavaprasādhaka iti tāvat na udgrāhayāmahe 
sāṃnyāsikametadavatiṣṭhatāmiti bhāvaḥ | bodha eva iti adhikasya 
aprakāśatvena bodhaśarīrānuveśayogyatāvirahāditi hi uktaṃ 
bhavadbhireva nijavratam | ucyamāna iti śabdaḥ kevalamadhikībhavet 
prabuddhavāsano bodha iti, natu arthaleśaḥ | asāvapi iti 
uktaivaṃvidhaviśeṣāntaro'pītyarthaḥ | nanu ca yadapi ābhāsavaicitryaṃ

(page 94)

bhāsavaicitryaṃ kāryatvena samarthanīyaṃ, tadapi bodhāt manāgapi na 
atiriktamaprakāśanaprasaṃgāt, atiriktamivaca bhāti | tadasya evaṃvidhasya 
kāryasya yādṛśo yakṣastādṛśo baliḥ ityupapattyā kāraṇamapi 
vāsanāprabodhavaicitryaṃ paramārthato bodhānatiriktamapi 
atiriktāyamānaṃ bhaviṣyati,- iti kimidam iti | nahi kāryavaicitryamapi 
pāramārthikaṃ kiṃcana yasya anupapattiryatnapariharaṇīyā bhavet | etat na 
sahate na cet iti | etat iti vakṣyamāṇam | tat darśayati ābhāsabhede'pi 
ityādinā | na ityatra upapattimāha yataḥ iti | kāryaṃ hi apūrvatayā 
bhāsamānamucyate | tacca vastu vā astu svārthakriyāyogāt, 
viparyayādavastu vā satyarajatābhāsavat sudhāśakalarajatābhāsavacca | 
kāraṇaṃ punaḥ kāraṇatvādeva samarthamarthakriyālakṣaṇatvāt vastuna 
iti vastveva bhavitumarhati, na avastu sarvasāmarthyavirahalakṣaṇatvādeva 
avastunaḥ | kāraṇatāvyāpakasāmarthyaviruddhāsāmarthyopalambhāt 
kāraṇatā niṣidhyate, vyāpakaviruddhopalabdhyā abodharūpatayā ca 
vastutvam | tathāca na vicitramiti kutaḥ kāryavaicitryam | tadāha 
vastubhūtasya iti bodhatayā vasturūpasyetyarthaḥ | yena ca vapuṣā 
nīlavāsanāprabodhavān bodhaḥ; pītavāsanāprabodhavān bodha ityādinā 
vicitraḥ; tadrūpaṃ nīlapītādibhedamāyatate | sa ca bhrānta iti tadapi 
rūpamavastu sat bodhasya kathaṃ satyaṃ vicitrabhāvamānayet | nanu kiṃ 
satyena vicitrabhāvena | yathāhi kāryavaicitryamapāramārthikaṃ, tadvat 
kāraṇavaicitryamapi bhaviṣyati,- ityāśayena śaṃkate athāpi iti | etadeva 
pūrvamuktam ābhāsabhede'pi ityādinā | kintu tatra itthamuktam- 
kārye'pi nīlādyābhāsavarge

(page 95)

bodharūpameva pāramārthikaṃ, kāraṇe'pi tadeveti 
pāramārthikatāmukhena sāmyamānītam, adhunā tu apāramārthikatā 
vaicitryaviṣayā dvayorapi,- ityanena bhaṃgyantareṇeti apunaruktam | etat na 
sahate tadayuktam iti | hetumāha avastunaḥ iti | tadabhyupagame iti 
kāraṇatvāṅgīkaraṇe | iha iti nīlādyābhāsakrame | nahi iti kāryaṃ yathā 
dṛṣṭamātraṃ paścāditi arthāt labhyate, na tathā pūrvaṃ dṛṣṭamātre 
kāraṇamiti vaidharmyeṇa | nanu niyamena pūrvaṃ dṛṣṭamitīyadeva 
kāraṇasya lakṣaṇam | āha tathābhūtasyāpi iti | pūrvadṛṣṭamātrasya 
apihi kāraṇatvametadeva- yat vastunaḥ satyasya avastuno vā asatyasya 
prakhyāpane samarthatā | saiva ca vastutvam | nanu yadi kārymavastu tarhi 
asya kathaṃ kāryatā | kā khalu asyāḥ kṣatiḥ | kāmamavastutvena tasya 
sāmarthyaṃ nijaṃ kāryāntaramakurvataḥ kāraṇatā na syāt | etadāha 
kāryasya sāmarthyavirahe tu iti | nanu yat kāraṇena kriyate, tat 
viśiṣṭakāraṇabalotpannaṃ kathamavastu bhavet; avastutve vā 
tatpadabandhapratilabdhasāmarthyaṃ kāraṇasya na kiṃcit sāmarthyam,- iti 
kāraṇamapi avastu bhavet | etadapi anenaiva āha kāryasya iti avastutvāt 
kāryasya kāraṇe kāraṇatvaṃ na bhavet kāryāpekṣasya sāmarthyasya 
abhāvādityarthaḥ | kāryatāyāstu avastutvaṃ na uparodhakam | avastuno hi 
kāryataiva na bhavet yadi satkāryavāda iva svāt sāmarthyāt tadudbhavet | 
naca evam | kāryaṃ hi avastubhūtameva utthāpyate kāraṇena | tadaivaca tat 
kāryamucyate, yadā nirupākhyam | darśitaṃ ca svasāmarthyena iti vadatā 
kāryagatabhavanam | na kutracidupayogi yadaṃgīkṛtamanyaiḥ 

	nityaṃ na bhavanaṃ yasya ......................... |

(page 96)

iti, tat kāryamasadeva | tattu kāraṇabalādudbhūtaṃ yadi sarvātmanā 
sāmarthyayuktaṃ, tat vastu; na cet, avastu | bhrāntayo'pica bodharūpatvena 
vastvātmānaḥ satyaḥ kāryā eva dvicandrajñānamiva timirasya | 
dvicandrasya tu arthakriyāvirahādavastutvamastu, na tatsaṃvedanasya 
saṃvedanāntarāt vicitrasya | tadāha nahi bhrāntīnāmapi iti | kāmalayā 
pītaśaṃkhasaṃvit, kācena kācaśaṃkhapratyayastimireṇa 
śaṃkhadvayasaṃvit,- iti hi dṛśyate eva | nanu pratītirūpaṃ cet bhrāntau 
kāryaṃ, tarhi pratītervastutvāt kathamuktaṃ- kāryatvaṃ 
punaravastutve'pīti | atha dvicandrādi avastu, tadeva kāryaṃ; tarhi 
kāraṇavyāpārabalotpannaṃ kathamavastu, tanniṣṭhena vāsāmarthyena 
kathaṃ kāraṇaṃ vastu bhavet,- ityāśaṃkya āha athavā iti | etaduktaṃ 
bhavati- kāraṇatvacintāyāṃ bodhasya avaśyaṃ 
pāramārthikasvarūpasamāveśamātra eva avastheyamityevaṃparatvena 
asmābhirabhihitamado bodharūpatvaṃ ca pāramārthikaṃ ca | tacca 
avicitraṃ bhaṅgyantarasahasre'pi yojyamāne | tat hi na pāramārthikaṃ 
kiṃcit prakāśādhikasya aprakāśanaprasaṃgāditi hi paramaṃ 
vratamaheyamāgamato yuktitaśca | etattātparyaṃ darśayati etāvattu iti | 
nīlavāsanāprabodhasya bodhādanarthānantaratvāt 
pītavāsanāprabodhavatā bodhena tulya eva asau bodhaḥ, so'pi teneti 
bodhamātramekameva,- iti piṇḍārthaḥ | evaṃ vastutattvamabhidhāya 
abhyupagamyavādena āha athāpi iti | pūrvaṃ nīlavāsanāprabodhe 
pītavāsanāprabodhe'pi ca bodharūpamekamiti uktam | mā bhūt vā 
bodharūpamekaṃ tadvāsanādvayaprayogāt, kintu nīlavāsanāprabodhasya 
pītavāsanāprabodhāt tadvāsanāvaśena bhedo vaktavyaḥ | vāsanayorapi 
nīlapītamukhena nīlapītayośca kathaṃ bhedaḥ | nīla-

(page 97)

pītavāsanādvayaprabodhāditi cet, cakrakameva | 
karmabhedavāsanādhipatyāt tadbheda iti cet, karmabhede'pi nimittaṃ 
vaktavyam | nilābhāsāt pūrvabodhādanyo'nantaro nīlābhāsabodhaḥ 
saṃskārarūpatayā sthitāditi cet, pūrvasyaiva gatasya bodhasya 
bodhatātiriktā nīlābhāsatā kutaḥ | bālasya ca prāthamiko nīlābhāsaḥ 
kasmāt | prāgjanmagatatvakalpane sarvaprathamanīlarūpatāpratilambhe 
nidānaṃ vācyam | paramparayā kramikanīlapītādyābhāsasvabhāva evaca 
bodha iti svāpamūrchāsamādhānādau śuddhātmatā tasya katham | sāpi 
nīlapītādyābhāsavadasya svabhāva iti cet, na 
śuddhāśuddhātmatvayorvirodhāditi uktaprāyam | kiṃca satatameva 
śavalasvabhāvatve bodhasya aṅgīkṛte nirmokṣaprasaṃgaḥ | tataśca

	prabhāsvaramidaṃ cittaṃ prakṛtyāgantavo malāḥ |

iti 

	prajñāpāramitādvaitaṃ jñānam ....................... |

iti

	yāmadvayajñānamayīm .................................... |

ityādeḥ svagamābhyupagamādervipralopaḥ,- iti alam | tadetadeva sidhyati 
yadi bodharūpatātiriktamanādinijanijabāhyakāraṇaparamparāprabhavaṃ 
bāhyameva kiṃcit vastu bhavet,- iti bāhyārthavādinā svapakṣaḥ 
pratyujjīvitaḥ | tadetadāha sarvathā bodhavyatirikta iti | evaṃ 
svasantānavarti saṃbhāvyamānaṃ tāvat kāraṇaṃ karmādhipatyaṃ 
pūrvo nīlābhāsaḥ samanantarapratyayaḥ pītābhāsaprāya 
ityetadāśaṃkitaṃ nīlapītādikramikābhāsavaicitrye, naca tadupapadyate iti 
uktam | atha parasantānavarti vaicitryaṃ 
nīlādyābhāsavaicitryakrame'dhipatipratyayarūpatayā heturiti yaḥ 
śaṃketa, taṃ prati āha bāhyārthavādī- 

(page 98) 

parapramātṛrūpāṇi yāni bodhāntarāṇi 
ābhāsavaicitryodbhāvanakāraṇabhāvena samarthayitumiṣyante, teṣāṃ 
saṃpādayitavyābhāsabhedāt tasmāt bodhasantānādekasmāt bhede sati 
kāraṇatā saṃbhāvyate | sa evatu katham | tathāhi bodhasya tāvat 
svarūpaṃ nityamahamiti 
antarmukhamidantāvabhāsavaśasamuditabhinnakakṣyau deśakālau 
tadbodhaviśeṣaṇabhāvābhigamanāsamarthau na bhindāte,- iti uktamasakṛt 
| svarūpabhede ca anyatarasya aprakāśarūpatvādabodhatvamāpatediti na 
deśato na kālato vibheditā asti saṃvidaḥ | svarūpato'pi bheditā jaḍāt na 
saṃvidaścitaḥ | tato vastutaḥ pramātrantarāsiddhiḥ | abhyupagamavāde tu 
sadā sannihitāni khalu parapramātrantarāṇi | tāni ca 
ābhāsavaicitryaśatasahasravartiyaugapadyādekasminneva kṣaṇe tataśca 
ekaikatra santāne tadekavyatiriktasamastasaṃbuddhāsaṃbuddha-
pramātrantaragatābhāsavaicitryāṇi kāraṇabhāvamupagatānīti na kaścit 
niyamena kvāpi pramātari ābhāsabhedaḥ samarthayituṃ śakyate iti 
koṭidhā ayamupaplavahetuḥ samarthanaprakāraḥ | anena āśayena āha 
upapannatve'pi iti | nanu sarvamidaṃ jaḍābhimataṃ 
bhāvābhāsajātamindhanāgnyābhāsabījabhūsalilābhāsādicetanaiḥ 
parasparayogyadeśasaṃnidhāpanābhidhānopasarpaṇasaṃpādana-
samarthaiḥ pratyayairhetubhirnijanijakāryasaṃpādanocitayogya-
deśasaṃnihitaṃ tāvat kriyate iti na asti atra vivādaḥ | 
upasarpaṇapratyayāśca cetanāśca icchāvantaḥ | sāca icchā 
layavijñānakalpāraghaṭṭaghaṭīyantravāhakecchā iva 
anantakālabhāviniyatakramakamābhāsavaicitryamāgūryaiva uttiṣṭhati | 
parāvaskandaiṣaṇā hi rājñaḥ pararāṣṭramardanāvaluṇṭhanabhaṅga-
bhedanaprabhṛtyābhāsāntaraśatasahasrābhisandhānagarbhatayaiva 
prādurbhavati | vivṛtau prabandhena prayuktamābhāsapadaṃ-

(page 99)

vijñānanaye bāhyārthābhāvāt vijñānākārataiva 
upasarpaṇapratyayādīnāṃ pūrvapūrvarūpatayā 
kāraṇānāmuttarottaraṃ ca kāryāṇām- iti sūcayati | hi iti 
yasmāduttarottaratayā niyamavatyā kāryatvena abhimatāḥ abhimānena 
tathā niścitāḥ, pūrvatāniyamāt ca kāraṇatvena abhimatā 
ābhāsabhedāḥ kriyante svenaiva icchāviśeṣeṇa vijñānarūpeṇa tathā 
iti tato hetuprakārādidamāyātam- yat kila 
icchākhyālayavijñānaviśeṣasamutthāpito ya ādyaḥ kāraṇābhāso 
yathā grāmaprāptyabhisandhānātmavijñānotthayā gamanecchayā 
utthitaḥ śarīrābhāsaḥ, sa eva madhyavartino mārgābhāsaṃ, tadvartinaśca 
tṛṇādinīlādyābhāsānākṣipati yāvadgrāmapraptyābhāsaphalam; 
tato'pi tṛptyābhāsātmakaphalāntarābhisandhānodbhūtayā icchayā yaḥ 
pākābhāsaḥ prathamakāraṇābhimata utthāpitaḥ, tenaiva 
adhiśrayaṇādyābhāso'ntyagrāsanigaraṇābhāsaparyanta ākṣiptaḥ; tataḥ 
pānagoṣṭhīvaicitryābhāsecchetyādi mantavyam | yadivā kimanena 
bahutarecchāprabandhākṣepiṇā bhūyasā kāryakāraṇabhāvena 
parikalpitena | prathamagarbhādhānasamaya eva ekapraghaṭṭakasaṃmurchita 
eva yaḥ karmavallīpratānābhāsa ekalayavijñānarūpaḥ, sa eva 
maraṇakṣaṇaparyantābhāsāvadhīn niyatakramabhāvinaḥ 
sukhaduḥkhatatsādhanābhāsānākṣipati | punarjanmāntare'pi evaṃ, natu 
teṣāmābhāsānāṃ madhyavartināṃ punaḥ kāraṇāntaramupayujyate 
yathā pātayāmi enaṃ giriśikharādityanayaiva icchayā 
pātyamānagatatattaddeśasaṃyogavibhāgatatkṛtaduḥkhamohādyābhāsa-
paramparā ākṣiptaiva | tata eva madhye'sāvaśakyapratibandhā | yadāha 
muniḥ 

	iha te karmaṇāmeva vipākaścintayiṣyati |
	amutra bhavitā yatte taccintaya śubhāśubham ||

(page 100)

iti | ardhena aśakyapratibandhatvaṃ madhyābhāsānāṃ vadatā 
karmābhāsākṣepāvinābhāva eva uktaḥ | ata eva 

	......................... prārabdhrekaṃ na śodhayet | (sva. 4|141)

iti aśakyatvameva uktamāgame 

	........................... yenedaṃ taddhi bhogataḥ |

iti ca | tathāhi lagnaviśeṣarūpāt kṣaṇābhāsāt sarvaṃ 
tajjātakagaṇanākāle maraṇakṣaṇāntaṃ niścinvanti yāvat 
tajjanmagatamaraṇakṣaṇalagnaviśeṣābhāsāt janmāntarābhāsākṣepādi 
niravadhikamapavargāvadhikaṃ vā gaṇyate eva | naca niyatakramānurodhina 
ābhāsaprabandhasya ekaṃ kāraṇam,- iti apūrvamadaḥ, apitu bālyādau 
grahanakṣatrādyudayāstamayaparamparāprabandhe ṛtusamudāye ca 
pratītatarameveti darśayati yathā iti tāvantaṃ niyataṃ kālamavasthātuṃ 
śīlaṃ yeṣāṃ, teṣāṃ vicitrāṇāṃ vilakṣaṇānāmanyonyato niyato yaḥ 
prabandha uttarottaratvena ābhāsaparamparā; tasyā ekameva kiṃcit heturiti 
iti iti | athāpi ucyate iti pūrvakriyayā abhisaṃbadhyate dṛṣṭānta eva tāvat, 
sarvasmin naitadupapadyate | kṛttikodayādinā nirūpite 
grahanakṣatrarāśiparispande tāvadetadupapadyate, ṛtvādau ca yatra niyata 
eva kramaḥ | bālyayauvanādau tu na naiyatyamasti avaśyaṃbhāvinaḥ 
kramasya anyathāca anyathāca avalokanāt | tato 
madhyavartināmāhāravaicitryādīnāṃ 
yauvanajarāsaṃpādanatāratamyabhājāmadhvagamanādeśca 
jarāsamutthāpakasya, rasopayogādeśca yauvanaparirakṣaṇaikakasakṣaṇasya 
svaniyatabhāvitayā pūrvakarmamātrakṛtamākṣepamasahamānasya 
kāraṇabhāvena vartamānasya kathamapahnavaḥ kriyeta | naca asya 
madhyavartinaḥ kāraṇavaicitryamanyadupalabhyate | tataśca 
samanantarābhāsasyaiva tatra kāraṇatvamiti na

(page 101)

tāvadādyasyaiva hetutā | atha ucyate kimanena puruṣaviśeṣagatena 
bālyādinā | puruṣasāmānyāpekṣayā bālyādikamasmābhirudāhṛtatam | 
ekaprathamakāraṇākṣipto'nekaḥ kramikaḥ prabandho bhavati,- ityatra 
vastuni idamapi na upapannaṃ tatrāpi prathamakāraṇākṣiptatvābhāvāt | 
yathāhi prabhāsvarādapavarakapraviṣṭasya na prathamakāraṇabalādeva 
cakṣurādīnāmālocanahetūnāṃ saṃpattiḥ, tathātve hi 
praviṣṭamātrasyaiva apavarakodarāntarvartisamastavastvavalokanaṃ 
saṃpadyeta, apitu paramparāpekṣāto'tra cakṣurādīnāṃ 
viśeṣapratilambharūpaḥ pariṇāmaviśeṣo'pekṣyaḥ | yathāca 
bījabhūmyudakānāmaṅkure janayitavye 
paramparāsaṃnidhānajanito'tiśayarūpaḥ pariṇāmaviśeṣaḥ, yathāca 
odanasaṃpattau kartavyāyāṃ sthālītaṇḍulodakānām | anyathā 
pariṇāmāntarānapekṣāyāṃ jhaḍityeva aṅkura odanaśca jāyeta | 
sāmagryā hi tatra pūrṇatvam | tatra hi na adhikamanupraveśayitavyaṃ, nāpi 
tataḥ kiṃcidapasārayitavyam | tathaiva 
kramasaṃnihitānāmādityacandrādyudayānāṃ ca nīhāravihārādīnāṃ 
ca avaśyaṃ paramparopakārapariṇāmena bhavitavyam | anyathā 
katipayakṣaṇaireva bālyāt yauvanaṃ, tato'pi madhyamavayaḥ, tato'pi 
vārdhakamiti savidhavartyeva nidhanaṃ syāt | asti tu kālāntarapratīkṣaṇam 
| tasmāt madhye sajātīyaśarīraparamparāsvabhāvena 
pūrvāvasthāpracyāvottarāvasthodayaśūnyena api dehasantānena 
kaṃcitkālamavastheyam | tadāha sthitaiva iti | tathā ca jātakagaṇane'pi na 
iha dine idamidaṃ drakṣyati, sprakṣyati vakṣyatīti pratipadaṃ 
hasitakaṇḍūyitaparyantavyāparasaṃvedanasaṃbhavaḥ, apitu 
sukhaduḥkhāveśopayogidaśāviśeṣasaṃvedanamātraṃ bhavati | yuktaṃ 
ca etat | anyathā ekajātakatattvasaṃvedane tallagnatayā sarvaṃ vidyāt | 
tasmāt bālyādau prathamakāraṇākṣiptatvaṃ tāvadasat 
vaicitryaśatadarśanāt |

(page 102)

araghaṭṭaghaṭīyantravāhane tu tāsāṃ ghaṭīnāṃ 
bharaṇāvarjanaparivartanādāvavicitra eva kramaḥ sarvadā | tatrāpi 
vaicitryaṃ cedavaśyaṃ sahakāryantaramantarā syāt | naca prakṛte 
nīlādyābhāsavaicitrye yauvanādau rasāyanādyupayoga iva 
sahakāryantarapraveśaḥ kaścit niyatasya sahakāriṇo'navalokanāt | yathāhi 
rasāyanopayogāt yauvanamavatiṣṭhate ciraṃ kālaṃ, gatamapivā 
punarnavopayoga iva punarāvartate iti niścito'tra sahakārī; tathā 
nīlābhāse sthire vā asthire astameti punarudbhavati vā ayaṃ sahakārī,- iti 
na niścayo'sti | nāpi prabhāsvarādapavarakapraveśa iva 
anyonyapariṇāmāpekṣā | sā hi tatra bhavet yatra niyataḥ 
kālāntarapratīkṣāyogo bhāsate | iha tu 
nīlābhāsakṣaṇamātrasamanantaramapi pītābhāso dṛṣṭa eva | 
prathamahetusamākṣiptatā api na yuktā kramaniyamasya abhāvāt | 
prathamahetuṃ pūrvoktaṃ smārayati tathāhi iti | ubhayatrāpi iti 
saṃbhāvyamāne iti bhāvaḥ tatra icchātmakaḥ prathamaheturyaḥ 
prāguktaḥ prathamecchayaiva hetvavabhāso'ntarākṣipta ityādinā, 
tadākṣiptatāyāṃ kramaniyamābhāvamāha yathaikadā iti anyadā iti 
tasyaiva puruṣasya puruṣāntarasya vā iti tajjātīyāt hi kāraṇāt 
tajjātīyameva kāryaṃ bhavati,- iti yuktam | iha ca icchāyāstasminneva 
puṃsi pumantare vā vahnimutpādayāmi,- ityevaṃrūpeṇa 
tajjātīyatāyāmavikalāyāmapi antarāsamudbhavato 
nīlapītādyābhāsakramasya niyamena tajjātīyatvam | atha yo dvitīyaḥ 
prathamahetuḥ saṃbhāvitaḥ pūrvakarmabhirevavā ityādinā, tatra 
kramaniyamābhāvo ya āpādayitumiṣyate bāhyārthavādinā, sa 
ekapuruṣāpekṣayā na upapannaḥ ekasmin janmani 
prathamakarmapraghaṭṭakahetvākṣipte tasya ekasyaiva

(page 103)

nīlādyābhāsakramasya maraṇābhāsāntasya bhāvāt,- ityāśayena 
puruṣāntarāpekṣayā taṃ kramaniyamābhāvamāha puruṣāṇām iti | 
bahuvacanena śarīrādyābhāsavargasya prathamakāryasya sarvapuruṣeṣu 
tajjātīyatāvalokanāt pūrvakarṇo'pi tajjātīyatvakhaṇḍitaṃ siddhamiti 
tajjātīyāt prathamahetostajjātīyenaiva niyatakrameṇa 
nīlādyābhāsaprabandhena bhavituṃ yuktam,- iti abhiprāyaḥ | 
karmākṣiptatvamapica sarvasya ābhāsasya ayuktaṃ sarvasya 
sukhaduḥkhābhāsaphalatvāyogāt, dharmādharmayośca 
tatsādhanasaṃpādanopayogena prasiddhatvāt | yadāha te 
hlādaparitāpaphalāḥ puṇyāpuṇyahetutvāt iti | yadyapica 
mārgagatatṛṇādidarśanamapi paramparayā kayācidavaśyaṃ 
sukhaduḥkhayorvyāpriyate adṛṣṭeśvarādivādimate sarvasya 
tadaniṣṭānāviṣṭasya utpattyanabhyupagamāt, tathāpi karmaiva ekaṃ 
prathamaheturiti yo manyate, tasya etat dūṣaṇaṃ sākṣāt- yat na sukhāya na 
duḥkhāya vā tasya kathaṃ karmākṣiptatvamiti | anyeṣāṃ tu 
bahutarahetuvādināṃ sāmagryā vaicitryeṇa karmaṇo'pi ativicitratve 
sukhaduḥkhasādhanānāmapi 
vyavadhānāvyavadhānādibahutaracitrabhāvābhyupagamo na duṣyatīti | 
nanu mābhūdicchaiva ādyā nīlādyābhāsavaicitrye prathamahetuḥ 
pūrvakarma vā | svakāraṇābhāsa eva tatra tatra kāryābhāse 
prathamaheturbhaviṣyati | so'pi jaḍo vā anyo vā yo'sāvupasarpaṇapratyaya 
ukta ityevaṃ prathamahetavo bhūyāṃsa ābhāsavaicitryaṃ madhyavarti 
samutthāpayiṣyanti,- iti yasya matiḥ, taṃ vitatya apahastitamohaṃ karoti 
nāpi mṛddaṇḍa ityādinā abhisandhānamasti ityantena | athavā 
pūrvaśeṣatayaiva asya granthasya itthamavatāraṇam | nanu yathā bālyādau 
prathamahetukarmākṣipte'pi rasāyanopayogādinā sahakāriṇā 
yauvanamaticirakālamavatiṣṭhate, tathā iha api 

(page 104)

sahakārivaśāt te te ābhāsāściramavasthāsyante | tathāhi ghaṭābhāsasya 
anuvartane mṛddaṇḍādyābhāso hetuḥ, dhūmābhāsasya 
vahnīndhanādisāmagryābhāsaḥ, paṭābhāsasya 
kuvindaturivemādyābhāsaḥ | evamanyatra vācyam | etat dūṣayati nāpi iti | 
atra hetuḥ- antarā madhye gṛhavartino ghaṭapaṭābhāsāderavalokane 
mṛtpiṇḍadaṇḍādyābhāsasya nāma api na avaśiṣyate iti | nanu 
kumbhakāragṛhe tāvat prathamaṃ mṛtpiṇḍābhāsaḥ saṃvedya eva, tato'pi 
yastadgṛhāt ghaṭamānayati, sa upasarpaṇapratyayābhāso gṛhavartino 
ghaṭābhāsasya anuvartane sahakārī bhaviṣyati | astu, yāvadāste | 
svagṛhagate tu tasmin kaḥ sahakārī tadābhāsānuvṛtteḥ | tadetadāha nāpi 
upasarpaṇa iti | nanu yathā agnāvanumitsite dhūmābhāsasya 
dṛśyamānasya adṛśyamāno'pi tena anumātrā adṛśyamānatvādeva 
adhipatisāmyāt hetutvācca adhipatipratyayaśabdavācyo vahnyā 
bhāsastaddeśakrimisarvajñādipramātṛniṣṭhatvena sthito hetuḥ, evaṃ 
ghaṭaprāpako'pi puruṣaḥ svagṛhāvasthita eva atra sahakārī bhaviṣyati | 
yadā tarhi sa yaśaḥśeṣībhūtastadā kiṃ kartavyam | kaḥ sahakārī 
ghaṭābhāsasya avasthāne śaraṇīkartavyaḥ | naṣṭasya na 
hetutvamanupākhyatvāt, sopākhyatvaṃ hetutāyā vyāpakam | 
tadviruddhasya ca iyamupalabdhiḥ | krimisarvajñābhāsasya ca na hetutvam 
ādhipatyena anantābhāsodayaprasaṃgāt ityādi vakṣyate agrataḥ | 
tadāha nāpi ādhipatyamātreṇa iti | evamapi yā hetutā ucyate, sā neti 
saṃbandhaḥ | atra hetuḥ tadupasarpaṇa iti | atraiva dṛṣṭāntamāha nahi iti | 
naṣṭasya kā hetutā yatra adhipatitvaṃ viśeṣo bhavet | ata eva iti yato na asau 
dhūmābhāso'gnyābhāsāt, ato hetostādṛśāt dhūmābhāsajāt

(page 105)

dhūmābhāsāt gopālaghaṭikāsaṃgṛhītavimuktāt na vahnyābhāsasya 
anumānamatatkāryatvāt | upasarpaṇapratyayanāśe'pi iti yaduktaṃ, tatra 
yadyapica ityādinā pūrvapakṣaṃ śaṃkitvā nirākaroti tathāpi iti | 
naitadyuktam ityanena yojyametat | rajakatakṣakalohakāraprabhṛtayo vastutaḥ 
santi kvacidupapattisthānāntare'pi svarganarakādāviti | iyatā tathā 
kāryābhāsasiddhirna bhavatīti darśayati ābhāsavastutvavāde iti | naca te 
tadā tadupasarpaṇapratyayatayā bhānti | bhāsane ca 
tadābhāsakāraṇabhūtopasarpaṇapratyayāntarābhāsaḥ, tatrāpi anya iti 
niravadhiḥ pūrvāvabhāso bhavet | naca so'sti,- ityāha 
paramparāvicchedaśabdābhyām | atha manyate- sarvajñasya 
tāvadābhāsaparamparāpratibhāso'sti,- iti tadvartinaste 
upasarpaṇapratyayābhāsā dhūmānumeyahutavahābhāsa iva 
adhipatipratyayatvena asmadādiṣu kāṣṭhakuḍyādyābhāsabhedahetavaḥ 
santu,- iti | tatra āha aniyamācca iti | nahi 
samastatadupasarpaṇapratyayanirmitagṛharathaghaṭādyābhāsāḥ sarve sadā 
upalabhyante iti niyamo'sti | naca sahakāryantaraṃ 
tadupasarpaṇapratyayarūpapramātricchātmakasaṃvedanātiriktaṃ 
vijñānanaye yuktopagamaṃ yena ayamaniyam upapadyeta | kiṃ ca 
teṣāmupapattisthānāntarabhājāṃ tadā tāvat na icchā asti- adyāpi 
ābhāsantāṃ gṛhādaya iti | pūrvanirmāṇāvasare'pi iyantaṃ 
samayamete'vabhāsantām,- iti na abhisandhānameṣām | 
abhisandhāne'pica madhya eva kīrtanasthānānāṃ maṭhādīnāṃ 
dhvaṃso dṛṣṭaḥ | nacāpi te pūrvaṃ sarvajñā yena itthaṃ 
gṛhābhāso'sya ābhāsasya anantaro'smātpūrva etena vyavahita iti 
anantavaicitryamabhisandadhyuḥ | nacāpi eteṣāṃ 
tāvānabhisandhiradyatanopasarpaṇapratyayāntareṣu tathādarśanābhāvāt |

(page 106)

evamiyatā prathamakāraṇākṣiptatā yato vitatya nirākṛtā, tataḥ 
samanantarapratyayaparamparāta ābhāsavaicitryamiti āpatitaṃ 
gatyantaravirahāt | tadapi ca ayuktamaniyamāt | atha ucyate- 
kumbhakārakulāvasthita ekaḥ pramātā antataḥ krimiḥ sarvajño vā 
avaśyamasti, sa ca ghaṭābhāsarūpo jātastāvat | tatra ca asya 
heturmṛddaṇḍakulālābhāsaḥ, tato naṣṭe'pi tasmin tasya tāvat 
ghaṭābhāsādeva ghaṭābhāsa iti sthite yo'pi anyaḥ pramātā 
taddeśābhāsavān, tasya api tadābhāsayogaḥ- iti | tatra api vivecyaṃ- kiṃ 
pūrvasthitapramātrābhāsarūpa eva asau ghaṭābhāsaḥ 
kālāntarāgantukapramātrantarāntaranupraveśameti,- ityetena nayena 
dvayostāvati ābhāse aikātmyaṃ prāṇasukhaduḥkhādyābhāsabhede'pi, 
utasvit pūrvasthitapramātrābhāsāt 
kāraṇādāgantukapramātṛvartyābhāsāntarameva kāryarūpamudeti | tatra 
pūrvasminkalpe tīrthikamatānuṣaṅgaḥ | tathāhi dvayoḥ 
pūrvasthitāgantukayoḥ pramātrorekasaṃvedanarūpatābhyupagame 
viśeṣābhāvāt sarveṣāmekasaṃvidrūpatvādekātmateti 
ekātmavādastāvadaniṣṭaḥ | tatrāpica ṛddhyantaramāyātam- yat sa 
ekātmā svātantryāt saṃyojanaviyojane vicitre nirbhāsayan vicitraṃ 
pramātṛbhedamantarā antarā ca ābhāsāṃśe kvacana abhedamuparacayati, 
- iti maheśvararūpo'sāviti tadayaṃ vijñānanayo yogācāreṇa suṣṭhu 
samarthita ityāśayena bāhyārthavādī prathamapakṣaṃ dūṣayati etaddhi 
iti | dvitīyamapi pakṣaṃ atha bhede'pi ityādinā saṃbhāvayate | 
bāhyatvādaprakāśanaprasaṅgaḥ iti pramāṇamatra na kiṃcana syāditi 
pramāṇamukhena doṣaḥ | mūrtatve ca asthūlatā na ghaṭate | 
taddeśātaddeśaraktāraktakampākampāvaraṇānāvaraṇabhedena 
viruddhadharmādhyāsāditi na ekatā, nacāpi anekaparamāṇurūpatā 
tathānirbhāsābhāvāt paramāṇorapi 

(page 107)

ṣaḍaṃśayogāpattyā anupapatteḥ | naca ekānekatātiriktaṃ vastuno 
rāśyantaramasti,- iti prameyamukhena doṣaḥ iti doṣavattāprasaṅge 
bāhyamūrta iti padadvayam | etadapi dūṣayati etadapi na iti te samarthāḥ 
iti | ekakāvasthāyāmapi pratyekaṃ dṛṣṭasāmarthyaiḥ śālibījairiva 
svasaṃkhyānuvartyaṅkuranikaraḥ śālīyaḥ pramātari ābhāsasaṃcayo 
janyate | samānābhihārādanekatvānavabhāsa iti cet, asamānābhihāre 
kiṃ vācyamiti darśayati tataśca iti | naca 
āgantukapramāturekābhāsarūpatāṃ muktvā 
sphuṭāsphuṭādinirbhāsayogaḥ | nanu taimirikāntarasya kiṃ na asti 
keśādyābhāsaḥ | satyamasti; sa tu svatimirabalādeva, natu tadābhāsāt | 
tathātve hi ataimirikasya api sa bhavet | tadāha bhrāntasyāpi parasmāt iti | 
etadupalakṣaṇam | pūrvamataimirikasya ekacandrābhāse taimiriko'pi 
āgantuko na dvicandrābhāsavān bhavediti na parābhāsajanitaḥ 
pramātrāntarasvābhāsastadvailakṣaṇyāt | atadvailakṣaṇyaṃ hi 
tadābhāsajananasya vyāpakam | anyathā ghaṭābhāsāt paṭābhāsa 
ityādiraniyamo bahuśākhaḥ | tasya viruddhaṃ tadvilakṣaṇatvamiti 
vyāpakaviruddhopalambhaḥ | atha yogācāramatadūṣaṇapravṛttaṃ 
bāhyārthavādinaṃ- etatpakṣastāvat nisargadurbalaḥ, na ayaṃ me 
gaṇanīyaḥ; yogācārāṃstu ayameva dūṣayiṣyati,- iti āśayena 
protsāhayituṃ nayaparamārthajño'yamantaranupraveśamiva asya 
kurvannīśvaraikātmyavādī kathayati īśvaraikātmyavāde tu iti | tuśabdo 
viśeṣaṃ dyotayan protsāhasya viśejñatāṃ dyotayati | satyamasi 
prāmāṇikadhuryaḥ- yat kila etadduṣaṇaṃ 
sphuṭatvāsphuṭatvādisaṃkramaḥ iti keśādyābhāsodayaḥ iti 
cakārāt vaikalpikābhāsāntarodaya iti ca, tat 

(page 108)

na īśvarādvayavāde darśitam | tatastīrthikapakṣaṃ sarvathaiva 
kṣaṇikatvanairātmyādiciropārjitanyāyakeśaikāntaharaṇadhuryamayaṃ 
yuṣmaddarśane avaśyaṃ praveśayiṣyati vijñānavādī durātmā 
svanikāyakalaṃkabhūtaḥ, tadamuṃ sarvāvaskandena nipātaya 
svabhāvāditi dvividhā hi iti 

	sarvākṣagocaratvena yā tu bāhyatayā sthirā |
	sṛṣṭiḥ sādhāraṇī sarvapramātṝṇāṃ sa jāgaraḥ || (3|2|17)

iti 

	sādhāraṇo'nyathā caiśaḥ sargaḥ spaṣṭāvabhāsavān | (4|1|11)

ityādinā sādhāraṇī sṛṣṭirvakṣyate kevaleśvarakartṛkā, yatra tāvati 
ābhāsāṃśe pramātṝṇāṃ bhedavigalanena ekātmatāpattiḥ,

	tasyāsādhāraṇī sṛṣṭirīśasṛṣṭyupajīvinī | (4|1|9)

ityanena tu asādhāraṇī paśurūpapramātṛkartṛkā yatra na miśratāpattiḥ 
pramātṝṇām | tatpakṣe ca sphuṭāsphuṭakeśādivaikalpikādiśca varga iti 
asādhāraṇyāt kathaṃ tatra ābhāsaikatādoṣaḥ | tatrāpica 
īśvarādhiṣṭhānamasti | yadvakṣyate 

	saiṣāpyajñatayā satyaiveśaśaktyā tadātmanaḥ | (4|1|9)

iti | atha protsāhito bāhyārthavādī parakīyam atha ityādinā śaṃkitvā 
dūṣayati na yuktam ityādinā | atha ayaṃ bāhyārthavādī 
bhagavadaikātmyavādinā protsāhanopajāpasamuttejito nirpekṣaṃ praharan 
santānāntarasiddhiṃ vijñānavādino mate vitatya dūṣayituṃ 
pīṭhabandhaṃ gṛhṇāti svaka iti | yāvanti santānāntararūpāṇi 
pramātrantarāṇi, tāvanta eva ghaṭābhāsā yadi; tat parasparavyavahāro na 
ghaṭeteti etena api cchidreṇa ekābhāsavādī tvayā praveśayitavyaḥ, 
tasmādaṅgīkuru bāhyamartham, yatra ekasmin

(page 109)

bhinnapramātṛgṛhīte parasparaṃ krayavikrayādivyavahāropapattiḥ | bāhye 
ca śarīravartini ekasmin vyāpāre vyāhāre ca aṅgīkṛte tasya 
samīhākāryatvāt tenaiva dṛṣṭena kāryaliṅgena 
kāraṇabhūtaparabuddhisantāno nirapavādamanumīyate iti 
pramātrantaraviṣayo'pi vyavahāraḥ 
praśnaprativacananigūhanavrīḍanāśayasaṃmīlanādiḥ paraspareṇa kṛto 
ghaṭate iti | na tat nayavidā aṅgīkāryaṃ, yat parapakṣotthāpakam,- iti 
aṅgīkaraṇakāraṇasvapakṣānupamardaviruddhatadupamardavyāptaṃ 
parapakṣotthāpakatvamiti kāraṇaviruddhavyāptopalabdhiḥ | evakāreṇa yat 
sūcitaṃ- paraghaṭābhāse vyavahāro na syāditi, tatra hetuḥ 
pramātrantaraghaṭābhāsānāṃ parokṣatvāt iti | 
parasvasaṃvedanaparokṣāt tadvartini pramātṛbhedena bahutarabhede 
ghaṭābhāse grāhyāṃśarūpe asyāpi ghaṭābhāso'syāpi, aparasyāpi,- 
ityevaṃ vyavahāro na syāt, grāhyakāṃśarūpe ca atibhūyasi 
pramātrantaraśabdavācye senāsaṃghādau ayamapi cetayate ayamapi 
cetayate iti na bhavet vyavahārasya sparśo'pi saṃbhāvanāpi, kimaṅga 
saṃpattiḥ | evaṃ granthayojanā, natu ghaṭābhāsānām ityetadapekṣayā 
cakāro yojanīyaḥ, yena atra ṣaṣṭhīsaptamyoranupapattirbhavet, ekasyā 
ākṛteścaritaḥ prayogo na dvitīyasyāḥ gavāṃ svāmīha yeṣu ca iti | 
evakārabalāt hi paraghaṭābhāseṣu pramātrantareṣu ca 
vyavahārasparśo'pi na syāditi saṃbandhaḥ | sarvathā 
pramāṇāgocare'rthe na vyavahāraḥ paramukha iva avahitthanigūhitākāre | 
tathāca pramātṛgatā grāhyagrāhakākārāḥ | vyavaharaṇaṃ hi 
jñānābhidhānarūpam | tatra ca kāraṇaṃ pramāṇagocaratvaṃ sarvatra 
tadanubhavāt, tasya viruddhaṃ tadagocatvamiti kāraṇaviruddhopalabdhiḥ | 
nanu satyapi bāhye'rthe ghaṭo'stu pratyakṣapramāṇagocaraḥ, 
grāhakābhāsastu anumānenaiva gocarīkartavyaḥ

(page 110)

	buddhipūrvāṃ kriyāṃ dṛṣṭvā svadehe'nyatra tadgrahāt |
	kalpyate yadi dhī.......................................................................... ||

iti nyāyāt | tadiha darśane grāhyābhāsāṃśo'pi anumitiviṣayo 
bhaviṣyati, tadasiddhaṃ pramāṇāgocaratvam | tathāhi 
anumātuścaitrākhyasya mātuḥ svapratibhāsatāṃ prāpto yo 
maitrasaṃbandhinā dehapratibhāsena sahito vyāpāravyāhārāvabhāaḥ, 
tasya samīhayā saha vyāptirgṛhītā kāryakāraṇabhāvaprāṇitā svātmani 
| evaṃbhūtayā itthaṃbhūtaghaṭādyābhāsavatyā ca antaḥsaṃvidā kila 
ayamevaṃjātīyako vyāpārābhāso vyāhārābhāsaśca bhavatīti | tato 
gṛhītakāryabhāvāt tasmāt vyāpārādyābhāsāt 
tattadgrāhyābhāsasaṃvalitagrāhakarūpānumānam | anumitena ca 
vyavahāraḥ | taduktaṃ

	............................... citramātre'pyeṣa nayaḥ samaḥ |

iti | apiśabdena saṃbhāvyamānatvena etaduktvā dūṣayati na saṃgatam iti 
| atra hetuḥ nahi iti | yo'sāvanumeyo maitraḥ, tadīyayā samīhayā 
svagrāhakasaṃvinniṣṭha eva vyāhārādyābhāso janitaḥ; natu 
anumātṛsaṃmatacaitrasaṃvedananiṣṭhaḥ,- iti maitrasamīhayā yo na 
kāryaścaitrasaṃvedananiṣṭha eṣa vyāharatīti ābhāsaḥ, sa kathaṃ 
maitrīyāmakāraṇabhūtāṃ samīhāmanumāpayet | nanu satyāṃ 
maitrasamīhāyāṃ caitrasaṃvedane maitro bhāsate,- iti ābhāsaḥ | sa 
kathaṃ tasyāḥ kāryo na syāt | āha pramāturasya hi iti | maitrasya 
icchānusāreṇa ahaṃ vāgmī bhāṣe,- iti svasaṃvedananiṣṭhito ya 
ābhāsaḥ, tasya kāraṇaṃ saṃbhāvyate | sa eva hi iṣṭaḥ karaṇāya, natu 
caitrasaṃvedanagatasya maitro bhāṣate,- iti ābhāsasya maitrasamīhayā 
kriyākaraṇaṃ syāditi | atra hetuḥ tasya iti | sa hi caitrasaṃvidgato na iṣyate 
kartuṃ caitrasamīhayā | nanu kimeṣaṇena prayojanam |

(page 111)

bījena kimaṅkura iṣyate | athaca sa tasya kāryaḥ | āha na hi anabhīṣṭaṃ ca 
icchākāryaṃ ca iti | jaḍavailakṣaṇyametadeva kāraṇasya- 
yadabhisandhāya karaṇamiti yāvat | ko'tra heturiti cet vipakṣe 
anabhisandhāyakaraṇe'tiprasaṅgo nāma | tamāha viśvasya iti | tataśca 
sukṛtaduṣkṛtasaṃkarādirbahuśākho vyupaplavaḥ | naca kevalamiyat, yāvat 
prakṛtamapi vighaṭeteti darśayati evaṃca iti | 
sakalalokaviruddhamaprasiddhaṃ ca idamiti kalpyamānapadam | caitrasya sā 
tūṣṇīṃbhāvādāvicchā samīhārūpā | tayaiva tarhi svasaṃvidgato 
maitro bhāsate,- iti ābhāso janita iti kalpyatām | aniṣṭo'sau 
caitrasamīhayeti cet maitrasamīhayā api na iṣṭa iti tulyo vidhiḥ | caitrasya ca 
anumātuḥ svasamīhā siddhā | tatra etāvadadhikam- matsamīhayaiva 
matsvasaṃvedananiṣṭho'yamābhāso janita ityantam | adṛṣṭamaitraṃ 
saṃvedanaṃ na kalpanīyaṃ syāditi upacayaṃ darśayan santānāntarasya 
aśakyasamādhānatāṃ darśayati | nanu parihṛtametadācāryeṇa svayameva 
śaṃkitvā, tat kimidaṃ codyate iti yasya bhramaḥ syāt taṃ pratyāyayituṃ 
tadgranthapāṭhapūrvakaṃ tadarthaṃ dūṣayati yadapi ityādinā 
atadvarṇitamiva ityantena | atadvarṇitamiva itivacasā bāhyārthavādī 
idamāviṣkaroti- prāmāṇiko'pi 
āryadharmakīrtirācāryadiṅnāgagranthānurodhāt 
tatpakṣapātādevamabhidhatte, na punarasya svarucireṣeti | asya 
santānāntarasiddhigranthasya arthaḥ- yathaiva bāhyanaye vyāhārāt 
parakāyagatāt parasamīhā anumīyate, tathaiva vijñānanaye 
vyāhārābhāsāt parakāyābhāsagatāditi | tatra yadi paro brūyāt 
bāhyavāde tāvadeka eva vyāhāraḥ, tatra yuktaṃ- yat tataḥ 
samīhānumānam, vijñanānaye tu dvāvābhāsāvanumātari caitre 
vyāharati ayamiti

(page 112)

svātmavicchedena; anumeye tu maitre vyāharāmi ahamiti svātmāvicchedena 
| tatra caitreṇa avicchinnāvabhāsasya vyāhārasya svātmani 
svehākāryatvena vyāptirgṛhītā, natu vicchinnāvabhāsasya 
parasamīhākāryatvena | tat kathaṃ sā anumīyeta | tatra ucyate 
kriyāviśeṣaḥ kuḍyādikriyāvilakṣaṇo yo vyāhārābhāsādiḥ, sa eva 
vicchedāvicchedādyavāntaraviśeṣatyāgāt sāmānyaṃ; tat dṛśyamānaṃ 
tasya gamakam | kasya | vyāharaṇasaṃpādako ya iha aviśeṣaḥ, sa eva 
ahamayamitiviśeṣāntarānādarāt sāmānyaṃ, tasya | nanu yathā 
ghaṭavalmīkayoḥ pārthivatvasāmānye'pi 
kumbhakārapipīlakarūpapratiniyatakāraṇajanyatvaṃ, tathā 
vicchinnāvicchinnayorapi pratyayayorvyāhārapratibhāsayornimittaṃ 
vyatiriktaṃ syāt | bhavet, yadi kumbhavalmīkavadeva 
pratiniyatakāraṇajanyatā upalabhyeta yāvatā vicchedapratibhāsavanto'pi 
kṣiptānāṃ śarāṇāṃ, tathā śilānāṃ yantranirmāṇādīnāṃ ca 
pareṣāṃ pracalitaparibhramaṇādikā ye kriyāpratibhāsāḥ, kṣiptairvā 
śaraśilāyantrādibhirnimitāḥ parasya cetanācetanarūpasya 
cyavanakālabhāvinaḥ pracalitādikāḥ kriyāpratibhāsāste 
avicchinnasvehāpūrvakā dṛṣṭāḥ | tat 
vicchinnairvicchinnasamīhāpūrvakairbhavitavyamiti niyamaḥ kutaḥ | 
parakīyasamīhāpūrvakatvaṃ ca parapreritaśarāghātādijanitasya ahaṃ 
calā nipatāmi,- iti svātmāvicchinnasya api kampādikriyāpratibhāsasya 
dṛṣṭam | tasmāt vyāpārābhāsamātre samīhāmātrasya vyāptiḥ | 
pakṣīkṛtastu yaḥ parakāyābhāsastaddharmatābalāt svasamīhānupalambhe 
tṛtīyarāśyabhāvena pāriśeṣyāt tatsamīhāmātraṃ 
vyāptisaṃvedanasmaraṇayorbhavadapi phalataḥ 
parasamīhārūpamanumitaṃ sidhyatīti | tadetat tena prāmāṇikena na 
varṇitamiva tena ca

(page 113)

aprāmāṇikena varṇitamiva prasiddhyā ca tena varṇitamiti śrūyate | vayaṃ 
tu itthamutprekṣāmahe- yadivā prāmāṇikavarṇitamapi idaṃ 
svadarśanapakṣapātapramādādidoṣādaprāmāṇikavarṇitena tulyaṃ 
jātamiti | ivaśabda utprekṣāyāmupamāyāṃ vā | kasmādevamiti 
āśaṃkya āha tathāhi iti | parastāvaduttaraṃ brūtām, tena asya 
dūṣaṇāvakāśāntaramāsādayiṣyāmi,- ityāśayena bāhyārthavādī 
prastutaprameyasiddhāvanupayogaṃ sādhyaviśeṣaṇasya tāvat darśayati 
kriyāyāḥ iti | jvalanapava(ca)nādikā kriyā na samīhāpūrvikā,- iti 
yuktaṃ sādhanadharmasya viśeṣaṇaviśeṣapadena, samīhāyāṃ tu 
anumitāyāṃ siddhaḥ parasantāna iti kiṃ tatra viśeṣapadena | nanu 
santānāntareṇa anumitena na kaścidarthaḥ, vyavahārasiddhaye hi 
tadanumīyate | kriyāmātrāt ca saṃniveśādiva puṣṭībhūtahastādeḥ 
pūrvabhāvikāraṇarūpaṃ samīhāmātramatītarūpamapi sidhyati | 
vartamānasamīhāntarānubandhitve'pi tasya siddhe jīvati ayam ityetāvat kva 
vyavahāraviśeṣe samupayogi | kriyayā hi vyāharaṇābhāsarūpayā 
tādṛgasau vyāhartṛrūpo vyāharāmi, ityevaṃ- 
tadvyāhārābhāsasamavāyirūpaḥ sādhyate sādhyatvocito'sāveveti 
yāvat | yataśca evaṃ, tata etadāyātamiti yāvattāvacchabdārthaḥ | tato 
maitralakṣaṇāt pramāturavicchinnarūpo yaḥ kriyāviśeṣābhāsastena 
tādṛgasau sādhyo yasya avicchedena śvāsonmeṣavyāhārādiḥ, 
kriyābhāsaḥ | tato vyāharāmītyābhāsāt parasantānānumāne cikīrṣite 
tasya anumāturuttamapuruṣavācyo'smadartharūpaḥ santānāntaratvena 
saṃmato'pi pratyakṣa iveti tādṛśāt kriyāviśeṣābhāsādīhāviśeṣa eva 
vyājihīrṣātatprayatnatatpūrvakaprāṇādyutthāpanādisvātantryamayā-
bhīṣṭapraśnaprativacanādivyavahāropayogī yukto'numātumiti 
jñāpayituṃ sādhye'pi viśeṣaśabdaḥ |

(page 114)

atra āha bāhyārthavādī tadittham iti | atra hi tātparyaṃ vicāryamāṇaṃ 
samastāṃ prakriyāṃ vilumpati | tathāhi- na caitrasya vyāharāmīti 
ābhāsaḥ sphurati yata evamanumimīte- sa hi vyāharatīti abhimanyate, natu 
vyāharāmīti | tathābhimāne hi asmadarthasaṃbhinne vyāhāre 
svasamīhaiva evamuktā bhavati, na parasamīhā, svaparayośca 
tādātmyāpattiḥ | yasya ca maitrasya vyāharāmīti ābhāsaḥ, tasya 
svasaṃvitsiddhā samīhā | kimanumānena | tadetadāgūrya āha 
dūrāpetam iti | yadrūpamanumānāt pūrvaṃ siddhaṃ, na tadanumeyaṃ 
vastutaḥ | parvata iva siddhaśca asmadarthaḥ | anumeyatve 
kāraṇamasiddhatvam, tadviruddhaṃ ca atra upalabhyate,- iti 
kāraṇaviruddhopalabdhiḥ | yadasmadartharūpam, tat paratra bhavati,- iti 
svabhāvaviruddhopalabdhiḥ | atra śarīrāntare ayamitipratyayāt paratvamiti 
cet, svatra api paratvaprasaṅgo nimittasya aviśeṣādatra ahamiti hi 
svābhimate'pi dehe,- iti kaḥ svaparavibhāgaḥ | yadivā atītatvenāpi 
ityantaṃ vijñānavādino vacanam | tadeva dūṣayituṃ bhaṅgyā 
vyācakṣāṇena bāhyārthavādinā anūditaṃ evaṃca ityādinā 
viśeṣaśabdaḥ ityantena granthena | dūṣaṇāṅgīkaraṇamiṣeṇa 
eṣo'bhiprāyastava viśeṣaśabdaṃ prayuñjānasya | atra ca prakṛtameva 
vighaṭate iti darśayati tadittham iti | anena na nayena īśvarādvayavādī 
avaśyaṃ labdhāntaraḥ praviśati | dvayorapi tadābhāsamātre 
parasparatādātmyagamanena asmadarthonmeṣapratibhāsāt, 
aiśvaryaśakteśca svaparavibhāgapratibhāsahetorābhāsāntareṇa aikyasya 
saṃbhavāt,- iti āśayaśeṣaḥ | nanu 
prathamottamapuruṣarūpapratyayārthānādaraḥ | naiva eṣaḥ | 
vyāharaṇamātrāt tādṛśameva prakṛtyartharūpaṃ samīhāmātraṃ 
sidhyet | tadāha atrāpi iti |

(page 115)

sāmānyarūpā iti svaparatāviśeṣaṇatātyāgena | iṣyate iti 
vyāptigrahaṇakāle vyāpakatvena sādhanadharmasya, anumitikāle ca 
anumeyatvena | atra āha tadviśeṣagrahaṇamanarthakam iti | tataśca 
tatsādhyārthalābhābhāvāt samīhāmātraṃ piśācasya vā yakṣasya vā 
sarvajñasya vā krimervā tādṛgasti kasyāpi śilādiprerakasya iva yena 
ayamitthaṃ kampate, vyāharati ca,- iti niścayābhāve vyavahārāsiddhiḥ | 
ataśca evaṃ yat parasamīhā api maccharīrakampāya, matsamīhā api 
paradehakampāya dṛṣṭā prabhaviṣṇuriti abhiprāyaḥ | yacca uktaṃ 
kṣiptaśara ityādinā vicchedāvicchedayorapi vyāpārapratibhāsasya 
samīhāmātrameva nimittaṃ svaparaviśeṣaṇabhāgasya 
vyabhicāradarśanāditi, tatra samīhāyā api vyabhicāro dṛśyate | patāmi, 
calāmi; calati, patati,- iti hi avicchinno vicchinnaśca vyāpārābhāso vinā 
samīhāṃ vātavegādinā api dṛṣṭa iti vyāpārābhāsena 
kāraṇamātrānumānocitena samīhā api anumātuṃ na yuktā | yat yena 
vinā api bhavati, na tat tasya kāryaṃ dhūma iva jalasya | tathāca kampaḥ 
samīhayā vineti kāryatāvyāpakatadavinābhāvaviruddhamatra 
tadvinābhāvitvamupalabhyate,- iti vyāpakaviruddhopalabdhiḥ | atha iti 
vātavegābhāsādijanitāt kampābhāsādanya eva samīhāsamuttho 
dhūmābhāsajādiva 
dhūmābhāsādagnyābhāsasamuttho'bhiyuktaikasamadhigamyo loke'pica 
abhyāsāt pratītaḥ; tataśca vicchedāvicchedaviśeṣatyāgāt sāmānyarūpo 
vātādyakta(ttha)kriyāvailakṣaṇyācca vicchedāvicchedatyāgena yat 
sāmānyaṃ samīhāmātraṃ, tasya kāryaḥ; tena kāryeṇa yuktaṃ tat 
svakāraṇamanumātumiti yaducyeta | tathāpi iti tasminnapi prakāre 
kathyamāne vicchedādiviśeṣatyāgena 

(page 116)

api yā samīhā kāraṇatvena saṃmatā, tasyāḥ kriyayā parakampādikayā 
apiśabdāt svakampādikayā saha yaḥ kāryakāraṇabhāvaḥ prasādhyate; sa 
samīhitatvalakṣaṇaviśeṣaṇaviśiṣṭayaiva sidhyati | nahi yā na kasyacit 
samīhitā pavanajavanādinimittāntaraprabhavā svagatā paragatā vā kriyā, 
sā samīhākāryā yuktā | tato vicchedāvicchedaviśeṣau tyajyetāṃ nāma, 
samīhitatvaṃ tu aśakyatyāgam | samīhāto yadi asamīhitamutpadyate, 
tadekasya vyāhārasamīhāyāṃ sthāvarajaṅgamaṃ viśvaṃ vyāhartṛ 
syāt | nanu yadi samīhitaiva vyāpārādikriyā samīhākāryā, natu 
asamīhitā | kimataḥ | etadāśaṃkya doṣāpādanāya yojayati naca iti | iha 
vyāhāre ayamahamiti samīhā | tato vyāharāmīti 
samīhitṛrūpasvasantānagato vyāhārābhāsaḥ | tatsamakālamevaca 
samīhitṛvyatirikte'numātṛpramātari parasantānarūpe 
vyāharatītyevaṃbhūto vyāhārābhāso'numātṛkartṛkatvābhāvena 
maitrakartṛkatvāt tanmaitrātmakaparasantānasamavāyī dvitīyaḥ | tadiha 
parasantānagataśabdaḥ ubhayathā vyākhyeyaḥ- samīhitṛvyatirikte 
anumātari yata ābhāsate anumātṛvyatirikte ca samīhitari bhavati- iti | eṣa ca 
prācyasahitaḥ sat (n) santānāntare anumātavye hetūkāryaḥ, na pūrvaḥ 
śuddhaḥ nāpi paraḥ śuddhastayoḥ krameṇa 
svasamīhāyāmasamīhāyāmapi ca bhāvāt | tasya asya vyāharāmīti 
sahitaṃ parasaṃkramaṇena prathamapuruṣaśabdena yogyaṃ paragatatvaṃ 
nāma vyāhāraviśeṣasya asamīhitayantraputrikāvyāhāravilakṣaṇasya yat 
viśeṣaṇaṃ, tat cet tyajyate; tarhi vyāharaṇamātrāt 
samīhāmātramanumīyeta, natu 
vyājihīrṣāmītyevaṃvidhaviśeṣaparihāreṇa vyājihīrṣatīti | etadevaca 
viśeṣato'numeyametadrūpatājīvitatvāt santānāntaratāyāḥ | tataśca 
yathā

(page 117)

cāndane agnāvanumitsite sāmodatvaṃ dhūmasya yadi tyajyate, tat 
vahnimātraṃ siddhyati; na cāndano'gniḥ | yāvat sādhyaṃ 
sādhanadharmasya yena vinā na sidhyati, tāvati tadviśeṣaṇaṃ nāma 
aṅgīkāryaṃ cāndanāgnyanumāne iva candanāmodavattvaṃ dhūmasya, 
na siddhyati ca paragatatvātmakottamapuruṣārthasahitaprathamapuruṣā-
bhidheyaviśeṣaṇavattvena vinā santānāntaram | anaṅgīkāryatve 
kāraṇaṃ tat hi, na asādhyasiddhinibandhanatvam | tadviruddhaṃ ca idamiti 
kāraṇaviruddhopalabdhiḥ | yathā ca cāndanatvāpekṣayā candanāmodo na 
viśeṣāntaraṃ tatparihāreṇa anāsīnatvāt | tadeva hi tadapekṣayā 
viśeṣāntaraṃ, yat yatparihāreṇa āste cāndanatvamiva tārṇatvāpekṣayā | 
anyathā gotvādapi śāvaleyo viśeṣāntaraṃ syāditi 
sāmānyaviśeṣavyavahāro hīyeta, dvayorapi 
gośāvaleyayorviśeṣatvāpatteḥ | viśeṣayośca sāmānādhikaraṇyaṃ 
kathaṃ syāt | asti ca tat- gauḥ śāvaleya iti | tasmādanyonyaṃ 
viśeṣavyavahārastadvyāpakabhāvena paridṛṣṭāt niyamāt 
viruddhamaniyamaṃ prasaktamavalokya vipakṣāt tatparihārānavasthānāt 
nivartamānastatparihārāsīnatvena vyāpyate | tadviruddhaṃ ca 
tatparihārānāsīnatvam, iti vyāpakaviruddhopalabdhiḥ | evaṃ prakṛte'pi 
vyāpāravyāhārādermaitrakartṛkasya caitrātmake parapramātari 
parasantānarūpe yat gatatvaṃ, tadābhāsarūpatvaṃ maitro'yaṃ vyāharati, 
- ityevaṃrūpaṃ pracyutāsmadarthaṃ 
viśrāntiprathamapuruṣābhidhānocitaṃ tanmaitrīyavyāpārādyābhāsasya 
uttamapuruṣocitasya vyāpriye ityevaṃrūpādanyo na viśeṣastatparihāreṇa 
anāsīnatvāditi | tataśca yathā dhūmāt cāndane'gnāvanumitsite 
dhūmasya candanendhanaprabhavavahnikāryatvamavaśyāpekṣyaṃ, tacca 
candanāmodavattvaprabhāvādeva saṃvedyaṃ; tathā hi 
tadāmodavattvagrahaṇāya

(page 118)

ghrāṇīyaṃ pratyakṣaṃ prabhavati,- iti 
antaḥpuravartinaścāndanahutabhujaḥ surabhidhūmayorasti 
pratyakṣaprabhāvodbhūtena vikalpena vyāptigrahaṇam | anumānakāle'pi 
āmodamādhuryaviśiṣṭadhūmāvasāyaḥ | evameva 
cākṣuṣaghrāṇīyadarśanabaloditamelanāvidhāyivikalpasvabhāvaḥ 
saṃbhavati,- iti sidhyati viśiṣṭāt surabherdhūmāt candanendhano 
dhūmadhvajo'gnikāryatvagrahaṇa iti cāndanāgnikāryatvagrahaṇe 
vyāptigrahaṇavelāyāṃ pramāṇāntaramupayujyate | tacca na 
saṃbhāvanīyam | evamiha prakṛte'pi | naca tat prakṛte nirvahati | viśeṣato hi 
atra parasamīhā anumeyā | anyathā samīhāmātramanumeyaṃ cet, 
piśācaprāyo'pi samīhitā caitreye vyāpārābhāse sidhyet | atha 
anumātṛpramātṛsaṃvedanavedyamānatadvyāhartṛrūpābhāsaniṣṭhaiva 
samīhā sidhyati, tarhi pramātṛsahasre anumātari 
tatsaṃkrāntamaitrābhāsasahasragatavyāhārābhāsasahasrāt 
samīhāsahasraṃ sidhyet,- iti 
tāvatāmanumātṝṇāmekapramātṛniṣṭhatvena yo 
vyavahāramelanalakṣaṇaḥ saṃbandhaḥ, sa na syāt | anenaiva ca nyāyena 
anumite'pi ghaṭābhāsavati pramātrantare ghaṭābhāsasya bhedādekatra 
ghaṭābhāse krayavikrayavyavahāro na ubhayorvyavahartrorbhavet,- iti 
punarapi mahābhūtagrastaṃ jagat na jāyate | tasmāt parasamīhāyāṃ 
cāndanānalatulyāyāmanumeyāyāṃ 
surabhidhūmacāndanāgnigrahaṇavat vyāptigrahaṇakāle paragatatvena 
vyāhārābhāsasya paratvena na samīhāyā grahaṇaṃ 
samānakālavyavahārakārivikalpavyavaharaṇīyamupayujyate | naca asti 
paragatatvam | parasamīhārūpatve hi sāhityavṛttivicchedāvicchedaprāṇe 
paraniścayapūrvakaṃ manaśca santānāntaralakṣaṇa iha anumeyapakṣe 
vartate iti anyonyāśrayam | evamanumānakāle'pi 
maitrātmakacetanarūpaparasantānasamavāyī vyāharāmi ahamiti

(page 118)

mūlabhūmau tāvadayam, tato mayi saṃkrāman saṃniviṣṭo'yaṃ 
vyāhārābhāso vyāharati,- ityevaṃ parasantānagatatvaṃ nāma 
viśeṣaṇaṃ pramāṇāntaranirgrāhyam | naca pramāṇāntaramatra kramate 
parasantānasya atra avadhāvanavagamāt | avagame tu 
anumānanairarthakyāpattiḥ | tata eva anumāyāmitaretarāśrayam | tataśca 
parasantānagatatvaṃ tāvat durjñānam | jñāte'pi 
parasamīhākāryametadvyavahārābhāsarūpamityatra arthe 
vyāptigrahaṇāvadhau nāsti pramāṇam | tadetadāha naca parasantāna 
ityādi | iyatā ca aṅgīkṛte'pi parasamīhākāryatve tatra pramāṇaṃ nāsti,- 
iti uktam | adhunā tu svasantatau vyāharāmi,- ityevaṃbhūtasya 
parasantānagatatayā vyāharati,- iti ābhāsasya yā paragatatā 
samīhitṛvicchinnasvabhāvatā, sā samīhākāryaiva na bhavati,- iti 
bāhyārthavādī brūte vyāhārābhāsasya ityādinā | maitrasya tāvat 
vastusthityā evaṃ samīhā vyāhareyamiti, tato vyāharāmīti ābhāsaḥ 
svasantānagatastasya udetu tāvat | yastu caitraviśrānto maitro vyāharati,- 
ityevaṃbhūtaḥ parasantānagato vyāhārābhāsaḥ sa tāvat na maitrasya 
saṃbandhinyā samīhayā kāryaḥ | asamīhito hi asau | nanu 
viśeṣasamīhāyāṃ sāmānyamapi samīhitam | satyaṃ, tattu 
samīhitaikatamaviśeṣaśarīrameva samīhitaṃ bhavati | anyathā 
svātantryeṇa asya samīhitatve kumbhakārecchayā trailokyaṃ kumbhānāṃ 
pūrṇamavalokyeta | na ca evaṃ, tata idamāpatati- balādeva 
sāmānyamukhāyāmapi samīhāyāṃ kaścideva viśeṣaḥ samīhitaḥ, 
phalato yo'sau viśeṣāntaratiraskāreṇa udyan dṛśyate | tadamunā 
prakāreṇa yadyapi sāmānyaṃ samīhitam, tathāpi svātmavartī yo 
vyāhārābhāso vyāharāmi- ityevaṃrūpaḥ,


(page 120)

sa satyaṃ samīhājanyatvena prasiddhaḥ | yattu anumātṛsaṃmato 
yaścaitralakṣaṇaḥ samīhitṛsantānāt paro'nyaḥ santānaḥ, tadgatatvaṃ 
vyāharati ayaṃ maitra ityvamābhāsanocitaṃ vyāhārasyaiva 
viśeṣarūpam; tat kasya janyaṃ bhavet | na caitrasya, na maitrasya, dvayorapi 
tatra nāsti samīhā | yataḥ samīhā ca yadi evaṃ kartuṃ prabhaviṣṇuḥ- 
mayi maitre yo vyāharāmīti ābhāsaḥ tatsamaye eva caitre maitro 
vyāharatīti ābhāsa udetu- iti; tarhi yadā evaṃ maitraḥ samīhate- mayi yo 
vicchedavirahito vyāharāmīti ābhāsaḥ, sa caitre'pi avicchinna eva udetu- 
iti, tadā caitro'pi eṣa maitro'haṃ vyāharāmīti avicchinnābhāsabhāgī 
bhavet, tadicchāto'dbhutaceṣṭāprasisārayiṣayā yaśorjanakāmyayā 
tadaiva viśvaṃ tadābhāsavat syāt, lajjāvahaṃ ca na kenacit dṛśyeta | 
anutpādecchā hi tatra saṃbhavet | naca evamasti | tat na samīhākāryaḥ 
parasantāne vicchedayukto vyāhārādyābhāsaḥ | tat tasya na 
samīhākāryaṃ, yat samīhāntare na anyathā bhavati ghaṭa iva kuvindasya | 
tathāca vicchinnābhāso vyāhāro maitrasyeti na samīhākāryaḥ | 
samīhākāryatvaṃ samīhāntare anyathābhavanena vyāptaṃ hastasya iva 
muṣṭīkaraṇam | anyathā sarvaṃ samīhākāryaṃ sarvasya syāt,- iti 
sukṛtaduṣkṛtasvasvāmitādisaṃkaro'nantaśākhaḥ | tacca 
vyāpakamanyathābhavanamiha na upalabhyate,- iti vyāpakānupalabdhiḥ | 
tadetaduktaṃ paratra ca ityādinā | parasya maitrasya samīhayā 
sāmānyaviṣayayā api viśeṣaṃ spṛśantyā vyāharaṇābhāsaḥ paratra 
caitrasaṃvedane'pi avicchinnatvena vyāharāmīti amunā rūpeṇa janyeta, 
naca evamiti na samīhākāryatve pramāṇamasti paragatatāyāḥ | etadeva 
adhikāvāpagarbhīkāreṇa

(page 121)

upasaṃharati evam iti | yadetaduktaṃ, tat iti tasmāt hetoretat labdham- yat kila 
samīhitādiviśeṣatyāge yadvyāharaṇābhāsasāmānyaṃ taddvāreṇa api 
itarābhāseṣṭaścaitragato yo vicchinno vyāharaṇābhāso 
maitrasantānagatena vyāharāmīti ābhāsena sahaiva bhavan, ata eva na 
tatkāryatvena śaṃkyaḥ | tatsamīhāyāstasminnitarābhāse kāraṇatā nāsti 
| nāpi tāmiṣṭimapekṣya tasya itarābhāsasya kāryatā asti | 
vyāharāmītyevamābhāsasahabhāvena ca ya itarābhāso yo 
vyāharatītyevaṃrūpaḥ, sa icchākāryaṃ naiva bhavati, tāvati na icchā 
kāraṇamasamīhitatvāt tāvataḥ | nanu samīhitatvamasamīhitatvaṃ ca yadā 
na apekṣyate, apitu vyāharaṇābhāsasāmānyamātram; tadā paragatena tena 
itarābhāsena saha maitragatāyāḥ samīhāyāḥ kiṃ na 
kāryakāraṇabhāvaḥ | satyaṃ, yadi sā viśeṣānapekṣā nirvahediti 
darśayati svagatameva iti | yogasiddhyadhikaraṇanītyā hi sāmānyamapi 
abhisandhīyamānaṃ viśeṣaniṣṭathāyāmeva paryavasyati, iha ca 
saṃvedyate eva viśeṣaniṣṭhatā yena ṣṭhīveyamiti icchā bhavantī 
prayatnena śleṣmāvṛtaṃ sthānaṃ āntarāvayavaviśeṣasaṃyoginā 
vegavatā pavanena karaṇena abhihatya śleṣmāṇaṃ kriyādvāreṇa tato 
viśleṣya samīhāntaravyavadhānena ṣṭhīvāmīti bahirnirasanaṃ 
śleṣmaṇaḥ saṃpādayati | natu evaṃ caitrasantāne bhavati | maitrasya 
icchayā sphuṭatvāt asya arthasya ṣṭhīvanamuktam | ṣṭhīvanaśabdaḥ 
śiṣṭaprayukta iti na asādhuḥ | tata eva candrācāryaḥ ṣṭhivaṣivordīrghaśca 
(1|3|98) iti avocat | tasmāt viśeṣābhisandhānaṃ sāmānyābhisandhāvapi 
nāntarīyameva, viśeṣaśca iha ṣṭhīvāmīti avicchinnarūpa eva samīhitaḥ | 
tato yuktamuktamasamīhitena caitragatena vicchinnābhāsena saha 
maitrasamīhāyā 

(page 122)

nāsti kāryakāraṇabhāva iti | avicchinnābhāsajanyo'sau caitragāmī 
vicchinnābhāso bhaviṣyatīti ca na vaktuṃ śakyaṃ, tayoḥ 
sahabhāvanaiyatye kāryakāraṇatvāyogāt,- iti adhikasya arthasya atra 
āvāpaḥ | iṣṭiśabdo bhāṣyakāravacanāt sādhuḥ atreṣṭiḥ iti, anyathā 
striyāmiti vā sarūpatvābhāve ktin ityaṃśena bādhyeta bhāṣyakārīyaṃ 
karaṇasādhanam | tacca śruyajīṣibhyaḥ iti aupasaṃkhyānikamiti cet, ihāpi 
tadeva bhaviṣyati | naca arthabhaṅgaḥ, dhātvabhidheyasya hi bhāvanāvāde 
karaṇatvamapi phalaṃ prati svayaṃ ca sādhyatvamiti iṣyate iṣikarmatayā 
bhāvyate phalam anayā,- iti iṣṭiricchaiva saṃpadyate | 
karmānapekṣāyāmapi iṣyate anayā iti kartṛsamavāyirūpaṃ 
eṣitṛtvamanayā bhāvyate | tayā hi eṣitā kartā saṃpadyate iti | evaṃ tatra 
tatra avadhātavyam,- ityalamavāntareṇa bahunā | idānīṃ vijñānavādī, 
svāvicchinnavyāharaṇābhāsena saha niyamenaiva itarābhāsasya 
samīhitatā asti eva abhisandhānabhedāditi darśayan 
vicchinnābhāsatāyāḥ samīhākāryatvaṃ sādhayitumanvayaṃ 
vyatirekapuraḥsaraṃ darśayati nanu yatra iti | anyathaiva iti 
anapavāryetyarthaḥ | evamukte vijñānavādinā bāhyārthavādī 
tūṣṇīkaḥ kṣaṇaṃ yāvat cintayati, tāvadīśvarādvayavādī 
paravyāmohavyapohanaraṇaraṇakatvaritahṛdayaḥ 
svakarāvalambanapratyāśayā bāhyārthavādinā sahyamāno 
vastuparamārthaṃ pradarśayiṣyate, tat na sahate tadetat ityādinā | yadyapi 
maitrasya tathā samīhā caitre'pi- maitro nṛtyati ṣṭhīvati,- iti ābhāsa 
utpadyatām- iti tathāpi caitraḥ kathaṃ jānīyāt- anapavārya yadidaṃ 
nṛttaṃ, tat parasamīhākāryaṃ bhavati- iti | nahi anena parasamīhāyā 
adyāpi nāma jñātam | anenaiva nyāyena caitra

(page 123)

paramajānato maitrasyāpi kathaṃ tathā samīhā bhavediti cintyam | nanu sa 
caitro'pi yadā bhagavantamabhipūjya recakāṅgahāraiḥ paritoṣayituṃ 
nṛtyati, tadā saṃvṛte'vakāśe nirjane ca | yadā tu sapītigoṣṭhīpramuditaḥ 
prayatamayā caitreṇa ca maitreṇa saha nṛtyati, natu tau tato nirgamayya; tadā 
priyā api paśyatu, maitro'pi paśyatu iti,- bhavati asya abhisandhānam | tat 
svātmani vyāptiranena gṛhītā anapavāraṇapūrvakatadācaraṇasya 
paraviṣayatāvagamanābhisandhānasya ca | etadapi katham | tathāhi- 
svayamanapavārya yat nṛtyati udgrāhayati vā, tatra asya abhisandhānamasti | 
maitro'pi paśyatu,- iti yaduktam, tadevamupapadyeta yadi maitraśarīrābhāse 
samīhārūpe draṣṭṛtāsvabhāvaṃ jānīyāt | 
svātmavartikāryakāraṇabhāvajighṛkṣāsamaye'pitu kathaṃ 
parasantānajñānam | dṛśyatāṃ hi yadā pāmarakadāserakāvanyonyaṃ 
ṣṭhīvato vādināvudgrāhayato yuvānau nṛtyataḥ, tadā ayaṃ para etat 
jānātu,- iti yadabhisandhānam; tat parapramātṛjñānapūrvakam | 
parajñānaṃ ca tathābhisandhijanitanṛttābhāsajñānapūrvakamiti 
anyonyāśrayam | tadāha tathābhūta iti | paratra 
utpadyatāmayamābhāsaḥ,- ityetadabhisandhānajanito'yaṃ 
vyāhārābhāsa ityevaṃ nirjñātāt tataḥ pramātrantarasya niścayaḥ 
kartavyaḥ | evaṃ nirjñānaṃ ca parapramātari jñāte tasmin jñāte 
svātmani abhisandhānamucitaṃ paratra utpadyatāmayamābhāsa iti | tataśca 
anapavāryaceṣṭā tato vyāhārābhāsajanma, tataḥ 
kāryakāraṇabhāvaniścayaḥ, parapramātṛjñānaṃ ca yathoktaviśeṣāt 
vyāhārābhāsāt,- iti | ato'nyonyāśrayaṃ viśiṣṭasya 
vyāhārābhāsasya viśiṣṭayā samīhayā saha 
kāryakāraṇabhāvagrahaṇāvasara eva 
paragatābhāsotpādanābhisandhānasya paragatanṛttādyavabhāsānāṃ 
samīhitṛvicchedena

(page 124)

ucyatāṃ ca 
pramāṇāntarādanumānavyatiriktādanupayujyamānavyāptigrahaṇāt 
kutaścit pratyakṣaprāyāt kāryakaraṇabhāvo yadi avagataḥ syāt dhūmasya 
agneśca yathā | tadanyena dhūmena yathā agnyantarasya avagamaḥ, tathā 
anyena vicchinnanṛttādyavabhāsena anyasya pramāturavasānaṃ ghaṭeta, 
naca etadasti,- iti darśayati yāvatā iti | anyataḥ iti pratyakṣāt | āgamo hi 
vyāhārarūpo'nena samyagvedinā idaṃ parapramātṛrūpānasmān 
bodhayituṃ kṛtaṃ parataḥ saṃpātādipūrvakamuktaṃ, 
vyākhyātamanuṣṭhitaṃ veti kāryo vā nityo vā parasparaṃ 
parabhūtapramātṛniścaye sati eva bhavati,- iti | tato'pi parasantānāvagame 
anyonyāśaryameva | evaṃ pramāṇavṛttamavicāryaiva 
vastuvṛtterabhavannapi tathābhūtābhisandhānena saha 
vicchinnavyāhārābhāsasya kāryakāraṇabhāvo jñātuṃ na śakya iti 
upapāditam | adhunā tu anvayavyatirekāsaṃbhavāt vastuvṛttena asau na 
bhavati,- iti prakaṭayati na ca iti | naca yukteti saṃbandhaḥ | 
vyatirekābhāvaṃ darśayati tathā iti | bālo rudan na abhisandhatte- paraḥ 
śṛṇotu- iti ekākitve'pi janākīrṇatve'pivā kutaścit 
duḥkhādasāvavyaktadhvaninā rudannupalabhyate, naca paratra rodanābāso 
na utpadyate | nanu mā drākṣīt iti 
abhisandhāne'vaśyamāvaraṇāpavāraṇādinā bhavitavyam | tatra ca 
tadanutpattirastyeva, kaḥ prasaṃgārthaḥ | ayaṃ bhāvaḥ- evamucyamāne 
apavāraṇena saha tadābhāsodayasya kāryakāraṇatā syāt, na 
abhisandhinā, sa ca iha anumeyatvena prakrāntaḥ | 
āvaraṇopasaṃhārābhāso'bhisandheḥ kārya iti cet, tatrāpi āvaraṇaṃ 
maitro'yamupasaṃharati,- iti caitreya ābhāsaḥ, tasya 
āvaraṇāntarābhāvādiviśeṣānveṣaṇe'navastheti na kiñcidetat | mā 
drākṣīditi ca abhisandhāne'pi

(page 125)

āvaraṇopasaṃhārayoge'pi 
sarvajñakrimiprabhṛtipramātrantaragatābhāsasahasrodayaḥ,- iti naiva 
tathābhisandhānābhāve tathābhūtābhāsānudayo yukto'vyatirekāt | yata 
evaṃ vijñānavādina etat na upapadyate, tat iti tasmāt hetorasmanmatameva 
ayaṃ svecchayā patati gacchati dhāvati,- ityevaṃ lokena yadapadiśyate 
patanādyasmadarthaviśrāntaṃ kuḍyādipatanavilakṣaṇaṃ 
pramātrantarapratibhāsākṣepakaṃ tena kṛtasākṣikamavalambanīyam | kiṃ 
tat | āha, buddhyā jñānena uditayā samīhayā icchayā prayatnaparyantayā 
yukto yaḥ pramātā maitraḥ, tasmādavicchinna eva yo vyāharāmīti 
ābhāsaḥ svātmani pratyakṣapratibhāsī tata eva 
āntarasparśanādyavagatasthānakaraṇābhighātakāraṇopayogakrameṇa 
utpadyamāna iti avadhāritaḥ; tasminneva yataścaitraḥ pramātā 
parameśvareṇa ābhāsāntaraikyādupasaṃhṛtya ekībhāvena sṛṣṭaḥ

	muhurmuhuraviśrāntastrailokyaṃ kalpanāśataiḥ |
	kalpayannapi ko'pyeko nirvikalpo jayatyajaḥ || (sta. ci. 112)

iti 

	sadāsṛṣṭivinodāya ...................................... | (u. sto. 22|9)

iti ca nyāyena, tataḥ so'pi sarvaṃ maitravadeva avabudhyate, paratastu 
śarīrādyahaṃbhāvadārḍhyāt svaparavibhāgagaṇanāpagamāt vikalpayati 
- maitro vyāharati- iti evamīśvaravādisaṃmatametaditi 
upasaṃhāragranthādasmāt mantavyam | yadi tu bāhyavādimatatvena tadetat 
mandamati ityādi yojyate, tadā upasaṃhāro na iha śliṣyati | ekarūpatā 
tāvat vyavahārasya anena uktā | sā ca bāhyatāyāmapīti labdhocchvāso 
bāhyavādī āha evaṃca iti | tata eva taddeśakāle yathāvabhāte caitrasya 
maitrābhāse pravṛttiryuktā |

(page 126)

aparathā kampate maitra iti yaścaitrasya ābhāsastaddeśābhāsasahitaḥ, sa 
brahmalokasthamaitrābhidhānapramātrantarajanito na bhavati,- iti kuto 
niścayaḥ | etāvadeva hi tadā syāt- yadi atra ābhāti 
svarūpabahirbhūtamiva ca, tadanyataḥ saṃkrāntaṃ darpaṇa iva ghaṭādiḥ | 
atādṛśasya anyato'saṃkramaṇe vipakṣe bādhakamasti 
svarūpabahirbhāvaviruddhaṃ tatsvarūpatvaṃ svacchatāyā iva 
darpaṇaniṣṭhāyā,- iti svabhāvaviruddhopalabdhiprasaṅgāt vipakṣato 
heturvyāvartate, iti sādhyenaiva vyāpyate | caitrapramātari ca ābhāti 
vyāhāraḥ svarūpabahirbhāvena- maitro vyāharatīti, tadanena anyataḥ 
saṃkrāntena bhavitavyam,- iti svabhāvahetuḥ | anyaśca 
taddeśatatkālatvādinā duravadhāra eva | darpaṇe tu bimbamapi 
pratyakṣāntarasiddhameva iha tu na tathā | darpaṇe ca pratibimbasya 
bimbānantarabhāvitā na bimbayaugapadyam, iha tu yaugapadye kathaṃ 
samarpyasamarpakabhāva iti syāt,- iti anavakḷptyā dyotayati |

	tatrāpi darpaṇe dṛṣṭaṃ yaugapadyamāśubhāvo vā

ityāśayena tu pakṣo yatra na uttiṣṭhati iti syāt ityanenaiva dyotayati, 
nāparasya syāditi | tat satyamuktam-

	na deśakālaniyamaḥ santānaniyamo naca |
	naca kṛtyakriyā yuktā vijñaptiryadi nārthataḥ ||

iti | evaṃ taddeśatvādyanavadhāraṇadoṣamuktvā doṣāntaramapi 
vijñānavādina āpādayati evaṃca iti | caḥ samuccaye | doṣāntarasya 
anenaiva vyāharatīti ābhāso vyāharāmīti ābhāsanabimbabhūtena 
pratibimbabhūtaḥ pṛthagbhāvenābhāsamānaḥ samarpitaḥ, iti nyāyena 
ghaṭābhāso'pi ahaṃbhāvapṛthagbhāvena 
asmadarthasāmānādhikaraṇyamasahamāna idaṃ bhavati,- iti 
prathamapuruṣaucityena

(page 127)

sthito'nyagatena kenacit samarpita iti āyātam | tatra ca pratyuta doṣaḥ- sarva 
eva pramātrantaravartina ābhāsāḥ samarpakāḥ prāptāḥ viśeṣābhāvāt 
| darpaṇadvaye'pi hi anyonyapratibimbārpaṇe'saṃkhyapratibimbodayaḥ, 
kimaṅga pramātṛkoṭiparārdhānāmanyonyapratibimbārpaṇe | tadāha 
aparyavasānaṃ syāt iti | kiṃca samarpakasaṃmato'pi pramātrantaravartī 
asāvābhāso'smadarthaviśrāntivailakṣaṇyena idamiti nirbhāsamānaḥ 
pṛthagbhāvābhimānayogyatvāt pratibimbakalpaḥ,- iti tasya api arpakeṇa 
bhāvyam, tatrāpi evam,- iti anavasthā, tatparihārāya tu paryante ghaṭa eva 
asmadarthasaṃbhinnaḥ sakalapramātṛvyatirikta 
ābhāsanasāro'bhyupagantavyaḥ ahaṃ ghaṭo bhāse ityevaṃrūpaḥ | 
tatrāpi ca ghaṭatā yadi na adhikā, tadahaṃ ghaṭaḥ, ahaṃ paṭa iti 
nirbhāsamānayorghaṭapaṭayoraikyameva syāt | adhikā cet, tatrāpi 
pratibimbateti bimbena anyena bhavitavyamābhāsarūpatāśūnyeneti bāhya 
eva arthaḥ siddhaḥ | anena āśayena uktam aparo'yaṃ 
bāhyārthavādaprakāro jñānabāhyānām iti | tatra ca aṅgīkṛte 
bāhye'rthe kiṃ pramātrantarābhāsānāṃ 
pramātrantarābhāsasamarpakatayā pratyuta 
aparyavasānadūṣaṇānubandhinyā | sa eva bāhyo'rthaḥ 
sarveṣāmābhāsārpako bhaviṣyati,- iti aparyavasānadoṣaparijirhīṣāṃ 
parakīyāṃ śaṃkate athāpi iti | vāsanāprabodhamātre teṣāṃ vyāpāro 
na svapratibimbārpaṇe, vāsanā ca ghaṭasahasrairapi 
pūrvaghaṭānubhavajanitā pratibodhitā tameva ekaṃ 
pūrvānubhūtaghaṭābhāsamunmeṣayati, tato na aparyavasānātmā 
ābhāsānāmatiprasaṅgaḥ | natu iti | ābhāsāntarāṇi parokṣāṇīti na tatra 
tādṛśadarśanasaṃbhāvanamasti, pūrvānubhūtadeśasya ghaṭābhāsasya 
ca unmeṣaḥ syāt, deśakālānanunmeṣe

(page 128)

vā ghaṭamātrasya | ghaṭadvayādestu pūrvānanubhūtasya kuta unmeṣaḥ | 
nanu ghaṭadvayābhāso'pi abhūt, tadvāsanaiva prabudhyate | satyaṃ, 
taddeśakālākārasahacarapramāntarāditi viśeṣyatvaṃ tu na 
kadācidābhāsasya abhūt,- iti tadviśiṣṭaghaṭābhāsavāsanāyā eva 
abhāvāt kutaḥ prabodho bhaviṣyati yena tadavabhāsodayo bhavet | 
pṛthagvāsanāprabodhe 
viśeṣaṇaviśeṣyatāniyamo'vaśyamapūrvo'vabhāsate tadvāsanā ca 
nābhūdeva kutastu prabodho'dhipatitveneti, anirbhāsamānatve'pīti yāvat | 
prabodhyate iti vyācaṣṭe tathābhāsa ityādinā | evamabhidhākrame sati 
tadvastvabhidhīyamānam iti uktaṃ syāt | evaṃ rūpamuktaṃ bhavet | 
kiṃrūpam | āha pramāntara ityādi iti ityantam | pūrvaṃ prasaṅgaḥ iti 
ābhāsaparyavasānamadhipatitvaṃ ca prakṛte na upapadyate iti darśayati 
tuśabdena adhipatistu iti | dṛṣṭaḥ iti mahānase | nanu sūtre hetuḥ 
prabodhakaḥ kimiti udbhāvya na dūṣitaḥ | āha bāhyārthavādibhireva iti 
| apūrvaṃ hi atra ucyate | kṛtaśca atra prayāso 
bāhyārthasiddhyādāvupādhyāyadharmottarādibhiḥ | tathāhi 
ahaṃkārātmakamanaḥsaptamānāṃ śabdādisukhādijñānānāṃ 
janikā yāḥ śaktayo vāsanāstadādhārabhūtamekamālayavijñānaṃ 
svāpamadādau pravṛttijñānasaptakābhāve'pi santānavṛttyā 
vartamānaṃ tat svasantānavartino nimittasya abhāvāt parasantānānāṃ ca 
sadā sannidhānāt kathaṃ krameṇa pravṛttijñānāni kuryāt | tata āha 
dṛśyate ca iti | atra cakāraḥ samuccaye | na kevalaṃ pūrvokto'tra 
abhiprāyaḥ, yāvadayamapīti pūrvasūtre ya ukto nyāyaḥ- 
indriyavadadhikaṃ kiṃcit kalpanīyaṃ, sa bāhyo'rthaḥ | yadāryaḥ 

(page 129)

	............................. bāhyasiddhiḥ syāt vyatirekataḥ |

iti | nanu īśvarādvayavādinā api svapakṣe doṣānāpattiruktā | satyaṃ, 
sakalalokaprasiddhavijñānabāhyavastuvādo'pi yadi na ghaṭeta, 
tadīśvarādvayavādasaraṇatā samastagatikṣaye satyaṃ prāmāṇikānāṃ 
yuktā, ghaṭate ca asāviti kimalaukikadurāroahavādāntarārohaṇaprayāsena 
| tadāha īśvarādvaya iti || 5 ||

	evaṃ bāhyārthavādinā vijñānanaye pratiṣiddhe cet ityanena 
bāhyārthasaṃbhāvanāyāṃ dṛḍhīkṛtāyāmīśvarādvayavādī āha 

	syādetadavabhāseṣu teṣvevāvasite sati |
	vyavahāre kimanyena bāhyenānupapattinā || 6 ||

	kintu iti vākyaśeṣaḥ | saṃbhāvyeta tat yat bhavatā uktaṃ, kintu 
bhavaduktasaṃbhāvanāto'pi dṛḍhatamasaṃbhāvanāntaramasti | yadivā 
tava iyaṃ tāvat saṃbhāvanā tad dṛṣṭe'pitu, etat iti vakṣyamāṇaṃ 
yadasmābhiridamadhikaṃ saṃbhāvanāyogyam | kiṃ tat | āha teṣveva iti | 
iha nirākaraṇe kathaṃ tasyaiva grahaṇamekasāmagrīkatvamindriyādāvapi 
samānaṃ, parasya ca na paraniṣṭhatā yuktā [ka. na yuktā pāṭhaḥ |] 
paratvasya ananyaniṣṭhatāprāṇatvāt, tadanātmaprakāśanaṃ svabhāva 
eva bodhasyeti ayuktam | yat bādhitaṃ, tat svabhāva eva na, pītimā iva 
śaṅkhasya | bādhitaṃ ca jñānasya anyaniṣṭhatvamiti 
svabhāvatāvyāpakasya abādhitatvasya viruddhamupalabhyate iti | 
tadavaśyaṃ satyapi bāhye'rthe tatsamarpiteṣu ābhāseṣu bhavatā api 
aṅgīkṛteṣu teṣveva iti ca niḥsapatnatayā vijṛmbhamāṇeṣu | etaduktam-
anumito'pi bāhyo'rthaḥ prakāśamāna eva vaktavyaḥ, 
prakāśādbodhe(dbhede)hi aprākaśanaprasaṅgādanumitatvamapi vastuno 
mūrchāprāyaṃ  bhavet |

(page 130)

ata eva pramātrantaramapi anumitamanumānasaṃvidaścet bhinnamasti, tat 
sahopalambhaniyamavedyatvādirheturanaikāntikaḥ syāt, tataśca asti tāvat 
saṃbhavaḥ- yat vijñānabāhyaṃ cakāsti iti nīlādayo'pi bāhyā 
bhaveyuḥ, naca etaducitamanābhāsanaprasaṅgāt, adhyakṣaṃ ca prakāśaḥ, 
tadbhinnamadhyakṣasiddhamiti asat, evamekarājyena ye vijṛmbhaṇayogyā 
ābhāsāḥ, naca anupayoginastaireva anyonyaṃ vyavahārāt, kalpiteṣu api 
bāhyeṣu tadābhāsenaiva prakāśamānaiḥ, 
krayavikrayadānapratigrahābhāsādirvyavahāra iti teṣu samāpte vyavahāre 
anyena prakāśātiriktena tata eva aprakāśatvāt niṣpramāṇakena 
bādhakapramāṇanirastena ca [ka. kha. cā pāṭhaḥ |] bāhyārthavargeṇa 
kimadhikena anviṣṭena,- iti sūtrārthaḥ | arthaiḥ iti bāhyatayā api kalpitaiḥ 
| bāhyaśca arthaḥ sāvayavaniravayavobhayavilakṣaṇo 
viruddhadharmādhyāsādikaṃ dūṣaṇamavalambya pramāṇabādhitaḥ | 
avayavini dūṣite tadbhaṅgakramānumeyānāṃ paramāṇūnāmapi 
abhāvaḥ | dṛśyamānadravyābhāve tanniṣṭhaguṇakarmasāmānyādeḥ 
kā vārtā | tadabhāve kaḥ samavāyaḥ | 
dṛśyamānakāryagataviśeṣopayogitayā ca ātmakālākāśādīnāṃ 
kalpaneti tadabhāve na kiṃcit bāhyamasti | yat sūtraṃ muneḥ-

	sarvāprasiddhiravayavyasiddheḥ (nyā. sū. 2|1|34)

iti | niravayavaśca paramāṇurūpo'rthaḥ pramāṇabhādhito 
bahubhirbahubhiḥ prakāraiḥ ṣaṭkayogādikaṃ vikalpya iti 
vṛttigranthasya yojanā | etat sarvaṃ saṃkṣepeṇa avatārayati 
vyavahartrapekṣayā ityādinā | vyavahartraiva anviṣyate vastutattvam |

(page 131)

na hi tadanveṣaṇaṃ vyasanamātram | nirapāya iti apāyaḥ pramāṇābhāvo 
dūṣaṇasaṃbhavaśca, tadrahitā adhikatara iti ābhāsā eva darpaṇāt 
pratibimbāni iva saṃvedanādadhikāni, yacca tato'pi adhikataraṃ na kvacit 
bhāvi tata eva dṛṣṭaṃ, tacca vastu kathaṃ svacchandaceṣṭitamiti na 
pramāṇabalopanatamityarthaḥ | dṛṣṭaṃ ca idaṃ prāmāṇikānām- yat 
satyapi vastuni anupayoginā aṃśena na prayasyanti vicāritena yathā 
indriyādiṣu ṣaḍdhātusamīkṣākārādyo bā(vā)rhatyo vā | etairhi [ka. 
ekaiḥ pāṭhaḥ] bhūtapañcakaṃ cetanā ca itīyati 
vyavahārasamāptiraṅgīkṛtā tatrava anyasya indriyāderanupraveśāt | 
anyairapi bhūtacatuṣṭaye 
vicitramelanoditasaṃvedanākhyavikāraviśeṣe'nuditatadvikāre ca 
grāhakagrāhyavyavahārasamāptirupagatā | yathaiva ityasya tathaiva 
ityanena saṃbandhaḥ | syādetat iti saṃbhāvanāṃ sautrīṃ vyākhyātuṃ 
dṛṣṭāntadvayopādānam | anaṅgam ityanena kimanyena iti sautraṃ 
vyākhyātam | anupayogino'pi vastuno vicāracañcuranviṣyatāt tattvam, iha 
tu bāhye'rthe idamapi nāsti,- ityāha nāpi iti | anena anupapattinā iti 
vibhaktam | pratītiparamparātmaka iti | krayavikrayāderapi 
tathāprakāśanameva prāṇāḥ | yadeva idamasya itthaṃ prakāśate 
tadetenaiva mama prakāśamānasya prakāśamānāyāmeva 
arthakriyāyāmupayogaḥ | tadanena ubhayoḥ prakāśamānena mūlyena 
svopayogaṃ prakāśamenaṃ karomi,- iti | hi yasmādevaṃ, tat iti tasmāt | 
bāhya eva iti saugataistāvadadhyavasāyabalāt prāmāṇyaṃ 
vadadbhiranumānamapi bāhyaviṣayameva,- iti uktaṃ

	prāmāṇyaṃ vastuviṣayaṃ dvayorapi ...................... |

(page 132)

iti | asmanmate tu vikalpasya avaśyaṃ vastuniṣṭhatvameveti uktaṃ

	bhrāntitve cāvasāyasya .................... | (1|3|5)

ityādyantare | tata eva yadāha bāhyavādī- vikalpasya 
asatyaprakāśanatvamiti, tadasmanmate niravatāraṇameva [ka. niravataraṇaṃ 
pāṭhaḥ |] sākārajñānavādinā vikalpaḥ svātmani prakāśaḥ, arthe tu 
avasāyaḥ,- ityukte kathamasatprakāśanam | tadāstāṃ tāvat | 
vikalpapratibhāsitā iti upalabdhikriyākaraṇatayā sāmānyendriyaṃ, 
niratiśayasukhatatsādhanaviṣayatayā svargaḥ, 
anāhṛtasahajānandaghanataikasārapūrṇatātmanā apavargaśca 
abhāvabhuvamabhyeti eva anyathā 
abhilaṣaṇīyatvatatsādhanānveṣaṇatadupadeśatadavadhāraṇatada-
nuṣṭhānādyayogāt | yadāha granthakṛdanyatra-

	iṣṭārthitāyāmiṣṭaṃ vā vimṛśyeteṣṭakāri vā |
	nacāpyadṛṣṭamiṣṭaṃ dyaurapīṣṭā dṛṣṭabhogabhūḥ ||

iti | arthakriyāpi ca ābhāsamānatayaiva abhilaṣaṇīyā,- iti sā api 
ābhāsaviśrānteti tato'pi na bāhyasiddhiḥ | yathāca bhaṭṭaḥ

	ābhāsabhede tvarthaḥ kaḥ ........................... |

iti upakramya

	yatphalāyeti cejjñānaṃ tatphalāyeti [ka. tatphalaṃ veti pāṭhaḥ |] 
kā gatiḥ ||

iti ābhāsaparamparāmeva vyavahāropakaraṇabhūtāmavādīt | tataśca 
prasiddhyaiva bāhyaḥ sidhyati,- iti pratyuta viparītametaditi ābhāsānāmeva 
vastutāmabhidhāya prāmāṇikatvāt svayaṃ svapakṣe dūṣaṇamaśaṅkya 
darśayati āśayaśuddhipradarśanena avitārakatāṃ vaktuṃ kevalam iti | 
paryanuyojyamidam paryanuyogārham | kim | āha ābhāsamānatāyāḥ 
iti | pūrvamūrdhvaṃ ca 

(page 133)

iti | purastāt tu na parastāt tu na kālādhvasaṃkocamābhāsasya darśayan 
ābhāsanamavaśyaṃ bhavane ca abhavane ca nimittamapekṣate | tat cet na asti, 
tat nirhetukatā | tataśca kāryakāraṇābhāvāt ghaṭārthī na mṛdamāharet, 
na kumbhakārakulamabhigacchet, na dhūmārthī hutabhujamādadīta | 
kāryakāraṇatāmūlaśca jñāpyajñāpakabhāvo yataḥ | pratyakṣeṇa 
tāvat janakasya ekasāmagryadhīnasya vā grahaṇam | kāryahetostadbhāva 
eva prāṇāḥ | svabhāvahetorapi-

	ekasāmagryadhīnasya rūpāderasato gatiḥ |
	hetudharmānumānena dhūmendhanavikāravat ||

iti | ayameva nītimārgaḥ sarvatra- iti vakṣyate 

	kāryaṃ hetuḥ svabhāvo vāta evotpattimūlajaḥ (2|4|11)

iti | etāvāṃśca vyavahāraḥ sannirnimittakatve vighaṭate | nanu 
śaṅkitametat dūṣaṇaṃ, kiṃ dūṣaṇameva | netyāha etacca iti |

	cidātmaiva hi deva ........................... | (1|5|7)

iti, 

	svāminaścātmasaṃsthasya ........................ | (1|5|10)

ityādyuddeśeṣu yata etadapi adūṣaṇam, anyaśca doṣo nāsti, tata 
etadāyātamiti darśayati evaṃca iti ityapi yāvat, paramabhūmirāgameṣu 
paramarahasyāpi satī naiva anābhāsamānā bhavati, apitu ābhāsamānaiva, 
- iti tātparyam | etadādisiddhasūtre ca vyākhyātaṃ, mahāgurubhiḥ 
śrīśivadṛṣṭāvādisiddhe samastaśāstrārthapratijñāheturūpatvena 
vyavahārasādhanapramāṇapradarśanaṃ svaprakāśe'pi bhagavati 
nirūpitam | etat tātparyeṇa vyācaṣṭe | tatra yaduktaṃ pūrvaṃ puruṣa 
evedaṃ sarvam iti aviśeṣeṇa yadadvayamupakrāntaṃ, na tat 
samyagadhirohati hṛdayam | ghaṭādīnāmanyonyavilakṣaṇānāṃ 
sphuratāmekarūpatvamiti 

(page 134)

hi niryuktikaṃ sahasaiva vacanamātrakeṇa kaḥ pratīyāt | tasmāt 
jīvadbodhasopānavyavadhānena advayābhidhānamucitamiti | tat saptamyā 
sūcitam | tacca ābhāsasvarūpatvena svaniṣṭhatvābhāve 
jaḍānāmanyasaṃlagnatāyāṃ tadanyatādātmyaparyavasāyināṃ 
bodhātmatvādityanena [ka. tmakatvāt pāṭhaḥ |] nirūpitāyāṃ 
vyākhyātaṃ bhavati,- iti hṛdaye gṛhītvā ghaṭādīnāmiti ṣaṣṭhī 
prayuktā ābhāsasvarūpatvādityetadapekṣāmukhyatvena | svātantryādeva 
ananyāpekṣasvātmaparāmarśarūpatvādicchāśakterna 
prasarapratighātaḥ, tata eva aniruddhatvādicchāprasarasya dṛkkriyātmakaḥ 
prasaro nityapravṛttavartamānarūpaḥ | yadāha sa eva śrīmān

	sa yadāste cidāhlādamātrānubhavatallayaḥ |
	tadecchā tāvatī jñānaṃ tāvattāvatkriyā tathā || (śi. dṛ. 1|3)

iti upakramya

	evaṃ na jātucittasya viyogastritayātmanā |
	śaktyā nirvṛtacittvasya tadabhāgavibhāgayoḥ || (śi. dṛ. 1|6)

iti | anena ca saṃvidānandātmanaḥ sarvatra ekarūpatvena anapāyitvena 
dharmirūpeṇa śaktimadātmanā avasthitasya bhagavataḥ 
svātantryodrekabalena unmeṣyamāṇānāṃ ca icchādīnāṃ śaktitvaṃ 
tisṛṇāṃ devīnāṃ darśitaṃ, yato'sau tryambaka iti prasiddhaḥ | tathāca 
śatarudriyaṃ

	tisro devyo yadā cainaṃ nityamevābhyupāsate |

ityādi | aviratasphuraṇatvādeva navābhāsayogābhāvāt na tatra 
pramāṇamupapadyate upayujyate vā | ata eva na vidyate ādiryasya 
tathābhūtaḥ sarveṣāṃ ca ādibhūtaḥ | etat vyākhyātam ādisiddhe

(page 135)

ityatra vistarataḥ | iyatā sphurat iti vyākhyātam | śatṛpratyayāvatra 
pravṛttau | vyāpnuvan bhavati iti vibhurityukte 
vyāpanīyaviśeṣānabhidhānādaśeṣavastvantarbhāvena darpaṇavat 
vaiśvarūpyāvabhāsanasāratvaṃ vibhutvamuktam | evaṃ yataḥ sarveṣu 
bhāveṣu ahamiti svatantrastato'niruddhecchāprasaraḥ, tato'pi 
prasaraddṛkkriyāyogāt prakāśavimarśatādātmyayogena 
pramāṇādyanapekṣo'kālakalitaḥ, iyatā 
labdhavaiśvarūpyastadavyatiriktasyaiva 
darpaṇābhāsavaicitryavadābhāsabhedasya prakāśanāt | iyati ca siddhe 
pūrṇatvasya balādeva lābha iti vyatiriktākāṅkṣāvaikalyāt 

	prakāśasyātmaviśrāntirahaṃbhāvo hi kīrtitaḥ |
	uktā ca saiva viśrāntiḥ sarvāpekṣānirodhataḥ ||
	svātantryamatha kartṛtvaṃ mukhyamīśvaratāpi ca |
							(aja. pra. si. 23)

iti nayena paramānandaprakāśasvabhāva iti yathopayogaṃ kramamāśritya 
sūtrapadānāṃ vyākhyānaṃ kṛtam | nirvṛtacit iti nirvṛtirvidyate nityaṃ 
yasya,- iti matvarthīyājantena samāsaṃ kurvan 
atyantāviyogamekārthībhūtatāṃ ca prakāśānandayordarśayan 
vijñānānandarūpasya bhagavato dharmitvaṃ nirūpayati | svākāra eva iti | 
ghaṭādīnāṃ pāryantikaṃ yat pāramārthikaṃ rūpaṃ, sa eva svākāraḥ, 
svamātmānameva ca ghaṭādīnāmākaroti iti svākāraḥ | sa ca 
śreyorūpatvāt śivaḥ sarvakalpitagrāhakapāramārthikasvabhāvatvāt 
paramātmā, prasiddhabrahmaviṣṇurudrādīśvarabhāvaprasaraparigrahāt 
parameśvaraḥ pramāṇavyāpāranairapekṣyeṇa sphuraṇāt siddhaḥ | evam 
iti anenaiva prakāreṇa, idaṃ ca anyatra uktaṃ śrīśivasūtreṣu | teṣām iti 
ghaṭādīnāṃ prakāśātmatayā iti jīvadbodhasopānakrameṇa 

(page 136)

paramātmarūpārohaṇaṃ, paramātmanaśca vaiśvarūpyam | viśvaṃ ca 
sthūlapṛthivyādisūkṣmarūpādibhedena daśadhā, 
karmabuddhyantaḥkaraṇabhedena trayodaśadhā, sthitena 
tajjaḍābhimatabhāvopādānarūpakṣubhitaguṇatattvatatkāraṇaprakṣubhita-
samastasāmyātmakaprakṛtitattvayogena [kha. karaṇākṣubhita pāṭhaḥ |] 
dvidhā, uktarūpaitadbhedagrahaṇaprāṇapuṃstattvatadāvaraṇopakaraṇa-
rāganiyatikalāvidyākālamāyātmanā saptakena, āvaraṇahānitāratamya-
kramavibhaktavidyeśvarasadāśivaśaktiśivalakṣaṇatattvapañcakena 
ṣaṭtriṃśadrūpaṃ paramātmani bhagavati 
śrīmatparamaśivabhaṭṭārake'bhedabhūyaṃ prāptam,- iti ekaiko'pi 
paramāṇuḥ saṃvedakadvāreṇa tāṃ paramātmabhūmimabhedena 
upasaṃkrāntastadviśvarūpasvabhāva eva | tata eva śrīmadviṣamadṛśi 
pramātṛbhedasaṃbandhakṛtāḥ pañcadaśādibhedāḥ pṛthivyādiṣu 

	śaktimacchaktibhedena dharātattvaṃ vibhidyate |
	svarūpasahitaṃ tacca vijñeyaṃ daśapañcadhā | (mā. vi. 2|2)

ityādinā nirūpitāḥ,- iti āstāṃ tāvadiha | pradeśo'pi iti 
etadādisiddhasūtre'pi vyākhyātam | naca etat vacanamātraṃ, nāpi 
śuṣkayuktimātram, apitu ānubhavikaṃ tathaiva 
arthakriyāsaṃbandhadarśanāt,- ityāha ata eva iti | āstāṃ 
svasaṃvedanatattvam | tatra hi kimucyate | parameśvararūpatāyāṃ jaḍamapi 
yāvaccharīramitthamiti evakāraḥ | sidhyati iti 
vyastatattvatādātmyabhāvanāto 

	jalena jalarūpī syāt sthalena sthalatāṃ vrajet |

ityādiyuktibhiraparasiddhilābhaḥ, samastatādātmyabhāvanayā [ka. 
bhāvanāyāṃ pāṭhaḥ |] jīvanmuktatāyāṃ parameśvaraikarūpatāveśāt 
parasiddhilābhaḥ | yat mayā stutaṃ

(page 137)

	ātmanyeva na māmi nāma visaradromāñcarekhāṅkura-
		krāntyā kiñcidaṇīyasīrapi diśo jānāmi rundhe haṭhāt |
	yanme bhairava bhairaveti raṭato hṛdgranthivisphoṭana-
		truṭyatpāṭavapāśapañjarabharaḥ kāyo'pi mokṣāyate ||

ityādi | ghaṭādikamapi ca iti tata eva mantratādātmyabhāvanāpūjita-
kalaśasthaṇḍilākārādisannidhānāyattāni viṣabhūtaśamanādīni 
kṛtyaśatāni dṛśyante | rahasyaśca ayamartha iti na atīva pratato'tra avasare | 
abhiniviśya iti gāḍhena mūrkhaśrotriyāgrahatulyena [ka. śrotriyagraha 
pāṭhaḥ] tiraskārāsahiṣṇunā abhiniveśeneti yāvat | tadatiriktam iti 
dṛṣṭaṃ prayojanamadṛṣṭaṃ ca ābhāsebhya eva, garuḍavikalpāśca 
viṣaśamane ābhāsādarthakriyājñānamātrasya nirviśeṣatvāt | kiṃ 
bahunā | parapuruṣārthalābho'pi tathābhāsabhedāyatta iti 
ko'nyo'bhilaṣyate artho yo na sidhyedābhāsaiḥ, sidhyecca ābhāsabāhyaiḥ 
| yadāha tatrabhavān

	buddhiśabdau pravartete yathābhūteṣu vastuṣu |
	teṣāmanyena tattvena vyavahāro na vidyate || (vā. pa. 3|7|108)

iti | anena prakhyopākhyārūḍhasya eva 
prakāśavimarśadaśāviśeṣāśrayeṇa vyavahāropayogo darśitaḥ, 
vikalpasvapnādyābhāsānāṃ ca sphuṭaṃ hlādādihetutvaṃ na 
jñānamātratayā | naca niyataiva arthakriyā, abdhijalaṃ tṛṣamapi kurvat na 
vastu | ābhāsāntarabhedastu sarvatra samānaḥ | na pramāturadhyavasānaṃ 
bhāvānanyathākartuṃ śaktam | abhilaṣitā api mṛdo'pi 
kanakārthakriyārthī dṛṣṭa iti kiṃ tena | caśabdaṃ vṛttigataṃ 
pramāṇabādhitaḥ ityetadānantaryeṇa tāvat vyācaṣṭe na kevalam iti | 
bāhyasya sādhakaṃ tāvat pramāṇaṃ

(page 138)

pramāṇadhaureyameva pratyakṣaṃ pareṇa uktam, tat pratyuta 
prakāśarūpaṃ prakāśābhedameva sādhayatīti | tameva cakāraṃ 
viruddhadharmādhyāsādeḥ ityetadanantaramapi yojanīyamiti vyācaṣṭe 
tathā iti | tathāśabdena na kevalamityayamarthaḥ samuccayena ākṛṣyate | 
naca kevalamidameva bādhakaṃ yat pramāṇamukhena pravṛttaṃ, yāvat 
svato'pi iti svamukhena prameyasvarūpanirūpaṇapravṛttapratītidvāreṇa api 
pravṛttaṃ prameyasvarūpameva sattvāviṣkaraṇena unmūlayatyeva [kha. 
unmūlayatīva pāṭhaḥ |] bāhyamiti yāvat | pūrvakaṃ hi bādhakaṃ 
prameyasvarūpamanapekṣyaiva sāṃśamanaṃśaṃ viruddhamaviruddhaṃ 
yat bhavatu, tat bhavatu | prakāśāt bhinnaṃ na prakāśate iti tu sarvagrāsena 
[kha. grāsanapravṛttam pāṭhaḥ |] pravṛttam | idaṃ tu madhyamaṃ 
yadyevaṃ syāt, kathamitthaṃ prakāśate | atha evaṃ, tat kathamevamiti 
meyaṃ ca bhāsanaṃ ca apekṣya [kha. kṣyaṃ pāṭhaḥ |] tṛtīyaṃ tu 
bhāsanānapekṣayā śuṣkameva vastu āśritya bhaviṣyati 
pratītyanapekṣatve ca iti | evaṃ sthite madhyamaṃ bādhakamāha 
ekānekarūpatayā iti | pratītistāvat paṭo'yaṃ vicitro vitata ityevaṃ 
vastuviṣayavartinī [kha. vartiniḥsandhibandhatvāt pāṭhaḥ |] 
sandhimattvādekaṃ vitatatayā vicitratayā ca deśākārabhinnaṃ 
prameyamāgṛhītamabhimanyate, naca tathā tadvastu 
ekatvānekatvayoranyonyaparihāreṇa virodhāt | nanu yadeva ekaṃ, tadeva 
idamanekaṃ nirbhāyāt | syāt virodho, natu evamiti paramatamāśaṃkate 
atha iti ādau | dūṣayati tadapi na iti | avayavadharmeṇa yadi avayavo(vī)na 
samāviśyate, na kadācidavayavini calatīti, āvriyate iti, rajyate iti vā 
buddhirbhavet | nahi avayavasparśamavadhūya sākṣādavayavini kaścit 
kampāvaraṇarāgādīnupadadhyāt | atha samāviśyate, tadekāvayave 
kampādimati 

(page 139)

yathā taddharmasamāveśādavayavī kampādimān, tathā 
kampādyanāviṣṭāparāvayavadharmasamāveśādakampādimān; 
evamavayavanāśānāśābhyāmavayavināśānāśavaiśasamiti 
samānavāsanāvasaropanatamahotsavabandhumaraṇajanitātiharṣaśokāve-
śivallabhabhāminīyugalahṛdayānuvartanavyasanaparavaśahṛdayanāyakavat 
kaṣṭāṃ daśāmadhiśāyita eṣo'vayavī varākaḥ | sarvātmanā iti 
tatraiva vartamāno'nyatrāpi vartate iti vyāsajyā vṛttiriti yaducyate, tat 
pramāṇavṛttamavadhīrya svacchandābhidhānam | tadanyayoravirodhena 
ekatve vyāsajya iti ko vyāsaṅgārthaḥ | vitatatvaṃ ca na ābhāsetaiva | 
virodhe vā tadvṛttitvātadvṛttitve kathamekasya syātām,- iti ko 
vyāsaṅgārthaḥ | tatra tadvṛttitvameva anyatra anyavṛttitvamiti | tatra iti 
viṣayabhedādavirodho rūpasyeva | rūparasayorupādānasahakāritābheda 
ityapi asat | nahi rūpasya rūpatāṃ muktvā anyatkiñcidupādānatvaṃ 
sahakāritvaṃ vā | tadeva tu rūpaṃ kṣaṇikaṃ kāryamiti yathā 
anyāpekṣavyavahāramātrapātraṃ, tathā 
niyataparabhāvasadṛśāsadṛśavastvantarāpekṣayā 
upādānasahakārivyapadeśāvakāśasahiṣṇu syāt | vyavahāravirodho na 
vastu bhinatti tadanāśrayatvāt | tadanāśrito'pi yadi vastu bhindyāt, 
ghaṭapaṭau bhinnau vijñānaṃ bhindyātāmiti aniyamo bhedasya bhavet | 
avalokyate ca niyamaḥ | tato bhedasya kāraṇaṃ tadāśritatvaṃ tadviruddhaṃ 
ca tadanāśrayatvamiti kāraṇaviruddhopalabdhiḥ | tata eva avikalaṃ 
vastubhede kāraṇaṃ vastugato virodhaḥ, sa ca deśabhede 
sthiravyavahārabhede | ekasya hi maitrasya svagṛhe sukhāsīnasya yadi 
vyavahartāro bhinnatayā rūpaṃ vyavaharanti, mama mitraṃ, mama 
śatrurmama madhyastho, mama na kiṃciditi; na iyatā sa svātmani 
svarūpavaiśasamāpatadabhimanyate |

(page 140)

yadi svāmī ruṣamāviśya brūyāt- iha āsīnatāmanujjhanneva 
bhavānadhunaiva yadi na bahiratastiṣṭhatīti, tadayaṃ 
deśabhedamativipratiṣiddhamabhimanyeta mṛtyuvadanapatitatāmeva 
ātmanaḥ | tatra iti ca yaduktaṃ, tadapi vacanamātram | evaṃ hi sa ghaṭaḥ 
paṭa iti ekaṃ vastu bhavet, tatra tādṛktaiva, anyatra asya paṭateti na 
ghaṭapaṭarūpātiriktaṃ kiṃ tadanyaśabdadvayavācyam | deśa iti cet, 
tadbhedāt punarapi virodhaḥ | ihāpi tau digbhāgabhedabhinnāvayavau 
muktvā kimanyadasti yat tatra anyateti codyate | tat deśāntarabhedopagame 
punarapi virodha eva, ekaikāpāye sā ? vināśaḥ sarvāpāye tu vinaṅkṣyanti 
| ko'tra doṣa ityāha ekaika iti avayavāśritatvāt | bhinnena evahi sahārtho 
ghaṭate putreṇa iva pituriti bhāvaḥ | evaṃ kāṇādasaṃmataṃ bāhyaṃ 
dūṣayitvā vaibhāṣikaparibhāṣitamapi dūṣayati- atha iti niravayavāḥ iti 
| tata eva na śaṅkito viruddhadharmādhyāsa iti bhāvaḥ | saṃcitāḥ iti 
puruṣakarmādhipatyādidarśanavṛṣadaṃśadarśanādiprāpakādāloka-
timirāṇubhiravyavadhānāt nirantarabhāvena avatiṣṭhamānā iti yāvat | 
naca evaṃ paramāṇumayatve iti | vaitatyaṃ digbhāgabhedavattvam | tacca 
bahūnāṃ paramāṇūnāṃ bhinnadeśatve'mūrtatvena 
anyonyarūpadeśākramaṇayogyatvābhāvāt pratilabdhe kimiti na ghaṭate 
ityāśaṅkya āha tathāhi iti | ayaṃ bhāvaḥ- yadi sāntarāḥ paramāṇavo 
ghaṭaḥ, tadadṛśyatā, saṃcayasya avadhiniyamābhāvaḥ, 
arthakriyānupayogaḥ, dhāraṇākarṣaṇādyasaṃbhavaḥ, 
ālokapuñjaghaṭayorekadeśa eva darśanam, [kha. deśadarśanaṃ pāṭhaḥ |] 
pārthivataijasādivastvantaradṛkprasaṅga iti śataśo doṣāḥ; nairantarye tu 
parasparasaṃśleṣaḥ | tatra paramāṇoḥ paramāṇunā āśleṣe 
anupāśliṣṭaṃ 

(page 141)

bhāgāntaramasya aparaṃ nāsti, aparasyāpi evamiti dvāvapi militau na 
adhikaṃ rūpaṃ samutthapayeyātām | evamanyamelane'pi vācyam | tadāha 
ananta iti | evaṃ kramasaṃśleṣe doṣaḥ, akramasaṃśleṣe tu vakṣyati 
ekaparamāṇusaṃpṛktasya ityādinā | madhyamaparamāṇorhi yugapat 
paramāṇū yadā yojyete, tadā ekaparamāṇusamāśliṣṭena rūpasarvasvena 
madhyavartī paramāṇuḥ saṃśliṣṭa iti tau pūrvāparasaṃmatāvapi 
paramāṇū tanmadhyavartiparamāṇumagnaśarīrāviti 
ekaparamāṇumātranirbhāsaprasaṅgaḥ | avyāpyavṛttitā ca na saṃyogasya 
atra upapadyate avyāpanīyasya aṃśāntarasya asaṃbhavāt | dvābhyāṃ 
saṃyuktābhyāṃ dvyaṇukaṃ ca avayavirūpaṃ yadi ārabhyeta, tat 
tadārambhakāpekṣayā paramatvatyāgena aṇurūpaṃ kiṃcit sthūlamityapi 
syāt | dūṣitaśca ārambhaṇīyo'vayavī | ādarśane iti nirvikalpe ālocane 
ityarthaḥ | anupalakṣaṇīyatvam iti aniścaya iti yāvat | nanu bahavaḥ 
paramāṇavo gṛhyamāṇā itthaṃ cakāsati | tat ke'mī paryanuyogā 
ityāśaṃkya āha prathama iti | digavabhāsabhedātmā yaḥ saṃniveśaḥ, 
sa cet paramāṇusamūhe gṛhyamāṇe abhimānamātrasāraḥ, tat 
paramāṇusamūhatvāviśeṣāt kvacidṛjurayam, anyatra vakro'yam, aparatra 
caturaśro'yam, itaratra tryaśrirayam,- iti niyamena sarvapramātṛsaṃvādī 
bhinnārthakriyākāritvena pratibhāso na bhidyeta | tathā tathā te 
paramāṇavaḥ ityapi tathāśabdacchannaṃ bāhyavastuniṣṭhaṃ kimapi 
paramāṇutātiriktaṃ tattvāntaramurarīkaraṇīyameva,- iti ekāntaḥ | 
yadevaṃbhūtaṃ, tat cet na aṅgīkriyate bahirasti,- iti; tarhi nīlasya api kiṃ 
bahiḥsattāṅgīkaraṇatvena | nīlānupagame ca kasya paramāṇutvaṃ 
sādhyeta | siddhe hi nīle tasya vastuvyāpakaviruddhadharmā-

(page 142)

nadhyāsaviruddhadharmādhyāsayogāvinābhūtāvayavirūpatāpratiṣeḍhe 
niraṃśaparamāṇurūpatā kālabhedābhāvācca kṣaṇikatā sidhyati 
arthakriyākāriṇo vastutvāt, dikkālabhede ca viruddhadharmayogāpattyā 
avaśyamavastutvāpatteḥ | deśataḥ kālata ākārataśca saṃkucitameva 
nīlam, natu vitataṃ, nāpi sthiraṃ, nāpi citram,- iti hi vyavatiṣṭhate | tat 
nīlamarthakriyākāri cet, tadaṅgīkṛtamṛjuvakratādyapi vastusadeva 
upagamyaṃ tena vapuṣā arthakriyopapatteḥ | nīlasya ca paramāṇutayā 
anavasīyamānatvādidamapi anyatra anavakāśaṃ śuddhanīlasya 
arthakriyākāriṇo'dhyavasāyena viṣayīkārāt tāvata eva 
arthakriyākāritvāt sattvamanyasya saṃniveśasya sthairyavadasatteti | 
etadāha nanu iti | ekasmin jñāne bahavaḥ paramāṇavaḥ pratibhānta itthaṃ 
pratibhāsanayogyā iti ta etāvadeva idamiti yāvat | atha tṛtīyaṃ 
bādhakamāha svarūpeṇaiva iti | ṣaṭkoṇe devanākṣādau yadā aṇavaḥ 
samīyante, tadā dhruve [bruve ka. pāṭhaḥ |] avadhibhāvena āśrite 
madhyavartini ekatra yugapadeva saṃlagnāḥ ṣaḍaṇavaḥ | yadi na kalpyeta, tat 
samaṣaṭkoṇavastusamudayaḥ kathamiti tasya madhyavartino'vaśye 
ṣaḍbhāgā āpadyante | bhāga eva aṇuriti cet | tatrāpi eṣaiva vārtā | tataśca 
tadeva idamāyātamavayavāvayaviprasaṅgaśca evamāpralayāditi | 
ekadeśavṛttiḥ saṃyogaḥ ityapi ekadeśayogameva ākṣipati | 
avyāpyavṛttisaṃyogaṣaṭkopādhikṛto'yaṃ bhāgaṣaṭkabhramaḥ 
ityapi asāraṃ niraṃśatāyāmaṇoraṇutvenaiva avyāpanasya 
śabdamātrasāratvāt | niraṃśe'pi hi mahati bhavet tatpradeśayogasya 
kalpitasya ākāśādāvakalpitasya vā parvatādau saṃbhavāt | tathā iti 
ṣaṭkoṇatayā | tadapi vā iti nipātadvayena idamāhakaścidapi

(page 143)

saṃniveśo na upapadyate | pārśvasaṃbhavāyatto hi sarvaḥ saṃniveśaḥ | 
pratibhāsabalotthāpito'yaṃ saṃniveśābhimāna ityapi na yuktam | 
pratibhāsasya niyāmakahetvabhāve niyamena kvacideva kathaṃcideva 
saṃniveśābhimāna ityayamarthastāvat niryuktikaḥ | arthakriyāyogaśca 
yobāhyārthasadbhāvapratipādane mūrdhābhiṣiktaḥ, sa sarvaḥ 
saṃniveśāyatto na mṛtparamāṇumātrāyatto 
ghaṭamṛtpiṇḍayorekārthakāritvādṛṣṭeḥ | tathā tathā te paramāṇavaḥ 
ityapi nibhṛtabhaṇitimātraṃ na saṃniveśādhikyaṃ viśeṣaṃ 
pratyākhyāya upapadyate | yacca ucyate- jñānamekaṃ gṛhṇadeva aparaṃ 
gṛhṇātītyetāvatā vaitatyābhāso dvitvāvabhāsavat,- iti, tatra api yathā 
tathā tayorgrahaṇe asti dvitvābhāso, naivaṃ saṃniveśābhāsaḥ | 
prajñaptisattve ca asya arthakriyākāriṇaḥ saṃvṛtatve kimaparamanurudhya 
vyasanamaṇusaṃcayasamarthane | kiṃca avayavinaṃ 
dūṣayitumaṇusaṃcayamātravastuvādinā yadabhyadhāyi ghaṭasya ekatra 
pārśve chāyā, paratra ātapaḥ, madhyabhāgaḥ pārśvadvayena āvṛtaḥ, 
pārśvadvayamanāvṛtam, ataśca 
tathābhūtāvayavaviśrāntaśarīro'vayavī yugapadeva viruddhāṃ 
chāyāṃ kathaṃ kṣamatāmātapasaṃyuktaśca na ca iti, āvṛtaśca naca iti 
ca | āvaraṇena raktādayo'pi upalakṣyante | citratantau bhāgo raktaḥ, 
aṃśāntaramaraktaṃ, bhāgāntaramasitamanyat pītamityādi | tasmāt 
vastutvasya vyāpakaṃ viruddhadharmasaṃbandhavandhyatvaṃ yat, 
tadviruddhasya viruddhadharmasaṃsargasya upalabdhyā 
vastutvaniṣedho'vayavinaḥ,- iti tatparamāṇāvapi samānam | pārśvadvaye 
hi madhyaparamāṇoryadi paramāṇudvayaṃ, tadā prāgvṛttitayā 
sūryasaṃmukhasya aṇorātapayogaḥ, pratyagvṛttestu tadayogaḥ, 
madhyavartinaśca dvābhyāmāvaraṇamiti ghaṭate | yāvatā madhyavartino 
nirbhāgasya pārśvadvaye sati madhyavartitvānupapattiḥ, iti 
paramāṇutrayādārabhya 

(page 144)

sthūlaghaṭādiparyante vastuni cchāyātapavibhāga 
āvṛtānāvṛtatvaraktāraktādirviśeṣo ya upalabhyate, so'ṇusaṃcayavāde 
nirvivādasiddha iti yaduktam, taduktisārameva, na yuktisāramaṇoḥ 
sāṃśatvena vinā asya vidherayogāt, niraṃśasyaiva vā 
pārśvadvayādiyoge taddeśatvātaddeśatvavaiśasāpattiḥ | aṃśadvayamaye 
asya ekatve avayavivādasyaiva abhyupagamaprasaṅgaḥ | aṃśasya 
aṇutvāṃśāntaraparyanuyogena pralayāntarāpātaḥ | kiṃca 
cchāyālokanīlapītādiparamāṇusaṃcaye viśvatra 
bhāvāvacchedāvadherayogaḥ vijātīyatayā avacchede citre ekatvena kathaṃ 
pratītiḥ, vastuto madhyapūrvāparatādyabhāve niyamābhāvāt 
saṃniveśabhedapratyayaḥ kathamityādayo deṣāḥ | etadupasaṃharati 
vijñānavādibhiḥ iti | ālambanaparīkṣādau daiṅgāge, 
vijñaptimātrādisiddhāvāsabandhanyāṃ, prajñālaṃkārādiṣu 
bhāṭṭadarśaneṣu, tatra tatra ca anyatra vitatya ayamartha ukta iti | ayaṃ 
bhāvaḥ- dūṣaṇakalāpena anena viṣayasya asattvamāvedayatā 
bāhyārthaviṣayaṃ yat pramāṇaṃ pareṇa pratyakṣaṃ samabhāvyata, 
tadasamarthatayā pramāṇābhāsīkartavyam | tato niṣpramāṇako 
bāhyo'rthaḥ kathaṃ sidhyet,- itīyati viśrāntirādheyā anyathā 
pramāṇena prasādhite vastuni dūṣaṇasya akiṃcitkaratvāt | 
pramāṇābhāvaśca bāhye'rthe vitatya uktaḥ 

	vartamānāvabhāsānām .................... | (1|5|1)

ityādinā, vakṣyate ca vitatya, iha 
kimamībhirāvedanakāribhirnīrasavicārairiti || 6 ||

	nanu bāhyamābhāsakramavaicitryeṇa hetunā prasādhitam | tat 
kathaṃ tadanupapattiriti uktamityāśaṅkya sūtraṃ 

	cidātmaiva hi devo'ntaḥsthitamicchāvaśādbahiḥ |
	yogīva nirupādānamarthajātaṃ prakāśayet || 7 ||

	saṃvidrūpaṃ tāvat viṣayavyavasthāsthānaṃ 
sarvavādibhiraṅgīkṛtam, 

(page 145)

anusandhānādibalācca tadekam | aiśvaryaṃ ca asya 
devatvamābhāsasaṃyojanaviyojanasvātantryātmakamupapāditam | 
prakāśatādātmyaṃ ca arthānāṃ vitatya uktam, vakṣyate ca | 
tato'ntargatavaiśvarūpyaṃ tadaiśvaryādeva ca | tasya abhyupagame 
svātantryāpratihatalakṣaṇena icchāviśeṣeṇa bhavitavyam | icchayā ca 
nirmāṇaṃ svapnasaṃkalpādau dṛṣṭameva 
ghaṭādermṛdādiprasiddhakāraṇaparamparāparākaraṇena | tadatra 
asatyaghaṭādiriti cet, astu tāvadevam | tathāpi yogī 
purasenādinirmāṇamicchāvaśādeva karoti,- iti siddham | tatra hi tadicchayā 
jhaṭiti saṃghaṭitāḥ paramāṇava upādānam,- iti ucyamāne yadi prasiddho 
ghaṭasaṃpādakaḥ 
samastakarmaśikṣādharmādharmadaṇḍādisahakārisahitaḥ 
svopādānocitaḥ kapālādikāraṇakalāpo'bhyupeyeta, tat kulālaviśeṣa eva 
ayaṃ yogīti āyātam | tṛṇamātreṇāpi tu prasiddhyullaṅghane 
svapnasaṃkalpakāmaśokādiviṣayaparidṛṣṭabhāvābhāsanirmāṇa-
sāmarthyaṃ saṃvida eva | icchāṃ prakhyāya kimakāraṇameva 
kāraṇāntarānveṣaṇāya prayasyate | yadāha bhaṭṭadivākaravatsaḥ-

	na dṛśyate tvatpratibhāsaśakteḥ
		svapne'rthavaicitryanimittamanyat |
	taddṛṣṭasāmarthyatayā sadaiṣā
		viśvaprapañcaprathanaikahetuḥ ||

iti | yoginaśca śarīraprāṇādyārūṣitamapi caitanyaṃ tāvati nairmalyāt 
nirmātṛ, svaśarīraprāṇādisahitapramātrantarāpekṣayā bāhyatvena tasya 
arthasya, cittattvameva sarvatra nirmātṛ | etadeva darśayituṃ vṛttau 
ṭīkāvataraṇikāyāṃ ca dṛṣṭāntaḥ pṛthaṅ na vyākhyāto 
dārṣṭāntikarūpābhidhānenaiva asya vyākhyātatvāt tatra āvṛttiyogena ca 
granthasya ubhayatra api vācakatvāt | yato devaścidātmā

(page 146)

tataḥ prakāśayati iti hetumati liṅ | hi iti yata evaṃ devatvāt cidātmā 
ābhāsavaicitryaṃ prakāśayati, tasmāt anupapattinā kimanyena bāhyena 
iti pūrveṇa saṃbandhaḥ,- iti sūtrayojanā | evaśabdaḥ- 
aprayāsasiddho'yamartho bahutarābhīṣṭasaṃpādakaśca- iti dyotayati | 
etadeva sphuṭīkṛtaṃ svātmarūpatayā ityādinā kartuḥ karmaṇaśca 
viśeṣaṇena | tadayamarthaḥ- cittattvaṃ yataḥ svātmarūpamahamiti 
ananyāpekṣaprakāśavimarśam, tatastasya yadābhāsanaṃ, tat 
tāvadupapannaṃ na prayatnasādhyam; tadabhedinaśca bhāvarāśeḥ 
prakāśātmatvādupapannamābhāsanamiti | antaḥsthitaṃ ityasya vṛttiḥ 
anantaśaktitvāt iti | bhagavati evahi viśvamadaḥ śaktivaicitryam | 
yadāgamaḥ 

	śaktiśca śaktimāṃścaiva padārthadvayamucyate |
	śaktayastu jagatsarvaṃ śaktimāṃstu maheśvaraḥ ||

iti | sūtrārthaṃ saṃkṣepeṇa vivakṣurhiśabdasya hetutāṃ dyotayituṃ 
sādhyaṃ pūrvasūtraniṣṭhamarthamupakṣipati naca ityādinā | hiśabdaṃ 
vyācaṣṭe yataḥ iti | yadidaṃ vastu vakṣyate, tasya asminnarthe hetutetyarthaḥ 
| tathā iti bāhyābhāsatayā | evakārārthaṃ vyācaṣṭe pūrvam ityādinā 
| sarvathā iti na bāhyasadbhāvena, na vāsanāprabodhena, na 
pūrvakarmaikapraghaṭṭakābhāsena, na vā icchābhedena, na 
kāraṇābhāsabhedena, na 
upasarpaṇapratyavabhāsābhidhānapramātrantarābhāsādinā vā 
ayamupapanna ābhāsabhedaḥ | tatra atidurghaṭakārī 
paridṛṣṭāpratihataśaktiḥ parameśvara eva śaraṇam | nanu kimapekṣayā 
bahiṣṭvam, na tāvat prakāśāt, tadbahirbhūtasya 
aprakāśanāpattiprasaṅgāt,- ityāśaṃkya kalpitapramātrapekṣayā 
bāhyatvam, natu jātu paraprakāśāditi darśayituṃ 
tattvabhuvanalakṣaṇāyāḥ sthūlasūkṣmarūpāyāḥ prameyasṛṣṭeḥ 

(page 147)

pañcāśatpratyayabhedabheditabuddhidharmaprabandhalakṣaṇabhāvasṛṣṭi-
vicitrīkṛtabhūtātmakapramātṛsṛṣṭisāhityenaiva svarūpaṃ nirṇayan 
pīṭhabandhaṃ tāvat karoti tasya ca ityādinā | asmān iti na svātmānaṃ 
prati, nāpi bhāvān prati bhedena darśayataḥ, apitu kalpitapramātṝnprati 
bhedena darśayataḥ, tadapekṣayaiva, natu svātmāpekṣayā, nāpi 
bhāvāpekṣayā sraṣṭṛtā,- iti ubhayato yojyam | tatra iyaṃ sṛṣṭiḥ-

	parasūkṣmavyūhayogāt vibhavācca caturvidhā |

ityāgame nirūpitā | tāṃ vibhajati saca iti īśvaraḥ | 
yāvatsaṃvidviśrāntatā darpaṇapratibimbavadīśvaradaśāyāṃ 
dhyāmaledaṃbhāgaśrīsadāśivabhūmyanantaraṃ 
sphuṭedaṃbhāvāyāṃ sṛṣṭivargasya ahamidamiti, tāvat pūrṇatvena 
svarūpaparirakṣaṇena utkarṣayogena ca paratvam | ananyopādānam 
ityanena nirupādānatāṃ pāramārthikīṃ vyācaṣṭe | etacca 
viśeṣaṇadvayaṃ vyūhavibhavasṛṣṭāvapi yojyam | paratvaṃ hi triṣu 
uttareṣu, sūkṣmatvaṃ dvayaḥ, vyūha ekatra | pūrvapūrvānuprāṇitaṃ 
hi yathottaram | iti āgamādhikāre vitaniṣyāmaḥ | vyūhavibhavasṛṣṭyorapi 
ca vastuto nirupādānataiva | niyatiśaktyā tu 
upādānāvabhāsastanmātrādiṣu api asti | ahaṃkārāt tanmātrendriyāṇi, 
so'pi mahataḥ, saca guṇebhyaḥ, te sāmyāt, tat kalātaḥ, sā māyātaḥ, 
māyā ca bhagavacchaktivijṛmbhā api 
viśvopādānarūpatāvabhāsitajaḍatvasvabhāvā tattvarūpā | etacca 
labhyate anāgatāvekṣaṇaṃ tantrayuktiḥ iti | tathāhi yat vibhavasṛṣṭau 
vakṣyati niyatiśaktyā svakāraṇamukhena iti, tat 
susūkṣmavyūhasṛṣṭyorapi upajīvanīyam | ādyāṃ sṛṣṭimullaṅghya 
yanmadhyavartinī tanmātrasṛṣṭiratra 

(page 148)

uktā ādiśabdena prakārārthena uparivartitattvāntarasaṃgrāhiṇā, tatra 
ayaṃ bhāvaḥ- śabdādaya eva sthūlatvena prameyībhūtāḥ 
svopalabdhikaraṇasaṃpādakabuddhikarmendriyatatsaṃkalpādisiddhau 
prayojakībhavanti | tadupalambhabalādevaca etaducitapramātṛlābhe 
tatpramātrupakaraṇakañcukaṣaṭkādisiddhiriti te eva sarvatra prāṇāḥ | 
tathāca pañcabrahmayoge'pi nabhaḥprabhṛtīnāmeva 
sūkṣmaśabdādirūpatayā upayogaḥ,- iti yat kiñcit prameyaṃ, tat 
sarvametanmayameva paramārthataḥ | tata eva pañcatattvaparamārthatā api 
viśvasya āgame nirūpitā | tadetadāgamādhikāre vitaniṣyāmaḥ | yoginaḥ 
iti vyācaṣṭe tat iti sūkṣmatanmātrādyābhāsaparamārthān | 
aviśeṣebhyaḥ iti tanmātrebhyaḥ | gandho hi 
saurabhādyavāntaraviśeṣavinirmukto gandha ityeva bhāsamānaḥ, tadeva, na 
adhikaṃ tatra anyat cakāsti,- iti tanmātramaviśeṣaśca ucyate | vyūhaḥ 
śabdādīnāṃ kṣobhaḥ, parasparasāhityaṃ ca

	ekadvitricatuṣpañcaguṇaṃ vyomāditaḥ kramāt |

iti nyāyena | dṛśyatāpatti iti rūpādīnāṃ yā sarvapramātṛṣu 
darśanopalakṣitārthakriyāviśeṣasaṃpādanayogyatā, tatparyantaḥ | tena 
gandhatanmātrasya cet dṛśyatā tādṛśī jātā, kimanyadastu 
ābhāsāntaraṃ yattattvarūpaṃ syāt | katipayadṛśyaṃ sarvajanadṛśyaṃ 
ca yadābhāsarūpaṃ sāmānyaṃ, tat yato vibhavātmanā tanyate, tatastat 
tattvamucyate | ghaṭādi ca na anyena rūpeṇa tanyate | taddhi 
pṛthivyādervimiśratayā anyonyavyāptyā vibhāgena ca vicitreṇa bhavanam, 
- iti vibhava ucyate | tadetadāha ānantyāt iti paricchedasya antasya 
iyattātmano'saṃbhavāt | tataśca iti tattvebhyaḥ | bhuvanākāreṇa iti 
bhogādhikaraṇabhūtabrahmāṇḍādirūpatayā |

(page 149)

ghaṭapaṭa iti bhogyarūpatayeti | anye tu ghaṭādisṛṣṭimeva 
bhāvasṛṣṭimāhuḥ | tattvāni hi sāmānyābhāsarūpāṇi 
guṇaguṇibhāvena vicitreṇa sāmastyena [kha. sāmānyena pāṭhaḥ |] 
militāni bhoktṛbhogyataddvayādhikaraṇarūpatayā 
bhūtabhāvabhuvanātmanā bhānti | pratyayasargastu 
buddhitattvadharmasteṣu eva anupraviṣṭaḥ | niyatiśaktyā iti tata eva yāvat 
sā niyatirna vighaṭate iti pramāṇāntarāt niścitaṃ, tāvat bhavatyeva 
kāryakāraṇānumānam | paramārthatastu bhagavāneva 
viśvanirmāṇaśaktimān yathā tu svapnadarpaṇādāvapi, 
kumbhakārādikāraṇapuraḥsaraghaṭanirbhāso'pi, 
svacchabhāvasvatantrabhāvayoreva mahimā tatrāpi mantavyaḥ [ka. 
mantavyaṃ pāṭhaḥ |] | svakāraṇamukhena iti sphuṭayati ghaṭaṃ hi iti | 
tatrastho yaḥ pramātā krimisarvajñādirantato vā, sa eva kumbhakṛt; tasya 
ābhāso ghaṭo'yamiti vimarśaviśrāntaḥ prakāśastadeva prakṛtaṃ sāraṃ 
rūpaṃ yasya ghaṭasya, taṃ janayati ayam iti īśvaraḥ | evam iti 
niyatiśaktyā tatrasthapramātrābhāsamayaṃ ca | anyataḥ iti 
kuvindatantvādyābhāsasāmagryāḥ | evaṃ prāthamakalpike ghaṭābhāse 
bhagavatā nirmite tasyaiva ābhāsasya anuvartamānatā yā, sā sthitiriti 
upapādyate | tataśca iti sṛṣṭeranantaram | tat iti 
kumbhakṛddaṇḍādyābhāsanāśe'pi taṃ nirmitaṃ 
ghaṭādyābhāsaprapañcaṃ deśāntaragatapramātṛviśrāntyā 
tadābhāsasāhityena janayati, tatsāhityamasya sṛjati, ghaṭābhāsasya ca 
sthitiṃ karoti, pūrvapramātṝṇāṃ ca tadābhāsavattāṃ saṃharati | 
yathoktaṃ granthakṛtaiva 

sadāsṛṣṭivinodāya sadāsthitisukhāsine |
sadātribhuvanāhāratṛptāya bhavate namaḥ || (śi. sto. 20|9)

iti, śrīparameṣṭhinā api

(page 150)

	pañcaprakārakṛtyoktiśivatvānnijakarmaṇe |
	pravṛttasya nimittānāmapareṣāṃ kva mārgaṇam || (śi. dṛ. 1|13)

iti,

	....................ṭāśca nityamavasthitāḥ |
	sarantyeva svabhāvena tatsaratprakṛtiḥ śivaḥ ||

iti, bhaṭṭaśrīnārāyaṇena api

	pratikṣaṇamaviśrāntastrailokyaṃ kalpanāśataiḥ |
	kalpayannapi ko'pyeko nirvikalpo jayatyajaḥ || (sta. ci. 120)

iti | nanu kimarthaṃ madhye deśāntaranayanādi ābhāsyate | āha 
niyatiśaktyā iti | yadā kumbhakāragṛhāt ghaṭasya anyatra nayanaṃ, tadā 
eṣa vṛtāntaḥ, yadātu pramātrantarāṇāmāgamanaṃ, tadā ko vṛttāntaḥ | 
āha pūrvadeśa ityādi | tāvatyaṃśe iti ghaṭābhāsāṃśe | 
antaḥpraveśanena iti prakāśasya ekībhāvena | anena krameṇa 
ghaṭādyābhāsān teṣāmāgatānāṃ pramātṝṇāṃ grāhyān karoti, 
tāṃśca pramātṛṃśca tadgrāhakān | nanu bhinnatvāt pramātṝṇāṃ 
pramātrantarameyo [kha. mayaḥ pāṭhaḥ |] ghaṭābhāso yaḥ sthitaḥ, sa 
kathaṃ pramātrantaramupasaṃkrāmet | atra āha tattvata ekarūpatvāt iti | 
etat na apūrvam, pratyuta bhedo'yamāgantuka iti bhāvaḥ | kuta iti | 
cidrūpasya hi asāvābhāsaḥ | sarve ca te citsvabhāvāḥ | nanu evaṃ 
śarīrābhāsā api na kathaṃ parasparataḥ | ka evamāha neti | tadāha 
yāvatkiñcit iti | pramātṝṇāṃ saṃbandhi yāvat bāhyendriyavedyaṃ, 
tāvat sādhāraṇaṃ śarīrādi, na punaranyat, tattu asādhāraṇaṃ 
sukhasaṃkalpādi | prameyāṇāṃ ca saṃbandhi yāvat bāhyendriyavedyaṃ,

(page 151)

tāvat sādhāraṇaṃ rūpādi, anyat tu asādhāraṇaṃ rasādi | tadāha 
kevalaṃ tu iti | āntaraṃ spraṣṭavyaṃ śūlādiduḥkhamantaḥ- 
kandahṛttālunāḍīsparśasukhaṃ vā samādhānakālasaṃvedyaṃ 
[sasādhanā pāṭhaḥ |] bindunādādirūpaśabdātmakaṃ, viṣayavatī vā 
pravṛttiriti kathitam | gandhādi api tadvat niyatiśaktyā ekasminnekasmin 
māyīyapramātari niyamena sthāpitam, mantreśvarādipramātrapekṣayā tu 
sādhāraṇameva,- iti māyīyapadena āha | kṛtam iti niyatyā | tena tarhi 
parasu(mu)khādinā parasya kathaṃ vyava(vyā)hāra ityāha | nanu 
ghaṭābhāso devadatte viṣṇumitre ca tulya iti bhavatu ekaḥ, 
vyāhārābhāsastu [ka. vyavahārā pāṭhaḥ |] vyāhartari- vyāharāmi,- iti, 
evaṃ śrotarivyāharati,- iti; tat kathamanayorabhedaḥ, bhede ca anumānaṃ 
na yuktam,- iti uktaṃ vitatya vāsanāsūtre | satyaṃ, itthaṃ tu etat 
saṃgacchate iti vibhāvyatām- iha yāvat kiñcit bāhyendriyagocarīkāryam, 
tāvat sarvaṃ sādhāraṇameveti uktam- evaṃca śrotrapathagāmī yo'sau 
ghaṭamānaya,- iti śabdaḥ, sa tāvat vyāharaṇaśabdavācyo dvayorapi eka 
eva avabhāsate | tataḥ svātmīyavyāhārābhāsavadeva vastutastāvat 
svasaṃvedanenaiva avikalpako'pi bhāti, vikalpe tu 
svaparavibhāgasaṃskārāt paratā adhyavasīyamānā api 
vyāharaṇābhāsamātreṇa anyathā bhāvādakiñcitkarī nīlasya iva 
sthiratā | vyāptigrahaṇakāle'pi tenaiva vyāptiḥ | tato viśiṣṭādābhāsāt 
taccharīrasahabhāvinīṃ vyāhareyamiti 
icchamasmadarthaviśrāntāmanumimīte | tathāhi asya pratipattiḥ- atra śarīre 
vyāharāmīti ābhāsaḥ kevalaṃ śarīrapramātṛtābhimānadārḍhyāt, 
taccharīraṃ paratvena abhimanyamānastadācchuraṇāt 

(page 152)

vyapadiśati- ayaṃ vyāharatīti | vastutastu na anumeyatā parapramaturapi,- iti 
upapāditamupoddhāta eva 

	tatra jñānaṃ svataḥ siddhaṃ ..................... | (1|1|5)

iti sūtre | vāsanāprabodhasūtre'pi uktaṃ tadevaṃ 
buddhisamīhāyuktapramātravicchinnāt ityādi | tata idaṃ 
vyāhāramātrasādhanamanumānaṃ [ka. vyavahāra pāṭhaḥ |] maulike 
siddhe svasaṃvedane, ābhāsamelanātmakaṃ ca idaṃ vyāharāmi, 
vyāharati,- iti ubhayamapi | ekamahantābhāsena, aparaṃ dehābhāsena 
vyāharaṇābhāsādhikena miśraṃ yataḥ, tatastadadhikābhāsaparihāre yat 
vyāharaṇābhāsarūpamekatayā cakāsti, tadeva hetūkartavyam | tacca 
ekarūpameva, natu vijñānanaya iva bhinnasvabhāvamiti na kaścana 
virodhaḥ | niyatiśaktau ca bāhye'rthe vāsanāprabodhaḥ, karmādhipatyaṃ 
prathamecchākāraṇābhāsa [ka. karaṇa pāṭhaḥ |] upasarpaṇābhāsaḥ 
pramātrābhāsa ityapi tattadapekṣayā kāraṇaṃ nirvahatyeveti | atra codayati 
nanu ca iti | ayaṃ bhāvaḥ- iha tāvat pramātari pūrvamavasthito 
ghaṭābhāsaḥ, tena miśrībhavati pramātrantaramiti kimanena | āśveva 
pramātrantaravijñānasaṃkrānto'nena ghaṭābhāso janyatāṃ, tāvatā 
siddhaṃ pramātrantarasya yugapadabhimataghaṭābhāsavattvamiti 
kimalaukikapramātrabhedābhyupagamasāhaseneti | atra āha naitat iti | 
upapattiṃ smārayati uktam iti | ayaṃ bhāvaḥ- sa pūrvapramātari sthita 
ābhāsastasya pramātrantarasya saṃvedyaḥ san vā 
kāraṇamātmavartighaṭābhāsodaye syādasaṃvedya eva vā | na tāvat 
saṃvedyaḥ san, tatsaṃvedanopāyābhāvāt | santānāntarānumānena hi 
tatsaṃvedanaṃ, tacca na ghaṭate iti bāhyārthavādinaiva upapāditam | atha 
asaṃvedya

(page 153)

eva kāraṇaṃ, tat santānāntarāṇāmaviśeṣāt sarve tadābhāsā janakā 
bhaveyurityādipūrvoktadoṣāpattiḥ | tadāha atiprasaṅgāt iti | evaṃ 
bodhamātraṃ nīlādityetasmāt 
sopānādekabodhamātrarūpatvasopānāntaraṃ [ka. sopādānāt pāṭhaḥ |] 
samāruhya ūrdhvadharāyāmaiśvaryamāsādayituṃ [kha. 
ūrdhvadhārām pāṭhaḥ |] praśnaṃ karoti nanu evam iti | ādhipatyena iti | 
na atra kāraṇatā mantavyā, apitu tatsattāmātram | ekarūpavāde hi kaḥ 
kāryakāraṇabhāvaḥ | yadivā 
tadamilitapūrvapramātrābhāsādanyonyasaṃmilitapramātrābhāso jāyate 
ityāśayena adhipatiriti kāraṇaviśeṣa eva uktaḥ | atiprasaṅgadoṣaśca 
aikyamātreṇa parihṛta iti darśayati na caivam iti | pūrvasūtroktaśca doṣo na 
avatarati,- iti darśayati na cāpi iti | atra āha etadapi nāsti iti | na 
saṃbhavatyeva idamanīśvararūpatvaṃ saṃvida iti yāvat | saṃvido hi 
idameva jaḍavailakṣaṇyaṃ- yadaparichinnaprakāśatvam | nīlatayā api 
bhāti, pītatayā api bhāti,- ityādinā ca bhinnānāṃ vastūnāmutpattyā 
vyaktyā vā kāryakāraṇatā upapannā,- iti vitaniṣyate kriyādhikāre | tataḥ 
sā api parameśvareṇaiva nirbhāsyate svapna iva ghaṭakulālayoḥ | 
niyatiśaktyā ca mṛdādyābhāsamukhena vā ghaṭāditayā loke, 
mantrauṣadharatnābhāsadvāreṇa vā śāmbarikavṛtte, 
dhātuprakopamitrādyābhāsapūrvakatvena vā 
timirasvapnādāvicchāmātrodbhāsanapuraḥsaraṃ vā yoginirmāṇe sa eva 
prakāśate,- iti | etat tāvadaiśvaryamiha darśitam, pūrvaṃ ca 
ābhāsasaṃyojanādinā smṛtyādau svātantryam, anyadapica agrato 
darśayiṣyate | tataḥ saṃvit cedekā siddhā, tadaiśvaryamapi asyā 
eṣṭavyamanyathā svabhāvaviruddhajaḍatvaprasaṅgāt | 
saṃvidīśvararūpā saṃvittvādeva,-

(page 154)

iti svabhāvahetuḥ | saṃvideva viśvakāraṇamanyāsaṃbhave tatsaṃnidhau 
tadudbhāvāt | ata eva yat cittattvasya aiśvaryamuktaṃ, tato 
hetoryogidṛṣṭānta upāttaḥ | kimartham | āha iti darśayitum | kiṃ tat | āha 
saṃsāriṇām ityādi | anyathā ityādinā upabṛṃhaṇaṃ karoti | 
upādānam iti prasiddhakāraṇasāmagrīṃ vineti yāvat | naca avastutvaṃ 
yoginirmāṇasya, nacāpi prasiddhakāraṇajanyavastvapekṣayā | 
anyajātīyatvamiti darśayati arthakriyākārī iti | yogi hi abhisandhatte- 
prasiddhārthakriyopayogayogyameva ghaṭarūpamullasatu- iti | 
tadetadalaukikamiti nirūpayati keśa iti | naca tatra avastutvaṃ 
keśaturagādivimarśasya bhāvāt | arthakriyā api tatra hlādodvegādikā 
astyeva keśāntarasādhyā nāsti arthakriyā iha | sā ca pramātuḥ saṃmatā 
sattvavyavahārakāraṇatayā hanta jalanidhijalamasat syāt, 
sāmagryantarapraveśāt na tathā,- iti tulyam | stambhito hi agnirna dahati, na 
pacati | naca arthakriyātaḥ sattvamābhāsāntaratvāt tasyā ityādi 
uktaprāyam | tadabhāve'pi na ābhāsasya avastutvam,- iti ca vakṣyate 

	arthakriyāpi sahajā nārthānāmīśvarecchayā |
	niyatā sā hi tenāsyā nākriyāto'nyatā bhavet || (2|3|12)

iti | etat nirūpayati tadevam iti | nanu arthajātam iti jātaśabdena 
sāmastyaṃ svīkṛtam | naca samastamīśvaraḥ prakāśayati | sa hi mahāsarge 
sṛjyamānamarthaṃ prakāśayet, madhye'pivā prathamotpādāvasthāyām | 
vyavahārakāle tu yadarthajātamābhāsate, tadavasthitameva | atra ucyate 
yāvacca iti | utpādakāle iti mahāsarge kāraṇābhāsāpekṣayā vinā, 
tayā tu saha prathamotpattikāle

(page 155)

vyavahārakāle veti pramātrantarebhyo viśleṣya anyairmelayati,- iti 
vyākhyātaṃ sadāsṛṣṭivinodāya iti | vivṛtam iti 
vṛttāvartharāśiśabdena jātaśabda evaṃbhūtārthavādī vyākhyāta 
ityarthaḥ | artharāśiḥ iti yo vṛttau granthaḥ, sa yāvacca kiṃcit ityādinā 
sarvo'rthaḥ ityantena ṭīkāgranthena vivṛtaḥ,- iti vyākhyānaṃ na yuktaṃ 
vivṛtikārasya svoktivyākhyāne'pramāṇaucityāt || 7 ||

	nanu paraniṣṭhatvaṃ niyamena yadābhāti, tat dvidhā dṛṣṭaṃ kiṃcit 
sadṛśātmakasaṃkramitaṃ darpaṇe iva gajādi, kiṃcit svaśaktibalollasitaṃ 
tadeva svapnasaṃvedana iva | tadidaṃ na niścayārhaṃ- kiṃ 
svapnayogadiśā ābhāsavargo bodhasvātantryādullasitaḥ, uta 
ādarśadṛśā tadatiriktasvasadṛśabhāvāntarasaṃkramaṇabalāt,- 
ityāśaṅkya kāryavyatirekeṇa samarpakabāhyabhāvānumānaṃ 
sūtrāntareṇa nirākartuṃ tātvikamanumānavṛttaṃ tāvadāha 

	anumānamanābhātapūrve naiveṣṭamindriyam |
	āabhātameva bījāderābhāsāddhetuvastunaḥ || 8 ||

	yat kiṃcidanumānaṃ, tat samagraṃ vikalparūpam | vikalpaśca 
ananubhūte na udeti | etacca sarvavādināmiṣṭam | nanu 
indriyādṛṣṭaprabhṛti yadanumīyate, tatra kiṃ vṛttapūrvo'nubhavaḥ | 
satyaṃ vṛttapūrvo yata indriyādṛṣṭaprabhṛti na kenacit viśeṣarūpeṇa 
anumīyate, apitu sāmānyena dṛṣṭarūpālokādhikaṃ kiṃcit kāraṇamiti | 
tatra mṛjjalayoḥ saṃnihitayorabhavannaṅkuraḥ, sa hi sati bīje bhavan, 
daṇḍacakrayoḥ satorasan ghaṭaḥ, sati mṛtpiṇḍe bhavan, 
tadadhikabījahetukastadadhikamṛtpiṇḍahetuka iti krameṇa 
pratyakṣānupalambhajo niścayo jāyate | tatra ca kāraṇatvaṃ nāma 
sāmānyamakāraṇavyāvṛttamanadhikavyāvṛttaṃ

(page 156)

ca adhikatvaṃ pratyekaṃ vyāvṛttiniṣṭhāt pratyakṣavyāpārāt gṛhītameva 
| bījaṃ hi tatra kāraṇarūpaṃ vastu iti gṛhītam | anyathā ekatra bīje 
kāraṇaśabdaḥ saṃketito, na mṛtpiṇḍādau saṃketito bhavet | tasmāt 
kāraṇatvābhāsasāmānyaṃ [kha. kāraṇabhāsa pāṭhaḥ |] 
pūrvapratyakṣasvīkṛtam | tatastatra yuktaṃ vikalpanam | vikalpanaviśeṣa 
evaca anumānam | anumānamanābhāte viṣaye na bhavati vikalparūpatvāt | 
anābhāte hi arthe bhavadapūrvasaṃvedanaṃ nirvikalpaṃ bhavet, 
tadviruddhaṃ ca idamiti svabhāvaviruddhopalabdhiriti sūtrārthaḥ | 
prathamaṃ sūtrabhāgaṃ gamyamānārthanirūpaṇena sphuṭayati vṛttikṛt 
pūrvāvabhāta ityādinā anumānam ityantena | 
pūrvāvabhātāntaḥsthitaḥ iti pūrvakāleti samāsaḥ | 
pūrvaśabdopādāne'pi hi antaḥsthitatvasya avarakālatāvṛttirvyaṅgyā | 
naca vimarśanamātramanumānam, apitu 
prāptipravṛttiyogyavastuniścayarūpam,- ityāha nāntarīyaka ityādi | 
ābhāsaḥ punaḥ ityādibhaviṣyatsūtraviśrāntāvetasya sūtrasya 
tātparyamityāśayena bhāvisūtrārthopakramameva etatsūtramavatārayati 
bāhyasya iti | yuktigataiḥ sāṃśatvaprasaṅgādibhirbādhitatvamanāśritya 
api parīkṣakasaṃmatameva pratyakṣamiti anādṛtya api hālikavedyatayā api 
na pramāṇasiddhatvamastīti āśayaḥ | bhāvisūtre ca anumāne 
dūṣyamāṇe pratyakṣamapi dūṣitameva,- ityabhiprāyeṇa āha 
ṭīkākāraḥ pratyakṣeṇa tāvat iti | eka eva hi nīlābhāsaḥ | sa ca 
jñānavartī, aparathā kathamābhāseta | ekasāmagrīkatvamapi na parasya 
paraniṣṭhatāṃ kuryāt rūparasādīnāmiva | rūpameva asya saṃvedanasya 
tādṛgiti cet, aho svopagamasamarthanagrahaḥ 

(page 157)

parasya- yat sāmānyaprabhṛtau yaḥ svayaṃ paramāstrīkṛtastaṃ 
viruddhadharmādhyāsamanastaṃ manyate | tadayaṃ jñānādavyatirikta 
ākāraḥ | tatra samarpako'nyo na [kha. vā na pāṭhaḥ |] avabhāsate 
darpaṇagate yathā | yacca uktaṃ samānābhihārāt na pṛthak bhāsate iti, tat 
na | samānābhihāre hi pṛthagābhāsanaṃ tāvadasti anyathā kalakalatāyā 
eva anupapatteḥ | pṛthaktvena tu nāsti ābhāsanam, iha tu samarpakasya 
pṛthagābhāsane pṛthaktvena ca anābhāsane kalakalavat militarūpaṃ 
nīlarūpaṃ nīladvaiguṇyaṃ bhāseta | deśakālādi api samānameveti cet, 
atra api dvaiguṇyaprasaṅga eveti sākāratve doṣa eva | sati bāhye 
nirākāraśca na grāhaka iti uktam | yacca uktaṃ pratyakṣato'pi sidhyet iti 
anumānena sasaṃvādaḥ kṛtaḥ iti natu kṣaṇikatvavadapūrvaḥ prasādhitaḥ 
iti ca, tatra api ucyate | pratyakṣasya yadyapi adhyavasāyāpekṣaṃ 
prāmāṇyamiti ghoṣyate, tathāpi tatra ayaṃ paramārthaḥ- pratyakṣaṃ 
pramāṇaṃ nīlābhāsarūpatayā svasaṃvedane sphurat 
siddhapramāṇabhāvameva vikalpena tathā vyavahriyate | tata eva 
vikalpastadaparigṛhītaṃ sthairyādi adhyavasyannapi na tatra pramāṇam, 
adhyāpi ābhāsayāmi iti hi pratyakṣavyāpāramanukurvan vikalpaḥ- 
sadamātyakavikalpasvātantryeṇa na prāmāṇyamupāśrayate | 
tadayamagṛhīte gṛhītatvena adhyavasāyamutthāpayan pramāṇaphalatvāt 
niṣkāsyetaiva | yaduktaṃ bāhyārthapratibandhabalāt pratyakṣasya atra 
prāmāṇyamiti, tatra api pratibandhasya grahaṇaṃ na vā | yadi grahaṇaṃ, 
tarhi pratibandhagrahaṇādutpadyamānaṃ saṃvedanamanumānameva 
niścayātmakaṃ bhavet, na pratyakṣaṃ tatra tat syāt | anumānaṃ ca 
vicāryaṃ vartate | atha vastutaḥ pratibandho'sti,- iti ucyate, tat siddhe 
bāhye'rthe bhavedeṣā 

(page 158)

vārtā | sa ca na adyāpi siddhaḥ,- iti kaḥ pratibandhārthaḥ | naca vastutaḥ 
pratibandho'sti,- iti pratyakṣamarthe pramāṇam, apitu sākṣātkāritvāt; 
anyathā cakṣuṣi api tat pratyakṣaṃ bhavet |

	arthasyāsaṃbhave'bhāvāt .................... |

iti tu arthajatvasiddhaye'nvayavyatirekoktiḥ, [kha. arthajasiddhaye pāṭhaḥ |] 
arthajatvāt ca arthasākṣātkāritvamasyeti | evamarthāvinābhāvamūlaṃ 
prāmāṇyaṃ dvayoruktam | artha eva tu iha asiddhaḥ | atha ālokasya atra 
pratyakṣo bāhyo'rthaḥ,- iti asti abhimānaḥ, sāṃvyavahārikaṃ ca 
pramāṇaṃ cintyate,- iti ucyate; tat sthairyasāmānyadravyaprabhṛti 
aśeṣālokasiddhaṃ kiṃ na aṅgīkriyate | tatrāpi mūḍhāḥ pare 
visaṃvādayanti iti ca tulyam | yattu sadṛśamarpakaṃ [ka. 
sadṛśasamarpakaṃ pāṭhaḥ |] dṛṣṭaṃ darpaṇādipratibimbasya iti uktaṃ, 
tatra ubhayamapi bimbapratibimbātmakaṃ [kha. viśva pāṭhaḥ |] 
paramārthataḥ saṃvidākāramātraṃ svapna iva darpaṇasaṃkrāntadarpaṇa 
iva ca | tatra kiṃ kena arpitamiti na niścitaḥ kalpaḥ | kiṃca arpakeṇa vinā na 
upapadyate jñānagata ābhāsa iti ucyamāne, svapnadvicandrādau kiṃ 
vācyam | na cāpi darpaṇadṛṣṭānto'tra samaḥ | iha hi 
saṃvedanādupādānāt viṣayāt ca nīlākāro bodha utpadyate | tadā tu 
evaṃ darpaṇāt gajāt ca gajākāro darpaṇa iti yuktam | apete'pi gaje 
darpaṇasya svasadṛśasantānānubandhinā 
taḍitsadṛśasadṛśaikasvabhāvānanubandhisantānavijñānalakṣaṇena 
vapuṣā avasthitasya mṛtpiṇḍasya iva 
daṇḍacakrādisahakārikalāpaprasādopanataśarāvarūpatā [kha. pramāda 
pāṭhaḥ |] gajākāratā anuvartate | 
evamavibhāgasantatijananamaniṣṭaśaktikakāraṇāntarasaṃnidhānāvadhiḥ 
samarpyasamarpakatā ca darpaṇagajayostulyakālakṛtaiva |

(page 159)

tata eva na pāramārthikaḥ kāryakāraṇabhāvo'yam, apitu 
bimbapratibimbavyavahāraḥ | tata eva vibhramo'yam, na paramārthaḥ,- ityapi 
asti pravādo yo jñānākāre na kenacidadyāpi kriyate | prakṛte tu 
jñānārthayoḥ kāryakāraṇabhāvo'stīva, tata eva hi grāhyasya 
pūrvakālabhāvitvam | yadāha

	bhinnakālaṃ kathaṃ grāhyamiti cedgrāhyatāṃ viduḥ |
	hetutvameva yuktijñā jñānākārārpaṇakṣamam ||

iti | naca grāhyaṃ bhinnakālatvena cakāsti idamahaṃ gṛhṇāmīti 
tulyakālatayaiva adhyavasānāt | jñānākārasya pratibimbābhāsasya idaṃ 
tulyakālatvamadhyavasīyate iti cet, mūḍha kathamuktavānasi- 
bāhyākāro'dhyavasīyate, adhyavasāyabalācca pratyakṣasiddhatā 
bāhyasya- iti, prācyaśca viṣayakṣaṇo'rpakābhimatastatsadṛśa iti kutaḥ | 
darpaṇapratibimbe hi bimbamapi upalabdhamiti niścitaṃ sādṛśyamātre, iha 
tu bimbasya nāma api na avagatam,- iti kathametattulyatā bhavet | tasmāt yadi 
anumānāt pūrvaṃ vyāpariṣyeta atra pratyakṣaṃ, tat 
pāścāttyamanumānaṃ saṃvedakatāyāṃ [ka. saṃvedanatāyāṃ 
pāṭhaḥ |] yojyeta nāma; natu evamasti,- iti | tadāha 
ābhāsadvayābhāvāt iti | nanu mā bhūdābhāsadvayam, tathāpitu 
bāhyasya anābhāsamānasya api pratyakṣagamyatā bhaviṣyati 
anumānagamyataiva | na, etattulyamiti brūte ābhāsamāna iti | paśyāmi 
etaditi hi ābhāsamānataiva pratyakṣaprameyatā | nanu iyamekasya tāvadasti 
nīlasya, tataḥ pratyakṣasiddho nīlaḥ | sa evaca bāhyo bhaviṣyati | kiṃ 
dvitīyanīlābhāsānveṣaṇena | atra api āha bhinnasya iti | etacca

(page 160) 

	..............................ṇāprakāśaśca sidhyati | (1|5|3)

iti vitatya nirūpitamadhastāt | etena arthakriyākāritvādabādhito nīlaḥ kiṃ 
bāhyastyajyate ityapi pratyuktamarthakriyāyā api bāhyāyāḥ 
kasyāścidasiddheḥ | pravṛttyābhāsaprāptyābhāsavastvanābhāsādaya 
eva hi vyāvahārikāḥ, na adhikaṃ kiñciditi pratyakṣeṇa bāhyasya asparśe 
anumānamapi daṇḍāpūpikayaiva na saṃbhavati,- ityāha nāpi iti | 
dhūmāgnyoranupalambhāvagnerupalambho dhūmasya 
anupalambho'gnyupalambhāduktādeva dhūmasya upalambha ityevaṃ 
pratyakṣadvayena anupalambhatrayeṇa ca sakṛdeva kāryakāraṇatā 
vyavasthāpyate | tatrāpi anupalambho'pi anyopalambha eva,- iti 
pratyakṣavyāpārādeva akāraṇatā vyavasthāpyate bhāvasiddhiḥ(ddheḥ) | 
naca bāhyo'rthaḥ pratyakṣa iti tena saha kasyacidapi na 
kāryakāraṇabhāvasiddhiriti tasminnanumeye na jñānaṃ kāryahetuḥ | atha 
nīlasya svabhāvāntaraṃ bāhyatvaṃ sādhyatāmarthakriyākāritvādinā 
svabhāvahetunā,- iti | tatrāpi āha apratyakṣa iti | apratyakṣo dharmī yasya 
sādhyasya, tasya svabhāvaheturapi kathaṃ sādhakaḥ | pratyakṣagrahaṇaṃ 
pramāṇopalakṣaṇam | pramāṇasiddhe hi dharmiṇi siddhena 
tanmātrānubandhinā [bandhena kha. |] svabhāvena svabhāvo yo vyāptaḥ, 
sa tanmātrānvayinaṃ sādhayati dharmamiti | iha ca nīlameva [iva kha. |] na 
kiṃcana svatantraṃ prasiddhaṃ pramāṇena, yasya 
dharmiṇo'rthakriyākāritvākhyena dharmeṇa tanmātrānubandhī 
bāhyatālakṣaṇaḥ svabhāvaḥ sādhyate pramāṇena aprakāśasya 
prakāśanāyogāt | prakāśātmatve ca sarvaṃ dharmi 
sādhanasādhyarūpaṃ saṃvidavyatiriktameva sidhyediti | anenaiva nyāyena 
vijñānanaye santānāntarasiddhirayukteti sūcitam | tathāhi tatra caitrasya yo 
maitraśarīrābhāsaḥ 

(page 161)

pratyakṣastatraiva cet santānāntaraṃ pramātṛrūpamanumīyeta, tarhi 
pramāturanumeyasya iyattāvyavasthā [iyattvā kha. |] na bhavet | 
anumātṛsaṃkhyayā hi tadanumeyāḥ pramātāraḥ syuḥ | atra 
maitrātmaniṣṭho yo maitraśarīrābhāsastatraiva 
sarvairanumātṛbhirbuddhisantāno'numīyate | tat siddhe tasmindharmiṇi 
bhavedadaḥ, tasyaiva tu kathaṃ siddhiranadhyakṣatvādanumānasya ca 
cittārūḍhatvāt | nanu [nanu nīlaṃ ka. pāṭhaḥ |] na nīlamatra 
dharmīkriyate, nāpi tasya saṃvedanātiriktatvaṃ dharmaḥ sādhyate; kintu 
svasaṃvedanasiddhasya nīlābhāsavijñānasya aparidṛṣṭena bāhyena 
hetunā sahetukatvaṃ sādhyate | tena ca yadyapi vyāptirna gṛhītā, tathāpi 
kāryavyatirekeṇeti kādācitkatayā yadidaṃ kāryaṃ nīlābhāsaṃ 
vijñānaṃ, tat tathābhūtamadhikaṃ [adhika kha. pāṭhaḥ |] hetuṃ vinā na 
upapadyate,- ityevaṃ niyamavato vyatirekāt sāmānyamukhena api anvayaḥ 
sidhyati eva | tatra āha tathāpi iti | yadi tāvadadhikaṃ hetumātraṃ 
sādhyate, tat kāpilābhyupagatasaṃvinmātrasvabhāvādhikaṃ 
saṃvidaiśvaryamicchātmakamurarīkṛtameva kāraṇatayā svātantryaṃ 
nāmeti siddhaṃ sādhitaṃ syāt | athāpi saṃvidbāhyatāviśiṣṭaṃ 
tadadhikaṃ sādhyate | tadanupapannaṃ saṃvidbāhyasya svapne'pi 
anābhātasya vikalpyatvāyogādanumeyatā anupapannā yataḥ | iyatā 
anumānam ityādi saṃkṣepeṇa vyākhyātam | indriyam ityādi vyācaṣṭe 
cakṣurādeḥ iti | pūrvābhāte eva anumānam,- ityetat sādhayituṃ 
tāvadāha anumānaṃ hi iti | yata evaṃ, tasmāt yuktaḥ sūtrārthaḥ | nanu 
vikalpamātrameva kimanumānam | netyāha avyabhicārī iti | 
svabhāvahetunā tādātmyādeva tatpramāṇarūpaṃ sādhyaṃ siddhameva 
sat vyāmohādavyavahṛtaṃ vyavahāryate paraṃ lokaḥ | kāryahetunā tu 
apūrvaṃ sādhyate,- 

(page 162)

iti tatraiva anumānasya svatantraṃ prāmāṇyam | kiṃca 
kāryakāraṇabhāvamūla eva svabhāvaheturiti vakṣyate

	................ṣvabhāvo vāta evotpattimūlajaḥ | (2|4|11)

ityatra | tat kāryahetoreva sarvo hetuprapañcaḥ pallavaprāyaḥ,- ityāśayena 
kāryapadam | tasya anumānavikalparūpatāyāmapi prāmāṇyaṃ 
sādhayitumāha tacca iti | anumānaṃ kartṛ prathayati iti saṃbandhaḥ | 
naca tāvatā iti antaḥsthitasaṃskāraśeṣasya 
bahīrūpatāvabhāsanalakṣaṇena vicchedamātreṇa ābhāsitena api 
viśiṣṭau deśakālau vinā 
kāyīyavyāpāraparyantapravṛttijananamanumānena na kṛtaṃ bhavet,- iti 
viśiṣṭadeśakālāliṅgite'rthe pravṛttiyogye yat vikalpanaṃ, tat 
pramāṇarūpamavisaṃvādakatayā anumānamucyate; anyattu 
padārthamātra eva [eva vaikā kha. pāṭhaḥ |] ekākini 
asaṃbaddhapadārthasamūhe vā saṃbaddharūpe'pi 
pūrvānubhūtānadhike vā adhike'pi vā bahirasaṃnihite sannihite'pivā 
niyatadeśakālayogāt kāyīyapravṛttyayogye 
padārthasvabhāvavyavasthātmakamanovāgvyāpāralakṣaṇapravṛtti-
kartavyatāyāṃ ca pratyakṣātmake pramāṇāntaramahimānamāviṣkurvati 
yat vikalpanaṃ- ghaṭa iti, daśa dāḍimānīti, sa rasa iti, nadyāstīre iti, yatra 
dhūma iti; na tat pramāṇaṃ pravartakatvāyogāt | etadvilakṣaṇaṃ tu 
anumānamiti darśayati eṣa punaḥ iti | vyāptivimarśāt iti yatra 
dhūmastatra agnirityasmāt | nanu dharmiṇi yo'gniḥ saṃbhavati tāvadatreti 
ayogavyavacchedāt, sa vyāptivimarśena svīkṛtaḥ sāmānyena 
vyāptergrahaṇāt; tatreti dharmyaṃśena ca viśeṣeṇa tadviśiṣṭo'gniḥ 
sādhyate,- iti viśeṣo'numeyaḥ syāt, na sāmānyamiti 
sāmānyaviṣayamanumānam

(page 163)

iti hīyeta;- ityāśaṅkya āha dharmapratyakṣa iti | anvayavyatirekavat 
pakṣadharmatā api nāma tṛtīyamaṅgamanumānasya | sā ca pratyakṣeṇa 
adhunātanena [adhunā tena kha. pāṭhaḥ |] gṛhītā,- iti 
pratyakṣavikalpānugṛhīto vyāptivikalpo'numānasya na 
viśeṣaviṣayatāmanayati viśeṣāṃśasya pratyakṣasiddhatvāt, 
ādhārādheyatāyāśca vyāptau sāmānyena sphuraṇāt yatra yatra iti | 
indriyam ityādi vyācaṣṭe pūrvānubhūtameva ityādinā | nanu 
kathamindriyamanubhūtam, nityaparokṣaṃ hi tat | atra āha nahi iti | nanu 
bījasya, mṛdaśca nimittatājñāne kathamanyadīyā nimittatā jñātā syāt, 
- iti śaṅkāṃ vārayati nahi tatra iti bījasya nimittatājñāne | uttaratra iti | 
nanu kumbhaṃ prati mṛdo nimittatājñāne bījamapi nimittabhāvena 
svīkṛtamiti kutaḥ | atra ucyate prasakta iti | prasaṅgaśca 
kāraṇatāsāmānyapratibhāsasamutthāpitaḥ iti bhāvaḥ | nanu 
viśeṣasaṃvedanāvasare kathaṃ sāmānyaṃ saṃviditaṃ syāt | kathaṃca 
na syāt, pratyuta viśeṣoparañjakataiva jīvitaṃ jāteriti uktaṃ 
sarvajñasyāpi jātiḥ prakāśamānā ityatra avasare | saugatānāmapi 
prativyāvṛttyadhyavasāyaḥ [vṛttyādhyava kha. pāṭhaḥ |],- iti 
tadvyavahriyamāṇapramāṇabhāvasya pratyakṣasya 
ekaikavyāvṛttiviśrāntataiva | ihāpi pratyābhāsaṃ pramāṇe vyāpāra iti 
vakṣyate 

	.............................ḍeśakālādyabhedini |
	ekābhidhānaviṣaye mitiḥ ................... || (2|3|2)

iti | pratyakṣānupalambhau hi kāryakāraṇabhāvaṃ sādhayataḥ | tatra 
pratyakṣaṃ pratyābhāsaṃ pramāṇam, anupalambho'pi 
anyopalambhasvabhāvatvādevam | ābhāsa evaca sāmānyamiti vakṣyāmaḥ 
| tataśca 

(page 164)

mṛdo ghaṭa iti pratyaye yat yasya niyamamanuvidhatte, tat tasya kāryamiti api 
sāmānyamavabhātameva | tataśca rūpopalabdhiryasya niyamamanuvidhatte, 
tat netramiti tatpūrvaṃ pramāṇaṃ gṛhītameva | tadeva sāmānyato 
dṛṣṭamiti dṛṣṭavyapadeśo yukta eva | tadāha samarthayiṣyate iti || 8 ||

	eṣa tu na bāhyasya asti vṛttāntaḥ,- iti kathamanumīyeteti brūte 

	ābhāsaḥ punarābhāsādbāhyasyāsītkathañcana |
	arthasya naiva tenāsya siddhirnāpyanumānataḥ || 9 ||

	punaḥśabda indriyāderapi kāraṇasāmānyena dṛṣṭāt viśeṣaṃ 
dyotayati | bāhyasya ābhāsāt 
bahirbhūtamanābhāsamānamaprakāśamānaṃ yadartharūpam, tat 
kathaṃcidapi viśeṣāntaratiraskāreṇāpi bāhyatayā anābhāsamānatayā 
naiva ābhātam | ābhātatvamanābhāsamānatā ca,- iti kathaṃ 
parasparābhāvaprāṇamekadā saṃgamayitavyamekatra | nahi bhavati 
anīlatayā idaṃ nīlamiti | tena bāhyasya na kevalaṃ pratyakṣeṇa na siddhiḥ, 
yāvadanumānenāpi | kathaṃcana iti ca āvartate | tadayamarthaḥ- 
anumānaṃ tāvat bāhye na asti, bhavatu vā; tathāpi tat saṃvedanarūpaṃ 
tāvat svasaṃvedye | vyatiriktasya ca saṃvedanamanupapannam iti uktaṃ prāk

	prakāśātmā prakāśyo'rthaḥ............................ | (1|3|5)

iti | tataśca yadapi kiṃcit pramāṇamupayācyate satyaṃ brūhi, bhedaṃ prati 
sākṣi bhava iti, tat bhedasya asatyatāṃ paśyadapakṣapātitvena 
nyāyyātpatho vicalitumaśaktamabhedameva [vidalituṃ kha. |] āgūrayati,- 
iti na kenāpi prakāreṇa prakāśabāhyasya siddhiriti sūtrārthaḥ |

(page 165)

nanu ghaṭaḥ prakāśāt bahirbhūto'pi dṛṣṭaḥ paṭaikaviṣayāt,- 
ityāśaṅkāṃ śamayituṃ vṛttau ghaṭādi iti ābhāsasya viśeṣaṇam | sa hi 
tasya prakāśa eva na bhavati,- iti yāvat | tena iti vyācaṣṭe tataḥ iti | 
apiśabdaṃ tataḥ ityanantaraṃ yojayitvā vṛttyartho vyākhyeyaḥ | na 
bhavatyeva tāvadanumānam | tato'pi iti saṃbhavato'pi anumānāt na 
bāhye'rthe siddhiriti bāhyasya iti vivakṣitaṃ sūtre padamiti vivṛṇoti 
kādācitka ityādinā | cittattvasya yadaiśvaryaṃ, tasyeti yojyam | āhatya iti 
kāraṇatāsāmānyapṛṣṭhe bāhyatātmakaṃ viśeṣaṇāntaraṃ 
ṭaṅkayitavyamityarthaḥ | saca iti bāhyatvaviśiṣṭo'rthaḥ | grāmāt 
darpaṇāt gṛhāt dehāt saṃvedanāt bāhyamiti bāhyataḥ sāmānyamekaṃ, 
tacca gṛhādbāhyamiti pratītau siddham | tataśca samarpakaṃ 
darpaṇādibāhyaṃ saṃvedanādapi setsyati kramikābhāsavaicitryāt 
hetorityāśayena pūrvapakṣayati nanu cakṣurādi iti | na idaṃ bāhyatvaṃ 
ghaṭasya grāmācca saṃvedanācca ekaṃ, saṃvedanāt bāhyaṃ hi 
asaṃvedanarūpaṃ; natu gṛhāt bāhyamagṛharūpam | evaṃ sati hi 
gṛhaikadeśaḥ kuḍyādirgṛhāntarvartyapi ca ghaṭādirgṛhabāhyaḥ syāt | 
naca evam | gṛhasaṃnikṛṣṭaṃ [ṣṭaṃ yadvat kha. |] ca yadvat bāhyaṃ 
gṛhāt, na tadvadeva saṃvedanāt tasya amūrtasya 
saṃnikarṣādideśavyavahāryatvābhāvāt | tataḥ śabdasāmānyamātreṇa 
idaṃ sādhyamekaṃ pratibhāti,- ityabhiprāyeṇa uttarayati atra ucyate iti | 
nāsīdeva iti paurvakālikamābhāsanaṃ niṣiddhamiti yo muhyet, taṃ 
bodhayati atra hi iti | loke hi atyantāsaṃbhavi [bhavyaivaṃ kha. pāṭhaḥ |] 
evaṃ vyapadiśyate- na dṛṣṭaṃ, na śrutamadyāpi tāvadetat- iti | āvṛttyā 
sūtrabhāgaṃ vivarīṣyan pūrvaṃ sūtraviṣayabhāgena [sūtrārthaviṣaya 
kha. |]

(page 166)

paradarśanābhiprāyeṇa upasaṃhāradiśā saṃkṣipati etacca iti | uktamiti 
saṃbandhaḥ | kathaṃ tasya anābhāsamānaviṣayatvaṃ parairuktam,- ityāha 
vikalpo hi iti | tamāvṛttyā sautramaṃśaṃ vyācaṣṭe adhyavasāyo'pi iti | 
punaḥśabdena paramatāt svamataṃ viśeṣavat dyotayati | uktaḥ iti 

	bhrāntitve cāvasāyasya.................... | (1|3|5)

iti 

	bhāsayecca svakāle'rthāt ................ | (1|4|2)

ityādyuddeśeṣu, vakṣyate ca

	kevalaṃ bhinnasaṃvedya ................... | (1|5|21)

ityādipradeśeṣu | bādhyam iti āvaśyake ṇyat | tato'pi iti saṃbhavato'pi 
anumānāt pramāṇāntarādapivā,- iti apiśabdārthaḥ || 9 ||

	yata evaṃ bāhye'rthe 
saṃvedanāntaḥpratibimbarūpābhāsotthāpake pramāṇaṃ na kiṃcidasti, 
tasmāt yuktamuktaṃ

	cidātmaiva hi devo'ntaḥsthitam.................. | (1|5|7)

iti | tatra tu idaṃ nirūpyam- yadi antaḥsthita eva cidātmano'rtharāśiḥ, tat 
kathamasau na bhāsate | kaḥ khalu āha sāhasiko na bhāsate iti | etadāha 
sūtreṇa

	svāminaścātmasaṃsthasya bhāvajātasya bhāsanam |
	astyeva na vinā tasmādicchāmarśaḥ pravartate || 10 ||

	co'pyarthe bhinnakramaḥ | na kevalamidamityanena vapuṣā 
nirbhāsamānasya bāhyabhāvajātasya bhāsanaṃ sakalalokasiddhamasti, 
yāvat bhagavataḥ prakāśaikarūpasya antaḥsthitatayā api bhāsanamastyeva; 
kevalaṃ bahirbhāvalakṣaṇedantānullāsādahantaucityenaiva asti 
avabhāsanaṃ

(page 167)

natu nāsti | tadabhāve hi kuvindasya paṭaṃ karavāṇi itiprathamaparāmarśe 
icchāśabdavācye yadi eṣṭavyaṃ niyāmakaṃ na syāt ghaṭasya iva paṭasya 
niṣpattiḥ, tato bhavitavyaṃ tāvadeṣaṇīyena paṭena | tadeva tasya paṭasya 
nirmāṇamiti cet, astu etat buddhibhūmāvaśuddhavidyābhūmāvapi vā | 
tatrasthatayā tu nirmāṇaṃ saṃvidavasthitasyaiva eṣyamāṇasya yuktam | 
tatrāpi cetanena aniṣṭanirdeśatvādicchāntarakalpane anavasthā | yat 
nareśvaravivekaḥ 

	nirmitsāyāṃ ca nirmeyameṣṭavyamapṛthakpratham [k katham kha. |] |
	anyathedantayā bhānādbhavennirmitireva sā ||
	tasyā apica nirmitsā prāgupeyā tathāpica |
	eṣā vārtānavasthaivaṃ tataśca prakṛte kṣatiḥ ||

ityādi | tena avaśyaṃbhāvino vimarśāt tatprakāśo'numīyate | etacca 
pūrvaṃ darśitaṃ

	bhāsayecca svakāle ........................ | (1|4|2)

ityetatsūtraṭīkāyāṃ prakāśasvabhāvaśca parāmarśo yasya iti 
vyākhyānāvasare | ātmanīva iti vṛttyā ātmasaṃsthatvamatra hetutvena 
sphuṭīkṛtam | ātmani hi nirbhāsamāne tadabhedasthitaṃ kathaṃ na 
nirbhāseta | tathāca vivarīṣyati ātmābhedaśca iti | ekaśabdena 
avaśyameṣaṇīyaniyantritayā icchayā bhavitavyamiti āha |

	cidātmaiva ............................. | (1|5|7)

ityanena sūtreṇa saha asya saṃgatiṃ karoti pramātuḥ ityādinā | 
tathocitena iti ahamityātmanā | bhāsanamastyeva iti saṃkṣipya vyācaṣṭe 
bhāsate eva iti | śiṣṭasya saṃkṣiptavyākhyā parāmarśadarśanāt 
[marśanāt ka. |] iti | pramātā ityādi iti yo'sau 

(page 168)

devaḥ iti pūrvamuktaḥ | nanu kimanena ātmasaṃsthasya iti 
ābhāsamānabhāvaviśeṣaṇena vyabhicārābhāvāt,- iti darśayati 
sarvasya iti | tataḥ iti punarucyamānādevamavagamyate- yadyapi viśvaṃ 
bhagavadātmani sadā sthitaṃ, tathāpi tacchaktyaiva 
adhyāropitapramātṛbhāvaprāṇādirūpāpekṣayā idamityapi bhedena 
bhāti; tadā tu sisṛkṣātmani parispande tat viśvamātmani samyak tiṣṭhati 
kathaṃcidapi bhedadaśāmanāśritamiti | sa ca iti artheṣvapi svayaṃ 
prakāśaḥ sarge sarvasādhāraṇe sthire cikīrṣite bhagavataḥ 
svapnabhramayorādau prārambhe pāśavasargacikīrṣāyāṃ ca 
asthirāsādhāraṇarūpāyāṃ tāvati bhagavadrūpasamāviṣṭasya iva 
pramātuḥ sraṣṭavyeṣu tattvabhuvanādiṣu teṣu teṣu ca bhāvāntareṣu 
sahajaḥ svarūpaprakāśanamātrāyātaḥ prakāśasya 
svabhāvaparāmarśaḥ,- iti nayena | vikalpanotprekṣādau tu 
pūrvānubhavabhāve prācyaprakāśaparāmarśasyaiva 
punarunmeṣādasahajo'sau prakāśaḥ,yadi vā sahajatvaṃ prakāśasya 
idantāyāḥ kathaṃcidapi anullāsādahamityevasvarūpeṇa sthiteḥ | tacca 
prathamasṛṣṭau cikīrṣitāyām | sṛṣṭasya tu sṛṣṭedantākasya madhye 
niḥstimitasya iva yadahaṃrūpatvamidaṃtvena aprakāśanāt, tat 
pūrvaprakāśāyattamiti sahajatvaṃ vimarśāṃśena prakāśāṃśena ca 
ahaṃprakāśasya yojanīyam | nanu asāvartheṣu bhavatu prakāśaḥ, ahamiti 
tu kutaḥ | āha sa ca iti prakāśo hi tāvadastyeva | naca idam iti 
nirmāṇarūpataiva tathā syāt | tatraca anavastheti hi uktam | idamiti cet 
vicchedo nāsti, tadarthādāyātamavicchedena | aviccheda evaca 
ātmaviśrāntilakṣaṇaḥ prakāśasya ahamitirūpamiti darśitam | idamiti ca 
bāhyatābhāsena [bhāsana kha. pāṭhaḥ |] yojanā

(page 169)

prakāśate | tayā ca vinā nīlamābhāsāntararūpaṃ kathamiva na bhavet, 
bāhyatābhāsasya api eṣaiva vartanā, [vārtā kha. |]- ityanena krameṇa 
sarvamidaṃ sisṛkṣābhūmau saṃskārabhūmau ca ātmani ahamiti 
prakāśamānamavasthitameva | ekāntabhedagrahagrastāstu 
nīlādīnāmabhāvameva bahirasaṃbhavadaśāyāṃ mohāt manyante | naca 
etat yuktam,- ityāha tasya iti | nīlādīnāmantaḥprakāśasya abhāve 
tadviṣayā kathamiccheti cetanocitamicchāpūrvakatayā yat nirmāṇaṃ, tat 
vighaṭate | nanu icchā astu nīlādisraṣṭavyaviṣayā, kiṃ tatprakāśena | āha 
prakāśaparāmarśayoḥ iti | icchā hi parāmarśaviśeṣa eva | 
parāmarśaśca prakāśasya svabhāvaḥ | svabhāvaḥ svabhāvinaśca 
abhāve svabhāva iti na yuktam | etacca darśitaṃ vitatya

	bhāsayecca svakāle'rthāt...................... | (1|4|2)

iti sūtre | eṣa ca iti yo nirmātṛtāmayo'bhyupagamalakṣaṇaḥ prakāśaḥ, 
saiva icchā | svasaṃvedanasiddhatvācca kaḥ sacetāḥ pratyācakṣīta 
enamarthamiti darśayati bhuñje iti | sāmānyarūpatvena yat 
bhogyagantavyādirūpaṃ grāhyaṃ, 
śarīrendriyaprāṇabuddhyādiviśeṣānullekhane ca yat grāhakaṃ 
tadābhāsato'nyonyabhidi ca yasmin manovijñāne madhyamātmani 
antaḥsaṃjalpe, tadrūpatāmaprāpta eva yaḥ prathamaḥ 
paśyantīśabdavācyaḥ icchālakṣaṇaḥ prasaro yatra pramātṛprameyayoḥ 
sāmānyarūpatayā api na vivekollāsa iti, etadvastu svayameva nirbhāsate | 
atra hetumāha yataḥ iti abhinnasya pramātṛprameyarūpasya 
anunmiṣitavibhāgasya api yadi vastutaḥ prakāśo na syāt, tat tvaritaṃ 
lipipāṭhe vegasaraṇe tvaritābhidhāne ca 

(page 170)

rekhāto rekhāntaraṃ, deśāt deśāntaraṃ, sthānakaraṇādeḥ 
sthānakaraṇāntaraṃ ca gacchatastāṃstāṃstyaktavyān grahītavyāṃśca 
bhāgānnaparāmṛśataḥ [marśataḥ ka. pāṭhaḥ |], tayośca 
tyāgopādānayoḥ kartāramavimṛ'satastāni [abhimṛśataḥ ka. |] vicitrāṇi 
tyāgopādānāni kathaṃ bhaveyuḥ parāmarśapūrvakatvena eṣāṃ 
dṛṣṭatvāt | tadimāni bhavanti svakāraṇaṃ parāmarśamanumāpayanti | 
naca asau bhedenaiva parāmarśa eṣāmiti | bhedena hi parāmarśe 
vācikamānasaparispandaparamparāto'bhilāpasaṃketasmaraṇaprabandha-
sadbhāve [parasparataḥ kha. |] tvaritataiva na nirvahet | āhaca apohe 
kvacidvāṅmanasaspandaṃ vinā ityādi | tadayaṃ prayogaḥ- 
pramātṛprameyaprakāśastyāgopādānayorasti cetanakriyātvāt,- iti 
kāryahetuḥ | yadasti, naca pṛthak; avaśyaṃ tadapṛthak tṛtīyarāśyabhāvāt, 
- iti svabhāvahetuḥ | evaṃ vācanadhāvanādi iti grantho'yaṃ 
pramātṛprameyayorabhedena api asti sadbhāva;- ityetāvati asminnaṃśe 
hetutayā vyākhyeyaḥ, natu bhuñje gacchāmi ityetadanena spṛśyate iti | 
tadāhuḥ śrīparameṣṭhipādāḥ

	yadā tu tasya ciddharmavibhavāmodajṛmbhayā |
	vicitraracanānānākāryasṛṣṭipravartane ||
	bhavatyunmukhitā cittā secchāyāḥ prathamā tuṭiḥ | (śi. dṛ. 1|8)

iti upakramya

	sā ca dṛśyā hṛduddeśe kāryasmaraṇakālataḥ |
	praharṣāvedasamaye darasaṃdarśanakṣaṇe ||
	anālocanato dṛṣṭe visargaprasarāspade |
	visargoktiprasaṅge ca vācane dhāvane tathā ||
	eteṣveva prasaṅgeṣu sarvaśaktivilolatā |

iti | atra hi tātparyametat- sarvaśaktiparipūrṇatātmakaṃ cito

(page 171)

yadrūpam, tat yadā svātantryāt saṃvitsvabhāva āmṛśati tata 
unmukhībhūtāyāṃ cidrūpatāyāṃ 
tatprasaraprathamavikāsalakṣaṇāyāmicchākalikāyāṃ sthitaḥ 
sarvāvibhāgena sthitiṃ bhāvina upayogirūpasya 
pramātṛpramāṇapramātavyavargasya vimṛśan bhāvibhedāḥ 
śaktīrabhedakalpenaiva piṇḍīkṛtāḥ satīrgolakaśimbikādivikalpena 
utthāpayati, tata evaca bhāviniyatakramakakāryaṃ jāyate | yathā ślokaṃ 
smareyamamumiti susmūrṣayā ekayaiva madhyavartiṣu varṇapadādiṣu 
pratyekasmṛtisantatiprabodhanakāraṇameṣaṇamantareṇaiva 
niyatakramakasmaraṇaparamparodaya iti | naca vācyaṃ- sarvamavibhāgena 
saṃvedanāntaḥsthitam, tat kathaṃ niyatasya kāryakalāpasya udayaḥ iti | yata 
imaṃ kāryaviśeṣamitthaṃ karomi,- iti tāvatkāryopayoginivastujāte asau 
prathamecchā bhavantī sarvaṃ tāvadupayogi vikalpayati | 
tatsaṃskārasaṃskṛtāt tu abhyāsabhāvanopakṛtapramātṛrūpāduttarottara-
bodhaspṛṣṭakāryakramodayaḥ [bhyāse bhāva kha. |] | evaṃ 
vācanadhāvanādāvapi mantavyam | yadāha śāstrakṛdeva 

	ata evābhyāsavatāmapohena vināpi tat |
	prabodhātkevalādeva jāyate bādhanādikam ||

iti | tena prathamecchāviṣayīkṛtaṃ vicitratayā tāvat kāryaṃ prasūyate 
yadi madhye tadiṣṭapratighātakamicchāntaraṃ nodeti | niyatiśaktyā ca tatra 
tatra tattat sahakāri apekṣaṇīyaṃ dhāvana iva balādi | tataśca sthitametat- 
kumbhaviśeṣaṃ paṭaviśeṣam ca cikīrṣataḥ prathamecchāspande 
kumbhakṛtkuvindādeḥ kartavyatādi nirbhāsate eva | tadatra nirṇaye 
vijñānanayadūṣaṇaprastāve yadābhāsavaicitryakāraṇatvena śaṅkitam, 
tadapi upapannameva | tathāhi mukhyatvena tadeśvarecchaiva [tadī kha. 
pāṭhaḥ |] anantasṛṣṭisaṃhāraprabandhasahasraṃ kroḍīkṛtya avasthitā

(page 172)

tasya niyatakramakasya hetuḥ | tanmadhya eva niyatiśaktyā 
śrīmatsadāśivādīnāṃ mantreśvarādīnāṃ kiṃbahunā 
brahmādīnāmicchā | tatrāpi janmābhāsasamaya eva 
ekapraghaṭṭakamilitakarmaprabandharūpasaṃvedanam | tanmadhye'pi 
prathamakāraṇābhāsaḥ upasarpaṇapratyayābhāsaḥ paryante'pi vā 
samanantarapratyayābhāsaḥ | so'pi hi 
ābhāsabhāgamilitatāvatpramātṛvargamelanājanitavicitrabhāvabhūtāt 
nīlābhāsāt bhaviṣyataśca anya eva | tata eva etat vācyaṃ- sadaiva tata eva 
nīlābhāsāt pītābhāsodayaḥ syāt- iti | nahi sa nīlābhāsaḥ kadācidapi na 
bhavati 

	muhurmuhuraviśrānta........................ | (sta. ci. 112)

iti nyāyāt | nanu evaṃ dhūmābhāsārthī kimupādattām | uktamatra 
yatraiva ābhāsāṃśe niyatiśaktyā kāryakāraṇabhāvo gṛhītaḥ, tatraiva 
upādānaṃ tadarthinaḥ | vakṣyate ca etat

	yoginirmāṇatābhāve .................. | (2|4|11)

ityatra | prathamakarmapraghaṭṭakasya api niyativadanāvalokitayaiva 
kāraṇatvam,- iti kārmamalaprastāraprasaṅge bhaviṣyati | tathāhi 
janmābhāsasamaya eva tadgatarāśiviśeṣaparispandātmakaṃ 
lagnābhāsaṃ tadānantaryāt 
tatsahabhāvaniyataniyatābhāsāntarayojanayā 
pramātrantarābhāsayojanayā ca śavalīkṛtaṃ sarvātmanā 
viduṣo'vaśyaṃ janmamadhyabhaviṣyadanantāśeṣābhāsasākṣātkāra 
eva bhavati | paramārthato hi 
tattanniyatadeśakālāvasthitavicitrābhāsaśarīratāsvīkṛtavaiśvarūpyaḥ 
parameśvara eva prakāśavapurviśvatra kāraṇam | yadi hi 
kumbhakāragṛhadeśe merurbhavet, yadica kumbhakaraṇāvasare 
mahākalpāvasānavāsaraḥ syāt, tat tadānīṃ tatra nodiyādeva tādṛk 
kumbhaḥ,- iti trailokyakālyaniyatābhāsamadhyavartī kṣaṇābhāso'pi 

(page 173)

viśvamākṣipya vartamānaḥ parameśvarasvarūpaḥ, sa eva [rūpa eva kha. |] 
svecchāvaśāt tattat nirmimāṇaḥ svātmavaicitryeṇa asaṃkhyena 
nirbhāsate- iti sthiravādādanūna [sthiratvavādāt kha. |] eva asmin darśane 
kṣaṇabhaṅgavādo'pi | yathāha avadhūtācāryaḥ 

	prākāmyamātmani yadā prakaṭīkaroṣi
		vyaktīḥ pratikṣaṇamanekavidhā dadhānaḥ |
	tvayyeva so'pi bhagavanbhajate'rthavattāṃ
		prāyo vidagdharacitaḥ kṣaṇabhaṅgavādaḥ ||

iti | āstāṃ tāvadetat | sthitamidam- cidātmani viśvaṃ 
prathamecchāparāmarśabhūmāvahamityeva ucitena rūpeṇa bhāti- iti | 
anye tu bhuñje gacchāmi ityetadanusāreṇaiva uttaragranthaṃ 
vyācakṣaṇāḥ pācanadhāvana iti paṭhanti bhojanecchāyā anantaraṃ 
pākaṃ prayuṅkte, gamanecchāto dhāvati,- iti | yataḥ iti ca 
udetikriyāpekṣā apādānapañcamīti || 10 ||

	nanu bhagavati parāmarśa icchālakṣaṇaḥ iti kimetat | parāmarśo hi 
vikalpaḥ | naca śuddhasaṃvedanarūpe bhagavati samayabalāyattasya 
vedyatvavikalpyatvanāntarīyakasya śabdayojanasya avakāśaḥ | tadeva hi 
vikalpatāyāṃ nibandhanam, vedyoparakte tu prakāśe vikalpatā 
vedyāṃśaviśrāntā abhilāpayojanayā vedyāpekṣayā astu kadācit, 
svayamavikalpatve'pi na śuddhā saṃvit vikalparūpā 
saṃvedyatvānupalabdheḥ | vikalparūpatāyāḥ kāraṇamabhilaṣaṇīyatā | 
tasyā vyāpakaṃ vedyatvamiti kāraṇavyāpakatānupalabdhiḥ [vyāpakānu 
kha. pāṭhaḥ |] kāraṇamapi kāryakāryasya vyāpakameva, 
vyāpakavyāpake ca vyāpakatā yuktaiva,- ityāśayena 
vyāpakānupalabdhireva yuktā, kiṃ śabdādhikyamālāvardhaneneti

(page 174)

tu āśayaḥ āryadharmakīrterevaṃprāyāḥ pṛthak prayuktīraparigaṇayataḥ; 
[aparivigaṇayataḥ kha. |]- iti uktaṃ prāk | tadatra anabhyupagama [anupa ka. 
|] eva samādhiḥ | tathāhi na atra samayāyattaśabdayojanā uktā yato 
vikalpatā āpatet, apitu vimarśarūpatā bodhasya naisargikī,- iti 
abhīṣṭameva idaṃ naḥ ityāśayena āha sūtraṃ

	svabhāvamavabhāsasya vimarśaṃ viduranyathā |
	prakāśo'rthoparakto'pi sphaṭikādijaḍopamaḥ || 11 ||

	avabhāso'vabhāsamāna [mānameva bhavat kha. |] eva bhavan 
svayamavabhāsanasvabhāvaśca | avabhāsayati arthāniti avabhāsaḥ 
prakāśaḥ, tasya vimarśamahamiti akṛtrimamasāṅketikaṃ 
svātantryarūpamātmaviśrāntilakṣaṇaṃ svabhāvaṃ jānanti te [te te kha. 
|] tattvavido ye mantraśarīraṃ bodhatattvaṃ 
śrīmātṛkāśrīmālinyāditattvaṃ manyante | yuktaṃ ca etat | yadihi 
parāmarśalakṣaṇaṃ svātantryamasya rūpaṃ na bhavet; prakāśaḥ 
svātmani prakāśaḥ, ghaṭo'pi svātmani ghaṭaḥ, tataśca ghaṭapaṭayoriva 
svātmanaḥ prakāśāprakāśayorapi ajaḍajaḍabhāvalakṣaṇo na bhavet 
viśeṣaḥ | parasya saṃbandhī prakāśaḥ,- iti cet, ghaṭo'pi mṛdaḥ 
saṃbandhī | pareṇa janita iti cet, ghaṭakṣaṇāntaramapi evam | pareṇa 
ekasāmagrījanyatvaṃ bodhasya,- iti cet, rūpeṇa api rasasya tat | 
paronmukhatā bodhatvaheturiti cet, ayaskānto'pi bodhaḥ syāt 
lohonmukhatvāt | atha svabhāvata eva bodha ātmānamiva anātmānaṃ 
prakāśayati,- iti ucyate, tadātmaprakāśanasya kathamanātmaprakāśanaṃ 
rūpaṃ syāt,- ityetadeva cintyaṃ parasya paraniṣṭhatvānupapatteḥ | nanu 
idameva rūpamāsaṃsāraṃ jñānasya yadanyaniṣṭhameva idamutpannam |

(page 175)

nahi jñānasya anyadrūpaṃ kiṃcidupalabdham,- iti kasya upālambhaḥ, na 
kasyacidanyasya svadarśanapakṣapātamohāt | evaṃhi 
sāmānyāvayaviprabhṛtayo'pi evaṃrūpā eva āsaṃsāraṃ- yadekarūpā 
api anekaviśrāntāḥ- ityādi abhidadhatā kiṃ na pādau prasāryeyātām,- 
iti astamiyurvicārakathāḥ | tadalamanena | atha gatyantarakṣayāt 
parasārūpyaṃ bodhasya, bodharūpatā sphaṭikasyāpi syāt | apiśabdo 
gatyantarakṣayaṃ dyotayati | yata evaṃ, tasmāt bodhasya iyameva 
bodharūpatā- yadasau ghaṭādivat prakāśe [prakāśena nānyā kha. |] na 
anyāpekṣaḥ prakāśate | ananyāpekṣatā ca eṣaiva yat 
svātmīyavimarśe'hamiti bhoktṛtāmaye avicchinne bhuñjānatātmani 
camatkāre rūḍhiḥ | nīlaṃ hi tathā prakāśāt, so'pi tathā jñānodayāt, 
so'pi ahamevaṃ prakāśe iti pāryantikāt ananyākāṅkṣāt [kāṅkṣām 
kha. pāṭhaḥ |] vimarśāt tataḥ paramākāṅkṣāvirahāt,- iti uktamasakṛt | 
vṛttau sautraṃ svabhāvaśabdaṃ vyācaṣṭe mukhya ātmā iti 
svo'vyabhicaraṇīyo bhāvaḥ iti | anyathā iti vyācaṣṭe taṃ vinā iti | 
artho'parakto'pi iti vyācaṣṭe artha iti | bheditagrahaṇena pratikarma 
vyavasthāmātraṃ sidhyatu ataḥ, natu ajāḍyam,- ityāśaṅkya vivṛtikāro 
anyathā ityupakramaṃ dvitīyaṃ ślokārdhaṃ pramukhe vivṛṇoti 
tadarthasya prakṛte sādhye'rthe pūrvārdhokte hetutvaṃ yataḥ | nanu 
ādarśaḥ kiṃ na ghaṭāt viśiṣyate | āha nacāsau jāḍyena iti | satyaṃ 
viśiṣyate svarūpāntareṇa ghaṭa iva paṭāt, jāḍyaṃ tu ubhayatra tulyameva | 
co hetau | yasmāt ghaṭacchyādhāryapi mukuro na ghaṭasya kiṃcit 
tadvyavaharaṇarūpatvābhāvāt tasya, tathā prakāśo'pi 
arthacchāyādhārī na arthaṃ

(page 176)

prati vyavaharaṇarūpo bhavet | nanu sārūpyaṃ kevalaṃ bodhatāyāṃ na 
prayojakam, apitu prakāśarūpatvam | tacca prakāśate, paraṃ ca prakāśaṃ 
karoti,- ityevaṃrūpam | tarhi ādarśo'pi ādarśo bhavati, ghaṭaṃ ca 
ādarśīkaroti,- ityetadbhaṇiteḥ prakāśaḥ prakāśo bhavati, ghaṭaṃ ca 
prakāśīkaroti,- ityasya bhāṣitasya ko viśeṣaḥ | tadāha 
ghaṭasyādarśasya ca iti | svayaṃ ghaṭabhāvaḥ svayaṃ 
prakāśabhāvaśca,- iti tulyam | pareṇa ātmānaṃ svarūpayati ādarśo'pi 
bodho'pi | ko viśeṣaḥ, evamiyataiva na prakāśarūpatvaṃ nirvahati, apitu 
icchānupraveśenaiva svātantryamayena | evaśabdo bhinnakramaḥ | itiśabdo 
yasmādarthe | tacchabdastasmādarthe | yasmādevaṃ, tasmāt prakāśaḥ 
prakāśanetyetāvatā [prakāśenetyetā kha. |] nāmapadāt yat pratīyate, tato 
vilakṣaṇaṃ yat kartṛpratyayatārūpaṃ [pratyabādrūpaṃ ka. vi. |] 
saṃrambhāveśasvātantryamayaṃ nairapekṣyasvabhāvaṃ [nairapekṣyaṃ 
kha. |] pratīyate yat na ghaṭe, na makure; tadeva prakāśasya ajaḍatāyāṃ 
nibandhanam | yadivā evaṃ yojanā- svayaṃ ghaṭa iti svayaṃ paramarūpa iti 
ca yaducyate, tatrāpi svayamityanena vapuṣā hi nirapekṣaṃ 
svātmaviśrāntaṃ yat ghaṭatvaṃ paramarūpatvaṃ ca aṅgīkṛtaṃ; tatra 
nairapekṣyamabhidadhatā icchaiva iyamuktā bhavati | tadyogāt ca 
prakāśarūpataiva ghaṭādarśayoḥ pramātrātmamātraviśrāntatvāt | 
tathāca jaḍarūpataiva na kadācit | yat vakṣyati 

	itthaṃ tathāghaṭapaṭādyābhāsajagadātmanā |
	tiṣṭhāsorevamicchaiva hetutā kartṛtā kriyā || (2|4|21)

iti | tadetadāha prakāśarūpataiveti iti | yasmādevaṃ, tasmāt svayaṃ 
prakāśate bodharūpatayā nirbhāsate paraṃ prakāśayatīti 
svātantryāvabhāsitaparabhāvena ghaṭādyatmanā prakāśate iti |

(page 177)

atra nairmalyāt prakāśanarūpāt prakṛtibhāgaviśrāntādatiriktaḥ 
kartṛtālakṣaṇaḥ svātantryasvabhāvo yaḥ pratyayasya arthaḥ, sa eva asya 
bodharūpasya prakāśasya sūryādijaḍaprakāśavilakṣaṇasya sārabhūto 
jaḍāt sūryādiprakāśāt vailakṣaṇyamutthāpayan jaḍatāśaṅkāṃ 
nivārayan jāḍyamapadhvaṃsayatītyuktaḥ [tyarthaḥ kha. |] | 
śaṅkāpadhvaṃsa eva śaṅkyamāne upacarito viṣayaviṣayibhāvāt 
nimittāt | prayojanaṃ ca atra upacāre bhāvatattvasya 
ābhāsasāratāpratipādanatātparyeṇa buddhyanusāri vastvapi tathā bhavati, 
- iti pratipādanam | nanu prakāśasya [aprakā kha. |] ko'nyaḥ svabhāvo 
yadapekṣayā mukhyo'yaṃ svabhāva ucyate, kathaṃca asya mukhyatvamiti 
śaṅkādvayamekena yatnena apāsyati viśuddhasya iti | prakāśasya 
asaṃsṛṣṭasya tata eva arkādiprakāśavilakṣaṇasya parasārūpyaṃ 
pratibimbāyamānaparatādātmyakṣamatvamasti svabhāvāntaraṃ yatastena 
vapuṣā ghaṭāderbodho viśiṣyate, tathāpi na tat mukhyaṃ jaḍe'pi 
maṇimakuraprabhṛtau tasya saṃbhavāt, vimarśastu na jaḍe saṃbhavatīti 
ananyaviṣayatvāt sa mukhya ātmeti yuktam | apiśabdena iti | sūtre vṛttau ca 
ayamapiśabdaḥ svabhāvāntarasamuccayārtha iti yāvat | nanu 
vimarśābhāvāt jaḍatā syāditi vaktavye camatkṛterabhāvāt iti kathaṃ 
vṛttiḥ | camatkṛtirhi bhuñjānasya yā kriyā bhogasamāpattimaya ānandaḥ, 
sa ucyate ityāśaṅkya āha sa evaca iti yaḥ prakāśasya prāṇatvena uktaḥ | 
etaduktaṃ bhavati- svarūpasya svātmanaḥ 
paripūrṇanijasvabhāvaprakāśanameva parāmarśamayatāṃ 
dadhadānanda iti ucyate, tathā 
dehādisaṃkocakaluṣāparipūrṇapratyagātmāhaṃbhāvaniṣṭhatvena 
śarīrasya riktatayā kṣudhāturasya vyatiriktānnābhilāṣavivaśīkṛtamate- 

(page 178)

rātmaparāmarśo'yamekaghanavṛttyā yato na saṃbhavati, 
tato'yamanānanda iva āste | sati ātmaparāmarśamaye svānande yadā tu 
annaparipūrṇajaṭharatā asya, tadā tadriktatodrekarūpā tāvadapūrṇatā 
vinaṣṭā | saṃskārarūpatayā tu tadānīṃ yadabhilaṣaṇīyaṃ 
kāntāliṅganādi parāmarśanīyaṃ sthitaṃ yadāha guruḥ patañjaliḥ nahi 
caitra ekasyāṃ striyāṃ rakta iti anyāsu viraktaḥ ityādi, 
tadyogādapūrṇo'yamānanda iti paramānando'yaṃ na bhavati | 
sāṃsārikaśca sarvo'sya ānando

	lābhe bhāviviyogabhīru...................... |

iti 

viṣayo viṣayāntarārthitāṃ janayan vā janayet kathaṃ sukham | iti ca 
nyāyena vyatiriktākāṅkṣāvicchedamayatāṃ sarvātmanā na svīkurute iti 
tato'pi apūrṇa eva, yastu ānandatāṃśastatra svātmaparāmarśarūpataiva 
[rūpitaiva kha. |] prayojiketi | tata eva uktaṃ

	trailokye'pyatra yo yāvānānandaḥ kaścidīkṣyate |
	sa binduryasya taṃ vande devamānandasāgaram || (sta. ci. 61)

iti śrībhaṭṭanārāyaṇena | tathāca madhurādau rase 
audarikābhyavahāravailakṣaṇyena pravṛtta idamitthamiti pramātari 
viśramayan pramātṛbhāgameva pradhānatayā vimṛśan bhuñjāna iti 
ucyate | yatrāpi atyantamanyathābhāvamatikramya sukhamāsvādyate 
arjanādisaṃbhāvyamānavighnāntaranirāsāt 
vaiṣayikānandavilakṣaṇaśṛṃgārādau nāṭyakāvyādiviṣaye, tatra 
vītavighnatvādeva asau rasanā carvaṇā nirvṛtiḥ pratītiḥ 
pramātṛtāviśrāntireva, tata eva hṛdayena parāmarśalakṣaṇena 
prādhānyāt vyapadeśyā vyavasthitasya api prakāśabhāgasya 
vedyaviśrāntasya

(page 179)

anādaraṇāt sahṛdayatā ucyate iti nirvighnāḥ svādarūpāśca 
rasanātadgocarīkāryāścittavṛttayo rasā nava 
ityayamartho'bhinavabhāratyāṃ nāṭyavedavivṛtau vitatya 
vyutpādito'smābhiriti | tatkutūhalī tāmeva avalokayet | iaha tu 
prakṛtavighnakāritvāt na vitataḥ [tam kha. |] tasmādanupacaritasya 
saṃvedanarūpatānāntarīyatvena avasthitasya svatantrasyaiva 
rasanaikaghanatayā [rasenaika kha. |] parāmarśaḥ paramānando 
nirvṛtiścamatkāra ucyate | tasmāt yuktamāha camatkṛterabhāvāt | 
madhurādirasāsvāde tu viṣayasparśavyavadhānam | tato'pi 
kāvyanāṭyādau tadvyavadhānaśūnyatā [dau vyava kha. | tadavadhāna 
kha. pāṭhāntaram |] tadvyavadhānasaṃskārānuvedhastu | tatrāpi tu 
tathoditavyavadhānāṃśatiraskriyāsāvadhānahṛdayā labhanta eva 
paramānandam | yathoktaṃ

	jagdhipānakṛtollāsarasānandavyavasthiteḥ | (vi. bhai. 62)

ityādi | viśeṣaprītiḥ ityatra viśeṣapratītiriti apareṣāṃ pāṭhaḥ | ata eva 
iti yato vimarśa eva camatkāraḥ, sa evaca ajāḍyaṃ; tato hetornīlādau 
idamiti yo vimarśaḥ, sa nīlādiśarīre viśrānto na bhavati, kintu 
pramātaryeva viśrāmyati | yadvakṣyate 

	ghaṭo'yamityadhyavasā nāmarūpātirekiṇī |
	pareśaśaktirātmeva bhāsate na tvidantayā || (1|5|20)

iti | pramātṛviśrāntau ca ahamityeva sa vimarśo'vaśiṣyate, mukhe parasya 
viṣayāṃśasvīkriyāta idamiti nirbhāsaḥ | anyathā iti yadi pramātari 
viśrāmyedityarthaḥ | etacca

	kintu mohavaśā............................. | (1|1|3)

(page 180)

iti sūte prakāśavimarśavailakṣaṇyaṃ nirūpitameva vimarśaḥ punarna 
kadācididantābhūmimāskandati ityatra avasare | tathāca iti yataḥ sarvo 
vimarśaḥ pramātaryeva viśrāntimāśrayate tena prakāreṇa | 
paraprakāśatvametadeva saṃvedanasya yat 
tathābhūtasvatantrasvarūpātmanā prakāśanam | itthamevaca 
ātmānātmaprakāśanaṃ vijñānasya yuktaṃ 
tattvātmano'vyatiriktatāyām | tathāhi prakāśamānameva 
vijñānamātmano'nātmanaśca prakāśanamiti yaducyate; tatra 
yadātmanaḥ prakāśanaṃ, tadeva cedanātmanaḥ, tarhi ātmā, anātmā ceti 
ekaṃ syāt | ayaṃ hi tadārthaḥ- yajjñānamātmanā prakāśate- idameva 
ghaṭaḥ prakāśate iti | nanu ca ghaṭapaṭayorekaprakāśanam, athaca na 
ghaṭaḥ paṭaḥ, tadvadātmānātmanorekaṃ prakāśanaṃ, naca 
ekamātmānātmānau bhaviṣyataḥ | maivaṃ, nahi ghaṭapaṭayoḥ kiṃcit 
prakāśanamasti siddham | asmanmate hi prakāśa eva prakāśate | sa ca 
kadācit svatantratvāt ghaṭātmanā, jātucit paṭātmanā, anyadā 
dvyātmaneti | atha ucyate- ātmanā prakāśamāno bodho'nātmānaṃ 
nīlaṃ prakāśayatīti, tatrāpi yadi prakāśaṃ taṃ karotīti ucyate, tadā kiṃ 
tadātmaprakāśarūpameva taṃ karotīti, uta vyatiriktaprakāśarūpam | 
ādyakalpe svarūpīkṛta eva anātmā api bodheneti bhagnā 
iyamanātmakathā | pūrvamanātmeti cet, aprakāśamānasya kā kasya 
pūrvateti na kiṃcidetat | dvitīyapakṣe jñānaṃ prakāśate, tadevaca 
kāraṇabhūtamarthasya prakāśatāṃ jñānarūpatāṃ vidhatte iti dvayorapi 
svaprakāśatvaṃ svasaṃvedanatayeti punarapi 
kathamātmānātmaprakāśakatvam | naca aprakāśarūpasya 
prakāśarūpatāṃ svabhāvasya anyatvaṃ vidhirapi vidhātuṃ prabhavati | 
naca parasya paraniṣṭhatvamucitamiti uktamasakṛt | anubhavādeva 
[bhavādirvā nātmā kha. |] anātmā prakāśate iti viparītamucyate |

(page 181)

anubhavo hi prakāśa eva | sa ca na bhinnasyeti upapāditaṃ, natu 
svahetuparamparayaiva bodho grāhakātmā, nīlādistu grāhyātmā | 
ekasāmagryadhīnatā kevalamidamasyaiva grāhakamiti 
grāhakagrāhyabhāvasya niyame vyāpriyate, natu tayā asāvutthāpyate 
cakṣurāderagrāhyagrāhakasvabhāvatvāditi | tadidaṃ 
bālavipratāraṇaphalameva | grāhakatā hi nāma yadi grāhyasya 
kaścidupakāraḥ, sa tulyakālatve kathaṃ syāt | atha upakāro na kaścit, tarhi 
śabdamātrametat- ayaṃ grāhakaḥ, ayaṃ grāhya iti | sa tasya prakāśa 
ityetadeva grāhakatvamityapi nirasto vāda ityalaṃ bahunā | tat yuktamuktaṃ 
tathā svayaṃ prakāśate iti | evaṃ pāramārthikamahamiti prakāśasya 
vimarśātmakaṃ nirvṛtirūpaṃ vapuḥ | tacca yatra āropyate, tadapi 
nirvṛtimayameva bhāti śarīraprāṇādi | tadāha ahamityapi iti | 
apirbhinnakramaḥ | śarīraprāṇādirūpe vedye'pi yo'dhyāsyate 
ahamitivimarśa ityarthaḥ | nanu duḥkhopalambhakāle tāvadahamityasti, naca 
tatra camatkārātmā asti ānandaḥ | ka evamāhanāstīti | tathāhi 
duḥkhamapi ayamāsvādayamāno'ntareva viśrāmyati | tāṃ tu 
antarviśrāntiṃ bāhyena arthī taṃ ca 
vinaṣṭamabhisamīkṣamāṇo'nādaratiraskṛtatvāt satīmapi na abhimanute | 
upadeśaviśeṣadiśā tu māyāvigalane [vigale ka. |] 
tadbāhyarūpānādaraṇe saiva viśrāntirunmiṣati | tathāhi śivadṛṣṭiḥ

	duḥkhe'pi pravikāsena....................... | (5|9)

ityādi | ye tu śarīrādititikṣavaste [tityakṣavaḥ kha. |] 
taditarasvargādigataśarīravāñcayā vā 
taccharīrāvinābhāviniṣpratīkāraduḥkhajihāsayā 
ahamiticamatkārādhyāsaṃ tatra śarīre śithilayanti, śarīrāntare

(page 182)

ca taṃ camatkāragrahamabhisaṃcārayanti, pāramārthikīmeva tu 
camatkārānandadaśāṃ vitavighnameva avalilambiṣante 
mumūrṣudaśāpannāḥ | etadupasaṃharati tadevam iti | etat saṃvādayati 
tathāca iti bhartṛharirityavocat iti saṃbandhaḥ | kena vākyena | āha 

	vāgrūpatā................................. |

ityādinā

	........................................... pratyavamarśinī | (vā. pa. 1|125)

ityantena | kimavocat | āha prakāśasya jaḍavailakṣaṇyaṃ saṃrambhaḥ 
kartṛtārūpo yaḥ, sa eva ātmaviśrāntilakṣaṇo nirapekṣatvena 
vimarśo'hamiti kathyate | nanu kena śabdena asau saṃrambhaḥ 
kārikāyāmuktaḥ | āha prakāśeta [prakāśate ka. pāṭhaḥ |] iti | 
liṅṅatra [liṅ ka. |] saṃbhāvanādhikyamātramāha, ākhyātarūpatā tu 
kartṛvyāpāraprādhānyaviśrāntisatattveti āśayaḥ | nanu liṅā [liṭā ka. |] 
vinā saṃbhāvanā kathaṃkāramucyate | tat saṃbhāvanābhidhāyī 
ayamākhyātaprayogo [prayogena kartṛtāṃśaprādhānyena gamayati ga. |] 
na kartṛtāṃśaprādhānyaṃ nigamayati | maivam, yadi vastvabhāvamātraṃ 
saṃbhāvanāviṣayatvena vivakṣitaṃ, na śuklo'yaṃ, śuklaḥ syāditi 
nyāyena prakāśaḥ prakāśo na bhavediti prakāśabhāvāt bāhyīkṛtameva 
bhavanaṃ liṅā saṃbadhyeta [saṃbadhyeta śveto na śveteta; na nīlaṃ nīlet, 
ghaṭo na ghaṭībhavet ga. pāṭhaḥ |], na śvetaḥ śvetet, na nīlaṃ nīlet, ghaṭo 
na ghaṭībhavediti tu tatsvarūpānupraviṣṭa eva saṃrambhārtho nirbhāti,- iti 
vyatirekadvāreṇa ca itthaṃ vidhiḥ saṃpadyate prakāśate ca ayaṃ prakāśa 
iti | tadayaṃ tiṅantārtha eva svātantryātmā vimarśaḥ prakāśasya aheyaṃ 
vapurbodhasya 

(page 183)

yā vāgrūpatā śabdanaśabdayitṛrūpatā śāśvatī saṃketādivat | atha 
saṃbandhānugrahādaikyānaikyamayatve'pi yathāvailakṣaṇyaṃ 
jātādyavabhāsanaṃ bālyādyavastheti, na atra 
avasthānāmaikyānanusandhānaṃ vivakṣitaṃ tasya 
avayavibuddhāvaprayojakatvāt, apitu etāvānahamayamadya 
pūrvarūpādetāvatā bhinnavaitatyo niḥsaṃbandhi................ iti iyati atra 
tātparyam | ata eva nirapekṣāhamiticamatkārasvabhāvatā yadi utkrāmet 
bhāvaprakāśamullaṃghya krāmet, idaṃbhāvagrāhyaṃ bhāvanaṃ 
svīkuryāt; tadā prakāśamāno'yamartho nirvikalpake vā .............. 
pratyabhijñā dyotyate | ..............pratiṣṭhā | pratiṣṭhā ca pāryantika ............ 
vaktīti vacanaṃ ceti vāk prakāśa ityarthamukhena upakramo mantavyaḥ | 
........iti hi vyavahāraḥ | etadarthameva avabodhasya ityupakramya, nāsau 
prakāśeta ityuktam | avabodhasyeti ca ṣaṣṭhyā ayameva āśayaḥ | anyathā 
caitat | prakāśaḥ prakāśate iti hi bodhasya yadyaparaḥ prakāro na bhavet, 
bhavati ca || 11 ||

	naca evaṃ saṃvidrūpasya vimarśaprādhānyamihaiva uktaṃ, 
yāvadanyatrāpīti sūtram

	ātmāta eva caitanyaṃ citkriyā citikartṛtā |
	tātparyeṇoditastena jaḍātsa hi vilakṣaṇaḥ || 12 ||

	ātmāta eveti- etadeva hi vimarśaprādhānyaṃ yat tamuddiśya 
ātmā dharmisvabhāvaḥ caitanyaṃ ityanena dharmavācakaśabdena 
vaiyadhikaraṇyenāpi samānādhikaraṇatayā śrīśivasūtreṣu bhagavatā 
nirdiṣṭaḥ | tathā sāmānādhikaraṇyameva vyākhyātaṃ 
bhaṭṭaśrīkallaṭapādaiḥ-

	caitanyamātmano rūpam ...................... |

iti | ............... śaktiriti caitanyaṃ citiśaktirātmamahimā bhoktṛtvarūpaṃ 

(page 184)

hi, yaditi tadvaiya .......... ttvike sāmānādhikaraṇyanirdeśasya 
citkriyārūpāyāṃ cetanakriyāviṣayatāyāṃ 
saṃvedanasaṃyojanaviyojanādisvātantryasārāyāṃ tātparyaṃ 
tatparatvaṃ tadviṣayaṃ pratipādakatvam | tathāhi dharmirūpatānirdeśe sad 
dravyaṃ samavāyaṃ ............... ityādi | 
jaḍasādhāraṇadharmāntarakṣamo'pyasau pratīto bhavet | ta- ........... 
litasaritsahasrapraviviktarasāsvāda ..............ścetana ityā ......... tyanaṃ 
jaḍebhya iti .............. saṃmataṃ na śāstram | yadivā .......... kriyā ca ātmā 
uktaḥ | citikartṛtā ceti pṛthageva | evaṃvidhavacanā ............ marthadvāreṇa 
vacanamanyadapi svīkaroti | tata eva pātañjalabhāṣya ............. paṭhitaḥ 
sūtramavatārayati | ata eva iti sūtrāṃśamevaṃ paṭhitvā .......... ityantena 
vivṛṇoti | svatantramevedaṃ pūrvoktahetuyuktyupajīvanāya 
kartṛtālakṣaṇādvimarśādavibhedena | tatra tatra iti svadarśane 
śrīśivasūtrādau, paradarśane ca pātañjalādau 
jaḍādvibhāgārthamapadiśyate vyavahriyate | .............. dharmasvabhāva 
evāyaṃ śarīrasyaiva caitanyamiti cārvākanayena | yadāha .......... 
śaktivaccaitanyaṃ caitanyaviśiṣṭaḥ kāyaḥ puruṣa iti | tasya nirdeśasya 
spaṣṭateti kathaṃ tātparyāntare yojanamityāśaṃkya vṛttau 
dravyapadamātmasāmānādhikaraṇyena uktaṃ, tadvivarītumupakramate iti 
tattvopadeśapare śāstre | sarvatra iti 
vaiśeṣikasāṃkhyavaiyākaraṇādyadhikaraṇeṣu 
vaiśeṣikanaiyāyikajaimineyānāṃ sphuṭa eva dravya(vya)vahāraḥ | ārhatā 
dravyamavasthātṛ manyante; mahāyānasthāḥ saugatā vikalpitaṃ tata eva 
svatantraṃ dravyaṃ saditi | sāṃkhyānāmapi svatantramavasthātṛrūpaṃ 
dharmi dravyamiti saṃmata eva | vaiyākaraṇaiḥ ...............ṣāṃketikaṃ yasya 
............. meva ekaika .............. yathā mukhopakramaṃ devadatto'yamityādi 
dṛḍha........ṝthasiddhiḥ, tathaiva arthakriyāyāṃ

(page 185)

guṇakarmādipadārthāntarādhīnāyāmapi sādhyāyāṃ ............ bhavati | 
yallagnamanyat kṛtārthaṃ bhavati | tata eva yojanarakṣaṇādeḥ 
prādhānyena viṣayo yadālambanaśūnyaṃ padārthāntaraṃ sadapyasadeva 
| yadāha- sarvāgrahaṇamavayavyasiddheḥ (nyā. sū. 2|134) iti | padārtho 
dravyam | mukhyatayā coktayā yadyapi aniṣṭaprasaṅgo nāsti, tathāpi 
tameva nirūpayituṃ viśeṣaṇacatuṣkamupāttam | tathāhi kathaṃ tasyaiva 
mukhyatvam | āha- sphuṭatvena idantā yata ākriyate viśeṣyatvena | kā asya 
sphuṭatetyāha- sarvasmāt yato 
bhinnalakṣaṇo'vayavārthakriyāyāmupayujyate | naca gṛhītavidhvasto 
yenārthakriyāyāṃ viniyoktumaśakyaḥ syāt yataḥ sthiraḥ | nanu ca 
dṛśyate'sya rūpānyathābhāvaḥ | nāsau dravyasya, apitu taddharmāṇāṃ 
saṃyogavibhāgasaṃkhyādīnāṃ tadāśritānām | 
tathāvidhadharmāśrayatvādevaca bahvīrarthakriyāḥ kartuṃ prabhavat tat 
dravyamarthanīyaṃ bhavatīti | anena idamāha- astīdamātmano rūpam iti 
ātmā dravyapadārtho gaṇitaḥ sarvairasya svātantryamupetaṃ yataḥ | iyati tu 
tattvamabhiniviśate matiḥ, tat prakāśarūpāmātmabhittimupalīnāḥ sarve 
bhāvā bhavanti | dravyaguṇādayaḥ 
padārthāstadātmadharmatāmadhirohantastasyaiva pāramārthikaṃ ............... 
svasya | tadayaṃ prayogaḥ- ātmā viśva ............ 
dviśvāvabhāsavattvādanyābhāsavattvaṃ dravyavyatiriktātparatantrāt 
padārtharāśeḥ palāyate 
svavyāpakasvātantryaviruddhapāratantryāvalokanoditasatrāsaṃ yataḥ | 
rūpatvamapi bhāsamānaṃ rūpaṃ bhavadapi nirbhāsate dravyaniṣṭhatvena 
| nṛpasannidhāvamātyaparivāro'pi rājaparivāra eva | idaṃ rūpamiti hi na 
laukikaḥ pratyayaḥ, apitu śuklaḥ paṭa ityeva laukikaḥ pratyayo yadamuyā 
nītyā ātmaiva dravyaṃ tattvato'hamityevaṃbhāsaḥ | eṣaiva tāttvikī 
saṃvit sarvatra yataḥ | yathoktam

(page 186)

idamityasya vicchinnavimarśasya ............... | (a. si. 15)

ityādi | vaikalpikasya paṭasya śukla itiva(t)svātantryāropaṇapaṭāntare 
dravyabhāvaḥ | tadevaṃbhūtasya dravyasyāpi ātmano yat 
sāmānādhikaraṇyaṃ dharmapadena, tat tasyaiva dharmasya prādhānyaṃ 
khyāpayitumiti tātparyam | ghaṭo mahāniti jaḍasya dravyasya nidarśanam, 
anyadajaḍasya, tasya tu dharma iti saṃbandhaḥ | anena bhāvātmakam iti 
vivṛtam | citiḥ iti dṛśiḥ iti hi bhāve kipratyayāntaḥ kṛṣirityādivat | 
nanvanayorastu kriyā vimarśarūpā vācyā dhātvartharūpe bhāve iko 
vidhānāt | caitanyamiti tu ṣyañ pravṛttinimitte nāmnaḥ satāyāṃ vā 
vidhīyate | yadāha madhyamo muniḥ- yasya guṇasya hi .................................. 
viśrāntisāratvamuktam | vṛttau ca bhāva ............... śabdasāmyamātrameva, 
vastusāmyaṃ tu katham | atra āha sarvatra ca iti | triṣvapi padeṣu evaṃ 
pratijñāya uktāśaṅkāśamanāya hetumāha- caitanyamapi iti | iha 
saṃbandho nāma pramātṛviśrāntasaṃbandhidvitayāvabhāsasāra iti 
vakṣyate 

	svātmaniṣṭhā viviktābhā bhāvā .................... | (2|2|4)

ityatra | tatra kartṛlakṣaṇaḥ saṃbandhī prakṛtibhāgameva adhirūḍha iti 
pratyayāṃśaṃ kriyaiva āśliṣyati | upādhibhinnā ṣyañādīnāṃ vācyā 
matā cetanakriyā, saṃbandha eva atra upādhiriti sa eva arthaḥ | sattā ca 
bhavattā bhavanakriyākartṛtaiveti punarapi sa eva arthaḥ | nanu 
kriyāsaṃbandhaḥ kārakāntareṣvapi tulyastatkathamuktam- citkriyārūpā 
citikartṛteti | āha sā ca iti | kartṛviśrāntidvāreṇa hi 
kārakāntarāṇyupalīyante kriyāyāmiti kriyādhikāre vitatya vakṣyate | 
nanu yadi paryāyaśabdau, tatkathaṃ yaugapadyena sūtre prayoga 
ityāśaṅkya āha- vastuta iti | ...............padeśapratyabhijñādyotyate 
........ḍyotakena || 12 ||

(page 187)

	citiḥ pratyavamarśātmā parā vāk svarasoditā |
	svātantryametanmukhyaṃ tadaiśvaryaṃ paramātmanaḥ || 13 ||

	evaṃ sūtrārthamavatārayati saṃkṣepeṇa kartṛtaiva ca iti | 
parāmarśamayī vimarśanalakṣaṇaiva yā kartṛtā, saiva 
mantrāṇāmutpattisthitilayasthānatvena [yatvena ka. |] 
samāpyāyanopabṛṃhaṇādikāritvena ca māntrī mahāmantratanośca 
bhagavataḥ saṃbandhinī śabdanarūpā, natu pāśavargamadhyapatitā 
karmendriyaviśeṣarūpā tatkāryaśabdarūpā vā vāk | paramātmanaśca 
eṣaiva kartṛtā aiśvaryam, natu kulālasya iva karacaraṇādiparispandamayī | 
etadubhayamāha kārikayā | vāk ityasya viśeṣaṇaṃ yat parā iti, 
tadvyavacchedyaṃ darśayituṃ tasyāḥ prasiddharūpopakramaṃ bhedamāha 
vākśaktiḥ iti | śaktigrahaṇamindriyaśaṅkānirāsārtham | jihvāśabdena 
vāgindriyamupalakṣyate, taddvāreṇa ca aparāṇi karmendriyāṇi lakṣyante | 
tadayamarthaḥ- prasṛtarūpo yaḥ kriyāśaktilakṣaṇo vimarśaḥ, sa eva 
vāgādikaraṇavargamāviśan [vāgādi kha. |] jaḍamapi svābhiṣekeṇa 
ajaḍamiva saṃpādayati yena svatantratayaiva svakṛtye sthūle vā sūkṣme 
vā jhaṭityeva pravartate yāvatkāryanirvartanaṃ ca avasthāya nivartate, 
punaḥ kāryāntare'pi evamiti | yaduktaṃ 

	yataḥ karaṇavargo'yaṃ vimūḍho'mūḍhavatsvayam |
	sahāntareṇa cakreṇa pravṛttisthitisaṃhṛtīḥ ||
	labhate .......................................... | (spa. kā. 1|6)

iti | vikharaḥ śarīraṃ, tatra bhavā tatparyantaceṣṭāsaṃpādiketyarthaḥ | 
kāryabhūtaḥ iti bhūtagrahaṇena kāryakāraṇatāmāha | 
jihvāvyāpārasya hi tatkāryasya śabdaḥ kāryaḥ | jihvāvyāparo'pica 

(page 188)

vastutastathāvimarśasvabhāva eva | vimarśarūpānadhikasvabhāvā hi 
samastā kriyeti uktam | saghoṣaḥ iti sthūlaḥ | tasya lakṣaṇaṃ 
śrūyamāṇaḥ iti aviśeṣopādānāt svayaṃ ca paraiścetyarthaḥ | 
upāṃśuḥ iti aghoṣo yaḥ svayameva śrūyate, na pareṇa; upagatāḥ 
svasamīpameva praviṣṭā aṃśavaḥ prasarā yasyeti | anena 
pāṇyādīnāmapi sthūlasūkṣmarūpasya svakāryasya upalakṣaṇam | 
sarvatra ca atra saghoṣāghoṣarūpavāgvyāpāraśabdānuviddhatā 
prādhānyena dṛśyate | tadidaṃ grahīṣyāmi gṛhṇāmi gṛhītamiti tata 
evamuktam | varṇapadagrahaṇaṃ ca tatraiva śrūyamāṇatābhimānāt | 
varṇe eva hi tāvat śrūyamāṇatābuddhiratisphuṭā, pade tu alpavarṇe 
syādapyeṣā, vākye tu 
saṃkalanāsmaraṇānuvyavasāyādirūpabuddhinirgrāhye śrūyamāṇatā 
na sphuṭā,- ityevamuktam | tathāca vaiyākaraṇairapi vākyasphoṭasya 
prāyaśo buddhinirgrāhyataiva darśitā | yadāha tatrabhavān 

	nādenāhitabījānāmantyena dhvaninā saha |
	āvṛttaparipākāyāṃ buddhau śabdo'vadhāryate || (vā. pa. 1|85)

iti | eṣā tāvat prathamā vāk | dvitīyā tu iti antaḥkaraṇaṃ 
manobuddhyahaṃkāralakṣaṇaṃ madhyabhūmau puryaṣṭakātmani 
prāṇādhāre viśrāntaṃ yā vimarśaśaktiḥ prerayati, sā madhyamā vāk | 
tatpreritaṃ ca tadantaḥkaraṇaṃ saṃkalpane niścaye abhimanane ca svasmin 
vyāpāre vikalpanalakṣaṇe pravartate | tatkāle sā vimarśamayī vāk 
saṃkalpyādikaṃ grāhyaṃ saṃkalpayitrādirūpaṃ ca grāhakaṃ svena 
abhidhānasya- imaṃ ghaṭamahaṃ caitraḥ saṃkalpayāmi- 
ityādervācakasya śabdasya bhedena sphuṭena krameṇa ābhuṅkte gāḍhaṃ 
parāmṛśati yatastataścintanaśabdavācyā madhyabhavatvāt madhyamā 
jñānaśaktirūpā [dhyānaśakti ka. |] |

(page 189)

tṛtīyasyāṃ tu abhidhānayorgrāhyagrāhakagatayorabhidheyayośca 
grāhyagrāhakagatayoryathāsvaṃ yaḥ kramo deśataḥ kālataśca 
saṃbhavati, natu sphuṭena rūpeṇa yato nirvikalpakaḥ svabhāvo'sau 
vimarśaḥ svayamakramatvādavibhāgaḥ prasevaka iva tamantarlīnaṃ 
kramalakṣaṇaṃ vibhāgamācchādya āste, tata eva sarvato grāhyāt 
grāhakācca yaḥ kramaḥ samāhṛto'ntaḥsaṃkocito yayā yasyāmiti vā 
saṃhṛtakramatvādeva sūkṣmo'tra asāvabhijalpati yattat sat kimapītyādinā 
sphuṭakrameṇa yataḥ padeṣu sarorasaḥprabhṛtiṣu vākyeṣu 
devadattaturagādiṣu ca kramasaṃkocanātmakapiṇḍīkaraṇamiliteṣviva 
saṃpāditeṣu, sa padavākyātmā abhijalpaḥ sūtrasthānīyena vapuṣā 
sūkṣma iti yāvat | yathāha tatrabhavān

	pratisaṃhṛtakramā tu satyapi bhede samāviṣṭakramaśaktiḥ paśyantī 
ityādi | iyamevaca icchāśaktirūpeti darśayati kāryacikīrṣā iti | 
bodhyabubhutsāsvabhāvā api iyaṃ bhavati, ataśca evaṃ- 
yadicchāśaktirjñānakriyāśaktyoranugrāhikā- iti, kintu bubhutsā api 
bodhasvabhāvaiva tasya vastunastatra avabhāsaparipūrṇatayā prakāśanāt | 
cikīrṣākaraṇayostu sphuṭa eva bhedo lakṣyate | cikīrṣāyāṃ hi sphuradapi 
vastu na kṛtamiti ucyate | 
ubhayendriyavedyatopalakṣitābhimataparisphuṭatvāpattiparyantaṃ 
sāmarthyaṃ karaṇamiti hi vakṣyāmaḥ | paśyantī iti 
aviratadarśanasvabhāvatvena apratihataprakāśarūpatvamicchāśakteḥ 
prakāśaprasararūpatvābhidhānāya uktam | sā ca 
iyamicchāśaktirvidyāśaktiprasararūpaṃ buddhīndriyavargamanugṛhṇatī 
nirvikalpamālocanaṃ samutthāpayati | tisṛbhyo'pi vilakṣaṇā iyamiti 
punaḥśabdena āha | ekā iti paśyantyādikaṃ trayamapi prativācyaṃ 
bhidyate, natu tathā iyamityarthaḥ | 

(page 190)

akramatāṃ prāptaṃ yat niḥśeṣaṃ samastamabhidhānānāṃ 
śabdānāmabhidheyaṃ vimṛśyamānaṃ rūpaṃ 
grāhyagrāhakātmakamubhayaṃ, tena garbhiṇī tatsarvaṃ kroḍīkṛtya 
avatiṣṭhamānā; natu śaktimadrūpaparamaśivadaśā iva 
anunmiṣitagrāhyagrāhakādivaicitryā, ata eva bhagavataḥ svābhogaṃ prati 
ya āsvādaścamatkāro nijābhogaparāmarśātmā [nijabho ka. |] tamayī | 
yadāha

	................viśvamāmṛśasi rūpamāviśan | (u. sto. 13|15)

iti | naca kadācidapi parameśvara evaṃ tadrūpaśūnyaḥ | yadāhuḥ 
parameṣṭhipādāḥ

	śānte śivatvaṃ sthūle'pi śivatvaṃ yatra varṇitam |
	tatra kā śāntatā brūhi śānte kiṃ vastutā na te ||
	vastutā cettathābhūtaśaktitritayasaṃgamaḥ | (śi. dṛ. 3|56)

ityādi | evaṃ parā iti vyākhyāya svarasoditā iti vyācaṣṭe svarūpavat iti 
| etadāgamabhāṣayā saṃvādayati nityoditā iti satatānastamitatvena 
anāhataśabdavācyo yo mahān viśvavyāpī mananatrāṇadharmā 
guptīkṛtaviśvaśabdanavyāpārastanmayī | svarūpāt iti 
paśyantīlakṣaṇāt vācakāt sūkṣmasaṃjalpasvabhāvāt | tasyā api iti 
paśyantyāḥ abhinnavācyavācakāyāḥ iti abhinnavācyaśabdo vācako 
vṛttau yasyāḥ prātipadikaḥ [kalakṣaṇaḥ kha. |] prayuktaḥ, 
abhinnavācyaśabdena uktā yā vṛttau, tasyā iti yāvat | vācyamapi iti 
paśyantyāṃ tu vācakamasphuṭakramaṃ, vācye tu kramaḥ sanneva āvṛtaḥ 
| yadi vā phaladarśanamidaṃ vṛttivacanasya yāvadeva svarūpādabhinnaṃ 
vācyaṃ paśyantyāṃ tāvat tat vācyaṃ vācakena abhedaṃ prāptam | 
svarūpaṃ

(page 191)

hi tasya avācakameva | evaṃ ṣaṣṭhyā pañcamyā vā samāsena 
vyākhyāya karmadhārayeṇa vyācaṣṭe athavā iti | sūkṣmā iti, natu pareti 
yāvat | sarvasya kramasya vācyavācakagatasya nanu paśyantyeva paraṃ 
tattvamiti jaradvaiyākaraṇā manyante, tatra kathaṃ sakramatetyāśaṃkya 
āha paśyantyavasthāyāmapi iti | cintyamānasya iti yo'sau cintyamāno 
madhyamāyāṃ sphuṭacintāviṣayatāmeṣyatītyarthaḥ | abhisandhyoḥ iti 
abhinnasandhānamabhisandhirnirvikalpakamaindriyikaṃ vijñānaṃ 
nirvitarkanirvicārasamāpattiḥ saṃdarśanātmā ca prathamaḥ 
pramātṛvyāpāraḥ | tatra yadā pratyakṣeṇa avikalpakena saraśca paśyati 
rasaṃ ca tadgataṃ, tadā tadālocanadvayaṃ yadi na bhinnaviṣayatayā 
viṣayagataṃ kramaṃ svīkuryāt svavimarśāvasare; tat sphuṭabhinnau 
kathaṃ samanantaraṃ vikalpau syātām | tasmādālocanakāle'pi sat 
tadādirūpapracchannaṃ tat saro rasa iti vācakaśabdarūpaṃ (pam) 
sakramaṃ, vācyaṃ ca tadanuvarti parasparabhinnarūpaṃ cakāstyeva | evaṃ 
sarasi gāḍhaṃ vikalpyamāne rase ca kramanimiṣitatadrūpāvasthāyāmapi 
samāpattau parasparabhedo vaktavyaḥ | anyathā 
prathamamavitarkasamāpattyavasarocitastatra [prathamaṃ savi kha. |] vikalpo 
bhedena na upayujyeta | vyutthānadaśāyāṃ ca na yogī bhedena tayoḥ 
samāpattyoḥ smaret | evaṃ saro vivakṣo rasaṃ ca 
vivakṣorjigamiṣordidṛkṣorvā yat prathamaṃ saṃdarśanaṃ, tat cet na 
vicitraṃ, prārthanāderapi avicitrataiva syāditi nyāyaḥ | ghaṭaḥ 
śarāvamityādau yadyapi evameva, tathāpi tatra sphuṭa eva bhedaḥ 
saṃpiṇḍībhāve'pi | tathāhi tāmrarajatapiṇḍībhāve 
lohanāgapiṇḍibhāve ca kasya ekatābhimānaḥ idamapi 
tāmrasuvarṇapiṇḍīrūpamidamapyevaṃ, tatko bheda 

(page 192)

iti tu bhavedapi bhramaḥ | so'vaśyaṃ nivartanīyaḥ | kramarūpapradarśanena 
ayaṃ tāmrahemapiṇḍo'yaṃ tu hematāmrapiṇḍa ityāśayena sarorasa iti 
uktam | nanu paśyantyāṃ yadi cintāmayatvaṃ, tarhi madhyamā kim | āha 
sthūlaṃ śabda iti iti | tathāhi madhyamaiva vikalpabhūmirucyate | 
vikalpasya ca abhilāṣasparśa eva jīvitam | tadvartī hi asau 
vācakarūpo'hantārūpasyaiva vācakatvāt | tatra hi saṃketakaraṇādi 
upapadyate | yattu śrotragrāhyaṃ svalakṣaṇaṃ rūpaṃ, tat na 
vācakaśabdarūpaṃ vācyavācakabhāvasya so'yamityadhyāsajīvitatvaṃ 
vakṣyate yataḥ | naca svalakṣaṇaṃ svalakṣaṇāntare adhyāsituṃ pāryate | 
tat śabdanarūpatayā yat śabdarūpatvaṃ kramikaṃ, tat 
madhyamāvasthāyāmeva sphuṭatvena viśrāntam | tato yaduktaṃ bhagavatā 
śrīmatkālapādasaṃhitāyāṃ

	sthūlaṃ śabda iti proktam.......................... |

iti, tat madhyamābhiprāyeṇa mantavyaṃ; yastu śrotragrāhyaḥ śabdaḥ; sa 
tatprapañcapallavaprāyo na pṛthagvyapadeśyatāmarhati | nahi 
vikalpyamānāt ghaṭāt bāhyasya ghaṭasya anyat rūpaṃ vaktuṃ nyāyyam | 
sa eva hi ghaṭābhāso deśādyābhāsāntarayojanayā 
svalakṣaṇībhāvamabhyeti | tathaiva śabdo'pi | sa eva sthūlarūpatvena 
pūrṇābhāso'pi ābhāsāntarasaṃbhedavaśāt 
śravaṇayugalasaṃvedanayogyena vapuṣā abhidhīyate svalakṣaṇam | tataḥ 
iti yato madhyamāyāṃ sthūlaśabdarūpatā | sphuṭam iti pramāṇavṛttena 
āyātamityarthaḥ | asyām iti etatsūtranirdiṣṭāyām | ata eva iti yataḥ 
paśyantyāṃ pramāṇopapannaṃ cintāmayatvaṃ, tataḥ paśyantyāḥ 
paratvaṃ śivadṛṣṭiśāstre nivāritam | katham | ityuktvā anena granthena 
anūdya | tatra hi granthaḥ 

(page 193)

athāsmākaṃ jñānaśaktiryā sadāśivarūpatā |
	vaiyākaraṇa............................................................... || (śi. dṛ. 2|1)

ityādiḥ | nanu yat paraṃ rūpaṃ, tadeva paśyantīśabdavācyaṃ 
bhaviṣyatītyāśaṅkya āha nahi iti 

	dṛśiḥ sakarmako dhātuḥ kiṃ paśyantīti kathyatām |
	yadyābhāsān bahirbhūtāṃstānsato hyasato'pi vā ||
	vartamānakriyārūḍhā dṛśiḥ paśyantyudāhṛtā | (śi. dṛ. 2|20)
	atha nāmnaiva paśyantī sphuṭameva jaḍā tataḥ | (śi. dṛ. 2|80)

ityādinā granthena viṣayārpitātmanā deśakāloparāgeṇa saṃkucitā 
dṛśiḥ kathaṃ parā paripūrṇā bhavediti abhihitam | deśakālottaratvena hi 
pūrṇatvamucitam | nanu paśyantyāṃ deśakālākārasaṃkocaḥ 
kimarthamaṅgīkriyate | hanta tarhi asaṃkucitaṃ paśyan asaṃkucitameva 
madhyamāyāṃ vikalpayet, vaikharyāṃ ca brūyāt paratra saṃkramayitum | 
nahi nīle dṛṣṭe pītaṃ vikalpyeta ucyeta vā | tasmādavikalpikā api paśyantī 
saṃkucitaiva aṅgīkartavyā | tadetadāha pratiśabdārthaṃ hi iti | 
yadyaducyate, tatra tatretyarthaḥ | pūrvapūrvā vāk iti paśyantī anyaṃ 
śabdaṃ anyaṃ ca arthaṃ parihṛtya tataḥ śabdādarthācca itarau 
śabdārthāvābhimukhyena samyak dadhānā āgṛhṇatī kathamiva parā 
pūrṇā bhavet, yato'sau viśiṣṭā tābhyāṃ śabdārthābhyāṃ 
deśakālākārasaṃkocavatī jātā | atra udāharaṇaṃ sphuṭīkaraṇāya āha 
pṛthubudhna ityādi | anena arthāntaraparihāreṇa arthāntarābhisandhānaṃ 
nidarśitam | paṭādi ityanena śabdāntaraparihāreṇa 
uttaraśabdābhisandhānam | nanu asaṃkucitarūpābhisandhānātmikā 
paśyantī tāvat paripūrṇā, saiva parā bhaviṣyatītyāśaṅkya āha viśva iti 
| ekaikatārūpavyavacchedena 

(page 194)

sākalyaṃ, ghaṭādiśabdavyavacchidā ca viśvaśabdamabhisaṃdadhānā, 
sāpi saṃkucitaiveti yāvat | nanu nirvikalpakadaśārūpā paśyantī | tatra 
yadidantātmakaṃ vapuḥ, tadahambhāvācchuritameva bhāti- ahamidamiti | 
tatra idantāṃśe ghaṭo vā viśvamapivā sphuradahaṃbhāve pūrṇe 
nimagnamiti galitasaṃkocanatvāt kathamiva tāṃ paśyantīṃ 
saṃkocayedityāśaṅkya āha ahaṃbhāvasyaiva māyīyasya na 
asaṃkucitatvam, apitu saṃkoca eva iti ghaṭayiṣyannasaṃkocasya 
viṣayavibhāgaṃ darśayati sā ca iti | caśabdaḥ prameyāntarasamuccaye | 
śarīraprāṇabuddhyādisaṃkocahīnasya cinmātrasya yat 
citrābhāsakāritvaṃ nāma śaktistayā viśvasya vācyagato vācakagataśca 
bhedo yadā ullāsyatvena āsūtryate, tadā tathollāsanecchā bhagavata 
īśvararūpasya viśvāvabhāsanecchā ucyate | tasyāmīśvaravyatiriktaṃ 
pramātrantaraṃ nāsti yadapekṣayā te bhāvā avasthāntareṇa bhāseranniti | 
asaṃkocabhāk iti ahaṃbhāve viśrāntaḥ | pūrṇatāṃ bhajanta iti na 
ayaṃ paśyantyā mahimā | bhedāsūtraṇarūpā hi sā | mahimā tu 
ayamahaṃbhāvasya | tataśca idantākṛtāt saṃkocāt tatrāpi kathaṃ 
paratvaṃ syāditi āśayaśeṣaḥ | tata eva śivadṛṣṭau saṃbhavantī 
tāvadiyatī gatiryā vaiyākaraṇairna dṛṣṭā api asmāddarśane paraṃ 
saṃbhavatīti darśitam 

	........... asmākaṃ .................. sadāśivarūpatā | (śi. dṛ. 2|1)

iti | māyīyānāṃ tu ahantā api dehādivāsanayā saṃkucitā, idantā api 
prameyāntaraparihāreṇa, prameyāntarāṇi ca santi pramātrantarāpekṣayā, 
tasyaiva ca prameyasya avasthāntaramapi asti yattena pramātrā na dṛśyate 
anyena ca dṛśyate kāminyā iva vairāgyāyatanatvam | 
evamubhayataḥsaṃkucitaṃ vartate māyāpramātṝṇāmahamidamiti

(page 195)

nirvikalpakarūpam | nanu kathaṃ tarhi uktaṃ prāgādisiddhasūtravivṛtau 
tasyāṃ hi daśāyāmaiśvaro bhāvaḥ paśorapi iti | atra āha tāvatī iti 
vedyasya vedakabhāganimagnatvameva tadaiśvaryamuktamiti yāvat | evaṃ 
grāmaṃ gacchāmīti mahāpaśyantī, gṛhāt niḥsarāmīti 
paśyantīmapekṣya tāvadyāvat sadāśiveśvaradaśā mahāpaśyantī 
māyāpramātṛvartyaśeṣapaśyantyapekṣayeti mantavyam | nanu 
māyāpramātṝṇāṃ paradaśāyāṃ tarhi kā vārtā | āha parā iti | 
ahamiti śuddhe'pi parāmarśe samādhānadārḍhyādau 
dehādyahaṃbhāvavāsanā cet vigalet, tat tadaiva dehādipātāt 
vyutthānābhāvaḥ | tataḥ sā vāsanā bhavantī tāmapi daśāṃ 
saṃkocayedeva | svapaśyantyapekṣayā tu tatra paratvaṃ 
vedyollāsavaikalyāt | yadyevaṃ, kiṃ tadasaṃkucitaṃ sarvathā yatra 
paratvamucitamityāśaṅkya āha tataśca iti ya eṣa viṣayavibhāga uktastato 
hetorityarthaḥ | ahamiti yat nityaṃ citsvarūpaṃ 
taddeśakālākārakṛtābhyāmādyantābhyāṃ śūnyaṃ nityoditaṃ, 
tadevaca parā [paramiti kha. |] iti svarasoditā iti vyākhyātam | ata eva iti 
yata evaṃ paratvaṃ bhavati, tata ityarthaḥ | vāṅnāma [nāma bhavatyanena 
ka. |] vaktītyanena vapuṣā yadi śuddhakartṛtāprāṇā 
ahamityasaṃkucitamahāmantramayī śabdanarūpā na upagamyate 
vaiyākaraṇaistadā karaṇarūpā sā buddhīndriyavargādapi nikṛṣṭā 
karmendriyasvabhāvā paśuprāṇibhistiryagādibhiḥ sādhāraṇā 
dhvanijanikā ahaṃkāravṛttireva kācit vāk pāṇyādivat, tatra ca kathaṃ 
paratvaṃ bhavediti | ato'pi iti enamapi nyāyamavalambya | tat iti paratvam | 
tatra iti śrīśivadṛṣṭau | tasyāḥ iti paśyantyā vācaḥ | ayaṃbhāvaḥ- iha 

(page 196)

tāvatparameśvaraḥ śabdarāśiḥ | śaktirasya bhinnābhinnarūpā vicitrā | 
mātṛkādevīvargāṣṭakaṃ rudraśaktyaṣṭakaṃ pañcāśadvarṇāḥ 
pañcāśadrudraśaktayaḥ |

	paṃcamantramahāmūrtirbhagavān................... |

ityādi vadatā bhagavatā tāvadāgameṣu śabdanaikaśarīratvaṃ 
vimarśātmatayā bhagavataḥ prakāśavapuṣo'ṅgīkṛtam | ye punaramī 
māyīyā varṇāḥ śabdātmānaste ghaṭādisthānīyāḥ | tadutthāpakaṃ ca 
avikalpasavikalparūpaṃ paśyantīmadhyamātmakaṃ jñānaṃ 
jñānāntarasthānīyam | tannirvartakaṃ ca vāgindriyaṃ 
pāṇyādisthānīyaṃ dvaitātmakamāyāpakṣanikṣiptaṃ ca | tat kathamiva 
paratattvaṃ syāt | viṣayajñānendriyarūpaṃ hi tat | yattu tatrāpi 
svakṛtyāṃśaprasādhakatvaṃ dṛśyate, tat paratattvabalasparśakṛtam 

	api tvātmabalasparśāt ......................... | (spa. kā. 8)

iti nītyā | tathāca nyarūpi bhagavatā

	te tairāliṃgitāḥ santaḥ sarvakāmaphalapradāḥ |
	bhavanti sādhakendrāṇāṃ nānyathā vīravandite | (mā. vi. 3|28)

ityādi | yat kāladeśākārakṛtyasaṃkucitaṃ, na tat paraṃ ghaṭa iva | 
tathāca pāśavaṃ śabdajñānatadindriyādīti | paratvaṃ pūrṇatvamucyate, 
tadviruddhaśca saṃkoca iti svabhāvaviruddhopalabdhiḥ | taduktaṃ 
śrīśivadṛṣṭau

	śaive vāca indriyatvam ..................... | (3|10)

ityādi,

	pāṇyādīndriyavannaitadbrahma vāgindriyaṃ bhavet | (2|17)

iti | tatraiva ca uktaṃ

	vimarśānubhavenaiṣā yathā vāk prathamaṃ śritā | (2|19)

(page 197)

ityāśaṃkya

	iti ceccaryatāṃ tāvatpaśyantī yujyate yathā | (2|20)

ityādinā

	yo hi paśyati paśyantīṃ sa devaḥ paramo mataḥ | (2|64)

iti granthena śabdanarūpatvaṃ bhagavataḥ | tata eva 
saṃvitsāramīmāṃsakena bhaṭṭaśrīnārāyaṇena stutaṃ

	sugirā cittahāriṇyā paśyantyā dṛśyamānayā |
	jayatyullāsitānandamahimā parameśvaraḥ || (sta. ci. 1)

iti | atra ca paśyantīśabdena śrīsadāśivabhūmirjñānaśaktisvabhāvā 
uktā | yā'sau mahāpaśyantīnāṃ 
pratyagātmarūpāṇāmavibhāgātmikā paramamahāpaśyantī tayā ca 
yo'sāvānandamahimā parasvātantryātmā ullāsanīyaḥ, sā bhagavataḥ 
parā vāditi darśitam | parasparapremadarśanaṃ raterānandātmikāyā 
ulāsanaṃ karotīti laukikanidarśanena ānanda eva sphuṭīkṛtaḥ | 
etatsarvamāgūrya sūtrasya aparamardhaṃ vyācaṣṭe saiva ca iti | 
mukhyaśabdasya vyavacchedyaṃ darśayati tathāhi ityādinā | yat 
vyatiriktaṃ, na tadviṣayamaiśvaryaṃ pūrṇaṃ 
pratihatisaṃbhāvanopalabdheḥ | pūrṇasya aiśvaryasya 
vyāpakamapratihatatvam | yadāha aiśvaryādavighātaḥ iti | tadviruddhaṃ 
ca pratighātasaṃbhāvanamiti vyāpakaviruddhopalabdhiḥ | 
yadanātmabhūtaṃ, tat na atyantaṃ pratipattricchānuvarti 
svakārāṇādyanuvṛttivinābhāvāt | yacca yasya na icchānuvarti, tatra tasya 
na aiśvaryaṃ kāliṅgasya iva vaṅgeṣu | yathāha vīranāgaḥ

	tadutpattirhetoḥ sthitirapi nijapratyayabalājjarā kālāt |

ityādi | aiśvaryavyāpakaṃ hi icchānuvartitvam, tasya idaṃ viruddhamiti;

(page 198)

aiśvaryameva ca ānandaḥ pūrṇatā,- iti upāpādi | tata eva āha muniḥ

	sarvaṃ paravaśaṃ duḥkhaṃ sarvamātmavaśaṃ sukham |

iti | ādiśabdena brahmaviṣṇurudrāṇāṃ parigrahaḥ | tathāhi sraṣṭavye 
sthāpayitavye saṃhartavye ca vyatirikte adhiṣṭhātāro 
māyāgarbhādhikāriṇo brahmādyāḥ, tadicchānuvartinaśca sarve 
lokapālā indragrahaṇena upalakṣitā mantavyāḥ | atra tuśabdena 
śrīmatsadāśiveśvaratāyā bhedamāha | ātmabhūtam iti ahaṃbhāvena 
avacchādanāt dehavadātmatāṃ prāptamityarthaḥ | paratantram iti 
svecchākalpitabhedatvena 
māyāśaktimidantāṃśamakhyātiprāṇamudbhedayitumapekṣamāṇam | 
svātantryam ityatra cchedaḥ | idaṃ tu iti yadatra sūtre prakrāntam | 
anantāyām iti pratiyogivirahāt tadapohanasaṃbhave vikalparūpatvena 
anāśaṃkyamānāyām | avyapadeśyāyām iti asāmayikyām | 
svarasavāhinyām iti nityoditāyām | dehādāviva na kalpitā iyamiti yāvat | 
idaṃ tu śuddhaṃ svātantryaṃ sarvasya idaṃbhāgasya ahantāyāṃ 
nimajjanāt | paraṃ svātantryaṃ yataḥ śuddham iti vākyasaṃgatiḥ | 
śuddhatve hetuḥ aiśvaryadaśāyāmiva iti, vaidharmyadṛṣṭāntaḥ | 
vijātīyarūpāntarānupraveśo hi aśuddhiriti bhāvaḥ | aparatā yatra nāsti, 
tat param | sā ca vyatirekavaśāditi darśayati aparamindrabrahmādi iti | 
aparatvaṃ ca pūrṇaṃ vā leśato veti tu avāntaravibhāgo vṛttikṛtā na 
spṛṣṭaḥ, vivṛtikṛtā tu darśitaḥ | yata idameva svātantryamaiśvaryam, tato 
yuktamavocāma .................. tena jaḍātsahi vilakṣaṇaḥ | (1|5|12) iti || 13 ||

	rahasyāgameṣvapi etat darśitamati sūtrāntaram | tadavatārayati 

(page 199)

	sā sphurattā mahāsattā deśakālāviśeṣiṇī |
	saiṣā sāratayā proktā hṛdayaṃ parameṣṭhinaḥ || 14 ||

	anyadapi asyāḥ iti karacaraṇādivyāpāravailakṣaṇyena 
vimarśarūpāyā ityarthaḥ | āgameṣu parameśvaraśāsaneṣu ādigrahaṇāt 
vedāntādau, muniprokteṣu siddhapraṇīteṣu, gurunirūpiteṣu ca śāstreṣu 
yadasyā rūpa nāmadheyanirvacanavaicitryalabdham, tat sūtrakāra āha |

	....................... tatra spandaḥ pratiṣṭhitaḥ | (spa. kā. 22)

iti

	guṇādispandaniḥṣyandāḥ .................. | (spa. kā. 19)

iti

	......................... spandatattvaviviktaye | (spa. kā. 21)

ityādau spandaśabdena

	ūrmireṣā vibodhābdhernistaraṅgasya kīrtitā |

iti ūrmiśabdena

	............................... sphurannirvṛtacit............... | (śi. dṛ. 1|2)

iti sphurattāśabdena sā vimarśaśaktiruktā | kiṃ bahunā | 
prāktanakuśalavipākapravartitasaṃvitparāmarśābhyāsatapaḥprabhāva-
pratilabdhonmeṣeṇa bhaṭṭaśaṃkaranandanena api

	sākṣātkāraḥ svataḥsiddhaḥ sā sphuradrūpatāsya hi |

iti nirūpitam | sphuraṇaspandanādikaṃ hi kiṃciccalanaṃ prasiddham, 
kiṃcittvaṃ ca idameva yadacale'pi calatvāvabhāsaḥ | loke'pi 
bahutarādhyavasāyasvātantryapūrṇo'pi acalapratiṣṭhaḥ spandavāniti 
ucyate | tadimāṃ sphurattāṃ lokaprasiddhimeva anusaran vyācaṣṭe 
ghaṭādayaḥ ityādinā | yadāca [yathā ceti kha. |] iti yataścetyarthaḥ | tam

(page 200)

iti bodham | mama sphurati ghaṭa iti hi ahamaṃśalagnā sphurattā 
saṃkramyate bhāve | ghaṭaḥ sphurati iti hi ko'rthaḥ | ahaṃ tāvat 
prakāśātmā ghaṭarūpeṇa sphurāmi bodhātmano manāgapi 
atiricyamāno'natiricyamānaśca, tathā svātantryāt cakāsmi 
tadekatārūḍho'pi ghaṭa evamiti | ata eva uktaṃ bhaṭṭacandrānandena 

	paśyato rūpamālekhādbhāto bhānānuṣaṅgi yat |
	svarūpabhānaṃ pratibhā bhāvānāṃ ................. ||

ityuktvā

	............................... sātmasaṃśrayā ||

iti | anyathā tu iti yadi svakameṣāṃ sphuraṇaṃ syāt | anyasyāpi iti 
yoṇyadeśakālaḥ | anyasyāpi ? iti apare paṭhanti | yadi hi teṣāmeva 
sphuraṇaṃ rūpaṃ, tataśca anyasaṃbandhisvarūpamahimnaiva 
tadvyavadhānādāvapi sarvasya tathābhimānabhājanaṃ bhaveyuḥ | etacca 
abhyupagameneti mantavyam | vastuto hi na paraṃ paraniṣṭhaṃ bhavitumarhati, 
- iti uktamasakṛt | tat bodha eva sphurati jalamiva, tadāveśāttu ghaṭādayo'pi 
tṛṇādīveti ekānto'yam | yadviyoge yasya yat na rūpaṃ, tat tasya 
tadāveśāt tṛṇasya iva vāyujalādiyoge cāñcalyam | tathāca 
ghaṭādīnāṃ sphuraṇaṃ na bodhaviyoga iti svabhāvaḥ | 
tadviyuktāvabhavanaṃ hi vipakṣāt tadāveśavyatirekāt nivartate svaṃ 
vyāpakamasvabhāvatāṃ virundhānaṃ svabhāvatvamavalokyeti 
vyāptisiddhiḥ | tata eva uktaṃ śrīparameṣṭhinā

	ātmaiva sarvabhāveṣu sphurat ...................... | (śi. dṛ. 1|2)

iti | evaṃ prakāśamānatvabhavatvapratibhāttveṣu bodhāveśakṛtameva 
bhāvasya kartṛtvaṃ samarthayitavyam | nanu iyatā prakāśa eva uktaḥ, natu 
vimarśaśaktirityāśaṅkya āha kevalam iti | prakāśasya api

(page 201)

vimarśalakṣaṇa eva nija ātmā | tena vinā hi aprakāśāt bhedo'munā 
durlabha iti upapāditam | mahāsattā iti vyākhyātuṃ sattāṃ tāvat 
vyācaṣṭe rūpeṇa iti | co vyākhyeyāntaraṃ samuccinoti | rūpeṇa 
svabhāvenetyarthaḥ | anyasya iti 
sattāsaṃbandhārthakriyākāritvāderaparatadrūpānveṣaṇayā 
anavasthopahatasya na pratiṣṭhāviśrāntirasti yataḥ | atha 
mahacchabdavyākhyānāya yā vṛttiḥ abhāvāpratiyoginī [vapra kha. |] iti, 
tāṃ vyācaṣṭe bodhavyatiriktaṃ ca iti | apiśabdena prāgabhāvādestāvat 
kathaṃcit bhāvarūpatā syāt, atyantābhāvasyāpi eṣā gatirityāha | nanu 
[nanu bhāvo'bhāva kha. |] abhāvo bhāvasya pratiyogī | satyaṃ 
bahiḥsadbhāvasya, natu prakāśamānatāyāḥ | tayā hi vinā pratiyogitaiva 
kasyeti darśayati bodhapratiyoginaḥ ityādinā | itarathā iti prakāśasya api 
yadi aprakāśaḥ pratiyogitvena śaṅkyamāno bhavet, 
tatastatpratikṣepasāro'hamiti vimarśo vikalpa eva syāt; naca asau vikalpa iti 
vakṣyate

	ahaṃ pratyavamarśo yaḥ prakāśātmā.............. | (1|6|1)

ityatra vistarata iti abhiprāyaśeṣaḥ | nanu 
dravyatvaghaṭatvādivadābhāsarūpaṃ sattā nāma sāmānyam | tacca 
prameyabhūmikāpannaṃ kathaṃ śuddhapramātṛdharmavimarśātmatayā 
nirūpyetetyāśaṃkāṃ nivārayati sattā ca na iti | sa hi sattāśabdo 
rūḍhyā pravṛttaḥ | ayaṃ bhavanārthasya aseḥ śatrantasya bhāvapratyayena 
vyutpāditaḥ ādṛtārthaḥ iti yāvat | viśeṣaṇaviśeṣaḥ 
abhāvāpratiyoginī iti | deśakālābhyāṃ niśeṣaṃ nityameva yā na 
gacchatīti yat sautraṃ, tadvṛttiḥ nityā ityādikā vyākhyātumupakramyate

(page 202)

cittattvasya iti nityatā iti saṃbandhaḥ | sarvadaiva iti sarvatra vā ityapi 
mantavyam | anena ca idamuktaṃ- yat khaṇḍitapṛthākaṃ, tadeva kvacit 
kadācicca bhavat deśakālābhyāṃ kāraṇabhūtābhyāmāviśyeteti 
kṛtakasyaiva tau viśeṣaṇaṃ, na akṛtakasya | saṃvedanasya 
prameyakakṣyāpatitasyaiva ca 
pramātṛsaṃyojyamānābhāsāntarābhidhānadharmayojanasahiṣṇostau 
viśeṣaṇaṃ, na prameyatottīrṇasya pramātrekarūpasya saṃvedanasya | nanu 
nityatā sūtre vaktavyatvena sūcitā yato vṛttau saiva sphuṭīkṛtā | tatra ca 
kālāsparśa eva kāraṇam | tatra kiṃ deśopanyāsena 
sūtravṛttyorityāśaṅkya āha kālaprasaṅgena iti 
saṃkocābhāvaprasaṅgenetyarthaḥ | nanu iti paramāṇorhi 
saṃkucitadeśasya api asti nityatā | nanu sarvathaiva asaṃkucitā saṃvit 
vimarśaśaktirnirūpyā, tat kālābhāva eva sūtre sūcita iti kutaḥ | pratyuta 
vṛttikārasya idamakauśalaṃ- yadanena deśāsaṃkoco na anuvartita 
ityāśaṅkya anyathā vyācaṣṭe athavā iti niyataṃbhavaṃ hi nityaṃ, 
naiyatyaṃ abhavanābhāvaḥ | yadyapi ca 
deśasaṃkocavatastatsvarūpaniṣṭhā nāsti, tathāpi atra [atra yanna kha. |] 
ayaṃ na bhavatīti āpekṣikaṃ saṃbhavatyeveti nityatayā tadabhāvo'pi 
vṛttāvupalakṣitaḥ | nanu vedyadharmāveva tāviti kasmāt | āha deśakālau 
hi iti | etacca vyākhyātaṃ

	jñānaṃ ca citsvarūpaṃ cet .................. | (1|2|7)

ityatra sūtre vitatya | antarmukhameva iti svātantryasṛṣṭaṃ tu 
bahirmukhīkṛtamiva bodho'yamatrādhunā ityādivikalpeṣu upāroha......... 
tāviti bhāvaḥ | nanu evaṃ prameyasya deśakālayoge idaṃ taditi yat 
sattātmakaṃ mahāsāmānyaṃ bhāti, yacca gotvādikamaparaṃ; tasya 
vyāpitvanityatve 

(page 203)

na syātāmiti codyaṃ pariharati idam ityādinā | 
ākārasaṃkoco'nyonyābhāvalakṣaṇo na atra saṃkocakaḥ | sarveṇa hi 
rūpeṇa saṃvidvimarśo bhavati | etadapi atra upalakṣitaṃ mantavyam | 
evamiyaṃ mahāsattā vyākhyātā

	śaṃbhoḥ śaktiḥ svatantratvātsattāmātrasvarūpiṇī |

iti 

	sadevedamagra āsīt | (chāṃ u. 6|2|1)

iti yā nirūpitā śrīrahasye śrutyante ca, kakṣyāstotre'pi

	..................... viśvasya sattā mahatīti soktā |

iti | atha sāratayā ityādi vyācaṣṭe iha iti viśvatra jagatītyarthaḥ | etacca

	tathā hi jaḍabhūtānām ......................... | (1|4)

iti sūtre vitatam | arthanirbhāso'pi iti darpaṇādisadṛśo'pīti yāvat; 
tathāca uktaṃ mayā śrītantrasārādau

	antarvibhāti sakalaṃ jagadātmanīha
		yadvadvicitraracanā makurāntarāle |
	bodhaḥ paraṃ nijavimarśanasārayuktyā
		viśvaṃ parāmṛśati no makurastathā tu || (3 ā.)

iti | tasyāśca iti kartṛtāyāḥ | svarūpopapādakatvāt iti 

	.........................ṇāprakāśaśca sidhyati |

iti |

	.................... na vinā tasmādicchāmarśaḥ pravartate | (1|10)

iti hi nyāyena prakāśabhinne bhāvajāte na boddhṛtvamupapadyate, nāpi 
cinmātratvamiti | tadetadāha uktayā iti | vakṣyamāṇayā

(page 204)

iti kriyādhikāre | niyatapūrvāparatāmātraṃ [tātmakaṃ kha. |] 
kāryakāraṇabhāva iti vitatya parākariṣyate 

	nahi svātmaikaniṣṭhānām............................. | (2|4|15)

ityādinā | tasyā api iti śrīsadāśiveśvarapadocitāyā ahamidamiti 
parāpararūpāyā ityarthaḥ | param iti ahamityetāvaditi yāvat | ahamityapi 
yadrūpaṃ, na tat nīlamitivedyasaṃsparśaniyatavimarśatulyamiti darśayati 
tasyāśca iti paraśivarūpāyāḥ | asyāḥ iti sarvatra vijṛmbhamāṇāyāḥ | 
saiva iti yaiva svātantryaprasaradiśā bāhyaparyantavimarśarūpā | eṣā iti 
akhilaprakāśānugrāhiṇī | pūrvikā iti icchādiśaktyantarakakṣyāṃ 
tāvadagṛhṇatī | kartṛtaiva iti asvātantryaleśo yasyāḥ na kaścit | 
citimātrarūpā iti etadeva cetanatvaṃ yataḥ | parasvātantryarūpamasyā 
vyācaṣṭe śodhitā iti | aparadaśāyāṃ bhinnaṃ, 
parāparadaśāyāmabhinnamiti ubhayathāpi yat vedyakāryarūpaṃ vastu, 
tadasyāṃ svātantryaśaktau pratyastamitaṃ ca pratyujjīvanayogyaṃ ca, 
pratyujjīvitaṃ ca akramameva āste iti | seyaṃ saptatriṃśī tattvakalā 
śuddhā ṣaṭtriṃśyāḥ paraṃ tattvamiti saṃbandhaḥ | iyatā sāratvaṃ 
nirṇītaṃ yat vitatya śrīviṣamadarśanasāraśāstre nirūpitaṃ 
śaktilakṣaṇena | iyatā sautraṃ sārapadam anuvādamukhena vidhirapi iti 
vyākhyātam | parameṣṭhinaḥ iti vyācaṣṭhe parame pade iti 
saptatriṃśarūpe | yathoktaṃ

	yogapīṭhasaṃsthitāya ............................... |

iti mantratattvaṃ vyākhyātuṃ bhagavatā

yogo'sya śaktayaḥ svākyā.................... | (ma. taṃ. 4|5)

(page 205)

iti, anyatra api

	sā parā paramā devī yoge bhairavayāmale |

ityādi | nanu

	cintayā rahitaṃ yacca tatparam ....................... |

ityuktaṃ, tatra kimanyat tiṣṭhatītyāśaṅkya āgamaṃ paṭhati parāt iti | 
parameṣṭhinaḥ iti vyākhyāya sāratayā iti sūtre yadanuvadanaṃ 
hetutayā hṛdayatve sādhye, tat vyācaṣṭe yathā iti [iti saṃbandhaḥ kha. |] 
cetanaṃ pratiṣṭhā iti saṃbandhaḥ, cetanāvatāmapi iti yathā iti 
saṃbandhaḥ | yathoktaṃ

	sākṣyaṃ [sākṣaṃ kha. |] kṛtsnamimaṃ dehaṃ yadyapi vyāpya 
tiṣṭhati |
	tathāpyasya paraṃ sthānaṃ hṛtpaṅkajasamudgakam ||

ityādi | prakṛte yojayati tathaiva iti | viśvacetanasya iti bhagavataḥ 
paramaśivasyetyarthaḥ | sā parā vimarśaśaktiḥ parameśvarasya 
pratiṣṭhā ityanena śabdena parameśvarasya hṛdayam ityanena ca śabdena 
vācyā | nanu kiṃ tayā vimarśaśaktyā asataḥ kāryatvānupapatteḥ | 
tattvabhuvanādikāryanirbharo'sau viśvātmā viśvarūpaḥ parameśvara iti 
ucyatāṃ param | naitadyuktamityāha anyathā iti | vimarśaktyā vinā 
mayūrāṇḍarasasya yā nīlapītādinirbhāratā sā yathā kāraṇatā, natu 
kartṛtā, tathā bhagavato'pi aśeṣaviśvanirbharatā syāt, naca 
kāraṇatāmātraṃ yuktamiti bhāvaḥ | camatkṛtirūpatvāt iti 
ānandātmakaparamabhogaparyantā viśrāntireva hi viśuddhaṃ 
svātantryaṃ yatra pratighātaleśakṛtamasvātantryaṃ manāgapi na 
śaṃkyaṃ yena

(page 206)

	ātmānamata eva ......................... | (1|5|15)

iti 

	svātantryāmuktam......................... | (1|5|16)

ityādi vicitraṃ nirmāṇaṃ vakṣyamāṇamabhivyanakti | tataḥ 
sarvotkarṣahetutvena sāratayā pratiṣṭhā sthānaṃ pāryantikaṃ hṛdayaṃ 
sā bhagavataḥ | itiśabdaḥ samastaitatsūtroktaṭīkārthaparāmarśako 
vṛttāvapi sphuradrūpatā iti sattā iti pratiṣṭhārūpā iti hṛdayam iti 
pratyekaṃ saṃbandhanīyaḥ | pratiṣṭhārūpeti prathamayā sāratayā iti 
śabdena vidhirapi sūcita iti vyākhyātam | anye tu- 
siddhāntāgamamātrābhiprāyeṇa mantro bhagavato hṛdayaṃ, mantraśca 
parāmarśamaya iti hṛdayaśabdena vimarśa āgameṣu vyavahriyate- iti 
manyamānāḥ pūrvamardhamanūdyamānārthatayā sāratayā iti ca 
hetutayā vyācakṣate | hṛdayameva iti na atra upacaritaṃ hṛdayatvam, apitu 
mukhyameveti bhāvaḥ | taduktaṃ

	brahmaṇo hi pratiṣṭhāhamamṛtasyāvyayasya ca |
	śāśvatasya ca dharmasya sukhasyaikāntikasya ca || (14|27)

iti gītāsu | anena sadrūpasya brahmaṇaḥ paramānandasya 
viśrāntisthānamahamitivimarśātmakaṃ darśitam | anyatra api

	yatsāramasya jagataḥ sā śaktirmālini parā |

iti

	na tairvinā bhavecchabdo nārtho nāpi citergatiḥ |

iti 

	tatra tāvat samāpannā mātṛbhāvam ............... | (mā. vi. 3|9)

ityādi

	na so'sti pratyayo..............................|
	vāgrūpatā cet ................................ || (vā. pa. 1|125)

(page 207)

ityādi | bauddhasāṃkhyādibhirapi adhyavasāyaviśrāntireva prakāśasya 
aṃgīkṛteti vimarśaśarīra [śarīra kha. |] eva prakāśo yuktaḥ || 14 ||

	nanu anantaśaktau bhagavati vimarśaśaktiḥ kathamitthamabhiṣiktā,- 
iti śaṅkāyāṃ sūtradvayaṃ

	ātmānamata evāyaṃ jñeyīkuryātpṛthaksthiti |
	jñeyaṃ natu tadaunmukhyātkhaṇḍyetāsya svatantratā || 15 ||
	svātantryāmuktamātmānaṃ svātantryādadvayātmanaḥ |
	prabhurīśādisaṃkalpairnirmāya vyavahārayet || 16 ||

	tatra kartṛtvalakṣaṇā svātantryaśaktirviśvaśaktiśreṇīsamā-
kṣepeṇa vartate iti saiva vimarśarūpā pradhānamiti tātparyam | tatra 
prathamaṃ ślokamavatārayati ataśca iti samānādhikaraṇāḥ 
paṃcamyarthāḥ, anena ataḥ iti vyākhyātam | ayam iti paṭhitvā vyācaṣṭe 
parameśvaraḥ iti | evakāramātmaśabdānantarīkṛtaṃ viśvasya na anyat 
rūpamiti sphuṭīkṛrtuṃ vyācaṣṭe viśvam ityādinā | 
jñātṛrūpatvādajñeyamevaṃ jñeyaṃ karoti,- iti dṛḍhena anumānena 
saṃbhāvyate hetvantarānupapatteruktatvāt | tāmimāṃ dṛḍhāṃ 
saṃbhāvanāṃ niyogalakṣaṇāṃ niyamāt ityanena vivṛṇoti | anenaiva ca 
padena pṛthaksthiti jñeyaṃ natu ityādi sakalaṃ vākyaṃ saṃkṣepeṇa 
vyākhyātam | asya hi prasaṅgo'rthaḥ, prasaṅgaviparyaye tu tātparyam- yadi 
pṛthaksthiti jñeyaṃ, tadā tadaunmukhye paratantro'yam iti asvatantro'yamiti 
asvatantro jaḍaḥ, jaḍasya ca kathaṃ jñeyaviṣayaṃ svātantryamiti 
prasaṅgaḥ | svasaṃvitsiddhaṃ ca idamasya | tato'yaṃ svātantryāt na 
paronmukha iti ātmānameva viśvaṃ jñeyīkaroti,-

(page 208)

iti prasaṅgaviparyayadiṣṭasiddhiriti sūtrārthaḥ | kāraṇāt iti bījādiva 
aṃkuraḥ | jāyeta iti yadi idaṃ yuktyā ghaṭeta, natu ghaṭate iti 
abhiprāyaśeṣaḥ | nanu kumbhakāro bhāvitaṃ ghaṭaṃ buddhyā 
abhisandhāya karoti, natu ātmānamiti saṃbhāvanāṃ nirasyati bhāvinyapi 
iti | pṛthagbhūtā iti ghaṭarūpa eva viśrāntā, natu saṃvidrūpe 
pratiṣṭhitetyarthaḥ | etaduktaṃ bhavati- na vastutaḥ kumbhakṛt kartā,- iti 
uktaṃ vistarataḥ | nahi asya śuddhaṃ kartṛtvam | viruddharūpam iti 
pararūpam | nanu śuddhatvaṃ kathamiti anukuryāt | āha aniyantritaṃ hi iti 
niyantraṇaṃ hi pratighāto'svātantryamaśuddhasvātantryam | nanu 
viruddhatā tarhi śabdamātram | āha lokāpekṣayā iti | nanu 
parameśvarādaparaḥ ko lokaḥ | satyaṃ, sa eva tu 
parigṛhītamāyāśaktipracchādanapuraḥsaratayā 
vedyavedakayugalasahasramayo loka iti darśayati lokaṃ prati iti | nanu adhunā 
bhinne kartṛtā na yukteti brahmādīnāṃ tiryagantānāṃ sā kathaṃ syāt | 
ka evamāha- teṣāṃ kartṛtā kvacidapi- iti | kasya tarhi | āha 
parameśvarasyaiva iti | upacaritaiva iti 
tadicchopakalpitābhimānamātrasārā yāvadabhimānaṃ, na yathāvastu | 
tata eva

	abhimānagrahatyāge na kaścit karmabandhanaḥ |

ityādi gītādipradeśeṣu nirṇītam | natu vibhoḥ iti na tasya upacaritā 
kartṛtā | yadi ca vyatiriktajñeyonmukhatā bhavet, upacaritā iyaṃ syāt; na 
pāramārthikī,- iti cittattvasya kartṛtābhāve viśvaṃ na kiṃcit syāditi 
prasaṃgaḥ | asti tu tat | tadanupacaritā sā | anupacaritatvaṃ vā itthaṃ- yadi 
na vyatiriktaṃ jñeyaṃ kāryaṃ ca, 

(page 209)

apitu ātmaiva jñeyīkriyate iti | atraca svātantryaśaktireva vijṛmbhate iti saiva 
pradhānamiti piṇḍārtho vṛttivivṛtyoḥ | dvitīyaṃ ślokamavatārayan na 
kevalam ityādinā vedyīkaroti ityantena pūrvasūtrārthamupajīvati ata eva 
ityanena | etat viśeṣayituṃ tadānīntanam iti tadaiva tadekatayā sphurantam, 
yat vakṣyati yadāpi ātmānameva vaktāram ityādi | śivaḥ 
parameśvaraḥ,- ityādiparāmarśopalakṣitasya hi na śuddhaiva vedyatā, yat 
vakṣyati śivādiśabdānām ityādi | duṣkaramapi iti ātmano 
ghaṭāditayā vedyatādhānaṃ tāvatkaraṇaṃ ca, tacca śakyaṃ kadācit, 
idaṃ tu aśakyaṃ- yat vedakameva sat vedyaṃ ca sat vedakameva- iti | tadapi 
svātantryāt saṃpadyate yato vedyena saha vedakasya ekatā tattvataḥ | tat 
ghaṭādervedyīkṛtasya vedyatākāle bhavantyapi vāstavī vedakatā 
māyāśaktyā vedakabhāgādācchidyeva pracchāditā kartavyā, 
śivādiparāmarśe tu vedakāṃśādanācchinnasyaiva sā vedyateti | 
anyathā iti yadyevamapi kartuṃ na śaknuyāt, tadaviruddhameva 
[tadviruddhaṃ kha. |] arthaṃ jānīyāt kuryācca; tato 
niyamavyudastarūpajñānakaraṇāyogāt sarvaṃ jānāti karotīti yaḥ 
sarvaśabdastasya artho viluptaḥ syāt | nanu sa sarvaṃ jānātu ca karotu ca | 
yattu śivādiśabdavācyaṃ nirmitaṃ, tadavinirmuktasvātantryamiti kutaḥ | 
atra āha śivādi iti | tataḥ iti śivādiśabdāduccaritāt | tasyaiva iti 
sarvajñādirūpasya vedakasya upadeṣṭṛpade vartamānasya | 
evaṃnyāyabalena tadānīntano vaktā vedakarūpa eva sṛṣṭa iti pratipāditam 
| parāmarśabalena api evamiti brūte yadāpi iti |

(page 210)

	ahamātmā guḍākeśa sarvabhūtāśayasthitaḥ | (bha. gī. 10|20)

iti 

	sarvasya cāhaṃ hṛdi saṃniviṣṭo ................ | (bh. gī. 15|15)

ityādau na śarīrādirūpaṃ tadīyaṃ sarvasya ātmā sarvasya hṛdi 
saṃniviṣṭamupadiṣṭaṃ pratyakṣādivirodhāt | tadāha bodhātmatayā iti | 
tatra svakaṃ nidarśanamāha yathā iti parameśvaraḥ ityantam | 
yataścaivaṃ tadapi iti tata idamāpatati | kim | āha yo'haṃ vacmi iti 
nirdeśavaśena vakturātmanaḥ sa śiva iti nirdeśabalena pratipādyasya sato 
yaḥ sa eva pratipādako ya'hamidaṃ vacmi iti nirdeśabalāt, tasya yat 
lakṣaṇaṃ kartṛbhāvaḥ [kartṛtābhāvaḥ ka. |] kartṛtvaṃ nāma, tat 
vartamānamakhaṇḍitasya | sa yāvat iti | so'pi nāma | tenaiva iti 
akhaṇḍitapratipādakatvalakṣaṇakartṛbhāvena pratipādyate | 
yāvacchabdo'piśabdārthe iti duṣkaratādyotakaḥ | nanu pratipadyatāṃ 
tathā, tathātu nirmita iti kutaḥ | brūte pratipādyamānataiva ca iti | nanu 
tathābhūtena kiṃ nirmāṇena | ucyate tasyaivaca iti akhaṇḍitasvātantryasya 
| anyathāhi īśvara ityanīśvara iti bhāvanāderaviśeṣaḥ syāt | evamīśvaro 
mayā pūjyate dhyāyate upadiśyate ityādau nirmitastāvadasau pṛthak 
pramāturavabhāsāt, naca atyantaṃ pṛthak svātmanyeva tathābhāsāditi | 
tathā iti atyaktasvātantryatayā | tenaiva iti īśvareṇa | anye tu- ata eva 
svātantryāditi ślokadvayena śivādisṛṣṭireva prādhānyena abhidheyā 
[dheyasyārthasya kha. |] asya arthasya prasiddhatvāt, tatra tu pūrvaślokoktaṃ 
nīlādinirmāṇaṃ dṛṣṭāntaḥ, dṛṣṭāntatāyojanāyaiva

(page 211)

kevalamityādyavatāraṇagranthaḥ- iti yojayanti | vyavahārayet iti śaki liṅ | 
evaṃca yojanā- evamātmānaṃ nirmāya 
upadeśapūjanabhāvanādivyahāramātmā kartumātmani śaktaḥ, 
tasmāditthamapi ātmānaṃ jñeyīkuryāt; tatra na vimarśaśaktireva heturiti 
yuktamavocāma

	svabhāvamavabhāsasya........................ | (1|5|11)

iti | tena jñeyīkaraṇameva pradhānaṃ vidheyamiti vyākhyātuṃ vṛttiḥ 
ābhāsayati iti anyathā ābhāsya vyavahāravatīti vṛttirucitā syāt || 15-16 ||

	nanu sa eva ātmā pratipādyaḥ, pratipādakaśceti kutaḥ | prakāśo hi 
bhidyate pratipādakasya nirābhāsatvāt, pratipādyasya ca sābhāsatvāt, 
vimarśābhedādabhedaḥ satyapi ābhasabhede sphuṭāsphuṭādāviva

	goḥ stanātpātataḥ kṣīre vikārastata eva hi |
	naca na kṣīramityeṣa vyapadeśo'sti tatkṣaṇam || (śi. dṛ. 1|18)

iti nyāyeneti | etadapi atra nāsti pratipādakasya ahamitivimṛśyatvāt, idamiti 
tu pratipādyasya | atra uttaradānāya śaṅkitapūrvapakṣaṃ [pakṣa kha. |] 
sūtraṃ

	nāhantādiparāmarśabhedādasyānyatātmanaḥ |
	ahaṃmṛśyatayaivāsya sṛṣṭestiṅvācyakarmavat || 17 ||

	etatpūrvapakṣopakramaṃ saṃkṣipya avatārayati ābhāsabheda iti | 
etatparāmarśabhede'pi ityantaṃ pūrvapakṣavyākhyānam | vakṣyate iti 

	dūrāntikatayārthānām............................ | (2|3|10)

(page 212)

ityatra | mūlaparāmarśa ityādi uttaravyākhyānam | 
mūlaparāmarśo'hamiti, tasya atyāgastena vinā ayamīśvara ityasyaiva 
parāmarśasya apratiṣṭhatvāt [ṣṭhitakāle kha. |] tatkāle'pi 
anuvedhakatvena avasthānam | ādiśabdena tiṅkriyayoḥ 
pratyayamasattvabhūtāṃ ca śaktimupalakṣayituṃ sūtre nirdeśa iti 
vyācaṣṭe | kriyābhedena ca ābhāsaparāmarśau bhinnāvapi 
ekaparāmarśapratiṣṭhitau bhavataḥ- nipīyamānaṃ madhu madayati, 
kumbhakāro'yaṃ kriyate- iti | tadāha yogyatayā iti | kadācit iti | kālena 
kriyāpi upalakṣyate, prakṛte tu etadvaidharmyamityāha atra tu iti | tena 
bhinnāveva parāmarśāviti siddham | ābhāsāvapi bhinnāviti darśayituṃ 
yā vṛttiḥ ābhāsabhede ca iti, tāṃ vyācaṣṭe vyatirikta eva iti 
bhāvayituḥ | anābhāsasya iti vedakatayā | tadānīm iti tasminneva kāle | 
yadekasminneva kāle bhinnābhāsavimarśaṃ, tat bhinnaṃ ghaṭapaṭavaditi 
svabhāvahetuḥ | evaṃbhūtamapi yadi abhinnaṃ syāt, tat bhedo na kvacit 
syāditi kvacitsaṃbhavatvaṃ yadasya vyāpakaṃ, tat hīyeteti 
vyāpakānupalabdhyā vipakṣāt hetornivṛttiriti vyāptisiddhiḥ | evamiyatā 
ahantedantāparāmarśasya, tadupalakṣitasya ca ābhāsasya bhedādātmano 
vedakarūpasya ca anyatā śaṅkyate iti 
sūtraśaṅkitapūrvapakṣavyākhyānam | tathāpi ityanena 
samuccayopayuktāt caśabdādekasmādaparamapiśabdārthaṃ vartamānaṃ 
vyācakṣāṇo netisautravṛttigranthagatapramātaivetyevakāraspṛṣṭaṃ 
siddhāntabhāgaṃ vyācaṣṭe ātmā iti nirbhāsanakāle na para iti 
sphuraṇam | īśvaraḥ iti īṣṭe, svatantraḥ iti jīvitaṃ, śivaḥ śreya ānando 
viśrāntiriti tattvaṃ, pramātā pramimīte jānāti karoti iti vastu |

(page 213)

tadatra sarvatra ahamiti cet nirūḍhirna jātā, tadā ātmādiparāmarśā api na 
parāmarśā eva viśrāntyalābhāt | viśrāntisthānamevaca parāmarśa iti | 
nanu evamātmetyapi parāmarśo'haṃparāmarśasatattva iti kathamucyate 
ātmā tatra sṛṣṭa iti | āha kevalam iti ahamiti upakrama eva 
svātantryaparāmarśaḥ, ātmetyādau tu upakrame prameyatvena 
idantālakṣaṇapāratantryonmeṣaḥ [nmeṣe satyapi kha. |] satyapi 
anuvedhakatayā antaḥsthite ahaṃparāmarśe, tadāśayena sṛṣṭirucyate | 
antarīkṛtya garbhīkāreṇa antarṇīya vyavadhāyikāṃ ca tāṃ vidhāya | 
tathāhi ātmeti parāmarśasya anantaraṃ yadi ahantā na sphuret, tat 
pramāturviśrāntirna bhavediti 
ātmaparāmarśaviśrāntiparāmarśayormadhye ahamiti vyavadhātā 
parāmarśaḥ pākaparāmarśaviśrāntiparāmarśayoriva 
pacatītiparāmarśaḥ | nanu ahaṃparāmarśe'pi idantā sphurati upakrame 
kṛśo'hamityādau | satyaṃ, tatra tu idantānuviddho'sāvahamitivimarśaḥ 
śuddhāhaṃparāmarśe viśrāmyati,- iti uktamasakṛt

	yadyapyarthasthitiḥ................................. | (a. pra. si. 20)

iti nyāyena, kevalaṃ tatra svātantryameva ubhayyāmapi ahantāyāṃ, 
prācyaṃ tu dehādisaṃkucitam | tadāha 
parāmarśāntarāvyavadhānena iti | iha tu upakrame ātmāyamiti 
prameyatākṛtaṃ pāratantryaṃ bhātīti ahaṃpratītirvyavadhātrīti uktā | 
etat saṃvādayati ata eva iti | yataḥ sākṣātparāmarśo 
vyavahitaparāmarśādantaraṅgaḥ, tataḥ kleśakarmasūtroktā api 
īśvaraśabdena pāratantryaspṛśyā parameśvarasya yā vācyatā uktā, 
tāmanādṛtya sūtrāntaram | praṇavopalakṣito hi rahasyabījamantrakalāpaḥ 
saṃvidvimarśaparamārthaḥ prameyarūpaṃ 

(page 214)

paratantramarthaṃ naiva ullāsayati | ata evaṃvidhaḥ śabdo'vyayamiti ucyate 
| bahiḥsṛṣṭasya hi liṅgasaṃkhyādiśaktyantarayuktatā syāt, na 
āntararūpasya saṃvidrūpasya taddharmasya vā | ata eva 
samuccayanavikalpanādikaṃ bāhyavastuniṣṭhatvābhāvāt 
saṃvedanasvātantryollāsanalakṣaṇaṃ dharmamabhidyotayantaścādayo'pi 
asattvabhūtārthaniṣṭhā iti ucyante | samuccaya ityādau tu tadeva rūpaṃ 
sṛṣṭaṃ bhāti, tato liṅgasaṃkhyādiyogaḥ tatrāpi ca-arthapratītau ca 
apivyavadhānameva | praṇavena ca 
jāgradādyavasthācatuṣkaparāmarśasvātantryamayena 
viruddhavidhiniṣedhādisamastābhyupagamarūpecchādiśaktyavighāta-
parāmarśinā sa īśvaraḥ satyataḥ parāmṛṣṭo bhavati svatantrasvabhāvaḥ, 
- iti

	tajjapastadarthabhāvanam | (yo. sū. 1|28)

ityuktam, prameyarūpatāspṛśastu śabdāstathārūpavyavadhinā 
tatparāmarśaṃ vidadhate | yathoktamāgame

	bhriyātsarvaṃ ravayati sarvado vyāpako'khile | 
iti bhairavaśabdasya santatoccāraṇācchivaḥ || (vi. bhai. 130)

iti | etadarthamevaca bhagavataiva śivādipadānāṃ 
'srīmadvyomavyāpimahāmantrarāje mantravivaraṇaṃ svayameva nirūpitam 
| tadanusāreṇaiva vyāsamuniprabhṛtayo'pi

	tisro devyo yadā cainam ........................... |

ityādi nirūpitavantaḥ | yadavalambanādabhijñānirvacanādyapi 
nāmasahasraparyantamanyairnirucyate | tata eva pāñcarātrikā 
niruktamādriyante | tiṅvācyakarmavat iti vyācaṣṭe yathā iti | 
siddharūpaṃ svatantramiti upakrame, sādhyamānaṃ 
paratantrārthaparyantībhūtamiti viśrāntau | pacati iti krameṇa 
kriyājātiguṇaparāmarśāḥ | ādigrahaṇāt kālādayaḥ | yathāha 
tatrabhavān

(page 215)

	dik sādhanaṃ kriyā kāla iti vastvabhidhāyinaḥ |
	śaktirūpe padārthānāmatyantamanavasthitāḥ || (vā. pa. 3|6|1)

iti | tata eva dravyāyamāṇānāmeṣāṃ saṃkhyākālādisaṃbandho na 
virudhyate, dvāvekatvaguṇāvayaṃ vartamānaḥ kālaḥ pūrvaṃ 
bhaviṣyannabhūtkarkī viṣṇujanmani bhūto bhavitā,- iti | 
ghaṭāvapākṣīdityādiparāmarśapratipanne tu saṃkhyākālādau sa 
nāstyeveti | tata eva tattvatastatparāmarśāḥ, na itare | svadarśanaṃ 
ghaṭayituṃ vṛttau dṛṣṭāntāntaraṃ yaduktaṃ, tat vyācaṣṭe yathāca iti | 
dārṣṭāntikasya pūrvamuktatvāt tatheti na punarupasaṃhāraḥ | smṛtiḥ iti 
vartamānavikalpanarūpā | asya dṛṣṭāntasya prakṛtena sāmyaṃ nāsti 
ubhayatra api smṛtāvanubhave ca ghaṭa itiparāmarśābhedādityāśayena 
āha atrāpi iti | sa iti parāmarśāntaramupakrame bhavadapi ayaṃ ghaṭa iti 
pūrvaparāmarśaviśrāntaṃ prathate | nanu sa iti na vastuparāmarśasya 
bhedakaṃ rūpaṃ, ābhāsabhedamātrametat kālabhedakṛtam | naca 
ābhāsabhedo bhedaka ityāśayena āha pakṣāntaraṃ sākṣāt ityādinā | 
sarvasāmyābhāve'pi vyavadhānāṃśe dṛṣṭāntaḥ prakṛte iti yāvat | 
etadeva ca yuktamiti darśayati parāmarśa ityādinā uktaprāyam ityantena 
| tena bhinnābhāsavimarśatvādātmano grāhyagrāhakatāyāṃ yugapat 
bheda ityatra hetāvābhāsabhedo vimarśabhedāpekṣo bhedako, 
vimarśabhedaśca nāstyeva,- iti so'pi asatkalpa iti heturatyantāsiddhīkṛta iti 
tātparyam | nanu evaṃ ghaṭa ityapi parāmarśo'hantāyāmeva viśrāmyati | 
yathoktaṃ

	idamityasya vicchinnavimarśasya....................... | (a. pra. si. 15)

ityādi | tat ghaṭādisṛṣṭerapi kathaṃ parihṛtavedakabhāvatvaṃ yena 
ātmādisṛṣṭereva svātantryāmuktatvamuktamityāśaṅkya āha 
māyāpade ca iti |

(page 216)

satyametat, kintu pramātā ghaṭādyarthakriyāmarthayamānastāṃ 
bhinnaparāmarśasaṃpādyāmeva abhimanyate iti 
pāryantikamahantāparāmarśamadasīyaṃ na ādriyate, 
ātmādyarthakriyāṃ tu tatparyantaparāmarśaviśramamantareṇa na labhate, 
yathā pākādyarthā kriyā sādhyatāparāmarśam, tatastāṃ 
pāryantikīmeva viśrāntimatra pramāṇayati | māyāpadaṃ hi idaṃ 
vimṛśyate, tatra ca ahantedantayorvirodhaḥ, idantāyāmapi parasparaṃ 
ghaṭapaṭādīnāṃ, yadāha grāhyāṇāṃ ca iti | 
caitramaitrādyahantābhedo'pi ayaṃ grāhyarūpaśarīrādibhedāyatta 
ityāśayena punargrāhakāṇāṃ ca iti na avocat | tatrasthānām iti 
cinmātrasthānām | śuddhatvaṃ 
śarīrādyārūṣitamāyīyāhaṃbhāvāpekṣayā ahaṃbhāvasya | sa ca 
śuddhaḥ sarvameva sahate | svātantryaparamārtho hi asau | etacca uktaṃ

	svāminaśca................................. | (1|5|10)

ityatra || 17 ||

	nanu ātmaiva parameśvara iti tava saṃmataṃ, ātmā ca grāhakarūpo 
jñānādhyavasāyasmaraṇasaṃkalpādibhireva vyavahāraṃ vartayati, na 
vimarśaśaktyā; tat kasya anyasya sā nirūpitā,- ityāśaṅkāyāṃ sūtraṃ

	māyāśaktyā vibhoḥ saiva bhinnasaṃvedyagocarā |
	kathitā jñānasaṃkalpādhyavasāyādināmabhiḥ || 18 ||

	satyaṃ vibhureva ātmā parameśvaraḥ | sa tu māyāśaktyā 
saṃkocāt grāhako yathā, tathaiva vimarśaśaktirapi 
māyāśaktisaṃkocitavedyoparāgasaṃkucitā satī jñānasmaraṇādirūpeti 
ucyate, nāmamātreṇa tu vimarśaśaktyatiriktaṃ kimapi 
jñānāditattvāntaramiti tātparyam | anena ca iyamapi śaṅkā śamitā 
bhavati- nanu viśvaparāmarśāstāva-

(page 217)

dahamityetāvanmātratatvāstataśca jñānasmṛtyādayo bhagavataḥ 
śaktayaḥ iti kathamuktaṃ, jñānādīnāṃ ca saṃśayādibhedaḥ kathaṃ, 
kathaṃca nīlādivaicitryamiti | māyīyavedyoparāgajaṃ hi idamiti hi 
tātparyam | etadavatārayati saiva ca iti | anupapannābhāsanaṃ māyā, tatra 
sāmarthyaṃ śaktiḥ; tadvaśāt bhinne vedake yat vedyaṃ bhinnaṃ vedyācca 
vedakācca tatra tatretyantaṃ pramātari vyākhyeyaṃ vaiyadhikaraṇyena 
prameye ca, anyathā sūtre'pi bhinne bhinnena ca iti | tatra tatra iti vicitre, yato 
vaicitryādeva jñānādināmabhedaḥ | evam iti uktaṃ yat yuktijātaṃ tat iti 
tasmāt hetorayamartho na nihnotavyaḥ | ko'sau | āha artha iti | ekarūpa iti, 
natu bahavaḥ prakāśāstadbhedahetūnāṃ 
deśakālākārādīnāmabhāvāt | viśvātmā iti sarvapramātṛtvena 
sarvajño'nyasya vedanāyogāt | viśvakṛt iti anyathā 
vaicitryamidamahetukameva syāditi hi upapāditaṃ vitatya, upapādayiṣyate ca 
| nanu īśvareṇa māyāśaktyā bhāsyate iti vaktavye kā iyaṃ vṛttyuktiriti 
matvā āha upayogāt iti | adhikopayogaprakāśanaṃ prayojanamabhipretya 
upacāro'yaṃ mantavya iti bhāvaḥ | ṣaṣṭhī ca iyaṃ bhāsyate 
ityetadapekṣayā [pekṣāpi kha. |] api yojyā | vṛttāvapi evam | yato'nyasya na 
kasyacit bhāsyate, tato vibhorjñānādikāḥ śaktayaḥ; natu ātmanāmiti 
darśayati tathāpi iti māyāpade'pi iti | tatra jñānaṃ vyācaṣṭe 
abhinavam iti apūrvam | pramātuḥ iti māyīyasya | nanu evaṃ 
vibhorbhāsyate iti kathamityata āha tacca ityādi | tat iti tato hetoḥ | tadīyā 
iti aiśvarī | saiva iti jñānam iti pūrveṇa saṃbandhaḥ | adhyakṣam iti 
vyācaṣṭe indriya iti 

(page 218)

akṣaiḥ karaṇatayā adhiṣṭhitamityarthaḥ | nanu pratyakṣasya avaśyaṃ 
viṣayeṇa bhāvyaṃ, tat kathaṃ sa vṛttau na uktaḥ | ka evamāhetyāha 
prakṛtam iti | viśvaṃ bhedena ābhāsyate iti hi uktam | tasyaiva bhinnasya 
iti vṛttiṃ śaṅkitapūrvapakṣanirākaraṇena vyācaṣṭe tasyaiva iti 
anubhūtasyetyarthaḥ | nanu smṛtāvadhyavasāye ca evamastu, saṃkalpe tu 
nava ekaviṣaya utthāpyate, ādigrahaṇagṛhīte ca saṃśayotprekṣādau 
vikalpe; tat kathaṃ smṛtisaṃkalpādhyavasāyasādhāraṇyena tasya iti 
vṛttāvuktamiti | atra pratibrūte anubhavasaṃskāra iti | evaṃ 
bāhyābhiprāyeṇa tasyaiva iti vṛttāvuktaṃ, yadivā tasyaiva iti 
anubhūtasyeti na vyākhyāyate, apitu māyāśaktiparavaśasyeti | etacca 
rūpaṃ vikalpyasya api asti,- iti vyākhyāntaraṃ darśayati tadānīmapi 
ityādinā | nanu pratyagātmano manovṛttiḥ saṃkalpaḥ, 
buddhivṛttiradhyavasāyaḥ, evamakṣavṛttirbuddhivṛttirvā jñānaṃ, 
manobuddhyakṣāṇāṃ ca jaḍatvamiti jñānādayaḥ kathaṃ 
citisvabhāvāḥ,- iti codyaṃ garbhīkṛtya vṛttāvapiśabdo yaḥ prayuktaḥ, 
tadvyākhyānāya āha yadyapi ca iti | atra uttaraṃ sphuṭayati tathāpi iti |

	yadyapyarthasthitiḥ.......................... | (a. pra. si. 20)

iti nayena pratyagātmā śuddhasaṃvinmātraparamārthaḥ,- iti 
manobuddhyakṣavṛttīnāṃ vimarśātmakacidrūpataiva | evamevaca 
upakrāntaṃ vṛttikṛteti vṛttau darśayati citiśaktiḥ iti | co hetau | yataḥ 
pratyagātmā vṛttau parameśvara iti kathitaḥ, tataścitiśaktiriha parā kartṛtā 
mantavyā, viparyayeṇa vā hetuhetumattā yojyā | phalaṃ hi tulyam | nanu 
adhyavasāyo jñānenaiva svīkṛtaḥ | satyaṃ, asti tu aparo'sau yadarthaṃ 
punaradhyavasāyapadamiti darśayati

(page 219)

adhyavasāyaśca iti | sākṣātkāraikyena iti tāvataḥ 
sākṣātkārarūpatvāt | pratyakṣasya vyāpāro'dhyavasāyaḥ, vyāpāreṇa 
ca tadvato bhinnena na sthīyate, adhyavasāyabalāt vā aikyam | yadāha 
pratyakṣāyante hi vikalpāḥ iti | asti kūpaḥ iti saṃśayarūpaḥ pramukhe 
tathātvena aparisphuṭa ityarthaḥ || 18 ||

	nanu savikalpe smṛtyādivarge astu vimarśo'bhilāpayojanāmayaḥ, 
sākṣātkārātmani tu anubhave tādṛśadarśanarūpe smṛteḥ pitaraṃ 
saṃskāraprabodhaṃ vidadhāne tatkāraṇakasaṃketasmaraṇāyogāt 
kāraṇānupalabdhyā pratyavamarśābhāva eva yukta iti 
parabhramabhañjanāya sūtraṃ

	sākṣātkārakṣaṇe'pyasti vimarśaḥ kathamanyathā |
	dhāvanādyupapadyeta pratisandhānavarjitam || 19 ||

	etadavatārayati kathamanyathā 
ityādiyuktirūpasūtrāṃśārthopakramaṃ prathamasūtrabhāgābhidheyaṃ 
sādhyatayā paścāt nirdiśan | nanu parāmarśamantareṇa iti | satyaṃ, 
asti hi saḥ, ālocanasya tu paścāt | etat na sahate uttarakāla ityādinā | 
svātmani iti vikalparūpe pūrvajñāne sākṣātkāre vā avabhātasyeti 
vikalpadvyam | prathamamuddiśya āha svatmani iti | atra iti sākṣātkāre | na 
yujyate ityatra hetumāha yataḥ iti | yāvadityādinā iti yadevaṃbhūtaṃ 
vastu, tasya hetutvamasminnarthe iti yāvat | pūrvaṃ sādhye nirdiṣṭe 
yacchabdenaiva upakramyamāṇasya hetutāvagataye pañcamī | nahi atra 
tacchabdo bhavitā yata utpannā hetuvibhaktistasya arthasya hetutāṃ 
gamayediti | etat samīkaroti tat iti | arthasya iti arthe hi savikalpakaḥ, na 
svātmani tatra asya sākṣātkārarūpatvāt | etat dūṣayati tathāpi

(page 220)

iti | yatra hi na sākṣātkārātmā asau, tatra vikalpaḥ; [lpakaḥ kha. |] yatra ca 
na sākṣātkārātmā, so'rtho'prakāśamāna evaeti aprakāśamānasya 
vikalpe vimarśanaṃ vidadhat sarvasya pūrvajñānāvabhātasya kiṃ na 
vidadhyādaprakāśamānatvena aviśeṣāt | prakāśitasyaiva vikalpanaṃ 
yuktaṃ, na itarasyetyāśayena pūrvagrahaṇaṃ jñānagrahaṇaṃ ca | atra 
parakīyaṃ viśeṣapratipādanamāśaṃkate dūṣaṇāya athāpi iti | etat 
dūṣayati tatrāpi iti evamucyamāne satyapītyarthaḥ | pratipāditam iti 

	satyam .................................................. | (1|3|1)

ityādi upakramya

	dṛksvābhāsaiva ................................. | (1|3|2)

ityatra prakaraṇe | tataḥ iti uktāt nyāyāt | yat vikalpyena [lpeta kha. |] saha 
aikyaṃ sākṣātkārasya, sa nirvikalpakatvābhāve hetuḥ | atha 
dṛṣṭasaṃkalanātmakam [saṃkalpakātmakaṃ kha. |] iti yadrūpaṃ 
vikalpanasya sākṣātkārabuddhāvasaṃbhavitvena darśitaṃ, tat 
vyāpakapūrvāparaparāmarśānupalabdhyā tadvikalpasyāpi na saṃbhavati 
nirvimarśatāyāṃ sākṣātkāradhiya iti darśayati nacāpi iti |

	saṃketasmaraṇopāyam........................ | (pra. vā. 3|174)

iti hi nirūpitam | tatra saṃketasya smaraṇaṃ 
saṃskārādhānasaṃskāraprabodhayorāyattam, tau ca nirvikalpakena 
kartumaśakyau | uktaṃ hi anubhavaḥ paṭīyān smṛtibījamādhatte, 
tādṛśadarśanādasya prabodhaḥ iti | paṭīyastāṃ ca anubhavasya na 
aparāṃ kāṃcana manmahe ṛte vimarśaviśrānteḥ | yadapi bhaṭṭena 
nirūpitaṃ

	praroho'syāḥ paṭīyastvam .......................... |

(page 221)

iti | tatrāpi prarohasya pramātṛviśrāntimahamitthameva bhāse- 
ityevaṃbhūtavimarśarūpāṃ tāṃ kimutānyadrūpāmutpaśyāmaḥ | 
tādṛśatvamapi darśanasya prarūḍhataiveti vimarśarūpatvābhāve kathaṃ 
saṃskārasya ādhānaṃ prabodhanaṃ vā syāt | yat punaḥ 
prāmāṇyaparīkṣāyai bhaṭṭena uktaṃ 

vyaktaḥ [vyarthaḥ prakāśaḥ ga. |] prakāśaḥ svārthārthaṃ 
[svārthārthasaṃ kha. |] saṃskārapratibodhakaḥ |
nānyathā syādvikalpe'pi tatpravṛttirapīṣyatām ||

iti | tatra yadi vyaktiḥ prakāśasya yathāvyākṛtaprarohapaṭīyastvādirūpā 
na iṣyate, tadā na kiṃcit | apaṭīyaso'pi ca saṃskāraprabodhakatvāpattīḥ | 
paṭīyānitiviśeṣaṇānarthakyaṃ kīrtigranthe | yaśca tatra viniścayaḥ 
saṃvāditaḥ

	taddṛṣṭāveva dṛṣṭeṣu saṃvitsāmarthyabhāvinā |

ityādiḥ, tatra saṃvidaḥ sāmarthyamasāmarthyavilakṣaṇamastyeveti alaṃ 
bhūyasā | etadeva krameṇa nidarśayati nahi iti | agnitvameva hi 
dhūmahetutvamiti dṛṣṭe vahnau tat dṛṣṭameveti nālikeradvīpavāsino'pi 
tathā saṃskārādhānāt bhavet smaraṇam | dhūmaheturayamiti 
smaraṇalakṣaṇakāryābhāve ca kāryaikānumeyaḥ saṃskāra āhita iti 
kathaṃ bhavet | evaṃ saṃskārasya ādhānaṃ vimarśaśūnyo bodho na 
karotīti nidarśya prabodhanamapi na karotīti nidarśayati nāpi dhūmaḥ iti | 
nanu kāraṇatvamarthasya paropādhikatvena vyavahāraparaṃ [hāryaṃ 
paraṃ ga. pāṭhaḥ |] na 
sākṣātkāramanupādhikasvalakṣaṇaprakāśanamātrasvabhāvamupā-
roḍhumalaṃ, tat kāraṇatvaṃ dṛṣṭameva netyāśaṅkya nidarśanāntaraṃ 
darśayati mārgagamana iti | nacāpi iti pūrveṇa saṃbandhaḥ | svātmani 
iti ādhānābhāvasya udāharaṇam, sahacāri ityādi prabodhanābhāvasya | 
evamupasaṃharati tataśca iti | vimarśarūpatātmakakāraṇābhāvāt 

(page 222)

tatkāryasaṃskārādhānaprabodhanābhidhānakāraṇābhāve kāryasya 
smaraṇasya abhāvāt tatkāraṇānupalabdhau saṃkalanaṃ nāma 
vikalpanameva na bhavet | na kevalaṃ kāraṇābhāvena, svarūpeṇa apica 
dṛṣṭasaṃkalanaṃ na upapadyate iti darśayati naca iti | dṛṣṭaṃ hi 
svalakṣaṇadvayaṃ | tacca kathaṃ saṃkalyeta saṃkalanāvikalpasya 
tadaviṣayatvāt, aviṣayasya apica saṃkalane'tiprasaṅgaḥ | tena

	saṃketasmaraṇopāyam......................... | (pra. vā. 3|174)

ityādi pratipadaṃ dūṣitam | yacca viniścaye tat na 
indriyajñānamarthasaṃyojanānāṃ kalpanāmāviśati,- iti upasaṃhṛtam | 
tadeva yujyate yadi jātiguṇakriyādravyasaṃyojanātmakameva vikalpasya 
svarūpaṃ syāt, naca evamiti upakramate nacāpi iti | nanu bhavatu vikalpasya 
smaraṇātmakaṃ rūpāntaraṃ, tattu na parākartavyaṃ pratyakṣe tasya 
anāśaṅkanīyatvāt | idantāgrāhitvaspaṣṭatvādisākṣātkāradharmāva-
bhāsabhāvitavibhramāṇāmayaṃ gauḥ śuklaścalati viṣāṇīti tu vikalpane 
saṃbhāvyate adhyakṣarūpateti tadeva vikalpanaṃ 
pratyakṣarūpādapakraṣṭavyam, smaraṇasya tu tāvatā vikalpatve ko doṣaḥ 
ityāśaṅkya siddhāntī svābhiprāyamācaṣṭe tacca ityādinā | 
smaryamāṇasya pratibhāsanavikalpane kramike, akramike veti vikalpadvaye 
prathamaṃ parākaroti tatra iti | naca evam iti nīladarśanaṃ 
tato'dhyavasāyaḥ iti yathā darśanānantarabhāvī vikalpo bhāti, na evaṃ 
nirdagdhapitṛsmaraṇe dagdhapitṛdarśanaṃ; tato'sya vikalpanamiti rūpaṃ 
saṃvedyate | tathābhāve hi sphuṭamadhyakṣatvameva syāt, na smaraṇatvaṃ 
smaraṇatvavyāpakasa-itiparāmarśaviruddhāyamitiparāmarśaprasaṅgāt,- 
ityāśayaḥ | ādyaṃ vikalpaṃ parākṛtya, aparaṃ svadarśanapātitvena 
yojayati atha iti | kim iti | asti hi saṃbhavo yatpratibhāsanasamakālatvaṃ 
vikalpanasya aviruddhamiti | tat sākṣātkāro'pi

(page 223)

pratibhāsanasamakālavikalpanasvabhāvo'rthe kiṃ na sahyate | etat paro na 
mṛṣyate athāpi iti | smṛtāvadhyavasāye vā pratibhāsamānasya yadi 
vikalpanaṃ syāt, tat codyeta [taccocyeta kha. |] nāma 
pratibhāsanavikalpanayoḥ kramākramayogastṛtīyaprakārābhāvāt | 
yāvatā na pratibhāsamānasya atra vikalpanam | pratibhāsate hi tatra 
svātmākāro vā vijñānadṛśi asanvā buddhito [buddhirno na kha. |] na 
bahiḥ iti nyāyena vaibhāṣikadṛśi | sa ca na vikalpayituṃ śakyate, sahi 
prakāśyate param | vikalpyate tu yaḥ, adhyavasīyate sa eva | naca 
pratibhāsamāno'dhyavasīyate | atra āha tat iti | bhavatā yadidamavādi, 
tadeva vicārayitumidametatsūtrābhidheyaṃ vastu prakrāntam | 
pratibhāsamāna eva asti vimarśa iti hi vayaṃ brūmaḥ | tatra kathaṃ pareṇa 
nāsti pratibhāsamāne vimarśa itīyat pratijānānena jīyate | 
svasaṃvedanasvopagamaviruddhā ca iyaṃ pratijñā,- iti darśayati 
svābhāsaḥ [svapratibhāsaḥ ka. ga. |] iti | svapratibhāso'rthatvena 
adhyavasīyate iti hi vacaḥ svapratibhāsasya adhyavaseyatāṃ brūte | saivaca 
vikalpanīyateti svābhāsa eva vikalpya iti pratibhāsamānasya 
vikalpyatāyāṃ yuktaḥ kramākramavicāra iti tātparyam | yuktibādhā iti

	saṃketasmaraṇopāyam................. | (pra. vā. 3|174)

iti, 

	...............'rthasya sāmarthyena samudbhavāt |

ityādikā | sā tu yuktibādhā evam iti uktavakṣyamāṇanītyā atraiva sūtre 
niṣidhyate, sūtrāntareṣu ca agne niṣetsyate | tasyāṃ ca apasāritāyāṃ 
svapratibhāsasyaiva nirvādaṃ vikalpyatve saṃvedanamiti 
pratibhāsanavimarśanayorna kālabhedaḥ kaścit | nanu vimarśanaṃ 
śabdayojanayā,

(page 224)

sā ca saṃketasmaraṇataḥ, tadapi saṃskāraprabodhāt, so'pi tādṛśadṛśaḥ, 
atastasyāṃ prapitāmahakalpāyāṃ kathaṃ vimarśanaṃ bhavet,- 
ityāśa'nkāśamanāya abhilāpayojanāyāṃ saṃskāramahimnā 
siddhāyāṃ saṃketasmaraṇavighnaṃ pareṇaiva apasāryamāṇaṃ kartuṃ 
paraṃ prati praśnagarbhamiva āha naca iti | saṃskārajatve'pi iti 
saṃskārajanmatayā sarvametat siddham, natu tadupari 
śabdasaṃketasmaraṇaṃ dvitīyaṃ kalpanīyamiti apiśabdaḥ | antarā iti 
pratibhāsanavikalpanayormadhye | nanu madhye mā bhūt, tatsmaraṇāt 
pūrvameva tu bhaviṣyati | etadapi niṣedhati naca iti | sahasotpadyamānataiva 
atra hetuḥ | anubhavasaṃskāra iti yena nīlaprakāśa eva punaḥ 
pratyujjivatīveti | viśiṣṭaśabda iti vikalpānantarameva hi smṛtibījasya 
ādhānamiti uktam | yataḥ svakāraṇāt iti 
vikalpaparyantatādṛśadarśanaprabodhitāt saṃskāradvayātmana ityarthaḥ | 
parataḥ iti dvitīyamityarthaḥ | etadevaca yuktam, anyathā tu anavastheti 
darśayati saṃketasmaraṇamapica iti | anena sarvatra abhilāpayojanāyāṃ 
saṃketasmaraṇasyaiva kāraṇatāyāṃ vikalpo'pi na kaścidutpadyeteti 
darśayan vikalpotpattereva kāraṇāntarajā api asti śabdayojanā,- ityāha | 
evamabhilāpayojanāprāṇe'pi smaraṇe saṃketasmaraṇāntaravighnaḥ 
pareṇa apasārito yena prakāreṇa, tameva anubhave'pi abhilāpayojanātmani 
samīkartumāha tataḥ iti bhavaduktādeva kāraṇavaiśiṣṭyādityarthaḥ | tat 
darśayati svaśabda ityādinā | so'pi iti anubhavaḥ | tasya iti arthasya | 
anyathā vā iti janakatvaikasāmagrīkatvādinā, tena 

	......................'rthasya sāmarthyena samudbhavāt |

iti aprayojako hetuḥ | nahi arthagatāt svabhāvādabhilāpavattāmanubhavasya

(page 225)

ācakṣmahe viṣayapakṣe abhilāpabhāgasya asphuraṇāt

	ghaṭo'yamityadhyavasā........................ | (1|5|20)

iti bhāvinyāyena, api tu manaskāramāhātmyāditi ākūtaśeṣaḥ | nanu

	ṣaṇṇāmanantarātītaṃ vijñānaṃ yattu tanmanaḥ |

iti samanantarabodha eva manaskāro yathā nīlabodhasya pītabodhaḥ, naca 
pītabodho [bobo ka. |] nīlaśabdābhilāpayoga ityāśaṅkāṃ śamayati 
idameva hi iti | indriyasya sādguṇyamiva [ṣādguṇyaṃ kha. |], ālokasya 
amandatā iva, viṣayasya yogyadeśatvamiva, manaso'pi avahitatvaṃ nāma 
yat kāraśabdena adhikena uktaṃ, tadapekṣaṇīyam | avadhānaṃ ca idameva 
ucyate- yat kila didṛkṣitavastuvācakaśabdasaṃskāraprabodhakatvaṃ; 
[śabdapra ka. | prabodhavattvaṃ ga. |] tathāpi abhidharmikaireva [dharmakaiḥ 
ka. |] uktaṃ manaskāraścittābhoga iti, ābhogaśca 
vimarśanonmukhatvameva ucyate | taiḥ iti boddhaiḥ bodharūpatā 
samanantarapratyayāt iti vadadbhiḥ | tena kāraṇasāmagrījanmanaḥ kāryasya 
kāraṇāṃśabalādutpadyamāno viśeṣo na apareṇa 
kāraṇāṃśāntarajanmanā viśeṣeṇa virudhyate ghaṭasya iva 
mṛdrūpatayā saṃniveśaḥ | tathāca bodhasya vimarśarūpatā 
manovadhānātmakakāraṇāṃśabalopanateti na 
arthātmakakāraṇāntarajanmayā viṣayavattayā virudhyate | virodhasya hi 
sahānavasthitirūpasya kāraṇaṃ kāraṇāntarāsaṃbhavo nāma mṛtpiṇḍe 
viśiṣṭasaṃniveśābhāvāt | tadviruddhaśca kāraṇāntarasaṃbhavaḥ iti 
kāraṇaviruddhopalabdhiḥ | tadāha tato yathā iti | janayati iti manaskāraḥ 
iti saṃbandhaḥ | avadhānasya tu tāratamyena kramika eva sphuṭabhāvena 

(page 226)

prasara iti prathamamantaraṅgasvabhāve ahamātmani rūpe vimarśabalena 
svīkāraḥ, tata idamityahaṃbhāvasāmānādhikaraṇyena 
sadāśivabhūmyadhiṣṭhānaṃ, tato'pi idamityeva bhedamātreṇa, tato'pi 
ghaṭa ityādiviśeṣeṇa,- iti | naca atra viśeṣāṇāṃ pariniṣṭhā kācit, 
kevalaṃ yata eva pramātā viramati, sa eva pāścāttyo viśeṣa iti 
tadvimarśata eva viśrāntaḥ pramātā bhavati,- iti tatparyantameva smaraṇam 
| tata eva āha sūkṣmaḥ iti | uttarottaraprasarāpekṣayā 
pūrvapūrvaniṣṭhaṃ saukṣmyaṃ yataḥ | tadāha tatrabhavān bhartṛhariḥ 

	pratisaṃhṛtakramāntaḥ satyapyabhede samāviṣṭakramaśaktiḥ 
paśyantī | sā acalā ca calā pratilabdhāsamādhānā ca, 
saṃvinniṣṭhajñeyākārāpratilīnākārā nirākārā ca, 
paricchinnārthapratyavabhāsā saṃsṛṣṭārthapratyavabhāsā ca 
sarvārthapratyavabhāsā praśāntapratyavabhāsā ca | iti | anena hi 
aparimāṇabhedatvena ahantedantayorvicitratā uktā | tathāca 
mārgagatāvidantāvimarśata eva pramāturuparama iti tāvati eva smaraṇam, 
uttarottarāpekṣayā ca pūrvapūrvasya 
saṃvartitaśabdabhāvanārūpatvādavikalpatvamucyate satyapi 
vimarśaviśeṣātmakavikalparūpatve | ādyaṃ tu yat- ahamiti, ahamidamiti ca 
rūpadvayaṃ, tatra kevalaṃ śuddhaiva vimarśarūpatā, natu 
vikalpātmakatvamiti nirṇāyiṣyate anantara eva āhnike | nanu ca 
samanantarapratyayarūpasya manasaḥ kuto'yamavadhānaśabdavācyo 
bhavadupakalpito'bhilāpasaṃskārayoga ityāśaṅkya āha yathā iti | 
samanantaraḥ pūrvo janakakṣaṇāpekṣayā yaḥ kṣaṇastatra | anyonyam iti | 
nahi atra apavarakapraveśavat kālāntarapratīkṣā saṃvedyate | saha iti, natu 
pṛthak | pūrvaṃ te indriyādayo tathābhūtā 
vimarśajananaśaktamanaskārātmasāmarthyavihīnāḥ, paścāttu 
svakāraṇabalāt tathābhūtasaṃskāravantaḥ,

(page 227)

natu tathābhūtānāṃ tathābhāve upādānasahakāripratyayāḥ paryante 
vopasarpaṇapratyayā hetutvena santi,- iti darśayati athābhipāte'pi iti | 
nanu na saṃvedyante tādṛṃśi kāraṇāni | atra ucyate viśvavartinām iti | 
merurapi himavataḥ sthitau ghaṭasya vā janmani nākāraṇameva tasmin 
yathādeśakālamāsīne tatsthityutpādādi nirvighnaṃ yataḥ | tathāca 
abhidharmaḥ 

	svato'nye kāraṇahetuḥ.......................... | (a. kośa 2|50)

iti kāryavyatiriktasya hetoḥ kāraṇatāmavocat | amunaiva [neva kha. |] 
āśayena āryaprajñākaragupto bhāvino'pi svakālāvasthānena 
kāraṇatāmavocat [t iti kha. |] | evaṃ paramatamanubhāṣya enameva 
nyāyaṃ svapakṣasiddhaye yojayati evamapi tata eva iti | etadeva dṛḍhīkaroti 
avaśyam iti | pratyakṣaṃ tāvat svabhāvataḥ parāmarśaśūnyaṃ bālasya 
| eṣa hi bhavatāṃ pakṣaḥ | pūrvaṃ yat saṃketadarśanaṃ tadāhito yaḥ 
saṃskārastasya prabodhanena ca smṛtyanantaraṃ parāmarśakriyayā 
bhavitavyaṃ, bālasya tu pūrvadarśanābhāvāt saṃskāra eva nāsti,- iti 
parāmarśaśūnyametadīyaṃ pratyakṣaṃ sarvam | naca aparāmṛṣṭe 
saṃketopapattiriti vitatya darśayati tathāhi iti | śravaṇamātraṃ 
darśanamātram iti 
parasparasaṃparkāyogyaśabdārthasvalakṣaṇadvayaniṣṭhaṃ 
jñānadvayamityarthaḥ | na caivam iti prasaṅgānantaraṃ tadviparyayaṃ 
darśayati | na aparāmarśakaṃ bālasya ādyaṃ vedanaṃ 
saṃketagrahaṇotthāpakatvāt, aparāmarśakatāyā viruddhaṃ yat 
parāmarśakatvaṃ, tena vyāptaṃ saṃketotthāpanam, tasya hi 
vyāpakāntaraṃ śabdārthayoḥ parasparādhyāsalakṣaṇena anuṣaṅgena 
grahaṇam, tadviruddhaṃ ca ananuṣaktagrahaṇam | parāmārśakatvaṃ 
[aparā ga. |] tadvyāpakaviruddhopalabdhitrastaṃ 
saṃketotthāpanaparāmarśakāt nivṛttaṃ 

(page 228)

parāmarśakatvena vyāpyate iti viruddhavyāptopalabdhiḥ | ādyatve cāpi 
śabdāntaraparāmṛṣṭa eva apūrvaśabdasya saṃketagrahaṇaṃ dṛṣṭaṃ 
kokilaparāmṛśye pikaśabdasya iva | tat paryantavartinā samayānapekṣiṇā 
saṃvedanabalāyātena śabdanena [śabdena ka. |] vinā 
sāṃketikaśabdayojanaiva na upapadyeta | sarvaśabdavācyatā hi sarvasya 
arthasyeti antato varṇamātrātmanā api huṃkārāṃśena asāmayika [asama 
kha. |] eva parāmarśaḥ, punarvyavahāraniyamāya niyataḥ śabdaḥ 
saṃketyate, tasyāpi pramātṛsāttve anya iti hi saṃketaparamārthaḥ | tasya iti 
sa parāmarśo'rthālocanasya svabhāva eva kiṃ na upeyeta | tathopagame hi 
saṃketasmaraṇaṃ dūṣaṇaṃ yathoktaṃ

	saṃketasmaraṇopāyam..................... | (pra. vā. 3|174)

ityādi

	arthopayoge'pi punaḥ smārthaṃ śabdānuyojanam |

ityādi ca | yathā saṃketanam iti pṛthagbhāve'pi hi upagate 
darśanavikalpanayoḥ saṃvedanabalāyātaṃ tādātmyaṃ samarthanīyam | 
yathoktaṃ

	vikalpā hi pratyakṣāyante |

iti

	abhraṣṭadarśanasaṃskārasya |

ityādi ca | tato yuktyā paraṃ tayoḥ pṛthaktā vācyā | tasyāṃ ca 
saṃketasmaraṇameva vijṛmbhate | tadvighnāpahastane ca kṛte 
abādhitasaṃvitsiddhamavaśyābhyupagantavyam, anyathā na 
kiṃcidabhyupagamyaṃ [dapyupagamyaṃ kha. |] syāditi vyavahārasiddhaye 
svabhāvahetuḥ | nanu bālasya pūrvadarśanasaṃskāro nāstīti asiddhamiti 
paramataṃ niṣedhati bālasya

(page 229)

ityādinā | yat kila bālye smaryate yatra na tathā antaḥkaraṇapāṭavaṃ, tat 
yauvane na smaryate iti kaḥ śraddhadhīta, yauvane ca tat smaraṇe smaryeta, 
anyathā dhātrīmapi na smarediti kāryābhāvāt tat nāstīti | nanu uktaṃ 
pratyakṣasādhana eva indriyadhiyaḥ kalpanāvirahaḥ 

	saṃhṛtya sarvataścintāṃ stimitenāntarātmanā |
	sthito'pi cakṣuṣā rūpamīkṣate sākṣajā matiḥ ||
	punarvikalpayan kiṃcidāsīnme kalpanedṛśī |
	iti vetti na pūrvoktāvasthāyāmindriyādgatau ||

iti | satyamuktaṃ, tattu na parāmarśābhāvasādhanāya alam | tathāhi 
sarvacintāsaṃhāre tatsamanantaraṃ tāvadadhyavasāyena na utpattavyaṃ 
tadutpattau stimitetarayoraviśeṣaprasaṅgāt, adhyavasāyānutpattau sā ca 
daśā asti,- iti kathamavyavaharaṇīyatvāt | smaraṇena vyavahariṣyate 
[vyavahāriṣyate kha. |] iti cet tadanupapattiṃ svadarśane tāvadāha 
darśanasmaraṇayorhi iti pūrvaṃ hi smaraṇāhnike 

	sa hi pūrvānubhūtārthopalabdhā...................... | (1|4|1)

ityādinā idamupapāditam- yatkila darśanasya smaraṇasya ca 
yadyekamantarmukhaṃ parāmarśamayaṃ cittattvaṃ, tadā bhavati 
abhīnnaviṣayatvaṃ; na anyathā | draṣṭuśca saṃvidrūpasya iyameva 
draṣṭṛtā- yadidantāvimarśe bhittisthānatayā pratiṣṭhāpadatvena 
ahaṃvimarśamayatvamiti stimitatā api vimarśamayī eveti pareṇa api 
etadavaśyābhyupetyamityāha vāstava iti | pramātā iti | 
ahamitthamidānīṃ nirbhāse itivikalpajīvitaḥ santānasvabhāvaśca 
asāvityāha tadaikyaṃ ca iti | ata [ata eva ka. |] eva pravahadrūpatvena 
udayāt yugapadubhau vikalpāve-

(page 230)

katvaśarīraprāṇasantānena avatiṣṭhete | tato'pi uktaṃ tadaikyaṃ ca iti | 
atra upapattiṃ ghaṭayati tathāhi iti | anubhavajaḥ saṃskāro vikalparūpe 
pramātari viśrāmyati | uktaṃ hi nāvimṛṣṭaṃ smṛtibījamādhatte iti | na 
iṣṭam iti | saṃbandhasiddhirapi 

	tatrāpi yaḥ parāmarśaviṣayo laukikasya saḥ |
	cidabhedāprathārūpabhedasārasya vedituḥ |
	vyāpāro'nena ruddho'sau na vikalpāntaraṃ vrajet |
	vikalpāntarasaṃsparśe mātṛbhedaprasaṅgataḥ || (9, 10)

iti | evaṃca vikalpānudaye vyavahāryataiva na syāt staimityasya | naca 
samanantarameva vikalpodayo yuktaḥ stimitetarayoraviśeṣaprasaṅgāditi 
uktam | nanu tadanantaraṃ yadyapi na vikalpa udeti, tathāpi kālāntare 
smaraṇasya utpatsyamānatākṣaṇe sa udeṣyati | netyāha naca iti | teṣām iti 
avāstavapramātṛvādinām | pramāturvikalpātmana utthānaṃ kasmāt na 
yuktam | āha antara iti | stimitatāyāḥ smṛteśca madhye bhavan yo 
vikalpastena yaḥ staimityadarśanasaṃskāravicchedo'yamiti 
idānīntanakālāntarabhāvyapi ata eva saṃskāravicchedāt 
hetornīlānubhavāntaratadvikalpanavichinnasaṃskāranirvikalpānubhava iva 
stimitatānubhave'pi na syāt smaraṇam | yadivā vākyadvayametat | antara 
ityādinā kālāntarabhāvinā api vikalpanasaṃbhedāt stimitataiva na syāditi 
uktam | ata eva ityādinā tatra [tat ka. |] smaraṇaṃ na bhavet | darśitaṃ ca tat 
punarvikalpayan iti vadatā iti āveditam | tadavaśyaṃ staimitye 
vikalpanarūpeṇa pramātrā bhavitavyaṃ, naca tataḥ pṛthagbhūteneti 
vimarśasya stimitadarśanatādātmyenaiva sthitiḥ

(page 231)

siddhā | tataśca pratyakṣasādhanatvena pratyuta kalpanātādātmyameva 
sidhyati,- iti viruddho'yaṃ hetuḥ | nanu kālāntarabhāvī vikalpo na 
stimitānubhavaṃ saṃbhettuṃ prabhavati, tat kathaṃ tatsaṃskāro vicchidyeta 
| samanantaravartī hi vikalpo nairantaryāt pṛthagalakṣyamāṇaḥ kāmaṃ 
nirvikalpakasaṃskāraṃ vicchindyāt | tat kālāntarodite vikalpalakṣaṇe 
pramātari na staimityasya bhādhaḥ kaścit, nāpi tatsmaraṇasya,- 
ityāśaṅkya āha vikalpo'pica iti co vyākyātaśaṅkāsūcakaḥ | smārtaḥ 
iti gṛhītagrahaṇarūpatvāt sarvo vikalpaḥ smṛtisvabhāva eva, kevalaṃ 
kadācidanubhavacchāyānurāgādayamiti udyan [udyat ka. |] sa iti amunā 
vapuṣā na avabhāsate | smaraṇaṃ [ṇaṃ ca |] nāma darśanena saha 
viṣayaikye bhavati | viṣayaikyaṃ pramātṛviśrāntyāyattam | sāpi sati 
pramātari | so'pi vikalpamayaḥ | vikalpa evaca idānīmuttiṣṭhati,- iti 
cakrakam | smṛtireva smārtaḥ, iti svārthikaḥ pratyayaḥ | svārthikatve'pica 
prakṛtito liṅgātivṛttirupagatā śamīra aupayikamityādivat | smṛtiśabdo vā 
jātau, bahuvacanānto vā varge | tato bhave taddhita iti smṛtijātīyatvaṃ 
smṛtivargīṇatvaṃ vā uktam | athavā śabdasaṃketasmṛterāyatto vikalpa iti 
smārtaḥ sa smṛtyabhāve kathaṃ bhavet | smṛtiśca 
pramātrutthānamantareṇa na yukteti vimarśasvabhāve 
pramātṛmaye'nubhave'nabhyupagamyamāne na syādeva vikalpaḥ 
kaścidanubhavānantaraṃ kālāntare'pi veti asati parāmarśe na vikalpaḥ 
smṛterabhāvāditi kāraṇānupalabdhiḥ, asati parāmarśe na 
smṛtirviṣayaikyāyogāditi vyāpakānupalabdhiḥ | tadiyatā granthena 
staimityasya abhāva [āśraya kha. |] eva darśitaḥ | nanu anubhūyate 
staimityasya smṛtirabādhitā, sā tasminnasati kathaṃ syādityāśaṅkya 

(page 232)

savimarśatve'pi staimityasamarthanaṃ pakṣāntaraṃ gṛhṇāti saṃskṛta iti | 
vimarśasaṃbhavasya staimityasya ca na kaścit virodhaḥ | tathāhi 
avahitamanaskāramahimnā bhavannapi dṛśyamānapadārthaviṣayo 
vimarśabhāgaḥ prakāśāṃśādabhinnaḥ kṣaṇamātrabhāvī 
kṣaṇāntaravikalpābhyāsena sūḍhatāṃ na nīta iti na kālāntare smaryate | 
nanu prakāśāṃśo'pi evamiti so'pi prakāśabhāgagato vimarśo na 
smaryate | maivam, prakāśabhāgasya hi svasaṃvidviśrāntilakṣaṇo'pi 
vimarśaḥ so'ntaraṅgatvāt [tvādādarapratyayamayo nityameva 
kṣaṇamātrabhāvyapi antaraṅgatvāt kha. |] dṛḍharūḍhimayatvena 
paṭīyāneveti tena avaśyādheyaḥ saṃskārastadasau prakāśāṃśaniṣṭha 
eva smaryate | arthabhāgastu pramāturbahiraṅga iti tanniṣṭho vimarśaḥ 
punarvikalpaparamparābhyasta eva prarohamabhyeti, na anyatheti sarvaṃ 
sustham | tadāha iti tat sarvatra samarthitaṃ vimarśamayatvamāhetyarthaḥ | 
anena saptamyantasya pūrveṇa saṃbandha ityāha tvarita iti | hetupadaṃ 
kriyāgrahaṇasya dhāvanādisautrapadavyākhyānāya kṛtasya 
vyāvartyamāha jñānaṃ hi iti | svakāraṇādhīnaṃ iti kākākṣivat 
pūrvottaraviśeṣaṇatvena yojyam | yadāhuḥ 

	ghaṭādau mīlitaṃ cakṣuḥ paṭaṃ nahi na paśyati |

iti |

	smaraṇādabhilāpena.......................... |

iti | atha dhāvanasya ādipadasya ca prakārārthasya vyākhyānāya yat 
śīghrapadaṃ, tasya vyāvartyamāha kriyāpi iti śayanāsanādikā 
niranusandhānatṛṇatroṭanādikā vā | saṃskāravaśāt iti 
prathamecchajanitāt | ata eva tatra tatra punaḥpunardarśanāni na upayujyante | 
icchāvimarśena iti punarantarālāntaropanatam | syāt iti na 
asaṃbhāvyametadityarthaḥ | anyat deśarūpaṃ

(page 233)

yat dravyaṃ, ādipadena śuklapītādilakṣaṇo guṇaḥ; yadivā 
anyadeśamanyasvabhāvaṃ ca yat dravyādi, tadviṣayā | tadāha iti etadvastu 
dṛśyamānaśabdena āhetyarthaḥ | anusandhānaśabdaṃ vivṛṇoti 
tādṛgicchāyojanena iti lakṣaṇe tṛtīyā | idamiṣṭamidamiṣyate, idaṃ ca 
eṣaṇīyamiti hānopādānecchānāmanusandhānena upalakṣitaṃ 
yadeṣaṇīyatvaṃ, tena vinā tat iti hānamupādānaṃ ca pratikṣaṇaṃ yad, 
tat na upapadyate iti saṃbandhaḥ | vācanaṃ tvaritapaṭhanodgrāhaṇāderiha 
upalakṣaṇamiti vivṛṇoti tvaritapāṭhe'pi iti | sthānaṃ mūrdhatālvādi, 
karaṇaṃ jihvāgrādi, tayoḥ parasparaṃ sparśe sati varṇaniṣpattiryataḥ 
spṛṣṭatādyudaya iti spraṣṭavyapadam | nanu sūtre kva etadasti yat vṛttau 
darśitam | āha tadartham iti | nanu iyatā prabandhena darśanalakṣaṇasya 
lolībhāvena vartamānā icchā ātmabhūteti upapāditam | etacca aprakṛtam | 
vimarśo'sya ātmeti hi upapādanīyam | satyaṃ, tadeva tu itthamuktamiti 
darśayati icchāyāśca iti | vimarśaviśeṣa eva hi icchā, tatra avaśyaṃ 
sāmānyarūpeṇa api eṣaṇīyasparśinā tadidamitivimarśena bhavitavyam, 
tasyāṃ ca daśāyāmicchājñānakriyāśaktibhiḥ 
saṃvedanānandamayaprakāśatādātmyavṛttibhiravasthīyate eva | yaduktaṃ 
śrīparameṣṭhipādaiḥ 

	praharṣāvedasamaye............................. | (1|9)

ityādi upakramya

	............................ vācane dhāvane tathā |
	eteṣveva prasaṅgeṣu sarvaśaktivilolatā || (1|11)

iti | darśanasya ātmā iti vigrahaḥ | nanu darśanasya ātmabhūtā

(page 234)

icchā vimarśaviśeṣarūpetyetadeva na siddham, darśanānantaraṃ hi icchā | 
etat pariharati naca iti | evaṃ hi sati mantharakriyātastvaritatāyāḥ ko 
viśeṣaḥ | nanu

	saṃketasmaraṇopāyam ................... | (pra. vā. 3|174)

iti nirūpitayuktikrameṇa vimarśātmatvaṃ darśanasya 
bādhitamityāśaṅkāṃ parāsyan smārayati uktaṃ ca iti | nanu 
icchātādātmyameva astu tvaritatānyathānupapattyā darśanasya kimanena 
tadidamitivimarśatādātmyāṅgīkāreṇa | atra āha naca iti | tadayaṃ 
prayogaḥ- tvaritadhāvanavācanādau darśanapṛthagbhūtā na icchā 
tvaritatvasya [tvaritatvopa kha. |] upalabdheḥ | pṛthagbhāve hi atvaritatvameva 
kramikasvarūpabhūyastvāpatitakālabhedopanataṃ bhavet,- iti 
apṛthagbhāvena viruddhena vyāptaṃ tvaritatvamiti 
vyāpakaviruddhopalabdhiḥ | tataśca tatraiva darśanaṃ 
vimarśātmaśūnyaṃ na bhavati icchāmayatvāt | vimarśaśūnyatve yadi 
bhavedicchā, mārgagamane'pi tṛṇādiviṣayā bhavediti niyatā na syāt | ato 
niyamānyathānupapattyā vimarśa icchāyā vyāpaka iti 
viruddhavyāptopalabdhiḥ | nanu sākṣātkāri jñānaṃ 
viṣayabalādutpānnaṃ, naca viṣayasya śabdaḥ svarūpaṃ, naca 
anyabalotpannaṃ jñānamanyasya prakāśakaṃ bhavati, naca anyabalotpanne 
jñāne anyasya pratibhāso [bhāsena yuktaḥ ka. |] yuktaḥ | yathoktaṃ

	taddhyrthasāmarthyena utpadyamānaṃ tadrūpameva anukuryāt |

ityādi | indriyabalācca utpannaṃ vijñānam, naca cākṣuṣeṇa jñānena 
śabdasya pratibhāso yuktaḥ, nāpi śabdasya 
cākṣuṣajñānajananasāmarthyamupalabdham | yadāha sato'pi vā 
tadātmana indriyāntarajñānotpattāvasāmarthyāt ityādi | etat 
pariharati

(page 235)

naca iti | naca vaktavyam iti saṃbandhaḥ | yadi hi 
viṣayatābalādindriyabalācca ghaṭe bhāsamāne paṭa iva rūpādau 
bhāsamāne śabdo bhāsate iti pratyajñāsyāmahi, tat 
satyamupālapsyāmahi; natu evaṃ dvayamapi upagatamasmābhiḥ | vācako hi 
ayaṃ śabdo, naca svalakṣaṇasya niyatākṣagamyasya viṣayasya sato 
vācakatvamiti bhavatu eva | nanu yadi na aindriyiko bhāti ayaṃ, (kathaṃ) tarhi 
avabhāti | āha svasaṃvidviṣaya iti | etena idamapi pratyuktaṃ 
yaduktamāryeṇa 

	na cāyamarthāsaṃsparśī saṃvedanadharmo'rtheṣu tanniyojanāt |

iti | nahi arthe kācana śabdayojanā vikalpasamaye saṃvedyate | yadapi idaṃ 
sāmānādhikaraṇyaṃ- ayaṃ gauriti, tadapi 
vimarśadvayayojanāmātralakṣaṇaṃ vimarśāntarameva, natu 
śabdārthayorbāhyasvalakṣaṇarūpayoranyonyamatra melanamavabhāti 
kiṃcit | yastu śabdasya arthe adhyāso vakṣyate, sa bodhabhūmāveva 
bodhābhedāt tayorvastuta iti vakṣyate | nanu yadi sa śabdaḥ svalakṣaṇātmā 
na bhavati [tmā bhavati ka. |], kastarhi asau | ucyate sāmānya iti | kutastyaḥ 
khalu asāviti cet, āha manaskāra iti | nanu manaskārasya 
bodhatāsaṃpādanamātre vyāpāro yaducyate samanantarapratyayāt 
bodharūpatā iti | rūpādeśca saviṣayatāṃ bodhasya saṃpādayituṃ 
sāmarthyam | tataśca tadbodhādhikaśabdanaśaktiviśrāṇane kasya 
vyāpāra ityāśaṅkāśamanamantarāgūrya brūte naca iti | ayaṃ ca atra 
bhāvaḥ- yathā nīle dṛśyamāne nīladarśanaṃ sukhādyātmakaṃ 
[tatsukhā kha. |] tāvat saṃvedyate, tatra saviṣayatā tāvat nīlena kṛtā, 
manaskāreṇa bodhatā; sukharūpatā tu keneti cintyam | na tāvat viṣayeṇa na 

(page 236)

artharūpāḥ sukhādaya ityupagamāt | na manaskāreṇa tasya bodhatāmātre 
sāmarthyāt | athaca bhāti sā | tadasyāṃ manaskāragataḥ saṃskāraviśeṣo 
bhāvanātmā nimittatvena abhidhātavyaḥ | yathoktaṃ bhavadbhireva

	....................... viśeṣātprītitāpayoḥ |
	bhāvanāyā viśeṣeṇa..................... ||

iti | tathaiva śabdanarūpatve'pi nirbhāsamāne manaskāragata eva 
saṃskāro'vahitatvalakṣaṇaviśeṣasvabhāvo vyāpāro jñātaḥ,- iti kimatra 
prathāsamarthanīyam | arthamātrasya iti | mātrapadasya ayamāśayaḥ- 
yadyapi asmanmate artharūpatvaṃ sukhādīnāṃ, tadāpi niyatā bhāvanā 
sahakāritvena tannirbhāse vyāpriyate; na śuddho'rthaḥ | prakṛte'pi 
ayameva vidhiḥ | tathāhi- prakāśamayatvādarthasya prakāśasya ca 
vimarśajīvitatvāt, vimarśātmakatve'pi arthasya 
apratiniyataśabdamelanaparighaṭitaśabdanātmakavimarśaviśeṣaprabodhe 
saṃketagrahaṇapaṭīyaḥsvāhitamanaskārasaṃskārasahitaḥ so'rtho 
vyāpriyate; na śuddhaḥ | apratiniyate tu māyīye 
vimarśe'ṅguliśironirdeśaprakhyedantālakṣaṇe 
viśiṣṭekāradakārādisaṃbhedamabhajamāne māyāśaktereva vyāpāraḥ | 
amāyīyatve tu ahantātmani satatodite na kāraṇacintā kācit | nanu 
svalakṣaṇasya avyavahāryatvāt na saṃketaviṣayatā, sāmānyaṃ ca 
apāramārthikaṃ na indriyagrāhyam | tat kathaṃ svalakṣaṇe dṛṣṭe 
viśiṣṭaśabdanopapattirityāśaṅkya ābhāsanikurumbātmakaṃ 
svalakṣaṇamābhāsamātraṃ ca deśakālābhāsāsaṃkucitaṃ 
sāmānyaṃ paramārthasadeva, tadevaca pramāṇena viṣayīkriyate 
pratyābhāsaṃ pramāṇavyāpārāt vakṣyamāṇāditi hṛdaye gṛhītvā 
nirūpayati ramaṇīyatā iti | tatra iti nīle dṛśyamāne 
ramaṇīyābhāsaviśrāntameva 

(page 237)

yathā sukharūapatvaṃ sukhajanakarūpatvaṃ vā, tathā 
nīlābhāsaviśrāntaṃ nīlaśabdanarūpatvaṃ nīlaśabdanajanakatvaṃ vā 
bhaviṣyati,- iti na kiṃcana vaiṣamyam | tadetadābhāsamātraviśrāntatvaṃ 
samarthayitumāha anyadāpi iti | etatprakṛte yojayati tadvat iti | 
svalakṣaṇamanāvartamānaṃ kā tatra bhāvanetyāśaṅkāyāmidameva 
uktaṃ ramaṇīyatā ityādi | nanu 
apūrvaghanasāraparimalaprabhṛtisvalakṣaṇajanyaṃ viśiṣṭameva 
sukhamasti, śrutapūrve'pi vā gītādau punaḥ śrūyamāṇe tātkālikaṃ 
yat sukhaṃ tat tātkālikenaiva svalakṣaṇena kartavyam | ata eva idamiti | tadeva 
gītaṃ ramaṇīyam iti ramaṇīyatā yā arthapakṣe, sā svalakṣaṇasthānena | 
nanu artharūpavikalpyatāsāre sāmānye yo nikṣepo'dhyāsastasya yaḥ 
paryantastadviśrāntilakṣaṇastena prāpitaṃ śrotṛhṛdaye viśramitaṃ 
viśiṣṭaṃ tat sukharūpatvamiti tatra kathaṃ bhāvanopayogaḥ | bhāvanā hi 
vikalpābhyāvartanasvabhāvā vikalpātīte kathaṃ svalakṣaṇe syāt | etadapi 
saṃgamayati viśiṣṭa iti | tādṛkṣe'pi bhāvanā tāvadavaśyamupayoginī | 
gītadhvanau hi na sṛgālo rajyati mālatīparimale vā madhukara iva hariṇa iva 
veti | tatrāpi anekajanmābhyastavāsanānubandhaḥ 

	vītarāgajanmādarśanāt | (nyā. sū. 3|1|25)
	pūrvābhyastasmṛtyanubandhāt jātasya [jātaharṣa kha. |]
	harṣabhayaśokasaṃpratipatteḥ | (nyā. sū. 3|1|19)

iti | tatastadvipākānuguṇānāmeva abhivyaktirvāsanānāṃ 
tāsāmanāditvaṃ cāśiṣo nityatvāt jātideśakālavyavahitānāmapi 
ānantaryaṃ smṛtisaṃskārayorekarūpatvāt 

(page 238)

iti ca nayena avaśyābhyupetyo manaskāraniṣṭho yasya 
prabandhapravṛttakāraṇamahimopanataprabodhasya manaskāreṇa 
vitīrṇabodhatāke arthena dattasārūpye bodhe saukhyātmatāṃ vitarituṃ 
prabhaviṣṇubhāvaḥ | artharūpā na sukhādaya iti ca vaḥ [yaḥ ka. |] pakṣaḥ, 
tatra ca

	bhāvanāyā viśeṣeṇa................... |

ityasminnavaśyasamarthye hetau samasto'yamartho bhavadbhirapi yatnena 
avalambanīyaḥ | asmaddṛśi api arthapakṣe tāvat yo nikṣepa idaṃ ramyamiti, 
tasya yaḥ paryanto buddhau saṃvedanacchāyādhāriṇyāṃ 
sajātīyārthagatasukhasaṃbandhaprabuddhasukhāyāṃ ca viśramastena 
prāpitamahaṅkāreṇa ahaṃ sukhī- iti vyavahṛtaṃ yatsaṃvedane 
sukharūpatvaṃ, tadbhāvanāmuktayuktyā sahakāritvena apekṣata eva | etat 
saṃkṣepeṇa nigamayati iti yuktyaiva ityādinā | tatra evaṃ yojanā-
āntarasya vācakarūpasya abhijalpātmatvena, natu viṣayarūpatayā, 
abhilāpasya yojanā yuktaiva prathamadarśanalakṣaṇe'pi bodhe, natu 
abhilāpayojanā, tata āha- saṃskṛtaṃ yat svopādānaṃ 
samanantarapratyayarūpaṃ manaskārākhyaṃ tena upapāditaḥ 
svasaṃvedanasiddhatvādanapahnavanīyaḥ śabdanaṃ nirūpaṇaṃ 
nirdeśanamiti prasiddho yaḥ pramāturdraṣṭurdarśanātirikto 
vyāpārastadāśrayā [śrayāt ka. |] tena avaśyaṃbhāvinā sā balādeva 
ānītā | nanu uktamatra paraiḥ 

	śabdenāvyāpṛtākṣasya buddhāvapratibhāsanāt |
	arthasya dṛṣṭāviva tadanirdeśyasya vedakam [śyavadekakam ka. |]

iti | etatpariharati arthasahakārisahita iti | saṃskṛtāt manaskārādarthaṃ 
sahakāritvena apekṣamāṇāt yā abhilāpayojanā

(page 239)

bodhe, yā ca tamanapekṣamāṇāt; sā kathamekarūpā bhavet, arthe hi 
sahakāriṇi bodho viṣayasvalakṣaṇasarūpaḥ san savimarśaḥ 
avyāpṛtākṣasya tadabhāve nirviṣaya ātmaviṣayo'sadviṣayaḥ 
sāmānyaviṣayo vā bhavan savimarśa iti kimatra ayuktam | asau iti 
pūrvoktā

	na so'sti pratyayaḥ .......................... | (vā. pa. 1|124)

ityādinā ca darśanāntareṣu api śataśaḥ samarthitā | nanu idānīmidamiti 
sarvatra nīlādibodhe śabdanaṃ cet, tarhi na kiṃcit nirvikalpakam | astu evaṃ 
paradṛśi, kiṃ no vighaṭitam | nanu bhavatāmapi kathaṃ nirvikalpakatā, yā 
avaśyaṃ [śya sama kha. |] samarthanīyā | taduktavanto bhavantaḥ tasyāṃ 
hi nirvikalpakadaśāyāmaiśvaro [lpada ka. |] bhāvaḥ paśorapi iti | 
tatra [atrāha kha. |] āha asmākaṃ tu iti | tuḥ paradarśanāt viśeṣakaḥ | 
idameva adhunaiva, raktaḥ san, jānāmi, karomi saṃkucitasvarūpaḥ,- 
ityevaṃ 
niyatikālarāgāśuddhavidyākalāmāyārūpakañcukaṣaṭkaparivṛta-
prakāśasvabhāvo yaḥ puruṣo nāma māyāpramātā, tasya samastaṃ-
paśyāmīti- prabhṛti buddhindriyaviśeṣavṛttivarge yadanuyāyi 
vedmītivṛttirūpaṃ, tatra yat karaṇaṃ 
sāmānyarūpamaśuddhavidyātattvaṃ; tacca na svatantraṃ kiṃcit, apitu 
parameśvarasyaiva śaktiḥ, tatastasya yāni viśeṣarūpāṇi cakṣurādīni- 
rūpaṃ vedmi, sparśaṃ vedmi- ityādivṛttiviśeṣabhāñji, tairabhivyakto 
māyāśaktisaṃkocāpasārito'pi īṣat [īśaḥ puru...........kāśo kha. |] 
punararpitaḥ prakāśo yasmin nīlādau vedye tādṛśe jhaṭiti dṛśyamāne 
prakāśasya svābhāvikāt parāmarśamayatvāt yadahamiti vimarśanaṃ, 
tadgocarībhāvaṃ prāpte idantayā pramātṛpra-

(page 240)

meyāntarabhāvāpohanaprāṇayā nirdeśyatvaṃ vikalpyamānatvaṃ nāsti, 
tāvati yato manasaḥ saṃbandhī 
pramātṛprameyabhedotthāpako'nuvyavasāyātmā vikalpanavyāpāro na 
udita ityasmanmate na asaṃbhāvyametat | tatra ca idantā nirdeśyatvābhāve 
nīlādimātraviṣayā bhedaprathanamātrarūpā māyāsaṃskārasya tatrāpi 
bhāvāt, natu sarvathā pūrṇā īśvaratā | pramāṇatā ca (vakṣyate) 
pramāṇalakṣaṇe

	idametādṛk................................. | (2|3|1)

ityādau, tadā ca māyāpramātṛbhāvasya saṃvṛtasyaiva avasthānam, udite 
tu vikalpanavyāpāre so'pāvṛto vartate iti tatkṛtāt dvaitārambhāt 
pramātṛprameyayorbhedakaḥ prameyaviśrāntaḥ idamitinirdeśo bhavan 
pūrvāpekṣayā prasāritarūpaḥ svayaṃvikalpanātmā svāpekṣayā 
pūrvatra nirvikalpakatāṃ vyavahārayati | saṃvṛtā hi śabdabhāvanā 
prasāritāṃ śabdabhāvanāṃ vividhakalpanārūpāmapekṣya 
tathābhūtavaividhyakalpanavaikalyāt nirvikalpeti [lpaka iti kha. |] ucyate | yadi 
evaṃ vikalpa eva idantānirdeśyatā bhavanmate, sa ca na vastusparśīti 
cakṣurādigrāhye vastuni na idantāvimarśaḥ syāt | tatra tu 
ahamitivimarśo'stu, naca tena vyavahāra idaṃ nīlaṃ dṛśyamānaṃ 
gṛhṇāmīti vyavahārāt | etat pratikṣipati sa ca iti idantānirdeśaḥ | 
vikalpo'pi hi na atyantāya avastuviṣaya iti nirṇītaṃ prāk 

	bhrāntitve cāvasāyasya........................ | (1|3|5)

ityādau, vakṣyate ca

	taddvayālambanā.................................... | (2|2|3)

ityādau || 19 ||

(page 241)

	nanu prakāśasya jīvitaṃ vimarśa iti sāmānyena uktam | tacca katham 
| sūkṣmo hi asau bhavatu tathā, yastu sthūlo yatra sphuṭā vikalpatā, tatra 
yadidaṃ śabdanaṃ sthūlaṃ śabdātma nīlamidamiti, taditi vā; sa 
māyāpadocito vimarśo māyāpramātṛprakāśasya kathaṃ jīvitamiti yaḥ 
śaṅkate, tasya mohaṃ śamayituṃ na asmākaṃ sthūlaḥ śabdo'rthavadeva 
pṛthak prakāśate; yo viṣayasvabhāvaḥ, sa prakāśajīvitamiti vimarśa iti vā 
saṃmata [smaryate ka. |] ititātparyābhidhāyi; tathā vimarśo'dhyavasāyaḥ, 
saca buddherdharmo no [na citaḥ kha. |] citaḥ prakāśarūpāyā iti yo manyate 
sāṃkhyastasya etadviparyayaśamanapradhānaṃ; tathā 
śabdārthavyatirekeṇa tāvat na aparaṃ saṃvedyate, tat kiṃ vimarśasya anyat 
vapuriti yasya ajñānaṃ, tasya saṃbodhādhāyi sūtraṃ

	ghaṭo'yamityadhyavasā nāmarūpātirekiṇī |
	pareśaśaktirātmeva bhāsate natvidantayā || 20 ||

	nāma ghaṭa iti rūpaṃ pṛthubudhnodarākāraḥ; tathā nāma ayamiti 
rūpaṃ kaṭhinamiti viśeṣasāmānyavibhāgena yojyam | ata eva 
vṛttāvitiśabdadvayaṃ tadadhyavaseyaviṣayādhyavasāyaniṣṭhaṃ 
prayuktam | tadetadubhayamapi adhyavaseyam, tadviṣayastu 
vimarśo'dhyavasāyaḥ | tābhyāmatirekī yo na kadācididantāviṣayaḥ, 
apitu ātmavadahamityeva bhāsate; yo'dhyavasāyo 
māyāpramātṛprakāśasya jīvitamiti asmākaṃ pakṣaḥ, natu śabda eva 
adhyavasāyaḥ | tena ādyaṃ codyaṃ parihṛtam | pareśasya 
parameśvarasyaiva prakāśavapuṣaḥ paramārthataḥ sā śaktiḥ | sa evahi 
[eva kha. |] paśupramātṛrūpatayā adhyavasyati smarati jānātīti, natu 
jaḍasya buddhitattvasya etat prātisvikaṃ kiṃcana vapuḥ | etacca uktaṃ

(page 242)

	.............................. jñānasmṛtyapohanaśaktimān | (1|3|7)

ityatra | tena dvitīyo'pi vyāmoho'pasāritaḥ | nāmarūpātirekī ca 
adhyavasāyaḥ prakāśate ahamityātmeva | tataśca 
idantānirdeśyatvābhāve'pi anapahnavanīya eva so'pīti tṛtīyasya api 
dattamuttaram | ghaṭo'yamiti iti adhyavasāyaśabdena nāmarūpaśabdena ca 
yojanīyam | vṛttāvapi evamiti sūtrārthaḥ | enamavatārayati idantā iti | 
idantayā parāmṛśyaṃ yat bhinnaṃ ghaṭa iti nāmādhyāsena vartamānaṃ 
ghaṭarūpaṃ, tadadhyavaseyatvena viṣayo'dhyavasāyasya; natu tasya 
svayamidaṃbhāvāvamṛśyateti prathamaṃ codyaṃ parihṛtam, natu 
śuddha ityādinā dvitīyam | nanu adhyavasāyasya iha 
prākṛtatvamāgamādhikāre vakṣyate | āha satyaṃ, sāṃkhyavattu na 
tatraiva viśrāntirasya paramārthataḥ | athavā iti natu ityanena yojyam natu 
nāstyeva iti | anena tṛtīyāśaṅkānirāsatātparyaṃ darśitam | nāma 
tāvadvibhāgato vyācaṣṭe kadācit iti | ekasminnapi svalakṣaṇe 
asphuṭāvabhāse sāmānyanāma [nyaṃ nāma kha. |] tasminneva 
sphuṭāvabhāse viśeṣanāmeti avabhāsabhedāt parāmarśabhedo 
vyākhyātaḥ | atha prameyabhedādapi asau bhavatīti vyācaṣṭe athavā iti | 
svalakṣaṇe pratyakṣaviṣaye viśeṣaparāmarśaḥ, 
ātmarūpamātradarśane'pi hi kaścidayamanyatamo viśeṣa iti parāmarśena 
viśeṣa ekatamaḥ svīkṛta eva | pratyakṣaviṣayatvābhāve tu yat vikalpanaṃ, 
tat yadātadetidarśanānantarasamayaviśeṣānapekṣam | tasmin 
yadātadāvikalpane sāmānyena parāmarśaḥ | viśeṣo'pi hi tatra 
avamṛśyamānaḥ paramārthataḥ sāmānyātmaiva saṃpadyate | nanu ghaṭa 
iti viśeṣaḥ kiṃ vikalpanenaiva sphurati, sphurato'pivā asya ayamiti 

(page 243)

paramārthatve ghaṭaḥ paṭa iti vikalpanayorna vaicitryaprasaṅgaḥ | atra ucyate 
ghaṭa iti viśeṣarūpatāṃ 
sarvatonirākāṅkṣāsaṃpūrṇavākyārthavikalpasamucitāmayamiti 
sāmānyarūpatāṃ padārthavikalpocitāmupalakṣayati | nanu 
darśanānantarabhāvino niścayasya api adhyavasāyatvaṃ

	māyāśaktyā..................................... | (1|5|18)

ityatra sūtre nirdiṣṭaṃ, tat smaraṇavikalpanādeḥ parāmarśasya kathaṃ 
prathanamiti iha na vicāritameva bhavedityāśaṅkya āha 
adhyavasāyaśabdena atra iti | pūrvasūtre govalīvardavat viśeṣe vṛttirasya 
| anena ca adhyavasāyasya iha sāmānyarūpatāvyākhyānena uttarasūtre'pi 
śaṅkāparihāraḥ kṛto bhavatīti darśayati tathāca iti | tenaiva 
parihāraprakāreṇa uttaratra evaṃ vakṣyate iti saṃbandhaḥ, anyathā tu 
niścayarūpe'dhyavasāye ātmatvena bhāsanamiti ukte ātmani 
kālaśaktyabhāvāt sakramatvena pratibhāso na yukta iti tatraiva 
tatsamarthanaṃ karyaṃ syāt, natu smṛtyādau tasya prakaraṇānārūḍhasya 
akramatvaśaṅkāyā eva ayogāditi yojanā | athavā sūtrakārasya ayameva 
artho'bhipretaḥ, natu ṭīkākāropakramameva iyaṃ vyākhyetyarthaḥ | 
sarvanāmaśabdena parāmarśaśabdena ca vivṛtikāro ghaṭo'yamityasya 
bhāgasya nāmarūpaśabdena [nāpi avasāyaśabdena ca kha. |] 
adhyavasāśabdena ca saṃbandhamāha | vācyavācakasaṃvedanāni ghaṭa 
iti, ayamiti ca tulyaṃ nirbhāsante | yathāha paramaguruḥ 

	śabdārthapratyayānāmitaretarādhyāsāt saṃkaraḥ | (yo. sū. 3|17)

iti | mīmāṃsakapravaro'pi

	gaurityeva hi nirdeśo vācyatadbuddhivādinām | (ślo vā. 4|182)

(page 244)

iti | etadeva sphūṭayati tatra iti nirbhāsamānatvādanapahnavīye | vācakaḥ 
śabdaḥ śrotragrāhyasvalakṣaṇarūpatātyāgena buddhinirgrāhyaṃ 
sphoṭarūpaṃ sāmānyarūpaṃ vā śabdaṃ darśayati | vācyam iti 
pratyakṣatocitāṃ svalakṣaṇatāṃ śabdācca vācakāt pṛthagbhāvamasya 
nirasyan buddhigrāhyameva niraṃśaṃ sphoṭātmānaṃ 
sāmānyalakṣaṇaṃ tadvanmātraṃ vā rūpaṃ nirūpayati | 
parāmarśaśca iti vikalpanavyāpārarūpaḥ | nanu vācyavācakāveva 
parāmṛśyete, na tṛtīyaḥ parāmarśaḥ kaścit | aho svoktimeva na cetayate 
mahābhāgaḥ | parāmṛśyate iti yaducyate, sa eva ayaṃ parāmarśastṛtīyaḥ 
ukta eva bhavati | tadetadāha nāmarūpamadhya eva iti | parāmarśābhāve 
hi tāvaparāmṛṣṭau vyomakusumakalpau bhavetām | nanu astu parāmarśaḥ, 
sa tu prakāśate iti kutaśca na uktaṃ tritayaṃ prakāśate iti | idantayā 
bhātīti hi bhavata eva anabhimatam | āha avabhāti ca iti | parāmarśasya 
anavabhāse parāmṛṣṭasya api aparāmṛṣtakalpatvamiti hi uktaṃ, vakṣyate 
ca | nanu avabhāti ca, naca idantayā, tat tṛtīyagatyabhāvādahantayeti 
upanatam | ahamiti ca ātmaiva ayam | tat ko'paro'dhyavasāyo 
nāmetyāśaṅkya āha eṣa ca iti

	kevalaṃ bhinnasaṃvedya......................... | (1|5|21)

iti samanantarasūtre jñeye jñeyena uparāgo vakṣyate tadvaśāt 
sakramatvena yato'vabhāti, tata ātmano niṣkramādatirikta iva vastutaśca 
anatiriktaḥ, ata eva ātmano dharmaḥ śaktirityevaṃvyavaharaṇayogyaḥ | 
tadetadatiriktānatiriktarūpatvaṃ sūtre ivaśabdena atādrūpye 
tādrūpyādhyavasāyadyotakena darśitaṃ, vṛttau ca mayaśabdena | 
prakṛtavacane hi mayaṭ | sa yadatra prakṛtaṃ tatpratyayārtharūpaṃ 
prakṛtyarthāt bhedena abhidadhat prakṛtyarthasya ca prakṛte pratyayārthe 
saṃbhedakatāṃ gamayannatirekānatirekau 

(page 245)

prakāśayati | tataśca dehādisaṃkucito yo'haṃbhāvaḥ, so'nyaṃ 
saṃkocamanaṅgīkurvannadhyavasātā pramātā ca ucyate | tatpṛṣṭha eva tu 
yat bahirvikalpanīyena saṃkocāntaraṃ, tadyuktaṃ yadahamitirūpaṃ; 
so'dhyavasāya iti tātparyam | nāma api idantayā bhātīti yaduktaṃ, tat 
vyākhyātuṃ codyena upakramate nanu nāmno'pi iti | rūpasya astu 
vicchedāvabhāsanaṃ, nāmno'pitu yadupagataṃ, tadasaditi 
apiśabdārtho'yaṃ ghaṭo lohita iti idantāparāmarśāt | nāmno'pica yadi 
tathā syāt, tat vācakasya api tasya idantayā avabhāso bhavet vyavahārakāle 
| naca asti asau | kumbho'yamujjvala iti hi 
sāmānādhikaraṇyamidaṃśabdasaṃbhedena ābhāti | naca vācakasya 
lauhityaṃ saṃbhavatīti idantāvabhāse 
tatsamānādhikaraṇadharmāntarayogo vyāpakaḥ, tadviruddhaśca tadayoga iti 
vyāpakaviruddhopalabdhyā na idantāparāmṛśyo vācakaḥ [kaśca śabdaḥ 
kha. |] śabdastathābhāvābhāvācca na vicchinnāvabhāsaḥ | 
vicchinnābhāsasya hi vyāpaka idantāmarśa iti vyāpakānupalambha iti 
pūrvapakṣārthaḥ | etat dūṣayati tatra ucyate iti | ayaṃ bhāvaḥ- iha 
ayamidamiti nirbhāsaḥ kiṃ pṛthaktayā bhavan 
pramātṛvicchedāvabhāsasya vyāpakaḥ saṃmato bhavataḥ | naca evaṃ 
bhramitavyam- evaṃ hi sati ayaṃ śuklaḥ paṭaścala iti paṭasyaiva iha 
pṛthagidantayā parāmarśo, na śuklaguṇacalanayostvaduktādeva tayoḥ 
sāmānādhikaraṇyābhāvāt | tataśca śuklo guṇaścalanaṃ ceti 
guṇakarmaṇī pramāturavicchinne syātām, ahamiti ca tadā 
nirabhāsiṣyetām | tathāca paṭena idantākakṣyāpatitena anayoḥ 
saṃbandhābhāvo bhinnakakṣyatvāt | atha ucyate- śuklatvacalanayoridameva 
rūpaṃ yat paṭādipāratantryaprāṇatvaṃ, 

(page 246)

tat paṭagataiva idantā tayorapi svena vapuṣā bhavatyeva naugateva 
gatirnauparavaśyatārham ? pṛthagidantāparāmarśo na 
pramātṛvicchedāvabhāsasya vyāpakaḥ, apitu idantāparāmarśamātram | 
tacca vācake'pi vidyate | tathāhi ayaṃ ghaṭa iti ghaṭaśabdena 
vācakarūpeṇa ekīkṛtasyaiva adhyāsabalāt tadāveśabhājo'rthātmano ya 
idantāparāmarśaḥ, sa tasya vācakarūpasya api bhavatyeva, anyathā 
ghaṭaśabdasya api uktena nayena ahamitinirbhāsa ityādiḥ prasaṅgaḥ 
pratītiviruddho bhavet | tasmādastyeva idantāvabhāsa iti pūrvapakṣahetū 
dvāvapi ayuktau | pṛthakprarāmarśe tu vācakarūpatā 
guṇakarmādirūpatā ca pratyuta na parāmṛṣṭā bhavet | vācakasya 
adhyāsena, guṇakarmaṇośca atyantaṃ [ntasaṃsa kha. |] saṃsargeṇa 
vastupāratantryameva prāṇitaṃ yataḥ | yadi hi ayaṃ ghaṭaśabda iti bhavet, 
tat viśeṣasvabhāvo'sau vācyarūpa eva parāmṛṣṭaḥ syāt, na vācakaḥ | 
tatrāpi ca tatsāmānyarūpaṃ svarūpaśabdābhidheyaṃ yat vācakatvena 
prasiddhaṃ, tasya api idantāparāmarśastatsaṃbhedādapṛthagbhāvena 
bhavatyeva yathāyaṃ śuklo guṇa iti guṇo dravyātmaiva parāmṛṣṭo 
bhavati, na guṇātmā | tatrāpi tu tatpāratantryeṇa pratīyamānaṃ 
guṇasāmānyameva pāratantryaprāṇamapṛthagbhāvena idantayā 
parāmṛṣṭaṃ bhavatīti | idaṃ śuklatvamiyaṃ śuklajātiriti sāmānyasya 
api dravyībhāve guṇasya viśeṣaṇatayaiva idaṃbhāvaḥ, na pradhānatayā; 
pradhānatayā tu idaṃbhāve dharmāntarasahiṣṇutāpādanāt dravyībhāva 
eva | tathāhi pradhānatvena arthakriyopayogena bhedyatvena 
dharmāntaraviśeṣyatvena ādigrahaṇasūcitena vā kriyāvattvādinā tāvat 
dravyabhāvaḥ | tacca etat 
sakalamābhāsāntararūpamidamitipradhānaparāmṛśyatayā ullasati 
rājapuruṣa ityādau

(page 247)

rājādīnāṃ pradhānaparāmṛśyatvābhāve 
dravyatvotthāpakānāmuktābhāsānāmaparāmarśāt | prakṛte'pi 
ghaṭo'yamitiparāmarśe ghaṭaśabdasya arthe guṇabhāvagamanāt 
tadabhedenaiva idaṃparāmarśaḥ, anyathā arthe'nadhyastaḥ svatantra eva sa 
śabdo vimṛṣṭo bhavet, asmāt agnerḍhak iti nyāyena, natu arthavācakaḥ | 
tatrāpi anekaśabdatvadarśane jātivyaktidarśane vā 
svarūpātmakavācyapravaṇasyaiva vācakasya avabhāsaḥ | nanu evaṃ 
vācakasya parāmṛśyatā asti,- ityetadeva sandehapatitamidaṃśabdena 
sākṣādaparāmarśāt | śuklaḥ paṭa iti ca śuklaguṇasya pūrvameva 
prakāśitaparāmṛṣṭasya viśeṣaṇatākāle na punaḥ prakāśaparāmarśau 
saṃbhavato'nekajñānālambanatāpakṣe | naca kṛtasaṃketaḥ paṭaśabdaḥ 
kevalapratītyarho bhavati śuklaguṇavat svabhāvata evavā 
saṃketakālātprabhṛti vā vācyādhyastasyaiva tasya prakāśanāt, ata eva 
atra na viśeṣaṇaviśeṣyabhāvaḥ, apitu adhyāsa iti vyavahāraḥ tataśca 
pṛthagidantāparāmṛśyatvābhāve nāmnaḥ pramātṛtattvāt bhedena 
parāmarśanamiti sandigdhameva,- ityāśaṅkya āha svanāmnā tu iti | iha 
prakāśitasya parāmarśābhāve prakāśitatvameva durghaṭamiti darśitam | 
tataśca yathā bāhyasya nīlasya prakāśamānasya nīlamiti 
vācakaparāmarśastathā vācakasyāpi prakāśasya avaśyabhāvyaṃ 
vimarśena | naca tatsvarūpavyatirekeṇa tat vijātīyaṃ śabdāntaramasti 
sāmānyarūpaṃ vā viśeṣarūpaṃ vā yena tat nīlavācakaviśeṣarūpaṃ 
vimṛṣṭaṃ bhavet | naca anekaśabdatvāśrayeṇa tatsadṛśena śabdāntareṇa 
tadvimarśo'navasthayā nīlaparāmarśasyaiva abhāvaprasaṅge 
nīlaprakāśāyogāt | tasmāt svarūpaparāmarśasvabhāva eva arthasya | yato 
nīlaśabdaḥ parāmarśakastataḥ svaparaparāmarśakatvameva asya 
svaprakāśatvam |

(page 248)

parāmarśo hi prakāśasya satyaḥ svabhāva iti niveditam | pradīpasya tu 
dṛgāvaraṇakāricchāyābhidhānadharmāsahiṣṇutātma bhāsvaratvaṃ 
svātmani bhavat ghaṭādāvapīti, yenaiva ca bhāsvarabhāvena arthaprakāśe 
arthasaṃvedanarūpe tasya upayogastenaiva svātmano'pi saṃvedanarūpe 
prakāśe | iyati prakāśasya phalabhūmirbījabhūmiśca 
vimarśanadīpanarūpā prakāśa iti uktā | jñānaṃ tu svātmanā 
prathamānaṃ tayaiva prathayā arthamapi prathamānaṃ karoti,- iti 
sphuṭameva svaparaprakāśakam | tena dīpaḥ svaparadīpanaḥ, śabdaḥ 
svaparaśabdanātmakaḥ, jñānaṃ svaparaprathārūpaṃ, vimarśastu 
svaparavimarśarūpo na pṛthak gaṇyate | jñānasvabhāva eva hi asau | 
vācakaṃ tadarthaparāmarśe parāmṛśyate prakāśamānatvāditi 
svabhāvaḥ | parāmarśābhāve prakāśanameva na bhavet 
tatsvabhāvaviruddhajaḍatvaprasaṅgāditi vyāptisiddhirvācakasvarūpeṇaiva 
[vācakaḥ kha. |] tatkriyākarmatadanyābhāvāt dīpajñānavaditi | 
tadetadāha nahi tena ityādinā | anabhidhāya iti aparāmṛśya | nanu 
viṣayatvamindriyagocaratvaṃ, tat dhūmasya iva śabdasyāpi bhavatu | 
jñāpakasya hi kimetadapūrvam | atra āha vācyībhāva eva iti 
parāmṛśyatetyarthaḥ | kuto'yaṃ viśeṣa iti cedāha prakṛta iti | 
svarūpavācyatvanirṇayaprakaraṇādeṣa viśeṣa iti yāvat | tathā hi 
upakrāntam 

	ātmarūpaṃ yathā jñāne jñeyarūpaṃ ca bhāsate |
	artharūpaṃ tathā śabde svarūpaṃ ca prakāśate || (vā. pa. 1|50)

iti 

	grāhyatvaṃ grahaṇatvaṃ ca dve śaktī tejaso yathā |
	tathaiva sarvaśabdānām............................................. || (vā. pa. 1|55)

(page 249)

iti ca | etadeva sphuṭayati jñānaśabda ityādinā granthena | nanu 
akṣijñāne [akṣa kha. |] yathā dīpāloka ālokāntaraṃ na apekṣate, tathā 
śrotrajñāne śabdo na śabdāntaramapekṣate, eṣaiva anapekṣā asya 
svarūpavācakatā, natu evaṃ ghaṭasya,- ityāśaṅkya āloko'pi vā iti 
uktam | naca āloke svarūpavācakatvaṃ prasiddham | nanu iyatā svarūpaṃ 
vācyamabhidheyamiti astu, parāmṛśyatā tu atra samarthanīyā 
pramātṛtattvāt bhedeneti śaṅkāmuddharati abhidhā ca iti | ābhimukhyena 
yathārucikaraṇasvātantryaparyantatayā śabdanasvabhāve 
prayoktṛpratipattṛlakṣaṇe pramātari dhāraṇaṃ praropaṇaṃ viśramaṇā 
parāmarśanamityeko'rthaḥ | tathāca vakṣyate svarūpāvivekenaiva hi iti | 
evaṃ svanāmnā tu astyeva iti yaduktaṃ, tadupasaṃharati tena astyeva iti | 
tatpūrvaka eva arthe prayogāntaraṃ vācakaḥ svarūpaṃ parāmṛśati [śyati 
ka. |] arthaparāmarśasvabhāvatvāt niścayādijñānavaditi svabhāvaḥ | 
niścayasaṃśayādijñānāni hi svātmani niścayarūpāṇi eva, aniścaye hi 
saṃvidrūpaviśeṣasya niyato vyavahāro na bhavet, yadihi tathāpi bhavet 
tatrārthe niścayādisvabhāvatvāt, tarhi asvaprakāśe [śepi kha. |] prakāśe 
arthaprakāśamātrādarthadṛṣṭau siddhāyām [yāspra kha. |]

	apratyakṣopalambhasya.................................. |

iti na ucyeta, niścayāntarāpekṣayā ca niścayasya vyavahāre anavasthā 
svaprakāśatvābhāva iva saṃvedanasya saṃvedanāntarāpekṣayā | nanu 
arthe'sau niścayaḥ, na svātmani; tarhi kathaṃ vyavahāra iti vaktavyam |

	nahi imāḥ kalpanā apratisaṃviditāḥ |

iti

	sadājñātāścittavṛttayastatprabhoḥ puruṣasya apariṇāmāt |

iti

(page 250)

	cittāntaradṛśye buddhibuddheratiprasaṅgaḥ |

ityādi ca śākyasāṃkhyādibhiḥ kathamuddhoṣyate | pratisaṃvedanaṃ hi 
pramātṛrūpatābhimukhabhāvagamanena samyagadhyavasāyaparyantaṃ 
vedanaṃ prakāśanamucyate | puṃsprakāśādananyathābhāvataḥ 
sattvaprakāśasvabhāvo niścayasvabhāvaśca arthātmani iva svātmanyapīti 
na niścayāntaropayogaḥ | nanu evam 

	aśakyasamayo hyātmā............................. |

ityādinītyā svātmani avikalpakatvaṃ yat vikalpānāmapi ucyate, tat kathaṃ 
bhavet | asmatsiddhānte tāvat

	svabhāvamavabhāsasya............................ | (1|5|11)

itinayena vimarśamayatvaṃ sarvasaṃvidāmavikalpatve'pi tathā 
vimarśādevaca vyavahāraparisamāptiḥ | nahi tatra atadrūpāropaṇamartha 
iva abhiśaṃkyate, yena vikalpatā svātmani upayujyate 
tatsaṃvedanātiriktasya tatsaṃvedakasya 
āropaṇaśaṅkātadapasāraṇādivyāpārakāriṇo'saṃvedanāt | bhaṭṭastu 
adhyavasāyāpekṣāmetadarthameva prāmāṇyasya na icchati | tadāha 

	siddhaṃ siddhatayā rūpaṃ nirūpyaṃ na tathā tataḥ |

iti | prakāśasvasaṃvedanādeva hi arthaḥ prakāśitaḥ, saṃvedanaṃ ca 
prakāśitamiti kimapareṇa | adhyavasāyāpekṣaprāmāṇyavādināṃ tu 
iyatyeva atra gatiḥ- yathā asti kūpe jalamiti 
vikalpe'nadhyastavastupratibhāsānantarabhāvini rajatamidamiti vikalpe vā 
koṭidvayasparśasya asaṃvedane'pi sādhakabādhakapramāṇāsaṃbhavāt 
saṃśayarūpatvaṃ phalataḥ paryavasitamiti ucyate, tathā svasaṃvedane 
bhramatvāśaṅkāyā

	no cet bhrāntinimittena saṃyujyeta................. |

(page 251)

itinyāyena samāropakasaṃbhavanibandhanāyā abhāvāt phalato 
niścayarūpataiva | yadāha dharmottaropādhyāyaḥ

	nahi ajñānamātre'pi sattāyāmiva sandehaḥ |

ityādi | tatra api darśane yadi tathādhyavasāyatādātmyaṃ 
svasaṃvedanasya na bhavet, tadanadhyavasitena prakāśamātreṇaiva 
vyavahāre siddhe kimarthānubhavo'pi 
adhyavasāyamukhāvalokanadainyadūyamānatāpakṣe nikṣipyate | atha 
adhyavasāyena vinā na vyavahāryaḥ prakāśaḥ, svasaṃvedanaprakāśo'pi 
tarhi evaṃ; niśayaprakāśasya api ayameva panthāḥ | vyatirikte ca 
adhyavasāye anavasthā, avyatirikte ca vimarśatādātmyameva prapatati 
[pratapati kha. |], vimarśatādātmyādevaca sukhādau rāgādau 
saṃśayādirūpatve ca caittavargeṇa pṛthaṅniścaya upayujyate 
samāropaṇāderasaṃbhavāt, arthe tu tasya 
saṃbhavādāropāpasāraṇaphalaḥ pṛthagasya asāvupayujyate eva [evaṃ 
kha. |] satyapi arthaprakāśasya vimarśamayatve | taduktaṃ

	pareṣāmapi keśādau bhrāntā saṃvidbahirmukhī |

ityalaṃ bahunā | tena astyeva ghaṭaśabdena svarūpasya 
parāmarśo'rthaparāmarśasvabhāvatvāt niścayādisaṃvedanavaditi 
siddham | nanu ghaṭaśabdasya svarūpaṃ śrotrendriyeṇa cet gṛhyate, 
parāmṛśyeta nāma | prakāśasya hi svabhāvaḥ parāmarśaḥ | sa 
prakāśābhāve kathaṃ bhavet | naca iha śravaṇavyāpāro'sti | 
etatparihartumāha tacca iti | nanu śukaśārikādivaktṛbhedena 
bhidyamānāsu ghaṭaśabdavyaktiṣu samānākārapratyayabalokalpitamastu 
tāvadutkṣepaṇatvāditulyavṛttāntaṃ 
vyaktibhāgakrmākramaparyanuyogamavadhīrya ghaṭaśabdatvasāmānyaṃ, 
tattu na vācakatvena loke prasiddhamityāśaṅkāṃ śamayati

(page 252)

tatraiva iti sāmānye vikalpite saṃketo vyavahārakālānuvartini ca | naca 
evaṃbhūtasvalakṣaṇamiti sāmānya eva saṃketaḥ | nanu evaṃ 
svanāmnaiva vācakasya parāmarśanamiti yuktaṃ nāma | yattu uktaṃ 
vācyavācakasvarūpe vicchedenaiva idantayā prakāśete iti, tat kathaṃ 
samarthitaṃ bhavet | idantā hi vicchedaḥ | naca vācakaśabdasvarūpaṃ 
pramātṛsārāyā vimarśabhūmervicchinnaṃ bhāti | 
tadavicchedasāratvādahaṃbhāvocitameva taditi āśaṅkya āha tena ca iti | 
vācakaśabdasvarūpeṇa parāmṛśyamānena yataḥ samānādhikaraṇaḥ 
sannarthābhāsa ābhāsena vimarśākṣepāt pratyavamṛśyamānārthaḥ, 
tasmāttadapi tatheti idantayā pratīyate eva | nanu avyavadhānena arthavadeva 
sākṣādidamiti kiṃ na bhāsate | tadāha vācakasya iti 
vācakatvādevetyarthaḥ | parāmarśakatā hi vācakatvam | sā ca 
pramātureva nijaṃ vapuriti vācakasya sato na kadācidiyaṃ durdaśā bhavati 
| nanu evaṃ pramātaiva asau, tat kathamucyate- nāmno bhedenāsti 
parāmarśa iti | tatra āha vācyaviśeṣa iti pṛthubudhnodarākārādinā 
viśiṣṭena vācyena yadupādhānamuparāgaḥ [upadhānaṃ kha. |], nacāpi 
tat lākṣayā iva sphaṭikasya paramārthato'tra bhedābhāvāt; kintu 
māyopakalpitabhedabhuvi saṃketamahimnā samāropitam | tena adhyāropeṇa 
hetunā yathā

	bhinnasaṃvedya...................................... | (1|5|21)

iti bhāvisūtranayena ahamityavabhāsanocitaṃ pramātṛtattvaṃ jñānamiti 
pramāṇamiti ca vedyoparaktamiti kṛtvā karaṇatayā vyapadiśyate 
saṃvedanabhāgena, tathā vācyoparaktamiti kṛtvā vimarśāṃśena [śe 
kha. |] abhidhānaṃ śabdanamiti karaṇatayā vyapadiśyate; natu karmatayā 
pāratantryeṇa śuddhena | karaṇasya hi kartṛviśrāntitayaiva 
svātantryarūpapāryantikaparispandāspadatvādeva

(page 253)

ananyāpekṣayā sādhakatamatvam | karmāṃśasparśāttu 
pāratantryamucyate karavālasya hi vīrakaratādātmyamiva 
yadabhyāsādidameva tanmūlaṃ karaṇatvam | sadyaḥparigṛhītāyudho hi 
yathā jīyate, na tathā vijayate | taduktaṃ mayaiva 

	kartṛkarmobhayāśleṣaśālinā yena tu kriyām |
	kartā karoti karaṇaṃ tat...................................... ||

iti | nanu bodhasya api bhavati avyavadhānena vedyatā idaṃ saṃvedanamiti, 
vācakasya tu kimeṣā gatirasti | astītyāha asākṣāt iti vācakatvāt 
pracyāvitasyetyarthaḥ, asākṣāt punarvācakasya api vācyatvāvirodho yadā 
śiṣya upadiśyate- jayati bhuvanakāraṇam- ityatra jayati iti idaṃ 
kriyāvācakamiti upadeśāya pramātuḥ prameyateti [yate iti kha. |] 
saṃbandhaḥ | vācakasyāpi iti ayaṃ ghaṭa ityādau yo'haṃ vacmi sa eva 
ātmā iti 

	svātantryāmuktamātmānaṃ [tat svāta kha. pāṭhāntaram |] 
............................. | (1|5|16)

itinītyā vācakatvaviśrāntiṃ pāryantikīmanujjhata evetyarthaḥ | yadā tu 
vācakatvaṃ naiva spṛśyate, tadā vāstavaṃ [sphuṭaṃ kha. |] 
vācyatvameveti darśayati kvacitpunaḥ iti | adhyāpanādau 
śiṣyapratipādanecchayā hetubhūtayā yadā svarūpaviṣayaiva prayoktuḥ 
pratītirviśrāmyati, tadā svarūpa eva śuddhe vācakatāmaspṛśatyeva 
[katāsaṃspṛśatyeva etamagni kha. |] | evamagnimiti bhavati parāmarśaḥ | 
atra svarūpameva vidheyatayā pratipādyam, etasmādagnerḍhagiti tu 
anūdyamānatayā atra hi ḍhagvidheyaḥ | tena pradhānaguṇabhāvabhedena 
[bhedane kha. |] parāmarśo'sti idantayā,- iti nidarśanadvayena uktam | nanu 
agnimetaṃ paṭheti vācakasyaiva tasya pāṭho vācakādeva

(page 254)

ca agnerḍhagiti āśaṅkya āha tadā ca iti | agnirdahatītyatra yo vācakaḥ 
śabdo'munā agniśabdena anukaraṇīyaḥ, sa vyavahāravākye'rthaṃ [hāre 
kha. |] prati guṇabhāvāpanna eva ucyate iti abhidheyatayā parāmṛśyate 
ayamagniśabda iti | asyāṃ tu avasthāyāṃ sa eva vācako 
guṇabhāvabhūmikāyāḥ kevalaṃ pracyāvita iti paramārthato'sau 
[rtho'sau kha. |] tanmaya eva | ayaṃ ghaṭa iti tu sphuṭaśabdodīraṇena 
bāhye'rthe pratipādayitumiṣṭe yathā ayaṃ ghaṭaḥ prakāśate iti 
prakāśāṃśo māyāśaktivaśāt prṭhakkṛtaghaṭapakṣaprakṣiptaḥ 
sannidantāpadavīmavatīrṇa eva, naca pṛthaktayā prādhānyena; tathā 
vimarśāṃśo'pi | tena bodhasya iva vimarśasya api tattvaṃ tāvadahamiti | 
tato'pi idantā ahaṃbhāva eva līnā tatastasmāt pracyutā api 
guṇabhāvenaiva bhavantī, paratra prādhānyena api bhavantī 
guṇabhāvakakṣyāṃ spṛśantyeva tatastāṃ kakṣyāmujjhantīti tātparyam | 
tatra tṛtīyaiva daśā vyavahāropayoginīti tāmeva vitatya vicārayati 
bāhyārtha ityādinā | nanu na śuklavat śabdo'rthasya dharma 
ityāśaṃkya dūraviprakṛṣṭaṃ dṛṣṭāntamāha siṃha iti | yathaivahi 
siṃhatvaṃ māṇavake adhyāropitaṃ, tathaiva vācakasvarūpaṃ vācye 
kevalaṃ vācakasya vācyānadhyastaṃ na kathañcana svarūpaṃ vācyasya 
vācakādhyāsavandhyaṃ vaṭusiṃhayoriva anācaritopadānamiti [pādānam 
kha. |] upacārāt pṛthagayamadhyāsa uktaḥ | tata eva na atra upacāraḥ iti [iva 
kha. |] bhinnaparāmarśaviṣayatā āropyamāṇāropasthānayoḥ | siṃhe'pi 
iti parāmṛṣṭe eva iti saṃbandhaḥ | pratītiparisamāptāvavadhitvaṃ yato 
nāsti, tata eva pratītiryato na samāpyate tāvadeva yato na tayā pratītyā 
pratyetavyaṃ, apitu saiva pratītiḥ svātmanaḥ kṛtitvāya paraṃ mṛgayate, tato 
hetorarthasya śuklaguṇasiṃhāderdravyatvaṃ

(page 255)

na syāditi pūrveṇa saṃbandhaḥ | arthasya idamiti yo vimarśaḥ, sa 
tadvācakasya api,- ityevaṃ vā pareṇa arthasyeti saṃbandhanīyam | atra 
hetumāha svarūpamabhidadhat iti parāmṛśan abhedāvabhāsanāt iti 
svarūpeṇa saha arthasya otaprotīkaraṇāt abhidhatte iti parāmṛśati | nanu 
dhūmaḥ parāmṛśyamāna eva agniparāmarśopayogī, naca tatra 
abhedāvabhāsanamasti | satyaṃ, tata eva tu na dhūmo vācaka iti ucyate, 
śabdastu abhedāvabhāsanādeva vācakaḥ | etadāha svarūpa iti | 
vācakaprāmarśasvarūpādaviveko yo'rthasya, tenaiva upalakṣitaṃ 
parāmarśanaṃ yat, tadabhidhānakriyā ucyate; natu vivekena 
dhūmakṛtamiva agneḥ | etacca pūrvamuktamapi śaṅkāntaraśamanāya 
upakṣiptam | kaścidācakṣīta-vyutpattermukhamavalokayate 
śabdārthavyavahāraḥ, sāca svarūpavivekenaiva bhavati, śabdo vācako, 
vācyastu artha iti | tat kuto'yamaviveka āyātaḥ | atra āha evamevaca iti | caḥ 
śaṅkāṃ dyotayati | evameva iti avivekenaivetyarthaḥ | vṛddhavyavahāre iti 
nimittārthe saptamī | vṛddhavyavahārastāvadavivekenaiva | 
tannimittādavyutpattistathaiva saṃketanimittikā dvidhā 
sāmānādhikaraṇyena itarathā vā | pūrvā bhedaniṣṭhaiva, uttarā tu 
rāhoḥ śira itivadupāyamātramavivekapratipatteḥ | etat darśayati etaddhi 
ityādinā | vidvadvyavahāra eva tarhi pramāṇīkāryaḥ | āha vidvadbhiḥ iti

	lokavatpratipattavyo laukiko'rthaḥ parīkṣakaiḥ |

iti hi nyāyaḥ | nanu yadā bhinnābhyāṃ pṛthageva asaṃbaddhaṃ 
śabdamarthaṃ vā abhidadhadbhyāṃ vākyābhyāṃ saṃketaḥ [taḥ kriyate 
tadā kha. |], tadā na sāmānādhikaraṇyaṃ 

(page 256)

karaṇyaṃ na vaiyadhikaraṇyam | tadāhi asaṃbaddhameva tat 
dvayamudāsīnamevetyāśaṅkya āha yadāpi iti | yadāpi evaṃ saṃketaḥ 
kriyate, tadāpi,- iti uktaṃ bhavati | kathaṃ saṃketaḥ kriyate ityāha yadā 
ityādi | atra hi ucyate ityantena vākyena śabda eva avamṛṣṭaḥ, na arthasya 
nāma api gṛhītam | boddhavyaḥ ityantena śabdamaspṛśatā artha eva 
taṭastho'vamṛṣṭaḥ | kiṃ taduktaṃ bhavatītyāha ayam ityādi | 
pratyakṣavikalpāvaseyo dṛśyasajātīyo'sādhāraṇābhijñānapradarśito 
vā artho ghaṭaśabdaparāmarśābhedena 
parapratipādanātmakavyavahāranimittaṃ vyavahartavyaḥ, anyathāsti 
[stiraparaḥ kha. |] na paraḥ pratipādayituṃ śakyo lāghavena | 
parāmarśābhāve ca pratipattireva kathaṃ parasya bhavet | etat vastu uktaṃ 
bhavati vākyadvayena api | atra ca vastuni svarūpāviveka eva tattvam | 
etaduktaṃ bhavati- vākyadvayārthe'pi yadā- tadetyābhyāṃ yāvadeva 
ekavākyārthīkṛtaṃ, tāvadeva yadidametatparāmarśanaṃ; tadeva 
arthaparāmarśanaṃ tvayā kartavyamiti tātparyārtho'vatiṣṭhate | nanu 
yadā dhūmo dṛśyate, tadā agniḥ pratyeya iti ekavākyatve'pi na 
dhūmāgnyorabhedastadvadatrāpi,- iti codyaṃ nirasyati anyathā iti | evaṃ 
tātparyābhāve kena prayojanaprakāreṇa saṃketaḥ kriyeta | nahi tasya anyat 
prayojanamasti vyavahārasiddhiṃ muktvā | sā ca abhedenaiveti uktam | nanu 
laukikīmabhedapratītimapahāya saṃketaḥ phalāntarāya bhaviṣyati | etat na 
sahate nahi iti | nanu pratītiranubhavarūpā tāvat siddhā, kiṃ tatra saṃketena 
| vikalpātmikā api yadi śabdāntarātmikā, tat kiṃ saṃketāntareṇa | atra 
āha kintu iti | sahajo'pi parāmarśavyāpāro ghaṭādiśabdanamayaḥ 
saṃpādyate siddharūpaghaṭaśabdopakrame'pi

(page 257)

naisargiko drava iva kaṭhinalavaṇaśakalopakramatve'pi lavaṇarasadravamaya 
iti | nanu dhūmāgnivadastu pratyāyyapratyāyakabhāvaḥ, kimanena 
svarūpāvivekeneti yo muhyet, taṃ pratipattihetūnāṃ vicitratāṃ 
saṃvitsiddhāmupadarśayan pratyāyayati kiṃciddhi ityādinā avabhāti 
ityantena | svasāmarthyādeva iti yogyatayaiva | indriyam iti | tat hi 
bījādikamiva aṅkurādāvapratīyamānameva pratītau kāraṇam | tatra iti 
pratītau tāvat praviśati, anyasyāmeva vā tasyāmeva vā,- iti [iti kha. |] tu 
vādāntaram | tathāhi dhūmādagniriti vākyārthapratītau 
vikalparūpāyāṃ dhūmo hetubhāvena viditatrairūpyādilakṣaṇayogitvāt 
sādhyāvinābhāvitvena adhikaraṇatayā praviṣṭo daṇḍipratītau daṇḍa iva 
saṃyogitvena ekajñānālambanaviśeṣaṇaviśeṣyavāde vā | nahi 
vākyārthavikalpo dhūmamantareṇa vahnimātra eveti bhavati; adhyavaseyaṃ 
tu bāhyamagnimapekṣya tatraiva [tatraiva kevale kha. |] na kevale pravṛttiriti 
tadabhiprāyeṇa tatpratītyananupraviṣṭo'pi dhūmaḥ [dhūma kha. |] 
pratītyantarapraviṣṭa iti ucyate daṇḍī śete iti pratītau daṇḍa iva 
bhinnajñānālambanaviśeṣaṇabhāvādeva | punaḥśabdaḥ ābhyāṃ 
pakṣaliṅgābhyāṃ viśeṣamāha | arthagrahaṇena śrautraḥ pratyayo 
nirākriyate, janakatayaiva indriyavadāste, nāpi antarbhavatyeva paraṃ 
dhūmavat | yadivā ekavākyatayā dhūmādeva śabdasya viṣaya utpadyate, 
pratīterdarśanānumānavailakṣaṇyena bhavantyā 
abhidhākhyāyāstādṛśaḥ svabhāvo yena abhidhīyamāna eva arthaḥ 
śabdamayaḥ svīkṛtaśabdanarūpo bhavati, natu śabdo na bhāti cakṣuṣi, 
nāpi pratītyantare bhāti dhūma iva | naca tasyāmeva pratītāvarthāt 
pṛthagbhūtatayaiva bhāti bhūtalādiva ghaṭaḥ, apitu tena arthena sārdhaṃ 
milita eva otaprotībhūta eva |

(page 258)

nanu bhinnākṣavīkṣaṇīyayoḥ śabdārthayoḥ ka eṣa vṛttānta ityāśaṃkya 
vācaka iha śabdaḥ, tasya ca śrotragrāhyatā, naca kācidavasthā,- iti 
darśayati nahi ityādinā śabdavyāptiḥ ityantena | nahi śrotragocara eva 
śabdaḥ, apitu pratyavamarśarūpa iti saṃbandhaḥ | niyamasya niṣedhe 
hetumāha madhyagranthena suśrūyamāṇo'pi iti | na tathā iti na śabdaḥ 
syāt, asti ca tadāpi śabdavyavahāraḥ

	upāṃśurmantraṃ japati............................. |

iti śabdaviṣayavyaktavāktvavyavahārāditi bhāvaḥ | tasya

	catvāri vāk parimitā.......................... | (ṛ 1|164|45)

itinayena catuṣṭayīṃ vyāptiṃ darśayitumāha ahamiti iti | anena 
parāvasthā uktā sā [sa kha. |] prathamam ityādinā paśyantīrūpā 
parāparāvasthā sādāśivī tāvataiva iti iyataiva tāvadasau 
pratipādanakriyāyāṃ svatantraḥ pratipādyasya tadānīmeva āsūtritatvāt 
paratastu ityādinā madhyamābhūmirvidyāmāyobhayasparśinī | 
manomayatvena iti antaḥkaraṇarūpasya māyāpramāturullāsāt yā 
prāṇanākhyā vṛttistayā kramikatvena cañcalarūpayā prāṇavṛttyā 
prāṇodayena bheditau parasparataḥ svarūpataśca yau viśarārūkṛtau 
vācyavācakau, tayoryo madhyamābhūmāvavabhāsaḥ; sa 
pṛthagbhūtagrāhyagrāhakaprapañcamīṣadracayati [bāhya kha. |] | 
yato'ntarālavartī sa prapañcaḥ mahāsaṃvidaḥ pṛthagbhūto bahiśca 
sphuṭatāmaprāptaḥ, tata eva ātmamātraviṣayaḥ, natu 
sarvapramātṛsādhāraṇaḥ; atyantacañcalaḥ, natu sthiraḥ | saṃkalpanā hi 
na ekatra avatiṣṭhate | cañcalapavanopagṛhītaṃ hi saṃvedanaṃ na sthiraṃ 
bhāti

(page 259)

	dhruvamapi ravibimbaṃ yadvadantastaraṅgam |

iti | tata eva

	rākṣase rākṣasaṃ bhāvam...................... |

ityādi nirūpitam | saṃsaraṇaṃ nāma yadājavañjavībhāvalakṣaṇaṃ, 
tadeva caturdaśavidhasargādikrameṇa bahuśākhatvādinā taruriva | tasya 
mūlabhūtoṣau prapañcaḥ | yato'ntarālavartini eva tasmin 
rāgadveṣādilakṣaṇena abhiniveśādhiśāyinā rasena upaseka ārdratā 
pṛthagbhāvalakṣaṇaśuṣkatāpāsanaṃ kriyate bahirbhūmau hi

	saṃsṛjyante na bhidyante........................... |

iti nyāyena | mamedamitisaṃbandhābhāve kau rāgadveṣau, idantāyā api 
ahaṃbhāvaprarohe bhedasya aprarūḍherbhedādhiṣṭhānaḥ kathaṃ 
saṃbandha iti tatrāpi na rāgādaya iti madhyamābhūmāveva 
māyīyayorgrāhyagrāhakayorullāsaśca saṃbandhaśceti tatraiva 
rāgādayaḥ, mūlaṃ ca sekena upabṛṃhaṇīyaṃ bhavati,- iti darśitam | 
mūlasya cañcalatvena vicitraḥ prarohaḥ saṃsārasyeti uktam | 
antarālavartinam ityanena idamapi āha- yastata eva bhūmerāntaraṃ 
rūpaṃ spṛśati, sa vidyā yāmeva abhiniviṣṭaḥ | yathoktaṃ

	seyaṃ kriyātmikā śaktiḥ śivasya.................. | (spa. kā. 48)

ityupakramya

	.....................ṣvamārgasthā jñātā siddhyupapādikā ||

iti | yastu tayaiva bahiranudhāvati, sa saṃsārameva puṣṇāti | yathoktaṃ

	.......................................................paśuvartinī |
	bandhayitrī ........................................................ ||

iti | asyāmevaca madhyamābhūmāvadhyāso vācyavācakayoriti 
upapādayati 

(page 260)

tatra ca iti vedyavedakaprapañcaracanālakṣaṇāyāṃ madhyamāyām | 
pramātṛbhūmimeva iti buddhiprāṇalakṣaṇamāyāpramātṛtādātmyam | 
idantayā iti tataḥ pramāturmāyīyādapi pūrṇena bhedeneti yāvat | natu 
[nanu ka. |] iti tathābhāsena hi bhūtalaghaṭavat ko'dhyāsārtho bhavet | tena 
iti vācakena śabdena māyāpramātṛbhūmirna tyajyate 
madhyamādaśāyām | vedyatvena hi tadānīmartha eva pṛthagavabhāsate, 
śabdastu ahaṃbhāvameva śavalayati paraṃ, natu tataḥ pṛthak bhavati 
manāgapi īdṛśaḥ saṃkalpayitā | ahamiti hi tadānīṃ 
māyāpramāturavabhāsaḥ | taduktaṃ svarūpāvācyatva [pavācya ka. |] 
iti ahantāśavalīkārakāraṇabhūto hi asau vācakaḥ parāmṛśyamāna eva 
arthasya parāmarśakaḥ | vācakasvarūpeṇa ca saha yato'rthasya 
parāmarśastato'rthagatedantā arthādhyaste [vyaste kha. |] vācake'pi 
prasarpati iva, natu sākṣādasya idaṃbhāvaḥ | arthādhyāsādevaca 
vācakasya śāntyabhicārādiprayoge'rthasya tathābhāvaḥ, anyathā tajjape 
pratipādyasya śroturabhāve aṅgulisamayasya aṅgulisamayāntareṇa 
nirantareṇa yatha na śāntyādi, tathā atrāpīti adhyāsa eva sutarāṃ 
prātītikametaditi na hetutāmātramatreti sa evaca pratyavamarśaḥ 
ityādinā vaikharīdaśāmaparadaśāyā eva prasaramayīṃ nirūpayati | 
evakāreṇa ādyaiva daśā etatparyanteti darśitam | pramātṛ ityādinā eva 
ityantena madhyamābhūmermāyāpramātṛrūpāyā atrāpi aviyogaṃ 
nirūpayan pūrvapūrvāviyuktatāmuttarottaradaśāyāḥ pradarśayati | 
sthānakaraṇābhiharaṇātmakaṃ yat pramāturvyāpārāntaraṃ, 
tadrūpatāṃ prāpya tadvyāpārasaṃpāditaśabdarūpatāṃ pratipadya, 
śrotrendriyagrāhyeṇa bhinnena rūpeṇa nirbhāsamānā, bhinne ca vedye 
svabhāvādhyāsanatadvedyarūpatāṃ spṛśantī

(page 261)

suparisphuṭākārā bhavati | vaikharī hi vyāpārarūpā ca [ca kāryarūpā 
ca iti kha. nāsti |] kāryarūpā ca | sā tasyāmapi daśāyāṃ 
māyāpramāturdehabhūmikāmadhyāsīnā atyantaṃ bhedena 
nīlādivedyavat nirbhāsate iti tadavadhireva śabdavyāptiruktā, na 
nīlādyavadhiḥ | nīlāderapitu paramārthataḥ śabdavyāptireke | yathāhuḥ 
parameṣṭhipādāḥ

	ghaṭāditvavivṛttāsau gṛhyate cakṣurādinā | (śi. dṛ. 2|8)

iti | nanu śrotragrāhya eva śabdaḥ, madhyamādiṣu tu śabdatvaṃ 
svamanīṣikāmātramiti kāṇādasya mohaṃ 
pārameśvarāgamavyavahārapradarśanena nirākaroti ata eva iti | yata 
etāvatī śabdavyāptistataḥ parādirūpatayā japa uktaḥ 

	jīvanmuktau [kto ka. |] paro devi muktau sūtritabhedakaḥ |
	madhyamo bhogamokṣākhya upāṃśuḥ siddhidāyakaḥ ||
	vāciko bhūtaviṣajitsaśabdastvābhicārikaḥ |
	iti ṣoḍhā japajñasya mantrāḥ sarvārthasādhakāḥ ||

iti | anyathā parādirūpatayā kathaṃ japaḥ syāt | japo hi 
śabdāvartanasvabhāva eva ucyate, natu dhyānacintanādyāvartanena 
japavyavahāraḥ | japa vyaktāyāṃ vāci iti hi smaranti | nanu āgamāntareṇa

	citiḥ pratyavamarśātmā................................. | (1|5|13)

ityatra sūtre paṭhitena śrīkālapādīyena śravyasyaiva śabdatāvyavahāro 
darśita iti śaṅkāmapāsyati kevalam iti | lokaprasiddhyapekṣo'yaṃ 
vyavahārastata eva proktagrahaṇaṃ tatra | vastuto hi

	sādākhyaṃ yatparaṃ bījaṃ sarvabhūteṣvavasthitam | (sva. )

ityupakrāntaṃ yat, tasyaiva anena vyāptiruktā | ata eva 
mayaṭpratyayopādānaṃ

(page 262)

tatra upapannam | nanu yadi śabdāvartanaṃ japastadavicchinne 
kālabhedamaspṛśati paravāgrūpe kathaṃ japavyavahāraḥ | āvartanasya hi 
vicchidya vicchidya yadudīraṇaṃ, tadeva rūpam | parāvasthāyām iti 
sakṛdvibhātatvavat sakṛdāvartanameva tatra japa iti yāvat, 
āvartanavyavahāraśca tatra udayamātre | sakṛcchabdena tu ekavāravācinā 
sadārthaparyāyeṇa vā vicchedaśaṅkā nivāritā, yathoktaṃ prāk 
svarasoditā iti | yastu

	bhūyo bhūyaḥ pare bhāve bhāvanā bhāvyate hi yā |
	japaḥ so'tra svayaṃ nādo mantrātmā japya īdṛśaḥ || (vi. bhai. 145)

iti parādaśāyāmapi āvartanavyavahāraḥ, sa spṛṣṭāyāmasyāṃ 
paśyantīmadhyamādarśapatitāyāṃ daśāyām | evaṃ saṃketakāle 
śabdananiṣṭhameva saṃketanamiti svarūpāvivekena 
arthaparāmarśo'bhidhānamiti vyutpādya vyavahārakāle'pi eṣaiva vartanī 
yanmukhaprekṣī saṃketa iti nidarśayati vyavahārakāle ca iti | co'pyarthe | 
na kevalaṃ saṃketamūlāyāṃ vyutpattāvayaṃ prakāro 
yāvadvyavahāramūlāyāmapi,- iti anena vitatya tadeva vibhajya ucyate 
yattaduktaṃ evameva ca vṛddhavyavahāra iti | śrotāpi iti na kevalaṃ 
vaktā tathābhūtaśabdanamaya ityarthaḥ | tathaiva iti vaktṛvadeva tatra 
anūnādhikam | tadeva vimarśanamiti vadan ghaṭamānayetyato 
vakṣyamāṇāt śabdanāt vailakṣaṇyamiha darśayati | sa ca ayaṃ vyavahāro 
na saṃketānupajīvīti darśayati śabdana eva iti | nanu svīyaṃ parakīyaṃ 
ca śabdanamekīkartavyaṃ saṃketena, tacca na apramitaṃ tathā 
sukaramityata āha tadapi iti śabdanaṃ svagataṃ svasaṃvedanāt, paragataṃ 
tu anumānāt, tadanumāne ca kartavye śabda eva sthūlaḥ sthūladṛṣṭyā

(page 263)

kāryaheturvastuvṛtte, natu svabhāvahetureva | śabdanāvasthaiva hi 
tatparyantā | ānumānikatvaṃ tāvat parairapi upagataṃ paramārthatastu 
vyaptismaraṇādisaṃvedanavighnābhāvāt śabdapramāṇarūpatayaiva 
śabdaḥ svarūpamiva nīlādimiva ca prayoktṛgataṃ śabdanātmakaṃ 
parāmarśamapi svaparāmarśābhedenaiva parāmṛśan, parasya 
tatsvarūpaparāmarśamayatāmiva tannīlādyarthaparāmarśamayatāmiva ca 
tatprayoktṛparāmarśaparāmarśanamayatāmapi vidhatte | nanu evaṃ 
vyavahāro mayaṭśabdāducyate, sa ca [etadu ga. |] 
taduktasvarūpasaṃvidhānātiriktaḥ kaḥ | na kaścidaparo'sāviti darśayati 
śabdanasyaivaca iti | madīyaṃ parāmarśamayaṃ parāmṛśati, etadīyaṃ 
ca ahamityeṣa eva parasparavyāptilakṣaṇo [rāprāpti ka.] vyavahāraḥ | 
vyaveti karmavyatihāramāha, haratiḥ prāptimiti hi uktaṃ prāk | nanu 
ghaṭamānayeti vakturyādṛśaṃ darśanaṃ, na tādṛśaṃ pratipādyasya | ka 
evamāha | tādṛśameva hi tat, tathāhi praiṣastasyābhipreta iti | 
preṣayāmyahamimamiti hi parāmarśe vaktuḥ śrotuśca praiṣo'bhipreta eva 
sphurati preṣito'hamiti | kevalaṃ kartṛkarmabhāvo'tra 
pratipādakapratipādyatvavaśādeva vijṛmbhate, sahi praiṣasya 
pratipādakatvādeva kartā, itarastu pratipādyatvādeva karma 
tathābhisandhānenaiva śabdaprayogāt | yastu taṭasthaḥ, tatra na asau 
pratipādya iti tasya na svātmani preṣyamāṇapratipattiḥ, apitu 
viditasamayatvāt so'pi tanniṣṭhameva praiṣaṃ pratipadyate ayamanena 
preṣita itipratipatteḥ, ayameva adhikāryanadhikāriṇoḥ pratipattau viśeṣaḥ | 
ghaṭastiṣṭhatītyatra api māmayaṃ pratipādayati, ahamamuṃ 
pratipādayāmīti asti evaṃ saṃkramaṇe parāmarśavaicitryam | upajīvyo hi 
parāmarśaḥ svatantratvena kartā nirbhāsate, tadanujīvī tu 
tatpāratantryādeva karmabhāvametītyevaṃ [mabhyetī kha. |]

(page 264)

bimbapratibimbavat vaiparītyaṃ, saṃkramaṇasya [ṇe ka. |] kevalaṃ 
ghaṭastiṣṭhatītyatra kartṛkarmatāvaicitryaṃ śabdena padarūpeṇa kenāpi na 
spṛṣṭaṃ [sṛṣṭaṃ vā spṛṣṭaṃ kha. |], prakaraṇādisahāyavākyagamyatā 
tu tasya kena apasāritā tatsannidhau hi tatpratīteḥ | yadi anyathāsiddhatvaṃ 
kriyate, tat vākyārtho'pi na kaścit bhavet vākyagamyaḥ | tena 
vākyasaṃnidhau yāvadavyavadhinā niyamena pratīyate, tāvato 
vākyārthatvamanavadyameva [manapodyameva kha. pāṭhāntaram |] | 
anenaiva āśayena kartavyatvaviśrāntaṃ pratipattikartavyatābalāt [pattiḥ 
ga. |] sarvaṃ vākyamiti kecana manyante | athavā kiṃ naḥ etena | tadastu 
śabdena aparigṛhītam, anumānamātrāt tu avagamyate | sarvathā tu praiṣaḥ 
śabdena padātmanā na spṛṣṭa iti viśeṣaḥ | taṃ punaḥśabdena āha | 
punaḥśabdena ca vaktṛsajātīya eva prathamaparāmarśaḥ caramaṃ tu 
svātmani pratipādyatāṃ parāmṛśata eva 
vaktṛviparītaparāmarśāntarodayaḥ | praiṣasya hi īdṛśa eva svabhāvo- yat 
vaktari preṣakatā, pratipādye tu preṣyatā | paramukhena api vyavahāre 
mūlabhūta eva svatantraḥ, anyastu tadanukārī lekha iva vastuto na vaktaiva | 
sa tu svarūpasya kevalaṃ vaktā lekhavadeva, svarūpāttu pratipannāt 
praiṣapratipattau pratipādakapratipādyatvāvagatiḥ | nanu praiṣo gamyamāna 
iti prakriyālakārastu 
kartṛkarmānyataraniṣṭhasaṃkhyāmātraśabdanarūpaḥ, tat kathaṃ 
praiṣo'pi lakārasaṃśabdita iti uktam | ucyate- iha 
anādivyavahāraparamparānirūḍheryato yāvadutpadyate śabdanaṃ 
śabdāt, tāvat so'bhidhatte iti tāvat paramārthaḥ | praiṣe'pica bhavati ataḥ 
parāmarśa iti so'pi kiṃ na vācyaḥ | yogyatā vā samayo vā kiṃ 
guṇapradhānatāvaicitryāvaruddhena ekatra api arthe pratihanyate 

(page 265)

yena śabdasya bhāraḥ kaścit bhavet [bhavati etaśca ka. |] | tataśca 
yathonmiṣitadṛśo yāvat yogyadeśagaṃ yogyaṃ vastu, tāvat 
samastaviṣayanirbhāsaṃ cākṣuṣaṃ vijñānam, naca asya bhāraḥ kaścit; 
tathā śabdasyāpīti praiṣo'pi paramārthatastenaiva saṃśabditaḥ 
saṃkhyādivadeva | prakriyāstu aniyatākārāḥ | kvaciddhi dhātuḥ sādhane 
diśi puruṣe citi tadākhyātamiti kartrādi dhātuvācyamiti abhyupagatam 
[upagatam ka. |] pratipādakaśabdaniṣṭhāḥ kila yathāruci carcyantāṃ 
prakriyāḥ, kaḥ khalu vyavahāraniṣṭhe tu ākhyeye śabde viśeṣa iti 
alamavāntareṇa bhūyasā | saṃkramaṇa iti bimbapratibimbayorhi 
dṛṣṭametat vaiparītyamiti bhāvaḥ | anurūpeṇa iti 
praiṣasāmarthyāyāteneti yāvat | evaṃ vyavahāramūlāyā 
vyutpattestattvamabhidhātuṃ vyavahāraparamārthaṃ vicārya 
saṃketamūlayā api vyutpattyā vyavahāramūlayaiva yuktaṃ bhavitumiti 
pratyāvṛttyopasaṃhāramukhena āha tadevam iti bhavati iti pratītiḥ iti 
saṃbandhaḥ | vyavahāropayoginī iti vyutpattiriti mantavyam | yathāhi 
aṅgulīsaṃvartanādi saṃketabalāt dānādiviṣayatāmātreṇa 
vyavahāropayogi, na tathā śabdasvarūpaṃ tasya pratītau 
parāmarśanabhāge parityaktasiddhasvabhāvatayā sādhyamānatvena 
śabdanarūpatayānupraveśāt | aṅgulīsamaye'pi 
vyutpattivyavahārakālayoḥ śabdanarūpataiva vijṛmbhate | tata eva na 
sāmayikatvamātraṃ śabdanasya | tathābhāve'pi na sāmayike 
anyasmiṃstadupayogo bhavet | nahi aṅguliniveśe tajjātīyamaparaṃ niyamena 
upayogi, na sāmayikaṃ śabdanaṃ samayāntare praveśāditi 
sāmayikatvasya vyāptā [vyāptatada ka. |] tadananupraveśaḥ ekenaiva [naca 
ka. |] carite'rthe'nyānupayogāt,

(page 266)

tadviruddhasya ca iyamupalabdhiḥ | tata eva śabdanasya pratītivyāpāratā 
uktā | tena parāmarśāvasare śabdaḥ śabdanarūpatāṃ gato'rthamapi 
bahiṣprakāśamānaṃ ghaṭa iti tanmayīkurvannātmānaṃ vastumayamiva 
vastu ca svātmamayamiva saṃpādayati, tadāpica bahiṣprakāśabhūmau 
tayorbhedādeva adhyāsavyavahāraḥ, anyathā ātyantike aikye kathaṃ 
tadvyavahāraḥ | ata eva bhinnendriyagrāhyatvādinā adhyāsavādaṃ 
bādhate iti darśayati natu iti | taccedamanavakāśaṃ- na arthe śabdāḥ santi 
- ityādi | nanu ca viśeṣaṇaviśeṣyayorapi ekaṃ śabdanamasti 
śabdārthayoriva, tatastatra api adhyāsavyavahāraḥ syāt yathoktarūpaḥ; 
naca asau saṃvedyate iti śaṅkāṃ śamayati daṇḍītyatra iti | evaṃ 
prakriyākrameṇa tāvadekaśabdananiṣṭhatvaṃ tayornāstīti upapādya 
pāramārthikamapi rūpamāha eka evaca iti | tadā ca bhedāvasthāyā 
abhāvaḥ | ekamekena śabdanena yadi [na yadi kha. |] śabditaṃ, tadā kiṃ 
kva adhyastaṃ syāt | nanu vastutastāvat daṇḍapuruṣau bhinnāveva, 
vastuvṛttaṃ na atra upayogi, kintu avabhāsanamatra vijṛmbhate | tacca bhedena 
nāsti daṇḍītyasyāmekaghanavikalpyapratītau 
vākyārthapratītisthānīyāyām | vastuvṛttānujīvī ca na 
adhyāsavyavahāraḥ | etat darśayati evamevaca iti bhedena 
prakāśamānāvityevam [śya ga. |] | etat iti anyonyādhyastāvucyete 
ityetadvākyārtharūpaṃ vastu | nanu evaṃ prakāśo bhedamādarśayan 
vaiyadhikaraṇyaṃ śabdārthayorāvedayate, parāmarśastu tadvaiparītyena 
sāmānādhikaraṇyam | tatra vyavahāre kiṃ samucitataramityāśaṅkya āha 
sāmānādhikaraṇyam iti vaikharīprasare | abhedaśca iti madhyamābhūmau | 
prakāśabalopanate 

(page 267)

tu bhede vaiyadhikaraṇyaṃ na ādriyate | atra hetumāha śabdana iti | uktaṃ 
hi

	svabhāvamavabhāsa.................................... | (1|5|10)

iti, vakṣyate ca

	dūrāntikatayārthānām.......................... | (2|3|10)

ityādi | tadayaṃ vācakasvarūpādhyāsa eva vācyatvaṃ, tadadhyāsaśca 
vācakatvamutthāpayati,- iti vyavahāryaṃ vastu 
nāmarūpalakṣaṇamanevaṃrūpatayā na kadācidāste,- iti ekānta eṣaḥ | 
tataśca ayaṃ prayogaḥ- vācyavācakena parasparādhyaste vyavahāre 
parasparaviśeṣato hlādatāpādyarthakriyā yogyatvāditi svabhāvaḥ | 
śuklapaṭayorhi parasparoparāgādarthakriyābhedaḥ | tadvat taruṇīti 
ākarṇyamānameva hṛdyamarthoparāgāt [hṛdyarthopa ka. |], strī 
dṛśyamānāpi hṛdyā iyamasau ramaṇītyuparāgāditi | nanu 
paśyantībhūmau kīdṛgadhyāsaḥ | na kaścit tatreti nirūpayati ata eva iti 
yato vibhagena avabhāsate'dhyāsavyavahārastata [sataṃ kha. |] ityarthaḥ | 
āstāṃ tāvat iti uttaratra tu etatprapañcayiṣyate 

	svaviśrāntyuparodhāya.............................. | (4|1|10)

ityādyuddeśeṣu | prakṛtamupasaṃharati sthitameva tu iti | bhedena 
pramātuḥ pṛthagbhāvena parāmarśakāle śabdaḥ prakāśate, tasya ca 
svarūpameva anurūpamucitamidantāvamarśanam | naca tatra 
vyutpattirupayujyate | sā hi vyabhicāraśaṅkāṃ śamayitum | naca sā 
svarūpaṃ prati saṃbhavati | sā hi viśiṣṭavyavahārasiddhaye 
śaktiniyamaprakhyāpanakṛtāt niyamavyāvartanāt | naca svarūpasya tat 
saṃbhavatīti | tasya antaraṅgatve vyutpatteśca anupayogaḥ | nanu svarūpeṇa 
vācyena kva

(page 268)

vyavahāraḥ | āha agnimimam iti | tadevaca iti svarūpadvāreṇa 
yadidantāvamarśanam | nanu evamagnimāhareti svarūpasya āharaṇaṃ 
kasmāt na bhavati arthasya ivetyāśaṃkya āha kevalam iti | 
śītamapaneṣyāmaḥ iti hi prakaraṇādibalādarthakriyāviśeṣaṃ prati 
arthitā jñātā, sa ca arthenaiva sādhyaḥ, na śabdasvarūpeṇa; yastu tenaiva 
sādhyastatra svarūpameva vācyatvena sphuṭamupalakṣyate- agnerḍhak 
agniṃ paṭha iti | yadyapi ca agnimāhara ityatrāpi tatsvarūpā(dhya)stasya 
yadāharaṇaṃ, tatsvarūpasya adhyāharaṇameva, itthamevaca tadāharaṇaṃ 
yuktam, na svātantryeṇa vācakasya tadāharaṇaṃ bhavediti nyāyāt; tathāpi 
vastubhāgameva lokaḥ pradhānatvena parāmṛṣṭamabhimanyate tata eva 
arthakriyālābhādityāśayena anupalakṣaṇāt iti uktam | evam agnerḍhak 
ityatra api svarūpasya yadyapi vācyādhyastasyaiva prakāśaḥ, ataśca evaṃ 
yadvācakādeva arthato'gniśabdāt [arthanataḥ kah. |] pratyayastathāpi 
śabdabhāganiṣṭhatvenaiva [tiṣṭhatvenaiva kha. |] paurvāparyasya nirvāhāt 
svarūpavācyataiva ucyate | vastuto hi śabdārthāvatyantāviyogenaiva 
pratītipathe bhāsete, tato'yamadhyāsaḥ | svarūpābhidhāyitvaṃ ca 
pratītisiddhameva, vyāmuḍhaistu na vyavahriyate iti tadarthaṃ pramāṇamatra 
nirūpitamiti vyāmohapadasya āśayaḥ | adhyavasā ityaṅṅantaḥ striyām || 
20 ||

	nanu evaṃ parāmarśopajīvitāni [parāmarśenajīvitāni ka. |] 
vedanāni, sa ca ahamityeva viśrāntisatattvo vedyabhuvamanadhyāsīno 
[manadhyāsīnavedya kha. |] vedyasparśanocitābhyāṃ deśakālābhyāṃ 
na avaṣṭabhyate,- iti samastaṃ saṃvedanamakramameva prasaktam, ekaṃ ca | 
bhāti ca saṃvedane kramaḥ [kramasvāṃśāpekṣayā 
saṃvedanāntaropekṣayā kha. ka. |] svāṃśāpekṣayā 
saṃvedanāntarāpekṣayā

(page 269)

ca kramābhāvena saṃvedanavyavahārādarśanāt [vyavahārā kha. |] | ata 
[tataḥ kha. |] ātmarūpatāvabhāsane vyāpako 
yo'haṃbhāvabhāsanakṛto'kramatvaikyayogastadviruddhamiha 
saṃvedanarāśau sakramatvānekatvamupalabhyate [upayujyate ka. pāṭhaḥ |]

	.........................jñānasmṛtyapohanaśaktimān | (1|3|7)

iti ca vadatā siddhāntināpi upagamyate iti | na 
ātmarūpatāvabhāsanamadhyavasāyasya upapadyate iti yo manyeta, taṃ 
bodhayituṃ sūtrokta ivārtha eva abhivyajyate sūtrāntareṇa

	kevalaṃ bhinnasaṃvedyadeśakālānurodhataḥ |
	jñānasmṛtyavasāyādi sakramaṃ pratibhāsate || 21 ||

	etadvākyārthaviśeṣaṇaṃ bhavat- ahamiti viśrāntiḥ pāramārthikī 
tāvadakhaṇḍitaiva tatpṛṭha eva tu sakramatvaṃ nirbhāsate iti prakaṭayati | 
tathāhi kramavattvaṃ deśataḥ kālataśca 
parvatabadarasaṃvedanayorvaitatyāvaitatyābhyāṃ ciraśīghratayā ca yat 
bhāti, tat bhinnasaṃvedyagatadeśakāloparāgāt, yacca anekatvaṃ 
svarūpabhedābhidhānaspṛṣṭaṃ; tat parāmarśanīyasya bhinnasya 
saṃvedyasya anurodhāt | vedyāṃśaprādhānyamatra tadanurodhanaṃ 
bhinnasaṃvedyaṃ ca, deśakālau ca pratyāsattestadgatāveveti dvandvaḥ | 
eṣaca artho vṛttikṛtā spṛṣṭa ādipadena | tena atiriktānatiriktarūpatvameva 
[ktānānati kha. |] tattvaṃ jñānādīnām | nirbhāsanasāraṃ hi vastu iti | 
tathā yat bhāti, tadeva śaktiriti saṃrambharūpatayā, dharma iti 
siddharūpākārabhedarūpatayā, guṇa iti tatparatantrarūpatayā, vyāpāra 
itica pūrvāparavitatarūpatayā vyapadiśyate | yastu 
jñānasmṛtisaṃkalpādyavāntarajātikārī bhedaḥ, sa māyāśaktyeti 
(1|5|18) pūrveṇa uktaḥ | anena tu jñānādyekajātīyatve'pi [jñānanasya 
ekajā kha. |] yo bhedaḥ- nīlajñānaṃ,

(page 270)

pītajñānaṃ, nīlasmaraṇaṃ, pītasmaraṇamityādiḥ, yaśca 
deśakālakramoparāgāt vitatāvitatatvaciraśīghratvādiśca [śīghrādiśca 
kha. |] saṃvedanagataḥ, sa nirūpyate | athavā svarūpabhedo'khilo

	māyāśaktyā vibhoḥ....................... | (1|5|18)

ityanenaiva sūtreṇa ukta iti iha saṃvedyasya yau deśakālāviti samāsaḥ | 
atra pakṣe vṛttāvādipadena viṣayagataṃ hṛdyatvādi ucyate yataḥ 
saṃvedanasya sukhaduḥkādyākārataiva lakṣyate | tadevaca rūpaśabdena 
ṭīkāyāmuktam | deśakālapadasya ca atra pakṣa upalakṣaṇatvaṃ 
vyākhyātam | tena saṃvedyasya sphuṭāsphuṭādirūpatayā 
jñānasaṃkalpasmaraṇādibhedastāvadantaraṅgaḥ | pratyekamapi tatra 
nīlajñānaṃ pītajñānamiti antaraṅgataraḥ; nīle'pi sukhaṃ duḥkhaṃ 
saṃvedanamiti antaraṅgatamaḥ; ciramidaṃ jñānaṃ, śīghramidamiti 
bahiraṅgaḥ, pūrvamidamaparamidamiti bahiraṅgataraḥ; sūkṣmaṃ 
maśakajñānaṃ, sthūlaṃ hastijñānamiti bahiraṅgatamaḥ iti 
pradhānabhūtasaṃvedyoparāgakṛtaḥ saṃvedanasya bheda iti sūtrārthaḥ | 
enamavatārayati tadevam iti | kevalam ityasya arthaṃ sa punaḥ ityetena 
adhikaviśeṣasaṃbhavadyotakena vyākhyātuṃ pīṭhabandhatvena 
abhedabhittirāste eva iha vāstavī,- iti darśayati parāmarśa ityantena | 
apiśabdāntena vākyena abhedo bhavannapi na avabhāsate ityāśaṃkāṃ 
nirākaroti | saṃvedyaśabdaḥ parāmṛśyatāviśrāntaḥ saṃvedanasya 
parāmarśasāratvābhidhānāya vyākhyātaḥ | nanu saṃvedyamapi 
bhagavata eva abhinnaṃ, tat kathaṃ saṃvedyasya bhinnatā,- ityāśaṃkya 
āha viśvātmano'pi iti | apiśabda uktāśaṅkādyotakaḥ | 
padārthajātam iti saṃvedyaṃ sat prakāśyate [prakāśate kha. |] 
māyāśaktyetyarthaḥ | ata eva iti yato māyayā

(page 271)

bhedena prakāśanaṃ ghaṭādestata eva hetorvedyadharmadeśakālayogaḥ, 
saṃvedanamayatve tu vāstave ghaṭāderapi na iyaṃ durdaśā,- ityetat ata eva 
itiśabdena uktam | bhinnasya saṃvedyasya rūpaṃ deśaḥ kālaśceti 
pratipādayiṣyate

	kramo bhedāśraya................................ | (2|1|4)

ityatra | sajātīyādapi iti ghaṭo'pi ghaṭāntarāt | nanu sa ghaṭo vedyarūpaḥ 
kathaṃ saṃvedanaṃ kakṣyāntarapatitamupādadhīteti codyamuddharati 
taccaitat iti vedyadaśāyāmapi na saṃvedanasparśaṃ śaknoti 
ullaṅghayitumiti na asya saṃvedanāt davīyasī avasthitiriti yuktameva 
codyopadhānaṃ vedanāṃśe | yadiśabdena kriyātipattirdyotitā 
hetuhetumadbhāvakathanāya | sā tu kiṃviṣayeti kathayiṣyamāṇasya 
vākyārthasya tatkriyātipattiviṣayato hetuhetumadbhāvaviśrāntatāṃ 
tacchabdo dyotayati,- iti | tato'pi iti abhedāt | na bhavet iti tadā 
bodhadharmaḥ | pratyuta ākrāmedvedyam iti svagataṃ 
kramamutkrāmedeva tat | nanu bodhyasya unmagnatāyāṃ prakaśanameva 
asya na yuktam | āha māyāvaśāt iti | abhimānabalena idamunmagnatvaṃ 
prakāśate, na vastuta iti yāvat | bodhyasyāvaṣṭambhaḥ iti karmaṇi 
ṣaṣṭhī bodhyamavaṣṭabhnāti, bodhaḥ svaṃ rūpaṃ tadekalīnaṃ karotīti 
yāvat | athavā iti atra vyākhyāyāṃ kartari ṣaṣṭhī, bodhasyeti tu karmaṇi | 
jñānasmṛtyādīnāmapi yaḥ pratyekaṃ svarūpabhedastena,- iti 
vyākhyāne tu jñānasmṛtyādilakṣaṇena svarūpabhedeneti | evaṃhi 

	māyāśaktyā.............................. | (1|5|18)

ityetatsūtrārthena asya paunaruktyaṃ syāt, saṃbhavantyāṃ ca 
sūkṣmāyāṃ gatau sthūladṛṣṭirna āśrayaṇīyā, tataḥ 
pūrvasūtrārthopasaṃharaṇatātparyamasya 

(page 272)

sūtrasya na vyākhyātamasmākaṃ gurupādairiti | artha iti vṛttivākyasya | 
evaṃca atra yojanā- jñānādirūpatayā ekajātīyatve'pi 
vibhinnadeśakālādinā uparaktaṃ jñānamapi jñānāntarāt smaraṇaṃ 
[ṇaṃ ca kha. |] ca smaraṇādanyadābhāsate iti samastasūtravṛttitātparyaṃ 
[staṃ kha. |] saṃkṣipya āha māyākṛto'pi iti | etaduktaṃ bhavati- 
bodhasya yat bodharūpeṇa pradhānībhūtena avaṣṭambhanaṃ, na 
idamasaṃbhāvyaṃ bodhasvabhāvatvādeva bodhyasya | ataśca 
prakāśamānatāliṃgitena bodhyabhāgena nirbhāsamāno bodhaḥ 
kimadbhutaṃ yattadīyarūpadeśakālabhedena 
tadrūpānuparivartitāmātmani nirbhāsayati- iti | bhāgaśabdasya 
ayamāśayaḥ- yadyapi grāhyagrahakayugalasṛṣṭiśaktirmāyā, tathāpi 
grāhakasya cidbhāge na māyāvyāpāraḥ, apitu acidaṃśa eveti | tat 
siddhaṃ jñānaśaktirbhagavato vyatiriktabodhyabhedāt bhinnakalpā api 
paramārthato na vyatirikteti | tadanena prabandhena 

	jñānaṃ ca citsvarūpaṃ cet................... | (1|2|7)

iti yaḥ parasya vyāmohaḥ, sa vyapohitaḥ kalpitabhedameva vastuśaktiriti hi 
samarthitamiti śivam || 21 ||

iti śrīmahāmāheśvaraśrīmadācāryābhinavagupta-
viracitāyāmīśvarapratyabhijñāvivṛtivimarśinyāṃ 
jñānaśaktivimarśaḥ pañcamaḥ || 5 ||



atha ṣaṣṭho vimarśaḥ |

	ahamānandaghanecchāghaṭiteśvaratonmiṣatsamastormiḥ |
	ityullāsataraṅgitamamṛtormimahaṃ cidarṇavaṃ vande ||

	smṛtijñānaśaktī vimṛśya tadubhayānugrāhiṇīmapohanaśaktiṃ 
vitatya ślokaikadaśakena vimṛśati

	ahaṃpratyavamarśa............................... |

ityādinā

	................................ṣarvasya jīvataḥ |

ityantena | tatra pratyavamarśasya vikalpo viśeṣa iti ekena uktvā 
śuddhehantāvimarśe apohanavyāpāro nirasyate ślokena | tato'smaddarśana 
eva ayamapohanavyāpāra iti ślokena ucyate, dvayena 
aśuddhāhaṃvimarśasya vikalpatā, anusandhānasya api vikalpatvameveti 
ekena, evaṃvidhānusandhisvabhāvaiva sraṣṭṛtā bhagavataḥ iti ekena | 
prakṛte cidātmani arthāvabhāsasattopasaṃhārāya ekaḥ ślokaḥ | 
anubhavasmṛtyādāvarthāvabhāsa eva vicitraḥ,- iti dvayena ucyate, 
etadabhidhānaṃ ca prakṛtasvātmarūpeśvarapratyabhijñāyāmupayujyate 
iti ekena,- iti tātparyam | uktaṃ prāk

	svabhāvamavabhāsasya vimarśaṃ................... | (1|5|11)

iti | vimarśaśca abhilāpayojanayā, sa ca avaśyaṃ vikalpatvamāpādayati 
[upapādayati ka. |], tacca sāṃsārikamāyāpadocitaṃ bhagavati kathaṃ 
syāt,- ityāśaṅkāṃ śamayituṃ sūtram 

	ahaṃpratyavamarśo yaḥ prakāśātmāpi vāgvapuḥ |
	nāsau vikalpaḥ sahyukto dvayākṣepī viniścayaḥ || 1 ||

dehādisaṃkocaśūnyasya prakāśasya ya ātmā sārasvabhāvo'na-

(page 274)

nyavadanāvalokisvātantryaviśrāntimayaḥ [vadanāloki ga. |] paraḥ 
pratiṣṭhātmā ahamiti pratyavamarśaḥ, asau vikalpo na bhavati | kutaḥ 
punariyaṃ vikalpatvāśaṅkā | āha vāgvapurapi 
śrotragrāhyarūpātiriktāntaravabhāasamānasaṃvidrūpāve-
śivācyādhyāsasatattvaśabdanātmakaśabdaśarīro'pi [vasāyamān ka. |], 
- ityarthaḥ | kasmādasau na vikalpaḥ | āha sahi iti | vividhakalpanā 
bhinnasyāpi guḍadadhimaricāderiva yojanā, ekasya api vaividhyena kalpanā 
vividhasya ca śaṅkitasya rūpāntarasya kalpanaṃ vicchedanaṃ vibhajya 
anyataścyavanaṃ pramātṛbuddhikośe praveśanena 
dārḍhyāpādanaparyantaṃ paripālanaṃ vikalpa ucyate niścayaśca | atra ca 
sarvatra avaśyaṃ tadatadrūpadvayena bhavitavyaṃ, anyathā kiṃ yojyate, 
kiṃca vibhajyate, kiṃca śaṅkyate iti sūtrārthaḥ | ātmani yaḥ 
pratyavamarśaḥ prakāśasya na nīlāderiva vedyasya idamiti, nāpi 
śarīrāderiva vikalpitapramātṛbhāvasya ahamiti paratra pramātari; sa 
evamucyate | ahamiti ātmani iti viṣayiṇi viṣaye ceti yojyam | evamiyatā 
ahamityasya tattvaṃ darśayituṃ vṛttau ātmani iti vaiyadhikaraṇyena 
sautrasāmānādhikaraṇyaparamārtho [aparārtho ka. |] vyākhyātaḥ | 
paravāgrūpatvāt iti parārthabhāgena na vikalpaḥ ityatra ayaṃ hetuḥ, 
uttarapadārthabhāgena sābhilāpatāyām | sahi iti vikalpaḥ | 
niṣedhaśabdena nirasanaṃ [niranumānaṃ ga. |] vyācaṣṭe | 
pratiyoginiṣedhapūrvatvādeva niścayaśabdavācyatā,- iti yojanīyam | 
vikalpasya ekaprakāravyākhyānaṃ vṛttau prakārāntarāṇāṃ 
tadanuviddhatvāt | atra iti viśuddhe prakāśe | iyatyā vṛttyā sūtrārtho 
vyākhyātaḥ | enamavatārayati yadi iti | tasya iti pratyavamarśasya 
śabdanātmatvapratipādanāt 

(page 275)

iti paravāk iti vacasā prāptamiti | naca tat yuktamityāśayaḥ | iyatā 
vāgvapurapi iti vyākhyātam | nirūpaṇāya iti uttarasūtrairyat 
nirūpayiṣyate, tasya ayaṃ pīṭhabandhaḥ kriyate ityarthaḥ | tāvat iti 
aśuddhasya tu vicāraḥ kariṣyate iti tātparyam | prakāśasya ityasya 
vyāvartyamāha śarīrādeḥ iti | nanu śarīrādi na bhinnaṃ kiṃcit 
prakāśāditi kathaṃ tat vyāvartyaṃ syāt,- ityāśaṅkya āha tacca iti | 
prakāśasya śarīrādau vedyībhūte yo vimarśastaṃ vyāvartayituṃ yat 
ātmani iti padaṃ, tadapi anenaiva granthena vyākhyātam | tacca iti tadapi 
vyāvartitamātmanītipadena,- iti saṃbandhaḥ | nanu viśuddhe prakāśe 
vācaḥ karaṇarūpāyāḥ kathaṃ saṃbhavo yena uktaṃ 
vāgvapurityāśaṅkya brūte śabdanātmatvāt iti | vacanaṃ hi śabdanaṃ, 
na vāgindriyajanyaḥ śabda ityarthaḥ | nanu evaṃ vṛttau paraśabdasya kiṃ 
prayogaphalam | tatra āha kevalam iti | śrutigocarīkāryā yā śabdanakriyā 
śabdotthāpikā kriyā-brūte jalpati vakti-ityevaṃ tasyā janyatvena 
viṣayatāṃ yato na prāptā sā vākśaktiḥ sthūlaśabdabhūmikāṃ [śakti 
ga. |] yato na svīkṛtavatī tatastajjananakaraṇatārūpaḥ sūkṣmaśabdātmā 
na bhavatyasau pratyavamarśa iti saṃbandhaḥ | pratyavamarśa evahi 
śabdātmā parabhūmau pramātuḥ sūkṣmabhuvi vāgindriyaṃ karaṇaṃ 
sthūladaśāyāṃ [sūkṣmadaśāyāṃ ga. |] prameyarūpaḥ śabdaḥ,- iti 
nirūpayiṣyate vitatya āgamādhikāre | nanu ca abhilāpinī pratītiḥ kalpaneti | 
tatra śabdanātmatve kā vikalpatvaśaṅkā | āha śabdānāmevaca iti | 
nanu na atra bhāve ghañ, apitu karaṇe, śabdanaṃ ca bhāvātmakamiti 
codyaṃ yadyapi ityādinā āśaṅkya śamayati 

(page 276)

tathāpi ityādinā | siddhatvena prameyasvabhāvo yaḥ śabdaḥ, 
so'rthavadeva abhilapyamānaikasvabhāvaḥ kathaṃ karaṇabhāvamanubhavet 
| tataśca [tathāca ka. ga. |] kartureva yat kriyātmakaṃ rūpaṃ, tadeva

	savyāpārapratītatvāt pramāṇaṃ phalameva sat |

iti nyāyena karaṇatayā nirdiṣṭam | yena parispandena pramātā abhilapitā 
sannabhilapati,- ityevaṃ vyavasthāpyate, so'bhilapanakriyātmā parispandaḥ 
karaṇatayā

	tadvaśāt tadvyavasthānāt......................... |

iti nayena apadiśyamāno'bhilāpa iti yāvat | abhilapane pramātuḥ kriyaiva 
karaṇaṃ pramātṛkaraṇatvāt pramākriyāvaditi svabhāvaḥ | karaṇatvaṃ hi 
sādhakatamatvena vyāptaṃ [prāptaṃ ka. |] tacca ananyāpekṣayā | tat yadi 
pramātṛkriyāvyatiriktaṃ karaṇaṃ syāt, tadanapekṣāviruddhā 
anyāpekṣā [vyāpekṣā ka. ga. |] āpatet,- iti vyāpakaviruddhopalabdhyā 
vipakṣāt pracyavamāno vyāpyamapi nivartayati | tena vyāpakasya 
anupalambhāt vyāpyaṃ nivartate, kāraṇaviruddhe'pi kāraṇābhāvāt 
kāryamiti vyāptisiddhiḥ | tathā iti abhilāpaśabdena | tairapi iti baudhaiḥ | 
nanu iyatā śabdasaṃsargayogyatāyāḥ śabdanaviṣayatā nāma tattvamiti 
vyākhyātaṃ bhavati | tacca prāktanairna upagatam | yathāha 
dharmottaropādhyāyaḥ-

	saṃsṛṣṭapratibhāseti vaktavye yogyagrahaṇaṃ kimartham 

ityupakramya

	avyutpannasaṃketasyāpi pratyayo bhavati vikalpaḥ

iti samarthya upasaṃhṛtaṃ

(page 277)

	viṣayavyāpāranirapekṣotpādatayā tu aniyatapratibhāsastataśca 
śabdasaṃsargayogyābhāsaḥ |

iti | etadeva parasya anupapannam, asmākameva tu upapannam,- iti darśayati 
nanu iti | tadeva hi iti aniyatapratibhāsatvaṃ parasya na yujyate | atra hetuḥ 
nahi iti | jñānasya hi viṣayavyavasthātmakameva nijaṃ vapuḥ | tadasya 
kathamavyavasthātmakatvaṃ syāt, avyavasthātmakatve vā 
saṃśayarūpataiva syāt | etacca saṃbhāvanāmātreṇa ucyate | vastuto hi 
saṃśayo'pi niyatapratibhāsa eva | sthāṇurevavā puruṣa evavā,- iti hi 
vārthāliṅgitameva atra vastu prakāśate | vārthasya tu tatpṛṭha [taddṛṣta eva 
ka. ga. |] eva bhavato vastuni vikalpakatvaṃ na saṃbhavati | nahi evamatra 
pratipattiḥ- vastu vikalpate iti, apitu tadekameva | aṃśe tu viparyāsaḥ, so'pi 
ekaniṣtha eveti na saṃvedanaṃ nāma viṣayaṃ prati avyavasthātmakaṃ 
yuktam | yaśca adhyavasāyāpekṣaṃ prāmāṇyaṃ abhimanyate, tasya 
adhyavasāyaśca [avyavasāyaḥ ka. ga. |] aniyatapratibhāsaśca,- iti kā 
bhāṣā | darśanāyante vikalpāḥ iti codyamāne sutarāmayaṃ bhagno 
vādaḥ | svapakṣe tu etadupapattimāha pamātuḥ punaḥ iti | etaduktaṃ 
bhavati- yasya arthaprādhānyāt tadbalopapannaṃ darśanaṃ 
tadrūpānukāri ca vikalpa iti darśanaṃ; tasya arthe niyate sarvametat 
niyatarūpameva | asmākaṃ tu pramātā pradhānatvena prapatati, natu artho 
varākaḥ kaścidasti | tadasau pramātā yāvantamābhāsaṃ svātantryāt 
vimṛśati, tāvati asau vikalpaḥ; natu ābhāsāntare,- iti 
ābhāsanikurumbharūpatvāsparśādaniyatapratibhāsa ucyatāṃ nāma, 
atadvyāvṛttibhedakalpanamapi 
sarvatonirāśaṃsarūpasvalakṣaṇaniyantritatve

(page 278)

kathaṃ syāditi, tadapi pramātaryeva āyatate tadetatsaṃskārasya 
atatsamāropasya atadvyāvṛtteśca pramātradhīnatvāt,- iti arthasya vyaktaye 
sphuṭatvāya upayogino ye ābhāsā deśakālādayaḥ, tān yadā pramātā 
na ādriyate svavyāpāre, ghaṭabhāsamātravimarśe tu viśrāntimādriyate; 
tadā yuktamaniyatapratibhāsatvam | nanu śabdo viṣayapakṣe sphuratu nāma, 
śabdanaṃ tu nāma kim | etadāha śabdanaṃ ca iti | 
śvetaguṇasattāśabdāśca pramātṛbhūmipatitāḥ pramātrā 
vimṛśyamānā vimarśe lolībhūtāḥ pūrvāparībhūtena vimarśarūpeṇa 
upabṛṃhitāḥ śvetate- bhavati- brūte- ityādikriyārūpabhājaḥ | 
siddharūpa evahi padārtho vimarśabalena pūrvāparībhūtarūpatāpatitaḥ 
kriyārūpe nimagno bhāti putrīyatāviva putraḥ | vācyakarmāṇo'pi iti 
vācyaṃ śabdalakṣaṇaṃ karma nirvartyamarthalakṣaṇaṃ ca prāpyaṃ 
yeṣāṃ, tathāvidhā api śabdārthāḥ śabdakriyāśca uktāḥ | yadihi 
śabdaḥ kriyārūpatāṃ na āśrayet, kathamīpsitatamaṃ dhātorvācyaṃ 
syāt | nahi karoterghaṭo'rtho, gamervā grāmaḥ | nanu vṛttau yaduktaṃ 
svabhāvabhūtaḥ iti pratyavamarśaviśeṣaṇaṃ, tasya kiṃ vyāvartyaṃ; 
nahi prakāśasya asvabhāvabhūtaḥ kaścana vimarśo'sti | asti,- ityāha ata 
eva iti | ghaṭaniṣṭho yaḥ prakāśaḥ- ghaṭaḥ prakāśate- iti 
ghaṭaniṣṭhīkṛta eva māyāśaktyā tasya prakāśasvabhāvasya api sato 
vimarśaḥ paratvena anātmabhāvena api śakyate vaktum | kutaḥ | āha ata eva 
iti | viṣayarūpaśabdavailakṣaṇyena yadetannirūpaṇamasmābhiḥ kṛtaṃ 
śabdasya, ata eva hetoḥ | yataḥ pramāturasau vyāpārastatastatraiva 
pramātṛtve viśrāntaḥ prameyasya anātmabhūto bhavati | yadyapica 
prakāśavimarśayoruktanayena anyonyamavyabhicārastathāpi 
māyāśaktyā prakāśasya pṛthagavabhāsanāt ghaṭo'yamiti vimarśo na 
ātmabhūtaḥ, 

(page 279)

svātmani tu viṣayaniṣṭhatāmaspṛśati, prakāśasya sadyaḥpramātṛlakṣaṇe 
vapuṣi yo vimarśo'hamiti so'nātmabhūtatvena anabhiśaṅkyaḥ,- iti 
pratipādayituṃ viśeṣaṇam | nanu prakāśasya kathamiyaṃ 
prameyarūpaspṛktā,- ityāśaṅkāmapāsyati māyāśaktyā tu iti | 
evamiyatā api vāgvapuḥ ityasya arthaṃ vyākhyāya nāsau ityādi vivṛṇoti 
śabdanarūpatvāt iti | vimarśarūpatā yadyapi sāmānyarūpā, tathāpi 
vikalpatānibandhanabhūtarūpāntaraśūnyo yo vimarśavyaktiviśeṣaḥ, sa 
vikalpavyaktervibhinna eva,- ityabhiprāyeṇa tadubhayānuyāyi 
śabdanātmakasāmānyalakṣaṇamityāha artha iti | natu 
tucchamakiñcidrūpaṃ prakāśakalayāpi aspṛṣṭaṃ pratiyogi bhavatīti 
yāvat | tasya iti atadrūpasya | tadātmani iti atadrūpaviparīte pāramārthike 
na sārvātmyena śaṅkyamānatvamasti, tadasāvapasāraṇīyaḥ, anyathā sa 
na niścitaḥ syāt | nanu etadapasāraṇe pratyuta apūrṇo'sau [apūrvosau ka. 
ga. |] niścitaḥ | satyaṃ, tathaivatu sa upayogī māyāpade iti darśayati 
bhedamaya iti | pramātṛsvabhāva iti pramāṇātiriktaḥ pramātureva asau 
pramitiśabdavācyo vyāpāro yena pramātā svatantro vyapadiśyate ityarthaḥ 
| atra iti vṛttigataṃ vyācaṣṭe viśuddhe iti viśeṣaṇaṃ 
māyāpramāturvyavacchedāya | prakāśātmani iti, anena 
pratiyogyasaṃbhava eva āsūtritaḥ | aprakāśamāno hi na pratiyogīti 
darśitam | prakāśamānaśca prakāśatādātmyavṛttiḥ prakāśasya 
pratiyogī,- iti ucyamānameva trapākaramiti || 1 ||

	nanu ghaṭe pratiyogī saṃbhavati, na prakāśe iti kutaḥ | 
nañarthāliṅgito 

(page 280) 

hi aghaṭa iva ghaṭe pakāśe'pi aprakāśo bhavedeva,- ityāśaṅkya sūtraṃ

	bhinnayoravabhāso hi syād ghaṭāghaṭayordvayoḥ |
	prakāśasyeva nānyasya bhedinastvavabhāsanam || 2 ||

	māyāpade hi ghaṭāghaṭau bhinnau prakāśete | tataśca atra 
pratiyogisaṃbhavaḥ | śaṅkyate hi ghaṭākrānte yogyadeśe 
taddeśākramaṇaśīlo vijñānajanakaḥ svakāraṇopanataḥ paṭādiraghaṭaḥ 
| dehādisaṅkocakalāvikale satyaprakāśe tu yo'prakāśaḥ śaṅkyate, tasya 
prakāśādavabhāsanamucitam | avabhāsena hi aprakāśatvahāniḥ | hiriti 
hetau | yata evaṃ, tato yuktaṃ nāsau vikalpaḥ iti,- iti sūtrārthaḥ | hiśabsya 
arthaṃ tathāhi ityanena vṛttikṛt vyācaṣṭe vṛttiṃ vṛttyantareṇa 
saṃgamayitum | ata eva vṛttau punarhiśabdārtho na vyākhyātaḥ | evaṃ 
tathāca iti bhāvisūtragataṃ hiśabdavyākhyānaṃ smartavyam | tena 
naiṣā sūtrasaṃgatiriti na bhramitavyam | sūtrārthamavatārayati nahi iti 
ityevaṃbhūtaṃ pratipakṣāsaṃbhavaṃ yuktyā hetunirūpaṇena 
hiśabdadyotitena nidarśayitumāha | kasmāt punaratra yuktirucyate ityāha 
āśaṅkyamānam iti | pratipakṣāsaṃbhavo hi na niḥśaṅko'prakāśasya 
pratipakṣasya vacanārhatvāt | yuktyā kīdṛśyā | āha tathāhi ityanena 
vṛttivākyena upakramya iti prathamata eva dyotitayeti śeṣaḥ | 
tathāhītyanena upakramaṇīyayā yuktyeti vā karmadhārayaḥ | 
etatsūtrārthasya pūrvasūtrārthe hetutvamiti 

	............................ḍvayāpekṣī viniścayaḥ |

ityevaṃ bhāgamiha vyācaṣṭe | vikalpasya ityādi | krameṇa atra 
hetuhetumadbhāvaḥ pūrvagrahaṇamapohanaṃ pratiṣedhanaṃ 
tāvanmātrameva ca, na niścayaḥ prakāśarūpatayā vidhau viśrāntatvāt 
niścayasya,-

(page 281)

ityāha nīlameva iti hi evārthadyotitaparāpasāraṇapratilabdhaniyamaviśiṣṭe 
[niyamaḥ ka. ga. |] nīla eva vidhirūpe viśrāntiranyasya 
prakṛtanīlāpekṣayā atallakṣaṇasya pratiyogino 
nīlapracyāvāvinābhūtasya pītāderākṣepāt | ubhayaviṣayatayā iti 
niṣedhabhāgasya hi atadrūpaṃ viṣayo, vidhibhāgasya tu tadrūpam, 
vividhaṃ hi kalpanaṃ vidhīyamānaniṣidhyamānatayeti vikalpanam | nanu na 
atra samuccaya iva tadatadrūpadvayaṃ viṣayastat kathamubhayaviṣayatā,- iti 
codyaṃ pariharati yadyapi iti | yata eva dvandvapadārthavailakṣaṇyena 
ubhayaviṣayatā, ata eva samuccayavailakṣaṇyaṃ 
niścayavikalpanasaṃgītīnām [saṃgītānāṃ ka. |] | etadāha yatrāpi ca iti 
| vikalpa iti niścayavyatirikto vibhāṣaṇātmā vā ātmarūpaḥ | nanu āsāṃ 
samuccayādastu vailakṣaṇyamuktanītyā, parasparatastu 
kathamekaparyavasānasya ubhayāpekṣe(kṣepe)'pi aviśeṣāt | āha kevalam 
iti | niścayarūpe vikalpe ghaṭa itipratītisvīkṛtameva ekatāparyavasānam, 
ekamevahi tatra anubhavena pratītamāropaṇamātrāyātaṃ tu 
aparamapasāritam | vikalpanasaṃśayostu pratītaṃ dvayameva 
dolāyamānatvāt | pratīte tarhi ekaparyavasānaṃ kathamuktaṃ, kaśca 
anayorviśeṣaḥ | ucyate aparatra iti niścayavyatirikte śābde 
pramātṛrucerekatāparyavasānaṃ [ekatraparyavasānaṃ tathā hi ga. |]; tayā 
hi pramāturvrīhiyavādi yadyadeva abhipretaṃ, tatraiva 
pratītimanuṣṭhānahetuṃ viśrāmayati svanahasorvā (3|3|62) ityapi ghañi 
vā | nanu receraniyantritatvāt dvaye'pi jātu kathaṃ tāvat viśramayedityata 
āha samuccaye ya iti virodhopapāditavārthamahimnā hi niyantritā 
pramātṛruciriti kathamaniyantritā 

(page 282)

asau | saṃśaye ca iti ekatāparyavasānam iti saṃbandhaḥ | 
caśabdastuśabdadyotitaṃ pūrvoktaṃ niścayāt vailakṣaṇyaṃ samuccinoti | 
tata eva vibhāṣyamāṇasaṃśayayoḥ sāmānyena niścayāt 
vailakṣaṇyamupasaṃharati natu ityādinā viśeṣa ityantena | tuśabdārthe 
vā vartamāno vikalpanāt vailakṣaṇyaṃ saṃśayasya dyotayati | 
prakaraṇāpanna eka eva iha niścaya iti tu abhidhātuṃ 
tadvailakṣaṇyamātramubhayoraviśeṣeṇa upasaṃhṛtamiti yojyam | 
pratītiprabhāvāt iti | pratītirhi atra ubhayatra pratyuta dvayālambanā | 
imāveva iti ubhayasvīkāra ekaparyavasānamityetattu tulyaṃ tritaye'pi,- iti 
vārthasyaiva ayaṃ prakārabhedaḥ,- iti vārthānugamāt 
vikalpavācoyuktirniścayena na yukteti evakāraḥ | evaṃ vikalpasvarūpaṃ 
pūrvasūtropajīvitamupasaṃhāreṇa tadevam ityādinā pradarśya 
satsaptamyā avaśyāṅgīkartavya eṣo'rtha iti nirūpayantyā prakṛte 
etadupayojayaṃstadvailakṣaṇyamahaṃpratyavamarśasya darśayituṃ 
yaduktaṃ prakāśasyeva ityādi, tat vyākartuṃ prakramate cidātmana 
ityādi | vimarśagata iti vimarśaviśrāntervimarśasthāne eva vikalpatā 
saṃbhāvyate, natu avabhāsasthāne iti tatraiva sā parākartavyā,- 
ityabhiprāyaḥ | tādātmyena prati tatsthānāpattyeti yāvat | avabhāsa iti 
saṃbhāvyamāna iti śeṣaḥ | dvitīyasya ityuktau [ukto ka. ga. |] vṛttau 
bhinnapadasya ko'rtha ityata āha citprakāśa iti | svakalpanākalpitena 
dvitīyena na pratiyogiparipūraṇaṃ kriyate | nahi nīlasya 
kāraṇatvakāryatvakṣaṇikatvādi pratiyogipakṣe vartate, nahi tat pṛthak 
kiñcit | svakalpanotthāpitaṃ ca citprakāśasya ghaṭādīti na pratiyogi | 
pratiyogitvaṃ hi tatsthānāpannatvam | tacca pṛthaktayā

(page 283)

vastutvena 
vyāptamavastunastadarthakriyākāristhānākramaṇasaṃbhāvanavaidhuryāt 
| tadviruddhaṃ ca kalpyamānatvamiti viruddhopalabdhiḥ | nanu avastunaiva 
tucchena svapracyāvanena nīlasya virodha iti, sa vā asya pratiyogī, 
tadavinābhāvavantastu pītādayastanmukheneti manyate | maivaṃ, 
parasparaṃ hi parihṛtya yadavasthānaṃ, sa eva upapādayiṣyate virodhaḥ | 
naca tucchena saha parasparārthaḥ kaścit, parihārārtho vā | naca tucchasya 
kiñcidavasthānamucitaṃ, tataḥ pītādyeva nīlasya vāstavī tucchatā; 
vyavahāryaṃ tu tucchatārūpaṃ pramukhīkṛtya ucyate tucchamukhena 
virodha iti | prakṛte tu tucchatā vyavahriyamāṇā vyavahārasya 
prakhyopākhyāmayatvāt prakāśavimarśāveśinyeva,- iti kathaṃ 
tanmayasya cittattvasya pratipakṣatāpakṣe prakṣeptuṃ sā kṣamyeta, tat 
yuktamuktaṃ bhinnasya iti vṛttau padam | tathāpi iti | tasya ghaṭasya 
māyāpade dvitīyasyāpi śuddhāt vimarśe'pohanaṃ na kartuṃ 
śakyamarhaṃ yuktaṃ ceti saṃbandhaḥ | atra hetuḥ virodhābhāvāt | 
atrāpi viśeṣaṇadvāreṇa hetuḥ cidantaḥpraveśena iti | grāhyaśabdena 
grāhakasya api ākṣepādatra ṇyartho'pi | tadayamarthaḥ [tato'yaṃ ka. |] 
cidrūpe yadyantaḥ praviśati pramātrā ca yadyantaḥ praveśyate, tadā asya 
yo māyāpramātrapekṣayāpi vyavasthāpyate grāhyabhāvaḥ; sa 
upapanno'nyathā prakāśamānasya grāhyateti caitanyaprakāśena sākaṃ 
kathaṃ ghaṭādeḥ prakāśamānasya sato virodhaḥ, 
aprakāśamāna(tva)śaṅkāropāpasāraṇāni saṃvedanabalopanipatitāni 
kathaṃ saheta | ata eva iti yato na yuktamapohanaṃ ghaṭādeḥ | vastutaḥ iti 
nirvikalpakaprakāśaniṣṭhe'hamitivimarśe viśvamantarbhūtaṃ yāvat | 
paratastu māyāprabhāvāt mānase vikalpe dehādisaṃkucita eva saṃvedane 
ahamitivimarśo 

(page 284)

vikalpatāyāmeva paryavasyati,- iti tatraiva viśrāntimabhimanyamānastāṃ 
viśvaikātmatāṃ prakāśavimarśamayīmapi 
aprakāśitavimṛṣṭimabhimanyate iti tātparyam | nanu iti 
dvitīyatāmātrameva apohanasya prayojakamiti manyamānasya 
ayamākṣepaḥ | tathāpi iti uttaram | naca tathā iti saṃbandho na viruddha 
ityarthaḥ | vastuna evahi parasparaparihārārthaḥ | nanu kiṃ virodhacintayā, 
pratiyogi hi apohanīyaḥ | satyaṃ, pratipakṣatayā yogī pratiyogī viruddhaḥ 
evaṃ bhavati,- iti bhaṇati viruddhaśca iti viruddha eva pratiyogītyarthaḥ | sa 
ca iti yasya apohanaṃ śaṅkyate parairityarthaḥ | vyapadeśa iti tucchena hi 
atucchameva vyapadiśyate ityanena saṃjñāpadaṃ vyākhyātam | 
evaṃbhūtamevaca vikalpanasya rūpamiti darśayituṃ sūtrasya 
pūrvārdhaṃ yat, tat vṛttikṛtā prasiddhaspaṣṭārthamiti na vyākhyātam | 
vṛttikārastu vivṛṇoti ghaṭo'yam iti | atra ca iti | apohanasya prasiddhamidaṃ 
rūpaṃ tadrūpaśaṅkāpasāraṇāya prakṛte prameye'vaśyāpekṣamiti 
prameyasamuccāyakaścaḥ | tasmin saṃbhāvyamānasya aghaṭasya apohane 
[apohena kha. |] yo niścayaḥ, sa saṃbhāvyate | yatsthāne iti yasya ghaṭasya 
sthāne yaḥ paṭādiḥ saṃbhāvyate, tasmin yogye deśe svakāraṇabalāt; 
naca bhavati tasmin sthāne yato ghaṭena tatsthānamā samantāt krāntaṃ 
svīkṛtaṃ, sa paṭādistasya ghaṭasya pratiyogyādivācoyukterāspadam | nanu 
tatsthānākramaṇasaṃbhāvananirasanādi yaduktaṃ, tat 
sahānavasthānavirodhe śitoṣṇādau spaṣṭamaparyantakāraṇasya bhavataḥ 
anyabhāve'bhāvādvirodhagatiḥ [bhāve bhāvāt ka. |] iti nyāyena, natu 
parasparaparihārasthitilakṣaṇake virodhe nyāyo'yaṃ spaṣṭena pathā 
saṃgacchate [saṃgṛhyate ka. |] tat kathaṃ viruddhasya iyadeva lakṣaṇaṃ 
darśitaṃ, kathaṃca prakṛte

(page 285)

anyonyaparihāre sahānavasthānanyāyayojanam | etadāśaṅkya ayameva 
parasparaparihārātmā virodhaḥ sahānavasthānaṃ vadhyaghātakabhāvaṃ 
ca vyāpnoti, natu etau tato'dhikāviti darśayati tatsthānākrāntirhi iti | hi 
yasmādevaṃ, tasmādupapannametatsarvamityarthaḥ | kadācit iti yatra 
prasiddhaḥ sahānavasthānavyavahāraḥ, kadācit iti yatra 
anyonyaparihāravyavahāro lokasya | bhāvasya iti ghaṭasya kartari 
saṃbandhitvena vivakṣite ṣaṣṭhī | tat ghaṭātmakabhāvakartṛkā 
kalpitarūpā viparyayasthānasya aghaṭarūpatāyā yat sthānaṃ 
saṃbhāvyate, tasya karmabhūtasya ākrāntiḥ | evamarthatattve 
saṃbandhamātreṇa śabdasaṃskāraḥ, evamanyatrāpi avadheyam | 
viparyayarūpatānupapatteḥ iti | nahi ghaṭasya sata eva 
aghaṭarūpatvamupapadyate, tato hetoryā kalpitāyāḥ śaṅkyamānatvena 
āropitāyā viparyayarūpatāyā nivṛttiḥ, sā svarasena svabhāvabalena 
svahetuparamparopanatena yadyapi kṛtā; tathāpi tenaiva ghaṭena iva kṛteti 
utprekṣyate pramātṛbhiḥ | pramātā hi evaṃ vicārabhūmipatita utprekṣate | 
ghaṭasya ayaṃ svabhāvamahimā yadetadīyaṃ sthānaṃ na 
kadācidaghaṭo'vaskandati | tadavaskande hi sa ghaṭa eva na syāt | naca iha na 
bhavati ghaṭaḥ svakāraṇāt svapramāṇācca tasya yataḥ 
siddhiravikampanīyeti [avikalpanīyā ga. |] | ato hetorbhāvakartṛkā 
kalpitarūpā viparyayasthānasya ākrāntiriti saṃbandhaḥ | etat nidarśanena 
spaṣṭayati yathā iti | tat iti tasya ghaṭasya saṃbandhinī tatkartṛkā 
kalpitarūpā ghaṭābhāvasthānasya ākrāntiḥ, yadivā kalpitaṃ tat 
ghaṭābhāvasthānaṃ kalpanayā tathā kṛtaṃ, tasya ghaṭena ākramaṇamiti 
vyākhyā; pūrvatra api kalpitaṃ yat viparyayasthānaṃ, tasya ākrāntiriti |

(page 286)

etadupasaṃharati evaṃca iti ekātmatayā śaṅkyamānayā yo virodho nijena 
viśeṣeṇa viśeṣāntarasya rodhanaṃ svātmani anaṅgīkaraṇaṃ, sa eva eko 
virodhaḥ sarvatra yo'nyonyaparihāraḥ iti prasiddha iti ākūtam | sa tu iti 
virodhaḥ | kalpitasya aghaṭa iva paṭasya akalpitasya uṣṇasthāna iva śītasya 
yā nivṛttipratītiḥ kalpitākalpitayorvā nivṛttyoryā pratītistatpūrvikā 
prathā yasya, tādṛśo'sau | kevalam iti bhedena | ākhyāyate iti 
ākūtaśeṣaḥ | pratītiprathāśabdābhyāṃ kalpitākalpitabhāvo vastutaḥ 
kvacidapi na upayujyate, navā hi svalakṣaṇātmāno'nyonyamātmānaṃ 
miśrayanti vā virundhanti vā

	saṃsṛjyante na bhidyante...................... |

itinyāyāt | pramātā tu vicārabhūmimadhiśayānaḥ prathānusārī 
vyavaharati | evam iti | sā cedvirodhe tulyā, tarhi 
vāstavāvāstavatvavicāraṇamakiṃcitkarameveti darśitam | 
anyonyaparihārānanupraveśe tu śītoṣṇāderapi na virodha iti darśayan 
uktameva nyāyaṃ draḍhayati tathāca iti | tathāhi saheti samānakālatayā 
avasthānaṃ na bhavatyeveti naikāntikaṃ śītoṣṇaprabhṛteḥ 
sahānavasthānam | svarūpameva deśastadavaṣṭambhācca 
ākāśabhūtalādikamapi | badhyaghātakabhāve'pi uktacaraṃ saṃcārayati 
nyāyam ahinakulasyāpi iti na kevalaṃ śitoṣṇāderiti apiśabdaḥ | 
nakulasvarūpāvaṣṭabdhasya deśasya tena iti nakulena taddeśasya iti 
ahideśasya tanmayatvamahivigrahāvaṣṭabdhatvamatanmayatvaṃ ca 
nakulaśarīrāvaṣṭabdhatvena bhogibhogānavaṣṭabdhatvaṃ viparyayo vā | 
etallakṣaṇayoḥ svarūpavirodho deśasya tatparyavasāyī, 
tadekaparamārtho'hinakulasyāpi virodha iti saṃbandhaḥ | tata eva 
deśayorvirodhe tatra taddeśatvamanyatra 

(page 287)

anyadeśatvamiti viṣayabhedena yaḥ pariharati, na tena bauddhasya 
kiṃcitkṛtamātmā tu vṛthā kheditaḥ | deśadvayadvārakameva hi 
virodhamāha paraḥ, tasya tenaiva virodhe parihāra iti 
samastavirodhāpadhvaṃsanamidamuttaraṃ nīlānīlayorapi virodhaṃ 
nirundhīta | tatra nīle'nīlamanīle ca nīlaṃ, tadevaca tadviṣayabhedāditi tatra 
taddeśamanyatra anyadeśaṃ, tadevaca tadviṣayabhedādityanayorhi 
vākyārthayoḥ kiṃ vailakṣaṇyaṃ deśadvāreṇa svarūpadvāreṇa vā yo 
virodhastasya tenaiva parihārāyogāt | etāvattu vācyaṃ-pratītibhedāt siddhe 
svarūpabhede pratītisiddha evaca ādhārādheyabhāve te ekasya deśe 
bahavaḥ kāraṇaṃ, yathā ekasya bahavo natu bahūni kāraṇāni yena 
tatkāraṇakatvetaratvakṛto virodha ityatra bhaviṣyati etaditi alamavāntareṇa | 
nanu yadāpi anyataradeśo na ākramyate anyatareṇa, tadāpi ucyate 
ahinakulasya virodhaḥ; ataśca ucyate yadvyavahriyate yeṣāṃ ca virodhaḥ 
śāśvatikaḥ (2|4|9) iti, tat kathaṃ sarvatra ayaṃ virodhaprakāra ityāśaṅkya 
āha anyadā tu iti | evaṃ bhinnayoravabhāsaḥ ityapi vyākhyāya 
prakṛtameva arthametadvaiparītyena ayatnasiddhamanubadhnāti evaṃca iti | 
vaidharmyeṇa dṛṣṭāntaṃ yojayati na saṃbhāvyate ghaṭo'hamitisthāne | 
tasmāt iti tadekarūpatvaṃ hi prakāśasya asaṃbhāvyaṃ, 
tanmātrasahatvaṃ tu sati prakāśarūpatve na apohyamityāha nāpi iti | tatra 
iti prakāśe | asau iti ghaṭaḥ | ata iti yato na tatra saṃbhāvyate, svena 
kevalena vapuṣā akevalena ca yato na nirasanārhastata ityarthaḥ | sa iti ghaṭaḥ 
| tataḥ iti prakāśāt | kastarhi prakāśo viruddhatāyogyaḥ, āha kiṃ tarhi iti 
| naca tādṛgstītyāha tulya iti | itaraśabdena iti vṛttau | nanu 

(page 288)

prameyatāsthāne nīlasya yathā anīlaṃ saṃbhāvyate, bhavati ca tat tata 
itarat; tathā pramātṛsthāne'pi cidrūpasya saṃbhāvyamānaṃ 
vastvantaraṃ syāditi bhramaṃ bhinatti tāvanmātra iti mātrapadena | 
prameyasya hi māyānirmitasya ābhāsanikurumbātmakatve 
anekavaicitryasahatvaṃ na apūrvaṃ, śuddhaprakāśasya tu 
pramātṛrūpāntaraṃ manāgapi na sahyam | anena iti prakāśetaratvāt na 
syāt iti vṛttivākyena | abhyupagamena api āha tathāpica iti | deśakālasya 
bhede'pi bhavantu prakāśāḥ svabhāvabhedenaiva bhinnāḥ, tathāpi 
nīlamiti niścaye yathā na nīlāntarāṇi apohyāni, pratyuta 

..........................ḍṛṣṭasaṃkalpanātmakam [kalanātmakaṃ ga. |] |

itinayena tāni yojayitavyāni, anyathā smaraṇādabhilāpeṇa 
vyavahārāsiddherapitu pītādītyeva nīlābhāvānuprāṇitāni 
vyāvartanīyāni; tadvat prakāśe niścetavya prakāśāntarāṇi 
svasaṃvedanakakṣyābhāñji na apohanīyāni,- iti punarapi na 
vikalpatāsiddhiḥ | nanu

	nirvṛttiryadi tasminna hetorvṛttiḥ kimiṣyate |

itinītyā yata evāsau prakāśeta tena svabhāvo nābhāti, tata eva nitarāṃ 
tadapoho bhaviṣyati | etadapāsyati pratiyogyanābhāse vā iti | hetorhi 
vipakṣāt vyāvṛttirvastugatyā nirūpyate, sā ca vipakṣāsaṃbhave na 
mlāyati iti śraddheyamadaḥ, iha tu na vastucintā vartate | kiṃ tarhi | 
saṃvedanacarcā | pramātṛvyāpāro hi apohanam, tatra ca 
āropaṇāderavaśyambhāvaḥ | tacca anābhātapūrve kathaṃ 
vikalpotthāpitatve'pi āropaṇādervikalpanatayā vikalpasya 
anubhavavāsanopajīvitvena atyantānābhāte'saṃbhavāt | etat paro na sahate

(page 289)

nanu iti | atra hi yadi aghaṭamābhāsamānaṃ vikalpayedāropayet 
niṣedhecca, tadā kālabhedena bahvyaḥ saṃvittayo bhaveyuḥ, 
itaretarāśrayacakrakānavasthānadoṣācca evamuktamiti anābhātasya nāsti 
apohanamiti, tat pratyuta apohanamicchatānābhāsanameva tasya 
apohanameṣaṇīyamiti ākūtaśeṣaḥ | etat pariharati uktamatra iti | 
ākṣepavācoyuktyā hi sarvametatsamāhitamiti matvā ākṣepārthameva 
[āpekṣārthamave ka. |] vyācaṣṭe nahyatra ityādinā | saṃvittihaṃsī 
svamukhena yugapadeva heyaṃ ca jahāti, upādeyaṃ ca samādatte,- itīyati 
tataḥ svātantryamasyā [mavāstava enāṃ ga. |] āste eva | enāṃ 
hānasamādānanirvacanabhāginīṃ tadvido manyante | pratiyatī iti 
pratipattirevaṃ yaddhi ātmanā viśvasyate iti yāvat | anyathā iti yadi 
kathitanayena hānopādānamaya eko vyāpāro...........ṃalakṣaṇo na udiyāt 
pramātuḥ | nanu ghaṭamarthayate khalu, tataḥ pravartate | satyamarthitā 
pravartikā, natu kevalaiva sā pramāṇavyāpāraniyantritā 
niyataviṣayonmukhāṃ pravṛttiṃ kuryāditi mātrapadam | arthitāyāṃ ca 
pramāṇavyāpāranirapekṣāyāṃ pravṛttikāraṇatvena 
upagamyamānāyāṃ duḥkhanivṛttyarthitāpi bhavantī tadaiva 
nivṛttihetustato yadaiva pravṛttiryatra, tadaiva tato nivṛttiriti mahadvaiśasam | 
tadāha aniṣṭaśaṅkayā iti | śaṅkāmātrādeva 
niścayānapekṣādarthitve sati pravṛttiriti hi prakrāntam | etacca nivṛttāvapi 
tulyam | evamupapādya upasaṃharati tasmāt iti rahi...........ḥitādayo hi 
śabdā antarlīnīkṛtapratiyogyabhāvaviśiṣṭavidhipradhānavastuniṣṭhā eva 
yathā, tathaiva ghaṭādayaḥ sarve śabdā iti darśayati evam iti | parasya api 
etat saṃmatamityāha eka iti | ekasya nīlasya 

(page 290)

yāvadeva pratyavamarśatvena ākhyātaṃ vijñānaṃ, tāvadeva tatra ekatra 
viśrāntaḥ pramātā svayaṃ svenaiva pramātṛtāmahimnā 
tatkāryatatkārirāśidvitayasaṃskāravānatatkārivargāt heyāt 
tatkārivargamupādeyatvena vibhajati, tata eva pramātṛvyāpārarūpeṇa 
upādeyābhimukhatayā hātavyamavāṅ kurvan vimarśaḥ pratyavamarśa iti 
ucyate | paṭhitavākyārthaṃ prakṛte yojayituṃ vākyasya tātparyamāha 
anena iti | tadayaṃ prayogaḥ- sarvā prameyeṣu 
pratipattirapohyābhāsāropaniṣedhavyāpārāntaḥkāriṇī 
niścayapratītirūpatvāt kevalaṃ vivikta ityādipratītivaditi svabhāvaḥ | 
vipakṣāddhi heturvyāvartate svabhāvaviruddhopalabdhibhayāt | yadi hi na 
etāvadantaḥkurvīta, seyamaniścayarūpataiva bhavet | upapāditaṃ ca 
idānīmeva etat | etat prakṛte prameye yojayan prakṛtamupasaṃharati tadevam 
iti | ahamiti śuddhacidvimarśo na vikalpaḥ 
pratiyogyābhāsanādyanupalabdheriti vyāpakānupalabdhiḥ, 
vyāpyavyāpakabhāvaśca vitatya nirṇīta eva | etadevaca prakṛtamiha 
prameyamiti vṛttikāreṇa sākṣāt sūtrasya uttaramardhaṃ vartitaṃ 
[pravartitaṃ ka. |], pūrvaṃ tu gamyamānārthatvena || 2 ||

	sūtramāśaṅkāpūrvakamavatārayati

	tadatatpratibhāabhājā mātraivātadvyapohanāt |
	tanniścayanamukto hi vikalpo ghaṭa ityayam || 3 ||

	nanu iti | darśane yadavabhātaṃ viṣayastanniṣṭhaśca 
vyāpārastadeva ubhayaṃ vikalpasya viṣayo vyavaharaṇīyatvena | darśane ca 
ubhayaṃ bhāti ghaṭo ghaṭasaṃvedanaṃ ca, natu aghaṭatanniṣedhane tatra 
avabhāte, ananyatrabhāva iha viṣayārthaḥ | 
yuktinidarśanatāheturniścīyamānākāratā hiśabdena yā dhyotitā sūtre, 
saiva tathāca ityanena vṛttipadena

(page 291)

upakrāntā | tasya ghaṭasya atasya ca aghaṭasya ca yā pratibhā tāṃ yo 
bhajate antargarbhīkaroti, tādṛśena pramātraiva 
viṣayataddarśanādipāratantyamujjhatā svatantreṇaiva atatkārivargaṃ 
vyapohatā tatkāriṇo yat niścayanaṃ ghaṭa ityevamākāramayamasau 
vikalpa uktaḥ | hi iti yasmādevaṃ vikalpastasmādahaṃpratyavamarśo na 
vikalpaḥ- iti pūrveṇa saṃbandhaḥ | yadivā yasmātpramātraiva itthaṃ 
tanniścayanaṃ kriyate, tasmāduktacodyānavatarāt tanniścayanātmā ghaṭa 
iti vikalpo garbhīkṛtātadvyāhananena upapadyate,- iti saṃbandhaḥ iti 
sūtrārthaḥ | evakāraḥ iti vṛttau | vṛttivyākhyāne ca 
vivṛtestatkramavikāsarūpāyāḥ prādhānyamityabhiprāyeṇa sūtre'pi iti 
uktam | nanu sarvasyaiva pramātuḥ kimevaṃrūpatā, na ityāha īśvara iti | 
ahamiti sāmānādhikaraṇyena yato vartate viśuddhāhantā ca sarvaṃsahā, 
tato na bhinnaḥ saṃvedanāt prameyāntarācca aṅgabhūtaśca avayavatulyaḥ 
idamiti pṛthagbhāvena unmeṣāt, evaṃbhūto yaḥ 
prameyavargādekadeśo'pi īśvarapramātari, sa na 
apohanavyāpāramādriyate aciradhyutivadasya unmiṣato'pi aprarohāt | kva 
tarhi asya prarohaḥ | āha māyīyau iti | punaḥ iti īśvarāvasthāto 
viśeṣakaḥ | tatra iti evaṃsthite | nanu tatrāpi cakṣurvyāpṛtau 
nirvikalpatvaṃ satyapi vimarśe tadānīṃ hi aiśvaro bhāvaḥ paśorapi iti 
sārvātmyamuktam, etadāśaṅkitaṃ sarvātmakatve'pi ityanena | kadā 
tarhi viśrāntirapohane | āha vikalpa iti | paryavasānam iti gāḍhatvena 
pratiṣṭhā | anena nirvikalpadaśāyāmapi asti saṃskārayogena māyīyatā, 
natu sarvathā nāsti; īśvaratāyā eva hi nairmalye viṣayatvenaiva kathaṃ 
samanantaravikalpodayaniyamo bhavediti darśitam | tadā iti vikalpakāle | 
vimarśanena 

(page 292)

iti vikalpanaṃ gateneti bhāvaḥ | etadevaca sphuṭayati sahi iti | tathā iti 
māyīyaḥ | tasya iti māyīyasya api | pramātṛtāmayo yaḥ saṃvillakṣaṇaḥ 
svabhāvastasya yat māhātmyaṃ mahātmatā sarvātmatā, tato hetoḥ | 
apohyamāna iti yasya apohaḥ kariṣyate iti bhāvaḥ | svabhāvasya 
māyīyatvasya ca yo mahimā bhedakatvena iti paramātmani 
māyāpramātrantare prameyāntare ca parasparaṃ vartamānatvena 
ṣaṭprakāra ekayaiva vṛttyā 
vidagdhādaśanadaṣṭavicitrākṛtibhāgitāmbūlīdalaviṣayakhaṇḍana-
vyāpārasamānacchedanavyāpārastanmāhātmyādapohyamānaḥ san 
pramātuḥ prameyāntarācca vicchidyamānaḥ sthita eva | anyat iti yena 
itaretarāśrayādidūṣaṇānavakāśo bhavet | tata eva āha pūrvabhāvi iti | 
tatkālodite hi nimitte nimittāntarānveṣaṇamavaśyabhāvīti syādeva 
anavasthādidūṣaṇam | nanu aghaṭa iti ghaṭavyatirikto viśvaḥ 
padārtharāśirapohyoṣau pṛthak svālakṣaṇyena avabhāsate | naca tatra 
aghaṭatvaṃ sāmānyamasti, sadbhāve'pivā tasya na saṃvedanamasti,- iti yo 
muhyet, taṃ prabodhayati ghaṭaviparyaya iti | caḥ śaṅkādyotakaḥ | 
ghaṭaviparyayaḥ sāmānyarūpaḥ | sa yadyapi ekaghaṭārthinā 
tadavabhāsanavaśena anupalakṣaṇādapratīta ityabhimānena 
utprekṣitastathāpi vastutaḥ pratīta eva | sāmānyarūpatāyāṃ tāvat 
hetumāha niyata iti | nanu mā bhūdasya [arthasya ka. |] viśiṣṭaṃ niyataṃ 
rūpaṃ, paṭādīnāṃ tu kathaṃ tatsāmānyam | ucyate paṭādirūpaṃ 
yatastena avaṣṭabdhamanugamena āliṅgitaṃ, naca sthūṇayeva 
vaṃśacakravālam, apitu tadekarūpatvena āropādabhedena adhyavasāyāt | 
patītatve hetumāha ukta iti | anyathā hi na niyataṃ pravṛttyādi bhavediti

(page 293)

upapāditaṃ yataḥ | ubhayatra prasiddhaṃ dṛṣṭāntamāha dṛśye svalakṣaṇe 
yadā sāmānyātmā vikalpa ākāro 
niyataghaṭarūpābhāvādityādiyuktibhirasti, yathāca 
pṛthaganavadhārito'pi vastuto'vadhārita [vastunaḥ ga. |] eva, ta(dva)cca 
ayamapi | nahi atra viśeṣo vidhipratītāveva sāmānyena bhavitavyaṃ, natu 
niṣedhapratītāviti | ābhāsavastutāvādo hi ayaṃ, tataśca kaṇādaprakriyā 
na avaśyamatra pramāṇīkartavyā abhāve cetsāmānyaṃ samaveyāt 
[samavāyāt ga. |] bāvarūpatā asya prasajyeta ityādiḥ | taduktaṃ 
tatrabhavatā 

	vyāpāralakṣaṇā yasmātpadārthāḥ samavasthitāḥ | 
(vā. pa. 3|1|11)

iti | ubhayātmatābhāse tarhi saṃśayāt niścayaḥ kathaṃ bhidyeteti codyaṃ 
samādhātuṃ yā vṛttiḥ atadapohanena iti, tāṃ tātparyato vyācaṣṭe 
sphuṭena dṛṣṭāntena ubhaya ityādinā | niṣidhyamānatvena hi dvitīyo'tra 
bhāti, na tulyakakṣyatayā dolāyamānatvena yena saṃśayarūpatā 
śaṅkyeteti manyate | saṃśayasya api 
taddolāspadavastudvayetaravyapohanayogāt niścayarūpatvena vikalpataiva 
nāma | śabdena iti vikalpanaṃ vikalpa iti | dhātuvācyā kriyā iti 
kriyātvenaiva atra prasiddhiriti yāvat | ukta iti vṛttikāreṇa vyākhyāte 
viśabdārthanirvacanamahimnā || 3 ||

	nanu ahamiti pratyavamarśo na vikalpa ityuktaṃ, tataśca śarīre 
gauro'hamiti, dhiyi sukhyahamiti, prāṇe kṣudhito'haṃ tṛṣito'hamiti, 
śūnye vītasamastabāhyābhyantararūpo'hamiti yo vimarśastatrāpi 
vikalpatvābhāve'nyo na apohyate iti teṣāṃ [teṣāṃ ca ka. |] paraspareṇa 
pramātrantaraiḥ prameyaiśca bahuśākhaḥ saṃkaraḥ prasajyate iti 
svaparapravibhāgabhaṅga 

(page 294) 

āpadyate | atra āha ślokadvayena uttaraṃ

	cittattvaṃ māyayā hitvā bhinna evāvabhāti yaḥ |
	dehe buddhāvatha prāṇe kalpite nabhasīva vā || 4 ||
	pramātṛtvenāhamiti vimarśo'nyavyapohanāt |
	vikalpa eva sa parapratiyogyavabhāsajaḥ || 5 ||

	ahamiti vimarśaścittattvameva yadyapi ālambate

	yadyapyarthasthitiḥ prāṇapuryaṣṭakaniyantrite |
	jīve niruddhā tatrāpi paramātmani sā sthitā || (aja. pra. si. 20)

itinyāyena, tathāpi tat vihāya anādṛtya ullaṃghya dehādau 
bhedite'bhimānakalpitena nīlādiviṣayapramātṛtābhiṣekayogena, natu 
saṃketamātraprabhāvena [prabhavena ka. |] yo'hamiti vimarśo'vatīrṇaḥ, 
sa nirvikalpakabhuvi yā śuddhā vimarśarūpatā tāṃ tiraskāreṇa vidhūya 
vikalpāvasthāyāṃ vikalpatāmeva svīkurute yataḥ pratiyoginaḥ parasya 
vastubhūtasya avabhāsānantaraṃ jātastasya vyapohanamavalambya | 
ullaṃghanabhedena avataraṇī tiraskaraṇīyeṣu ca ukteṣu māyāśaktireva 
bhagavataḥ saṃbandhinī hetuḥ, natu yathāhurapare 
anityāśuciduḥkhānātmasu ityanena anātmani ātmābhimānasya 
avidyāmātrahetutām | sūtre māyayā iti sarveṣvaṃśeṣu 
saṃbandhanīyam | vṛttāvapyevaṃ, vimarśo vikalpa eveti dūreṇa 
saṃbandhaḥ | avidyādi iti ādigrahaṇādadṛṣṭaviśeṣa 
ekasāmagryadhīnatādi ca cidanimittāntaram ? | svatantrasya bhagavato yā 
paramabhūmāvicchā aiśvaryaśaktirucyate, saiva 
śrīsadāśiveśvaradaśāyāṃ parāparabhuvi prasṛtya vibhāgena jñānaṃ 
kriyā ca

(page 295)

iti bhedābhedaniṣṭhena vapuṣā vijṛmbhate, aparabhūmau tu te eva 
bhedaparyavasite māyāśaktitvena nirūpyete iti darśayati jñāna ityādinā | 
na sāmayikamātramahamiti śarīre'pitu jñeye kārye ca 
jñātṛkartṛtāmayasvātantryātmakaparāmarśayojanametat, aparathā 
gacchāmi- calāmi- tiṣṭhāmi,- iti svātantryāmarśanamavicchedaprāṇaṃ 
kathaṃ dehe saṃkrāmet | nahi anyasya svātantryamanyasya kriyāyai bhavet | 
vicchedavimarśe hi syādetat- ayaṃ calatu- iti | avicchedena tu 
gacchāmītyādivimarśaḥ | etat darśayati hetvantaraṃ vadan indriya iti | dehe 
iti vyākhyāya buddhau iti vyācaṣṭe sukhādyātmana iti 
traiguṇyātmakatvāt | grāhakāveśāt iti 
saṃvedanatādātmyagamanādityarthaḥ | yadāha

	idameva hi naḥ sukhaṃ yat sātasaṃvedanam [sātaṃ ga. |] |

iti | nanu nīlādivat vedyameva sukhādi ataścaiva yat prameyasya jaḍasyaiva 
dharma iti buddhitattvavādinā upagataṃ taditi yo brūyat, taṃ pratibrūte 
anyathā iti ahamitivimarśābhāve | tata eva cicchāyoparāgavatyāṃ 
sukhādyākārāyāṃ buddhāvahaṃkāraḥ saṃvitsukhādirūpe avivekena 
abhimanyamāno vyavahartā san prītiparitāpotthāpako'bhyupagataḥ | 
prītiparitāpau hi na bāhyavastuno rūpam,- ityadhyavasīyate kevalaṃ tat | 
prītiparitāpātmakasukhādijanakatvena satkāryavādopapattyā bāhyasya api 
tadrūpatvaṃ vyavasthāpyate | prāṇe iti vyākhyātuṃ yā vṛttiḥ āntare 
vā sparśe iti tāṃ vyācaṣṭe prāṇasya iti | sparśa iti 
sparśanendriyagamya iti āśayaḥ | anyathā dehe cakṣurādigamye 
buddhivṛttau ca antaḥkaraṇagamyāyāmastu ahantābhimānaḥ, āntare 
[āntaraṃ ga. |] punarvāyau kena adhigate tathābhimāna iti śaṅkyate | 
śarīrasya 

(page 296)

ca aviṣayībhūtasya [ca viṣayī ga. |] asatyāṃ bhogaṃ prati ādhāratāyāṃ 
ahamiti bhoktṛtvamāropitaṃ, buddhestu satyāṃ bhogaṃ prati karaṇatāyām 
| tadvadeva āntarasya sparśasya karaṇatāyāmeva satyāṃ 
bhoktṛtvamāropitamiti nirūpayati na cātra iti | asti(sthi)śūle hi vāyunā 
asthno'bhighātajanitastīvratamasparśo [tapaḥ ka. ga. |] duḥkhavedanādāyī 
yena tatra karaṇatāsparśaḥ | āntaratvam iti abāhyatvam | yāvat iti 
antaraṅgatvādapi āntaratvamiti āśayaḥ | sarvāṇi indriyādhiṣṭhānāni 
vyāpnoti, tata eva tvageva ekamindriyamavyatirekāditi manyante | tato'yaṃ 
prāṇaḥ sarvato dehāderutkṛṣṭaḥ sakalakaraṇamārgādhiṣṭhānāt | ata eva 
iti ahamiti yataḥ pramātṛrasena ayamabhiṣiktastato [abhiśiṣṭaḥ ka. |] hetorna 
āntaro vāyurnāsikāmukhābhyāṃ praveśaniḥsaraṇadharmā yaḥ, sa eva 
prāṇa ityucyate, apitu tatra adhikaṃ rūpamasti,- iti apiśabdaḥ | 
jīvatītyevaṃ jīvanaśabdavācyo yat pramāturjñasya sato vyāpārātmā, 
sā prāṇanakriyā lakṣaṇoktā prāṇākhye pramātari asti | kīdṛśī asau 
kriyā | āha- sarvābhirindriyaśaktibhiranusyūtaṃ yat puryaṣṭakaṃ, tasya 
saṃbandhinī | atra ca viśeṣyadvāreṇa viśeṣaṇaṃ boddhavyam | 
tadanuvedhakatvena [tadanubodhaka ka. ga. |] 
vartamānānāmindriyaśaktīnāṃ saṃbandhinī sādhāraṇā āntarī 
yā'sau vṛttiḥ

	sāmānyakaraṇavṛttiḥ prāṇādyā vāyavaḥ pañca | (sāṃ. kā. 29)

iti nirūpitā, sā yasmin prakṛtā phalatvena prastutā | ata eva [eva vā ga. |] iti 
yata evaṃrūpo'sau vyāpārastata āntaratvaṃ sarvānuvedhakamapi 
abhimatam | yataḥ pramātuḥ śaktirūpāṇi yāni

(page 297)

indriyāṇi pramākaraṇāni yadyogāt pramātā, teṣāṃ yā 
bhūmirantarmukharūpaṃ; tatra avasthito'sau vyāpāraḥ | tena 
abahīrūpatvādantaraṅgatvāt sarvānuvedhakatvācca āntaratvaṃ 
prāṇasya,- iti tātparyam | prāṇe iti vicārya kalpite nabhasi ivavā iti 
vyācaṣṭe athavā iti | sarvo ya 
evaṃsaṃvedyo'ntaḥkaraṇabahiṣkaraṇagamyatvena prasiddho 
buddhidehaprāṇalakṣaṇo'rthastasya yo niṣedhaḥ 

	tathā hi vedyate yadyat tanmadhye'haṃ na kaścana |
	apitvetadvivikto'smi .................................................... ||

itinayena, tadabhāvamātraṃ na antaḥkaraṇasya sukhādivastuvat, na 
bahiṣkaraṇasya nīlādyarthavat viṣayo'viṣayatvādevaca kalpito 
vikalpanamātraparamārthastathaiva vastubhūtastatra yogino'hamitivimarśaḥ 
| śūnye ca vedyīkṛte śūnyāntarameva yoginaḥ pramātṛ, tatrāpi anyaditi 
yāvadayaṃ bhedagrahaḥ, tāvat kalpanā na viramati, naca anavasthā | 
śuddhaprakāśasyaiva [prakāśataiva hi ka. |] hi vastutaḥ pramatṛtā, 
dehādau tu tathābhimānamātraṃ, paryante ca saṃkocamātrameva 
cidrūpaṃ śūnyam | śūnyatvam iti ca tucchaṃ rūpaṃ tat ityatraiva 
saṃbandhanīyam tasya iti akṣasaṃvittyabhāvasya sphuṭīkaraṇāya | 
ākāśaṃ hi na sarvathā tucchaṃ tadvādināṃ mate | tadevaca iti 
śūnyatvam | ata eva ca iti yato na sarvātmanā tucchaṃ [tucchāt ga. |] 
tadābhāsamānatvādābhāsasyaiva ca vastutvāt, tataḥ | asya iti śūnyasya | 
vastutā iti na kevalaṃ vastutvamākāśasāmyena uktaṃ, yāvadvyāpitā 
ceti vyāpitvamapi uktam | nanu śūnyasya kiṃ vyāpakatvam | nabhaso hi 
sarvasaṃyogisaṃyogāśrayatvameva vaibhavaṃ, naca śūnyasya tadasti

(page 298)

adravyatvāt | atra āha mahāviṣayatā iti | sā ca [sāpi ga. |] katham | ucyate 
sarvo'rtho yato vedyarūpastatra niṣedhyastato niṣedhasya mahānviṣayo, na 
tādṛgasti yattena mahāniṣedhena na spṛṣṭam | yathoktaṃ 

	yadyat saṃvedyate kiṃcit naca tadrūpamiṣyate |

iti vīpsayā hi sarvamatra niṣedhyamiti darśitam [darśita ka. |] | 
mahāviṣayataivaca prātītikaṃ vyāpakatvaṃ, nabhaso'pi hi tadeva 
vaibhavaṃ svaprakriyopārohaṇāya tu 
sarvasaṃyogisaṃyogādhāratvamityevamuktam | naca asya 
vyāpakatvamapūrvamiti darśayati etāvadevaca [etadeva ca ga. |] iti na 
tairadhikaṃ dṛṣṭam | saṃyamātmāno neti neti hi vīpsayā 
sarvaniṣedhasvabhāvatvādeva bṛhattvena abhāvameva brahma manyante 
kecana |

	śanaiḥ śanairuparamedbuddhyā dhṛtigṛhītayā |
	ātmasaṃsthaṃ manaḥ kṛtvā na kiñcidapi cintayet || (gī. 6|26)

iti | atra hi sakalacintyaviviktataiva tāvadātmatattvamiti 
upapāditamadharabhūmikāparityāgaṃ tāvadādriyantāmityāśayena 
[amyāyena ka. |] natu tadeva paraṃ tattvam | idameva darśayituṃ 
śrīspandaśāstre

	nābhāvo bhāvyatāmeti.................... | (12)

ityādinā

	abhāvaṃ bhāvayettāvadyāvattanmayatāṃ brajet |

iti abhāvabrahmavādimataṃ dūṣitam | yat kila smaryate, tat kālāliṅgitaṃ 
vedyaṃ ca śūnyaṃ ca evaṃbhūto'hamakiñcidrūpa āsamiti 
dehādipramātṛtāvataraṇe smaryamāṇatvena | tathā iti vedyameva tat 
vedakīkṛtaṃ dehādivadeva, ahaṃprakāśastu satatānastamitaḥ svato 
nirvicchedatvāt na smaraṇārhaḥ ityupapāditamādisiddhasūtre [ādisūtre 
ga. |]- pramātṛśūnyatā

(page 299)

na kadāciducitā- iti upapādayatā śāstrakāreṇa | etadupasaṃharati evam 
iti | tasmin tasmin nijaniyatarūpe śarīrādau yāvadābhāsamānatvaṃ, 
tāvadeva tasya śarīrāderavaśyaṃ pratiyoginaḥ sakāśādapohaḥ kriyate,- 
iti yo vṛttyarthaḥ, sa niyamitaśabdena vivṛtaḥ | ghaṭo'yamitivat ityanena 
vyāptiruktā vṛttau, dehādāvahamitivimarśo vikalpaḥ 
pratiyogivyavacchedaprāṇatvāt, vikalpasya hi tāvanmātralakṣaṇakatvaṃ 
vyāpakamiti vitatya prasādhitamiti svabhāvahetuḥ | 
pratiyogyapohanakaraṇāt iti yā vṛttistāṃ tattvato vicārayati eṣāṃ ca 
ityādinā | tathāhi pratiyogī dehasya yathā ghaṭādiḥ, tathā 
buddhiprāṇaśūnyānyapi | naca śarīrapramātṛtābhimānasamaye 
buddhiprāṇādīnāmapohanaṃ saṃvedyate, kāmaṃ śūnyasya 
saṃvedyate, buddhiprāṇayostu tadekatāveśo lakṣyate pratyuta ya eva ahaṃ 
sthūlaḥ, sa eva sukhī kṣudhita iti pratyayāt | tadayaṃ pratiyogyapoho 
vimarśanīya iti śaṅkāyāmayaṃ granthaḥ | eṣāṃ ca iti nirdhāraṇe 
ṣaṣṭhī | śarīramatyantamananuvartamānamiti pramātṛtā tatrāpi nikṛṣṭā, 
- ityāśayena pāryantikīkṛtam | nanu yadi uttaraṃ pūrvāviyogi, tarhi 
pṛthagbhūtaṃ tat pūrvamuttarasmāt pramāturiti kathaṃ sidhyet | atra āha 
pūrvaḥ pūrvaḥ punaḥ iti ekatomukhe'pi ca vyabhicāre 
nabhaḥpavanayoriva siddha eva pṛthagbhāva iti bhāvaḥ | avyabhicāraṃ 
vyabhicāraṃ ca grahaṇakavākyadvayadarśitaṃ krameṇa vibhajati tathāhi 
iti | nanu pṛthaktve vāstave sati kasmādevamityāha ayameva iti | hi 
yasmādanātmani vedye yadātmābhiniveśasya 
pramātṛtvagāḍhābhimānasya svarasavāhino vivekamātreṇa [niveśa ka. |] 
apasārayitumaśakyasya 
avataraṇamavarohaṇamūrdhvarūpaśuddhasaṃvedanabhūmityāgena 

(page 300)

adharabhuvi vedyarūpāyāṃ nipatanaṃ, tatra ayameva 
śūnyaprāṇabuddhidehābhidhānabhūmikāparigrahaḥ 
pūrvapūrvayogeneti īdṛśa eva kramaḥ | tathāhi vedyarūpe'pi nabhasi 
sarvāvakāśasahiṣṇutvaṃ vyāpakatvaṃ ceti na atyantamiva jaḍatā, tato 
vaibhavarahite vāyau spandaśaktimaye gaganāviyogini nīrūpe, tato rūpavati 
prakāśamaye tejasi, tataḥ prakāśaśūnye parapraveśakṣame ambhasi, 
tato'pi parapraveśāsahiṣṇāvatighane [ghane pārthive ga. |] sthūle pārthive 
atyantajaḍe pramātṛtābhimānaḥ krameṇa nikarṣadaśāmadhiśete | tatra 
kevalaśūnyasya ayogibhiravyavahāryatvāt lokāpekṣayā sparśamayasya 
prāṇasyaiva parigṛhītaśūnyānuvedhasya 
tejaḥsaṃbandhādhikyopanatacarācaradagdhṛtvasya prāthamyamucyate | tena 
saṃvidaḥ pariṇāmo hastina iva taṭe gāḍhena abhiniveśena anātmani 
vedyarūpe saṃkramaṇam | sa dehādyapekṣayā pūrvaṃ prāṇa ityucyate, 
antaḥkaraṇasya saṃkalpanābhimanananiścayanavṛttimayasya tattvam | 
yadanugrahādevaṃvidhavṛttilābhaḥ; tat cittattvaṃ, tasya vāyuḥ prāṇa 
āśrayatvamadhiṣṭheyatvaṃ gataḥ | tathābhūtena saṃvittattvādhiṣṭhitena 
prāṇena buddhirūpapuryaṣṭakasāhityabhājā yato'dhiṣṭhitaṃ śarīraṃ, 
tataścetanocitasvātantryayogo'sya; natu sākṣātsaṃvedanena adhiṣṭhitaṃ, 
tat | tathā ca uktaṃ

	prakāśarūpo bhagavān prāṇādhiṣṭhāna ucyate |
	prāṇa eva khago dharmo haṃsaśceti trivāhanaḥ ||

iti | ata eva 

	śarīraṃ yadavāpnoti yaccāpyutkrāmatīśvaraḥ |
	gṛhītvaitāni saṃyāti vāyurgandhānivāśayāt | (15|8)

iti bhagavatā [bhagavadgītāsu ga. |] gītāsu saṃvidrūpasya īśvarasya 
prāṇapuryaṣṭakādhiṣṭhānadvāreṇa

(page 301)

dehādhiṣṭhānatvamuktam, spandaśāstre'pi guruṇā

	yataḥ karaṇavargo'yaṃ vimūḍho'mūḍhavatsvayam |
	sahāntareṇa cakreṇa pravṛttisthitisaṃhṛtīḥ ||
	labhate............................................................. (| (kā. 7)

ityatra sahāntareṇa cakreṇa iti | tata eva dehasya bhasmībhāve'pi svapna iva 
śayanaikanimagnatātmakavyāmohadaśāyoge'pi 
cetanādhiṣṭhitaprāṇakroḍīkṛtasya puryaṣṭakasya tādavasthyāt paraloke 
dehāntarādhiṣṭhānadvāreṇa bhogo na duḥsamarthaḥ | dṛśyante ca 
bhūyasā yoginyaḥ svaśarīre svagṛhāvasthite eva 
svatantrīkṛtaprāṇagamāgamayogena dehāntaragate'pi vastuni 
jñānakriyāyoginyaḥ | svatantrīkaraṇe ca yuktaya upadiṣṭā eva | yat kila 
śivasūtraṃ

	brahmapade kamalaśarīrastadutthaprāṇirūpeṇa sarvatra sarvadā 
vicarati | 

ityādi | tadalamanena | sarvathā tāvat dehaprāṇayoḥ pṛthagbhāva eva | 
yadāha muniḥ

	sahavardhitayornāsti saṃbandhaḥ prāṇakāyayoḥ |

iti, samyagbandho'tyantāviyoga iti yāvat | tathāca kakṣyāstotraṃ

	bhagno bhramo'yaṃ bhavatā vicitrāṃ
		svapne videhādigatiṃ pradarśya |
	dehe gate bhasmamaye paratra
		kīdṛk........................................... ||

iti | yathāca ayamavataraṇe bhagavanniyatiśaktimahimnā kramaḥ, tathā 
adharādharabhūmityāgena ūrdhvarūpārohaṇalakṣaṇaṃ yaduttaraṇaṃ 
tatrāpi ayameva krama iti darśayati tathā iti | śarīrabhūmikāvasthitasya 

(page 302)

etaccharīragataṃ sthaulyaṃ saukṣmyaṃ ca

	paramamahadvā śarīramaṇḍaparyantam | 

iti

	paramāṇuparamamahattattvānto'sya vaśīkāraḥ | (yo. sū. 1|40)

iti ca nayena bhāvayato vitarkavicārau, tato'pi ānandāsmite | traiguṇye'pi 
buddheḥ sattvaprādhānyaṃ sattvapade ca darśayannānandasya 
sattvavṛttirūpasya tasmin pade prameyatvena āsvādyatāmācakṣāṇo 
neyaṃ paramānandabhūmiriti nirūpayati | tat iti śarīraṃ buddhisattvaṃ ca, 
- iti ubhayaṃ na apekṣante sadapi na ādriyante | ata eva 
śarīrabhūmivartināmindriyāṇāmanādaraṇāt na śabdādibhogaḥ, naca 
sukhopabhogo buddhisattvasya api anādaraṇāt [manādaraṇāt ka. |] | 
tadaśeṣabhogābhāvācca asmitāmātrameva tatra sphurati, natu na 
kiñcidrūpaṃ tat bhavati śūnyabhūtasya prāpteḥ, naca śuddhacidrūpaṃ 
taditi vedyena tena śabdādyanyatamena bhavitavyam | sparśarūpaṃ tatra 
prāṇabhūmau vedyam || 5 ||

	nanu prāṇanābhūmau 
prāṇādipañcakakarmendriyabuddhīndriyāntaḥkaraṇavargatrayamiti 
puryaṣṭakarūpatā, tata eva

	sāmānyakaraṇavṛttiḥ prāṇādyā vāyavaḥ pañca | (sāṃ. kā. 29)

iti uktam | tatra indriyāntarasadbhāvāt rūpāderapi kathaṃ na 
vedyatetyāśaṅkya uktaṃ sparśanaprādhānyāt iti | nanu 
tasyāmavasthāyāmavaśyaṃ niścayamātre [niśceyamātre ga. |] vā 
abhimānamātre vā viśrāntyā bhavitavyaṃ, naca 
buddhyahaṃkārābhyāṃ sparśanasya [sparśasya ka. |] parigrahaḥ | atra 
āha tadāca iti | tasyāṃ daśāyāṃ puryaṣṭakāvaśeṣatārūpāyāṃ 
sparśanendriyasya api sūkṣmatayā saṃbhavo na viruddhaḥ | sparśanavacca 
spṛśyamapyasti,- iti darśayati mahābhūtavāyurūpatayā sūkṣmatayā 
saṃbhavaḥ iti |

(page 303)

nanu iyati kiṃ mahābhūtānāṃ saṃbhavo'sti | asti,- ityāha 
nāvasthāyāmapi iti | apiśabdaḥ parāparadaśāyāmaparadaśāyāṃ ca 
keyamasaṃbhāvanā,- iti dyotayati |

	sadyojātastu pṛthivī āpaḥ syādvāmadevakaḥ |
	tejo'ghoro naro vāyurīśāno vyoma kīrtitam ||

iti hi paṭhyate | cidānandecchājñānakriyālakṣaṇameva hi śaktipañcakaṃ 
krameṇa prasaramāsādayat [yan ka. ga. |] saptapañcakāni darśayati 
avibhāgena ca āste iti ṣaṭtriṃśattattvātmanā āste iti | uktaṃ 
śrīkālapādādau

	pṛthivyāpastathā tejo vāyurākāśa evaca |
	pañcaitāni tu tattvāni yairvyāptamakhilaṃ jagat ||

iti | vitaniṣyate ca etadāgamādhikāre | nanu yadā indriyeṣu anātmasu 
ātmabuddhistadā kathaṃ śabdādyanyatamatā, na khalu indriyāṇi kasyacit 
nijena vapuṣā vedyāni yena teṣu ātmābhimāno bhavet | etenaiva āśayena 
āha viśiṣṭānām iti | prātisvikena vapuṣā na tāni saṃvedyāni | 
ahaṅkāraśaktirūpatvena hi tāni vyavasthāpitāni āgameṣu | nanu 
saṃsāriṇāṃ buddhyahaṅkārayorasti ātmābhimānaḥ, tatra ca kathaṃ 
śabdādirūpatā | āha buddhiḥ iti | paratattve yat 
jñānakriyāmāyāśaktitrayaṃ, tadeva vedyaprādhānyaṃ bhajamānaṃ 
sat sukhaduḥkhamohātmakaṃ guṇatrayamiti vakṣyate 

	svāṅgarūpeṣu bhāveṣu patyuḥ................. | (4|1|4)

iti | nanu yogināmindriyāṇi prātisvikena vapuṣā vedyānyeva, tatra kathaṃ 
śabdādirūpatā; kiṃca susūkṣmatvasūkṣmamapekṣya tatra 

(page 304)

sūkṣmarūpatvaṃ śabdādīnāmityāśaṅkādvayamekena yatnena 
nirākaroti yogināmapi iti | āhaṅkārikatve'pi akṣāṇāṃ pratiniyata 
viṣayatāsiddhaye [viṣaye ka. |] 
tattacchabdādiprakṛtatvaviśiṣṭādahaṅkārāt tattadindriyaprasaropagamaḥ,- 
iti bhautikatvamaviruddhameṣām | nanu sukhādyanubhave kathaṃ 
śabdādisadbhāvaḥ | āha viṣayānuṣaktameva iti | gītameva hi 
tathābhūtamāsvādyate kaṇṭakasparśo vā | sauṣupte tarhi katham | āha 
suṣupta iti | antataḥ iti | ramaṇīkucakalaśasparśādimayaṃ tāvat 
nidrāyāṃ sukhaṃ, tadabhāve'pi 
svaśarīrāntarvartisvasthasvabhāvaprāṇavāyusparśamayaṃ sukhaṃ, ata 
eva asvasthaprāṇavāyusparśo duḥkhātmā, nidrāyāṃ 
tamaḥsaṃpiṇḍitaprāṇamayatve mohātmā | tadāha guruḥ 
sukhamasvāpsaṃ prasannaṃ me manaḥ ityādi | sukhagrahaṇaṃ 
ṭīkāyāṃ duḥkhamohāvapi upalakṣayati | nanu 
vedyasphuṭaśabdādisamuttīrṇaṃ kimasti saṃvedanam | satyamasti, natu 
tadānīmanātmani ātmāveśaḥ | etadāha uttīrṇatve tu iti | 
śabdādervedyāduttirṇaṃ yadā [yathā ka. |] bhavati 
pratyastamitamāyīyavidyākalāsaṃkocatvāt 
buddhikarmendriyāntaḥkaraṇavyāpārābhāve sahajāyā 
jñānaśakterunmeṣāt hetoḥ saṃvedyabhuvaṃ tyajati yatastadā bodhasya 
svānandavimarśamayaḥ svayaṃ prakāśaḥ iti suṣuptottirṇā sā 
vyapadeśāntarāsahiṣṇutayā turyā daśeti ucyate, na suṣuptāvasthā | nanu 
vedyottīrṇatādaśāyāṃ yadi turyadaśā na suṣuptatvaṃ, tarhi suṣupte yat

	savedyamapavedya ca.......................... | (3|2|15)

iti vakṣyate, tat vyāhanyate ityāśaṅkya āha sthūla iti | sthūle śarīre yā 
asmitā, tasyāṃ tyaktāyāṃ 
pramāṇaviparyayavikalpanidrāsmṛtilakṣaṇānāṃ sarvāsāṃ 
cittavṛttīnāṃ nirodhena upalakṣitā yā śūnyāvasthā; sā tāvanmātraiva 
sthūlarūpaśūnyataiva, natu śarīrāduttaraṃ yat prāṇādi, tacchūnyatā 
asau, yataḥ sthūlaśarīraśūnyatā nāma prāṇādirūpameva bhūtalamiva 
ghaṭābhāvarūpatā, tataśca tasyāṃ śūnyatāyāṃ na turyatā śūnye 
vedya eva anātmani ātmatābhiniveśāt, apavedye tu [apavedyatve tu ga. |] 
vedyatvena prasiddhasya śabdāderasya sthūlarūpabhāktvena asaṃvedanāt, 
sūkṣmatayā tu śabdādeḥ parāvasthāyāmapi saṃbhava eveti uktam | 
enameva āśayaṃ rūpaśabdena āviṣkaroti | etadāgamena saṃvādayiṣyan 
vyatirekadvāreṇa kathayati anyathā iti | yadi śūnyamapi tadā vedyatayā na 
avaśiṣyeta, tarhi vedyaṃ sarvathā tucchībhūtaṃ prakhyopākhyāvirahāditi 
vedakataiva niḥsapatnā,-iti kathamiyaṃ suṣuptadaśā bhavet | turīyadaśaiva 
hi sāmyārthaḥ (sā syāt) | yadā tu śūnyarūpameva vedyamasti, tadā 
tathātvamiti suṣuptarūpatvamupapadyeta [upapadyate ga. |] ata eva iti | yato 
nivṛttirnāma śūnyarūpā vedyā, natu vedyavargasya sarvathā tucchatā 
niḥsapatnavedakamātrasvabhāvā; tato hetoḥ, śrīrauravasūtrasaṃgrahe

	athātmamalamāyākhyabandhatrayanivṛttaye |

iti nirūpya

	vyaktaye tu śivatvasya śivājjñānaṃ pravartate |

iti śivatvavyaktiḥ prayojanāntaratvena uktā | turhetau yato na malanivṛttireva 
śivatvavyaktiḥ | tathāhi kārmamalasya

	kartaryabodhe kārmaṃ tu..................... | (3|2|5)

iti vakṣyamāṇasya nivṛttiriti paramārthato māyīyāṇavamaladvayameva 

(page 306)

ucyate | vyavahārataśca tatra pratiyogitvena sphuran kārmamalo'pi bhāti | 
tathāhi bhūtalameva ghaṭābhāvo vastuto vyavahārataśca ghaṭo 
niṣidhyamānaḥ sphurati sarvathā ghaṭasya prakhyā nopākhyeti 
yadetadrūpaṃ, tat na kiñcideva; natu tadghaṭābhāva ityapi kiṃcit, 
akhilavedyavinirmuktaśuddhavedakaprakāśa eva hi saḥ | evaṃ māyīyasya 

	bhinnavedyaprathātraiva māyākhyam.................... | (3|2|5)

iti nirūpayiṣyamāṇasya nivṛttāvāṇavamalameva paramārthaḥ, 
vyavahāryaṃ ca niṣidhyamānatvena māyīyam | nanu

	svātantryahānirbodhasya svātantryasyāpyabodhatā | (3|2|4)

iti yat sahajaṃ maladvayavat malāntarānapekṣaṃ 
maladvayollāsakamīśaśakteridaṃpūrvatvābhāvādanādibhedāva-
bhāsanarūpaṃ māyīyaṃ ca dharmādharmalakṣaṇaṃ ca kārmamalaṃ 
tadāyattamiti kṛtvā anapekṣaṇīyaṃ yata āṇavena, atastadubhayāpekṣayā 
tat naisargikam | tasya nivṛttau yadyapi malāntaraṃ na avaśiṣyate, tathāpi 
kṣayonmukhatvaṃ krameṇa kṣīyamāṇatvaṃ vitataṃ kṣīṇatve'pi tat 
kṣīṇamiti prakhyāyāṃ pratiyogitayā vāsanāśeṣatvena avasthānaṃ, 
tataḥ saṃskārayogāt saṃkocavāsanākāluṣyaṃ yatsaṃvidastena 
anekavidhaṃ

	uditaṃ vipulaṃ śāntaṃ suprasannam.................. | (mā. vi. 2|45)

ityādibhedaiḥ suṣuptabhūmikāvaicitryamantarāle yata uttiṣṭhati, tato 
hetorjhaṭityeva tadrūpaṃ na sphurati śuddhasaṃvillakṣaṇaṃ yat 
sarvamalānāṃ sarvathā iti sarveṇa prakāreṇa saṃskārāvaśeṣatāyā 
api asaṃbhave sati sarvātmanā tuccharūpatvamiti bhaṇyate | 
āṇavamalanivṛttāvapi evam | yatra suṣuptibhūmikā, natu turyarūpatā; tatra 
tadapekṣayā prathamāyāṃ suṣuptabhūmau sphuṭameva turyatvamiti 
darśayati prathama iti | svaśakteḥ svātantryabodhasvabhāvāyā 
jñatvakartṛtvalakṣaṇāyā yadaprakāśanaṃ

(page 307)

paripūrṇena anyonyāviyuktena svabhāvena aprathanamakhyātilakṣaṇaṃ, 
tadātmamalaṃ sphuṭameva asti,- iti saṃbandhaḥ | nanu evaṃ 
svaśaktyaprakāśanasya nivṛttiḥ svaśaktiprakāśanaṃ, tatra ca kathaṃ 
suṣuptatā yena uktaṃ sahajasyāṇavasya nivṛttāvapi iti | etat pariharati 
krameṇa tu iti | śivatvavyaktilakṣaṇā hi kriyā pūrvāparībhāvena 
vartamānā malanivṛttilakṣaṇāṃ kriyāṃ krameṇa udbhavantīmapekṣate iti 
| yathā yathā malasya kṣayastathā tathā prakāśasya 
vyaktiryāvatsarvāvaraṇamalāpetasya jñānasya anāntyāt jñeyamalpamiti 
sthityā malasya saṃskāramātreṇa saṃbhava iti śuddhatvena suṣuptatā 
yuktaiva | turyatā tarhi kā | ucyate, trayāṇāmapi malānāṃ na kathaṃcidapi 
prakhyopākhye yadā, tadā avasturūpā teṣāṃ yā tucchatā; sā 
vedyayogena karmabandhena saṃkocena ca kāluṣyāṃśena vinirmuktaṃ 
śuddhameva saṃvidrūpaṃ bhagavata āstāmiti | āgamādhikāre hi vitatya 
etat cintayiṣyate | evamuttaraṇakramo'pi niyata iti yaduktaṃ, tat nirṇītam | 
tathāhi vicāra(vitarkā)vasthe dehe, ānandāvasthā buddhau, asmitāvasthā 
prāṇe iti caturvidhasaṃprajñātayogasvarūpamuktam, tato'pi 
śūnyabhūmau vicitraprakārāyāṃ virāmapratyayābhāsayoge 
tāratamyena asaṃprajñātayogasvarūpam | iyati sabījāvasthā, 
turyabhūmau tu nirbījaḥ samādhiriti | prakṛtaṃ kārikārthamupasaṃharati 
idaṃ tāvatsthitam iti | sarvadaśāsu iti jāgratsvapnasuṣuptalakṣaṇāsu | 
ato'pica iti suṣuptarūpāyāḥ | śuddhapramātṛpade iti turyadaśāyām | 
ata eva iti yataḥ śarīrādeḥ pūrvapūrvāvinābhāvitā, tata ityarthaḥ | 
yadihi śarīrasya pramātṛtā prāṇapuryaṣṭakādisaṃsparśaśūnyasyaiva 
bhavet, tadā bhasmībhūte śarīre kasya paralokitvaṃ cintyate iti 
paralokino'bhāvāt paralokābhāva iti 

(page 308)

vadantaḥ śobheran | nanu evamapi strībālamūrkhādīnāṃ śarīra eva 
pramātṛtābhimāna iti tān prati idamarthavat bhaviṣyati | na,- ityāha 
śarīra iti | nahi teṣāmapi gauro'hamityeva abhimānaḥ, apitu sukhyahaṃ, 
bubhukṣito'hamiti buddhiprāṇādyapi sphurati pramātṛtayā; naca 
śarīrasyaiva idaṃ vapuriti nirṇītamanyatra

	naca śarīrameva buddhistaddarśane'pi buddhivikalpe saṃśayāt 
ityādau | nanu prāṇāderapi apūrvasyaiva dehavadutpattirbhaviṣyati,- 
ityāśaṅkāṃ parihartumāha tathāhi iti | etacca 

	pūrvābhyastasmṛtyanubandhājjātasya 
harṣabhayaśokasaṃpratipatteḥ | pretyāhārābhyāsakṛtāt stanyābhilāṣāt 
| vītarāgajanmādarśanāt (nyā. sū. 3|1|19, 22, 25)

ityādyuddeśeṣu munibhireva nirṇītārtham | śarīrabhedakṛtametat 
bhaviṣyatītimohamapohati śarīritāsāmye'pi iti | etacca tadatadrūpiṇaḥ 
ityādisthāneṣu nirṇītamanyaiḥ | kṣaṇabhedaśca na kāryabhedāt, apitu 
saṃtānabhedādeva,- ityapi vimṛṣṭaṃ pūrvaireva | pratīyante iti | adyatve 
bhāvanāṃ vinaiva pārāvatānāṃ rāgitvam, uragāṇāṃ kopanatvamiti hi 
dṛśyate eva | eṣām iti rāgādīnām | nirhetukatvameva iti | bhāvanā hi 
teṣāṃ hetutvena | etajjanmani dṛṣṭe sā cet na heturāpatitamahetukatvaṃ, 
tathāca deśakālasvabhāvaniyamāyogaḥ | śāstrāṇāṃ 
paralokayuktiprasādhanapradhānānāṃ bahutvāt pratiśāstraṃ 
bhūyasībhirbahvībhiḥ sādhitamidamiti vaktuṃ śataśaḥ iti vīpsā | 
śatamiti anekopalakṣaṇaṃ, bahvībhiryuktibhiriti yāvat, naca etaditi prakṛtaṃ 
prameyamiti darśayati cinmātrasya tu iti sakṛdavabhātatvena avicchinnatvāt 
[anavacchinnatvāt ka. |] kālāsparśaḥ svaprakāśatvena antarmukhatvāt 

(page 309)

deśāsparśo'pi | ādigrahaṇena paralokagataṃ 
svarganarakādibhogajātamāha | etaddhi sarvaṃ 
prāṇapuryaṣṭakaniṣṭhameva || 5 ||

iha ayamahaṃpratyayaḥ śuddhaśca aśuddhaśca pratyekaṃ dvidhā 
anubhavānusandhibhedāt, tatra śuddhaḥ śivātmani 
anubhavasvabhāvo'hamiti, sadāśivabhūmāvanusandhirūpo'hamidamiti, 
so'yamubhayo'pi pratiyogyavacchedaviśramaśūnyatvāt 
vikalpatāvinirmuktaḥ śuddhavimarśasvabhāva eveti upapāditam | 
aśuddhastu dehādāvahamityanubhavasvabhāvo'pi 
pratiyogyavacchedaviśrāntiśarīra iti vikalpa eva asau, na śuddho vimarśaḥ 
ityādi nirūpitam | aśuddho'nusandhānātmā tu yo'hamiti pratyayaḥ, tatra 
dehāvasthānāṃ bhedāt na idaṃ tadviṣayaparāmarśanam, apitu 
saṃvinmātramasya viṣayaḥ | taddhi nityamekamiti | yadivā sthirameva 
śarīramanena sākṣātkriyate | ubhayathāpica na vikalpatā kācit,- iti 
vyāmohāpasāraṇāya sūtrāntaram | athāpi 
dehāvasthāviṣayo'yamahamitipratyayastathāpi 
dehāvasthābhedaikīkaraṇasphuraṇādabhedasāratāṃ spṛśan kaścit 
vimarśamātratāṃ śaṅketa aparaḥ, taṃ prati ca sūtraṃ

	kādācitkāvabhāse yā pūrvābhāsādiyojanā |
	saṃskārātkalpanā proktā sāpi bhinnāvabhāsini || 6 ||

	dehe buddhau ityādi pūrvasūtrādanuvartate | yadivā viśeṣya- 
viśeṣānupādānādetadviśeṣaṇayogyaṃ dehādi labhyate eva aniyataṃ, 
etadāśayena vṛttau bahuvacanam | tatra ca ayamarthaḥ [ayamādyarthaḥ paṭā 
nu ka. |]- ghaṭādyanusandherapi vikalpatā samarthitā bhavatīti | 
kādācitko'vabhāso yasyeti upalakṣaṇaṃ, kautracitkaḥ 
kāthaṃcitko'vabhāso yasyeti ca | aniyatakāladeśākāre svalakṣaṇātmani 
dehe yuvarūpe pūrvābhāsena 

(page 310)

bāladehābhāsena pūrvanāmnā ca caitra eva ahamiti, tathā bhaviṣyatāpi 
sthavirābhāsena; pāṇe'pi kṣudhitābhāsena tṛṣitābhāsena 
durbalādurbalābhāsena ca, buddhāvapi sukhitvaduḥkhitvādyābhāsena, 
śūnye'pi parimitāparimitābhāsabhedena 
mūrchāsamādhānādyābhāsāntaraiśca saha yojanā tāvadasti | 
prācyānubhavāhitavāsanāprabodhaprabhavasmaraṇamahimā ca tasyāṃ 
kāraṇaṃ, kintu sā yojanā kalpanaiva vikalpa eva tannibandhanasya 
bhinnāvabhāsasya saṃpūrṇasyaiva bhāvāt | yojyamānayorhi ābhāsayoḥ 
pratiyogyapohanoṭṭaṅkitabhedayoreva yojanā, yojyamāno'pica asau 
dehādiḥ pūrvāvasthaikīkṛto'pi [kṛte'pi ga. |] atadrūpāpoha eva nirbhāti 
| yojanā ca pramātureva arthānapekṣo vyāpāra iti sā kathaṃ na vikalpaḥ 
syāt | evamatra sūtre sarvaḥ padārtho yathāyogyaṃ kalpanātve 
hetubhāvena vyākhyeyaḥ | evaṃ ghaṭādāvapi anusandhirabhidhānīyo 
vikalpanatvena, kintu tāvatyāṃ bhūmau kasyacit bhedasya tiraskāra 
ityāśayena paripūrṇābhedasaudhasamārohaṇasopānatvamevamāderanu-
sandhānasya gurubhirabhāṇi | pūrvābhāsena yā aikyayojanā 
ādigrahaṇādahaṃkāreṇa tatsamānādhikaraṇena ca caitra- ityādināmnā 
ca, sā kalpanaiva,- iti vṛttau saṃbandhaḥ | atra ca 
dehadhīprāṇaśūnyānāmapi parasparamasti anusandhānaṃ, tattu 
sarvathaiva viṣayayāthātmyatyāgena atyāsannabhāvopakārakṛtāt 
vibhramāt | nahi tatra ekamavasthātṛrūpamavayavi, tathā vakṣyamāṇamiva 
deharūpaṃ kiṃcidasti; tato na 
śunyādibhinnabhinnarūpapramātṛtānusandhānamiha vicāritam | 
sūtrārthaṃ saṃkṣepeṇa avatārayati yo'pi iti | na kevalaṃ 
dehādyanubhavamayo'hamiti vimarśo vikalpo, yāvadanusandhimayo'pi,- iti 
apiśabdārthaḥ |

(page 311)

yadāśaṅkāvighaṭanāya sūtraṃ, tat darśayati nanu iti | prathamasya 
pradhānasya | prathamagrahaṇena ca sadāśivādipramātṛbhūmāvasti 
anusandhigandha iti sūcayati | so'pica aciraprabhāvadaprarūḍharūpa eva 
saṃvedyasya saṃvedakamelanenaiva tatra ātmalābhādityāśayena 
saṃbandhapadam | samyak bandho'nusandhānapratyayasya rūḍhiriti yāvat | 
bālo gauraśca ahamabhavam, adya tu anyathā iti yuvā 
vyāyāmakarkaśībhūtadūrvākāṇḍaśyāmaśarīraḥ | etat 
dehāvasthānāmanusandhānāt nidarśitam | atra ca vāgrahaṇe na 
avasthāntaraṃ nirdiṣṭaṃ tatsamaye avasthāntarasya asaṃbhāvanīyatvāt 
sukhitvādau tu duḥkhitvādinā saṃbhāvyam iti uttaratra vāśabdaprayogaḥ | 
sukhī duḥkhī vā abhavam, adya tu anyathā iti buddhyavasthānāṃ, 
kṣudhitastṛṣito'hamāsam [tṛṣārtaḥ ga. |], adya tu anyathā iti 
prāṇāvasthānāṃ, mūrchāvyāmūḍhaḥ parimitaśunyāvasthaḥ 
samādhānabalāt

	bahirakalpitā vṛttirmahāvidehā, tataḥ prakāśāvaraṇakṣayaḥ (yo. 
sū. 3|43)

iti

	nirvṛkṣagiribhittyādi........................ | (vi. bhai. 68)

iti

	svavadanyaśarīre'pi......................... |

iti 

	apekṣāṃ svaśarīrasya...................... | (vi. bhai. 107)

ityādinītyā dehādiśūnye kramavikasvare sati saha unmeṣeṇa 
kramavikāsena vartamāno vā abhavam, adya punaranyathā iti 
śūnyāvasthānām, nityamekaṃ cittattvaṃ yat, tat na asya viṣayaḥ, 

(page 312)

śarīrādi nityameva [evaṃ ka. |] sadekaṃ viṣayo'sya vakṣyate iti 

	......................ḍravyadikkālabuddhayaḥ (2|2|1)

ityatra | nanu ekameva nityametadastu, kimanityatayā; atra āha bālya iti | nanu 
sarvadā iti kathamuktaṃ, nahi sadyojātasya kṣaṇāntara eva viśeṣo 
dṛśyate | dṛśyate eva,- iti darśayati tadāha iti | atiśayapadena idamapi āha 
- yadi pūrvatarameva vaisādṛśyaṃ na bhavet, ante'pi na bhavet 
tādavasthyānapāyāt | yathoktaṃ śrīmadanantapādaiḥ 

	ante purāṇatāṃ dṛṣṭvā pratikṣaṇaṃ navatvahāniranumīyate |

iti | pūrvarūpeṇa ābhāsena anupraveśo vyāmiśratā'sadaprakāśamāno 
vikalpabhūmāviti na asatyam | aikyaśabdena iti vṛttau | etena iti 
aikyayojanā ityantena vākyena | nanu vimarśabalāt vartamāne sa 
pūrvākāraḥ sthita eveti abhyupagamyatāṃ, tat ko yojanārthaḥ,- iti 
śuṣkasāṃkhyāḥ manyante, tān prabodhayati ekasya iti | nanu nāstyeva 
vicchedaḥ, kevalamanabhivyakta iti kṛtvā sa ākāro na upalabhyate | atrāpi 
āha natu iti | dṛśyatvaṃ hi yadi tasya rūpaṃ ca, evaṃca abhivyaktiḥ; tarhi 
idānīmapi kiṃ na dṛśyate iti śaktivyaktyādināmāntarapracchannaṃ 
tādavasthyātādavasthyakṛtaṃ vicchinnatvameva idamaṅgīkṛtaṃ syāt | 
tasmāt cidadvayavāda eva saṃviddarpaṇapratibimbarūpe bhāvakalāpe 
abhyupagamyamāne śaktivyaktivibhāgaḥ 
saṃvicchakticitritanimeṣaṇonmeṣaṇaparamārtha upapadyate, na anyathā,- iti 
darśitaṃ śrīvasuguptapādaiḥ saṃvidrūpātmaspandādeva 
unmeṣanimeṣataḥ saṃghātavigrahaviparyāsairlayodayopalakṣitakṛtya-
pañcakaprapañcasaṃbhavaṃ nirūpayadbhiḥ |

(page 313)

etadeva sphuṭayati anityatvaṃ ca iti | teṣām iti ākārāṇām | 
samarthayiṣyate iti [ca iti ka. |] 

	yadasattadasat................................. | (2|4|3)

ityatra antare | anyathā iti śuddhena baudhasāṃkhyādimatena | tataśca iti 
yato vicchedena ākārāṇāmanityatā tasmāt nityamekaṃ śarīraṃ yato'sya 
viṣayastato'pi na ayaṃ vikalpo, na iyaṃ yojanā | nahi ekasmin yojanārthaḥ 
kaścidityapi na āśaṅkanīyam | anusandhānasya iti anusandhānatvena 
abhimatasyetyarthaḥ | apiśabdena idamāha-cidekaviṣayatvena yojanābhāvo 
yaḥ śaṅkyate, sa na kevalmayukto yāvannityaśarīramātraviṣayatvenāpi | 
etadeva prakaṭayati cidātmanīva iti | cidrūpe yathā sākṣātkārabhūmau 
prakāśalakṣaṇāyāmahamiti śuddha eva vikalpatāśūnyo vimarśo, 
naivaṃ dehādau | yato'pi iti sākṣātkāravimarśamātrarūpatvāt 
saṃbhāvyamānāt [saṃbhāvyaracanāt ka. |] vikalparūpatā na bhavet, naca 
tat saṃbhāvyate iti apiśabdārthaḥ | asaṃbhāvanāyāṃ hetumāha yasmāt 
iti | yadi vartamānameva śuddhaṃ dehādirūpamatra sphuret, bhavedayaṃ 
sākṣātkāraḥ, natu evamityāha naṣṭasyāpi iti | ata eva iti naṣṭasya yataḥ 
pratītiḥ, tataḥ saṃskārajā sā; tato vikalpātmikā | evakāreṇa 
vartamānabhāge bhavatvapi sākṣātkārarūpatā,- iti darśayati | nanu 
naṣṭe'pi bhavet sākṣātkāra ityāśaṅkya āha nahi asati iti | sākṣātkāro 
hi asaṃnihitena viṣayeṇa ayogināṃ na janyate, naca asato janakatvamucitam | 
tathābhūtena iti saṃskṛtena | pūrvānubhavo hi 
pramāturudriktaviṣayopādhikṛtabhedaḥ pūrvamabhūt, sa eva nilīnabhedaḥ 
saṃskāra iti ucyate, natu sarvathaiva 

(page 314)

dhvastabhedaḥ; sa punaḥ prabuddha idānīntanadehādijñānasacivo bhavan 
smṛtiriti tātparyam | tathā iti jñānajanakatvena yadanusandhīyate 
pūrvatvam iti | karmaṇi lakāre'pi yat ityanena dhātvarthaḥ parāmṛśyate, 
na karmaḥ; pūrvaṃ tu asya yadanusandhānaṃ, sa vikalpa eva yataḥ 
pramāturasau svatantrasya vyāpāraḥ | puro'vasthitastu arthaḥ kāmaṃ 
sākṣātkṛtaḥ, sa kevalaṃ 
nijasvātantryakalollikhyamānapūrvānusandhānacitrasya abhittibhūta iti 
saptamyā nirūpayati | uktameva sphuṭayati nahi iti | tadā iti 
sarvamuktapūrvaṃ prameyaṃ prakṛte hetūkaroti | tata-ityarthe vartate yataḥ | 
nanu evaṃ yadi vikalpa eva ayaṃ, tarhi kiṃ tena saṃnihitena arthena tatra 
kṛtam | āha kevalam iti | bhinnaṃ tātkālikamabhinnaṃ pūrvāvasthayā 
ekīkṛtaṃ dehādi yato'syā viṣayastata iyaṃ na śuddho vikalpo, nāpi 
śuddhaḥ sākṣātkāraḥ, apitu cchāyāmayī pratyabhijñā,- ityucyate | 
pūrvasya pratyāvṛttyā vartamānasya ca ābhimukhyena jñānamiti 
pratyabhijñāśabdasya yo vṛttau prayogastasya abhiprāya iyatā vivṛtaḥ | 
nanu dehasya iti | etadupalakṣaṇam | dehasya bālyādinā, buddheḥ 
sukhādinā, śunyasya saṃkocetaratāratamyena kāmamastu vicchinnatvāt, 
prāṇopalakṣitasya tu sparśasya na kaścit bhedo lakṣyate | tathāhi sa sparśo 
dehena saha otaprotībhūtasya prāṇasya bhavan dehasvabhāva eva bhavati 
ayogināṃ yogināṃ vā 
prāṇāyāmapañcakābhyāsapṛthakkṛtasvatantraprāṇavṛttīnāṃ 
prāṇasvabhāva eva | ubhayathāpi na asya kaścit bhedo yena 
vicchinnopalambho bhavet tathābhūtaśca grāhakatvena vyākhyātaḥ | yat iti 
yata evaṃ tat iti tasmāt kathaṃ vṛttau vīpsayā sārvatriko viccheda uktaḥ | 
tadapi iti sparśasyāpi grāhakatvam | sāmānyarūpamabhinnameva 
sparśanam | ādigrahaṇāt prāṇīyo'ntarnādo yataḥ 

(page 315)

so'pi na sarvadā anuvartate, apitu kadācit sukhajanakaḥ, kadācit 
duḥkhajanakaḥ svasthāsvasthatvādibahutarabhedādhāyīti tatrāpi viśeṣāḥ 
santyeva | yata evaṃ, tasmādeva hetoḥ pūrvameva vṛttāvuktaṃ 
sautrāntyapadavivaraṇaṃ śūnya ityādi || 6 ||

	dehādīnāṃ krameṇa pūrvapūrvapramatṛvedyatāyā-
manavasthānāt pramāturaprakāśe prameyamapi na jātucit prakāśeta, 
tasmāt parameśvara eva svaprakāśaḥ paramārthataḥ sarvatra pramātā, 
dehādau kevalaṃ pramātṛtābhimānaḥ, sa ca 
māyābhidhānaparameśvarecchāhetuka iti sūtrāntareṇa nirūpayan sadaiva 
sṛṣṭyādikṛtyapañcakaprapañcanacāturyaṃ nojjhati hi parameśvara iti ca 
darśayan

	svāminaścātmasaṃsthasya......................... | (1|5|10)

iti yat prakṛtaṃ prameyaṃ, tallagnatvena vimarśasvarūpasya 
tadanuprasaktatayā ca apohanaśaktivicārasya āpātāt tadapi upasaṃharati

	tadevaṃ vyavahāre'pi prabhurdehādimāviśan |
	bhāntamevāntararthaughamicchayā bhāsayedbahiḥ || 7 ||

	dehe buddhau ityādi yaduktaṃ tadevam iti etatsūtrārthavaśāt 
yujyate | tathāhi vyavahāre māyāpade'pi dehādiṃ vedyamapi prabhureva 
prakāśaparamārthaḥ prabhutvādeva māyābhidhānayā svecchayā 
āviśati pramātṛtayā svīkaroti taddehaprāṇādiprādhānyaṃ nirbhāsayan 
tatpramātṛbhāvaṃ nirbhāsayati, nirbhāsayaṃśca antaḥ iti ahantābhuvi 
sthitaṃ bhāsanaparamārthatvādavicchinnāvabhāsanameva icchayaiva 
bahiḥ iti antaḥkaraṇabahiṣkaraṇavedyatābhūmau sphuṭamasphuṭaṃ ca 
krameṇa idamiti bhāsayati, tato hetoretat yujyate eva anavasthāyā abhāvāt | 
hetau liṅ | kiṃca yadetaduktamapohanasvarūpaṃ, tato hetoḥ | evam iti 
vakṣyamāṇasvarūpaṃ vastujātam |

(page 316)

kiṃ tat | āha na kevalaṃ prasiddheṣu 
sṛṣṭisthitisaṃhāratirodhānānugrahakāleṣu 
yāvadasminnanyonyakrayavikrayavivādopadeśaprekṣāprabhṛtyananta-
vyavahārakāle'pi dehaprāṇādīṃścaitramaitrādibhinnān āviśan 
aikyena tāvatyaṃśe nirmimāṇastatraiva sthitiṃ bhāsayan 
pūrvapramātraikyaṃ saṃharan, tadekaghananijarūpanimīlanāt 
vilayamupadarśayan aikyāveśāṃśena anugrahakalāṃ nirbhāsayan 
bhāntameva atyantaprakāśameva santamartharāśiṃ icchayā prabhuḥ 
svatantraḥ kṛtyapañcakasaṃpādane sadaiva udyukto bahiḥ ekābhāsatayā 
bhāsayati,- iti na asaṃbhāvyametaditi etat jātam | saṃbhāvanāyāmatra 
liṅ | tadetaduktaṃ

	sadāsṛṣṭi..................................... | (u. sto. 20|9)

ityādi,

	pratikṣaṇamaviśrāntaḥ .......................... | (sta. ci. 112)

ityādi,

	prākāmyamātmani .......................... |

ityādi ca | apica yato vimarśasvarūpanirūpaṇaṃ vitatya kṛtaṃ, tat iti tato 
hetoḥ | evaṃ iti pariniṣṭhitaṃ tat jātaṃ yat pūrvamuktaṃ 

	svāmina....................................... | (1|5|10)

ityādisūtraiḥ | idaṃ hi teṣāṃ tātparyaṃ- prabhuḥ sṛṣṭikāle 
vyavahārakāle ca dehādīn pramātrīkurvanneva antarbhāntamartharāśiṃ 
bahirbhāsayati,- ityeṣa niyamo niyoga iti vidhirūpe niyoge yatra liṅ | 
vṛttāvapiśabdaṃ vyākhyātuṃ ādisarga iti | icchayā iti deśādyāveśe 
bahirābhāsane ca heturiti nirūpayituṃ māyāśaktyā iti kartṛśaktyā iti 
ca | krameṇa iti pūrvataḥ pramātṛvargāt viśleṣaṇamapareṇa 
saṃśleṣaṇamiti kṛtyapañcakāveśaḥ sūcitaḥ |

(page 317)

maheśvaro bhāsayati iti anavasthāparihāraḥ | evaṃ tridhā 
sūtrārthamavatārayati ittham ityādinā | eva ityanavasthāśaṅkāśamanam 
| na kevalam ityādinā sṛṣṭyādyavicchedaśaktatvaṃ pūrvaprastutamiti 
prāktanārthanigamanakāritvamavatāritam | svam iti 
śuddhaśrīśivabhūmau, avayavātmakaṃ śrīsadāśivādidaśāyāṃ 
rūpamasya iti dvandvagarbho bahuvrīhiḥ | indriyamatiṣu viśeṣarūpaṃ 
sphuṭaṃ [sphuṭayat ga. |] yadīśvarabhūmāvavibhāgena ahamidamiti bhāti, 
manobhūmau sāmānyarūpādasphuṭaṃ yat kila śrīsadāśivapade 
sargātisargaprārambhe śuddhe sadāśivādirūpe māyīye ca brahmādirūpe 
| lakṣaṇaṣaṣṭhīsamāso'yaṃ bahuvrīhirapi | sṛṣṭisthityādau prasiddhe 
yathā, tathaiva sarvadāpītyarthaḥ | ābhāsayati iti 
sṛṣṭisthitisaṃhāratirodhyanugrahayogyatayeti gamyate eva 
viśeṣānupādānāt | śuddha ityādinā prabhuḥ iti vyācaṣṭe

	svāminaśca....................................... |

ityarthaṃ smārayan krameṇa aśuddhametadīyaṃsargaṃ nirūpayiṣyan 
tasya ityādinā śuddhaṃ tāvadāha, smārayati ca

	..............ṇa vinā tasmādicchāmarśa................. |

iti | icchā nāma tasya svarūpameveti icchuśabdena darśayan, kimarthamasya 
tādṛśī icchā, tathāhi

	krīḍārthāyāṃ jagatsṛṣṭau vihanyeta kṛtārthatā |
	sṛjecca śubhamevaikamanukampāprayojitaḥ ||

ityādivyāmūḍhaparyanuyogaṃ niravakāśayati | yathoktaṃ

	pañcaprakārakṛtyoktiśivatvānnijakarmaṇe |
	pravṛttasya nimittānāmapareṣāṃ kva mārgaṇam || (śi. dṛ. 1|12)

iti | siddhe hi svaprakāśavapuṣi svatantre ka eṣa vyāmohaḥ [vyāpāraḥ ka. 
|] vimarśapradhānā 

(page 318)

pratītiḥ, satyapi prakāśe sadāśivapade yā manobhūmirmāyādaśāyāṃ 
bhaviṣyati, atra ca prakāśāṃśasya avabhāsarūpasya apradhānatvena 
nimīlanāt bhāvānāṃ ca avabhāsanatvāt 
dhūmadhusarībhāvaśyāmalitavicitrapaṭaniviṣṭabhāvapaṭalavat 
nimīlanamiti nimeṣavyavahāraḥ kariṣyate | etacca āgamādhikāre

	īśvaro bahirunmeṣa.............................. | (3|1|3)

ityatra nirūpayiṣyate | vimarśaprādhānyādeva 
samastanāmāvibhāgasāranādabhūmirityucyate daśā iyaṃ, 
vimarśāṃśanimīlane tu 
avabhāsātmakasākṣātkārocitaprakāśarūpaprādhānyāt 
bodhāvabhāsonmeṣarūpāvibhāgasvabhāvabaindavapadavyapadeśyā 
aiśvarī daśā, iyameva māyāpade indriyaviṣayatā bhaviṣyati | 
evaṃbhūtaṃ pratītidvayaṃ prati yo viṣayabhāvastatkṛto yo bhedastena yaḥ 
sphuṭatvetaravibhāgastadyuktaṃ yat svāṅgabhūtaṃ tata eva avibhaktaṃ 
samarthaṃ ṣaṭtriṃśattattvātmakaṃ vastu cidacidrūpaṃ bhaviṣyati, na 
tato'dhikaṃ kiṃcidasti,- iti kṛtvā tasya yat prakāśanamiyameva viśvasya 
sṛṣṭiḥ | svarūpabhūtaiva ca asau bhagavato natu adhikā asau kācidadhikasya 
vā kasyacit | nīlamasphuṭaṃ pītaṃ sphūṭamitivat na atra 
bhinnaviṣayatvamiti brūte cviprayogena [dviprayogena ka. |], naca 
etatsṛṣṭiyoge'pi bhagavataḥ kiṃcidunatvamadhikatvaṃ vā,- ityāha tadāca 
iti | asyām iti sadāśiveśvarapadatirohitāyāṃ śuddhaśivadaśāyām | 
nanu kiṃ kramikametat daśādvayaṃ bhagavati, uta yugapat | ubhayathāpi na, 
-ityāha na cāpi iti | kramo hi kālavṛttiḥ | sa eva ca apekṣāntareṇa 
yaugapadyaṃ, kālānunmeṣe ca tadubhayamapi na kiṃcit | nanu ca evaṃ sati 
tadā iti avasthāyām iti taduttara iti ca 

(page 319)

yaduktaṃ, tat sati krame avasthāvyavahārāducitamiha, 
tadabhāvādandhaprāyaṃ [tadabhāvāndhapadaprāyaḥ ka. |] 
bhavedityāśaṅkya āha kevalam iti | 
māyāsaṃskāradārḍhyādamāyāpadamakālakalitaṃ vaktuṃ 
sākṣādaśaknuvannaviruddhamapi 
rūpadvayabhedapradhānasvabodhadaurātmyāt viruddhamiva 
abhimanyamānaḥ pratipādyaḥ pratipādakaśca svapratipattipariniṣṭhitaṃ 
kramamatrāpi āropayati | anāropitaṃ tu kīdṛk tattvamityāha sarvatrātra 
itiśrīśivasadāśiveśvaratve | deśabhedo mūrtibhedataḥ, kālabhedaḥ 
kriyābhedataḥ | tau ca atra na staḥ iti

	sarvatrābhāsabhedo'pi........................... | (2|1|6)

iti prakaraṇe vakṣyate, uktaṃ ca ādisiddhasūtre | evaṃ śuddhāṃ sṛṣṭiṃ 
vicārya aśuddhāṃ vivinakti tadevam iti | anantaraśabdaḥ paravacana iti 
dikśabdayoge pañcamī | atrāpi yadā tadā iti māyāsaṃskārādeva 
bhagavadicchāyāṃ kālavibhāgābhāvāt | darpaṇa iti 
ādhikyāvabhāse'pi anādhikyamāha | yāsu iti yāsu ābhāsyamānāsviti 
nimittasaptamī ābhāsanāyā naimittakatvamāha | tataśca ayamarthaḥ- 
yadābhāsananimittaṃ dehādīni grāhakībhāvyante, 
dehādyupayuktaśabdādivyatiriktaṃ tu śabdādi grāhyatāmāpadyate | nahi 
anyathā grāhyagrāhakadvayasantatīnāmābhāsanā upapadyate | yata 
evamiyaṃ śuddhamiśrāśuddhavyavasthā tat iti tasmāt hetorenāmeva 
aśuddhadaśāmapekṣya

	dṛk svābhāsaiva............................. | (1|3|2)

iti prakaraṇe vyāpakaviruddhavyāptopalabdhyā 
svaparasaṃvidrūpayoranyonyābhāvaḥ sādhitaḥ śuddhe miśre ca pade 
nirodhābhāvāt | nanu pramātrādīnāṃ bhedo yadi pratibhāsate, tat 
pratibhāsānusāreṇa sa eva 

(page 320)

astu tāttviko vidhācatuṣṭayavādināmiva,- iti kiṃ 
māyāparikalpanenetyāśaṅkya āha atrāpica iti | bhedavyavahāre 
śaṅkādyotakaścaḥ | na kevalaṃ śuddhadaśāyāmabheda eva sāraṃ, 
yāvadihāpīti apiśabdaḥ | jñeyasya na pṛthak kimapi tattvam, apitu jñeyatā 
nāma jñānameva | tadapi na aparaṃ kiṃcit, apitu prakāśarūpameva 
svatantratayā ahamitiviarśātmakapramātṛtattvamayam | nanu tadapekṣayā 
māyāpi kathamavabhāsayet bhedamityāha māyīya iti | dehādau pramātari 
āropitaṃ yatastatprakāśarūpamahamiti, tato 
dehādisaṃbandhasaṃkucitāvabhāsaṃ tat, tatastadapekṣayā 
bhedābhimāna upapannaḥ | nanu māyīye pramātari eṣaiva māyīyatā 
yadadhyāropitaḥ pramātṛbhāvastatra kimapareṇa 
prakāśarūpāropaṇenetyāśaṅkya [āropeṇa ga. |] āha taddharma iti 
prakāśarūpatāropaṇameva pramātṛtāropaṇamiti yāvat | tato yathā 
apāramārthikabāhyapadena āropitameva prakāśarūpaṃ 
saṃkucitasvabhāvamiti kṛtvā tadapekṣayā bhedena na ucitastathā ihāpi, 
kevalamasya arthasya anupapattau satyāmanupapannāvabhāsanakāriṇī 
māyākhyā śaktiḥ svaprakāśe bhagavati prakāśavapuṣi paramaśive 
tadāgamavimarśaprabhāvitā abhyupagamyeti bhāvaḥ | nanu 
evamāropitasya prakāśavimarśanaḥ(taḥ)kathaṃ 
tadarthakriyākāritvamucitamityata āha vastutaḥ iti | natu ghaṭaḥ 
paṭasvabhāvo māyāpade śuddhapade'pivā, tadāpi saṃvideva 
viśvarūpā; natu ghaṭaḥ kaścit svatantraḥ | nanu evamasminnaśuddhe 
māyāpade kālavibhāgastāvadunmiṣitaḥ,- iti tadapekṣayā bhagavatyapi sa 
prāpnoti | yāvaddhi purā māyāpadamaśuddhaṃ nollāsitaṃ tata 
ullasitamiti vyavahāro yathoktam anantarameva śuddhasargādanantaraṃ yadā 
ityādi, tāvadupanipatito

(page 321)

yuktyā kālavibhāgaḥ,- iti mohamapahartumāha atra ca iti māyāpade, 
ādiśabdāt miśradaśā | bhavedayaṃ doṣo, yadi ca parameśvarāpekṣayā 
yadeti anantaramityādi ca syāt; yāvatā 
māyīyavibhāgānubhavābhāsādhivāsitāsmādṛśadṛṣṭyapekṣayā 
etadityuktaṃ, bhagavati tu 

	kena nāma na rūpeṇa bhāsate.................... |

ityetāvatparamārthaprakāśe idānīṃ bhāti prāgabhāsīt bhāsyati 
ityādikamapi śuddhabhāsanamātraparamārthaṃ svaśaktivijṛmbhitaṃ 
darpaṇa iva vitatāvitatadeśatādi tat kevalaṃ svacchatāvijṛmbhitamiti 
paramaśivāpekṣayā na śuddhamiśrāśuddhatayā bhedavyavahāraḥ 
kaścit tatprakāśaikaparamārthatvāt sarvasya, citrabodhāpekṣayā 
nīlapītāditayā yathā iti | yadihi tadapekṣayā bhedavyavahāraḥ, sa tarhi 
teṣāṃ na prakāśo bhavet ghaṭa iva paṭāderniyamataśca sa eva teṣaṃ 
prakāśo'nyānupapatteriti niyamasya vyāpakasya 
anupalabdhilakṣaṇaprasaṅgasaṃtrastahetuvipakṣāt 
pracyutastatprakāśaikaparamārthatvalakṣaṇo 
heturbhedavyavahāraviparītābhedavyavahāreṇa vyāpyate iti 
viruddhavyāptopalabdhiḥ | nanu evaṃ kathamuktaṃ pūrvaṃ 
pūrvapramātṛdaśāyāmuttaro nāsti,- iti | etatpariharati tadānīṃ kevalam 
iti | viśvapramātṛtāpadalakṣaṇe tasmin kāle kathaṃ 
dehaprāṇādermātṛtā | sā hi saṃkocavatī tasyā udreke sati asaṃkucitāyā 
viśvapramātṛtāyā eva ayogāpatteḥ | etaduktaṃ bhavati- śarīrasya 
vedyarūpasya sata eva vibhinne vedyavedakarūpeṇa yā pramātṛtā, sā 
prāṇaṃ buddhiṃ śūnyaṃ paramaśivaprakāśaṃ ca pramātṛtvena 
apekṣamāṇaiva jhaṭiti sphurati | yathoktam 

	apitvātmabalasparśātpuruṣastatsamo bhavet | (spa. kā. 8)

iti | bhagavataḥ punarvedakaikasvabhāvasya pramātṛtā svabhāva eva |

(page 322)

abhinnavedya iti tathā śarīrāderbhāsamānasya api 
paraśivaprakāśābhinnatvena na vedakatā kācit | nanu śarīraprabhṛteḥ 
pramātṛtā parimitatvena bhāvānāmabhito bhedamābhāsayati, 
paramaśivasya tu mātṛtā [prakāśātmatā ka. |] sarvamabhinnamabhito, 
naca ekadā ghaṭāderbhedābhedāvucitāviti parasya bhramaṃ bhinatti 
māyā iti | evamaśuddhaṃ sargamuktvā tasyaiva śeṣabhūtaṃ 
vyāvahārikaṃ sargaṃ...........ḍaparaṃ sūtrārthamunmīlayati tat iti | 
śuddhacidātmana ityādinā tasya viśvanirmāṇecchoḥ ityādinā 
śuddhavyāmiśrarūpanirūpaṇapūrvakaṃ māyīyasargarūpaṃ 
yadā saṃsāracikīrṣā ityādinā yaduktaṃ, tadeva vaktuṃ tathāhi 
ityupakrameṇa viśvavartina ityādinā śuddhamabhinnaṃ vidyāmayaṃ 
bhinnābhinnasvarūpaṃ smārayati | īśvarasya iti bhagavataḥ śivasya | 
parasparāpekṣayā iti īśvarāpekṣayā tu parasparamapi na bhinnāḥ, 
saṃvidekarūpaparamārthā hi te, tadapekṣayā tadāhamityeva te bhāseran; 
natu sarvamiti idantāprāṇitena sarvaśabdena vyapadeśyatayā | īśvarasya 
iti bhagavataḥ śivasya sadāśiveśvarapade evaṃbhūtaprakāśasvabhāvatā 
| etacca śrīśivasadāśiveśvararūpatvamantaranuprāṇakatvena 
prakhyopākhyārūpapratipattipratipādanātmake vyavahāre'pi 
pūrvabhāvitvena sphurati | viśvasṛṣṭāviva iti punaḥ smāraṇena sūcayati 
| tataśca ityādinā ādisargasvarūpaṃ yat vyavahārakāle 
lokayātrālakṣaṇe'pi atidiṣṭaṃ, tat spaṣṭayati | teṣāmeva iti 
viśvavartināmarthānāṃ daśātritayabhāktvena darśitānām | vāyvādiḥ 
iti | śūnyena bhūyasā [śūnye'nubhūyamānavyavahārā ka. |] 
vyavahārābhāvāt prāṇabuddhidehapramātṛtaiva uktā | ye pūrvaṃ 
sadāśivabhūmau, te idānīmantaḥkaraṇasya viṣayāḥ

(page 323)

santaḥ sāmānyātmāno mandaprakāśāḥ; ye tu īśvarabhuvi, te idānīṃ 
bahiṣkaraṇagocarāḥ sphuṭaprakāśā viśeṣātmānaḥ | tadāha iti 
vṛttigataṃ kramapadamiyatā śuddhamiśrāśuddhadaśāvyākhyānena 
vivṛtamiti darśayati | kartṛśaktyā iti vṛttipadena sautramicchāpadaṃ 
vaicitryeṇa vartitam | ātmatayā dehāderāveśe saiva icchā 
māyāśaktirucyate, bāhyāvabhāsane tu bhedanirmāṇabhāsanarūpatayā 
aśuddhakalāvidyāśaktirūpeti | nanu māyāśaktyā yāvadanātmani 
ātmatā dattā, tāvat kartṛtvajñatve tatra aviśuddhe datte eva | tat kimaparaṃ 
kalāvidyābhyāṃ kṛtyam | atra brūte māyāśaktyā hi iti | saṃkucitā 
pramātṛtā māyāśaktyā kāyaprabhṛteḥ 
satyavedakatāpaharaṇavedyarūpaviśrāṇanasamaya eva yadyapi vilabdhā, 
yat nareśvaravivekaḥ 

	tena māyābhidhā śaktiḥ sahaiva kurute dvayam |
	vedyānsadasataḥ sarvānkāṃścidvedyāṃśca vedakān ||

iti, tathāpi tāvatā asau svātmanyeva prakāśavimarśayogādahamiti 
jaḍakuḍyādivilakṣaṇatayā sphuret, na punariyataiva bhinnasya 
nīlasukhādeḥ pramātā saṃpadyate | yadi pramātṛtāmātrāyattaṃ 
nīlādyavabhāsanaṃ bhavet, tat suṣuptaturyādipadaṃ na prakalpeta 
pramātṛtāmātrasya jaḍavailakṣaṇyena tatrāpi sadbhāve 
tadākṣiptanīlādisaṃvedanāvaikalyena 
jāgratsvapnānyataratāpattiprasaṅgāt | tataśca yatsaṃbhave'pi yat na 
bhavati, na tat tāvanmātrādhīnaṃ bījamātrasaṃbhave'pi aṅkura iva; 
tathāca pramātṛtāmātrasaṃbhave'pi bhinnavedyasaṃvedanamiti 
vyāpakānupalabdhiḥ | tāvanmātrādhīnatvasya hi vyāpakaṃ tatsaṃbhave 
sati avaśyambhāvitam, anavaśyambhāvitve nirvivādasya 
tadvyāpakāntarasya anapekṣatvasya viruddhaṃ sāpekṣatvaṃ prasajyate 
yatastasmānmāyātiriktena 

(page 324)

apekṣaṇīyena bhāvyameva | tat darśayati kalā iti āgamasiddhayā 
bhāṣayā vidyāmapi svīkaroti, tathāhi āgame 

	kalodbalitacaitanyo vidyādarśitagocaraḥ | (sva. 11|98)

iti paṭhyate, udbalitaṃ udbalanaṃ balotkarṣaṃ nītaṃ 
bāhyakāryaviṣayatāmadhigamitaṃ caitanyaṃ kartṛśaktirūpaṃ yasya, 
vidyayā ca darśito viṣayo nīlādiryasyeti | evaṃ bhinne yat karaṇaṃ, tatra 
kalāyāḥ sāmānyena vyāpāraḥ paṅgorapi gamanodyamadarśanāt, 
viśeṣeṇa tu tatparipūraṇe karmendriyāṇām; yattu bhinne vedanaṃ, tatra 
sāmānyena vidyāyā andhasyāpi rasaviviktatayā rūpāvagamāt; viśeṣeṇa 
tu tatparipūraṇe buddhīndriyāṇām | rāgakālaniyatayastu 
jñatvakartṛtvayorupādhitvena sthitāḥ, natu utthāpakatvena sthitāḥ,- iti iha 
prasaṅgena nirūpitāḥ | nanu sargādau bhāsanaṃ nirmāṇarūpaṃ 
vyavahārakāle tu saṃvedanarūpaṃ pūrvameva nirmitatvāt, tat 
kathamaviśeṣeṇa darśitam ādisarge vā vyavahārakāle'pivā 
bhāsayati ityāśaṅkya yā vṛttiḥ tathābhāsanameva utpādanam iti, 
tāṃ vivṛṇoti yadevaca iti | etadeva sphuṭayati 
ākṣepapratisamādhānābhyāṃ nanu ityādinā | bhinnāvabhāsanam iti 
pratirūḍhamiti śeṣaḥ | parimitatvāt iti vedyatvena anyataḥ saṃkucitatvāt | 
dvaitadarśanāt iti svarūpeṇa aparimitatve'pi 
vyāpārapārimityādaṇutvameṣāmiti āśayaḥ | teṣāmeṣām iti 
yathāyogamāgamataḥ pramāṇāntarācca siddhānāṃ, saṣṭhī nirdhāraṇe 
| nityameva iti sarvajñā hi te pūrvapūrvatarāśca pramātāraḥ, tato na 
teṣāṃ kadācidapi apūrvabhāvāvabhāsanam | nanu 
mantreśvarādīnāmapi svādhikāraparikṣaye mokṣāvasthāyāṃ kathaṃ 
pramātṛtvaṃ, tataśca nityameva iti asaṅgatam | etadāśaṅkāśāntaye 
prāha muktāṇūnāṃ

(page 325)

ca mokṣāvasthāyāmapi paramaśivādanādiśivatāmayāt 
malanirhārābhivyaktaśivatvānāṃ bhedaḥ iti | anena aṃśena 
dvaitapakṣe muktāṇavo bhinnā eva, teṣāṃ ca śivatvena 
sārvajñyādavicchinnameva avabhāsanaṃ; traikālikatvāvabhāsastu 
[vabhāsaḥ teṣāṃ māyīya ga. |] eṣāṃ māyīyapramātṛniṣṭhitaṃ 
nirbhāsanamapekṣya, tadapi teṣāṃ sārvajñyāt na na sphurati | cakāreṇa 
idamāha- mantreśvarāṇāmadhikārakṣayāt mokṣe'pi tatsthāne parasya 
aṇostāvatpadaprāptinimittadīkṣāvratajapatapaḥsamādhānacaryā-
nuṣṭhānamahimnā saṃkramaṇe tasyāpi sarvajñabhāvāt traiyambike 
arthasārthe'kadarthita eva pramātṛbhāvaḥ,- iti mantreśvarāpekṣayāpi 
nityameva iti yuktam | paśvaṇūn iti paśvaṇutāmātraṃ sāmānyena 
apekṣyetyarthaḥ | tattvabhuvanādayaḥ iti ādipadena bhāvabhūtādīnāṃ 
kalāmantrapadavarṇānāṃ ca grahaṇam | ghaṭādayo'pi 
tajjātīyatāpekṣayā na atyantāpūrve kecit | itiśabda uktasya arthasya 
hetutāṃ bhāvini arthe- na tadānīmeva sṛṣṭāśca saṃhṛtāśca- ityetat 
dyotayati | tameva hetuṃ saṃkṣepeṇa āha pūrvasṛṣṭatvena ityādinā | 
iyatā pūrvapakṣe yaduktaṃ kathaṃ vyavahārakāle nirmāṇaṃ syāditi 
iti, tatra yuktavāditaiva pūrvapakṣavādino darśitā | kathaṃ tarhi 
nirmāṇatā,- ityāśaṅkāmadhikasaṃbhavaviśeṣadyotanopakrame 
parākaroti kintu iti | tadā iti tasmin samaye | yena iti aikyagamanena | tathā 
sati iti pratipramātṛ yadi bhinnabhinno ghaṭādyābhāso dehābhāsaśca | 
uktam iti vāsanāprabodhasūtre (1|5|5)

	cidātmaiva hi..................................... | (1|5|7)

iti sūtre ca | nanu evaṃ vighaṭetaiva pramātṛbheda ityata āha natu 

(page 326)

iti | prāṇapuryaṣṭakādau tṛṭśākhādibhedavyavasthāyāstādavasthyāditi 
bhāvaḥ | naca atra vipratipattiḥ kasyaciditi darśayituṃ jñānaṃ ca iti yat 
vakṣyati tat prakṛtena saṃgamayituṃ sa eva avabhāso jñānamucyate 
ityācaṣṭe | nanu avabhāso ghaṭādirūpo vedyastatkathaṃ sa jñānaṃ syāt | 
āha pramātṛvyāpārarūpā ca iti | saiva asya kathamiti cet, āha 
pramātṛniṣṭhatvena ityādi | nanu evaṃ pramātricchayā 
pramātrantarasaṃyojanayuktyā pratikṣaṇaṃ prameyāṇāṃ 
pramātṝṇāṃ ca nirmāṇaṃ saṃharaṇaṃ ca, tat kathaṃ maheśvaro 
bhasayati iti uktaṃ vṛttau,- iti codyaṃ uccāṭayati sā ca iti | evamarthamapi 
iti | na kevalaṃ vṛttigatasya kramapadasya 
śuddhādirūpatāparipāṭīmātramabhidheyamapitu 
pramātrantarasaṃyojanaparamparāpravāho'pi | etadvikṣiptībhūtaṃ 
saṃkṣipya upasaṃharati tadevam iti | sargasthitibhyāṃ pañcadhāpi 
kṛtyamupalabhyate | dehādimāviśan bahiḥ iti yadviśeṣaṇadvayaṃ 
tadvyatirekeṇa yo'rthaḥ sūtrāt avagamyate, taṃ prakaṭayituṃ yā vṛttiḥ 
dehādi iti; tāṃ vyācaṣṭe yadā punaḥ iti | sakṛdeva iti vicchinnatvena 
akramamityarthaḥ, anena yugapat padaṃ vṛttau kālakramābhāvatātparyeṇa 
vyākhyātam | nanu paramaśivadaśāmaspṛśataiva vṛttikṛtā kena āśayena 
sadāśiveśvaradaśā iyamuktā | ucyate, iha cidātmani 
bhāvarāśirantārūpatvena ahamityeva bhātīti prakṛtaṃ prameyam, tatra 
kaścidāśaṅkate- ahamitinirbhāsane bhāvavargo nirbhāta iti kimetat, 
sadāśiveśabhuvi bhavatu nāma tathā idantonmīlanāditi sa pratyāyyate, 
sadāśivādibhūmāvapi kathaṃ bhāvavargo bhāti, sa hi kramikaḥ 
prarūḍhedaṃbhāvaśca | atha ucyate bhāvānāṃ tāvadidamitirūpaṃ, 
tacca atrāpi asti prarohakramikatve tu 
māyākālaprabhṛtiśaktyantaravijṛmbhitamiti,

(page 327)

tarhi bhāvānāṃ prakāśataiva pāramārthikaṃ 
vapuraprarūḍhedantonmeṣastu vidyāśaktivijṛmbhitamiti, tato yathā 
sadāśivādipade sāmānādhikaraṇyādabhedaviśrāntena bhedena santa eva 
māyāyāṃ bhedena bhānti, tathā śivapade'tyantābhedena santa eva atra 
iti sadāśivādibhuvi evaṃ iti sāmānādhikaraṇyena bhānti,- ityetadvastu 
anena iti aiśvaryadaśābhidhāyinā vṛttigranthena pratipāditaṃ 
dṛṣṭāntamabhidadhatā, dārṣṭāntikaṃ tu prakaraṇāpannatvādavagamyate 
iti darśayati avasthita ityādinā | tathāca iti etena uktena prameyaprakāreṇa 
vak.yamāṇasūtrārtho'prayāsasiddhaḥ iti || 7 ||

	antararthāvabhāse sthite kiṃ kāraṇāntaracintayā,- iti prakṛtaṃ 
prameyaṃ prasaktānuprasaktena pratyavamarśavikalpādinirūpaṇena 
vicchinnakalpaṃ śiṣyadhiyi nidhātuṃ nigamayati

	evaṃ smṛtau vikalpe vāpyapohanaparāyaṇe |
	jñāne vāpyantarābhāsaḥ sthita eveti niścitam || 8 ||

	evaṃ smṛtau iti sūtreṇa smṛtijñānāpohananirūpaṇāni trīṇi 
prakaraṇāni ekīkurvatā yaduktaṃ- prabhureva idaṃ bhāsayati, tato 
jñānādau paśupramātrapekṣayā yadyapi bhinnā bāhyāśca bhāvāḥ; 
tathāpi paramārthapramātaiva jānāti smarati adhyavasyati,- iti 
vastuto'ntaḥsthitā eva ghaṭādyābhāsāḥ,- iti ayatnasiddhamadaḥ | yadi tu 
dehādireva paramārthataḥ pramātā, tadā tatra ghaṭādyavabhāso'sti,- iti 
kiṃ kena saṃgaccheteti sūtrārthaḥ | vivṛtiratra spaṣṭaprāyaiva | prāk iti 
jñānasmṛtyādisūtre (1|3|7) | nahi iti eko hiśabdaḥ prāgeva asya arthasya 
ātmasaṃsthādyavabhāsane sūtrokte hetutvena nirdeśaḥ,- iti darśayati | 
prakṛtaprameyasamarthanahetutayā 

(page 328)

yasmāduktametat, tasmādantaḥ saṃniviṣṭā eva tathā sphuranti,- iti 
yuktameva | tathāhi sati iti ayaṃ ghaṭa iti vimarśe vedyatvameva sphuṭaṃ 
bhavediti kā cidātmatā bhavet | iyatā ānurūpyapadaṃ vivṛtam | nanu 
idamitivimarśo bhāvānāṃ sphuritaṃ, natu ahamitivimarśaḥ,- 
ityāśaṅkāmanuvadan pariharati naca iti 

	prāk........................................... | (1|5|2)

iti 

	ahaṃpratyavamarśa........................... | (1|6|1)

ityādisūtradvaye | etat saṃvādayati saivaca iti | caḥ 
saṃvādanadvāramatāntarasamuccayadyotakaḥ | taduktaṃ kakṣyāstotre

	sarve'nubhūtā yadi nāntararthā-
		stvadātmasātkārasurakṣitāḥ syuḥ |
	vijñātavastvapratimoṣarūpā
		kācitsmṛtirnāma na saṃbhavettat ||

ityādi || 8 ||

	nanu evaṃ smaraṇavikalpajñāneṣu antaravabhāsasya 
paramārthavṛttena bāhyatāvabhāsasya ca māyāśaktyanusāreṇa 
aviśeṣaḥ,- iti asphuṭasphuṭatādiryo viśeṣo nirbhāsate, sa kiṃkṛtaḥ,- 
ityāśaṅkāyāṃ sūtraṃ

	kintu naisargiko jñāne bahirābhāsanātmani |
	pūrvānubhavarūpastu sthitaḥ sa smaraṇādiṣu || 9 ||

	yadyapi asti ayamaviśeṣaḥ, tathāpi viśeṣo'pi asti viśeṣahetoḥ 
sadbhāvāditi kintu ityanena dyotyate | tathāhi pūrvaṃ bahirābhāsanarūpe 
[avabhāsana ka. |] jñāne ghaṭābhāso nisṛṣṭeḥ 
svātantryādananyaśaraṇatayaiva

(page 329)

āyāto vyavahārakālaprathamadarśanena prathamanirmāṇakāle vā 
tato'pūrvonmeṣayogāditi sphuṭaḥ, ābhāsanakriyāyāṃ hi āyatamāna 
ābhāsastasyā apūrvatvena sphuṭatayā ca apūrvaśca sphuṭaśca ghaṭa 
[paṭaḥ ka. |] iva nirmāṇakriyāyāḥ, anyathā ghaṭo'pi kathaṃ 
kadācidapūrvaḥ, kadācit neti bhavet, tatkriyārūpameva kāryairanvīyate | 
smaraṇādau tu na svātantryāyāto'sau | anubhavavāsanāśaraṇatayā yato 
bhavati, tataḥ paribhogadhūsaritaprāya iva asau nirmālyakalpaḥ parimlāna 
eva avabhāsaḥ | anuvartamānatā hi nāma anubhavasya saṃskārarūpatā, 
anubhavaśca nīlādyābhāsamayaḥ;- iti 
tadanubhavatādātmyāpattibalāyātaḥ smaraṇādau so'rthābhāso 
[arthāvabhāsaḥ ka. |] na avyavahitatvena prakāśyaḥ,-iti asphuṭa eva | 
saṃkṣipya sūtrārthamavatārayan prasarati ityantena 
prathamamardhamavatārayati | sargadvaye'pi iti aikyaviśiṣṭe 
idamahaṃbhāvasāmānādhikaraṇyasāre aiśvare śuddhe, itaratra ca 
aśuddhe, vyavahārakāle'pi yaḥ sākṣātkārarūpāṇāṃ saṃvidāṃ 
kramo'nubhavaparamparā tatrāpi,- ityevaṃ bahirābhāsanātma jñānaṃ 
tridhā nirūpitam | sahaja iti bhagavata eva svātantryādullasita iti yāvat | 
dvitīyamardhamavatārayati smṛti iti | nanu parameśvarasya 
avicchinnaprakāśavimarśasvātantryaparamārthasya na 
smaraṇādikamupapadyate [asmaraṇādikaṃ ga. |] ityāśaṅkāṃ tasyaiva 
parigṛhītakṣetrajñabhāvasya sa eva hi tatra tatra śarīrādau smarati avasyati 
utprekṣate apohati iti kathitanītyā yujyate,- iti nirūpayan nirmūlayati 
kṣetrajñānām iti | nanu vṛttau jñāne bahiravabhāsanarūpe ityanena 
aiśvarasargo na spṛṣṭa eva, tatra ko'bhiprāyaḥ,- iti nirūpayati 
īśvaradaśā iti | na asau kācit

(page 330)

tṛtīyā daśā yena pṛthakparigaṇanaṃ saheta | sarvānuyāyinī hi sā saṃvit 
paramaśivasaṃvidiva, tena tatra kathamābhāsacintā pṛthak bhavediti 
tātparyam | tasya iti pramātrantaraikībhāvasya | uktam iti cittattvasya antaḥ 
iti vṛttigranthena | etadeva saṃvādayati ata eva iti | yadetaduktaṃ 
pramātrantaraikībhāvaḥ krameṇa sṛjyate bhagavatā iti, tata 
etadupapannam | yaducyate sarvatra āgame 

	pravṛttirjantūnāmaiśvarī

iti | etadeva spaṣṭayati tathāhi iti | kalāśaktyā iti 
kiṃcitkartṛtvopodbalanasāmarthyādicchāviṣayīkṛte iṣyamāṇe 
grāmādāvarthe kāyaspandagamanādikamīśvara eva ābhāsayaṃstathā 
bhāsate iti | sā tāvat iti ekavyavahāramātrarūpā api aiśvarī iti yāvat | 
parato'pi iti uktaivaṃrūpagamanādipravṛttimadhya [mayyeva ka. |] eva 
nirbhāsamānetyarthaḥ | iyaṃ tu vyavahārakāle'pi spaṣṭaiva aiśvarī 
pravṛttiriti darśayati dvicandrādi iti | bahubrīhigarbho dvandvaḥ | tatra 
prathamena padena aindriyiko vibhramo'pareṇa mānasaḥ saṃgṛhītaḥ | evaṃ 
jñānarūpe vyavahāre navāṃ sṛṣṭiṃ pramātrantaramelanena 
kāyapravṛttyā bhramadvayena ca caturvidhāmupapādya kriyārūpe 
vyavahāre vyavasthāmāha ghaṭa iti | tattveṣviva iti tadanantaraṃ 
notpādanam iti etadapekṣayā sādharmyadṛṣṭāntaḥ | 
sādharmyasamarthanāya tu hetuḥ ādisargasṛṣṭatvāt iti | 
dhūmamadṛṣṭvāpi iti anumānāśaṅkāṃ nirākurute | 
prasiddhasmṛtivailakṣaṇyaṃ samarthayate nanvabhhut iti | avasyati iti 
pūrveṇa saṃbandhaḥ nanu kimarthamādipadamiyati nīyate 
pratyakṣasamanantarabhāvivikalpaparigrāhakaṃ

(page 331)

kimiti na vyākhyāyate | atra āha dṛśyamāna iti | nanu 
evamaciravṛttapratyakṣaprabhavo'pi vikalpo dṛśyamānavikalpavadeva 
pūrvakālatvāparisphuraṇādasaṃskāraja eva yukta iti na 
asāvādigrahaṇena saṃgrāhya [saṃgrāhaḥ ga. |] ityāśayena 
pakṣāntaramāha athavā iti sa naisargika eva iti vakṣyamāṇasūtrayoḥ 
svatantravikalpeṣu vikalpanīyārthānāṃ yojanāṃśe paśoḥ svātantryaṃ 
vakṣyate, natu yojyamānāṃśe, nahi ananubhūtaṃ jalaṃ jvalanaṃ ca 
yojayet kaściditi | te'rthā iti tadvikalpyamānārthaviṣayatayā 
yojyamānāṃśaviṣayā vikalpā nirdiṣṭā ādigrahaṇeneti saṃbandhaḥ | 
viṣayaviṣayiṇoratra na vāstavo bhedaḥ,- iti nirūpayitumupacāreṇa 
te'rthā iti tadarthaviṣayā vikalpā mantavyāḥ, 
saṃskārasaṃjño'ntastamovaraṇapracchanābhāsatvena [saṃsārasaṃtaḥ 
ga. |] saṃskāra iti yasya nāma tādṛśo'rthāvabhāsastasmādeva 
āvaraṇāpasaraṇamahimaprabuddhāt jātā, tasya arthābhāsasya yadyapi 
tadānīṃ na pāramārthikaṃ saṃvedanena aikyaṃ suṣuptatayā 
śaktirūpasya avasthānāt tu tamasā varaṇena pṛthagābhāso bhavan na 
bhavet daśīyo ? yataḥ saṃpannastata idānīṃ varaṇavigame sa eva 
pṛthagābhāso'dhunā samunmīlitaḥ,- iti tatpṛthatkaraṇarūpā 
smṛtirityāha | etadeva spaṣṭayiṣyati anubhūtābhāsa ityādinā | 
viśeṣānirdeśāt iti | akartṛkāyāśca kriyāyā abhāvo 
viśeṣānabhidhāne sāmānyasya kartṛtvena pratipattiravaśyaṃ bhāvinī,- 
iti abhiprāyaśeṣaḥ || 9 ||

	nanu bahirābhāsanātmani jñāne naisargikatvena antarābhāsasya 
avyavadhānena bahirābhāsanamityābhāsagataṃ sphuṭatvamityuktaṃ, 
tadanyatra smaraṇādau anyavyavadhinā [vyavadhānāt ka. |] 
bahirābhāsanāt tātkālikatvābhāvādasphuṭatvamābhāsasya,-

(page 332)

iti labhyate eva, tatkimarthaṃ dvitīyamardham | satyaṃ, evaṃ tu 
anubhavavarjaṃ sarvasaṃvidāmeka eva vṛttāntaḥ syāt, naca evamiti 
darśayati sūtreṇa

	sa naisargika evāsti vikalpe svairacāriṇi |
	yathābhimatasaṃsthānābhāsanād buddhigocare || 10 ||

	svairam iti parapreraṇanairapekṣyeṇa svatantratayā yaścarati udeti vyeti 
ca tacchīlaścetaso vyākṣepasātmībhāvāt manorājyādivikalpastatra 
nīlāderantarābhāsamayasya yo bahirābhāsaḥ, sa naisargiko na na bhavati, 
apitu asti | nanu na asau naisargikaḥ, tatrāpi hi tadgavāśvaṃ 
pūrvānubhavaviṣayīkṛtameva vikalpyate iti codye nirūpayati yathā iti, 
śvetaṃ dantadaśakākīrṇakaratrayakalitavadanaṃ dantinamantaḥ 
pramātṛbhūmau sthitaṃ svacchabuddhimakuralakṣaṇe bāhyagocare 
vikalpastātkālikamābhāsayati svecchānusāreṇa,- iti 
saṃsthānayojanāṃśena asya anubhavānusāritvamiti asti naisargiko'sau | 
nāsti iti yojyamāno'pi bhāgaḥ 
pūrvakālāparāmarśādanubhavānupajīvyeva, arthatattvacintayā [tatve ga. 
|] tu prāguktaṃ tathāpi te'rthā iti | anubhavānusāreṇa tu gajanimīlikayā 
ābhāsavastuvāde yathābhāsaṃ vyavasthā,- iti navatvameva yuktamiti 
sūtrārthaḥ | nanu saugatavat kimiha vikalpa eva svatantro yena vṛttau tathā 
uktamiti bhrāntiṃ nirasyati kṣetrajña ityādinā | upacāraphalamāha 
deśādi iti | 
prācyānubhavaviṣayīkṛtavastugatadeśakālapramātrantarasācivyādi-
pāratantryaparākaraṇapravaṇā iyamuktiriti yāvat | tasmāt iti 
ābhāsamānataiva vastunaḥ paramārthaḥ, naca 
asāvasaṃvedyamānāṅgulimoṭanahaṭhāropaṇārhā 

(page 333)

bhavati,- iti bhāvaḥ | vibhāgaḥ iti 
saṃskārajatvatadabhāvayoranubhavasiddho'yaṃ 
viṣayavibhāgo'bhyupagamya ityarthaḥ | anena viṣayavibhāgena yāvati 
pūrvadṛṣṭatānusandhirupayogī, tāvati śabdanagocarīkaraṇīyena | naca 
tāttvikaṃ tannirmāṇamiti sphuṭayati parastāt iti

	pṛthagdīpaprakāśānām..................... | (2|3|7)

iti sūtre | nanu svālakṣaṇyāpattau tadviruddhā sāmānyarūpatā hīyeta, 
tataśca tanmukhena śabdanīyatā yā samarthitā, sāpi vighaṭeta | 
naivamityatra hetumaha tathā iti | nahi nikurumbarūpatve tadrūpatvaṃ 
viruddhaṃ yodharūpatvamiva senātve iti | nityaṃ vyāpakaṃ ca iti 
sakalakāladeśayogāt [sakaladeśayogāt ga. |] | tataśca pūrvadṛṣṭaṃ ca 
tadā dṛṣṭaṃ ca,-iti ekameva tat, natu anusandhānabalāt yatnata 
ekatāneyaṃ, abhilāpasaṃsargasaṃketakaraṇopayogī vikalpapratyayaḥ, 
tadvāsanāprabodhādavabhāsa aindriyikaṃ vijñānaṃ yasya tādṛśaṃ tat 
sāmānyaṃ bhavatīti saṃbandhaḥ | nanu yadi atra aṃśe 
pūrvānubhavasaṃskārajatvaṃ kimanyat tarhi naisargikam | āha svalakṣaṇa 
iti | prāgeva iti pūrvasūtra iva idaṃ pramāṇena upapāditam | ābhāsasāre 
hi padārthavarge ābhāsanakriyaiva prādhānyena vijṛmbhate, tata eva 
kriyāśaktivisphāramātraṃ bhagavato jagaditi kṛtamatayo manyante | 
ābhāsanakriyā ca yāvadapūrvā naisargikī vyavadhānavandhyā 
tātkālikatāliṅgitasphuṭabhāvā vartate, tāvadābhāso'pi sphuṭo'bhinava 
eva | ghaṭasyāpi iha itthameva navatā, na anyatheti darśitametat | ata eva 
pūrvadṛṣṭābhāsamukhena na kutracit paramārthato nirmāṇasaṃkathā 
sāvakāśā, prakāśarūpatayā sarvasya sadaiva svayameva 
paramārthasattve kasyacit 

(page 334)

nirmāṇamityavakāśābhāvāt, ābhāsanakriyāmukhena tu apūrvatvaṃ 
kulagiriprabhṛterapi

	pratikṣaṇamaviśrānta.................. | (sta. ci. 112)

iti kathitayuktyā bhavati,- iti tadapi sṛjyate eveti sadāsṛṣṭyādiśaktiyogo'pi 
bhagavati na na upapadyate iti tātparyam | yat yathā prakāśate, tat tathā 
paramārthasat prakāśa iva, tathāca bhāvānāmapūrvatayā sapūrvatayā 
ca ābhāsanamiti svabhāvahetuḥ | paramārthasattāvyavahāro hi 
tathāprakāśanamātreṇa vyāpto nimittāntarāyogāt | idantā iti 
nālikeradvīpavāsino yadi pṛthivyādyābhāso na viditaḥ 
sattvavastutvābhāsastu svaśarīradarśanasamaye vidita eveti manyate | nanu 
yadā garbhaśarīre prathamamasya sāhā.........ṣaṃvit dehaprāṇaviṣayā 
ahamiti prabudhyamānā dehādikamapi viṣayīkaroti, tadā 
atyantāpūrvatvena tasya dehādisvalakṣaṇasya 
saṃketaviṣayīkṛtatvābhāvāt kathaṃ tatra abhilāpasaṃsṛṣṭatā 
pratyayasya bhavet yataḥ saṃskārajatvaṃ syāt,- iti śaṅkāṃ nikṛntati 
tathāpi iti |

	svabhāvamavabhāsasya.................. | (1|5|11)

iti hi atra prāgupapāditam | idantāvimarśe ikārādisaṃbhedamantareṇāpi 
sahajo'ṅguliniṣkramanirdeśaprakhyo bhagavanmāyāśaktyupapāditaḥ 
samastetaraśabdasaṃkete citrakarmakuḍyakalpaḥ saṃbhavatyeva kṛtakaḥ iti | 
itthaṃ viṣayavibhāgamabhidhāya prakṛtamupasaṃharannanubadhnāti 
evaṃca iti | sāmānyarūpatāyām iti 
anādṛtaparasparasaṃmelanākalitapṛthagbhāvāyāmityarthaḥ | pūrvaṃ 
pūrvaṃ dṛṣṭameva iti pūrvadṛṣṭatāmeva prādhānyena samullikhati, 
yāvadarthasya svatantravikalpaṃ prati kalpanīyatāṃ gatasya yo'vabhāso, na 
asau pūrvānubhūtaḥ | tatraiva tu vikalpe yo yojyamānarūpaḥ 
sāmānyāṃśaḥ, sa na apūrvo, nahica vikalpastatra aṃśe 
svatantro'nubhavavāsanopajīvitvāditi | tatra iti vṛttau svatantravikalpo 
nirdiṣṭaḥ, tasya ca adhikaraṇatvādaupaśleṣikādeśca adhikaraṇasya 
svatantravastudvayaviṣayasya iha asaṃbhavāt, viṣayaviṣayitātmanaśca 
anuktasamatvaprasaṅgādantarbhāvanalakṣaṇavyāpyamadhikaraṇaṃ 
pratīyate,- iti darśayati svatantra iti | 
evamarthasāmarthyādantararthalābhaṃ vyākhyāya 
prakaraṇasāmarthyādapi vyācaṣṭe pakṣāntaraparigrahadvāreṇa athavā iti 
| evaṃ smṛtau iti hi yadatra upasaṃhṛtam antarābhāsaḥ sthita eveti tadeva 
sūtradvayena amunā vibhāgena prakaṭīkṛtamiti tadanusāreṇa vikalpe iti 
sautrī saptamī antararthaṃ prastutamākṣipyaiva vartate, tadanusāreṇa ca 
vṛttāvapi tatraśabdaḥ | vṛttivyākhyānadvāreṇa ca sautramatra tattvaṃ 
vyākhyātaṃ, vṛttivikāsarūpā vivṛtiriti hi uktam, evamagre'pi tatra tatra 
avadhātavyam || 10 ||

	antarābhāsasaṃbhavopapādanaprasaṅgāyātādābhāsavaicitrya-
vicārāt tadapi ayatnasiddhaṃ jātaṃ

	yatsiddhāvanyaprakaraṇasiddhiḥ | (nyā. sū. 1|1|30)

iti adhikaraṇasiddhāntalābhāt yadiha śāstre svātmani 
īśvararūpatāpratyabhijñopāyaprakaṭīkaraṇaṃ nāma mukhyaṃ 
prayojanamiti nirūpayati sūtreṇa

	ata eva yathābhīṣṭasamullekhāvabhāsanāt |
	jñānakriye sphuṭe eva siddhe sarvasya jīvataḥ || 11 ||

	bahiratyantāsattvādananubhūtasya samyagullekhanaṃ 
nirmāṇapūrvakaṃ yadavabhāsanaṃ 

(page 336) 

prasaṅgavaśena darśitam, asmādeva hetoḥ sarvasya brahmāderapi 
kīṭaparyantasya [kīṭaka ga. |] vedyarūpadehādyātmamānitayā 
prāṇadhāraṇavato jīvato jñānaṃ avabhāsanātmakaṃ, kriyā ca 
svollekhanirmāṇarūpā [ullekha ka. |] svātantryeṇeti śaktiyugalakamapi 
siddhamiti | tadidānīṃ suṣṭhutamāṃ dṛḍhībhūtaṃ yadavocāma-sarvasya 
ātmā maheśvaro jñānakriyāyogāt-iti,-iti sūtrārthaḥ | sarveṣām iti 
bahuvānopakramam | aiśvaryam iti ekavacanaṃ pāramārthikamadvayameva 
māyīye satyapi dvayāvabhāse iti darśayati | yato bahirābhāsīkriyate, tato 
bahiṣkriyetyādi,- iti saṃbandhaḥ | atraiva ca madhye asyaiva hetvarthasya 
vyatirekadvāreṇa spuṭīkaraṇaṃ nanu [natu ka. |] iti | vṛttiyojanaṃ ca 
etatmadhya eva, tadāha ityādi | yathā iti yena prastutaprasaṅgaprakāreṇa 
idamāyātaṃ-yat kṣetrajño na kevalaṃ smṛtyaiva buddhibhūmau 
vedyatvena bāhyatvena arthamābhāsayati, yāvat 
svatantravikalpanavyāpāreṇāpi- iti, tena prasaṅgaprakāreṇa yadartho'yaṃ 
śāstrārambhodyamaḥ, so'pi 
īśvararūpatāpratyabhijñāpanopāyanirūpaṇakramo'vasito labdhaḥ | 
katham | āha anena iti svatantravikalpanātmakavyāpāraprakāreṇa 
uktenetyarthaḥ | siddheḥ samuccayo'nyadapi pūrvaprakṛtaṃ siddhaṃ na 
kevalamavidūraprakārantamiti yaḥ, sa cena vṛttau dyotyate | sūtre tu iti 
evakāreṇa ayaṃ siddhisamuccayaḥ kṛto'taḥśabdasahāyena | ataḥśabdena 
hi pūrvasūtrahetutā na tyaktā,- iti sūcitam | evaśabdena tu atra hetutāṃ 
gacchanneva ayamarthaḥ sādhyāntaraṃ prasādhayati, natu tatra 
hetvantaramabhidhānīyamiti hetvantarābhidhānāvakāśavyavacchedaṃ 
dyotayatā siddhisamuccayaḥ kriyate iti | sarvatra iyam ata eva ityasya 
gamanikā mantavyā | pravṛttiviśeṣaiḥ iti |

(page 337)

tiryañco'pi hi akasmādeva trāsaharṣayuktā iva

	buddhipūrvāṃ kriyāṃ dṛṣṭvā..................... |

iti nyāyena | śrīmadbhaṭṭapradyumnapādaiḥ 
saṃvicchaktiprasaramātratāṃ ṣaṭtriṃśattattva(ktvyā)mupapādya yat 
vitatya vikalpapratibhāsanasya svātantryamuditaṃ, tatra etatsūtrārtha eva 
sāramiti mantavyam | tadevamiyatā jñānasmṛtiśaktyoranugrāhikā 
apohanaśaktirvitatya samarthiteti śivam || 11 ||

iti śrīmahāmāheśvaraśrīmadācāryābhinavaguptapādaviracitā-
yāmīśvarapratyabhijñāvivṛtivimarśinyā-
mapohanaśaktivimarśaḥ ṣaṣṭhaḥ || 6 ||



(page 338)

atha saptamo vimarśaḥ |

	svaprasarapreṅkhitavilasadūrmisaṃkṣubhitacidrasāpūram |
	amṛtasyandanasāraṃ bhairavasaṃvinmahārṇavaṃ vande ||

evamamunā vimarśatrayeṇa jñānasmaraṇāpohanaśaktayaḥ 
prādhānyena nirṇītāḥ, śaktimatsvarūpaṃ tu yadatra spṛṣṭamiva, tat 
tāsāmeva svātantryāpasāraṇena śaktitvameva samarthayitum | idānīṃ tu 
tacchaktyāśrayo'sti, sa ca 
tacchaktisaṃyojanaviyojanaviśramaṇatiraskaraṇaprathanādisvācchandya-
sāratayā maheśvararūpo, natu 
dahanapacanāsvedanādiśaktyāśrayajaḍaprayahutavahasthānīyaḥ,- iti 
yadubhayaṃ

na cedantaḥkṛtā...................... | (1|3|7)

ityatra sūtre sūcitaṃ, tat nirṇetavyam | tatra āśrayamātraṃ tāvadasti,- iti 
nirṇayāya

	yā caiṣā pratibhā................. |

ityādi

	.........................vyavahāro'nubhūyate |

ityantaṃ ślokacaturdaśakam | tatra ekena āśrayasya svarūpamātreṇa 
abhidhānam | tato'pi dvayena sati ekatra āśraye vyavahāra upapadyate, na 
asati,- iti krameṇa anvayavyatirekopapādanam | vyavahāraśca 
pramātṛniṣṭho'pi bhavan bhāvarūpatāviśrāntiḥ 
kāryakāraṇabhāvātmā ślokena uktaḥ, pramātṛviśrāntiparamārtha eva 
tu yaḥ smaraṇalakṣaṇaḥ, so'pi ekena; sarvavyavahārānuyāyī tu 
satyāsatyapravibhāgalakṣaṇo vyavahāraḥ ślokāṣṭakena; ekena 
piṇḍārthasya nigamanamiti | atha pratisūtramartho nirūpyate | yaduktaṃ-
sarvasya

(page 339)

jīvato jñānakriye siddhe iti, tat katham, jñānakriyayorāśrayo hi 
vaiśeṣikadarśane dūṣita eva

	tato bhinneṣu dharmeṣu.................. | (1|2|6)

ityatrāntareva, tadāśaṅkya svadarśanānusāreṇa 
tamekamāśrayamupapādayiṣyan svarūpatastāvadupakṣipati

	yā caiṣā pratibhā tattatpadārthakramarūṣitā |
	akramānantacidrūpaḥ pramātā sa maheśvaraḥ || 1 ||

	pratibhāti ghaṭa iti yadyapi viṣayamupaśliṣyantī iyaṃ kriyā lakṣyate, 
tathāpi na asya tat svajyotiḥ; kintu saṃvedanameva tat tathā bhāti māṃ prati 
bhātīti pramātṛniṣṭhatayaiva sphuraṇāt | yacchrutiḥ 

	tameva bhāntamanubhāti sarvam | (ka. u. 5|15)

ityādi | tata eva bhaṭṭacandrānandena 

	paśyato rūpamālekhādbhāto bhānānuṣaṅgi yat |
	pratīpabhānaṃ pratibhā bhāvānām..................... ||

iti bhāvadharmatvena abhidhāya api ātmasaṃśrayā iti 
saṃvidviśrāntataiva uktā, kevalaṃ viṣayollekhānuṣaṅgāt 
saṃvedanarūpameva tatpratibhānaṃ bahiḥ sakramatvādidharmādhāratāṃ 
dhatte | ataśca sa sa iti kramākramādicitrarūpo yaḥ padārthānāṃ 
vastūnāmaiśvarasvātantryarūpadeśakālaśaktyutthāpitaḥ kramo 
deśakālaparipāṭī, tena rūṣitā upahitā 

	kevalaṃ bhinnasaṃvedya....................... | (1|5|21)

iti kathitanītyā yā pratibhā eṣā iti sarvasya sadaiva svaprakāśā 
vastutaśca antarmukhena vapuṣā deśakālakalanāvaikalyāt 

(page 340)

akramā sa eva bhagavān anantacidrūpaḥ 
deśakālādiparicchedavirahitasaṃvitsvabhāvaḥ pramāṇapramitisamūhasya 
yathārucisaṃyojanādikaraṇasvātantryayuktaḥ 
śuddhāhaṃpratyavamarśamayaḥ kalpiteśvarāṇāṃ 
brahmaviṣṇvādīnāṃ svāṃśābhiṣekopakalpitaiśvaryo maheśvaraḥ 
pramātā | sā ca pratibhā anapahnavanīyā,- iti antarmukhena vapuṣā 
āśrayaḥ siddha eva | na atra yatnāntaramāstheyamiti cena dyotayati | 
sūtrārthamavatārayati yāvacca iti | cārtho vyākhyātaḥ | yat 
kiñcidābhāsate, tasya antarmukhaṃ yadavabhāsanaṃ; sa ātmā pramātā, 
sa evaca svabhāvaḥ, tadevaca aiśvaryamiti saṃbandhaḥ | cārthameva 
pūrvavastusiddhāvasya ayatnasiddhatvamityevaṃvidhasamuccayalakṣaṇaṃ 
nirūpayituṃ pūrvoktamanubhāṣate saṃkṣepanigamanena tadevam iti | tatra 
iti evamupapādite sati | kramapadenaiva bāhyatā ākṣiptā | sā ca

	ubhayendriyavedyatvaṃ tasya kasyāpi śaktitaḥ | (2|4|4)

ityatra māyāpramātṛkaraṇagocaratvābhimānabhūmitvameva,- iti vakṣyate 
| tat darśayati buddhyakṣa iti | buddhyakṣaśabdena antaḥkaraṇamapi 
draṣṭavyaṃ, manogocaro'pihi bāhya eva | ata eva iti etadeva bāhyatvaṃ 
pratipādyatvena abhisandhāya ābhāsaśabdena uktam | kathaṃ tadanuktau tat 
pratīyate | āha bahīrūpatvādeva arthatāpradhānatvamevetyato 
hetorābhāsatāsvīkāre tat pratīyate iti yuktam | yā pratibhā iti upakrame 
seti vaktavye puṃnirdeśasya ka āśaya iti bāhyāvabhāsa iti | cittattvasya 
yā antarakramābhāsatā, sā lokasya [loke'sya ka. |] 
māyāśaktivimohabalāt na siddheti vidhīyate siddhaṃ kramikaṃ 
bāhyāvabhāsamanūdya yā

(page 341)

ityanena | naca tāvatmātrataiva vidhīyate yena seti bhavet, kintu pramātā 
maheśvaraḥ sā [sā ca ka. |] pratibhā iti 
pramātṛtvamāheśvaryābhyāmupacitā labdhaparipoṣā, tata eva 
upacayabalādeva ucitaḥ puṃstvanirdeśaḥ | vṛttau tu iti phalanirūpaṇaṃ 
vṛttau kṛtamiti na yacchabdo 
vidhāsyamānadharmādhāratādyotako'nuvādakatvena upāttaḥ, nāpi 
dharmādhāratābhisandhānapātrīkṛtapūrvarūpaniṣṭhavivakṣita-
dharmāntarādhāratādyotako vidhāyakatvena tacchabdaḥ | naca sarvathā 
sautrau vidhyanuvādau spaṣṭāvityāha [na spaṣṭau eva ga. |] evakāreṇa iti | 
sa eva ātmeti hi ukte anyaḥ kaścidātmeti śaṅkā yāvat galati, tāvat 
vidhānaṃ phalakṛtameva bhavatīti | ābhāsa eva ātmā iti vṛttigranthaṃ 
saṃgamayati āśaṅkāṃ śamayan yadyapi ityādinā | nanu antarmukhatvāt 
yasya na kālayogaḥ, sa kathaṃ sarvasaṃvitkālavyāpī iti uktaḥ | atra āha 
athaca iti | uktam iti vṛttau sūtre ca | nanu yadi sa eva itthaṃ sphurati 
tacchaktivikāso viśvamiti, tarhi alaṃ tatpratyabhijñāmupadiśya | atra āha 
kevalam iti | evaṃbhūtaṃ yadarthānāṃ krameṇa 

	kintu naisargikaḥ............................ | (1|6|9)

ityādisūtradvayadṛṣṭyā avabhāsanaṃ, tasyeti samastaṃ padam || 1 ||

	evaṃ pratijñātaṃ śaktimatsvarūpamupapattyā 
upapādayitumanvayaṃ tāvadāha sūtreṇa

	tattadvibhinnasaṃvittimukhairekapramātari |
	pratitiṣṭhatsu bhāveṣu jñāteyamupapadyate || 2 ||

saṃvinniṣṭhā viṣayāṇāṃ vyavasthitayaḥ |

(page 342)

iti yat ghoṣyate, na tat bhinnāsu saṃvidrūpāsu pramāsu viśramaṇamātraṃ 
mantavyam, tāvatā hi na sidhyati vyavahāraḥ, apitu tāstā 
nīlasukhādiviṣayeṣu vibhinnā yāḥ saṃvido niścayāntāḥ, tānyeva 
mukhāni upāyāstairnadīsrotaḥsthānīyairnenīyamānā [unniyamānā ka. 
|] haṭhavāhenaiva ahamityekamahāsaṃvitsamudre yadā ābhimukhyena 
viśrāntiṃ yānti, tadā eṣāṃ jñāteyaṃ parasparaṃ 
svasvāmitākāryakāraṇabhāvādiḥ samanvayo vyavahārātmā upapattyā 
ghaṭate | jñātīnāṃ bhāvo jñāteyam, karma ca eṣāṃ parasparaṃ 
jānīyuriti, tadeṣāmanyonyayogakṣemodvahanena [tadānyonya ga. |] 
samanvayo lakṣyate, paramārthataścidrūpatāprāṇa eva ayaṃ yukta iti 
nirūpayituṃ gamyamānavyatirekamukhena sūtramavatārayati yāvat iti | 
nipātāvetau yaditi [yadīti ga. |] taditi cārthe | athavā 
kālaviśeṣāvadhinirūpaṇāya parimāṇaśabdau | 
evaṃvidhābhyupagamakālāvadhi na samanvayavyavasthānaṃ 
samarthayituṃ śakyamiti aikadhyam iti pramātṛrucitaḥ katipaye kecideva 
kadāciditi bhāvaḥ | samānajātīyatvāt iti | anena sāṃkhyādīnāṃ 
bhinnavyāpakacinmātrapuruṣavādināṃ mokṣāvasthāyāṃ 
kathaṃkāraṃ bhidyeran puruṣāḥ svarūpadeśakālavaicitryāsaṃbhave 
sati,- iti āveditam | anyonyamelanaṃ pramātṝṇāṃ prameyānāṃ ca 
bahuśākham | vyavahāro vyavahārāntarānubandhī,- iti 
viśeṣābhiprāyeṇa saptamīsamāsaḥ, sāmānyarūpatāśrayeṇa 
abhedāśayena karmadhārayo vivṛtaḥ | naca ābhāsajīvitabhāvavāde 
vyavahārasya avastutvamābhāsamānatvādeveti darśayati tataḥ iti || 2 || 

	nanu sarva eva samanvayaḥ kāryakāraṇabhāve viśrāntaḥ, sa ca 
bhinnānāmeva bījāṅkurāgnidhūmādīnāmityāśaṅkya sūtreṇa 
prāguktamanvayavyatirekābhidhānadvāreṇa 

(page 343) 

prasaṅgadiśā prasaṅgaviparyayalābho bhaviṣyati,- iti upodbalayati

	deśakālakramajuṣāmarthānāṃ svasamāpinām |
	sakṛdābhāsasādhyo'sāvanyathā kaḥ samanvayaḥ || 3 ||

	anyathā iti yadi ekapramātṛviśrāntirna upagamyate, tadā arthānāṃ 
nīlasukhādīnāṃ tajjñānānāṃ tanniścayānāṃ ca deśataḥ kālataśca 
krameṇa bhinnānāṃ svarūpamātrapariniṣṭhitānāṃ ca kaḥ samanvayaḥ | 
naiva kaścit | sahi samanvayaḥ sakṛdābhāsena [ābhāsane ga. |] 
deśakālasvarūpābhāsayojanaikyābhāsena sādhayituṃ saṃpādayituṃ 
jñāpayituṃ śakyaḥ, na anyathā | sakṛcchabdo bhedaniṣedhatātparye 
prayuktaḥ | sūtrārthaṃ saṃkṣepeṇa upakṣipati paurvāparyādinā iti | 
kathamiva syāt samanvayaḥ, na kathaṃciditi | anna ayaṃ hetuḥ- 
kramavattvalakṣaṇāt paurvāparyapathāt 
deśakālabhedādādipadākṣiptācca svarūpabhedāt | etacca na 
asiddhameṣāmiti vyākartuṃ sūtrānusāraṃ punaḥ sāmānādhikaraṇyena 
vivṛṇoti deśa ityādinā | evaṃ vyācakṣāṇaḥ sūtrapadānāmapi 
ubhayathā yojanā kartavyeti śikṣayati | yadivā paurvāparyaṃ 
kāryakāraṇabhāvaḥ, ādiśabdaḥ prādhānyavācī | tadayamarthaḥ-
kāryakāraṇabhāvaprādhānyena yaḥ saṃbandhaḥ iti ucyate, tatra 
saṃgatyā bandhanamanyonyāparityāgaḥ ityayameva artho na ghaṭate | yadi 
ityādinā na anyathā iti sautraṃ vivṛṇoti tadā iti vyavahārakāle | 
ābhāsasāraṃ yāvadābhāsaṃ bhāvānāṃ tattadrūpamiti hi uktamasakṛt 
| vyavahārāpekṣayā iti yaduktam, tadeva sphuṭayati 
pramātṛvyāpāratvena iti | bhāvavācinyā iti kriyāvācinyā | 

(page 344)

bhāvaśabdena parispandamānasādhyasādhanavyāpārarūpatāmapi āha | 
nanu kimarthamayaṃ vṛttau bhedena nirdeśaḥ kṛtaḥ | āha svarūpa iti 
svarūpe ābhāsane prakāśananiścayanarūpe yat bhedapratipādanaṃ, 
tadāśaṅkāśamanāya | nanu evamapi deśakālabhedāt samanvayo 
bhaviṣyati, kimekapramātṛviśrāntyā,- ityāśaṅkāyāmāha avabhāsa iti 
| nanu etāvatā svasamāpinām iti vyākhyātaṃ vṛttikṛtā, natu prakhyaḥ ? 
pādaḥ na na vartita ityāha avabhāsabhedādevaca iti | vakṣyate iti

	kramo bhedāśrayo bhedo'pyābhāsasadasattvataḥ | (2|1|4)

ityatra | abhedamayaḥ iti svarūpataḥ | abhedāvabhāsa iti saṃvedanataḥ | 
svarūpābhedaprāṇo deśābhedaḥ iti | etadeva sphuṭayati svarūpameva hi 
iti | tadavaṣṭambhayogāt tu ādhāro'pi deśa iti vyavahriyate | 
bhedābhedamaya eva tarhi artho'ṅgīkriyatām, naitaditi brūte naca iti | tat iti 
pūrvavākyārtharūpaṃ virodhādayuktatvam | ekapramātṛmayatvam iti 
kartṛpadam | agre iti kāryakāraṇabhāvasmaraṇabhādhādisamarthanā-
vasare | so'bhinna ityādivṛttiḥ kaṃ sūtrāṃśaṃ vartayati,- iti nirūpayati 
etacca iti | anyena prakāreṇa kaḥ samanvayaḥ iti yat sautraṃ, tatra 
anyaśabdena yaḥ prakṛtaḥ prakāra ākṣiptaḥ; so'nena vṛttigranthena vartita 
ityarthaḥ || 3 ||

	kaḥ samanvaya ityuktaṃ, tatra bahuvyāpī kāryakāraṇabhāva eva 
tāvat parīkṣyate sūtreṇa

	pratyakṣānupalambhānāṃ tattadbhinnāṃśapātinām |
	kāryakāraṇatāsiddhihetutaikapramātṛjā || 4 ||

	iha agneranupalambhe dhūmasya anupalambhaḥ, tato'gneḥ 
pratyakṣatayā 

(page 345)

upalambhe'pi tatkāla eva anupalabdhasya dhūmasya anantarakṣaṇe 
pratyakṣībhāvādupalambha ityevaṃ pratyakṣadvayamanupalambhatrayaṃ 
ca,- iti pratyakṣānupalambhapañcakaṃ prasādhya 
anvayavyatirekasiddhiparamārthāṃ kāryakāraṇabhāvasya 
prasiddhimabhimanyante | tacca eṣāṃ manorathamātram | tathāca 
agnipratyakṣeṇa agnirasti,- iti niścīyatāṃ, dhumapratyakṣeṇa api dhūmaḥ, 
anupalambhairapi dvayābhāvo dhūmābhāvaśca,- iti vyavahriyate | tadete 
pratyakṣānupalambhā vahnirdhūmo vahnyabhāvo dhūmābhāvaḥ ityevaṃ 
prātipadikārthamātraniścayaniṣṭhā ghaṭaḥ paṭaḥ iti yathā | tadete 
tasmiṃstasmin bhinne aṃśe bhāge nipatanaśīlāḥ, sati agnau dhūmo, 
vahnyabhāve dhūmābhāvaḥ,- 
ityevaṃbhūtasaptamyarthasvabhāvamapekṣālakṣaṇaṃ 
kāryakāraṇabhāvamanvayavyatirekasatattvaṃ kathaṃ niścinuyuḥ | 
asmaddarśane tu uktapratyakṣānupalambhasroto'nusāreṇa tāni tāni 
prameyāṇi ekacitsindhusaṃdhukṣaṇasakṣaṇāni yatastataḥ ekībhūtāni 
pramātṛsvātantryotthāpitāpekṣālakṣaṇasvarūpavailakṣaṇyāni, natu 
dvandvapadārthasadṝṃśi pramātrā bhāsyante | tathābhāsyamānataiva 
kāryatā, kāraṇatā ca tathābhāsanam | kāryatāṃ vṛttau pūrvaṃ 
vyācaṣṭe; paratastu tattat ityādisūcitāṃ paradarśane tadanupapattim,- iti 
tātparyaṃ vṛtteḥ | padārthaṃ tu vivṛtikṛdeva yojanāpakṣe [pekṣaṃ ka. |] 
yojayiṣyati bahutaravyāpitvaṃ sūcayituṃ, avatāraṇe'pi- śabdo 
bhinnagrahaṇena idamāha- yadeva ekaṃ sādhayitumanviṣyate pramāṇaṃ 
pratyakṣādi, tadeva kramikaṃ svayaṃ bhinnaṃ bhavadekaprameyasiddhiṃ 
kathaṃ vidadhīta viruddhatvāt,- iti tasya aikyāpādane yatanīyaṃ, 
pramātṛtattvamevaca tāvataḥ pratyakṣāderekamantarmukhaṃ 
svasaṃvedanarūpaṃ bhavadutsahate vihantumanekatām | utpattiḥ kāryatā, 

(page 346)

utpādanaṃ kāraṇatā, tadubhayamapi bhāvasya bhāvarūpatāṃ muktvā 
na abhyadhikaṃ kiṃcit sattāyāṃ veti vakṣyate 

	yadasat tadasat............................. | (2|4|3)

ityatra prakaraṇe

	naca yuktaṃ jaḍasyaivam......................... | (2|4|19)

ityantena granthena | āpādya prāpya iti pratyakṣādīnāmeva kartṛtvam | 
parapakṣe tu anupapattirasya arthasyetyāha yadā tu iti | svaviṣayābhāsam 
iti | svaṃ vyavahārayati iti tadvyavahārakaṃ vikalpamutthāpayatītyarthaḥ | 
evakāraḥ kiṃ punaḥ iti vakṣyamāṇāt dūrāpetatāṃ 
buddhāvunmeṣayati, agnyabhāve hi asti tāvat 
nāmagrahaṇamagnerityāśayaḥ | tadā iti agnyabhāvavyavahārakālasya 
sūcanaṃ, natu tatparāmarśanaṃ, tathāhi sati dāpratyayayogo na yujyeta | 
atra bauddhiyaṃ siddhāntamāśaṅkate atha ityādinā kṣatiḥ kācit 
ityantena | na kāryakāraṇabhāvaḥ kaścideko'sti yaṃ prasādhayituṃ 
pratyakṣānupalambhā ekapramāṇīkartavyā yatneneti tātparyam | ata eva iti 
yato yathādṛṣṭo'vasīyate, tata ityarthaḥ | yathādṛṣṭaḥ iti supsupā (2|1|4) 
iti samāsaḥ | vikalpena aneko'pi artho yata itthamavasīyate,- ityato hetoḥ, tena 
kāryakāraṇatā avasitaiva bhavatīti saṃbandhaḥ | nanu evamavasāyādeva 
kathaṃ sā avasitā bhavet,- iti bhramaṃ hetunirūpaṇena śamayati yasya hi 
iti agneḥ | yadīyasattām iti dhūmasattām | nanu agniśca dṛṣṭo, 
dhūmaśca; prayojyaprayojakabhāvastu kva viśrāntaḥ | āha evam iti | 
tasmāt iti yataḥ paścāttanaṃ na prayojakaṃ, nāpi samānakālaṃ; tasmāt 
| yathādṛṣṭam iti avyayībhāvo'tra 

(page 347)

darśanānatikrameṇetyāha | nanu kṛttikodayaḥ pūrvaṃ niyamena, tato'pi 
rohiṇyudayaḥ ityādau syāt kāryakāraṇatā | atra samādhiḥ notpattiḥ iti | 
āgamāt hi nakṣatrarāśicakraṃ dhruvanābhipratibaddhaṃ sthitameveti 
avagataṃ, tadunnataparvatasadbhāvāsadbhāvayośca tirodhānātirodhāne ca 
candrārkatārāderupalabhyate eva | nanu anavabhātamapi upapattyā 
sādhanīyamindriyādṛṣṭādikamevetyata āha upapadyate vā iti | 
anupapadyamānamapi upapatteḥ kaṃcitkālamalābhāt 
jñātabhāditārthakriyākaṃ satyamaṅgīkriyate, iha tu na tathā,- iti brūte 
upayujyate vā iti anālocitopapattikamanavalokitārthakriyākamapi 
dākṣiṇātyasya iva karabhacakramabādhitānubhavasiddhi na na śraddheyam, 
atratu naiṣa vidhiriti darśitam | avabhāti iti, avabhāsamānasya upari 
bādhakabhāvalakṣaṇopapattiḥ sadbhāvasthairyaprasādhako vā 
upayogo'bhidhānīyaḥ ityāśayaṃ vaktum avabhāti ityatra 
uttarasamānakaṣyatāsaṃbhāvanāṃ bhaṅktuṃ vāgrahaṇaṃ na kṛtam, 
anyathā trīṇi vā vāgrahaṇāni ekameva vā,- iti yuktaṃ syāt | nanu 
dhūmaśca agniśca bhinnāveva dṛṣṭau, tayorvikalpe'pi [vikalpopi ka. ga. |] 
bhinnarūpatāmeva vyavaharatu nāma | ekaṃ [evaṃ tu ka. |] tu 
kāryakāraṇabhāvaṃ kathaṅkāraṃ vyavaharet vikalpasya punaḥ iti 
arthabalotpannaṃ darśanaṃ kāmameva na kuryāt,- iti punaḥśabdena 
viśeṣadyotakena sphuṭayati | yadi bhaviṣyadvākyārtharūpaṃ 
vibhaktānāṃ daṇḍapuruṣādīnāṃ saṃśleṣeṇa yojanaṃ, 
avibhaktānāṃ ca guṇaguṇyādīnāṃ vibhāgena yojanaṃ parāmṛśati 
svabhāvavattāvidhānāya ayamiti vikalpaḥ ekābhilāpa iti 
kāryakāraṇabhāvo'nayoḥ,- iti 

(page 348)

saṃketakalpitena ekena abhilāpena tāveva dvāvarthau yataḥ parāmṛśyete, 
tata eva tathāparāmarśāt bhrāntinimittāduditabhramāḥ saṃbandhamekaṃ 
vastusantamabhimānabalena kalpayanti | nanu na atra vanapratyaye gavādaya 
iva agnau dhūma iti agnidhūmādayo'nyonyanirapekṣā eva bhānti, apitu 
parasparamapekṣamāṇatvamapi teṣāmatra bhātyeva, tata eva 
prātipadikārthavilakṣaṇa eva atra saptamyartharūpaḥ eko'rtho bhāti, tat 
kathamuktam anekaṃ dṛṣṭapūrvam iti | etat nirasyati yāpica iti ityādinā | 
lakṣyate iti anantaramivaśabdena tasyā aparamārthasattvamāha 
abhimānabalopakalpitameva tallakṣaṇaṃ yataḥ | yathoktaṃ

	............................ṣo'san kathamapekṣate |

ityādi | sāpi iti lakṣyamāṇākāreti yojyam | ete iti vikalpāḥ | 
pratītimātraṃ pratyayaśūnyasāramasyā [śūnyaṃ sāmarasyā ga. |] 
buddheḥ, tato'syāḥ pratyayaḥ pratibhāsanakāla eva uttiṣṭhati, tata eva 

	satyeva pratibhāse vastuni bhāsate param |

iti pratibhāsadharmo'yam kutaścit iti

	bhāvabhedapratītyarthaṃ saṃyojyante'bhidhāyakāḥ |

iti nītyā prasiddhaśirorūpatāpratipādanāya rāhoḥ śira iti 
ekārthakriyākāritvapratipādanāya ca gaurgauriti | nanu yadi vikalpitāt 
tathābhūtāt prayojanaṃ kiṃcit sidhyati, tarhi artha eva asau | atra 
siddhāntayati tathābhūte iti | taimirikadṛśyamāno'ruṇo'pi dīpo nijenaiva 
vapuṣā arthakriyāṃ vidhatte, natu bhramotthāpitena; tadvadihāpīti | nanu 
avasāyaviśrāntāḥ sarve pramāṇavyāpārāḥ, avasāyaśca 
vikalpanasvabhāvo'rthanirapekṣajanmā

(page 349)

na vastutattvaspṛgiti tanmukhena avisaṃvādakatvaṃ nāma 
yatnasamarthitamapi gajasnānīkṛtaṃ syāditi parāśaṅkāmamunaiva 
śamayati tathābhūta iti | prāpakaṃ hi pramāṇaṃ, tadapi 
prāptiyogyavastuviṣayapravṛttisaṃpattyupayogipratītisvabhāvameva ucyate | 
tataśca avasāyo yadyapi upaplutaḥ, tathāpi prāptiyogye vastvaṃśe avasite 
pramāṇasya prameyasya vyavahārasya ca 
viṣayaviṣayibhāvasmaraṇādabhilaṣitapravṛttervastuprāptiparya-
vasāyinyāṃ pravṛttau kartavyāyāṃ na kācit khaṇḍanā antarālavartini 
pravṛtteḥ pūrvabhāvini pramāṇavyāpāravyavahāritvācca 
pradhānabhūte satyapi upaplutasvabhāve vyavasāye | atra ucyate iti 
sidhāntaḥ | atra ca idaṃ tātparyam- iha prakāśasya vimarśāviyuktasyaiva 
prāmāṇyāt vimarśabalena sarvameva pramāṇamanyasaṃbaddhameva 
prameyaṃ paricchinatti, na śuddhamiti saṃbandhaḥ | na avabhāti iti 
asaṃbaddhaṃ vacaḥ | tathāhi- kvacit prameyaṃ tajjātīyena, kvacit 
vijātīyena prameyāntareṇa saṃvalitameva bhāti | sarvatra ca 
pramātṛrūpasaṃvalanā nirbhāsate eva | naca sā abhedaḥ, abhede hi kaḥ 
saṃvalanārthaḥ; naca bheda eva saṃvidbhūmāvabhedasmaraṇāt | 
ekāntabhede'pihi kaḥ saṃvalanārthaḥ | ato bāhyādrūpādārabhya 
pramātṛviśrāntiparyantaṃ yat bhāvasya vapuḥ, tatra asya bhinnatā 
avabhāti, tadvaśādaṃśenaivaca [taśādaṃśenaiva ca ga. |] abhinnatā, 
saivaca saṃbandharūpatā, tadasau bhātyeva, tathaivaca pramāṇena āveditā 
arthyate ca pramātṛbhiḥ | evameva bhāvatattvam iti, yat yathā bhāsate, tat 
tathā paramārtha iti hi vitatya āveditam, āvedayiṣyate ca | 
yāvacchabdo'nyatra ayatnasiddhaṃ sādhyamiti upakṣipati | etadeva 
nirvyūḍhamiti dyotayituṃ yatra punaḥ 

(page 350)

iti | nipātasamudāyena amumeva arthaṃ spaṣṭayiṣyati | ukte'sminprameye 
balādeva idamāgacchatīti | prameyasamuccaye caḥ | sakalo ya 
idaṃśabdavācyatāyogyo niyatadeśakālākārarūpaḥ, tena saha 
yadabhinnatvaṃ; tadupalakṣitā eva avasīyante idamityavasāye ghaṭa 
ityavasāye [avyavasāye ga. |] ca sakalapṛthubudhnādyabhedena | yaduktaṃ

	niyate'pyayamityeṣa parāmarśaḥ puraḥsthite |
	sarvabhāvagatedantāsāmānyenaiva jāyate ||

iti apohatattvavicāre | nahi tadānīṃ bheda eva bhāti | bhedo hi 
itthamābhāseta yadi dṛśyābhimatasvalakṣaṇāpekṣayā yāni 
svalakṣaṇāntarāṇi, tāni svālakṣaṇyena tadā bhāseran, yadivā 
tiraskriyeran, tattiraskāre dṛśyasyaiva avabhāsanāt, naca bhānti tāni, nāpi 
tiraskṛtānīti tadṛśyasādbhūtānyeva | atraiva upapattimāha anyathā iti 
yatsaṃketakaraṇakāle yat na ābhātaṃ, tat tacchabdāt na avasīyate 
[anumīyate ka. |] gauriva ghaṭaśabdāt, avasīyante ca idaṃśabdātsakalāḥ 
puraḥsthitaniyatavyaktayo ghaṭaśabdācca pṛthubudhnodarākāravyaktayaḥ,- 
iti tatsaṃketakaraṇāvasare eva na na bhānti | tadanavabhāsanasya hi 
viruddhaṃ yat tadavabhāsanaṃ, tasya yat kāryaṃ pāramparyeṇa tataḥ 
śabdāt tadarthādhyavasānaṃ; tadiha upalabhyamānaṃ 
svakāraṇaviruddhasya niṣedhakamiti svabhāvaviruddhakāryopalabdhiḥ | 
evamekākiparāmarśe'pi sāmānyata idamiti madhyamarūpato ghaṭa iti 
ativiśeṣarūpata īdṛśo'yaṃ ghaṭa iti tridhāpi sthite 
saṃbandhāvabhāsamupapādya prakṛte tamayatnasiddhatayaiva darśayati, 
yatra punaḥ iti upakrameṇa tatra iti padena yasyāṃ tattvacintāyāṃ 
kriyamāṇāyāmasaṃbhāvyamapi idamupanataṃ tasyāṃ satyāṃ

(page 351)

sakalaprasiddhaṃ prasiddhameva bhavatīti yojanā | 
punaḥśabdo'saṃbhāvanātmānamiha viśeṣaṃ dyotayati | 
ekaparāmarśa ityanena ābhāsānāṃ ca melanaṃ, 
svalakṣaṇāntarāṇāṃ ceti bahuśākho.yaṃ saṃbandha eva nirbhāsate iti 
sphuṭayati | tata eva āha saṃbandhasiddhau

	bhedābhedātmasaṃbandhasahasarvārthasādhitā |
	lokayātrākṛtiryasya................................................. || (ślo. 1)

iti | vāda iti kathanamātrametat

	sarve bhāvāḥ svabhāvena............................... |

ityādīti yāvat | evaṃ siddhāntamupakrame abhidhāya, pūrvapakṣaṃ 
yadyapi ityādinā anubhāṣya tathāpi ityādinā pratikṣipati [upakṣipati ka. 
|] | pratibhāvikāsagrahaṇena āntaro'sāvabhedāvabhāso, māyīyo 
bhedāvabhāsaḥ iti bhinnaviṣayau bhedābhedāvavirodhināviti brūte | 
ubhayam iti dhūmamagniṃ ca | na anyathā iti saṃbandhapratibhāvikāsena 
hi vinā tacca tacceti syāt, natu ṣaṣṭhyarthaḥ | cārtho'pivā na 
bhavedekajñānāveśe'pi pṛthageva anyonyāpohanasya bahuśākhasya 
unmīlanena niścayāt | avabhāti ceti, ghaṭa iti, bhāvānāmiti, upapadyate ceti 
| samarthayate pramātṛlīna iti pramātṛlagnatvena yadabhinna rūpaṃ, tasya 
aprakāśe bheda eva na pratitiṣṭhet,- iti na ayamabhedo bhedena virudhyate iti 
yāvat | etadeva vastuvyatireke prādhānyena upayujyate cetyatra hetūkaroti 
yāvaddhi iti | pūrṇo bhāvaḥ prathāyāḥ, prathamānasya bhāvasya 
pramātṛparyantaṃ rūpaṃ, prathāyāśca saṃvedanarūpaṃ 
bhāvatādātmyena vartamānaṃ vimarśasvātantryabṛṃhitaṃ ca pūrṇaṃ 
rūpam, 

(page 352)

anyathā kevalādeva prakāśāt sati vyavahāre [vyāhāre ga. pāṭhāntaram 
|] alamadhyavasāyeneti kṣaṇikatvamapi vyavahriyate, avasāyāt vyavahāre 
prakāśarūpatvābhāvāt jaḍo'pi vyavahāraheturbhavediti alaṃ 
saṃvedanena | dvābhyāṃ vyavahāraḥ iti cet, na dvayoryugapadabhāvāt | 
prakāśacchāyayā uparakto'dhyavasāyastathetyapi asat,- sa hi 
prakāśakāryaṃ cet kuryāt, tarhi prakāśa eva asau; kā cchāyā | 
prakāśarūpatāyāṃ ca tadeva prakāśarūpamadhyavasāyamayaṃ ceti 
prakāśa eva vimarśātmā,- iti āyātam | prakāśo'dhyavasāyena 
vyavahṛto vyavahāraheturiti cet jñānamabhidhānaṃ ca vyavahāraḥ | naca 
prathamaprakāśo'dhyavasāyasya jñeyaḥ | sa hi svaprakāśa eva 
paraprakāśatve anavasthāderuktatvāt | abhidhānamapi vikalpanam | tadapi 
prakāśanarūpaṃ cet, punarapi tadeva āvartyam; aprakāśanarūpatāyāṃ 
ca jāḍyamiti uktam; abhimāno'pi tathaiva vikalpyaḥ,- iti alamanena 
kṣaṇikatvavyañjanamiśrīkaraṇakalpitasvacarvaṇayogyatākena 
śuṣkasāṃkhyocchiṣṭena | yat yāvatā hi yuktamarthakriyākāri, tat 
tāvadrūpaṃ nīlamiva nīlatvena | kāryatvakāraṇatābhimānarūpaṃ 
[bhirūpaṃ ka. |] pramātṛviśramaparyantena vapuṣā sarvamarthakriyākāri | 
evamanupagatau na kasyacit kiṃcidrūpaṃ syāt | etacca pade pade 
nirūpitamapi saṃkṣepeṇa avismaraṇāya uktam | nanu tadanavadhāraṇe na 
kiṃcididaṃ prakāśeteti uktam | satyam, na anavadhāritamapitu 
avadhīritamanādareṇa apahastitaṃ bhagavanmāyopakalpitenaiva | 
yadvakṣyati 

	itthaṃ svasaṃvittimapahnuvānaiḥ..................... |

iti | yattat iti anyonyāsaṃbaddhaṃ [saṃbandhaṃ ga. |] viśvaṃ svaṃ ca 
vacanaracanaṃ yadevaca kiṃcit vyākṣepasātmatayā sphuritaṃ, yadevaca 
vicāramantareṇa 

(page 353)

vibhramavikṣobhāderjihvāpatitaṃ; tadeveti | dhīraśabdo vṛttiviṣaye 
bhāvapradhānaḥ | dhairyeṇa ekatra grahikatvādakampatvena [grāhakatvāt 
ka. |] yadavadhūtaṃ, yasya vā dhairyamavadhṛtaṃ; avadhīritamucyate tat | 
nanu bādhakamatra asti,- iti parasya bhramāvakāśaṃ niravakāśayati naca 
iti | agre iti 

	kriyāsaṃbandha................................ | (2|2|1)

iti prakaraṇe | evaṃ pramātrā saha tāvadaikyaṃ sarvatra, dhūmāgnyādau 
tu prameyayorapi asti,- iti upapādya anyatra api tadupapādayati paraspara iti | 
abhinnaḥ śabdo dvandvavṛttimayaḥ | pratyayaśca tadutthāpitā tadutthāpikā 
vā pratītiḥ | aikyamayāḥ aikyaṃ prakṛtaṃ prastutaṃ 
viśrāntidhāmatvena yeṣu, tathābhūtā eva santaḥ tathā iti bhinnā iti 
padāntarasamarpaṇīyena bhedena prathante | nanu dvandvavṛtterayaṃ 
prabhāvaḥ............ vinā bhede'bhidhitsite kā bhavedabhedasaṃbhāvanā | 
atrāpi āha yadāpi iti | pañcamyā tāvat saṃbandhaḥ sūcita eva | 
tadabhāve'pi bhidyamānatvalakṣaṇakriyātmani līnatayā sthitameva 
aikyamiti sarve'rthā vyavahriyamāṇā na saṃbandhadhurāmanadhirūḍhā 
vyavahāravartanīṃ kāmapi nirvāhayeyuḥ | nanu evaṃ bhāvāḥ kiṃ 
kadācidapi na asaṃbaddhā bhavanti | bhavanti,- ityāha kevalam iti | 
unmattānāṃ ye pralāpāḥ śabdā asaṃbaddhāḥ, tathā cetāṃsi 
jñānāni, tata eva vyavahārāya sādhūni bhavanti, teṣāmabhidheyatvena 
jñeyatvena ca viṣayāste krameṇa yataḥ pratibhānti, tataḥ 
parasparamananuṣaktāḥ, jñānena tu pramātṛrūpeṇa anuṣaktā eva, 
yugapacca jñāne tadekapramātranuṣaṅgamukhena anyonyamapi anuṣaktā 
eveti bhāvaḥ | nanu evamanuṣaktatvaṃ 

(page 354)

teṣāṃ kena vyavaharaṇīyaṃ, yadi tenaiva unmattena, tarhi 
ananuṣaṅgātmani ekatra te'pi anuṣaktā bhaveyuḥ | sa ca na unmattaḥ syāt | 
atra nirūpayati te'pica iti unmatto hi na vyavaharteti bhāvaḥ | nāpara iti 
parasparaprāptireva vyavaharaṇamiti hi uktam | tatra saṃbandhasya 
rūpaśleṣādi yat lakṣaṇaṃ dūṣitaṃ pareṇa

	rūpaśleṣo hi saṃbandho dvitve sa ca kathaṃ bhavet |

iti bruvatā, tat samarthitameva bhavatīti darśayati tataśca iti | yataḥ 
parasparaprāptireva vyavahārārthaḥ, tataḥ pramātari śliṣṭarūpāḥ 
padārthā bahavo'pi yāvadaikadhyamāpannā bhavantīti | sarvo hi pramātā 
arthakriyārthī svayaṃ vartamāno nivartamāno vā paraṃ pravartayan 
nivartayan vā vyavahartā tāvat bhavati, natu bhūtādhiṣṭhita iva kaścit 
kadācidāste | tasya vyavaharaṇaikaśīlasya vyavahartumicchā iyamucyate yā 
gamanāgamanayornānopāyaparighaṭanasaṃpādyayoḥ svayaṃ pravartituṃ 
nivartituṃ vā, paraṃ pravartayituṃ nivartayituṃ vā, arthitā 
sukhaprāptīcchayā duḥkhaparihārecchayā vā bhavati, labdhe sukhe 
rakṣāprāptīcchaiva, evaṃ duḥkhābhāve | yā ca asau 
sukhaprāptyādāvicchā pravṛttinivṛttyoḥ svaparagatayorhetubhāvena 
prārambhe vartamānā, tasyāṃ sa sarvaḥ padārthavargo 
vibhāgamavadhūya avatiṣṭhate, yo'sau gamanāgamanayoḥ pravṛttau 
nivṛttau vā upayujyamāno vicitraṃ vibhāgaṃ pratipatsyate | sā ca 
sukhaprāptyādīcchā yāvajjīvaṃ saṃsāripramāturanusyūtaiva āste | 
tataḥ prāpte'pi gamanādisādhye vastuni labdhe'pi sukhaprāptyādau no 
viramatyeva sā | tata eva kāmamaya eva ayaṃ puruṣo dātā ca pratigrahītā 
ca śrutyā nirūpitaḥ | āha ca

	śraddhāmayo'yaṃ puruṣaḥ.................. | (bha. gī. 17|3)

(page 355)

iti | eṣa tu viśeṣaḥ- prathamakoṭau sāmānyataḥ pūrṇāpi kenacit 
prakārāntareṇa [pūrakāntareṇa ka. |] pūraṇīyatvena āste, idamidaṃ me 
amunā upāyatadupāyādikrameṇa bhavatāditi, caramaṃ tu tāvati [tāviti 
ga. |] kiyatāpi pūrṇatvena iyamicchā mama amunā krameṇa pūrṇeti | saiva 
tu bhāvāntarajanyasukhādisaṃpādanābhiprāyeṇa 
pūrayiṣyamāṇatvādapūrṇāpi syāt | yadāgamaḥ 

	lelihānā sadā devī sadāpūrṇā ca sā vibhoḥ |
	ūrmiricchātmikā sā syādātmanaḥ sā taraṅgiṇī ||

iti | nanu vividhaḥ padārthasārthastasyāmavibhāgena vartate iti kutaḥ | ucyate 
sā hi iti | yasmādevaṃ tasmāt yuktā asau sarvasya avibhāgabhūmiriti 
pūrveṇa saṃgatiḥ | sā kāmanā tāvat pramātrā unmeṣyate, satyeva 
viṣayalālasātmanā abhivyajyate; tataśca na andhapadanyāyena uttarottaraṃ 
padamanusarati, paramapi utthāpyamānā satī 
dīrghadṛṣṭipuruṣapadabandhanyāyena [baddha ga. |] yamabhisandhāya 
utthāpitā, tāvantaṃ bahutaramavalihantī ābhogena sarabhasaṃ svīkurvatī 
prathamāvasthāyāmuttiṣṭhati sphuṭībhavati, caramāvasthāyāṃ ca 
tādṛśyeva satī pūrṇā viśrāntarūpā bhavati | yathoktaṃ

	uktā ca saiva viśrāntiḥ sarvāpekṣānirodhataḥ (aja. pra. 23)

iti | abhisandhīyamānamarthamupādeyamapekṣaṇīyaṃ heyaṃ ca krameṇa 
udāharati vahneḥ ityādinā | cāndanādagneḥ sugandhidhūmaḥ 
utpadyatām,- iti yā pravṛttirabhisaṃhitā, rājasvāmikaḥ kaḥ puruṣaḥ iti 
niścīyatāṃ mayeti yā pravṛttiḥ samīhitā yatra avasāyamātrapravṛttyaiva 
upekṣaṇīyatā, kaṇṭakabhujagādimān mā me bhūt deśa iti ca yā tato 
nivṛttirabhisaṃhitā, tayā utthāpyamānā sā 

(page 356)

kāmanā | yadivā vākyaprayogadvāreṇa parasya svātmavyatiriktasya [tmā 
ga. |] vineyasya pravṛttimupādeye vā, upekṣāmavasātavyamātre vā, 
nivṛttiṃ vā heyaviṣaye saṃpādayituṃ yo'bhisandhiḥ; tena sā 
utthāpyamānā | evaṃca tadabhisandhisamaye yat yadunmiṣitaṃ sāmānyato 
viśeṣataśca, tattat tasyāṃ kāmanāyāṃ śrīsadāśiveśvaradaśocitena 
avibhāgena sphuratyeva | anabhisaṃhitaṃ tu 
pṛthagullāsakalāmaspṛśadahamityeva-śivataucityena sphurati, naca 
śrīsadāśiveśvarabhūmau paurvāparyaṃ kiṃciditi uktaṃ pūrvameva | 
tata eva pūrṇākārā sadaiva asau prathamā caramā ca 
koṭiraprabuddhānāmapi tathātvena nirbhātīti [nirbhāsati ga. |] |

	...................ṭadādyante parasya tu | (spa. kā. 17)

aprabuddhasyeti uktam | suprabuddhasya tu prathamamadhyamacaramātmani 
padatraye'pi prakāśamātramakhaṇḍitameva sphurati-iti 
śrīmatpurāṇaguravo manyante | madhya eva utthāpyamānagrahaṇaṃ 
vākyaprayogāt para ityatra pūrvarūpatrayopajīvanārtham, anyathā 
samakakṣyatvena vāśabdaprayoge pūrvarūpānuṣaṅgo na atra pratīyeta 
svatantratvādarthāntarasya | avalehapūrṇaśabdābhyāmāgamamanusarati | 
etat prakṛte yojayatirājapuruṣādi dhūmāgnyādi bhujagakaṇṭakādi yat 
parasparāpekṣayā vicitraṃ sādhanabhāvasvabhāva(ma)vasāyamātrasya 
vā, sukhasya vā duḥkhasya vā; tacca sarvamakhilaṃ tathā 
vyaktiviśeṣānādarādanekarājapuruṣādivyaktimayaṃ tatsādhyā 
tatsaṃpādanaprayojanoddeśena pravṛttā yā viśiṣṭākārā 
prāptavyavastvaucityena vicitrā pravṛttirubhayaviṣayā pra(ni)vṛttikriyā ca 
heyaikaviṣayā svasaṃpādyatayā parasaṃpādyatvena vā saṃmatā 
tasyāṃ viśiṣṭāyāṃ kriyāyāṃ yā icchā tayā yāvadasau 
vicitrasādhanaphalasvīkāraśavalā

(page 357)

kriyā viśiṣṭā viṣayīkṛtā, tāvat tatkriyāviśeṣaśavalīkārakaḥ 
kārakaprayojanavaiśvarūpyayogaḥ spṛṣṭa eva bhavati | sa ca [sarvastasyā 
ka. |] tasyāmicchāyāṃ rūpeṇa śliṣṭo bhavannapi manobhūmau 
bāhyendriyabhūmau vā saṃkucitamāyāpramātṛprakāśāpekṣayā 
bahīrūpāyāṃ yo vibhāgastaṃ na ujjhatyeva, tata eva 
bhedābhedasvabhāvatvāt saṃbandha ucyate | nanu evaṃ 
vibhāgāvabhāsanaṃ cedāyātaṃ, tarhi dvitve sadā kathaṃ bhavediti | atra 
āha vibhāgenāpi iti | caḥ śaṅkādyotakaḥ | evaṃ 
svarūpamātrāpekṣayā rūpaśleṣaḥ, yatastu te 
anyonyamayaḥśalākākalpā na iṣyante, apitu kriyāṃ pratikārakatvena 
viśeṣaṇatvena saṃbandhitayā vā parasparamapi 
kevalarūpavilakṣaṇātmakaṃ rūpamutthāpayantastadā 
icchāmajaḍāmanupraviśya te'pi ajaḍāyamānāḥ parasparamapekṣanta iti 
apekṣāpi na na upapannā, tataśca

	....................... so'san.......................... |

iti abhyupagamanāhatamadaḥ;

	saṃstu sarvanirāśaṃsa............................ |

iti tu śuddhabāhyarūpatāyāṃ [śuddhe ga. |] bhavet, natu 
antaścitpraveśāpekṣayā,- iti apekṣālakṣaṇo'pi saṃbandhaḥ | tathā 
atraiva apekṣāyāṃ bhūtabhavyasamuccāraṇe iti nyāyena 
guṇapradhānabhāvānupraveśādupakāryādupakārakaṃ 
[praveśādupakārakaṃ ka. |] pradhānena saṃbadhyate tatparatantraṃ 
bhavati,- iti pāratantryalakṣaṇo'pi nyāyya eva saṃbandhaḥ | tataśca

	..............................ṣiddhe kā paratantratā |

iti yat saṃvedanānapekṣasvatantrabāhyavādadhairyeṇa ucyate, 
tadapahastitaṃ bhavati | nahi bhāvasya tapasvinaḥ svayaṃ kācit 

(page 358)

siddhirasiddhirvā 
prakāśācāryopadiṣṭāvabhāsavratacaryānaṅgīkaraṇena,- iti 
upakāryopakārakabhāvaḥ saṃbandhaḥ | sa ca avaśyopagamyo'nyathā 
yugapadiṣyamāṇatābhāsanamarthitā ca kathaṃ syāt, sa ca 
īśvaraniyataśaktimukhaprekṣīti uktameva | nanu bahūnāṃ dviśa eva 
saṃbandha iti saṃbandhasiddhiḥ, sa ca saṃbandho dvayoreva, na bahūnāṃ; 
tathāhi yadi ekaikasya anekasaṃkhyairekaparāmarśaviṣayai [eva ka. |] 
rājñaḥ puruṣaśca, rathaścāśvaśca,- iti, tadāpi rājāderaśrutena 
gamyamānena vā hastisaṃbandhakāraḥ punaḥ parāmarśapadavīṃ [rśā 
ga. |] nīyate iti yāvanto hastyādiṣu parāmarśāstāvanta eva rājño'pi,- iti 
ekasya ekena saṃbandha iti | tat kathamiva uktaṃ sarve te rūpaśleṣeṇa iti 
saṃbandhasteṣāṃ syāt iti ca | satyametat, etadeva tu iha abhisaṃhitaṃ, 
parasparasaṃbandho dviśa eva bahuśākho bhavan melitānumelananyāyena 
ekaṃ [ekaḥ ka. |] sahamelanākhyaṃ saṃbandhamutthāpayati,- iti 
sadāśiveśvarabhūrahamidamiti mahāsaṃbandhabhūmiḥ | tasyāṃ 
bhūmāvapahastite viśeṣāṃśaprakāśe idamiti- 
ekaparāmarśamātrasārabhāvasāmānyasāmānādhikaraṇyāpannāhaṃ-
bhāvamātramatra pūrṇatvaparisphuraṇameva hi tadā bhavet,- iti 
māyāpramātṛgatasadāśivādipadaṃ tadā tat bhavet | tata eva 
bhagavadapekṣayā saṃbandha eva paramārthataḥ prakāśate | sa hi jānāti 
smarati,- iti nyāyena paśupramātṛtāpadaṃ spṛśannapi 
sadāśivādipadaniṣṭho bhavanneva hi bhagavānahamiti 
viśvāvabhāsamayaḥ parisphurati | tatsaṃbandhāpoddhṛtastu 
tanniyatiśaktyaiva mitasaṃbandhamayo bhāvarāśiḥ prakāśate | 
etaduktadvitvadaśāsparśasiddhyarthameva sādhyasādhanagrahaṇaṃ 
parasparagrahaṇaṃ ca |

	bhinnā apyekatāṃ yānti...................... |

(page 359)

iti tu phalaṃ prati ādarāt bahuvacanaprayogaḥ | tadatra ayaṃ pramāṇārthaḥ 
- bhāvānāṃ saṃbandho na avāstavaṃ rūpaṃ tena vinā kadācidapi 
aprakāśanāt | yadi asya na avāstavaṃ vapuḥ, tat tena vināpi prakāśeta 
śaṅkha iva pītatvena vinā,- iti avāstavatvasya vyāpakaṃ tena vinā 
prakāśamānatvaṃ, anyathā niyatameva avāstavaṃ na bhavediti, 
tadviruddhaṃ ca iha upalabhyate,- iti vyāpakaviruddhopalabdhiḥ | hetuśca 
yatnena prasādhita eva | sarvasya bhedābhedāvabhāsamantareṇa 
prakāśanānupapatteriti hi uktam | sa evaca saṃbandhaḥ ityapi vitatameva | 
bhūyaḥprameyapravāhāpavāhitaṃ hṛdayaṃ śiṣyāṇāmavalambituṃ 
prakṛtasūtrārthopasaṃhāramadhikāvāpasiddhaye darśayati tadevam iti | 
pramāṇapadena karaṇatāmeṣāṃ sūcayati | nahi karaṇasya 
ityādivakṣyamāṇaprameyāvakāśadarśanāya bahuvacanaṃ 
bahubhiranekaviṣayairakaprameyasiddhiḥ kathaṃ syāt iti dhvanati | 
pramāturyo vyāpāro vyavasthākāritvaṃ nāma, tadanujīvitayā 
tadvyāpāravaśīkṛtāni,- iti yāvat | nahi iti tathāhi [ca ka. |] sati 
svātantryāt karaṇataiva na bhavet svātantryapāratantryayorvirodhāt 
pāratantryaprāṇatvācca karaṇādikārakakalāpasya | khaḍgo hi 
dṛḍhamuṣṭinipīḍanābhinītakartṛvyāyāmakriyāveśaśchinatti | nanu 
pramāṇameva asti, na anyaḥ kartā nāma kaścidityāśaṅkya āha na ca iti | 
pramāṇameva pramātrā vinā na pravartakaṃ na prāpakamiti 
prāptiparyantaḥ pravṛttyaṅgabhāvopagamanasadyaḥpradarśanamukhaḥ 
[sādhyaḥ ka. |] pramāṇasya svabhāvaḥ prāmāṇyalakṣaṇo'stamiyādeva | 
atra hetuḥ tadupadarśite hi iti | pramāṇairnopadarśite hi arthe yā 
upādeyatā heyatā ca, sā 

(page 360)

smaraṇādabhilāṣeṇa........................ |

itinyāyena udbhavantī pravṛtteḥ kāraṇaṃ yayā prāpakatvaṃ nāma 
samucitaheyopādeyaviṣayahānādānasaṃpādanalakṣaṇaṃ niṣpadyate; sā 
ca na akṣavijñāne saṃbhavati avikalpatvādeveti kathaṃ prāpakaṃ 
pramāṇamucyeta | atha tadanantarabhāvī vikalpa eva kuryāditi ucyate, tadapi 
asat | vikalpo hi dṛṣṭamarthaṃ paśyāmīti paraṃ vikalpayet [yat ka. |], natu 
iṣṭāniṣṭavibhāgamasau kuryāt smaraṇāt pūrvānubhavavāsanotthāpitāt 
| abhilāṣātmā icchālakṣaṇo vikalpastathākārīti cet, pūrvānubhavenāpi 
yadi viṣayākāravāsanāmātrasamarpaṇaṃ kṛtaṃ, tadā 
sukhaduḥkhaprakāśāsmaraṇe kathamicchodayaḥ | sukhādivāsanāpi tatra 
arpitā, tatsmaraṇādicchā,- iti cet, nanu nīle dṛṣṭe tasyāḥ kathaṃ 
prabodhaḥ, nīlaṃ sukhādīnāṃ kāraṇaṃ tatastaddarśanāt 
tatkāryaviṣayaṃ smaraṇam | yadāha 

	taddṛṣṭāveva dṛṣṭeṣu smaraṇāt........................ |

iti | tarhi kāryakāraṇabhāvo'pi ekapramātṛtattve viśrāntaḥ [ntaṃ ka. |] 
pratyakṣānupalambhavibhāvanīya iti kathitamanantarameva | kiṃca tadeva 
vastu kadācit sukhaṃ, kadācit duḥkhamakārṣīt, tataśca aśaṅkitameva 
tadvastudarśanamātrāt kā vāsanā prabudhyatām,- ityatrāpi pramātureva 
svatantrasya anantapūrvānubhavavikalpanādisvasaṃvedana-
tādātmyamayasya saṃbandhi yat svātantryaṃ 
niyatatadrūpapraṇidhānābhogabhāvakaṃ, tadeva vijṛmbhate | tadetadāha 
pramātradhīnaiva iti | etacca sarvasya saṃvitparīkṣānipuṇasya 
saṃmatamevetyāha bauddhairapi iti pramātāramapahnuvānairapi 
so'vaśyamaṅgīkṛtyaḥ iti bhāvaḥ, anyathā bāhyārthābhāve 
svasaṃvedanameva pramāṇaphalamiti yuktaṃ

(page 361)

sati tu bāhye'rthe bāhyaniṣṭha eva prakāśaḥ pramāṇaphalamiti yuktaṃ 
vaktum | yadā tu bāhyaniṣṭhādeva prakāśāt svatantrāṃ 
svasaṃvedanabhūmimanadhirūḍhāt na iṣṭatādivyavasthā, tayā vinā na 
pravṛttistadabhāve na prāptiriti nayena prāpakatvaṃ prāmāṇyaṃ 
svasaṃvedanāyattaṃ, tadā svasaṃvideva pramāṇaphalamukthaṃ taiḥ | 
nanu astu itthaṃ, tathāpi pramātā taiḥ kathamiyatā aṅgīkṛtaḥ | āha 
svasaṃvedanamevaca iti | evakāreṇa svarūpadeśakālabhedo na [bhedo'tra 
saṃ ka. |] saṃbhavati,- iti darśitam | tathāhi deśakālau 
bāhyakakṣyādhirohiṇau na antarmukhe saṃvedane yojayituṃ śakyāviti 
uktaṃ prāk | saugatairapi svasaṃvedye jñānasukhādau 
vikalparūpatāpākṛtaye 

	aśakyasamayo hyātmā sukhādīnāmananyabhāk |
	teṣāmataḥ svasaṃvittirnābhijalpānuṣaṅgiṇī ||

ityatra bhinnakakṣyeṇa grāhyabhāvabhāginā śabdena antarmukhasya 
saṃvedanasukhādirūpasya yojanā na saṃbhavati,- iti darśitameva | tataśca 
yat yato bhinnakakṣyaṃ, tat tena na yojyate saṃvedanamiva śabdena, tathāca 
deśakālābhyāṃ saṃvedanamiti | yojanaṃ hi tadupādhitayā 
tadātmīkaraṇaṃ, tacca kvacideva bhavanniyamavattayā vyāptaṃ, yadica 
bhinnakakṣye'pi bhavet, aniyamastarhi vyāpakaviruddhaḥ prasajati, tato 
bhinnakṣyāt vyāvṛttaṃ yojanaṃ tadanyena vyāpyate, tadviruddhaṃ ca 
bhinnakakṣyatvam,- iti vyāpakaviruddhopalabdhiḥ | svarūpabhede'pi 
aprakāśarūpatāprasaṅgaḥ iti asakṛduktam | tasmāt 
svasaṃvedanamaṅgīkurvadbhiḥ pramātṛtattvamaṅgīkṛtameva tasyaiva 
nityavyāpakaikarūpatvākṣepeṇa siddherityalaṃ bahunā | pramāṇajātaṃ 
pratyakṣānupalambhādi, prameyajātaṃ kāryakāraṇādi; kāryasya 
dhūmādeḥ kāraṇasya agnyādeḥ 

(page 362)

saṃbandhino ye bhāvarūpāḥ aṃśāḥ sati vahnāvasti dhūmaḥ 
ityādayo'bhāvarūpāśca asati tasmin nāsti ityādayasteṣāṃ prameyasya 
pramāṇadvāreṇa pramātari viśrāntiḥ, natu svamukhena,- iti darśayituṃ 
vyākhyāntaramāha athavā iti | naca sarvathā sā nāsti yena avacanārhā 
bhavediti prathayati sūcanāya iti vadan | prathamaṃ ślokārdhaṃ 
vyākhyātuṃ yā vṛttiḥ samanvitā ityādikā, tāṃ vivṛṇoti yadi punaḥ 
ityādinā | nanu svarūpameva tayoḥ kāryakāraṇabhāvaḥ ityāśaṅkya āha 
naca iti | svarūpaṃ hi na anyaniṣṭhaṃ bhavitumarhatīti uktamasakṛt | nanu na 
dhūmamarthayamāno vahniniṣṭhaṃ dhūmarūpamabhimanya vahnau 
pravartate yena paraniṣṭhatā parasya āpadyeta, apitu vahneranantarabhāvī 
yato niyamena dhūmo dṛṣṭo'munā, tato dhūmārthī vahnau pravartate,- iti 
ko virodhaḥ | etadanubhāṣya dūṣayati vahnāvityādinā iti | yat pareṇa 
ucyate, etat tadā syāt yadi vahnirdhūmāt pūrvabhāvīti dhūmajñānena 
dṛśyena,- iti saṃbandhaḥ | nahi vahnau dhūmadarśanena pūrvabhāvini 
aniścite vahnyanantaratā nāma dhūmarūpatātiriktā dhūmasya kācit 
gṛhītā bhavet | evaṃ vahnerapi dhūmapūrvabhāvitvaṃ vācyam, tataḥ 
kāraṇatā kāryatā ca svarūpagrāhiṇaiva gṛhīteti anṛtamadaḥ | 
svarūpasyaivaca tathābhāve dvitīyamaspṛṣṭavato'pi ekapratyaye 
tathāpratītiprasaṅgo'tyantamasaṃbhāvanīyasamarthanatvaṃ 
paradṛśikāryakāraṇabhāvasya nirūpayituṃ patitapārṣṇiprahāraṃ karoti 
| tadāpivā iti sitaghaṭapītapaṭābhāsadvayayukte'pi jñāne svarūpeṇa 
kevalatadrūpagrāhibhyāṃ jñānābhyāṃ paraṃ vailakṣaṇyamastu, natu 
tajjñānābhāsyayorviṣayayoḥ kācidapekṣā sidhyati; tadvat 
pūrvabhāvitāviśeṣaṇaṃ vahniṃ, dhūmaṃ ca 
anantarabhāvitāviśiṣṭaṃ samakālamapi

(page 363)

gṛhṇat vijñānamekatadrūpagrāhibhyāṃ jñānāntarābhyāṃ bāḍhaṃ 
vilakṣaṇaṃ, natu tadābhāsyayorviṣayayoḥ kiṃcidanyonyāpekṣātmakaṃ 
rūpaṃ tataḥ sidhyati | etadapica asaṃbhāvanīyamiti svadarśanacchāyayā 
upapattimatyā darśayati jñānamapivā iti | tataśca dvāvābhāsau 
pramātari viśrāntāviti jñānadvayameva tat syāt, na ekaṃ jñānam | 
evaṃ svakañcukapraveśitatvena dūṣitaḥ saugataḥ siddhāntavādinā 
svātmanaḥ prajñāprakarṣaṃ darśayitumetat tāvayuktamuktaṃ bhavatā,- 
iti nirūpayannāśaṅkate atheti iti | yadi para āha-bhavatāṃ 
tāvadabhimatasiddhānte na ābhāso nāma kaścit svatantraḥ, apitu 
ābhāsanakriyāyāmasau āyattaḥ | sā ca pramātṛvyāpārarūpā | tato 
yadā parasparaviviktavastudvayaviṣayamābhāsanaṃ, tadā vastunī dve; 
ābhāsanakriyā ca ekā,- iti kathaṃ tvayā svakañcukapraveśanena 
ābhāsadvayayogi na sahyate ekaṃ jñānam | tato'pi iti evamucyamānādapi 
idaṃ syāt kiṃ tajjñānaviśeṣamābhāsadvayayuktamarthayamānaḥ 
prayateta tathā yena [prayateta tena ka. |] ekaikābhāsavat jñānadvayaṃ 
parihṛtya tadeva āsādayet | yato jñānasyaiva svarūpabhedaḥ 
pradhānībhūto, na viṣayayoḥ kaścit, tato viṣayāntaraṃ dhūmaṃ prepsuḥ 
kasmādakasmādeva vahnikāṣṭhādisāmagrīṃ ḍhaukayet | nahi ghaṭārthī 
bījapaṭakuvindādisāmagrīṃ ghaṭena saha kadācidavalokitāmapi 
saṃbibharti [saṃvibhāntīti ga. |],- iti dṛṣṭam | tadiyatā sthitametat- 
tathābhāsadvayayuktaṃ jñānameva sidhyet 
prativiṣayamābhāsaparyavasānāditi | tadapi [tadapi ca ka. |] jñānamatra 
ubhayābhāsaṃ nāsti vahnijñānena dhūmasya anantaratayā, 
dhūmapratyayena ca vahneḥ pūrvatayā anavabodhanāditi [dhāt ga. |]

(page 364)

pūrvoktameva dūṣaṇaṃ prapatati-etat tadā syāt, yadi vahniḥ 
pūrvabhāvitayā dhūmadarśanakāle niścīyeteti | tata 
etatprameyalagnatayaiva prameyāntaramāśaṅkate atha tatsaṃskāra iti | 
agnidhūmajñānābhyāmeko vikalpo yo jātaḥ, tatra yaugapadyena te dve 
vijñāne sphurantī viṣayayoḥ kāryakāraṇabhāvaṃ 
sakṛdābhāsasādhyaṃ vyavasthāpayataḥ; tadāhi yugapatsattāsamāviṣṭe 
jāte jñānadvaye vahniḥ pūrvabhāvitayā dhūmadarśanakāle niścita eva 
bhavatīti | etat dūṣayati tadapi iti | nahi tadānīṃ te jñāne kecit 
vikalpalakṣaṇe tayornaṣṭatvāt, tat kathaṃ te vyavasthāpayataḥ | nanu 
tatsaṃskārajanmanā tadbhṛtyena vikalpena tathā vyavasthāpyate, 
tadvyavasthāpitaṃ ca tābhyāṃ vyavasthāpitamucyate ityāśaṅkya āha 
vikalpo hi iti | yadi tāvat tadīyarūpopajīvanamādriyamāṇo vikalpaḥ 
pramāṇayitumīhate, tarhi na anena 
pūrvāparabhāvastadvijñānadvayaspṛṣṭaḥ sthāpyate; atha sthāpyate, tarhi 
apramāṇena yadamunā sthāpitaṃ, tat paramārthapadāt davīyasi 
avasthāpitaṃ bhavati | evaṃhi iti vayaṃ tu vikalpasyāpi 
vastuspṛktvamicchāmaḥ [vastva ka. |] ityanyadetat | yadi tāveva pratibhāsau 
vikalpībhūtāvevaṃ kariṣyataḥ iti ucyate, tarhi asmaddarśanānupraveśaḥ 
iti darśayati atha iti | yadyevamucyate sādhayiṣyataḥ ityantam, tat iti 
tasmāducyamānāt hetoḥ | etat iti samanantarocyamānam ityantaṃ 
siddham | katham | evam iti vakṣyamāṇena tatrāpihi ityādinā 
nyāyaprakāreṇa iti,- vākyasamanvayaḥ | nanu ābhāsāveva 
vikalpatāpannāvevaṃ kurutaḥ ityukte ahaṃpratyavamṛśya eka ātmā 
tathāvyavasthāpaka iti kathaṃ sidhyet,- ityāśaṅkāṃ

(page 365)

śamayan evam iti pūrvasūcitāṃ yuktimāha tatrāpi hi iti | 
vikalpāvasthāyāṃ hi yadi tādṛśāveva tau, tarhi pūrvamakṛtamidānīṃ 
kurutaḥ iti kaḥ pratīyāt | anyonyāpekṣayā hi prāgbhāvasya 
paścādbhāvasya ca yat vyavasthāpanaṃ, tat na upapadyate, tatastau dvāvapi 
svaviṣayamātraṃ spṛśataḥ | itthaṃtu etadupapadyate ityāha ekasmiṃstu iti 
| pratyakṣānupalambhapravāhapañcakena hi pañca tāni prameyāṇi 
ekasmin saṃvitsamudre pātyamānāni 
tatsvātantryataraṅgabalādanyonyāpekṣāmayāni ghaṭaḥ- paṭaḥ- itivat 
viviktābhāsavimarśavailakṣaṇyena [vibhaktā ka. |] bhāsyante vimṛśyante 
ca | tatra yo'sāvābhāsanavyāpārakṛtaḥ pañcānāmekābhāsaḥ, sa 
kāryakāraṇabhāvābhāsaḥ; tathāvimarśaśca pramātṛvyāpāraḥ | 
iyamevaca sā pramāṇayojanātmikā [pramāṇaprayojanātmikā ka. |] 
samastavyavahāropayoginī yuktirucyate, tadvyāpāravirahe pramāṇānyapi 
akiṃcitkarāṇyeva | tataśca uktaṃ parameśvareṇaiva 
śrīmukuṭasaṃhitāyāṃ

	saṃvidvyāpāra evaikā yuktiḥ sarvatra sādhanī |
	bhoge vāpyathavā mokṣe tenāsyāmādṛto bhavet ||

ityādi | sa ca yojaka eveti sarvamiṣṭaṃ siddham || 4 ||

	nanu pratyakṣānupalambhairyadakāri, taccedekīkartavyamiti iyatā 
pramāturaṅgīkaraṇaṃ, tat kimanena, tadekīkaraṇe hi smṛtireva udyuṅkte 
ityāśaṅkya sūtraṃ

	smṛtau yaiva svasaṃvittiḥ pramāṇaṃ svātmasaṃbhave |
	pūrvānubhavasadbhāve sādhanaṃ saiva nāparam || 5 ||

	pratyakṣānupalambharūpāṇi saṃvedanāni yadyat nijaṃ 
saṃvedyamagṛhṇan, tasya tāvat smaraṇe yat prakāśanaṃ, tat na 
smaraṇakālopanatamapūrvaṃ

(page 366)

gṛhītagrahaṇasvabhāvatvāt, apitu pūrvānubhava eva tat | sa ca idānīṃ 
pṛthak vedyatvena na nirbhāsate abhāvāt tasya, bhāve'pi vedyatvena 
bhāsane jñātajñānaṃ syāt; tat na smaraṇaṃ, nacāpi jñānaṃ 
jñānāntaravedyamiti darśitaṃ bahuśaḥ | tadasya sato'pi pṛthak 
svaprakāśatāyāmanyonyānanuṣaktaṃ saṃvedanadvayameva syāt, na 
smaraṇam | tadiyadaṅgīkartavyaṃ- yat smaraṇakāle'pi anubhavaḥ 
prācyo'ntaḥsvasaṃvedanātmā sanneva 
smṛtisvarūpasadbhāvāvedakasvasaṃvedanādabhinnaḥ prakāśate iti | nahi 
atra pratyakṣānumānādi tatsvasaṃvedanāt paraṃ vyatiriktaṃ pramāṇaṃ 
kramate | tāvatkālavyāpakaṃ ca yadavicchinnaṃ saṃvedanaṃ, tadeva 
pramātṛtattvamiti smaraṇabalādekīkāraḥ [pratyakṣadvayasya 
anupalambhatrayasya ga. pustake adhikamasti |] pratyakṣādīnāmityuktiḥ 
pramātṛbalādekīkāramasmadupagatamupodbalayati | smaraṇalakṣaṇaśca 
āntaro vyavahāraḥ 

	smaraṇādabhilāṣeṇa............................ |

itinyāyena aśeṣavyavahāravyāpako yaḥ, so'pi 
ekapramātṛtattvaviśramādhīnaḥ iti sūtrārthaḥ | evaṃ saṃkṣepeṇa āha 
pūrvam ityādi | sādhanam iti siddharūpaṃ saṃvedanam | tasya ākāraṃ 
darśayati pūrvam ityādinā | smṛtiprakaraṇoktaprameyeṇa 
punaruktatāparihārāya āha pūrvam iti | smṛtivimarśaprakaraṇe hi 
evamuktaṃ- anyaścedanubhavitā [anyaśca ka. |], tadanyaḥ smartā kathamiti 
pramātrā vinā smaraṇaṃ na upapadyate,- iti vyatirekopakrameṇa 
anumānena pramātraikyamarthāpattyā- iti, asmiṃstu śloke 
anubhavasmaraṇe svasaṃvedanena ekatayā gṛhīte yadidameva tadekasya 
pramāturgrahaṇamiti sākṣādeva iti 
sarvaprakārābādhitasarvānapahnavanīyasvasaṃvedanapratyakṣeṇaiva

(page 367)

pramātraikyamuktamiti kā punaruktatā | pūrvānubhavasya svameva 
saṃvedanaṃ pramāṇaṃ bhaviṣyati,- iti śaṅkāṃ śamayituṃ yā vṛttiḥ 
abhāvāt ityantā, tāṃ vyākhyātumāha jñānaṃ tāvat iti | 
tadabhinnasya bahirmukhadarśanarūpādabhinnasya, apiśabdena 
pramāṇasyaiva prameyābhimatasyāpi darśanabhāgasya abhāvaḥ iti 
sūcayati | abhāvaṃ vyākhyāya pañcamīṃ vyācaṣṭe tat iti 
tasmādabhāvāt hetoḥ | yena iti smṛtikālātītaghaṭadarśanasiddhilakṣaṇena 
vākyārtharūpeṇa vastunā strīliṅgopakrame'pi yeneti nirdeśo 
vākyārthatāsaṃpādanāya [saṃbhāvanāya ka. |], anyathā 
padārthamātraṃ parāmṛṣṭaṃ bhavet | evamanubhavasvasaṃvedanaṃ 
pūrvānubhave na pramāṇam,- ityuktvā, smaraṇamapi tatra na pramāṇaṃ 
paradarśanena yuktamiti nirūpayati smṛtirevaca iti | smṛtireva pramāṇaṃ 
tatra yasyā vidyamānatvaṃ nirvivādamityapi na | sā hi svasaṃvedanatvena 
vā tatra pramāṇaṃ syāt, naca etat yujyate, tadāha tasyā iti; 
vyatiriktaviṣayatvena vā, etadapi netyāha nacāpi iti | tat iti viṣayatvam | nanu 
yogijñānaṃ prati naṣṭamapi viṣayaḥ, tathā ihāpi syāt | naitadityāha 
nacāpi iti | caḥ śaṅkām, apiśabdo viṣayatvanirākaraṇayuktisamuccayaṃ 
dyotayati | nanu iyati anarvāgdarśanaḥ sarvo'stu nahi dṛṣṭe'nupapannatā | 
atrāpi brūte bhāve vā iti | nanu yāvat dṛṣṭaṃ, tāvadeva astu, 
adhikāsañjanaṃ [saṃjanayatu ga. |] tu niṣpramāṇakaṃ; tarhi pūrvatraiva 
doṣāpādanamastu,- iti darśayati tacca iti idantayā bhavat | evaṃ 
smaraṇamapi pūrvānubhave pramāṇaṃ na bhavati,- iti āvedite 
gatyantarābhāvāt pūrvadūṣitamapi pakṣaṃ paro'valambhe(mbe)ta 
anubhavasiddhastāvat 

(page 368)

sa pakṣo bhavati,- iti pratyāśāmātreṇa dūṣaṇāni anādriyamāṇa iti 
hṛdaye gṛhītvā siddhāntī tatpakṣamāśaṅkate pūrvasvasaṃvedana iti | 
pūrvaṃ yat svasaṃvedanaṃ tanniṣṭhamiti tiṣṭhatu tāvat, kintu smṛtikāle 
tat kena pramāṇena avagataṃ tadāhi [tadihāpi ka. |] svaprakāśatvena 
smṛtisaṃvittirvartate, tato na śakyamevamabhidhātuṃ- tat tadā 
svaprakāśam- iti | naca indriyajñānāderayaṃ viṣaya iti balādāgataṃ- 
svasaṃvedanāntareṇaiva tat svasaṃvedanaṃ 
pūrvānubhavapramāṇabhūtaṃ prakāśyate iti | tacca 
svasaṃvedanāntaraṃ tadā na svaprakāśaṃ smṛtisvasaṃvedanasya tadā 
svaprakāśatvāditi tasyāpi āvedakaṃ svasaṃvedanāntaramityevaṃ 
nyāyopanatā iyamanaṃśe eva pūrvānubhave paryanuyogaparamparāyātā 
aṃśakalpanena svasaṃvedanānāmanavasthā ekasyāpi pūrvānubhavasya 
viśasanena svasaṃvedanabhāgakalpanāyām | sā ca mūlameva 
prācyānubhavaprakāśaṃ vihanti | atha 
prakṣīṇasakaladurmārgāvagāhanāvakāśo balādeva 
sanmārgamājigamiṣati paraḥ, tarhi evaṃ pratibodhayitavya iti kathayati 
adyāpi iti smṛtikāle | ataḥ iti idānīṃ nirbhāsamānatayā 
anapahnavanīyāt | nanu iyatyapi siddhe prakṛte kim | āha sa eva ca iti | atra 
ityasya vyākhyānaṃ pūrvānubhave iti | atraivaca cchedaḥ | nanu ca 
smṛtiranubhavakāryā, naca idamadbhūtadhāma yat kila kāraṇaṃ gamayati, 
- iti siddhaḥ pūrvānubhavaḥ, tat ko'yamasthānasaṃbhrama ityāśaṅkāṃ 
caśabdena dyotayan pratikurute pūrvānubhavasiddhau ca iti | itthamatra 
yojanā granthasya- pūrvānubhavakāla eva samanantarakṣaṇe 
smṛterudbhavo nāsti; smṛtisamaye tu pūrvakṣaṇe yadi anubhavaḥ prakāśeta 
vahnidhūmayoriva, gṛhyetāpi

(page 369)

kāryakāraṇabhāvaḥ, smṛtipūrvakṣaṇe tu na kathaṃcidanubhavasya 
prakāśaḥ, natu atra smṛtikāla eveti mantavyaṃ sahabhāvena prakāśe 
kāryakāraṇatvāsiddheḥ | etadarthamapica vṛttau pūrvagrahaṇam | smṛterna 
kāryaliṅgatā, yataḥ pūrvasya anubhavasya atītasmaraṇācca pūrvatvena 
anubhavasya ābhāso nāsti yena tasya smṛtiṃ prati kāraṇabhāvaḥ 
siddhyediti vṛttisaṅgatiḥ | nanu pratyakṣānupalambhābhyāṃ mā bhūdatra 
kāryakāraṇabhāvaniścayaḥ, kāryavyatirekeṇaiva tu sa bhaviṣyati 
adṛṣṭendriyādivadityākūtaṃ parasya āśaṅkate atha iti | jñānam iti 
smṛtirūpam | anurūpaḥ iti ghaṭo'nubhūta ityayaṃ viśeṣāṃśo yato'sya 
samunmiṣati, sa pūrvānubhavarūpa eva aucityāt paraṃ kalpyate 
anumānavikalpena aprakāśamāno'pi,- ityāśayaḥ | yadāha bhaṭṭaḥ

	kāryaucityātprāksvasaṃvidasaṃvitsmaraṇāntare |

iti | etat na sahate tadetat iti | na dhūmādau kāryavyatirekamātraśaraṇakaḥ 
kāryatāniścayaḥ, apitu pratyakṣaṃ prabhavatyeva atra, 
tatko'yamatiprasaṅgaḥ iti cet, ayaṃ tarhi doṣaḥ iti darśayati indriyamapi iti 
jñānarūpam | kutra kāraṇatā syādityāśaṅkya āha nīlādi iti 
asaṃvedyamānanīlaprayamiti yāvat | tataśca kṣaṇe kṣaṇe'nyadindriyaṃ, 
tatra ca tajjātīyameva karaṇamityādibahutarakalpanāprasaṅgaḥ, 
saṃskārapratyayaśca anubhavaḥ smṛteḥ | natu (nu) upādānasadṛśasya ca 
kāraṇatāyāmupādānameva sadṛśataraṃ yuktaṃ, naca evaṃ 
kāryahetubhūtayā ca smṛtyā upādānabhūtaḥ samanantarapratyaya eva 
kalpyate | yastu atiśayādhāyīti kṛtvā saṃskārapratyayatākāraṇatvena 
anubhavaḥ kalpitaḥ, tasya kāraṇataiva durjñānā,- ityāśayena āha 
smṛtirjñānasya ca iti | nanu evamanubhūto

(page 370)

mayā ghaṭa iti anubhavasya yat saṃvedanaṃ, tat kathaṃ nihnotavyam | atra 
āha etāvattu iti anihnava eva ayamasmābhirmurdhābhiṣiktīkṛta iti yāvat | 
tataḥ iti hi yaduktaṃ, tat katamadavalambatāṃ pramāṇarūpaṃ 
pratyakṣarūpaṃ vyatiriktaṃ, smṛtisvasaṃvedanāvyatiriktaṃ vā, 
anumānarūpaṃ vā | tatra ādyacaramapakṣau pratikṣiptāviti madhyama eva 
pakṣo'munā prakāreṇa pratiṣṭhitaḥ | etadupasaṃharati tasmāt iti | 
svasaṃvedanapṛṣṭhe ca anumānatvamapi śakyayojanamiti darśayati 
svasaṃvedanena iti | tasmin iti pūrvānubhave | smṛterapi iti anyatra | 
svasaṃviditā ityasya hetutā jāyate iti vismayasūcako'piruttareṇāpi 
capadena saṃbandhanīyaḥ samuccayadyotanāya | ekatra hi 
svasaṃvedanarūpe pramātari anubhavasaṃvedanamavicchinnameva āste, 
tataśca ābhogavatyanubhave smṛtirudbhavantī prācye pade anubhavameva 
apekṣamāṇaṃ samākṣipati,- iti | na tvasau iti nyāsamātraghaṭanametat, 
natu anumānasya atra kaścidupayogaḥ | vyavahārasādhanamapi atra na 
saṃbhāvyate mohābhāvāt, mohe vā kāryatāyā api durjñānatvāt | nanu 
evaṃ smaraṇe pūrvānubhava eva pratapati,- iti pūrvavadeva asya 
prāmāṇyaṃ syāt | satyametadityāha smṛti ityādi | yathā tasya 
anubhavarūpatā prācyā, tathaiva pramāṇatā; idānīṃ tu yathā asya 
smṛtirūpatāpattirvedyagatātītakāloparāgarūṣitānubhavabhāgatayā, 
tathā gṛhītagrāhitvādaprāmāṇyamapi | prākāśiṣṭa ghaṭo, natu 
prakāśate,- iti hi smṛtāvanubhavaḥ | nanu evaṃ svasaṃvedanamapi 
syādapramāṇam | syāt kāmaṃ, yadi gṛhītamātmānaṃ gṛhṇāti,- iti 
svātmāṃśe grāhyatvamunmiṣet | naca evaṃ, tathāhi sati 
bhūtavartamānavibhāgo bhavet, natu asāvasti antarmukhe

(page 371)

kālāvacchedavirahāditi [kalā ka. ga. |] hi bahukṛtvaḥ kṛtanirṇayameva | 
tadetadāha svasaṃvedane tu iti | satyāṃ grāhyatāyāmavaśyaṃbhāvinaḥ 
kālabhedasya abhāvāt grāhyatvābhāvo'pi uktaḥ || 5 ||

	nanu kāryakāraṇabhāvādivyāvahārikarūpaniścaye'nubhava-
mātrādaprasiddhe'pi vikalpā eva santu pramāṇaṃ yathā 
naiyāyikaprabhṛtayo manyante | bādhābhāve hi kiṃkṛtamaprāmāṇyaṃ, 
bādhayoge tu dvicandrālātacakrādyanubhavasya api aprāmāṇyam; tataśca 
bādhasattāsattayoreva avadhātavyaṃ, natu ekapramātṛtattvena samarthitena 
kiṃcit tatkṛtyasya vikalpabalādeva siddheḥ | astvevaṃ tāvat; natu [nanu ga. |] 
atra vikalpatattvamanubhavaikyamayapramātrātmakaṃ brūmahe, tathāpi- tu 
samastāntarbahirvyavahāravyāpakasatyāsatyapravibhāganiścayanibandhana
bhūto'pi ayaṃ bādhavyavahāro na kathaṃcit paradarśane ghaṭate, 
asmaddarśane tu upapadyate eva | tatra svapakṣe tāvadupapadyamānatāṃ 
darśayituṃ sūtraṃ-

	bādhyabādhakabhāvo'pi svātmaniṣṭhāvirodhinām |
	jñānānāmudiyādekapramātṛpariniṣṭhiteḥ || 6 ||

	yaḥ samastavyavahārasiddhaye sarveṇa aṅgīkṛtaḥ, so'pi na 
upapadyate | tathāhi na asau viṣayāṇāṃ, asannihitasya api natarām; tadasau 
jñānānāmeva vaktavyaḥ | tāni ca svasminviṣaye ātmani ca svasaṃvedane 
niyatasthitikāni atyantasantoṣabhāñji munimanāṃsi iva itaretaraṃ na 
virudhyante | parasparaparihāreṇa vā sahetukavināśopagame 

	...........................buddhirbuddhyantaravirodhinī |

iti nāśyanāśakabhāvena vā svasamaye anyāvakāśavirodhena vā 
svasamaye parakīyapramāṇabhāvavirodhena vā virodhe jñānaṃ na 
kiṃcidaviruddhamasti,- 

(page 372)

iti tādṛgvirodho'pi avirodha eva mitradvayasya iva | paraspareṇa 
virodhābhidhānanibandhanavandhyatāyāṃ tu bādhasya niyataviṣayatvaṃ 
na bhavet,- iti virodhotthāpananimittamanayościntyam | tacca ekaṃ 
viśrāntisthānaṃ pramātṛtattvaṃ nāma | tatra hi viśrāmyatāṃ 
jñānānāṃ na ekarasaiva sarvatra viśrāntiḥ | tatha hi ghaṭa iti paṭa iti 
jñāne parasparābhāsānāśleṣeṇaiva viśrāmyataḥ, nīlamiti utpalamiti 
parasparābhāsoparāgaprāvaṇyena, agnerdhūma iti 
prayojyaprayojakasattākatvābhasanapuraḥsarīkriyayā | evamanyadapi ūhyam 
| tata eva bāhyābhimataprameyāṃśāsaṃbhavi tat svātantryeṇa 
utthāpyamānarūpamayaṃ kurvan pramāyāṃ svatantraḥ pramātā 
bhaṇyate | tatra ekatra pramātari śuktikā iyamiti, na idaṃ rajatamiti ca 
jñānaṃ viśrāmyadeva pūrvaviśrāntarajatajñānasarvasva-
bhūtānuvivṛtsitarajatamidaṃ satyamarthakriyākṣamaṃ me 
bhātamitivimarśātmakapramāṇaphalānuvṛttiṃ vidhvaṃsayati, 
vidhvaṃsayacca viśrāmyatīti | evaṃ pramātari yā anyaparivarjanena 
jñānāntarasya niyatā sthitiḥ, tato hetorbādhyatā parivarjanīyasya, 
parivarjakasya ca bādhakatā sidhyati | yat yasya phalānuvṛttibhaṅgaṃ karoti, 
tat tasya bādhakaṃ sārvabhauma iva aparabhūbhujām | tathāca na idaṃ 
rajatamiti, śuktikā iyamiti vā jñānaṃ rajatajñānasya | bādho hi 
niyataviṣayo bhavan niyatanimittatayā vyāptaḥ, tato vipakṣe 
tadvyāpakābhāvāt sādhyena hetorvyāptiḥ siddheti svabhāvahetuḥ | 
jñānadvayamekapatitaṃ 
bādhyabādhakabhāvādyanyonyāpekṣarūpayogitvādityapi svabhāva eva, 
ekapadapatitatvābhāve hi niyamābhāva iti vyāptiriti sūtrārthaḥ | vṛttau 
vivṛtau ca svaśca ābhāsaśca iti svaśca viṣayaśca iti yojyam | athavā 
svasaṃvedanabhāge bādhāsaṃbhavādābhāsamātrameva 

(page 373)

saṃbhavadbādhamiha nirdiṣṭaṃ, tadāca sūtre'pi 
svātmagrahaṇamābhāsatātparyeṇa yojyam | eko yaḥ saṃniveśaḥ 
idamityaṅgulīnirdeśāspadatayā jighṛkṣāsthānaṃ, tadavaṣṭambhena 
yadyapi vastusthitirutpadyate; tathāpi pramātraikyamantareṇa 
tadekāvaṣṭambha eva durjñāna iti vadan bhāṭṭamapi matamavamanyate | 
sahi āha-śuktyavaṣṭambhenaiva rupyasaṃvit bhavantī śuktisaṃvidbhāvyeti 
| svarūpasya prāmāṇyasya tadanuvṛttervā nivartanaṃ [nirvartanaṃ ga. |] 
bādhā yathā na upapadyate iti darśayati bādhaḥ kriyeta ityantena | 
svāvasare jñānāntaramekasantānagataṃ na sahate iti bādhā sati 
pramātari,- ityāha so'pi iti | aparyāptakāraṇasya 
bhavato'nyabhāve'bhāvāditi yaḥ sahānavasthānavirodhaḥ ucyate 
tatsaṃnidhāvasamarthakṣaṇotpattidvāreṇa, sa santānāpekṣayā samakāle 
saṃbhavinaiva [saṃbhāvinā ka. |] balavatā uṣṇena śītasya 
deśamākramatā, natu jñānayoḥ samakālaṃ tatha asti saṃnidhānaṃ 
deśākramaṇaṃ vā | nanu śuktisaṃvedanaṃ śuktāveva pravṛttapūrvaṃ 
rajatasaṃvidaṃ na saheta | tathāhi tat cet na bhavet, sā prabandhena tatra 
pravartetaiva, etāvadeva duradhigamam | hi iti yasmāt jñānaṃ sarvaṃ 
jñeyamābhāsayadeva jñānaṃ, tata eva jñeyasya anuvṛttyā 
dhārāvāhitāṃ śrayate, tannivṛttyā anyakāraṇanivṛttyā vā tāṃ jahāti, 
na punarjñānāntaramanyābhāsamasti [atyābhāsaṃ ka. ga. |],- ityeva 
kṛtvā nivartate dhārāvāhitāyāḥ, tatkathaṃ tat tasya viruddham | yata 
evaṃ, tasmāt so'pi nāsti,- iti pūrveṇa saṃbandhaḥ | etaduktaṃ bhavati- 
pūrvābhāsajanakasāmagrīsaṃnidhau jñānāntarameva 
kathamanyābhāsamutpadyate śuktāviva prabandhapravartanasvabhāvaṃ 
rajatajñānam,- iti śuktikājñānena śītamiva uṣṇena apasāritam,- iti ca 
kaḥ prayateta 

(page 374)

jñānadvayānyatarasya evaṃvidhaṃ pratyetumasāmarthyāt 
svaviṣayamātraniṣṭhatvena | evamayaṃ virodhaḥ sahānavasthānarūpa eva 
śaṅkyamānaśca niṣidhyamānaśca mantavyaḥ | atha dvitīyaṃ pakṣaṃ 
dūṣayitumāśaṅkate atha iti | pramāṇyasya svarūpaṃ nirdiśati 
arthaprakāśatvam iti | virodhaḥ iti bādha ityarthaḥ | arthaprakāśatvam 
ityatra arthaśabdaṃ vyācaṣṭe ābhāsamānapadena | anyathā iti 
tadābhāsatāṃ vinā yadi tatprakāśatvaṃ syāt | kimato yadi 
ābhāsamānaprakāśatvaṃ pramāṇamityata āha naca iti | tadapi iti | 
aparasminnarthe saiva vṛttirāvṛttyā yojanīyā,- iti apiśabdaḥ | tṛtīyamapi 
pakṣaṃ dūṣayati naca iti anuvartamānāsaṃbhavahetupadaṃ 
[māno'saṃbhava ga. |] vyatireki ityantam | atha turyapakṣaṃ svamate 
upapadyamānaṃ darśayiṣyan krameṇa pariśodhayati athāpi iti | nivartyate 
iti | tasya tatra avakāśo na sahyate,- ityetāvadeva iha nivartanamabhipretaṃ, 
tathāca dūṣaṇaṃ saṃgacchate, ghaṭe'pi ghaṭājñānamiti 
pravṛttapūrvasya tatra avakāśaṃ na mṛṣyate,- ityevamapi 
viśeṣamāśaṅkate dūṣaṇāya athaca iti | etat siddhāntimata eva 
upapadyate,- ityabhiprāyeṇa brūte etadapi iti | anyathā iti yadi 
pūrvapravṛttatāyā jñānaṃ na upayuktam | ghaṭe'pi vā iti pūrvoktamapi 
dūṣaṇamatra pakṣe anena pratyujjīvayati | pratyujjivane hetumāha kenaitat iti 
avaśyaṃbhāvanīyaiva tatpravṛttiriti bhāvaḥ | nanu ekapramātṛgatatvaṃ 
nāma vastuvṛttato [vastuto ga. |] yadasti, tadeva viśeṣakṛt bhaviṣyati | 
naitadityāha kva iti sarvathā yat na prakāśate, tat vastuvṛttato'sti,- iti 
kośapānasyāpi nāyaṃ viṣaya ityāśayaḥ | nanu prakāśatāṃ tat kathaṃ, 
na 

(page 375)

tāvat jñānadvayena, nāpi vikalpena,- iti darśayati naca iti | naca idaṃ 
pramāṇaṃ dṛṣṭam,- iti kathayati naca antareṇa iti | 
jñānāntaravedyatābhyupagame'pi duḥsamartho'yamartha iti darśayati 
anenaiva iti | evakāro'bhyupagamadyotakaḥ [cakāraḥ ga. |] | ubhayatrāpi 
hetuḥ parāpekṣatvāt iti | tataḥ kimityāha sarva iti | svātantrye vikalpasya 
[lpābhyupa ga. |] abhyupagate'pi svakṛtametat na nirvahatītyāha 
vikalpenāpi iti | vikalpenāpi svātantryāt paurvāparyavyavasthāpanaṃ 
[panata ka. |] tadvikalpasvātmavyatiriktatvena abhimate jñānadvaye [dvaye 
ka. |] na yuktaṃ, jñānayostayoranyena aprākaśyatvādadhyavasīyate param 
| tena ayamarthaḥ- vikalpaḥ svatantro'ṅgīkriyamāṇo yatra 
prakāśarūpo'ṅgīkriyate, tatraiva svatantro yuktaḥ | nahi anyā asya kācit 
svatantratā | tanma(da)yamarthaviṣaye bhavatu svatantraḥ, natu jñānaviṣaye | 
nahi jñānasya svaprākāśasya vyatiriktasya vikalpaḥ prakāśanarūpaḥ | 
tato yatra na prakāśanasvabhāvaḥ, tatra 
ayamabhimānasārāvāstavaprakāśanavyāpārayogitvādadhyavasāya-
rūpaḥ, tataśca avasitamapi paurvāparyaṃ na prakāśitameva,- iti 
jñānadvaye vastubhūte kathaṃ tat viditaṃ bhavet | nanu avyatiriktameva tat 
jñānadvayaṃ vikalpāt, tataḥ svaprakāśatvenaiva tat vikalpatāpannaṃ 
jñānadvayaṃ svātmanaḥ paurvāparyaṃ sthāpayati, tataḥ 
ekapramātṛgatatve sati pūrvapravṛttajñānānuvṛttiniravakāśīkaraṇaṃ 
nāma bādhanaṃ na yuktam | tatrāpi ucyate avyatireke vā iti | pūrvavat iti

	pratyakṣā............................... | (1|7|4)

ityādisūtradvayoktena tulyanyāyametat | jñānayorapi iti na kevalṃ 
vikalpena sākaṃ tayoraikyaṃ, yāvadanyonyamapi | tadabhāve 

(page 376)

tadaikyasādhyo yaḥ 
paurvāparyalakṣaṇo'pekṣātmakasaṃbandhaprāṇito'rtho, na sa śakyaḥ 
kartumiti | tasmāt arthe nivartanāt iti phalānuvṛttyunmūlanāditi 
mantavyam | tathāca pramāṇalakṣaṇe

	so'ntastathāvimarśātmā................................. |
	.....................ṃitirvastunyabādhitā || (2|3|2)

iti vakṣyate | abhitaḥ samantādābhimukhyena ca pramātari yat mananaṃ 
bahīrūpānādareṇa, tadeva vimarśanamabhimananaṃ 
pramatṛviśrāntisāram,- iti darśayati vyavahriyate ityanena || 6 ||

	naivam.............................................. | (1|7|8)

iti prakṛtya

	evaṃ rupyavidā.................................... | (1|7|12)

ityantasūtrāntaravakṣyamāṇadūṣaṇaviṣayadānāya bādhavṛttāntaṃ 
dharmottaropādhyāyādidarśitaṃ śaṅkyamānatayā sūtreṇa āha

	viviktabhūtalajñānaṃ ghaṭābhāvamatiryathā |
	tathā cecchuktikājñānaṃ rupyajñānāpramātvavit || 7 ||

	śuddhaṃ bhūtalaṃ ghaṭābhāvastannibandhanatvāt 
ghaṭābhāvavyavahārasya; tataḥ śuddhabhūtalajñānameva yathā 
ghaṭābhāvajñānaṃ, tathaiva 
śuktijñānagatayathārthaprakāśanalakṣaṇaprāmāṇyasaṃvedanameva 
śuktikājñānasvasaṃvedanānatiriktaṃ yat prakāśate, tadeva ucyate 
śuktiviparītarajatajñānagatāyathārthatvasvabhāvāprāmāṇya-
saṃvedanaṃ; sa evaca bādhaḥ,- iti kiṃ tatra pramātraikyeneti yadi paro 
brūyāditi sūtrārthaḥ | tamavatārayati saṃkṣepavyākhyayā [khyāyā ga. 
|] vastūnām iti hetupadametat | mā bhūt iti bauddhādimate | nanu ghaṭasya 
yo bhāvaḥ, sa paṭaḥ kathaṃ; nahi ghaṭasya yat lauhityaṃ, sa paṭa iti 
śraddheyam |

(page 377)

atra āha nahi iti | nahi lauhityamiva ghaṭasya tat kiṃcit yena parasya rūpaṃ 
paro'nubhavet, apitu ghaṭa eva na, etacca ghaṭasya 
samastaprakhyopākhyāvirahamātraṃ, natu neti kiṃcit 
prakhyopākhyāyogyaṃ vastu | nanu evaṃ na kiṃcidabhāvo nāmeti 
kimavalambanī iyaṃ cintā [citā ka. |] | āha tasya tu iti 
vaikalpikajñānābhidhānātmakavyavahāramātrasāramamuṣya vapuḥ, 
niyataśca vikalpo'nubhavamupajīvya vartate | tato yadanubhavamupajīvan 
niyamena abhāvaṃ vikalpya udeti, tadanubhavaviṣayasyaiva vikalpyatāṃ 
vyavasthāpayati nīlavikalpa iva nīlasya, abhāvavikalpaśca 
śuddhavastvantarānubhavopajīvī niyamena,- iti vipakṣe niyamasya 
vyāpakasya anupalambhena siddhipratibandhāt svabhāvahetorniścitāt 
śuddhavastvantarasyaiva abhāvatvena vikalpyatā, tatastadeva abhāva iti 
vyavasthāpyate, tadvikalpyānanurūpatvācca abhāva ityucyate | dṛśyaṃ hi 
bhūtalaṃ vidhirūpaṃ, tat ghaṭābhāva iti amunā rūpeṇa anucitameva | 
dṛṣṭāntaṃ vyākhyāya dārṣṭāntikaṃ vyācaṣṭe tadvat ityādinā | 
śuktijñānaṃ rajatajñānasya aprāmāṇyajñānaṃ kathaṃ bhavati | 
bhavatyeva | atra hetuḥ pravṛtta ityādi | atrāpi hetuḥ svaviṣaye rajate 
pramāṇatvaṃ prāptaṃ rajatajñānaṃ, tasya niṣedhanāt na 
pramāṇabhūtaṃ rajatajñānam,- iti hi śuktikājñānasya rūpaṃ 
yatastadrajatajñānābhāvarūpamiti vākyasaṅgatiḥ | 
vyavahāraikasāratāmabhāvasya ghaṭayati ghaṭābhāvasya iti | 
yadāyattam iti | ghaṭābhāvena janitaṃ tadarpitākāraṃ ca na bhavati 
niḥsvabhāvasya jananamaraṇādyasaṃbhavāt | naca 
kumbhakārotthāpitakumbhasaṃbhāratulyo'sau,- iti kalpanāmātrapadena 
āha | kimarthamitthamutthāpayati,-

(page 378)

iti cet, vyavahārastadviṣayapravṛttyabhāvamātraṃ vā 
tadviparītaśuddhavastuniyataṃ hānādānasaṃpādakaṃ pravṛttyādi vā 
prayojanamasya utthāpanasya | bhūtale hi dṛṣṭe na atra piśāca iti yāvat na 
vikalpayati, tāvat piśācasaṃnidhānakṛtaṃ bhayatrāsādi āviśedeva,- iti 
adṛśyānupalabdhyā na tadāśrayā vyavahārā bhavanti | tena 
asadvyavahārābhāvo'tra | na atra ghaṭa iti ca yāvat na vyavaharati, tāvat 
tatra bhūtale niḥśaṅkaṃ na padāni nikṣipediti dṛśyānupalabdhyā 
sadvyavahāraḥ sidhyati | adhyavasāyamukhaprekṣiṇo hi vyavahārā 
yathādhyavasāyaṃ bhavanti, natu yathāvastu | nanu bhūtalajanitaṃ 
bhūtalākāraṃ jñānamuktaṃ; ghaṭābhāvajñānaṃ tu na 
bhūtalākāraṃ, tato na bhūtajanitam | atra āha-satyamevaṃ na 
bhūtalajanitaṃ, mānasaṃ hi vyavahārātmakaṃ vikalparūpaṃ tat | kathaṃ 
tarhi ucyate bhūtalajñānametaditi | āha asya tu iti | yadyapi etat 
vācikakāyīyavyavahāradvayapūrvabhāvitvena sthitaṃ 
mānasavyavahārātmakaṃ, tathāpi anyavikalpebhyo nīlādiviṣayebhyo 
nīlādyanubhavānusāribhyo'sti asya viśeṣaḥ | tathāhi vikalpastāvat 
niyataḥ sa [sarvānubhavaṃ ka. ga. |] ca anubhavameva niyāmakamapekṣate | 
asya ca abhāvavikalpasya abhāvānubhavaḥ samutthāpako nāsti,- iti 
bhūtalasya upalambhādeva ayamudeti, tatastadeva anena itthaṃ vyavahriyate | 
apica ghaṭābhāvādhyavasāyarūpasya jñānasya viṣayo yadā prepsyate 
prāpyate ca niḥśaṅkagamanāgamanāderbhūtalaikaviṣayatvāt 
tatastadanubhavamūlatvāt tatprāptiphalatvācca bhūtalajñānameva 
ghaṭābhāvajñānaṃ tathābhūtam iti arthakriyopayogi | nanu kimatra 
arthakriyayā | ucyate | tāmeva abhisandhāya nātra ghaṭaḥ iti 

(page 379)

vyavaharati pramātā, natu mukhaprakāśamātreṇa yatha kṛtakṛtyaḥ, tadvat 
tadvyavaharaṇamātreṇa | tat iti tasmāt | bhūtalameva yadarthakriyopayogi, sa 
eva abhāvavyavahārasya viṣayaḥ | yo yatprāptaye vyavahāraḥ, sa tato na 
anyaviṣayo nīlamiva pītaviṣayo, yathā bhūtalaprāptaye ca nātra ghaṭaḥ iti 
vyavahāraḥ | anyaviṣayatvasya hi vyāpakamanyaprāptyarthatvaṃ 
vyavahārasya, tadviviruddhamidamiti vyāpakaviruddhopalabdhiḥ | eṣa ca 
bhūtalamātraghaṭābhāvanyāyaḥ sūtrāntarābhidhāyiṣyamāṇo 
vyatiriktābhāvavyavahāraviruddhasamarthanakāriṇo 
bhūtalāvṛtālokarūpasparśamātraghaṭābhāvavyavahāre yojanīyaḥ | 
evaṃ dṛṣṭāntaṃ vyākhyāya enameva nyāyaṃ prakṛte yojayati eṣa eva iti 
| śuktipratyakṣeṇa asyāpi abhāvavyavahāraḥ ākṣiptaḥ | tatastāvat 
svabhāvavyavahāreṣu mūlabhūtaṃ yat śuktipratyakṣaṃ, tadeva 
pramāṇaṃ tadvyavahāraiḥ sarvaireva tadviṣayīkṛtāyāḥ śuktereva 
prāpyatvāt | yadi iti sautrasya cecchabdasya āśaṅkādyotakatvaṃ 
vyākhyātam | evaṃ sūtrārthaṃ vivṛtya vivṛtikāraḥ 

	evaṃ rupyavidābhāva........................... | (1|7|12)

iti yatsūtraṃ bhaviṣyati, tadarthānusāreṇa parasya mataṃ śaṅkitaṃ 
pariharati śiṣyabuddhisamādhānārtham, anyathā 
dṛṣṭāntadūṣaṇatatsamarthanādiprameyāntarābhidhāyakamadhyavarti-
sūtracatuṣṭayavyākhyopanataprameyāntarāvabhāsavyavahitaḥ 
pūrvapakṣaḥ śiṣyasya duranusandhānatvāt na buddhau punarunmīlet, 
cecchabdārthaśca siddhāntonmīlanena suvyākhyāto bhavati, anyathāhi 
vastveva etadastu śaṅkyamānatvena, kasmādetaduktamiti syāt 
vacanāvakāśaḥ; taṃ parihāraprakāramāha teṣāṃ ca iti | upamānena 
sādharmyeṇa niścayārthamasyate kṣipyate agrato vyutpādyasya 
vyāptiparighaṭanāya, tathā upa samīpaṃ prāpte vyāptiniścaye asyate 
kṣipyate na 

(page 380)

ādriyate sarvakroḍīkāreṇa antarvyāptisaddhaṭanāya [varti ga. |],- iti 
upanyāso dṛṣṭāntaḥ | sa viṣamo, na tulyaḥ | atra hetuḥ nahi iti | 
bhūtalajñānena tulyaṃ śuktijñānaṃ ghaṭābhāvajñānena ca tulyaṃ 
rajatābhāvajñānaśabdena tanmūlatayā vyapadiṣṭaṃ 
rajatajñānaprāmāṇyābhāvajñānaṃ yadi bhavet, bhavet sāmyaṃ, 
natvevaṃ; tasmāt vaiṣamyam | natvevaṃ iti | atra hetuḥ tathāhi iti | 
rupyajñānasya hi aprāmāṇyaṃ, svasamayabhāvimithyājñānatvaṃ 
nāma dharmāntaramāvedayitavyaṃ vartate, 
prāmāṇyātmakadharmābhāvo vā, natu tasya abhāva eva rupyajñānasya 
aprāmāṇyaṃ, evaṃhi sati svasamaye sarvaṃ vijñānaṃ pramāṇaṃ, 
jñānāntarasamaye tu sarvamapramāṇam,- iti punarapi niyamo vilupyate | 
atha ucyate rajatajñānaniṣṭhaṃ yadapramāṇatvaṃ, tat śuktijñānameva; 
na anyaditi | tatrāpi uttaraṃ naca iti | atra hetuḥ- rupyajñānātmakaṃ 
viṣayāntaraṃ dharmirūpaṃ yato'nena prāmāṇyena labdhaṃ, tadviṣayaṃ 
hi tadaprāmāṇyam | yadivā rajatajñānasya yat 
lakṣaṇamupādhirūpamaprāmāṇye prāmāṇyābhāvo vā, tadanena 
apramāṇamidamitijñānena viṣayāntaraṃ vyavahartavyāntaraṃ 
rajatajñānādikaṃ labdham | tato yathā paṭasya śukladharmajñānaṃ 
pītadharmābhāvajñānaṃ vā na ghaṭajñānameveti śakyaṃ vaktum, 
tathā prakṛte'pi anyajñānamanyasya yadi dharmajñānaṃ 
dharmābhāvajñānaṃ vā bhavet, tat niyamahetorabhāvādatiprasajati | 
tadiyamanyajñānatā taddharmajñānatāviruddhena 
taddharmājñānarūpatvena vyāpteti viruddhavyāptopalabdhiḥ | 
vaiṣamyameva draḍhayati prakṛtavailakṣaṇyena dṛṣṭāntasya ghaṭābhāva 
iti | viṣaya eva iti | ghaṭābhāvo hi na kiṃciditi uktameva | uktā iti yukteti 
ākūtaśeṣaḥ | evaṃ

(page 381)

śuktipratyakṣameva pratyakṣapramāṇaṃ bhavadeva 
rupyajñānaprāmāṇyābhāvavyavahārakāraṇamiti tāvat na saṃgatam | 
etāvattu bhavet, yadi rajatajñānaṃ pramāṇaṃ bhavet | tat tadāveditaṃ 
rajatameva idaṃ bhavet, na śuktiriti kāraṇānupalabdhyā śuktijñānaṃ 
saṃvādakaṃ na bhavet, asti ca tat, tato rajatajñānaṃ(a)pramāṇaṃ 
saṃvādiśuktikājñānopalabdheriti | tataśca 
kāraṇaviruddhakāryopalabdhyā prāmāṇyaniṣedhe rajatajñānasya 
śuktijñānaṃ pramāṇatāmupagataṃ hetubhūtaṃ, na pratyakṣabhūtam | 
etadāha iha iti prakṛte | punaḥśabdaḥ uktasaṃbhāvanādyotakaḥ | 
pāramparyeṇa iti na sākṣādviruddhaṃ tat tatprāmāṇyasya niṣedhyasya, 
apitu kāraṇavyavadhānenetyarthaḥ | nanu tathāpi siddhaṃ sādhyaṃ vināpi 
pramātrā ekena | atra āha tacca iti pratyakṣameva bādhakamiti hi te vadanti | 
nanu itaḥ prabhṛti itthameṣiṣyate | satyaṃ, tathāpitu vratatyāgamātrametat 
[eṣā tu ga. |], natu kāmaparipūraṇameṣāṃ tataḥ ityāha dūṣayiṣyate ca 
iti | anena parihārāntaramapi sūcayati | yat bhaṇiṣyate

	dharmyasiddherapi......................................... | (1|7|13)

ityatra sūtre || 7 ||

	etat nirākaroti

	naivaṃ śuddhasthalajñānāt sidhyet tasyāghaṭātmatā |
	natūpalabdhiyogyasyāpyatrābhāvo ghaṭātmanaḥ || 8 ||
	viviktaṃ bhūtalaṃ śaśvadbhāvānāṃ svātmaniṣṭhiteḥ |
	tatkathaṃ jātu tajjñānaṃ bhinnasyābhāvasādhanam || 9 ||

	abhāvavyavahāre tādātmyena sādhye [siddhe ga. |] bhavati ayaṃ 
nyāyo bhūtalaṃ ghaṭo na, piśāco na, śabdo na,- iti | tatra hi dṛśyatve 
svabhāvaviśeṣasāmagryabhāvādinā 

(page 382)

asaṃbhavatyapi saṃbhavatyeva abhāvasiddhiḥ | vyatirekeṇa tu 
upalabdhilakṣaṇaṃ upalambhayogyatādhāyi samastaṃ kāraṇaṃ prāptasya 
dṛśyasya yadā abhāvaḥ sādhayitumiṣṭo bhavati- iha bhūtale ghaṭo neti, 
tadā na uktanyāyena abhāvasiddhiḥ | evaṃ hi piśācasya api vyatirekeṇa 
abhāvaḥ sidhyedapiśācatayā bhūtalasya siddheḥ | naivam, tadeva tatreti 
vyavahartumucitam, sarvadā vā tathā vyavahriyatāṃ [vyavahriyate ka. |] 
viśeṣābhāvāditi dṛṣṭānta eva ayaṃ na saṅgata iti sūtrārthaḥ | 
vivṛtikāraḥ svokte dṛṣṭāntavaiṣamyadūṣaṇe 
sūtragranthasaṅgatimapaśyannabhyupagamyavādena granthasaṅgatiṃ karoti 
abhyupagamya ityantena sūtrakṛtaśca prauḍhavāditāṃ 
prasaṅgato'bhāvavyavahāratattvaparighaṭanāya darśayati | idaṃ tāvat 
jhaṭiti vaktavyaṃ na brūte, saṃnyāsikatvena tāvadabhyupagacchati etat, 
dṛṣṭānta eva [evaṃ ga. |] tu ayaṃ kathaṃ bhavatā kṛta iti | tat iti bhūtalam 
| na syāt iti | tādātmyena abhāvaḥ saṃbhāvyate nāma | eṣa tu vākyārtho 
na syāt na saṃbhāvyate- yat kila tatra ādhāre ghaṭo na | ekasyaiva hi 
kathamādhārādheyatā, kālpanikatve tu sadā syāt,- ityanayā bhaṅgyā 
dṛṣṭāntaṃ pratyakṣasiddhe bādhe nirākartumāheti yojanā | nanu 
bhūtalataiva tvayā śuddhatā abhidhitsitā, tat kiṃ 
tadviśeṣaṇopādānenetyāśaṅkya brūte atra sūtra iti | krameṇa 
parastāvadevamāha,- asmābhirapi tathāvidhameva rūpaṃ yadiṣyate iti 
yuktaṃ viśeṣaṇam | vakṣyamāṇa iti viviktaṃ iti sūtre yādṛśī iti 
svātmaniṣṭhatārūpā | asau iti ghaṭāderabhāvaḥ | tasyāḥ [asyā ka. |] iti 
viviktatāyāḥ | sadā iti paraṃ bodhayituṃ 

(page 383)

śaśvat ityasya vyākhyānam | svātmaniṣṭhataiva paramārthato 
viviktatvaṃ, tacca paraṃ jñāpayituṃ viviktatvaśuddhatvādivyavahāre 
sādhye hetutayā upāttaṃ sūtraṃ vivṛtaṃ tu siddhavadeva 
sāmānādhikaraṇyena | atra iti vyatirekeṇa abhāvavyavahāre sādhye | 
vastutattvamavalambya dūṣayati tathāpi iti | sāpi iti ghaṭe nāma dvitīyatā | 
anena tajjñānaṃ bhūtalajñānaṃ jātu kathaṃ bhinnābhāvasādhanam, 
apitu sadaiva syāt tādātmyābhāvasādhanavaditi sūtrārtho darśitaḥ | 
parakīyaṃ prasiddhilakṣaṇamabhiprāyaṃ sphuṭayitumāśaṅkate atha [atha 
bhinna ga. |] iti | bhinna iti vyatirekaprasiddhyā prakṛtaṃ ghaṭayati | yadātu 
iti siddhāntī tattvamuddhāṭayan naca iti dūṣaṇasya avakāśāya anuvadati 
evam iti ghaṭasāhityadiśetyarthaḥ | sahitatā nāma ghaṭena yā, sā na 
kācidadhikā bhūtalāt bhāti prameyataḥ pramāṇataśceti darśayati 
svākārādhikaḥ svajñāna iti | nanu daśādvaye'pi kiṃ prameyasya 
tāvattaiva, jñānasya vā,- ityāśaṅkya āha yo'pivā iti | nanu na ghaṭo 
bhūtalasya svabhāvaḥ, apitu tena sahitatā | sā ca bhūtalamityābhāse 
pṛthaganābhātā api asti vastutā iva | etat dūṣayati nacāpi iti | sarvadā iti 
asatyapi ghaṭe | nanu ghaṭena sā tasya kriyate sahitatā mṛtpiṇḍasya cakreṇa 
iva ghaṭatā | atra āha nāpi iti | evaṃhi sati kāraṇasya pūrvabhāvitvāt 
ghaṭakāle sā na bhavedityarthaḥ | bhavatu vā ghaṭasya tatra kāraṇatvaṃ, 
tathāpi bhūtalaviśrāntaṃ [ntiṃ ga. |] tadrūpaṃ ghaṭaṃ na apekṣate 
ghaṭena sahitateti | nanu cakṣurjanite'pi ālokaviśeṣe [ālokasya viśeṣaḥ 
vivarekakṣaṇā |] virekakṣaṇārambhakrameṇa cakṣuṣi astamite nāsti 
jñānasantānaḥ, nāpi 

(page 384)

dṛgādau, tadvadatra bhaviṣyati | etadapi na mṛṣyati ghaṭādarśane'pi iti | 
cakṣurādyadarśana iti veti manyate | anābhātaśca na kaścana kasyacit 
svabhāvo bhavati,- ityāha vastutvasya iti | vakṣyate iti 

	tathaiva sat............................................. | (2|3|5)

iti sūtre | naca idaṃ parasya mataṃ kāryānupalambhavyavahāramakurvataḥ, 
svabhāvānupalambho hi ayam | yatra iti yasyāṃ tattvacintāyāṃ 
kriyamāṇāyām | anena pramāṇataḥ prameyataśceti ubhayamukhamapi 
prakṛtamupadarśitamanvayavyatirekayogena | tat iti pradeśajñānaṃ sadaiva 
nirviśeṣatvāditi tātparyam | yaditu evaṃ syāt yathā saṃyogābhāve'pi 
saṃyuktaṃ tathāvastu ghaṭena janitaṃ tatsaṃnidhāna eva ca tathā gṛhyate 
tathā sahitatvamapīti, tadabhāve ghaṭasahitaṃ bhūtalamiti, tadapi asat | 
ghaṭo hi iti yāvacca kimasya grahaṇena | dhūmavat cedidamanumānametat | 
tacca pratibandhaṃ vinā kutaḥ | naca tajjñānameva tatsaṃvedanaṃ bhedāt | 
nanu sāhityābhāsanaṃ tarhi kim | vikalpanamātrametaditi brūte kevalam iti 
iyadeva idamadhikamatretyarthaḥ | etadeva yuktam iti vārtikagratthena 
saṃvādayitumupakramate ata eva iti prativiṣayaṃ paryavasyat 
vijñānamekamabhāgamapi sat yata ābhāsāntaravṛttāntamābhāsāntare 
na yojayati, tato hetorghaṭapaṭavijñānaṃ ghaṭe vyavasthāṃ 
paṭānapekṣatvena, paṭe'pi ghaṭānapekṣatvena vidhatte,- iti matvā 
evamuktavān | granthaṃ tadīyaṃ paṭhati ataḥ iti | ato'pi hetoḥ sā 
indriyamatiravikalpā [lpyā ga. |] siddhā | sāpi iti yā 
baudhāntarairevamātmatayā sādhyā,

(page 385)

yasmādekamarthaṃ manobhūmau vikalpayannapi tadaiva anyaṃ paśyati, tau 
ca vya...........parasparaviviktātmakāveva vimṛśati- idamutprekṣe, idaṃ tu 
paśyāmīti | yadihi parasparavṛttāntaniveśanena [niveśena na jñāna ga. |] 
jñānaviṣayau vyavasthāpayet, tadatra dṛśyatvavikalpyatve 
saṃkīryeyātāṃ, naca evamanubhava iti darśayati sidhyet iti tathaiva 
tatsiddhimarhati | prakṛte etat yojayati evaṃca iti jñānamubhayābhāsamapi 
na anyonyāpekṣaṃ vyavasthāpakaṃ vyavasthāpakatvāt | vyavasthāpanaṃ 
hi asaṃkīrṇaniścayotthāpanam | yadica anyonyāpekṣayā vyavasthāpayet, 
saṃkīrṇaniścayotthāpanaṃ bhavet | tadeṣā [eṣāṃ ga. |] 
viruddhavyāptopalabdhiḥ | vyavasthāpanānusāreṇaivaca prāmāṇyaṃ 
pareṇa upagatamiti smārayati bauddhasyaiva iti | ya eva itthamabhāve 
siddhiṃ vyavātiṣṭhipat sa eva tathā abhyupagatavān yathā etat 
prakṛtamasya vighaṭeta, natu 
anyadīyadūṣaṇoddhoṣaṇadaurjanyamasmākamāropaṇīyamiti evakāreṇa 
yattadvadadbhiḥ iti sūcitam | nanu evaṃ ghaṭabhūtalajñāne 
ghaṭamātrajñāne bhūtalamātrajñāne ca kimaviśeṣaḥ | aviśeṣa eva 
viṣayataḥ, svarūpatastu astyeva viśeṣaḥ | etadāha jñānaṃ ca iti | caḥ 
śaṅkādvāreṇa prameyāntarasamuccāyakaḥ | prakrānte jñāne kartari 
vastu ityādi karmapadam | prakṛtaṃ sūtrārthamunmīlayati evaṃca iti 
taddarśanam iti pradeśadarśanaṃ kartṛ | asatyapi iti ghaṭe | atra 
kāryānupalabdhyā ghaṭābhāvasiddhirbhaviṣyati,- iti 
parakīyamanubhāṣate ghaṭe sati iti | nobhayābhāsam iti anyat 
vyavacchinatti iti nyāyena svasaṃvedanādeva evaṃ vyavasthāpitaṃ tasya 
ghaṭasya dṛśyatvāt yadavyabhicaraṇīyaṃ kāryaṃ 
nijābhāsabhāgabhājanībhūtaṃ saṃvedanaṃ tasya abhāvāt |

(page 386)

etadanubhāṣya dūṣayati atra ca iti | pratītibādhādeva hi trastaḥ 
pratyakṣavikalpaśaraṇatāmabhāvasiddherabhyamaṃsta paraḥ, saca na 
upapadyata eveti darśitameva || 9 ||

	nanu vyatiriktābhāvapratītiḥ sarvalokaprasiddhā, sā ca na sarvadā, 
kintu ghaṭāsaṃnidhidaśāyāmeva | tat kimatra śaraṇam | iha yat yato na 
bhinnaṃ, tat tato vyatirekeṇa na vyavahāryaṃ bhūtalamiva bhūtalāt, 
tathāca ghaṭābhāvaḥ | vipakṣe hi nirnimittatā tathāvyavahārasya prasajet,- 
iti kāraṇānupalambhanaṃ, tataśca bhinna eva bhūtalāt ya ālokaḥ, sa eva 
ghaṭābhāvo bhūtalādheyatayā vyavaharaṇīyaḥ,- ityetadeva atra śaraṇam 
| etaducyate sūtreṇa 

	kintvālokacayo'ndhasya sparśo voṣṇādiko mṛduḥ |
	tatrāsti sādhayettasya svajñānamaghaṭātmatām || 10 ||

	kintviti vyatiriktavastvabhāvasiddhāvasti cirantanāparidṛṣṭaḥ 
praśnayogyo viśeṣaḥ | sa ca ucyate- iha raśmipuñjatatprabhādirūpa āloko 
vā ātapacandrikādisparśo vā kaṭhinaghaṭasparśavilakṣaṇo mṛdurbhūtale 
[mṛdubhūtastā ga. |] tāvadāvṛtaḥ kāryakāraṇatvaikasāmagrīkatvādinā 
jñāteyena vyavahriyate iti na apūrvam | sa ca 
ghaṭātmakaprasiddharūpasparśavilakṣaṇastadabhāvarūpastatra bhūtale 
svajñānena ālokādirūpasparśajñānena gṛhītaḥ | sa yadā vikalpyate 
pūrvoktayuktyā, tadā atra bhūtale ghaṭarūpavilakṣaṇo 
yadālokarūpapuñjaḥ iti yat vijñānaṃ, cakṣuravyāpṛtau vā 
karkaśakalaśasparśavilakṣaṇo'yaṃ 
śītoṣṇānyataramṛdusvabhāvasparśarāśiriti yat vijñānaṃ, tat tasya 
bhāsvararūpasya mṛdusparśasya ca anyat vyavacchinatti iti dṛśā

(page 387)

ghaṭarūpasparśābhāvatāṃ niścinoti,- iti sa eva tatra bhūtale 
ghaṭābhāvo vyavahriyate ya ālokastatsparśo vā,- iti iyatyeva nyāyāyātā 
gatirvyatiriktābhāvasiddhau nirvahati lokasya [tasya kha. |], sarvajñasya tu [tu 
na jñānanivṛttiḥ ga. |] jñānanirvṛttireva anyarūpā, tato mahāpralaye'pi 
svasaṃvedanajñānamātrātmā abhāvanirvṛttiḥ [bhāvanirvṛtti ga. |], tasya 
hi jñeyavyāpi jñānaṃ bhavatīti sūtrārthaḥ | ālokasya evaṃrūpatāṃ 
sthūladṛṣṭāntena sādhayati kvacit iti kevalabhūtalasaṃvit 
ghaṭābhāvaniścayanāṅgaṃ [bhāvaṃ kha. ga. |] na bhavatīti yāvat | 
nirantara iti śilopari saṃnihite'pi ghaṭe bhūbhāge tadabhāva iti yā 
pratītiḥ, sā śilāpratītireva | tadbhāva iti śilāyā bhavanaṃ, ādigrahaṇāt 
vāyvādiḥ, tamo'pi [na so'pi ga. |] keṣāṃcidrūpameva | tathāhi 
ābhidharmikāḥ 

	rūpaṃ tadā viṃśatidhā........................... | (a. ko. 1|10)

iti | yatrāpi ityādi tatrāpi ityuttareṇa saṃbadhyate | avāntare tu 
vṛttigranthaḥ paṭhito vyākhyātaśca | evamuttaratra | tasya yat 
sparśajñānaṃ, tat ghaṭābhāvaṃ vyavahārayati,- iti saṃbandhaḥ | 
andhasya iti anupalabhya iti pūrveṇa saṃbandhaḥ | kartari ṣaṣṭhī, 
apratighāti iti kuḍyabhittyādeḥ, pratigho nāma yo'sau sparśadharmo 
niḥsaraṇaniṣedhakṛt yasya nāsti | niyata iti vayaṃ tu 
ābhāsavastuvādino'bhāvaṃ viviktameva bhāvādupagacchāmaḥ | 
yaduktaṃ

	abhāvo'pi budhyamāno bodhātmabhūta īśvara eva |

iti | yukta iti vyatiriktābhāvasiddhaye iti bhāvaḥ | upayujyate iti 
vyavahārāya | saṃprati iti, anyadā paṭopayogādau 

(page 388)

sa eva āloka ucyate- paṭo nāsti- ityādinā vyavahāryeṇa rūpāntareṇa | 
naca nyāyamātrametat, apitu pratītirapi atra sākṣiṇītyāha vastusthiti iti | 
āvirbhāvayati iti niścāyayati, bhūtalameva [iha na kha. |] hi na apekṣate 
tadā, apitu taduparivartinaṃ paṭākāśamayaṃ [paṭāvakāśa ga. |] deśam || 
10 ||

	nanu asmin pakṣe tādātmyābhāva eva eko vyavahāryaḥ, na 
vyatiriktābhāvaḥ; tataśca āloko ghaṭābhāva iti kṛtvā pradeśe 
tanniścayākṣipto yathā ghaṭābhāvavyavahāraḥ, tadvat 
piśācābhāvavyavahāro'pi bhavedālokasyaiva piśācābhāvarūpatvāt,- 
ityāśaṅkya sūtraṃ 

	piśācaḥ syādanāloko'pyālokābhyantare yathā |
	adṛśyo bhūtalasyāntaraniṣedhyaḥ sa sarvathā || 11 ||

	ālokavyatirikto yadyapi piśāco'nālokātmako hi asau, tathāpi 
bhūtalasya iva ālokasya abhyantare so'pi na saṃbhāvyate | tataśca apiśāco 
yadyapi āloko'sti,- ityata āloko bhavan piśāco nāstīti vyavahriyeta, 
tathāpi na sarvātmanā tadabhāvasiddhiḥ | sarvathā iti niyamena 
bhūtalālokāpekṣayā yāvadgati ca vicāraṇā,- iti tridhā yojyam | 
piśācābhāvamātraṃ hi na sādhyam, apitu niyamena [niyamet kha. ga. |] | 
bhūtalāntare'pica saṃbhāvya eva asau yāvadgati ca vicārayiṣyate | 
tadevamālokāntarvartī sa syādeveti śaṅkāyāmarthanīyo 
niyamagarbhatayā tāvati vivakṣite [vivakṣati kha. vivakṣiti ga. |] deśe sa 
tādṛśo na tadabhāvaniścaya iti paradarśana iva uktadarśane'pi na kaścit 
doṣa iti sutrārthaḥ | taṃ saṃkṣipya vyācaṣṭe naca iti | evam iti vyatirekeṇa

(page 389)

abhāvavyavahāraprasaṅgo yaḥ śaṅkyate piśācasya, so'smatpakṣe'pi na 
avataratīti | caḥ prasaṅgaśaṅkāyāṃ hetuḥ | anālokarūpasya iti 
piśācasvabhāvatvādālokasya śaṅkyate'yaṃ prasaṅgaḥ iti tātparyam | 
śaṅkāniṣedhe tu hetuḥ antarlīnasya ityādi | tacca iti anyatvaṃ 
saptamyantaṃ yat vṛttāvuktaṃ antarlīnatāpakṣe | tatra iti vyākhyāte 
āloke antarlīnapiśāco na niṣeddhuṃ śaṅkyo'dṛśyatvāditi uktam | tacca 
acoditasamānam [samādhānaṃ ga. |] | evaṃhi prasaṅgaścoditaḥ [ṅgācco 
ga. |] pradeśe āloko'sti,- iti yadidameva piśāco nāsti,- iti prasajyeteti | 
anena āśayena anyathā upakramate sthūladṛṣṭipratyāyanāya athavā iti | 
sūkṣmadṛṣṭyā tu āloke prasaṅgatatpratiṣedhau kṛtau paryavasyata eva 
pradeśa ityādyaṃ vyākhyānaṃ na asaṅgatam | athavā yadyapi bhūtale 
āloko gṛhīta iti piśācābhāvo gṛhīta eva, tathāpi gṛhaikadeśe sphītāloke 
ghaṭābhāvo gṛhīto'pi yathā na 
samastagṛhāntarālaśaṅkitaghaṭābhāvavyavahāre kartavye'ṅgatāmupaiti 
gṛhaikadeśāntare santamasākrānte tatsaṃbhāvanāt, tathā 
pradeśavyavasthitālokamadhyavartitvena piśācasya saṃbhāvanāt tathā 
tāvadākāśadeśagatapiśācābhāvanibandhanavyavahārāṅgabhāvaṃ na 
upaiti,- iti tatrāpi tadabhāvaniścayaḥ kartavya eva | sa ca na sidhyati 
piśācākramaṇīye ālokamadhyabhāge tadālokānapasāriṇaḥ 
piśācatulyasyaiva anyasya kasyacidasmādṛśairanupalambhādityanayā 
bhaṅgyā vyākhyāntaraṃ karoti yadivā iti | 
ālokapradeśayorādhāratvamādhāratānāntarīyakavyatirekatātparyaṃ ca, 
- iti tridhā tatraśabdo vyākhyātaḥ | nanu pradeśe [piśāco ga. |] yadi 
vyatirekeṇa niṣeddhuṃ śakyaḥ, tarhi 

(page 390)

āloke'pi kiṃ tathā na śakyaḥ | āha pradeśāt iti ālokatādātmyena hi 
pradeśe niṣidhyeta | kiṃ saṃbhāvyate tāvat sarvātmanā hi tatrāpi tasya 
niṣedhaḥ śakyaḥ, iyat tu ucyetāpi pradeśe āloko'sti yat, tadeva piśāco 
nāsti,- iti | āloke tu kimanyadasti yat piśāco'pi nāsti,- iti syāt | tena atra 
vacanāvakāśamātramapi nāsti,- iti manyate | etadeva ghaṭayati tadāhi iti | 
pradeśe vā iti anena pradeśātmakaparamāṇusāntaravartamāna-
svaparamāṇukatadrūpasaṃbhāvanānivṛttiruktā pāramārthikī sautraṃ 
yathādṛśyo bhūtalasyāntar iti vyākhyātum | adṛśyatvamapi iti naiva 
kevalamanyatvaṃ piśācaniṣedhāyoge hetuḥ, apitu adṛśyatāsahitam | 
etadeva vyatirekeṇa sphuṭayati tasya hi iti | yat iti yasya ālokānapasārakasya 
dikkālātmaparamāṇvāderdarśanāt [tmaka kha. |] | kvacit iti āloke 
pradeśe vā asāvatīndriyadarśī piśācaṃ niṣedhet | sa hi iti 
piśācāderatīndriyadarśī | piśācasya yo'vakāśaḥ saṃbhāvyate 
bhūtalālokāntarālaprāyastadvyatiriktairātmadikkālādibhiḥ 
piśācarūpatvāsahiṣṇubhirālokaviśeṣarūpairevavā 
paramāṇubhirvyāptaṃ paśyaṃstānātmādīn piśācābhāvatayā 
vyavaharan piśācaṃ niṣeddhuṃ śaknoti,- iti saṃbhāvyate arhati, tato na 
atīndriyādarśino'tra śaktatādi asti | prakṛtameva spaṣṭayati nahi iti | 
ādigrahaṇāt digātmādi | ate eva iti | yataḥ piśācaḥ sarvajñasya api 
bhāsamāna ālokāvayavānāmālokaparamāṇūnāṃ yadrūpaṃ tadeva 
avakāśo deśastamutsṛjya parihṛtya bhāsate itaretarānāmiśrarūpatvāt 
bhāvānāṃ [bhāvanāṃ ga. |], tato hetoridamapi na āśaṅkanīyam | tadeva 
parāmṛśati

(page 391)

yathā iti iti ityantam | samānanyāyatāṃ yojayati nahi iti | piśāce'pi yatra 
eṣā gatirālokānapasārakābhimate, tatra tadviparīte ghaṭe kā 
iyamāśaṅkaiva | ālokāpasāraka eva tarhi ghaṭo niṣedhyo, na piśācaḥ 
ityāśayena āha athāpi iti | anāloka iti 
anyasāntaratārahitaikaghanālokarūpopalabdhyeti yāvat | atra uktameva 
samādhiṃ smārayati sphuṭīkartuṃ tadatrāpi iti | 
yadetadvacanamāśaṅkyate, tato vacanāt hetoridaṃ smāryate iti sambandhaḥ 
| nanu anyonyātmatve katham ekadeśāvasthāne'pi ityuktiḥ | āha tataśca 
iti | ālokāṃśasya yatra bhāge piśācasannikarṣeṇa avaśyabhāvyaṃ, tatra 
yo'nyo dṛśyate, so'piśācaḥ | nanu svarūpaṃ muktvā ko'nyo deśaḥ | atra 
āha bhūtamayānām iti | śabdādipañcakarūpāṇāṃ bāhyānāṃ 
pṛthivyādīnāṃ jñānavyatiriktānāṃ rūpātmanā deśena yat 
sambaddhamekasāmagryadhīnatvāt vā kāryakāraṇabhāvāt vā bāhyaṃ 
bhūtalādi, tadapi deśa iti pratibhāsata eva | tataḥ sannikṛṣṭadeśataiva 
abhinnadeśatā, ātmakālādayastu abhūtamayā iti ekadeśā bhavantu nāma 
| yatra hi darśane te santi, tatra sarvaiḥ saṃyuktā sarva eva te vibhutvāt, 
parasparaṃ tu asaṃyuktā iti anyat | na cāpi te kecitsanti | śabdādyā 
vijñānaṃ ceti ṣatpadārthamātraṃ hi viśvam | tatra śabdādyā 
bhūtamayā eveti bhūtamayagrahaṇam | jñānānām iti vā iti 
vaidharmyeṇa jñānasya hi svarūpavyatirekeṇa na deśo'nyo bhāti 
ekasāmagryadhīnaḥ kāraṇaṃ vā viṣayo'pi anādhāratvena bhāsate yataḥ 
samakakṣyatvābhāvena tadyojanābhāvāditi darśitaṃ 
bahuśaścetyadharmadeśakālasamarthanaprastāve | deśāntaraṃ 
svarūpadeśādanyo deśastena yo'vacchedastadādheyatāyogaḥ, tena ca 
śūnyatā yadi syāditi 

(page 392)

anyathāśabdasya arthaḥ | tathāca iti | yato vyatirikto'pi deśaḥ, tena 
prakāreṇa idaṃ prameyāntaramiti caḥ | ālokaviśeṣa 
uṣṇasparśaviśeṣaśca kaścideva piśācavadeva asya svabhāvaḥ | 
arvāgdṛśāṃ yaḥ piśācasya deśa ādhāraḥ saṃbhāvyate, sa eva 
piśācāsannidhau dṛśyamānaḥ- piśāco nāsti- iti sarvajñena 
vyavahriyate | nanu ca yatra madhye na kaścit dṛśyate, tatra rūpādayaḥ santi, 
- iti kutaḥ, tat kathamuktaṃ sa eva ālokarūpaviśeṣātmā deśaḥ 
piśācābhāva iti | atra āha rūpādayo hi iti madhyavartinaḥ 
kasyacidadṛśyatve'pi; yadyapi madhye na kiñcidālokyate, tathāpi 
rūpādayastathā tatra paramāṇutayā sthitā yathā ta eva asmadādibhirna 
dṛśyante, sarvajñena tu dṛśyanta eva | paramāṇūnāṃ ca na 
vaicitryamapūrvamiti darśayati tataśca iti | na tathā iti pratighātino'pi na 
atyantaṃ tathetyarthaḥ | dūrataram iti yathā tatra cchāyā dṛśyate tamasā 
kṛtena sāntaratvena vyavahitatvena vibhinnaṃ sajātīyatāvandhyamantaraṃ 
yeṣāṃ tāni sāntaravyantarāṇi, madhye vā tamasā sāntarāṇi 
vyantarāṇi, madhye tamaḥśūnyatayā sāntaratvena vā vyantaratvena vā 
vicitrīkṛtamadhyāni | sahaiva iti sve sve sthāne nivartayanti 
svadeśādapasārayanti asamarthanakṣaṇotpādanakrameṇa nivartyante, 
svadeśādapasāryante tathaiva | evam iti 
asmaddṛśyatamaḥprabhṛtibhāvāntaraparamāṇutulyā eva 
piśācaparamāṇavaḥ sarvajñasyetyarthaḥ | piśācābhāve tu piśācena yat 
pūrvamākrāntamantarālaṃ, tatra ālokaparamāṇava eva dṛśyamānāḥ 
sarvajñasya piśācābhāvavyavahāraviṣayībhavanti | nanu tattadātmādi 
padārthāntaramapi paśyan sarvajño vyatiriktaṃ piśācaṃ kathaṃ niṣedhet 
sati asati vā piśāce teṣāṃ svarūpaniṣṭhatvānapāyāt | 
vyatiriktapiśācābhāvo'nayā 

(page 393)

bhaṅgyā sarvajñenāpi duḥsādha eva | evaṃ tarhi kimanena prayāseneti 
darśayati athavā iti yat kiñcit yadyasti, tat tena draṣṭavyaṃ; tatastatra cet na 
paśyati piśācaṃ nāstyeva asau tatra ca sarvameva tatratyaṃ vastu 
piśācasahitaṃ tadbhāvaviviktena jñānāntareṇa vedyam, yadivā tadeva 
jñānaṃ tasya piśācābhāvavyavahāraviṣayaḥ iti na 
antarālavartiparamāṇvantarānusaraṇena kiñcit | nanu asmadāderapi evaṃ 
kasmāt na bhavati | ucyate arvāk iti | parimitaṃ yaḥ paśyati, tasya na 
jñeyamasti,- ityevaṃ jñānamutpadyate yena jñānameva 
sahitajñānalakṣaṇamabhāvavyavahṛterhetuḥ | yatra tu utpadyate iti niścayo 
jighrata iva rasayata iva avadadhata iva spṛśata iva 
gandhādijñānāvaśyakasaṃbhāvanāt, tatra gandhādijñānanivṛttireva 
śvāsapraveśanajñānādirūpāvyatiriktagandharasaśabdasparśābhāva-
vyavahārahetureva | tato yadyapi amunā ālokaṃ pradeśameva vā gṛhṇatā 
piśācābhāvo gṛhītaḥ piśācānyatvāt tayoḥ, tathāpi prādeśiko'sau 
gṛhīto'pi agṛhītakalpaḥ pradeśe āloke vā bhinnasya asya 
saṃbhāvanānivṛttikāraṇābhāvādetāvati [vatī ga. |] bahubhiḥ 
prakārairapi ukte vastuni | nanu yadi piśācasya aniṣedhyatāyāmadṛśyatā 
hetuḥ, tarhi ghaṭāderniṣedhyatāyāṃ

	............................ṣvajñānamaghaṭātmatām | (1|7|10)

ityādyuddeśeṣu dṛśyatā hetutvena nirdeśyā | na,- ityāha siddham iti | ya 
idānīṃ sarvo niṣedhastādātmyaniṣedhaparyavasita eva, tatraca 
avyabhicaritaṃ dṛśyatvam | tathāhi hetubinduḥ ? viśeṣaṇaṃ vācyamiti | 
evaṃ prasaṅgādabhidhāya prakṛtameva arvāgdarśane'pi piśācasya 
aniṣedhyatvamanubadhnāti adṛśyatve'pi iti | 

(page 394)

yadi ālokaḥ paramāṇuśo dṛśyo bhavet, tadā paramāṇuṃ paramāṇuṃ 
gaṇayato nirantaratvena bhavet buddhiratra sthāne yaḥ piśācaparamāṇuḥ 
saṃbhāvyate, tadvilakṣaṇo'yamālokaparamāṇureva 
piśācaparamāṇvabhāvasvabhāvaḥ, paramāṇvantare'pi evamiti 
piśācaparamāṇavaḥ śakyeran pradeśe ghaṭavat 
nirākartumālokaparamāṇūnāmeva tatra piśācaparamāṇvabhāvatvāt, 
natu paramāṇuśo darśanamasti sthūlaikaghanavitatapratibhāsāt tanmadhye 
ca parimitatimirādiparamāṇuvat [paramāṇuvarapiśāca kha. |] 
piśācaparamāṇūnāmapi śaṅkanīyatvāt | evamālokasya paramāṇuśo 
dṛśyatve syāt piśācābhāvasiddhirarvāgdarśanasyāpi,- ityuktamapi 
yāvadgati vicāryam [vicāramātraṃ kha. |], natu etat 
sthitamartharūpamityāha athavā iti | paramāṇuśo'dṛśyatve'pi yadi 
nairantaryapratighātakāḥ piśācaparamāṇavaḥ saṃbhāvyeran, tat 
sāntaratvābhāve bhavet tanniṣedho, natu evam | 
rasagandhasparśaparamāṇavo hi yathaiva adṛśyatvena santo'pi na 
ekaghanarūpapratyayaṃ nighnanti, tathā paiśācāḥ paramāṇavo 
rūpamayā api asmadādicakṣuragocarā eva | 
atasteṣāmantarālarūpāṇāmagrahaṇenaiva asaṃhatatvaṃ gṛhyate yathā, 
tathā pradarśitaṃ vitatya bāhyārthasiddhāvupādhyāyadharmottareṇa | 
pradeśamadhye'pi piśācaniṣedhasya aśakyatā itthameva anusaraṇīyā | 
tataśca yathā bhūtalasya antar ityapi sautramanusṛtaṃ bhavati sarvathā 
ityapi vyākhyātaṃ bhavati | iyatāpica yāvadgativicāreṇa sarvathāśabdaḥ 
sautro vyākhyātaḥ iti upasaṃharati tataśca iti | 
prāsaṅgikadoṣapraśamanaparamidaṃ sūtraṃ pūrvasūtrārthasya 
avicalatāmādhātumiti tadeva anusandhatte avaśyaṃ ca iti | ayameva iti 

	...............ālokacayo'ndhasya sparśo vā............... | (1|7|10)

(page 395)

itiprastāvena tādātmyābhāvo ya uktaḥ | yatsaṃvedanam iti yasya 
jñānasya saṃvedanaṃ bhūtalasaṃvedanasthānīyam | tasya iti jñānasya 
bhūtalasya iva grāhakaṃ pratyakṣaṃ bhavet yena rūpajñānābhāvaḥ 
pratyakṣataḥ sidhyediti vyavahriyate, tat tādṛśaṃ vijñānaṃ na kiñcidasti, 
- iti yāvat | nanu sparśajñānasya yat pratyakṣaṃ svasaṃvedanaṃ, tena yata 
ekameva sparśajñānaṃ gṛhītaṃ, na rūpajñānaṃ; tataḥ 
kevalabhūtalajñānatulyādekajñānasaṃsargayogyajñānāntaraniṣedhaḥ 
syāt | syāt satyaṃ, yadi rūpajñāne bhavatyapi tadeva 
sparśajñānasvasaṃvedanaṃ rūpajñānasvasaṃvedanākārāntaraṃ 
bibhṛyāt; natu evaṃ svapne'pi,- iti nirūpyate nahi iti 
ghaṭetyādivaidharmyāśayena | atra hetumāha jñānadvitva iti tasya 
saṃvedanasya jñānasvarūpagrāhakasya ekatvaṃ na upapadyate | nanu 
vedyabhūte cet dve jñāne [dvaitajñāne ga. |] ghaṭabhūtalatulye, tat 
kimāyātaṃ tatsaṃvedanasya | āha-jñānasvarūpāt vijñeyalakṣaṇāt 
tasya abhedaḥ | atrāpi hetuḥ svasaṃvedanatvameva | 
evamekajñānasaṃsargasya samastābhāvavyavahāravyāptyabhāvaṃ 
pradarśya arthasya nyāyasya vyāpakatvaṃ darśayati ukta iti | 
turviśeṣadyotakaḥ | tatsattaiva iti niyamavatī rūpajñānasattā vyavacchinne 
svasaṃvedane nirbhāsamānā rūpajñānābhāvavyavahārāspadam | nanu 
iyatā sparśajñānatādātmyāpannaṃ rūpajñānaṃ kāmaṃ niṣiddhaṃ, 
tatsamaye tu dvitīyasya vyatiriktasyaiva rūpajñānasya kathamabhāvaḥ 
sidhyati | ucyate kāryābhāvāt iti | rūpajñānaṃ yadi bhavet 
sparśajñānāvasare, tat sparśajñānāt yo jāyate vikalpaḥ, sa 
rūpajñānādapi jātaḥ iti rūpasparśobhayavikalpanavyāpāraṃ 
vikalpajñānaṃ svasaṃvedyaṃ bhavet, naca tat tathābhūtamastīti | atraiva 
dṛṣṭāntamāha pradīpe'pi iti yathā pūrvaṃ rūpadarśanāt 

(page 396)

pratighātakāraṇānāpātācca niścitasvanetrasadbhāvo'ndhakāre 
pradīpābhāvaṃ rūpajñānasya kāryasya abhāvāt niścinoti, tathā 
viśiṣṭavikalpātmakakāryābhāvāt rūpajñānasya abhāvādamunaiva 
nyāyena sahitatvarahitatvābhāvasvarūpavāde'pi rahitāt pradeśāt 
kāraṇasya ghaṭasya abhāva iti anumānataiva bhavet, natu sa eva sa ityalaṃ 
bahunā | etāvat iti natu eṣāmanyā gatirvahatīti yāvacchakti vimṛṣṭaṃ 
paradarśanamiti vadan vikalpo'pi pṛthageva astu svasaṃviditaḥ 
ityādidūṣaṇāntarasaṃbhāvanamatrāpi syāt,- iti darśayan 
ekasaṃvedanābhyupagamena idamapi na kiñcit,- iti sūcayati | tata eva āha 
yuktaṃ tu ityādinā | anena śabdarasagandhānāmabhāvo'pi 
samagrasāmagrīkatve'pi siddhe jñānātmakakāryābhāvena samarthitaḥ, 
tajjñānābhāvaśca tatsvasaṃvedanābhāvena, 
antarnādakāyasparśadantodakarasatripuṭikāgandhasaṃvedanena tu kāmaṃ 
bāhyaśabdādinirāso bhavet, ākāśadhāraṇāsamāpannasya tu 
samastatadabhāvavedanaṃ kathaṃ samastaśabdādyabhāve yoginastadā 
niścetavye nāsti avakāśaḥ ekajñānasaṃsargayogyavastudvayānyatara-
niyatavijñānāvaseyatāsamarthanasya,- ityalaṃ bahunā || 11 ||

	nanu evaṃ bhavatprasādhitenaiva nyāyena pramāṇabhūtaśuktikā-
rajatābhāvānyatarajñānaprāmāṇyasaṃvedanameva 
tadanyarajatajñānaprāmāṇyābhāvajñānaṃ siddhameva | satyaṃ 
siddhaṃ, tathāpitu sādhyaṃ na siddhamiti darśayati sūtreṇa

	evaṃ rupyavidābhāvarūpā śuktimatirbhavet |
	na tvādyarajatajñapteḥ syādaprāmāṇyavedikā || 12 ||

anena hi śuktikājñānasya na idaṃ rajatamitijñānasya vā

(page 397)

svarūpacintā kṛtā bhavati, natu tato vyatiriktasya ādyarajatajñānasya 
kiñcit khaṇḍitaṃ maṇḍitaṃ vā | ghaṭajñānaprāmāṇye hi 
prācyapaṭabodhāprāmāṇyarūpe saṃvidite'pi prācyasya paṭabodhasya na 
kiñcit kṛtaṃ bhavatīti sūtrārthaḥ | asadviṣayatām iti aprāmāṇyam | 
iṣyate iti saugataiḥ | tacca iti pūrvasya aprāmāṇyam | etāvattu iti ayaṃ 
bhāvaḥ- asti tāvadeṣā pratipattirloke, sā tu kiṃpramāṇarūpā,- iti 
cintyam | yadi pratyakṣātmikā, tadasmaddarśanameva vijayi; atha 
anumānātmikā, tat na upapadyate,- iti samanantarameva sūtreṇa vakṣyate || 
12 ||

	nanu idamityanena tadeva avamṛśyate yatra rajatajñānamabhūt, 
tatraiva ca na idaṃ rajatamiti śuktikā veti jñānamuditamidānīm, naca 
ekamekadā rūpadvayayogi,- iti na jñānadvayaṃ pramāṇaṃ 
bhavitumarhatīti ānumāniko bādho bhaviṣyati | tatra [atra kha. |] etadeva 
tāvat na siddhamidamityanena tadeveti anumānaṃ ca na upapadyate | asti ca 
bādhavyavahāraḥ, so'smannaya eva upapannaḥ,- iti sūtraṃ

	dharmyasiddherapi bhavedbādhā naivānumānataḥ |
	svasaṃvedanasiddhā tu yuktā saikapramātṛjā || 13 ||

	apiśabdo bahumukhaṃ yojyaḥ | anumānato'pi naiva bādhā 
dharmiṇo'pi hetorapica asiddheḥ | naca dūrānusaraṇena iyaṃ 
bādhapratītiḥ, apitu svasa.vedanenaiva tataśca avaśyasamarthanīyā api 
ekasmiṃstu pramātari sati tasmāt svatantrāt sā jāyate,- iti sūtrārthaḥ | 
tamavatārayati anumānamapi iti iyato'dhikaprameyatvādiyadeva 
avatāritam, śiṣṭaṃ tu prāktanārthanigamanameva | śuktijñāna iti 
hetorasiddhiṃ vyācakṣāṇo dharmyasiddhiṃ tadupayoginīṃ 

(page 398)

karoti pakṣadharmatvābhidhānaprathamarūpaprasādhako 
hetordharmyupayogaḥ ityāśayena | anyathā hetoḥ sādhyaṃ sidhyati, kiṃ 
tatra dharmiṇā,- iti śaṅketa kaścit | hetuḥ iti aprāmāṇye rajatajñānasya 
sādhye | nanu svarūpāsiddha eva kasmāt na ayamucyate yatra 
dharmyasiddhimukhaprekṣitā na ālambanīyā,- ityāśaṅkya nyāyaṃ 
vyutpādayati svarūpa iti | iha hetusvarūpameva svarūpaṃ, na 
vastusvarūpaṃ yena śaśaviṣāṇaṃ svarūpāsiddhaṃ bhavet, hetośca 
niyatadeśakālāyogavyavacchedena sādhyasādhakatvaṃ nāma 
svarūpamāśrayāyattam | tataśca yasya āśrayo na kaścit vākyāt pratīyate 
- anityaḥ śabdaścākṣuṣatvāditi, sa svarūpeṇaiva niradhiṣṭhāno bhavan na 
kiñcidiva sampannaḥ śabdagatasya tasya abhāvāt 
anyarūpādiniṣṭhatāyāśca pratītyasaṃsparśāt | tato'yaṃ 
svarūpāsiddha ucyate | śuktijñānasatyatvaṃ tu yadyapi anyatra na siddhaṃ, 
tathāpi svarūpeṇa bhātyeva anyanirapekṣasya tasya pratītiviśrāntipadatvāt 
| nanu evamapi śuktikāyāṃ jñānasatyatve śuktikājñānena adhikaraṇe 
satyatvaṃ siddhamapi adhikaraṇāntare prakṛtarajatajñāne na siddhamiti 
vibhinnādhikaraṇatvena asiddhametat | astu evaṃ ko doṣa ityāha 
vyadhikaraṇa iti kākasyetyanupātte tu svarūpāsiddha eva vā ayamiti 
mantavyam | nanu evamāśaryāsiddhatvaṃ kasmādabhyadhāyi | ucyate, sa 
vyadhikaraṇāsiddhasya api adhikaraṇāntarasaṃbandho na doṣāya, apitu 
taddvāreṇa āśrayeṇa yaḥ saṃbandhaḥ, sa eva | nanu kāka eva āśrayo'stu 
| na,- ityāha prakṛta iti | svarūpeṇa iti | dharmasya anyadharmyāśrayatvena 
dharmatayā, dharmiṇaśca anyadharmādhāratvena dharmitayā siddhāvapi 
satyāṃ tena dharmiṇā āśrayeṇa dharmatā, tena ca dharmeṇa āśritena 
tasya dharmitā,- ityevaṃ 

(page 399)

yā saṃyojanā, tasyā asiddhiryā, sā āśrayāsiddhirvā 
vyadhikaraṇāsiddhirvā vyapadiśyate | evamasiddhasya prakāre 
vaicitryamuktvā prakṛte viśiṣṭamasiddhaprakāraṃ darśayati ihatu iti | 
purā iti bādhakakāle | bādhyarajatajñānāt pūrvameva śuktijñānaṃ, 
tadevahi rajatajñānasya smārakaṃ virodhena saṃbandheneti tadeva 
rajatajñānamaprāmāṇye sādhye dharmīcikirṣitam tadā iti 
hetvabhimataśuktikājñānasatyatāsaṃvedanakāle naiva siddham | nanu na 
rajatajñānaṃ dharmīkariṣyate, apitu śuktikaiva | etadapi na sahate tasya...ṭi 
tadānīmityāśayaḥ | etadeva siddhasādhyatvaṃ ghaṭayati nahi iti | 
śuktikājñānasya yo'dhunā vartate viṣayaḥ, sa rajatajñānasya 
prākpravṛttasya api adhunā na viṣayaḥ iti hi daivaraktāḥ kiṃśukāḥ | nanu 
siddhasādhanaṃ kiṃnāma dūṣaṇaṃ, sādhyaṃ hi tāvat siddham, 
anumānasya punarastu vaiyarthyaṃ na kiñcit siddhamiti darśayati naca iti | 
nanu yathā parvataṃ tadgataṃ ca dhūmaṃ dṛṣṭvā kāryāntaratvarayā 
ananumitavahnireva apakramya prasthitaḥ san smṛte adrau dharmiṇi 
vahnimattaṃ prācyasamayabhāvinīmadhunaiva apūrvatayā sādhayati, 
tathā smṛte rajate tajjñāne vā adhunaiva asattāṃ bahirapramāṇatāṃ vā 
sādhayet | sādhayet yadi dhūmamiva hetuṃ smaret, smarecca, yadi anubhavet, 
naca anubhavo'sti,- ityācaṣṭe naca iti | syādetat, yathā adhunā 
dṛśyamānāt bhittimālinyādiviśeṣāt pūrvavṛttaṃ dhūmamanu sā 
vahnyanumā, tayaiva satyatayā mūlasādhyayā vyāptastadgamako yo 
dharmo hetūcikīrṣitaḥ sa idānīṃ hetvantarādanumāyiṣyate, tataśca 
astyatānumānaṃ bhaviṣyati | atra ucyate śuktikā iti | nahi 
tathābhūtasādhanaṃ dharmasādhakahetvantaramasti | asti hi tadā śuktiḥ, 
tajjñānaṃ, 

(page 400)

tatprāmāṇyaṃ, tatsvasaṃvedanaṃ ca | sarvaṃ ca etat anyatra sve sve 
āśraye vartate iti vyadhikaraṇameva | evaṃ smaryamāṇasya 
dharmitāmabhyupagamya dūṣaṇamuktaṃ, adhunā tāmeva na sahate rajate 
ca iti | parvate hi smaryamāṇe vastutā asti, natu rajate, rajatajñānaṃ tu 
kevalamadhyavasīyate iti adhyavasite yat sādhakaṃ, tat vastubhūtaṃ 
jñānena kiñcit sādhitaṃ bhavati | bāhyaṃ hi dṛśyaṃ vikalpyatayā 
adhyavasitamiti abhedādhyavasāyāt bhedānadhyavasāyāt vā vikalpena 
spṛṣṭamucyatām, asti [astu kha. |] ca

	śabdārthastrividho dharmī bhāvābhāvobhayāśrayaḥ |

ityādibāhyābhimatapradhānādiviṣayamanumānaṃ taddharmīkartuṃ 
[kartuṃ natu kha. |] śakyaṃ, natu evaṃ svasaṃvedanamavikalpyatvāt tasya | 
etacca bhavadbhireva svasaṃvedanasya avikalpatāmupapādayadbhiḥ 
[vikalpakatāṃ kha. |] 

	aśakyasamayo hyātmā sukhādīnāmananyabhāk |
	teṣāmataḥ svasaṃvittirnābhijalpānuṣaṅgiṇī | (pra. vā. 3|249)

iti vadadbhiḥ prasādhitameva | nanu asti eṣā pratipattiḥ- tat rajatajñānaṃ 
tadeva pramāṇaṃ na abhūditi adhunaiva mayā jñāyate 
śuktijñānānubhavāt hetoriti | bāḍhamasti, sā tu bhavanmate na kathañcit 
yujyate, asmanmate eva tu yujyate | tadāha asmākaṃ tu iti | tuśabdena 
yadyapi viṣayoparāgakṛtaṃ kālabhedaṃ saṃvedane'bhimanyante 
māyāpramātāro vedyāṃśapravaṇībhūtahṛdayatayā tata eva bhinnāni 
jñānāni,- iti vyavahriyate, tathāpi teṣāṃ pāramārthikaṃ 
rūpamabhinnameva,- iti śuktijñānasvasaṃvedanāvadhau 
rajatajñānasvasaṃvedanatā api māyoparāgayogāpagamāt sthitaiva | 
māyāvidyobhayasāro hi ayaṃ

(page 401)

vyavahāro na ekapariniṣṭhayā nirvahati | tatastasya rajatajñānasya 
dharmiṇaḥ sādhyamapramāṇātmakamananuvṛttidharmavimarśakatvaṃ 
nāma yat, tat śuktikājñānasatyatayā sādhyate | evaṃ 
parvatajñānadhūmajñānayoḥ smṛtisvasaṃvedane adyāpi bhāvāt 
tatprakāśyatvena sthitasya parvatasya 
dharmiṇo'vasthitadhūmajñānaprakāśyāt pūrvasmādeva pūrvameva 
agnimattvasiddhiḥ śakyasamarthanā | anyathāhi kaḥ parvataḥ, kaśca 
dhūmaḥ | nahi smṛtau tayoḥ prakāśanamasti | nirviṣayā [nirvimarśā] hi 
sā, tataśca sarvātmanā aprakāśamānasya dharmitā, hetutā ca,- iti 
gaganasya śaśaviṣāṇatūlikācitrollekhā | tat tadaparaṃ [apūrva kha. |] 
pūrvasiddhaṃ saṃvedanīyamaprāmāṇyalakṣaṇaṃ dharmāntaraṃ yasya, 
tasya bhāvastena aprāmāṇyena dharmāntareṇa saṃbandhaḥ, sa eva 
viśeṣastasya jñānābhidhānātmā yo vyavahārastat 
rajatajñānamapramāṇamiti tatsādhanakāle dharmitvamupapannaṃ 
kālabhedenāpi sthitānāṃ rajatādijñānānāmiti saṅgatiḥ | 
evamasmākameva idamupapannaṃ, natu bhavatāṃ kathañciditi 
tuśabdadyotitamupapādya prakṛtameva paraparākaraṇamanusarati naca iti | 
evam iti anumānānusaraṇena | atra hetuḥ jhagiti iti | anumāne hi 
dṛṣṭāntānveṣaṇānavastheti paryante'pi etat 
svasaṃvedanasiddhatvamaṅgīkāryamiti bhāvaḥ | etadupasaṃharati evam iti | 
na pratyakṣatayā, na anumānatayā śuktijñānaṃ 
rupyajñānāpramāṇatvavedanaṃ; tat na rupyajñānasya bādhyatā, nāpi 
śuktijñānasya bādhakatā sidhyati, svadarśane tu upapadyate iti 
darśayannavāntaraṃ sautraṃ vyācaṣṭe yāvat iti | eka āśraya idamiti 
purovartī, tadavaṣṭambhinau tadaparityāgena sphurantau saṃvedyau 
yasmiṃstādṛgavabhāsanaṃ prakāśanavyāpāro yāvadeva 
vikalpabuddhestāvat 

(page 402) 

taditi anyonyaviparītasaṃvedyadvayaṃ bahirviruddhe parasparataḥ iti kṛtvā 
bādhakamavasthāpyate; dvitīyaṃ ca bādhyamiti arthāt | adyāpitu 
bādhakatā na niyatīkṛteti bādhyam iti na sākṣāduktam | sarvatra ca 
ayameva vyāpako vidhiriti kathayati bhāvābhāvādeḥ iti | nanu bahiriti 
kimāśayena uktam | āha vikalpastu iti | nīlameva tadaiva tasyaiva 
anīllamityapi hi bhavati vikalpāvabhāso, natu tatra bādho'sti, tatkāraṇameva 
tatra virodhalakṣaṇaṃ nāsti; tat kā atra bādhasaṃbhāvanā,- iti 
vāśabdaḥ | nanu satyavikalpitam, asatyavikalpitamiti bhedena vyavahāro'sti; 
tatkathamuktaṃ nātra bādhaḥ ityādi | tatra [atra kha. |] ucyate- 
pratyakṣamavabhasaṃ dṛśyameva bāhyarūpamapekṣya vikalpena 
miśrīkṛtya sa iti bādho virodho vā; yadi vā [yadā vā kha. |] seti 
saṃbhāvyate cet tat syāt saṃbhavedapītyarthaḥ; tarhi vikalpamahimaiva 
bādhe pratapati, vikalpaśca anubhavāt yadi uttiṣṭhati, tat kiṃ pramātrā 
kalpitena,- iti bauddhamuccāṭayati vikalpa iti | nanu anubhavo'pi 
kāraṇamiṣyate vikalpasya asmābhiḥ, pramātṛsvātantryaṃ ca tatra 
adhikamupayujyate iti darśayituṃ mātrapadam | tatra iti 
yathāsthitakālabhedena bhinnābhāsadvayamātravyavahāriṇi vikalpe | 
yadā punaḥ iti svadarśane | svatantre iti | naiyāyiko'pi hi 
kālabhinnajñānaguṇadvayasamavāyinamaṅgīkṛtya api tadāśrayamekaṃ 
na samarthayituṃ śaknayāt, tasminneva hi ākāśe yadi pūrvaṃ 
samudraghoṣaḥ, tato'pi paṭahadhvaniḥ; tāvatā kiṃ kasya viruddhaṃ, 
viṣayaikyamapi tayoḥ kena jñānena gṛhyeta, vikalpajñānaṃ 
pramāṇabhūtamapi svaviṣayamātraṃ vyavasthāpayet, na 
jñānāntaraviṣayam; jñānasya jñānāntaravedyatve'pi

(page 403)

jñānajñānamastu aparaṃ jñānaviṣayameva,- iti 
svasaṃvedanātmakasvatantrapramātṛtattvābhyupagama eva 
samasteṣṭasiddhiḥ, pramātā ca śaṅkhavastu vikalpajñāne 
viruddhamavabhāsayati | kena prakāreṇa viruddham | āha ............... 
śuklatayā | sa tāṃ kathaṃ jānāti | ucyate śukla ityādi | tat śaṅkhavastu 
kadā asya prakāśitam | āha tadābhāsa iti | nanu kālabhedena 
tathābhātaṃ, tat kena anayorvirodhaḥ, sakṛdābhāsahetukastu virodhaḥ | 
hetau śatā | nanu kālabhedena anubhavo vṛttaḥ, tat 
sakṛdābhāsatvamadhunā kutastyam | āha- yat 
taddvārabhūtamābhāsadvayaṃ, tadanyonyāpekṣaṃ prakāśate | kutaḥ iti 
cet, vastuta aikyāt | yadeva pītamiti prakāśeta, tadeva śuklamiti prakāśate 
yataḥ | nanu iyatā api kathaṃ virodha ityāśaṅkya tatsamarthanāya 
hetumāha yatraiva ityādi virodhāt ityantam | nanu etāvatā virodho 
bādhe.....(?) virodhe ca ekāśrayatvamidamityavaṣṭambhena dvayorutpattau 
virodhonmīlanāt, tat punarapi na ekapramātṛkṛtyaṃ kiñcit 
pradarśitamityāśaṅkya āha eṣa iti | virodhasya kāraṇaṃ 
yadekāśrayatvaṃ, tat sati ekasmin pramātari jñeyaṃ, natu asati | atraiva 
dṛṣṭāntadvayamāha yathā iti | ghaṭapaṭayoreko deśo gṛhādiḥ, tena 
prātipadikārthā eva śuddhaḥ sahasaṃvedane'pi gṛhītā iti 
vibhaktyantarārthaprāṇe jñāteye pramātureva prabhāvaḥ,- iti āloke'pi 
ghaṭābhāve atra bhūtale ityaṃśe pramātṛprabhāvaṃ vinā nāsti 
gatyantaram | nanu iyatā virodhaḥ samarthitaḥ, tathāpitu kiñcideva 
bādhakamiti kiṃkṛto niyamaḥ | tatra āha evaṃca iti śuktikājñānaṃ 
svasaṃvedanapatitaṃ, śuktikayā arthakriyā kṛtā,- iti jñānaṃ yataḥ 
upacīyate, tataḥ śuktikājñānaṃ balavat 
bhūtamarthakriyājñānānupraveśaśūnyābhāvaparidurbalaṃ tat 
svasaṃvedanapatitameva rajatabodhaṃ 

(page 404)

bādhate tadvimarśamunmūlayat | nanu kimatra saṃvādabalena | āha nahi iti 
| śavalasya iti himarajatamakkolatrapuśakalakādisaṃvidāndolanacitrasya | 
ata eva iti yataḥ parataḥ saṃvādo, natu tadaiva; tasmāt so'pi 
ekapramātṛtattvādhīnaḥ | tatra iti pramātari bhāvābhāsau 
śuktikālakṣaṇau na virudhyete yataḥ | evaṃhi tatra tau viśrāmyataḥ- yā 
śuktikā mayā dṛṣṭā saiva iyaṃ adhunā arthakriyāyāṃ pravṛttā- iti | 
tena virodhamupakrame, saṃvādaṃ niṣṭhāyāṃ yāvadeva 
bādhyabādhakabhāvo'pekṣate tāvat virodhasaṃvādo yaḥ 
pramātraikyanibandhanatvāt, so'pi pramātrāyattaḥ eveti sthitam | 
yadadhīnabhāvādhīnaṃ yat bhāvāntaraṃ, tat tatsannidhāveva bhavati 
dhūma iva kāṣṭhādisāmagryadhīnavahnyāyattaḥ; tathā ca 
pramātrekatādhīnavirodhasaṃbādabodhādhīno bādhavyavahāraḥ iti [iti 
bhāvaḥ kha. |] svabhāvaḥ, vipakṣe [vikṣepe ca ga. |] ca 
ākasmikatvaprasaṅgato vyāptiḥ || 13 ||

	etadupasaṃharan vyavahārāntaramapi samanvayarūpatvāt satyeva 
pramātari bhavati, na anyathā,- iti darśayati sūtreṇa

	itthamatyarthabhinnārthāvabhāsakhacite vibhau |
	samalo vimalo vāpi vyavahāro'nubhūyate || 14 ||
	tattadvibhinna................................................ | (1|7|2)

ityādisūtradvayadarśitānvayavyatirekarūpeṇa upapattiprakāreṇa 
sūtrāntaranirūpitakāryakāraṇabhāvādyudāharaṇaprakāreṇa ca 
idamāyātam- yaḥ kila vibhau deśakālānavacchinnasaṃvedanasāre 
bhagavati svatantre 
māyāśakyupakalpitacidabhedākhyātisārabhedamātraparamārthaiḥ 
pratibimbakalpatayā anatiriktairapi atiriktābhāsairarthairnīlasukhādibhiḥ 
khacite svarūpānanyathābhāvena uparakte viśrāntaḥ sarvo

(page 405)

vyavahāro dṛḍhena anubhavapramāṇena niścīyate; sa dvidhā-samalo 
māyāndhānāṃ krayavikrayavivādādiḥ, nirmalaḥ 
pratyabhijñātātmaparamārthānāṃ pārameśarūpāveśalābhāt 
viśeṣadṛśi vīreśavyapadeśānāṃ, natu lākulādipaśūnāṃ; 
vidyeśvaraprabhṛtīnāṃ dīkṣitaparyantānāṃ śuddhātmanāmupadeśa-
dīkṣānityanaimittikādyanuṣṭhānadhyānasamādhānādivyavahāraḥ, 
yadyapi tatrāpi yāvanmalaśeṣāvasthānaṃ 
māyāvyāpārāvigalanādataśca tathā yena vyavahārarūpatā sā hi 
bhedābhedaprāṇitasamanvayātmā sarvathā bhedatirodhau tirodhīyate eva, 
tathāpi pratyabhijñātayāvatparamātmanāṃ sa vyavahāraḥ svaparātmani 
malaśodhanabodhanaikadhanatvāt vimala eva yuktaḥ | tathā jñāninām iti 
vṛttau samastaṃ padam | saṃbhāvyate iti vṛttāvuktaṃ mūḍhānāṃ 
jhaṭiti tathābhimānābhāve'pi uktopadeśapariśīlanadiśā prakāśate eva 
ayamarthaḥ iti darśayitum | taduktaṃ śivavijñānopaniṣadi

	grāhyagrāhakasaṃvittiḥ sāmānyā sarvadehinām |
	yogināṃ tu viśeṣo'yaṃ saṃbandhe sāvadhānatā || (vi. bhai. 106)

iti | kevalam iti satyapi sārvatrike māyāvyāpāre idamadhikamityarthaḥ | 
siddhaḥ samayyādigurvantāḥ, śuddhātmāno niṣkalāḥ, vidyeśvarāḥ 
anantabhaṭṭārakādyā mantramaheśvarāḥ, mantreśvarāḥ 
aṅguṣṭhamātraprabhṛtayaḥ, ādigrahaṇāt mantrāḥ, te ca 
parameśvaropadeśalābhe sati jñātaparamātmasvarūpā iti mantavyāḥ, 
yaduktam

	...........................'ghorātparamātmanaḥ |

iti, natu lākulādidṛśi iva paśurūpāḥ | tadarthameva siddhaśabda eṣāṃ 
viśeṣaṇam, tadāca ādiśabdenaiva niṣkalātmano grahaṇam, 
śivabhaṭṭārakasya tu na anyā pṛthak vyavahartṛtā, sarvavyavahārāṇāṃ 

(page 406)

sa viśrāntipadamiti nirūpyate | māyāndhāstu 
sakalapralayākalavijñānākalāḥ, teṣāṃ samalo vyavahāraḥ | yadāgamaḥ 

	avasthātritaye'pyasmiṃstirobhāvanaśīlayā |
	śivaśaktyā samākrāntāḥ prakurvanti viceṣṭitam || (mā. vi. 1|36)

iti | kevalamityādinā saṃbhāvyate iti vṛttigataṃ vivṛṇoti | iti śivam || 14 ||

iti śrīmahāmāheśvaraśrīmadācāryābhinavaguptapādaviracitā-
yāmīśvarapratyabhijñāvivṛtivimarśinyāṃ 
śaktivargaikāśrayavimarśaḥ saptamaḥ || 7 ||



atha aṣṭamo vimarśaḥ |

	pūrvaṃ yadanuttaramamṛtabhūmimāsādya saptamīṃ kalanām |
	viśrāmyati tatpraṇamāmyamṛtāṅgadaṃ parānandi ||

	evaṃ jñānasmṛtyapohanaśaktimāneko'ntaḥkṛtānantaviśvarūpaḥ, 
- itīyat vitatya upapāditam | adhunā maheśvara iti nirṇetavyam | tatra 
māheśvaryaṃ jñānaviṣayaṃ kriyāviṣayaṃ ca, ādyamatraiva 
jñānādhikāre nirṇīyate | evaṃ jñātā prakṛtitaḥ pratyayataśca nirṇīto 
bhavati | tatra jñānaṃ nāma saṃvedanamahamiti yat, tadeva 
svayaṃbheditābhāsoparāgarūṣaṇāsaṅkucitamucyate | tataśca 
ābhāsavarge yat svātantryaṃ, tadeva jñānaviṣayaṃ māheśvaraṃ 
nirṇetuṃ

	tātkālikākṣa.......................................... |

ityādinā

	......................... śuddhe jñānakriye yataḥ |

ityantena ślokaikādaśakena vimarśāntaramārabhyate | tatra 
ābhāsāntaramābhāso'pekṣate kaścit, kaścit na tathā,- iti ślokena 
uktvā, tathāpi sa eka eva ābhāsa iti ślokāntareṇa ucyate, 
arthakriyābhāso'pi tathaiva ābhāsaniyata iti dvayena, kutra ābhāse sā 
arthakriyeti dvayena, ābhāsāntaravaicitrye bhittikalpamāntaratvamiti 
ślokena, bāhyatvaṃ svarūpato vibhāgataśca dvayena, 
jñānādiśaktyāśrayasya upasaṃhāraḥ ekena, 
maheśvaratvamupasaṃharatā bhāvikriyādhikāropakṣepa ekena,- iti 
tātparyam | atha pratisūtramarthanirūpaṇam | uktamidaṃ parameśvaraniṣṭha 
eva sarvo vyavahāra iti | tatra syādāśaṅkā- vyavahārasya anuprāṇaka eka 
eva, nahi tadatiriktaṃ vyavahārasya kimapi nijaṃ tattvamasti, tataśca 
sphuṭatvā-

(page 408)

sphuṭatvaprāyapracuravaicitryacarcāvicāre nimittaṃ na labhyate-iti | 
tāmapāsitumucyate 

	tātkālikākṣasāmakṣyasāpekṣāḥ kevalaṃ kvacit |
	ābhāsā anyathānyatra tvandhāndhatamasādiṣu || 1 ||

	vyavahāro bhagavati sarva iti satyamidam, tatra vaktavyāntaramucyate,- 
iti kevalapadam | tatkālabhavaṃ nikaṭavarti yadakṣasāmakṣyamaindriyakādi 
pratyakṣaṃ, tadapekṣamāṇāstatsaṃskārabalotthitā ghaṭo'yamityādyā 
ābhāsāḥ pratyakṣasamanantarabhāvini vikalpavyavahāre anyatra tu 
andhādivyavahāre anyathā iti na tātkālikamakṣasāmakṣyamapekṣante 
ciravṛttasaṃskārotthāpitāstadā te ābhāsā ityarthaḥ | jātinayanahīnasya 
api rūpamityābhāso janmāntarapratyakṣasaṃskāraja eva tatra 
ciravṛttatvena tathāsmaraṇāt, aṇūnāmucyatāṃ nāma svatantratā 
nijābhāsabahiṣkaraṇaviṣayā teṣām iti 
vikalpanātmakavyavahāraviṣayāṇām | ta eva ca iti ye 
pratyabhijñātātmanāṃ mahāmantreśvaraprabhṛtīnāṃ 
sadaivāhamitibhāsanaviṣayāḥ, natu anye ke'pi iti ye niyatiśaktyā 
tadviṣayatayā niyamitāḥ; te ca ahantāpade pramātṛbhuvi viśrāntā 
vyavahārāya bhavanti,- iti śeṣaḥ | vyavahāraśabdeneti vṛttigatena | 
prādhānyena iti | tadāyatto hi abhidhānātmā paro vyavahāraḥ || 1 ||

	ataśca idaṃ jātamityāha

	viśeṣo'rthāvabhasasya sattāyāṃ na punaḥ kvacit |
	vikalpeṣu bhavedbhāvibhavadbhūtārthagāmiṣu || 2 ||

	iyatyapi vaicitrye arthāvabhāsasya 
traikālikavastuviṣayavikalpagocarapatitasya api sattāyāṃ 
prakāśamānataikasāre vidyamānatve naiva 

(page 409)

kaścit viśeṣo'hamityāmarśena sadātanaprakāśatvāt | tataśca nīlaṃ 
paśyāmi utprekṣe smarāmīti eka eva nīlābhāso darśanādau | evaṃ 
darśanābhāso'pi eka eva pītādau | tathā utprekṣādyābhāsāḥ, teṣāṃ 
saṃyojanaviyojanavaicitryāt māyāpramātṛṣu 
bhagavacchaktyupakalpitasasphuṭāsphuṭādivyavahāravaicitryasiddhiriti 
uktam iti 

	kevalaṃ bhinnasaṃvedya....................... | (1|5|21)

ityādau | eṣām iti vikalpyānāmarthānāṃ saṃskāralakṣaṇaḥ 
saṃskāranāmā pratibhāsa ābhāso'styeva | saṃskāratā ca yadyapi na 
atyantamahantāpadaṃ, varaṇamayatā hi sā; tathāpihi saṃsāriṇāṃ 
tanmukhena ābhāsānāmahantā sphuṭopadeśā,- ityevamuktam | nanu 
kasmādasau na bhāti | bhātyevetyāha tasya ca iti | prāk iti

	svāminaśca..................................... | (1|5|80)

ityādyuddeśeṣu | bahiṣkāryaḥ iti ahantaikātmanastathāvaraṇakāriṇaḥ 
padādidamitibhāsanīya ityarthaḥ || 2 ||

	nanu sukhādiṣu kā vārtā teṣu bāhyapratyakṣābhāvāt, tadāca 
sukhatatsādhanādyābhāse sthite sarvo niḥsamīha eva syādityāśaṅkya 
āha

	sukhādiṣu ca saukhyādihetuṣvapi ca vastuṣu |
	avabhāsasya sadbhave'pyatītatvāt tathā sthitiḥ || 3 ||

	nanu te ābhāsāḥ sukhādirūpāḥ santi ahantayā, tatkathamatītāḥ | 
satyaṃ, vartamānā apitu te tasyāṃ na bhavanti | tadāha kālānavacchinna 
iti | nanu evamidantāpekṣāyāṃ bhāvino'pi kasmāt na ucyate | āha 
pūrvam iti | nahi kaścit sukhādyābhāso'sti yaḥ pūrvaṃ na abhavadantato 
janmāntare'pi vṛttatvādasyeti vastucintāyāmatītatvameva asya ucitam | nanu 

(page 410)

ahantābhuvi yaḥ sadbhāvaḥ, iyaṃ kiṃ na vartamānatā | satyamevam | atra 
hetuḥ bāhyānāmeva iti | yadetaduktaṃ pūrvamuditāpi vṛttau āha iti 
saṅgatiḥ | tadānīm ityanena hi vartamānatā bāhyaniṣṭhaiva,- iti darśitam 
| buddhimayaḥ iti grāhaka iti śeṣaḥ | grāhakarūpānāveśe hi 
hlādādyayoga iti uktam | nanu ābhāsaścedasti, kimatra vartamānatayā | 
āha niyati iti | anyadā iti bāhyatvena atītatve | tadātvaṃ vartamānatā || 3 ||

	vartamānābhāsādarthakriyetyetadeva darśayati sūtreṇa 

	gāḍhamullikhyamāne tu vikalpena sukhādike |
	tathā sthitistathaiva syāt sphuṭamasyopalakṣaṇāt || 4 ||

	nirantarotprekṣyamāṇe sukhādāvatīte'pi yā paryante tathā sthitiḥ 
atyantāhlādādirūpatayā, sā tena prakāreṇa hetunā bhavati | 
hetuhetumatorliṅ | nahi tadā asau smaryamāṇaḥ, apitu vartamāna eva 
sukhādyābhāsaḥ | smaryamāṇasya vikalpyatvena asphuṭābhāsatvaṃ hi 
ucitam | yathāha 

	tatra viplavo'nyo vikalpaṃ sphuṭayati................ |

iti | ayaṃ ca tadā sphuṭābhāsa eva | kutaścit iti vyadhikaraṇatayā 
pañcamyarthaṃ vyācaṣṭe upadeśa ityādinā āhitam ityantena | 
kandasauṣumṇapadādyanupraveśaḥ upadeśaviśeṣaḥ, āsaṅgo'nurāgaḥ, 
anyo heturadṛṣṭādiḥ | pratyupasthāpyate iti vartamānābhāsīkriyate na 
sragādinā | svatantragrahaṇaṃ smaraṇanirākaraṇāya, vikalpatāyāmapi 
sphuṭāndhasya avirodho vimarśasāratvāt saṃvedanasthiteriti uktameva | 
nanu evaṃ kiṃ tatra smaraṇena | ucyate kevalam iti | atīta iti 
sukhavikalpanaṃ, tat na pūrvakam, ata eva āha anubhūta ityādi | tasya 
sukhavikalpasya 

(page 411)

prācyaṃ tat sukhaṃ na viṣayaḥ ityarthaḥ | nanu smaraṇavikalpena 
viṣayo'sya cet dattaḥ, tarhi kathaṃ na atītaviṣayatā,- ityāha tadānīṃ ca 
iti | sukhābhāsalakṣaṇaṃ yat sāmānyasmaraṇena upasthāpitaṃ, tadeva 
yataḥ sphuṭīkaroti nirantaro vikalpaḥ, prācyāṃstu 
deśakālapramātrantarasācivyādīn na ādriyate; tataḥ 
pūrvarūpatāpramukhīkāre'pi tadapahastanaṃ jātameva | tacca iti sukhādi 
ullikhyamānaṃ kāryakāri na veti tāvadāstām, abhūtasya api 
pṛthivīkṛtsnāśubhādeḥ, bhāvitasya api astu tāvadasatyatvaṃ, sukhādestu 
yāvatī arthakriyā vivakṣitā, sā pūrṇaiva,- iti na atra asatyadhiyā api 
bhramitavyam || 4 ||

	yaduktaṃ sarvadāntaḥ santaḥ iti, tatra dūṣaṇaṃ 
parakīyamarthakriyākāritaiva sattvamityāśayena yat; tadāśaṅkya 
abhyupagamya parihartuṃ sūtramavatārayati

	bhāvābhāvāvabhāsānāṃ bāhyatopādhiriṣyate |
	nātmā sattā tatasteṣāmāntarāṇāṃ satāṃ sadā || 5 ||

	yadyapi iti | tathaivaca iti arthakriyākāritvena | syuḥ iti lokaprasiddhyā 
saṃbhāvyamānametat, asmākamapi na 
atyantamasaṃmatamityabhyupagamaṃ sūcayati | pramātṛrūpatayā 
sadbhāve yadyapi na arthakriyākāriṇaḥ iti apiśabdaḥ | 
bhāvarūpāṇāmabhāvātmanāṃ ca ābhāsānāṃ bāhyatā nāma na 
ātmā [ātmānamapi tu ga. |] svarūpam, apitu ābhāsāntarasvabhāvā asau 
upādhiḥ uparāganimittaṃ viśeṣaṇam, yata evaṃ, tatasteṣām 
ābhāsānāmāntaratvena sadātanī sattā iti | nanu ābhāsāḥ santu ataḥ, 
arthāstu tathā katham | atra brūte ābhāsā eva iti vicchedavanto 
bāhyatābhūmau, antastu na 

(page 412)

tathā ye te eva ābhāsā arthāḥ | atra heturbodhādabhinnā yataḥ | tato bhede 
hi na prakāśeran,- iti nirūpitam | nanu evaṃ vṛttāvābhāsānāṃ 
bhāvābhāvā viṣayatvena kathamuktāḥ | ucyate kevalam iti | atyantābhede 
satyaṃ nāsti viṣayaviṣayitā, sa tu iha nāsti māyāśaktikṛtyasya bodhāt 
vyatirekasya nirbhāsāt | nanu bhāveṣu iyamastu cintā, abhāve tu tuccharūpe 
kathaṃ, imau bodhāt vyatirekāvyatirekau kathaṃca na syātām | nanu 
tuccharūpatvādeva, naiva svarūpeṇa abhāvastuccharūpaḥ, ghaṭasya hi asau 
tucchatā- ghaṭo [ghaṭeneti ga. |] neti, tat ghaṭa eva tathābhūtaḥ, ata eva na 
paṭo ghaṭasya bhāvaḥ | nahi paṭo ghaṭasya [ghaṭastu ga. |] kiñcit | nanu 
ghaṭasyāpi kiṃ tucchatā kiñcit | evametat | na kiñcit cet tat ghaṭasya 
kathaṃ [kiṃ kha. |] tarhi ghaṭastucchaḥ | 
prāgabhāvātyantābhāvapradhvaṃsābhāveṣu ca lokasya 
dhanadāraparicchadādigateṣu vairasyātiśayo dṛśyate | sa na syāt 
nakiñcidrūpasya abhāvasya viśeṣāyogāt | anena arthakriyāyogādapi 
sattvaṃ bruvāṇaḥ kṛtottaro mantavyaḥ | bhāvo hi tatra arthakriyāṃ na 
karoti,- itīyati ukte sa mā nāma tāṃ kārṣīt, duḥkhaṃ tu kutaḥ | 
tadarthakriyābhāvāditi cet, tasya asya suktasya smarāmaḥ 

	tathāpi svārthāndhe niravadhikamāndhyaṃ [niravadhi sākṣyaṃ ga. 
|] vijayate |

iti | tasmādabhāvo'pi vastveva | tathāca janakatayā 
pratikarmavyavasthāvādināmapi yogijñānamatītānāgataviṣayaṃ 
yaducyate, tatra te vicitrāḥ prāgabhāvāḥ pradhvaṃsābhāvāśca 
janakatvena mantavyāḥ- ghaṭapradhvaṃsa itaḥ [iti ga. |] prabhṛti utpannaḥ, 
ayaṃ paṭaprāgabhāva etadavadhirbhaviṣyati- iti | arvāgdṛśāṃ hi te 
bhāvāḥ pratiyogisamullekhamantareṇa 

(page 413)

vicitrā na bhānti nirguṇa iva prathamakṣaṇe dravyam | sarvajñānāṃ tu yat 
yat nijena rūpeṇa samasti, tat tat vijñānena svajanyena anyajanyena vā 
avabhāsyate,- iti na atyantādbhutam | asmanmate tu 
prakāśanamātrasāratvaṃ bhāvānāṃ rūpamiti nīlasukhādereva na- 
ityamunā rūpeṇa prakāśanādabhāvātmakamapi rūpaṃ na nāsti | nahi 
niyataṃ kiñcidasya vapuḥ, ata eva 

	ekaikatrāpi ṣaṭtriṃśadātmatā........................ |

iti uktam | tadayaṃ bhāvaḥ ā bāhyāt rūpāt sarvarūpatāṃ svīkurvāṇaḥ 
śūnyātiśunyadaśāyāmupalīya saṃvidrūpaśivātmanā prathate iti 
vitatātmaiva | tadayaṃ abhāvābhāso'pi pāramārthika eva | nanu evaṃ 
bhāvā ete syuḥ, satyaṃ syuryadi bhavanarūpeṇa ābhāseran | ghaṭo na 
bhavatītyādivapuṣā tu nirbhāsamānā yadi bhāvāḥ, tarhi nīlamapi 
nirbhāsamānaṃ kiṃ na pītaṃ bhavet | tasmādabhāvā api viṣayā eva, 
kevalaṃ ghaṭa iti vidhirūpatā prakāśaṃ prati anulomatayā vartate,- iti 
bhāvāḥ santi prakāśante iti teṣāṃ sattā ucyate | ghaṭo na bhavati na 
prakāśate iti prakāśaṃ prati anānulomyamāviṣkaroti abhāvaḥ | naca asya 
tadasti prakāśa eva viśramaṇāditi nañarthātmā ayaṃ saṃvidvilāsena 
āvirbhāvito na kiñciditi nirūpitaḥ iti āstāṃ tāvat | śaśaviṣāṇaśabdena 
api abhāvaśabdaḥ saṃbandhanīyaḥ | śaśaviṣāṇaṃ na bhavati,- 
ityevaṃbhūto hi atyantābhāvaḥ, na bhavatītyetadrūpāyoge tu ghaṭaḥ paṭa 
itivat sāṅkalpikameva śaśaviṣāṇaṃ, natu abhāvaḥ | te tu iti abhāvāḥ 
sphuranti iti pratyavamarśasāraniścayātmanā | etacca saṃsārijanaṃ 
pratītiprācyuryaṃ ca apekṣya ucyate | tatraiva hi deśe 
prākpradhvaṃsātyantābhāvasahasrāṇi na sarvadā vimṛśyamānatayā 

(page 414)

bhānti, tathābhāsanameva sattvam | athavā te tu iti ubhaye'pi 
bhāvābhāvāḥ pratyavamṛśyante | abhāvā api hi bhāvavadeva 
ekagocaratve'pi kṛmisarvajñādipramātṛgocarā eva | atra vyākhyāne 
tuśabdo na samarthitaḥ samarthitaśca | yo hi saugatamubhayamaviśiṣṭaṃ na 
icchati, tasya eṣa viśeṣo dyotitaḥ | yadi manyate- 
niścayātmakapratyavamarśābhidhāne vikalpamātrasāro'yamabhāvaḥ- 
iti, tarhi bhāvo'pi evameveti | etadupasaṃharati tat iti tasmāt | 
bāhyābhāve'pi iti vicchedena yat bāhyatvaṃ tadabhāve'pi | tadāca 
nīlaṃ sukhamityamunā rūpeṇa bhāsanamasti eva | nahi uparañjake nīle 
rājani vā asiddhake kiñcidutpalābhāsasya narābhāsasya vā | 
idamidānīmanena janitaṃ nīlaṃ sukhaṃ vā,- iti 
ābhāsavargamelanamadaḥ | tadanyonyaviyoge'pi na kiñcidābhāsānāṃ 
svarūpato vṛttamiti ābhāsātmanā sadā santaḥ padārthāḥ, 
ābhāsamātratvaṃ ca atra tadavasthaucityamiti mantavyaṃ, natu 
ahantāśeṣatvaṃ, tathā sati hi yāvatsaṃskārānuvṛtti iti na brūyāt | 
sārvakālikaṃ hi tat | grāhyatayā iti 
āvarakatāmasāvabhāsāpasāraṇāditi bhāvaḥ | anyeṣāṃ tu iti 
smartavyavyatirekiṇāṃ manorājyavikalpādau pramāturbhedena 
sphuratāmapi bahīrūpatā loke siddheti śeṣaḥ | kutaḥ iti cet, āha 
hetutrayaṃ prasiddha ityādi | yadyapi sukhādikaṃ gavādayaḥ kurvate eva, 
tathāpi tṛptipittaśamanādyarthakriyāntaraparamparānubandhi 
dehādikāryamanyagavyādiprasiddhena vidadhati | sukhādīnāṃ tu 
prakāśamātrarūpaiva [mātre rūpaiva ga. |] arthakriyā | nanu ca ābhāsā 
viṣayāḥ, yato grāhyāḥ; tat kathaṃ teṣāṃ vṛttau bahuvrīhiṇā

(page 415)

viṣayitvaṃ darśitam | tatra āha manogrāhyāṇām iti | te hi bodhalagnā 
bodhapratibimbitā ākārāḥ, tato bhedena api bhānto na bodhāt tattvato'nye 
iti pramāṇatayā viṣayitvameṣāṃ na ucitam [ucitaṃ kha. |], kintu 
nijanijarūpe bāhyākāre nīlābhāsasya nīla iva | yadvakṣyate 

	....................ṣo'pi svābhāso'bhinavodayaḥ | (2|3|1)

iti, anyatrāpi

	bhāvyaṃ [bhāvyante ga. |] tenātmanā..................... | 

iti | saṃskāracitre pramātari tu ahantaikarasāḥ santu sarvatra sarve viṣayiṇaḥ 

	.....................ṇīlābhāsamayo'pica |
	pramātā pītaharitādi na na viṣayaṃ prati |
	vikalpayannapyekārthaṃ yato'nyadapi paśyati ||

itinyāyena | tato'tra ahantāmayatvaṃ 
saṃskārapuñja.........vikalpyanīlābhāsaḥ śuddhavimṛśyapītābhāsaḥ 
pīto'rtha iti pañca ābhāsadaśāḥ | atra iti vṛttau | apekṣāmeva 
laukikaprasiddhirūpāṃ darśayati tatohi iti | ādipadena prasiddhikāraṇaṃ 
pramātrantarasādhāraṇyaṃ ca saṃgṛhītam | saṃskāra iti 
tamasācchāditāḥ | sarvathā iti te prṭhagapi na vedyā yena 
pramāturbahirbhūtā bhaveyuḥ, idamityaṃśena bāhyā eva, tathaiva 
sarvakālānuvṛttireṣāṃ, ahantāmātratve tu na kālakalanā, nāpi 
saṃskāratā kācit | nanu evaṃ svatantratayā vikalpyamānebhyaḥ 
smaryamāṇānāṃ ko bhedaḥ | ucyate grāhyatayā iti ...........śeṣāya, 
teṣāṃ hi pūrvakāla eva pramātṛsādhāraṇyādi trayamavasīyate,- iti 
tadātanaṃ bāhyatvaṃ na na sphurati | bhrāntirūpāṇāṃ tu iti 
dvicandrarajatādīnām, teṣāṃ tu bāhyatāvasāye 

(page 416)

satyeva na bāhyatā, manorājyādau tu sā nāstyeva,- iti viśeṣaḥ | 
ubhayathā iti grāhyatayā bāhyatayā ca | etat saṃkṣepeṇa āha tadevam iti 
| āntaratvaṃ dvidhā ahantayā saṃskāratayā, ca, grāhyatvaṃ dvidhā 
pramāṇatayā nīle prameya eva nīlābhāsasya prameyatayaiva 
svatantravikalpe | bāhyatvaṃ satyāsatyatvena kālabhedena ca ṣoḍhā, 
etaccatuṣṭayaṃ pūrvāvyabhicāri uttarottarakaṃ mantavyam | svarūpameva 
ca iti āntaratvaṃ, tat hi prakāśāvyatirekitvaṃ 
prakāśamānatvamavikalpitaṃ bhāvānāṃ rūpam | tacca iti āntaraṃ 
svarūpaṃ yathāyogaṃ grāhyatayā grāhyatvabāhyatvābhyāṃ ca yadā 
avacchinnamuparaktaṃ bhavati, tadā ayaṃ bhedaḥ | ko'sau | āha-
bhrāntisvatantravikalpanādau grāhyaṃ bhavati, na bāhyam | tatkālenaiva 
yogāt iti asādhāraṇyādihetutrayopalakṣaṇametat | smaraṇe ādipadāt 
sukhādigāḍhasaṅkalpe ca bāhyatā api asti smṛtau svakāla iva 
sādhāraṇyādisaṃbhavāt [sadbhāvāt ga. |] sukhādeśca tāvataiva 
prakāśamātreṇa sphuṭena bāhyatvāt | pratyakṣe ca iti nīlādau | tatra hi 
sādhāraṇyādihetudvayamastyeva | tat iti svarūpam | kālānavacchedāt iti 
sārvakālikatvādakālakalitatvāccetyarthaḥ | tathaiva tat iti svarūpatayaiva 
anupahatayā śuddhayā tatsvarūpaṃ vartate ityarthaḥ | evaṃ bāhyatvena 
prameyatā, grāhyatvena pramāṇatayāpi saṃskāratayā āntaratve 
pramātṛtā māyīyā, ahantayā śuddhayā āntaratve parameśvaratā, 
tatastathaiva prasaraḥ ityevamābhāsātmakaviśvaśarīraṃ saṃvedanam | 
tatra buddhipade tamasācchāditatvena avasthānaṃ tasya āntaratvam, yasya 
uttarakālaṃ sphuṭatayā smaraṇaṃ bhaviṣyati prakṛtipade, yasya idamityeva 
asphuṭatayā māyāpade, yasya tayā 

(page 317)

vināpitu saṃskāraparipāke [rapāke ga. |] sati kālāntaravyavadhinā 
vṛttilābhāt, mantrādibhūmau tu 
sadāśivāntāyāmahantāsāmānādhikaraṇyena samaviṣamatāvicitreṇa, 
śrīśivabhaṭaṭārakapade tu ahantaikanimagnatvena,- iti āntarasya viśeṣā 
vakṣyante āgamādhikāre | te tu iha sūcitāḥ tatpade iti tathaiva iti ca 
sāmānyoktyā | evaṃ bhedān vicārya prakṛtamupasaṃharati tadevam iti 
śaṅkanīyaḥ iti natu asāvasti aniṣedhyatvāt [asyaniṣe kha. |] svarūpasyeti 
bhāvaḥ | atra paro bāhyatvaṃ na upādhiḥ, apitu svarūpameva,- iti 
upapādayitumupakramate nanu iti | asattāvaiparītyena sattā upapādanīyeti 
darśayati prakhyā iti | tacca iti prakhyādiviṣayatvam | sarveṣāṃ iti, natu 
bāhyānāmeveti ākūtam | nanu evaṃ kathaṃ bāhya eva ghaṭe lokasya 
sattvavyavahāraḥ, na āntaragrāhyayoḥ saṃskāravikalpātmanoḥ | atra āha 
bāhyatā ca iti | ata eva iti yato lokasya 
arthakriyāparamparānubandhikāryaviśeṣakāritvameva sattvamiti 
saṃmatam, putre'pi akāryakṛti aputravyavahārasya avāstavasya api 
pravartanādanyairaṅgīkaraṇācca | tato hetorabhāvābhāso yo ghaṭādeḥ, sa 
laukikodakāharaṇādikāribāhyendriyasaṃvedyarūpaniṣedhastato bāhyo 
ghaṭo na bhavati,- ityanena rūpeṇa sa ghaṭābhāsa eva ghaṭasya abhāvaḥ iti 
uktaḥ | nanu asti evaṃ prākpradhvaṃsetaretarābhāveṣu niṣedhyabhāvāt, 
atyantābhāve tu katham | tatra api saṃbhavatyeva ayaṃ prakāraḥ iti vaktuṃ 
krameṇa atyantābhāvānudāharati śaśaviṣāṇādeḥ ityādinā | atra hi 
khapuṣpādivilakṣaṇaṃ buddau śaśaviṣāṇaṃ bhātyeva | 
udāharaṇāntaramāha bāhyatva ityādi | sattā syādeva iti tatra api 
śuddhamiva 

(page 418)

paryante saṃvedanamahamiti yat, tadeva vikalpyamānatayā 
samastabhedāvabhasanātmakasṛṣṭimūlabhūtaṃ bhāvavyatiriktaṃ 
māyayā pṛthak sṛṣṭaṃ sarvātmanā grāhyādibhī rūpairabhāvaḥ 
ityevaṃ buddhau vikalpyatāṃ pratipadyate eva | ata eva iti yataḥ 
prakhyopākhyāyonitvopayogi pāramārthikamāntaraṃ rūpaṃ sarvātmanā 
niṣeddhuṃ na śakyam | anyamudāharati ṣaṣṭhe'pi iti | kathañcit iti yathā 
pañcabhyo'kṣebhyo vyatiriktaṃ ṣaṣṭhamindriyaṃ manaḥ, tathā 
śabdādibāhyaviṣayapañcakātirikto bāhyaḥ ṣaṣṭho vikalpaḥ | ata eva 
rūpamiti iti sparśagandharasaśabdātiriktaṃ kimapi astīti | ata eva āgame 
bhāva eva ayamabhāva iti darśitaṃ

	yo'śūnyaḥ śūnya ityuktaḥ.................................. |

ityādinā || 5 ||

	nanu eṣāmavāntarāntaratvagrāhyatvabāhyatvāvasthāsu 
svasamucitā kācidarthakriyā dṛśyate bhāvānāṃ 
smṛtiharṣāliṅganādikā iva kāntābhāsasya, pramātṛtādātmyalakṣaṇe 
punarāntaratve keva arthakriyā | atra uttaramāha sūtreṇa 

	āntaratvātpramātraikye naiṣāṃ bhedanibandhanā |
	arthakriyāpi bāhyatve sā bhinnābhāsabhedataḥ || 6 ||

	pramātraikyanimittakaṃ yadāntaratvaṃ, tato hetoreṣāṃ 
bhāvānāṃ na kācidarthakriyā | sā hi pramāturanyonyataśca bhede sati 
bhavantī kāraṇaviruddhe tasmādabhede sati kathaṃ syāt | tathāhi [tathāpi 
kha. |] sā arthakriyā niyataiva ābhāsaviśeṣe | bāhyāpi hi kāntā na 
harṣāya āliṅgyamānatādyābhāsāntarasaṃbhedavandhyatāyāmā-
bhāsaniṣṭhatvādeva ca arthakriyāyāḥ, ābhāsa eva vastu,- iti parasyāpi 
yuktamupagantum,

(page 419)

na mṛdaḥ saṃsthānaṃ, na kulālāt mṛdrūpatā,- iti 
anvayavyatirekasiddhaṃ 
kāryakāraṇabhāvamācakṣāṇānāmābhāsānāmābhāsā eva 
vastutayā upagamyāḥ kalpitavyāvṛttiniṣṭhatvādanvayavyatirekayoriti 
alamavāntareṇa | tadāca iti saṃsāriṇāmantaravasthāne | parameśasya ca 
saṃsāriṇāmantaravasthāne nidarśanadvāreṇa heturdarśitaḥ 
māyāpramātari ityādinā | tatra bhagavaddaśāyāṃ tadaikyāt tasya yat 
sarvakartṛtvaṃ, tadeva teṣāṃ; māyāpramātṛtāsaṃskārarūpatāvasthitau 
tu māyāpramāturyāvatkartavyaṃ, tāvadeva sarvamiti ucyate | 
tāvatsaṃskāravaicitryacitrito hi brahmādikrimiparyantaḥ pramātā 
tāvatsaṃskārocitameva vicitraṃ ceṣṭate | svasmāt iti ātmanaḥ pramātuḥ | 
kāryādabhinnaṃ sat yat kāraṇamucyate, tadeva ātmā svabhāvo yeṣām | 
evaṃ bhedanibandhadarśanāpi arthakriyā yā śaṅkitā, sā na bhavati 
bhedābhāvavatyāmāntaradaśāyāmityevamapiśabdaṃ vyākhyāya api 
bāhyatve sā bhinnā iti vyācaṣṭe yadāpi iti sati tasyāḥ iti ca 
arthakriyāparāmarśaḥ | co bhinnakramaḥ | na kevalaṃ 
grāhyatvabāhyatvādinā ābhāsasya bhedaḥ, yāvat deśādibhirapi | 
deśamudāharati deśa ityādinā, kālaṃ smṛtau ityādinā | atra vidyamāna 
eva bāhye iti mantavyam | kālasyaiva uktasya atītasya vyatirekamudāharan 
vartamānakālasya arthakriyāntareṇa anvayaṃ darśayati, tatraivaca 
ākārabhedamapi upakṣiptamudāharati sphuṭāvabhāsaḥ ityuktyā | 
ābhāsabhedasya abhāvāśaṅkayā abhāvasaṃbhāvanayā parasya yā 
vimatirasti, sā rūpādāvukte na avataratīti tadupādānam | nanu 
āśaṅkāmātraṃ tat kasmāt sukhādīnāmābhāsabhedābhāvaḥ iti, vastu 
eva idaṃ na kasmāt, teṣāṃ hi buddhimātraṃ prati viṣayatā, 

(page 420)

na bāhyārthaṃ prati; tat kathaṃ sphuṭāsphuṭādibhedaḥ | etadāśaṅkya 
pratisamādhatte teṣāmapitu iti | tathaiva iti bhedenetyarthaḥ || 6 ||

	atra yadi kaścit brūyāt bāhyatvābhāsena bhāvasya 
upādhīyamānasya [upadhīyamānasya ga. |] tat viruddhamāntaratvaṃ 
kathaṃ syāt, tat kathamuktaṃ

	................ṣattā tatasteṣāmāntarāṇāṃ satāṃ sadā | (1|8|5)

iti; tadā asau pratyāyyate sūtreṇa

	cinmayatve'vabhāsānāmantareva sthitiḥ sadā |
	māyayābhāsamānānāṃ bāhyatvādbahirapyasau || 7 ||

	nīlaṃ bhāsate iti pūrvasṛṣṭasya asya bhāsanaṃ na svarūpamapitu 
jñānameva, tacca jñātarīti ābhāsanadvāreṇa arthānāmāntaratā,- iti 
tātparyam | sadā iti bāhyatvonmukhatābhāse, tadabhāve ca 
ābhāsānāmantareva sthitiryataśca cinmayā ete nīlaprakāśādirūpāḥ, 
anyathāhi na prakāśeran vicchedāvabhāsane | svātantryalakṣaṇayā tu 
māyāśaktyā bāhyatvaṃ yadeṣāmābhāsyate, tadābhāsanātmakaṃ 
jñānarūpamālambya yā sthitirarthatayā; sā bahirapi antarapi | 
tadantaravabhāso'yaṃ bahiravabhāsanātmavijñānacitrasya pratyuta 
bhittikalpaḥ kathaṃ viruddhaḥ syāt nīlatvamiva akṣaṇikarūpamapi 
kṣaṇikatvasya | atra hi kalpitavyāvṛttimātrataḥ kalpitānyonyaparihāro na 
pāramārthika iti sūtrārthaḥ | āntaratva iti virodhasaṃbhāvanāspadamiti 
ākūtam | anubhava iti bāhyā iva saṃskārātmāno'pitu upāvṛtā āntarā 
eva boddhṛmayā eva anyathā niḥsvarūpatvāpattireṣāmiti hi uktam | 
arthāḥ iti prameyarūpatvena arthyamānā bhavantīti yāvat | ābhāso'pi

(page 421)

iti pramātrabhedasāro'pi vastutastadarthabhedoparāgāt bhedamiva 
pratipadyamānaḥ pramāturdharmo jñānaṃ bodha iti vyavahriyate | 
ābhāsanaṃ yat vicchidyate tasya vyāpārabhāgo yaḥ, sa jñānamiti 
vibhaktaḥ; yastu siddhatābhāgaḥ, sa kiṃ jāyate ityāha bhedābhāsāḥ iti 
| cakāreṇa jñānatā arthatā ca yugapadunmiṣati,- ityāha teṣām iti ye 
pūrvaṃ pramātari abhedena pṛthak na kecidābhāsiṣata, teṣāṃ 
nīlādīnāṃ svopādhibhūtānāmābhāsādeva vastuto'svatantrāṇāmapi 
te nīlādyābhāsā abhimānamātrasāraṃ svātantryamāpādayanti 
utthāpayanti upagamayanti ca | tathāhi vyavaharati- bahiryadidaṃ nīlaṃ, 
tadeva ābhāsate iti | tata eva saugatairapi

	sārūpyasya sārūpyatā anumānādeva anyathānupapattivaśena 
sthāpyate, natu pratyakṣeṇa, nīlaṃ jñānamataḥ sārūpyarūpatayā bhāti | 
iti uktam | jaiminīyāśca prakaṭatāṃ tata eva arthadharmamāhuḥ | ata eva iti 
yato'bhimānamātrasāraṃ māyīyamābhāsate svātantryameṣāṃ 
nīlādīnām, tato vṛttau pāratantryameṣāṃ nirūpitam, svātantryaṃ tu na 
spṛṣṭamiti darśayati antarnīta iti svatantrasyaiva hi pradhānakriyāyāṃ 
tanniṣṭhavighnasaṃbhāvanānirāsopayogipraiṣādikriyāntaraviṣayaṃ 
pāratantryaṃ viṣaye'pi prasaratīva mukhyakriyārūpe, natu paramārthataḥ 
pradhānakriyāyāmasaṃbhavatsvātantryaḥ praiṣādibhirabhisaṃbadhyeta | 
nanu sūtrānusāreṇa vṛttau ābhāsyamāneṣu iti vaktavye 
prakāśamāneṣu iti kā vācoyuktiḥ | āha prakāśaśabdena iti | 
ābhāsanaṃ na prakāśarūpādadhikaṃ kiñciditi anena 
prakāśanakriyābhidhāyidhātuprakṛtikena spaṣṭīkṛtamiti tātparyam | natu 
svatantravikalpeṣu api nīlādayo vicchedena prakāśante, 

(page 422)

tatrāpi ca māyāśaktivyāpāraḥ, vastutaśca cinmātratvaṃ samarthanīyaṃ, 
pratyuta tatparivarjanaṃ kimarthaṃ kṛtaṃ vṛttau pratyakṣapadena,- iti hṛdaye 
gṛhītvā nirūpayati svatantra iti prakāśane saṃbhavatīti saptamīpāṭhaḥ 
spaṣṭaḥ | prakāśanam iti tu saṃbhavati ityatraiva cchedaḥ, tathāpi iti ca 
uttaravākyaśeṣādhyāhāraḥ | pratyakṣīkṛtānāṃ 
nīlādīnāmaprasiddhaṃ yata āntaratvaṃ, tato mukhyatayā iti prayatnena 
teṣāmeva tat sādhyaṃ, natu ayatnasiddhasaṃvittādātmyānāṃ 
vikalpābhāsānām | etadeva darśayati vikalpeṣu punaḥ iti | ke'pi iti ye 
iyattārūpameva vikalpyamicchanti, na bāhyaṃ, nāpi anantarbahīrūpam | 
abhiniveśa iti āntaratvasādhanāyeti śeṣaḥ | sādhayiṣyate iti yata 
eṣāmāntaratvaṃ prasiddhaṃ, tato bāhyatā pratyuta prayatnena 
sādhayiṣyate 

	vikalpe yo'yamullekha..................... | (1|8|8)

iti sūtreṇa | athavā iti pūrvatra vyākhyāne 
bāhyendriyasākṣātkāraviṣaya eva ābhāsaḥ [avabhāsaḥ ka. |] 
pratyakṣaśabdena uktaḥ, atra tu sarva eva antarbahiṣkaraṇagocarā ābhāsā 
nijanijena vapuṣā sākṣādeva avabhāsamānā navanavarūpāśca 
yathāyathaṃ pratyakṣā eva,- iti pratyakṣatvasya avyabhicāre'pi yaḥ 
keṣāṃcidasatyatāṃ tata eva apratyakṣatāṃ manyate, tasya 
vyāmohakriyaiva pratyakṣaśabdena darśitā | nanu ābhāsamātrameva 
prakāśyamānānāṃ rūpaṃ, tat te kathaṃ bhedamarheyuryena saptamyā 
nirdiṣṭā,- ityāśaṅkāṃ pariharati cinmayasya iti | bhedena iti 
vyāpārarūpatodrecanena bhāvaviṣayeṇa ābhāsavyāpāra iti yāvat | nanu 
evamābhāsa āntara eva yuktaḥ, tat kathaṃ vṛttiḥ | bahirābhāsaḥ iti | atra 
āha nīlādīnām iti 

(page 423)

tanniṣṭho'sāvābhāsastathā [tannirdiṣṭaḥ ga. |] ucyate | vicchedāt iti 
māyāgrāhakāpekṣāt | etadeva hetunā spaṣṭayati vastusthityā iti | teṣām 
iti prakāśāvyatirekabhājāmapi [prakāśyāvyati ga. |] avasāyāt iti 
māyāśaktikṛtāt māyāpramātṛmukhyavyāpārātmakāpohanapara-
mārthādabhimānamātrāt grahaṇaṃ, natu prakāśavyatiriktatayā 
tato'vasāyabalāt | arthyate iti, viśeṣeṇa sinvanti badhnanti hṛdayamiti, 
pramīyante iti, ālambyante ityādinirvacanayogādarthādiśabdairvyapa-
diśyante | apiśabdaṃ vyākhyātuṃ yā vṛttiḥ tadapi ityādikā, tāṃ 
vyākhyātumāha pratyakṣatve'pi iti | apyarthaḥ parasparāpekṣayā 
nirvahati,- ityāśayena bāhyatāvyavahāramanuvadannantaḥ-
sthitatāmācaṣṭe, tadanuvāde'pica pratyakṣatayā prakāśābhedena 
prakāśamānatvamavāntarānuvādena āha | ubhayatrāpi ca 
pūrvoktahetūpajīvanaṃ tadevam ityanena karotīti yojanā | 
nīlādisaṃlagnaḥ iti māyāgrahaṇena tathābhāsamāno bodho vivekodaye 
tanmaya evetyarthaḥ | samarthitam iti arthabhedena jñānarūpatāyāṃ 
bhedaprādhānyāt yuktaṃ bahuvacanamiti manyate | nanu ābhāsanadvāreṇa 
arthā antaḥsthitāścet, tadā gañjagṛhamiva nīlādibhāvasahasrasaṅkulaṃ 
hṛdayamupalabhyate, kimucyate upalabhyeta yāvatā upalabhyate evetyāha 
antaḥsatām iti | aśeṣa evahi viśvāvabhāsastadā ahamiti aviśeṣeṇa 
ekātmatāmupagato bhāti | nanu bāhyatāvasare tarhi nīlatādivicitrabhāvaḥ 
kutaḥ | ita ityāha bahiṣkriyā iti | yat iti prathanaṃ parāmṛśyate, 
kartṛvācini api ākhyāte kriyāyā eva prādhānyāt yat tathā prathanaṃ 
teṣāṃ, tadeva karmaniṣṭhaṃ bahiṣkriyamāṇatvamiti yāvat | cinmayasya 

(page 424)

yasya iti prakāśaikarūpasya arthasya iyameva nīlādirūpatā 
parasparaviviktākāratā yā grāhakāt bhinnatā | atraiva prasaṅgāt 
sisṛkṣādau ityapi vimṛśati | etasya uktasya prameyasya heturūpatayā 
upajīvanāya ata eva iti | nanu evaṃ prakāśatāyāṃ yadi adhikā nīlatā, 
sā tarhi aprakāśarūpā; na cet, kā nīlatā nāma, atra svasiddhenaiva 
dṛṣṭāntena paraṃ pratyāyayati prakāśasya iti | te iti nīlādayaḥ | 
dṛṣṭāntameva vyācaṣṭe paramāṇu ityādinā | yeṣām iti 
vaibhāṣikasautrāntikānām | tataḥ iti paramāṇusañcayāt | artha iti 
sanniveśo ghaṭaśarāvāderarthasya bhedamavabhāsayati, tataḥ 
paramāṇavastathābhāsamānāḥ sati avabhāse sanniveśadharmāṇaḥ 
pratīyante,- iti pratibhāsadharmatayā ukto vaibhāṣikaiḥ | kāṇādamate tu 
yadyapi mahattvaparimāṇātirikto na kaścidarthadharmaḥ sanniveśo 
digbhedasya apāramārthikasya aupādhikatvena 
anyonyāśrayacakrakānavasthopahatasya sanniveśotthāpakatvāyogāt, 
tathāpi avayavidravyaṃ tathābhūtameva jātamityetāvānasti 
palāyanaprakāraḥ ityāśayena paramāṇupuñjavādī na upanyastaḥ | ye'pi 
sautrāntikā vijñānākāre pratibhāsātmani niviṣṭaṃ 
sanniveśadharmamāhuḥ, teṣāṃ sa pratibhāsasyaiva dharmaḥ; natu 
sapratibhāse arthe asau kaścit yataḥ

	ekasaṃvedanatādātmyabalādananyabhāgaśakyadarśanaḥ |

iti nayena paramāṇupṛthaktvāvabhāsane santānavaikalyāt pratibhāsa eva 
vitata iti yuktam | etadāha pratibhāsa iti | pratibhāso hi cidrūpādanadhika iti 
cinmaya eva | nanu asau bhrānto vā sāṃvṛto [saṃvṛtāḥ ga. |] vā,- 
ityāśaṅkya ubhayamapi nirākaroti na cāpi

(page 425)

iti | pratibhāsasya yo dharmaḥ, sa na bhrānto; na sāṃvṛto yataḥ 
pratibhāsaścidrūpaḥ, saṃvicca abhrāntā, sa ca ākārastattādātmyenaiva 
san vidyamānaḥ | yo yadātmā, sa tatparamārthatve na bhrāntādirūpo 
ghaṭa iva lauhityam, tathāca saṃvidātmā sanniveśaḥ | bhrāntādirūpasya 
yat viruddhaṃ, tena tat vyāptaṃ paramārthatādātmyaṃ nāma; aparathā 
tādātmyameva hīyate, tasya atra upalabdhyā vyāpakaviruddhaṃ 
bhrāntādirūpaṃ niṣidhyate | yadivā asan iti viśeṣeṇa trayaṃ niṣidhyate | 
etadeva prasiddhena nidarśanena sphuṭayati svaccha ityādinā | co'pya'rthe | 
jaḍānāmapi svacchatāmahimnā evamupapadyate, kimuta 
saṃvedanarūpasya svatantrasya,- ityāśayaḥ | vyākhyātam iti atra asya 
vyākhyānāvasaraṃ pratidarśayitumevamuktam || 7 ||

	nanu uktam

	āntaratvāt pramātraikye naiṣāṃ bhedanibandhanā |
	arthakriyā......................................................................... || (1|8|6)

iti | tatra vikalpitasya garuḍapiśācāderbāhyendriyavedyasādhāraṇarūpā-
bhāvādabāhyasya kathamiva viṣaśamanasantrāsaprabhṛtyarthakriyā-
viśeṣāveśaḥ ityāśaṅkya sūtraṃ

	vikalpe yo'yamullekhaḥ so'pi bāhyaḥ pṛthakprathaḥ |
	pramātraikātmyamāntaryaṃ tato bhedo'pi bāhyatā || 8 ||

	svatantre anubhavopajīvini vā vikalpe ya ullekhaḥ utprekṣayā 
likhyamāna ākāraḥ so'pi bāhya eva, na kevalaṃ bāhyendriyagamya eva 
bāhyaḥ | tathāhi [tathāpi kha. |] sa pramātṛrūpāt vyatirikta eva bhāti 
ayamiti idantayā | nanu tataḥ kim | āha tataḥ pramātraikyāt 

(page 426)

sthitādapi anantaraṃ yo bhedo'vabhāsate tataḥ iti vā pramātureva 
so'vabhāsamāno bhedo bāhya ucyate | āntaratvaviparītataiva bāhyatvaṃ, 
āntaratvaṃ ca pramātrā saha aikyam | antariti ahaṅkārāspadaṃ 
svaikasaṃmukharūpamucyate, tatra bhavamāntaryaṃ, tadviparītataiva 
bāhyatā | sā ca dṛśye ca vikalpye ca arthe sukhādau sādhāraṇyeveti 
sūtrārthaḥ | tamavatārayati vikalpāvabhāsamānānām ityādinā | atra 
āśaṅkayaiva avataraṇaṃ kṛtaṃ, natu saṃkṣipya sūtrārtha ukto 
vispaṣṭatvāt | upapannam iti anubandhyarthakriyārthisakalalokāpekṣayeti 
ākūtam | tatra iti cchedaḥ | anubhūyate iti pareṇa granthena saṃbadhyate | 
prācyacakṣurādivyāpārabalena bahiṣkaraṇavedyatayā bāhyatvaṃ 
samarthitamapi na sārvatrikamiti darśayati evaṃhi iti | ahaṃvimarśaḥ 
ityuktiṃ śodhayati śarīra ityādinā | bāhyatā iti bāhyatāyā 
abhāvamātratātparyeṇa āntaravyavahārahetutā śuddhacittattve 
ahaṃvimarśasya bāhyatvameva iti | evakāreṇa pūrṇaiva atra bāhyatā,- 
ityāha | tasyāpi iti śarīrasya | vyavahriyate iti ahaṃ gauro ghaṭaṃ 
paśyāmīti | antaḥ iti bubhukṣātṛptyādāvāntareṇa sparśena tathā 
bāhyatā yathā āntaratvaṃ vyavahriyate | buddhyādau 
grāhyatvādidantāvimarśaviṣaye'pi āntaratvam | atra hetuḥ 
pramātṛvyāpāramayatvāt iti | tatra api pramātṛtvādirhetuḥ | dvitīyo 
hetuḥ bāhyapratiyogitvāt iti | atra hetuḥ parimitatvena iti | nanu 
buddhirniścayanalakṣaṇā jñānaśkteḥ prasaraḥ, prāṇo'pi prāṇanātmā 
kriyāśakteḥ, icchāśaktirubhayatrāpi jīvitam; tadetat śaktitrayaṃ 
śaktimato na bhinnaṃ śaktitvādeva, tat kathaṃ 
pramātṛvyāpāramayatvahetunā parimitatveneti

(page 427)

na virudhyate | atra ucyate- parimite hi niścayanavyāpāro hi 
prādeśikasukhaduḥkhamohanīlapītādiviṣayasaṅkucita eva, prāṇanā 
kriyāśaktirapi ca ardhacaturthahastatatparimāṇaśarīrakriyānibandhana-
bhūtadigbhedagamanopakalpitaprāṇādipañcakavibhāgayogipavanaviṣayā 
preraṇārūpā,- iti jñānakriyāśaktirūpatve'pi pārimityamanayoḥ | ata 
eva iti yato viṣayakṛta eva anayoḥ saṃkocaḥ, tatastatsaṅkocamanādṛtya ye 
vartante tatra ahaṃbhāvaṃ na gṛhṇanti, yato bāhyaṃ śarīrādi yat 
prāṇāpānapramukhabhedasya vāyoḥ saṅkocakam, bāhyaṃ ca deśādi yat 
bhittiparvatādisaṃvitprasarasya saṅkocakamupadhānaṃ, tat na ādriyante; 
tato hetoḥ prāṇāpānasukhaduḥkhaśarīrādayasteṣāṃ ghaṭādipade vā 
avabhāntaḥ prakāśaparamārthāsteṣāṃ saṃvido viśvāvabhāsatāmeva 
pūrayanti | tata eva uktamāgame 

	nirvṛkṣagiribhittyādideśe dṛṣṭiṃ vinikṣipet | (vi. bhai. 60)

iti,
	apekṣāṃ svaśarīrasya tyaktvā vyāpī dinairbhavet | (107)

ityādi ca | yataśca upadhānatyāge saṅkocābhāvo'ta eva evaṃ niścīyate- 
svabhāvata ete jñānakriyāśaktī aparimite eveti pārimitye eva ca 
buddhiprāṇavyapadeśye bhavataḥ, ubhayaṃ rūpaṃ saṃvidrūpatā 
saṃvedyasaṅkocaśca | tasyāpi iti vikalpollekhasukhādeḥ | eka ityatra hetuḥ 
dvitīyā bāhyatā nāsti iti kathyate tadānīm ityādinā | ekaiva iti sadaiveti 
yāvat | ubhayagatatve iti antaḥkaraṇabahiṣkaraṇavedyatve'pi na atyantaṃ 

	dūrāntikatayā..................................... | (2|3|10)

ityādibāhyayuktyā | nanu ghaṭasya antaḥkaraṇavedyatāyāmekā, 
cakṣurvedyatāyāṃ dvitīyā'pi; tena iyamubhayarūpā bāhyatā,- iti 
yaduktaṃ,

(page 428)

tat kathaṃ; yāvatā eka eva asau ghaṭābhāso vimarśaikyāditi adhunaiva 
uktamityāśaṅkya pariharati yadyapica iti 
ābhāsāntaravyāmiśraṇādupapannaṃ dvitvaṃ bāhyatāyā 
ghaṭābhāsabhitterekatāyāmapi,- iti tātparyam | tathāpi ityasya anantaraṃ 
pratipattyutpādakāle iti yojyaṃ yena sarvaśeṣatāyāmasya te ābhāsāḥ 
saṃviditā bhavanti,- iti manyante | dvayam iti dvayaṃ smaraṇe anubhave ca 
yathākramaṃ yojanīyam | arthakriyāyogitvena bhavanamabhavanaṃ ca 
samānapadamanye [samāsa kha. |] paṭhanti | bāhyāntaḥkaraṇavedyatā 
anubhave, ekāntaḥkaraṇāpekṣayā tu advayavedyatā smaraṇe, bāhyakaraṇe 
antaḥkaraṇāvinābhāvāt na antaḥkaraṇaṃ pṛthagupādheyamanubhave 
ityevaṃ manyamānāḥ karaṇadvayavedyatayā iti anye paṭhanti | atha 
pūrvadṛṣṭa eva arthaḥ smṛto bhāsate, sa ca anubhūyamānarūpa eveti 
kathaṃ tasya asādhāraṇatvādinā bhedo'bhimataḥ,- iti 
paramatamāśaṅkya āha smṛtikāle iti smaraṇakālāpekṣayā, 
tatsmaraṇakālavartiṣu pramātrantareṣu yato na bhāsate, apitu 
pūrvapramātrantaraireva tu saha bhāti, tato'sādhāraṇatvamasya uktam, 
tadāca na arthakriyāṃ karoti, naca bāhyendriyamatra vyāpriyate; 
tato'sphuṭatvam | atraiva samuccayadvāreṇa dṛṣṭāntamāha tathaiva [tatheti 
kha. |] iti | tātkālikādirūpameva ākārato darśayati idaṃ paśyāmi iti | 
satyaṃ ca bāhyatayā ullekhaṃ grāhakasamānakakṣyatayā 
sphuṭayitumayamahamiti uktam | yatra hi śāntikādau purovartinaḥ sādhyasya 
ullikhitasya vā mūrdhasarasīruhanālāntarālena 
garuḍādidevatāviśeṣakarayugalakasamakālāvarjyamānasphaṭika-
mahākalaśaniḥsṛtaparamāmṛtadhārāmantaḥsamastanāḍīcakra-
saṃcayāpyāyacaturāṃ viśantīṃ dhyāyati, tatra sphuṭameva arthakriyā 
dṛśyate | tat kathaṃ tatra na bāhyatā,- ityāśaṅkya

(page 429)

pariharati tathāpi iti | anyathaiva iti | bāhyatāpi ullikhitaiva tatra | tathāhi 
evaṃ dhyāyāmīti, sphuṭamidaṃ mayā dhyātamiti mama 
sākṣātkāramiva prāptamiti manyate | bāhya ityatra cchedaḥ | iti ityādinā 
prāguktamupasaṃharati | iti iti yat pūrvamuktam, tato hetoridamavasthitam [iva 
sthitaṃ kha. |]- yadanubhūyamānasya smaryamāṇasya 
samullikhyāmānasya ca ghaṭābhāsasya vāstavamekatvaṃ, yogyatayā ca 
dvitayī bāhyatā astyeva bāhyatayā bāhyendriyavedyatayā ceti | yastu 
vyāmohāt na aikyamatra pratīyādanubhūtasmaryamāṇayorhi yuktamiva 
aikyaṃ, natu ullikhitasyeti; taṃ prati ullikhite'pi anyathā dvayīṃ bāhyatāṃ 
prasādhayati athavā iti | apūrvollikhitamapi hi na 
rūpādibhyo'nyadullikhyate,- iti sāmānyadvāreṇa tatrāpi 
bāhyendriyagamyatālakṣaṇā dvitīyā api bāhyatā suvacaiva | nanu yadi atra 
na abhiniveśaḥ, tarhi kimiyatā prabandhena ucyate | ucyate avastutvam iti | 
nanu bāhyatādvitvanivedane sūtroktabāhyatāvibhāgaprakhyāpanayā 
avaśyavaktavye ghaṭādīnāmiti viśeṣaṇasya kiṃ vyāvartyamityāśaṅkya 
yā vṛttiḥ sukhādestu ityādikā, tāṃ vivṛṇoti sukhādeḥ punaḥ iti | 
aviśeṣapadapṛṣṭhe mātragrahaṇaṃ dhyānollikhitagaruḍādau 
pramātrantarāsādhāraṇyāviśeṣe'pi yadullikhitamaparaṃ bāhyatvamasti, 
tadapi nāsti sukhādāviti prakaṭīkartum || 8 ||

	nanu kumbhādeḥ kumbhakārādinirvartanayā bhavatu bāhyatvam, 
ullekhānāṃ tu kiṃkṛtaṃ tat,- iti āśaṅkya sūtram

	ullekhasya sukhādeśca prakāśo bahirātmanā |
	icchāto bharturadhyakṣarūpo'kṣyādibhuvāṃ yathā || 9 ||

	antarbuddhibhūmau pratibimbitasya nīlādeḥ sukhādeśca samastasya 

(page 430)

bharatādyuktasya sthāyivyabhicāricittavṛttigaṇasya pramāturvicchinnena 
vapuṣā yat prakāśanaṃ, tat bhartuḥ antarābhāsān 
dhārayatastadbahiṣkaraṇasvātantryeṇa, ca bāhyāṃ sṛṣṭiṃ puṣṇato 
maheśvarasya icchayā svātantryalakṣaṇayā, yathā 
akṣyādibhūmikādirūpāṇāṃ bāhyendriyagocarāṇāṃ nīlādīnāṃ 
bāhyatayā pratyakṣajñānaśabdavācyamapūrvikayā tatprathamikayā vā 
yat prakāśanaṃ, tadapi maheśvarecchayaiva | kumbhakāre'pi paraiva saṃvit 
tadicchāvabhāsitaviśiṣṭabuddhiprāṇakāyaspandādipramukhamṛtpiṇḍa-
daṇḍacakrādyābhāsarūpā, na punaranyaḥ kaścidasāviti vakṣyate

	tathāhi kumbhakāro'sau........................ | (2|4|9)

ityatra | etaduktaṃ bhavati-kṣetrajñe anicchati svarasabalādeva ya 
ullekhādyāstatra tāvat bhagavataḥ svātantryaṃ, yatrāpi paśoricchā 
saṃbadhyate, tatrāpi tadicchodaye bhagavata eva svātantryamupajīvyaṃ 
nimittāntarābhāvāt bhagavatsṛṣṭitantropajīvanācceti sūtrārthaḥ | 
atadrūpācca iti lajjā hi na sukhaṃ, na duḥkhaṃ, cittavṛttiviśeṣaśca | 
evamutkaṇṭhādau vācyam | īśvaratvāt iti tāvati aiśvaryānupraveśāt | 
tayaiva iti īśvarecchayaivetyarthaḥ | uktam iti 

	ata eva yathābhīṣṭasamullekhā.................... | (1|6|11)

sūtre | antaḥ iti agalitasvabhāva eva ahantāyāṃ saṃskārarūpatayā sthita 
ityarthaḥ | dṛṣṭāntaṃ vyācaṣṭe cakṣurādi iti | nanu teṣāṃ 
sukhollekhādīnāṃ grāhakaṃ manaḥ, buddhistanniścāyikā, tataśca 
mānasaḥ prakāśaḥ,- iti vaktavye kathamuktaṃ bauddhaḥ iti | imāṃ [iti 
ityāśaṅkāṃ kha. |] śaṅkāṃ nyakkaroti bāhya ityādinā | 
niścayaparyanto hi 

(page 431)

prakāśaḥ, tat niścaye bauddhe tadviśrāntaśarīraḥ prakāśo bauddha 
ityukto'pi na viśeṣamanyathābhāvamapekṣate prasañjayatītyarthaḥ | 
etatprasaṅgena anyadapi atra vicāryate buddhyādeśca iti 
naiyāyikabhāṣyaṭīkākāraiḥ 
pratyakṣamānasayogiprātibhaindriyakādibhedena vibhaktaṃ sūtrakāraśca 
aindriyakameva avādīt 

	indriyārthasannikarṣotpannam..................... | (nyā. sū. 1|1|4)

iti sūtreṇa | sāṅkhyādidarśane tu pṛthageva antaḥkaraṇamiti 
mānasatvamastu, bauddhatvaṃ vā; saugatanayena vā 
svaprakāśajñānāvyatiriktāste ullekhāḥ 
svasaṃvedanapratyakṣavyapadeśyā bhavantu, kimanena asthāne 
vyapadeśasamarthanamātranirbandhenetyāśayaḥ | nanu anena nyāyena 
smṛtirapi pramāṇaṃ syāt | syāt yadi abhinavamarthamavabhāsayet, naca 
tatheti darśayati smṛtau ca iti | nanu sphuṭo'rthapratibhāso nava eva, tat 
kathaṃ gṛhītasya grahaṇamidam [iyam kha. |] | atra ucyate pratibhāsa iti | 
vimarśavaśādeva vyavasthā,- iti dṛḍhayati yadā punaḥ iti 
arthamanādriyamāṇo yadā bodhagatamākārameva pradhānatayā vimṛśati 
- mama idānīmitthaṃ prakāśarūpatayā sthitiriti, tadā 
bodhadarpaṇapratibimbakarūpe bodhādavyatirekiṇi ābhāse bodhe 
svasaṃvedanātmanā pratyakṣataiva | pūrvaṃ hi arthaḥ pratyakṣeṇa 
gṛhītaḥ iti vimṛṣṭam, adhunā tu arthasya yat vartatāṃ, tat 
vartatāmahamitthamābhāsamayaḥ prakāśe,- iti apūrvatayaiva vimarśaḥ | 
evaṃvivakṣāyām iti bāhyarūpatānādareṇa bodhābhāsatāmeva yadā 
vivakṣati parāmraṣṭumicchati bodhābhāsaparāmarśameva ādriyate 
prādhānyena | dṛṣṭāntamāha yathā iti | dvicandrānubhavo hi 
bāhyarūpatādhyavasāyāpekṣayā bhrāntaḥ, bodhābhāse tu 
abhrāntameva svasaṃvedanaṃ, 

(page 432)

tata eva niścaye satyapi bāhye arthe svasaṃvedanānusāreṇa iṣṭo'yam, 
aniṣṭo'yamiti arthaḥ svayamavicitro'pi vicitratayā yato'vasthāpyate; tataḥ 
svasaṃvedanameva arthasaṃvedanatādhyavasāyaparyantīkṛtaṃ 
pramāṇaphalatayā prakārāntareṇa uktam | evaṃ prasaṅgāt 
ghaṭānubhavavṛttāntaṃ [ghaṭābhāve vṛttāntaṃ ga. |] nirvarṇya 
prakṛtavicārāṃ smṛtimeva anusandhatte pūrvagṛhītatva iti | itthamatra 
avataraṇam- nanu tadeva smṛtijñānaṃ gṛhītagrāhi ca, abhinavaviṣayaṃ 
ceti kathaṃ saṅgamayitavyamiti | atra [tatra ga. |] ucyate- 
bhinnaviṣayatvādayamadoṣaḥ, yadā tāvat tasya ābhāsasya 
pūrvānubhavaṃ prati yā viṣayatā, sā apekṣyate; tadā gṛhītagrāhitvam, 
satyapi ca asmin gṛhītagrāhitve arthāvabhāsopahitapūrvānubhavasadbhāve 
smṛtisvarūpe ca parasparāvyatirekiṇi smṛtisvasaṃvedanameva 
pramāṇamityuktaṃ pūrvaṃ

	smṛtau yaiva.............................. | (1|7|5)

iti sūtre | yadivā itthamavatārya yojanā-yaduktaṃ pūrvagṛhītameva 
smṛtirgṛhṇāti iti pūrvānubhavaṃ viṣayīkurvatī tathā karoti iti 
pūrvānubhavaśca smṛtirūpatāyāmanuvedhako'sti iti ca, tadatra 
aṃśatraye kiṃ pramāṇamiti, tatra āha pūrva iti | apiśabdaḥ 
prācyaprameyeṇa saha asya prameyasya samuccayārthaḥ | 
aṃśatrayasamuccayastu ekenaiva cakāreṇa || 9 ||

	atha yaduktam eko maheśvaraḥ iti, tatra aikyaṃ tāvat nigamayati 
sūtreṇa

	tadaikyena vinā na syātsaṃvidāṃ lokapaddhatiḥ |
	prakāśaikyāt tadekatvaṃ mātaikaḥ sa iti sthitam || 10 ||

	tasmāduktarūpāt prameyāt hetoridaṃ jātam- yat kila saṃvidāṃ

(page 433)

jñānānāmaikyena vinā lokamārgaḥ sarvo vyavahāro na bhavet, asti ca 
ayaṃ, tasmādavaśyaṃ saṃvidāmaikyam | naca tat durupapādam | prakāśa 
eva hi saṃvidāṃ paramārthaḥ, sa ca eko bhedābhāvāt | yaśca asāvekaḥ, 
sa eva paramārthataḥ pramātā,- iti yadiha upadeśyaṃ, tadadhunā sthiraṃ 
niṣkampaṃ jātam | vṛttau paramātma ityanena 
paramārthapramātṛtāmasya āha | tathāhi ajaḍapramātṛsiddhiḥ 

	yadyapyarthasthitiḥ............................ | (20)

iti | ityādināca iti | ākārato bhavanmukhyo bhedaḥ, sa nāsti,-iti 
svarūpagrahaṇena uktam | tatraiva hetuḥ cinmātrarūpatvāt iti | 
deśakālābhyāmapi na bheda ityāha deśa iti | yadyapi vicitrabhedo 
vyavahāra uktaḥ, tathāpi vyāpakatvāt sarvasaṅgrāhī 
pratipādyapratipādakabhāva iha uktaḥ, sa hi svātmani api 
saṃśayavitarkanirṇayādau, paratra ca upadeśakrayavikrayādau 
saṃbhavatyeva, tena vinā hi vyavahārasya api avyavahāryatvam | nanu 
jñānānāṃ svasaṃvedane sve sve yojanālakṣaṇā viśrāntiriti 
kimetadapūrvamityāśaṅkāyāmāha yadica iti | saṃvedyātmanām iti 
saṃvedyasya nīlāderātmabhūtānām | nīlāderhi prakāśa eva paramārtho 
rūpam | anenaiva ca vāstavamaikyameva ucitamiti uktam | nanu evaṃ 
nīlādinā api kathamuparāgaḥ kriyate yena uktaṃ 
tattatsaṃvedyopahitānām iti | ucyate- māyāśaktyā kṛtabhedaḥ 
prakāśāt vyatirecita iva, tata eva bhinnaḥ, parasparato'pi vyatiricyamāno 
yaḥ saṃvedyalakṣaṇo bhāgaḥ prakāśasyaiva aṃśaḥ, tena tā 
bheditāstāsām | prakāśaḥ 

(page 434)

iti sāṅkhyajaiminīyānāṃ svapakāśā saṃviditi sthitam | 
cirantanavaiśeṣikāṇāmapi citsvabhāva eva ātmeti uktaṃ

	jñānaṃ ca citsvarūpaṃ ca................... | (1|2|7)

ityetatsūtravivṛtau | bauddhairapi

	buddheśca grāhikā buddhiḥ......................... |

ityādi darśitameva | sarvapramiti iti

	yadyapyarthasthitiḥ.................... | (a. pra. si. 20)

iti hi uktam | nanu māyāśaktyā yo bhedo'vabhāsitaḥ, sa kiṃ na bhedaḥ, 
tataśca saṃvedyātmanāṃ saṃvidāmiti ayuktoktiḥ | āha- 
saṃvedyātmanāṃ ca iti yadi, tathāpi advayam | tarhi bhrāntā nīlādayaḥ 
syuḥ | atra api āha nāpi iti | dvaitānāpattau hetuḥ yataḥ iti | anyataḥ 
śarīrādervedyādeva bhedaḥ, na prakāśāt; tato'pi hi bhede bhinnaṃ 
bhāsitamityetadeva hīyeta | atra āntaratve hetumāha yacca iti | nanu etat 
kathaṃ saṅgacchatāṃ- nīlādayo bhinnāḥ, abhinnāśca- iti | itthamityāha 
grāhya iti | grāhako'tra māyīyaḥ śarīrādiḥ | prakāśātmā iti 
paramārthapramātā | tayoḥ iti grāhyagrāhakayoḥ | etacca nirṇītaṃ

	tanmayā dṛśyate............................... | (1|4|8)

iti sūtre | tathāca iti pratibimbakalpatayaiva | nanu evaṃ śuktikārajatamapi 
pratibimbakalpamiti utsannāstribhuvane bhrāntivṛttāntāḥ | satyaṃ 
paraprakāśāpekṣayā | tarhi kva bhrāntivyavahāraḥ | āha māyā iti | yā 
kācit iti | sarvā lokaprasiddhā bhrāntiḥ satyamuktā bādhacintāyāṃ, 
vakṣyate ca pramāṇalakṣaṇe, kintu māyāpramātāramapekṣya; 
yatastasyaiva arthakriyāviṣayau saṃvādavisaṃvādau saṃbhavataḥ || 10 ||

(page 435)

evamaikyaṃ nigamayya māheśvaryaṃ nigamayati sūtreṇa

	sa eva vimṛśattvena niyatena maheśvaraḥ |
	vimarśa eva devasya śuddhe jñānakriye yataḥ || 11 ||

	avicchinnavimarśatvaṃ nāma yat vimṛśadrūpatvaṃ tata eva niyatam | 
nahi asya prakāśalakṣaṇaṃ rūpaṃ nīlasukhādyuparāgarūapaṃ vā 
galvarkamaṇeriva avimṛṣṭaṃ jātucit bhavati, tena ananyonmukhatātmanā 
ānandarūpeṇa ahamiticamatkārātmanā mahānīśvaraḥ, yato devasya ete 
eva jñānakriye śuddhe pāramārthikyau yo'yaṃ vimarśo nāma 
uktanyāyāt iti

	svabhāvamavabhāsasya.......................... | (1|5|11)

ityatra antare | syādetat | bhavatu nāma prakṛtau saṃvedanalakṣaṇaḥ 
prakāśaḥ, pratyaye tu kvipi bhāva eva abhidheyo, natu vimarśaḥ, tat 
kathamuktam prakṛtipratyayābhyām iti | evaṃ manyatedhātunā tāvat 
saṃvedanaṃ jñānalakṣaṇamuktaṃ, ghañādayastu kriyāyāmeva 
vidhīyante, sā tu kriyā dharmāntareṇa siddhatākhyena bheditaiva 
bhāvapratyayavācyā siddhatāpratyavamarśayogyataiva- ayaṃ pākaḥ iti | 
atra kevalaṃ pratyavamarśo bhavan na pākakriyāsvātmarūpaniveśī 
pramātustathāpratyavamarśodayāt, saṃvedane tu prakāśavapuṣi 
pratyavamṛśyatā bhavantī na anyāpekṣayā yuktā,- iti 
saṃvedanatādātmyavṛtti yat pratyavamṛśyamānatvaṃ, tadeva 
siddhatārūpapratyavamarśasvabhāve [rūpaṃ pratya ga. |] 
svātantryeviśrāmyatīti | ataśca saṃmelitau prakṛtipratyayau 
jñānakriyāvimarśalakṣaṇaṃ jaḍavailakṣaṇyāpādakaṃ [tmakaṃ kha. |] 
rūpaṃ yasyāstādṛśīṃ paripūrṇalakṣaṇāmabhivyaṅktaḥ | 
anusandhānātmanaḥ iti pramāsu svātantryaṃ darśitam | asya iti 
paramātmanaḥ | nanu evaṃ cit 

(page 436)

ityatra yadi jñānakriye praviṣṭe, tarhi jñānamityatrāpi 
prakṛtipratyayasadbhāvāt te praviṣṭe eva, tat kiṃ punaḥ kriyā iti 
adhikamabhidhīyate | atra ucyate jñānamityapi iti | satyamevamekākini api 
atra śabde iti apiśabdaḥ | ucyate iti prakṛtipratyayabhāgadvayena | 
prādhānyena iti yadyapi prakṛtipratyayau pratyayārthaṃ saha brūtaḥ iti, 
tathāpi tasya pratyayārthasya prakṛtyarthadharmatvena sphuraṇāt dharmasya 
dharmiṇamudrecayataḥ eva dharmatvāt dharmiṇi pratyayalakṣaṇe 
bodhabhāge sa dharmaḥ prādhānyamunmajjayati kriyeti | apica iti caḥ 
samuccaye | yatrāpi bodhabhāgābhidhāyakaṃ bhāgāntaraṃ nāsti, tatrāpi 
evamiti apiśabdaḥ | ata eva pūrvatra ucyate iti uktam, iha tu ākṣipta iti | 
ākṣepahetumāha anavabodhasya iti | etadevaca yuktamiti darśayati vastu 
ekameva iti | nanu vimarśaḥ kasmāt māheśvaryam | āha āñjasyena iti | 
ananyāpekṣatā hi vimarśaḥ, saivaca svatantratā | nanu bodhasya vimarśo 
vyāpakaḥ svāmī, bodho hi vimarśaṃ na vyabhicarati na tyajati kadācit, 
tatastasya avyabhicaraṇe karmatāyāṃ vācyāyāṃ kathaṃ kartṛtā uktā,- 
ityāśaṅkya samavyāptikayoritthamabhidhāne'pi na doṣaḥ,- iti brūte 
bodhasya avyabhicaraṇīyo'pi vimarśaḥ sadā iti | bodhasya 
vimarśo'vyabhicaraṇīyaḥ, sa cāpi bodho'vyabhicaraṇīyaḥ sāmarthyāt 
vimarśasya, tasmādasya avyabhicāriṇo vimarśasya api kartṛtā na na yuktā | 
samavyāptikatve hetumāha avyabhicāravattvāt iti paraspareṇeti yāvat | 
evaṃ kartṛtāmupapādya hetūktiprasaṅgasmṛtena vyutpattyantareṇa yojayati 
tadāpi iti avyabhicāravattvaṃ yaduktaṃ, tato'pi 
hetormatvarthīyapratyayopapatteryujyate eva itthamabhidhānam |

(page 437)

nanu ātmamātravimarśo'sāvahamiti, tatra bhāvanirbharatā na vimṛṣṭaiva | 
naivamityāha tadāca iti | nanu asanto'pi icchayā unmiṣeyurityāśaṅkya 
āha iṣyamāṇa iti | nabhavane heturnirviṣayatvameva | 
avaśyaṃbhāvikarmaparigrahā kriyā tatkarmābhāve na bhavati jīvanamiva 
prāṇābhāve, tathāca iṣikriyeti svabhāvaviruddhopalabdhiḥ | nanu evaṃ 
bhāvābhāsānavasthitānapekṣamāṇo vimarśaḥ kathaṃ śuddhaḥ | 
itthamiti ucyate evaṃca iti | anena prakāreṇa ahamitirūpeṇa yat 
bhāvānāmavasthānaṃ tat nityaṃ paramātmano na bhinnaṃ, tadevaca 
ahamitirūpamiti na asya aśuddhiḥ kācit | nahi vyatiriktaṃ tadā 
kiñcidapekṣitavyamasti | atha śuddhagrahaṇasya vyāvartyaṃ 
vyākhyātumupakramate saiva iti | suddhimaśuddhiṃ ca vibhajati 
śuddhatve'pi iti aśuddhihetutvāt iti ca | āropitametadaśuddhatvaṃ, na 
svābhāvikamahantaikāntaviśrānteḥ [ahantvaikārtha kha. |] | 
evamahantāyāḥ śuddhāśuddhatvaṃ vyākhyāya, aśuddhatvaṃ 
vyācaṣṭe saiva iti | na asāvahantā anyā, apitu svaśaktivaicitryāt saiva anena 
rūpāntareṇa bhāti tattvabhuvanabhāvabhūtaprabhṛtiṣu avabhāsabhāgeṣu 
| ābhāsabhedeṣu tāvat vastuto'sāvahantā vyāpakatvena anuprāṇakatvena 
tāvadābhāsāntarbhāvanena avatiṣṭhate | tat tathābhūtaṃ yadahantayā 
avasthānaṃ tat yadā idantāvamarśayogyatayā teṣāmābhāsane 
māyāśaktikṛtayā tirohitaṃ, tadā sā ahantādaśā saṃsāriṇāmucitā 
yogyā; tasyāṃ daśāyāmahaṃvimarśanaṃ yat, tadaśuddhamuktamiti 
dūreṇa sambandhaḥ | ahaṃvimarśanasya svarūpaṃ darśayati 
prakāśarūpaṃ, kriyārūpaṃ ca bhavadapi tathā śaktirūpatvāt 

(page 438)

pracyutaṃ, tato jñānaṃ sattvavyapadeśyaṃ kriyā rajovyapadeśyā tatra ca 
madhye niyāmakaṃ tamaḥ praviṣṭaṃ; tena 
guṇatrayamayamahamitivimarśanaṃ jātaṃ svarūpapracyutau hetuḥ | 
bhinnamidaṃbhāgāvasthitaṃ yat buddhiprāṇādi, taccharīratayā 
taddharmatayā tadahaṃvimarśanamutpannam, tata utpattihetoḥ 
pracyutasvarūpaṃ tat | tathotpattirasya kutaḥ | āha-bhinnaṃ 
grāhyamapekṣamāṇaṃ tato grāhyāt bhinnaṃ yat grāhakamātraṃ sa eva 
bhāgāṃśastamavagāhate yataḥ, tasmādevamutpannam | evaṃbhūtasya 
ahaṃvimarśasya ākāraṃ darśayati ahamayam ityādinā karomi ca 
ityantena | nanu atra grāhyagrāhakayoḥ kathaṃ bhinnatā | āha 
vaiyadhikaraṇyena iti | nanu puruṣasya sattvarajovṛttirūpe jñānakriye 
buddhitattvagate ahamiti vyavahriyete,- iti kāpilā manyante, tvayā kā 
iyamapūrvā prakriyā utthāpitā | na apūrvā kācit | nahi puruṣo nāma 
anyaḥ, apitu aiśvaryasya nijasya yadapratyabhijñānaṃ, tadeva prakṛtaṃ 
rūpaṃ yasya saṅkucitasaṃvillakṣaṇasya, sa puruṣaḥ | tatsambandhinyau ye 
jñānakriye, tatsvabhāvaṃ tadahaṃvimarśanam | etacca 

	sa svarūpāparijñānamayo'nekaḥ pumān......... | (4|1|3)

ityasmin prakaraṇe vitaniṣyate | anūditam iti vṛttau | anuvadanaṃ ca atra 
bhittikalpatvena, natu yatra yatra dhūmaḥ ityanena nyāyena | evaṃhi sati 
dhūmavattvaṃ yathā agnimattvasya vidheyasya vyāpakaṃ, tathā 
ahaṃvimarśanamapi śuddhavyāmiśrāśuddhānāṃ daśānāṃ syāt, 
bhittikalpatayā tu yat pūrvasiddhatvena yadanuvadanam, tadanuvadanīyasya 
vyāpakatāmācaṣṭe | etadarthadyotakaśca evakāro'gnimāneva 
dhūmavāniti yathā | nanu trividhaṃ sadahaṃvimarśanamuktaṃ

(page 439)

śuddhādibhedena, tatra āgamasiddhaṃ paravyāmiśrāparalakṣaṇaṃ 
daśāntaratritayaṃ kiṃ tyaktameva | na tyaktaṃ, saṅgṛhītameva,- ityāha 
etā evaca iti | vakṣyante iti 

	atrāparatvaṃ bhāvānām........................ | (3|1|5)

iti sūtreṇa || 11 ||

iti śrīmahāmāheśvaraśrīmadācāryābhinavaguptapādaviracitā-
yāmīśvarapratyabhijñāvivṛtivimarśinyāṃ 
śaktivargaikāśrayagatamāheśvaryavimarśo'ṣṭamaḥ || 8 ||

samāptaśca ayaṃ jñānādhikāraḥ prathamaḥ ||



###########   END OF FILE  #######